ဂီနီနိုင်ငံတွင် ဝိညာဉ်ရေးဘဏ္ဍာများကို ရှာတွေ့ခြင်း
ဂီနီနိုင်ငံတွင် ဝိညာဉ်ရေးဘဏ္ဍာများကို ရှာတွေ့ခြင်း
ရာစုနှစ်များတစ်လျှောက် နယ်သစ်ရှာဖွေသူများသည် ဥစ္စာဘဏ္ဍာရရှိဖို့နှင့် ကြီးပွားချမ်းသာဖို့အတွက် အသက်ကိုရင်းပြီး ကြိုးစားရှာဖွေခဲ့ကြသည်။ အနောက်အာဖရိကရှိ ဂီနီနိုင်ငံသို့ရောက်ရှိလာသော ထိုစွန့်စားရဲသူတို့သည် မြေကြီးဘဏ္ဍာနှင့် ဝိညာဉ်ရေးဘဏ္ဍာနှစ်မျိုးစလုံးကို တွေ့ရှိခဲ့ကြသည်။ စိန်၊ ရွှေ၊ သံရိုင်းနှင့် အရည်အသွေးကောင်းသောဘောက်ဆိုက်သတ္တု (၎င်းမှ အလူမီနီယံ ကို ရရှိသည်) များပေါကြွယ်ဝသည့် ဤနိုင်ငံသည် ကိုးသန်းကျော်သောဂီနီနိုင်ငံသားတို့ နေထိုင်ရာဒေသဖြစ်သည်။
ဤနိုင်ငံတွင် ခရစ်ယာန်ဘောင်ဘာသာစိုးမိုးမှုမရှိသော်လည်း ဝတ်ပြုရေးကို အလေးထားပြီး များစွာသောသူတို့သည် ဝိညာဉ်ရေးဘဏ္ဍာကို အလွန်တန်ဖိုးထားကြသည်။ ဝိညာဉ်ရေးဘဏ္ဍာဟုဆိုရာတွင် မည်သည့်အရာကို အတိအကျဆိုလိုသနည်း။ ယင်းတို့မှာ ဟဂ္ဂဲ ၂:၇ တွင် “လူမျိုးအပေါင်းတို့ နှစ်သက်ဖွယ်သောအရာ” အဖြစ် ဖော်ပြထားသော ယေဟောဝါ၏ တည်ကြည်သောကျေးကျွန်များကို ဆိုလိုသည်။
ဝိညာဉ်ရေးဘဏ္ဍာ
မြေကြီးအောက် နက်လှစွာသောနေရာရှိဘဏ္ဍာများကို တူးဖော်ရာတွင် လွန်စွာကြိုးစားအားထုတ်မှု လိုအပ်သည်။ အလားတူပင်၊ ခရစ်ယာန်ဓမ္မအမှုတွင် ဝိညာဉ်ရေးဘဏ္ဍာများတွေ့ရှိနိုင်ရန် များစွာကြိုးစားအားထုတ်မှု လိုအပ်သည်။ ဂီနီနိုင်ငံတွင် ဘုရားသခင့်နိုင်ငံတော်ဟောပြောခြင်းလုပ်ငန်းကို ၁၉၅၀ ပြည့်လွန်နှစ်များအစောပိုင်း၌ နိုင်ငံအတွင်းပိုင်းဒေသများတွင် စတင်လုပ်ဆောင်ခဲ့သော်လည်း ၁၉၆၀ ပြည့်လွန်နှစ်များအစောပိုင်းအထိ မြို့တော် ကိုနာကရီသို့ မရောက်နိုင်ခဲ့ချေ။ ယခုအခါ နိုင်ငံတစ်ဝန်းတွင် အသင်းတော်ပေါင်း ၂၁ ခုနှင့်အုပ်စုတို့တွင် ယေဟောဝါသက်သေ ၉၀၀ ခန့်ရှိနေပြီ။
၁၉၈၇ ခုနှစ်တွင် ခရစ်ယာန်သာသနာပြုများရောက်ရှိလာပြီး ကိုနာကရီမြို့ရှိ တစ်ခုတည်းသောအသင်းတော်နှင့် ပူးပေါင်းလုပ်ဆောင်ခဲ့ကြသည်။ ယခုအခါ မြို့တော်နှင့် နိုင်ငံအတွင်းရှိဒေသများတွင် ခရစ်ယာန်သာသနာပြုအယောက် ၂၀ ကျော်ရှိနေပြီ။ သူတို့သည် အသင်းတော်များကို စိတ်အားထက်သန်စွာအားပေးတည်ဆောက်ကြပြီး ဓမ္မအမှုတွင် ဒေသခံညီအစ်ကိုများနှင့်အတူ လုပ်ဆောင်ကြသည်။
ကိုနာကရီမြို့တွင်နေထိုင်သူ လုခ်သည် လူငယ်ဆရာဝန်တစ်ဦးဖြစ်သူ အယ်လ်ဘတ်နှင့် ကျမ်းစာသင်အံမှုကျင်းပရသည်ကို နှစ်သက်ခဲ့သည်။ အယ်လ်ဘတ်သည် ချာ့ခ်ျအသီးသီးတွင် ဘာသာရေးအမှန်တရားကို ရှာဖွေခဲ့သူဖြစ်သည့်ပြင် နတ်ဝိဇ္ဇာဆိုင်ရာအကျင့်များတွင် ပါဝင်ခဲ့သူလည်းဖြစ်သည်။ နတ်ဝင်သည်တစ်ဦးက သူ့ကိုလာဘ်ကောင်းစေမည်ဟု အာမခံချက်အဖြစ်ပေးထားသည့် လက်စွပ်တစ်ကွင်းကို ဝတ်ဆင်ခဲ့သည်။ စစ်မှန်သောဘာသာတရားကို ရှာဖွေရာ၌ များစွာစိတ်ပျက်ခဲ့ပြီးနောက် အယ်လ်ဘတ်သည် မိမိလက်စွပ်ကို လွှင့်ပစ်ကာ ဤသို့ဆုတောင်းသည်– “ဘုရားသခင်၊ ကိုယ်တော်အမှန်တကယ်ရှိမယ်ဆိုရင် ကိုယ်တော်ကိုသိနိုင်ဖို့နဲ့ ကိုယ်တော့်အမှုတော်ကို ထမ်းဆောင်နိုင်ဖို့ ဖြစ်စေတော်မူပါ။ ဒါမှမဟုတ်ရင် ကျွန်တော့်အလိုအတိုင်းပဲ အသက်ရှင်မိတော့မယ်။” ထိုသို့ဆုတောင်းပြီး မကြာမီတွင် အယ်လ်ဘတ်သည် သူ့အစ်မအိမ်သို့ အလည်အပတ်သွားစဉ် သူ့တူမနှင့်အတူ ကျမ်းစာသင်အံမှုကျင်းပနေသော ယေဟောဝါသက်သေတစ်ဦးပြောသည့်စကားများကို အမှတ်တမဲ့ကြားလိုက်သည်။ မကြာမီ အယ်လ်ဘတ်သည် လုခ်နှင့်ကျမ်းစာသင်ရန် အစီအစဉ်ပြုလုပ်ခဲ့သည်။
လုခ်သည် ကျမ်းစာသင်ပေးရန် သုံးမိုင်ကျော်သောလမ်းခရီးကို ပတ်တိုင်းလမ်းလျှောက်သွားရသော်လည်း ပျော်ရွှင်ခဲ့သည်။ လုခ်သည် ကျောင်းပညာရေးအနည်းငယ်သာရှိသော်လည်း ကျမ်းစာအပေါ် သူ၏ကျန်းခံ့သောယုံကြည်ချက်နှင့် ကျမ်းစာအသိပညာများကို တက္ကသိုလ်ဘွဲ့ရဖြစ်သူ အယ်လ်ဘတ်တွေ့မြင်သောအခါ လွန်စွာအထင်ကြီးလေးစားသွားသည်။ လူသားများကြုံတွေ့ခံစားနေရသော ဆင်းရဲခက်ခဲမှုများသည် ဘုရားသခင်ကြောင့်မဟုတ်ကြောင်း၊ ယင်းအစား ဆင်းရဲခက်ခဲမှုအားလုံးကို အဆုံးသတ်ပြီး ဤကမ္ဘာမြေကို ပရဒိသုဖြစ်စေရန် ကိုယ်တော်ရည်ရွယ်ထားကြောင်း အယ်လ်ဘတ်သိလိုက်ရသောအခါ လွန်စွာဝမ်းသာခဲ့သည်။ (ဆာလံ ၃၇:၉-၁၁) ကျမ်းစာအမှန်တရားအပြင် အသင်းသားများတင်ပြသည့် ကောင်းသောအမူအကျင့်က သူ့နှလုံးကိုထိမိစေခဲ့သည်။
သို့ရာတွင် စိန်ရိုင်းတစ်ခုကို အရောင်တဖျပ်ဖျပ်ထွက်လာအောင် ကျွမ်းကျင်သောလက်မှုပညာသည်တစ်ဦးက အသေအချာ၊ ဂရုတစိုက်သွေးရသကဲ့သို့ အယ်လ်ဘတ်သည်လည်း သူ့ဘဝကို ဘုရားသခင်၏ဖြောင့်မတ်သောစံနှုန်းများနှင့် ကိုက်ညီစေရန် လောကအတွေးအခေါ်များ၊ သဘောထားများကို ဖယ်ရှားဖို့လိုအပ်လာခဲ့သည်။ သူသည် နတ်ဝင်သည်များနှင့် တိုင်ပင်ခြင်းမပြုတော့သည့်အပြင် အရက်ယမကာကို တလွဲမသုံးတော့ဘဲ လောင်းကစားခြင်းကိုလည်း ဆက်မလုပ်တော့ချေ။ ဆေးလိပ်ဖြတ်ရန် ပိုခက်သည်ဟု အယ်လ်ဘတ်ဆိုသည်။ အကူအညီအတွက် ယေဟောဝါထံ ထက်သန်စွာဆုတောင်းပြီး နောက်ဆုံးအောင်မြင်ခဲ့သည်။ ခြောက်လကြာပြီးနောက် သူ၏အိမ်ထောင်ရေးကို တရားဝင်ဖြစ်စေခဲ့ပြီး သူ့ဇနီးလည်း ကျမ်းစာစတင်လေ့လာတော့သည်။ ယခုအခါ သူတို့နှစ်ဦးစလုံးသည် နှစ်ခြင်းခံပြီးသော ယေဟောဝါ၏ကျေးကျွန်ဖြစ်နေပြီ။
မာတင်သည် နောက်ထပ်ဝိညာဉ်ရေးစိန်တစ်လုံးဖြစ်သည်။ သူသည် အသက် ၁၅ နှစ်အရွယ်တွင် ဂီကာဒူးမြို့၌ ကျမ်းစာစလေ့လာခဲ့သည်။ သူ၏ကက်သလစ်ဘာသာဝင်မိဘတို့သည် ယေဟောဝါသက်သေတို့၏အစည်းအဝေးများ သူတက်ရောက်သည်ကို ကန့်ကွက်ခဲ့ကြသည်။ မာတင်၏ ကျမ်းစာစာပေများကို သူတို့ဖျက်ဆီးပြီး သူ့ကို ရိုက်နှက်ကာ မိသားစုအသိုင်းအဝိုင်းမှလည်း နှင်ထုတ်ခဲ့သည်။ ကာဗွန်ဒြပ်စင်အပေါ်သို့ အလွန်ကြီးမားသော ဖိအားသက်ရောက်လာသောအခါ စိန်တစ်လုံးဖြစ်လာသကဲ့သို့ ဆန့်ကျင်မှုကြောင့် ကျမ်းစာအမှန်တရားအပေါ်ထားရှိသည့် မာတင်၏မေတ္တာသည်လည်း ပို၍ကြီးထွားသန်မာလာခဲ့သည်။ အချိန်ကြာလာသောအခါ သူ့မိဘ၏စိတ်သဘောထား ပျော့ပျောင်းလာသောကြောင့် သူသည် အိမ်ကို ပြန်လာခဲ့သည်။ သူ့မိဘ၏စိတ်နှလုံးကို ပြောင်းလဲအောင် အဘယ်အရာကဖြစ်စေခဲ့သနည်း။ ပုန်ကန်လိုစိတ်ရှိပြီး လိင်အကျင့်ယိုယွင်းမှုတွင် ပါဝင်ခဲ့ကြသော သူ့မောင်နှမတို့၏အမူအကျင့်နှင့် မာတင်၏အမူအကျင့်သည် သိသိသာသာကွာခြားသည်ကို သတိထားမိခဲ့ကြသောကြောင့်ဖြစ်သည်။ မာတင်လက်ခံသည့် ဤအသစ်သောယုံကြည်ခြင်းက သူ့အားလူကောင်းဖြစ်စေသည်ကို ယုံကြည်စိတ်ချလျက် ဖခင်ဖြစ်သူသည် အသင်းသားများကို အိမ်သို့ ဖိတ်ခေါ်ခဲ့သည်။ မာတင်၏မိခင်သည် သူ့သားအပေါ် ညီအစ်ကိုများ၏ အကူအညီပေးခဲ့ရာအားလုံးအတွက် အဖန်ဖန်ကျေးဇူးတင်ခဲ့သည်။ အသက် ၁၈ နှစ်အရွယ်တွင် နှစ်ခြင်းခံခဲ့သောမာတင်သည် နောက်ပိုင်းတွင် ဓမ္မအမှုသင်တန်းကျောင်းတက်သည့်ပြင် ယခုအခါ အထူးရှေ့ဆောင်ဓမ္မအမှုဆောင်တစ်ဦးအဖြစ် အမှုထမ်းဆောင်နေသည်။
ဝိညာဉ်ရေးဘဏ္ဍာများကို တင်သွင်းခဲ့
ဂီနီနိုင်ငံသည် နိုင်ငံ၏တွင်းထွက်ပစ္စည်းများစွာကို တိုင်းတစ်ပါးသို့ တင်ပို့ရောင်းချနေစဉ် အချို့သော ဝိညာဉ်ရေးဘဏ္ဍာများကိုမူ နိုင်ငံအတွင်းသို့ “တင်သွင်း” ခဲ့သည်။ အခြားအာဖရိကနိုင်ငံများမှ လူအတော်များများသည် စီးပွားရေးလုပ်ငန်းများအတွက် ဤနိုင်ငံသို့ပြောင်းရွှေ့လာခဲ့ကြသည်။ အခြားသူတို့မှာမူ ကြာရှည်ဖြစ်ပွားနေသော ရက်စက်သည့်စစ်ပွဲများမှ လွတ်မြောက်ရန် ပြောင်းရွှေ့လာကြခြင်းဖြစ်သည်။
ကင်မရွန်းနိုင်ငံမှ အာနက်စတင်းသည် လွန်ခဲ့သော ၁၂ နှစ်က ဂီနီနိုင်ငံသို့ ရောက်လာခဲ့သူဖြစ်သည်။ သူသည် နှစ်ပေါင်းများစွာ ယေဟောဝါသက်သေများနှင့် ကျမ်းစာလေ့လာပြီး အစည်းအဝေးများကို တက်ရောက်သော်လည်း နှစ်ခြင်းမခံဖြစ်ခဲ့ပေ။ ၂၀၀၃ ခုနှစ်၊ ယေဟောဝါသက်သေများ၏ တိုက်နယ်စည်းဝေးပွဲတစ်ခုတွင် နှစ်ခြင်းခံသူတို့ကို သူကြည့်နေစဉ် မျက်ရည်ဝဲလာသည်။ မိမိ၌ အပြစ်ရှိသည်ဟူသောခံစားချက်ကို တိုက်ထုတ်ပြီးနောက် ယေဟောဝါထံဤသို့ဆုတောင်းသည်– “ကျွန်မ အခု ၅၁ နှစ်ရှိပြီ။ ကိုယ်တော်အတွက် ကောင်းတဲ့အရာတစ်ခုမှ ကျွန်မ,မလုပ်ပေးခဲ့ဘူး။ ကိုယ်တော့်အမှုတော်ကို ကျွန်မထမ်းဆောင်ချင်တယ်။” ထို့နောက် အာနက်စတင်းသည် သူ၏နှိမ့်ချသောဆုတောင်းချက်နှင့်အညီ ပြုမူခဲ့သည်။ သူနှင့်အတူနေထိုင်လာခဲ့သည့် အမျိုးသားအား တရားဝင်လက်ထပ်မှသာ ဆက်ပေါင်းနိုင်တော့မည်ဖြစ်ကြောင်း ရှင်းပြခဲ့သည်။ ထိုသူသဘောတူခဲ့သည်။ ၂၀၀၄ ခုနှစ်၊ နိုဝင်ဘာလတွင် ကိုယ်တိုင်နှစ်ခြင်းခံသောအခါ ဝမ်းသာမျက်ရည်ကျခဲ့သည်။
ဂီနီနိုင်ငံသည် ၁၉၉၀ ပြည့်လွန်နှစ်များအစောပိုင်းကတည်းက လိုင်ဘေးရီးယားနှင့် စီအဲရာလေယွန်နိုင်ငံတို့မှ ရာနှင့်ချီသောယေဟောဝါသက်သေများအပါအဝင် ထောင်နှင့်ချီသောဒုက္ခသည်များကို လက်ခံခဲ့သည်။ ညီအစ်ကိုတို့သည် ဒုက္ခသည်စခန်းတစ်ခုသို့ ရောက်သည်နှင့်မကြာမီတွင် မှန်မှန်အစည်းအဝေးများကျင်းပရန်နှင့် ဟောပြောခြင်းလုပ်ငန်းအတွက် အစီအစဉ်များဆွဲကြပြီး ဘုရားသခင်နိုင်ငံတော်ခန်းမတစ်ဆောင်လည်း ဆောက်ခဲ့ကြသည်။ အချို့သူတို့သည် ဒုက္ခသည်စခန်းထဲတွင်ပင် ယေဟောဝါ၏ကျေးကျွန်များဖြစ်လာကြသည်။ အိုင်ဇက်သည် ထိုသူတို့ထဲမှ တစ်ဦးဖြစ်သည်။ သူနှစ်ခြင်းခံပြီးနောက် ယခင်က သူအလုပ်လုပ်သည့်လိုင်ဘေးရီးယားရှိ ကုမ္ပဏီကြီးတစ်ခုတွင် ပြန်အလုပ်လုပ်ဖို့ အခွင့်အရေးပေါ်လာခဲ့သည်။ သို့သော် လီနာစခန်းတွင် မှန်မှန်ရှေ့ဆောင်တစ်ဦးအဖြစ်ဆက်နေဖို့ သူရွေးချယ်လိုက်သည်။ သူဤသို့ရှင်းပြသည်– “စည်းဝေးတက်ဖို့၊ စည်းဝေးပွဲတက်ဖို့အတွက် အလုပ်ရှင်ဆီမှာ အခုဆိုရင် ခွင့်တောင်းဖို့မလိုတော့ဘူး။ ကျွန်တော် ယေဟောဝါအမှုတော်ကို လွတ်လွတ်လပ်လပ်ထမ်းဆောင်နိုင်တယ်။” ဤဝေးလံသောစခန်းတွင် ဒုက္ခသည် ၃၀,၀၀၀ ရှိသည့်အနက် ယေဟောဝါသက်သေ ၁၅၀ အတွက် ခရိုင်စည်းဝေးကြီးတစ်ခုကို ၂၀၀၃ ခုနှစ်၊ ဒီဇင်ဘာလတွင် ကျင်းပပေးခဲ့သည်။ ဝမ်းသာစရာမှာ၊ လက်ဟန်ပြဘာသာစကားအစီအစဉ်တွင် ပါဝင်ကြသော နားမကြားသူ ၉ ယောက်အပါအဝင် ၅၉၁ ယောက် တက်ရောက်ခဲ့ကြသည်။ တစ်ဆယ့်နှစ်ယောက် နှစ်ခြင်းခံကြသည်။ မိမိတို့အတွက် ဝိညာဉ်ရေးခဲဖွယ်စားဖွယ်ကြီးကို ကြိုးစားစီစဉ်ပေးသည့်အတွက် ညီအစ်ကိုများ အလွန်ကျေးဇူးတင်လေးမြတ်ခဲ့ကြသည်။
“နှစ်သက်ဖွယ်သောအရာများ” က လိုအပ်သောပြောင်းလဲမှုများကို ပြုလုပ်ကြ
ရွှေနှင့်စိန်များ ရှာဖွေသူတို့အတွက် မကျော်ဖြတ်နိုင်လောက်အောင်ကြီးမားသည့် အတားအဆီး မရှိပုံပေါ်သည်။ သို့သော် ယေဟောဝါအမှုတော်ထမ်းဆောင်နိုင်ရန် အတားအဆီးအားလုံးကိုကျော်လွှားဖို့ လူသစ်များ၏ကြိုးစားအားထုတ်မှုများကို မြင်ရသည်မှာ စိတ်ကြည်နူးစရာကောင်းလှသည်။ ဇိုင်နပ်၏အဖြစ်ကို သုံးသပ်ကြည့်ပါ။
ဇိုင်နပ်သည် အသက် ၁၃ နှစ်အရွယ်တွင် ကျွန်အဖြစ်ရောင်းစားခံခဲ့ရသည်။ အနောက်အာဖရိကနိုင်ငံတစ်နိုင်ငံရှိ သူ၏နေအိမ်မှ ဂီနီနိုင်ငံသို့ အပို့ခံလိုက်ရသည်။ အသက် ၂၀ အရွယ်တွင် ကျမ်းစာသတင်းတရားကို ကြားသိလာခဲ့သည်။ သူသင်ယူခဲ့ရာများကို လက်တွေ့ကျင့်သုံးရန် စိတ်အားထက်သန်ခဲ့သည်။
ခရစ်ယာန်အစည်းအဝေးများတက်ရောက်ကာ ဝတ်ပြုကိုးကွယ်ဖို့ ဇိုင်နပ်အတွက် ခက်ခဲ၏။ သို့သော် အစည်းအဝေးများကို သူအလွန်တန်ဖိုးထားသောကြောင့် အစည်းအဝေးအားလုံး မပျက်မကွက်တက်ရောက်ရန် ဆုံးဖြတ်ခဲ့သည်။ (ဟေဗြဲ ၁၀:၂၄၊ ၂၅) အစည်းအဝေးသို့ စာအုပ်များယူသွားနိုင်ဖို့ အစည်းအဝေးသွားရာလမ်းတွင် ယင်းတို့ကို ဝှက်ထားရသည်။ သူသည် ထိုဝိညာဉ်ရေးအစည်းအဝေးများ တက်ရောက်သည့်အတွက် သခင်ဖြစ်သူတို့၏ ဆိုးဆိုးရွားရွားရိုက်နှက်ခြင်းကို မကြာခဏခံခဲ့ရသည်။
နောက်ပိုင်း အခြေအနေများပြောင်းသွားပြီး ဇိုင်နပ်လည်း ကျွန်ဘဝမှ လွတ်မြောက်လာခဲ့သည်။ ဝိညာဉ်ရေးတွင် အလျင်အမြန်တိုးတက်စေသည့် အစည်းအဝေးအားလုံးကို ချက်ချင်းတက်တော့သည်။ သူသည် ခရစ်ယာန်လမ်းညွှန်ချက်ရရှိဖို့ အစည်းအဝေးတက်ရောက်ခြင်းကို အတားအဆီးဖြစ်စေသော လစာကောင်းသည့်အလုပ်ကို ငြင်းပယ်ခဲ့သည်။ သီအိုကရက်တစ်ဓမ္မအမှုကျောင်းတွင် စာရင်းသွင်း၍ နှစ်ခြင်းမခံသေးသော ဘုရားသခင့်နိုင်ငံတော်ကြေညာသူတစ်ဦးဖြစ်လာပြီးနောက် ယေဟောဝါထံ မိမိ၏အပ်နှံမှုကို ရေတွင်နှစ်ခြင်းခံခြင်းဖြင့် တင်ပြခဲ့သည်။ နှစ်ခြင်းခံပြီးသည်နှင့် အရန်ရှေ့ဆောင်ဓမ္မအမှုဆောင်တစ်ဦးဖြစ်ရန် စီစဉ်တော့သည်။ နောက်ခြောက်လအကြာတွင် မှန်မှန်ရှေ့ဆောင်ဓမ္မအမှုဆောင်တစ်ဦးအဖြစ် အမှုထမ်းဆောင်ခဲ့သည်။
အစည်းအဝေးတချို့ကို တက်ရောက်ပြီးနောက် စိတ်ဝင်စားသူတစ်ဦးက ဤသို့ပြော၏– “ကျွန်တော်ဒီမှာရှိနေတဲ့အချိန်မှာ ဆင်းရဲတယ်လို့ မခံစားမိဘူး။” လူအများသည် ဂီနီနိုင်ငံ၏မြေကြီးဘဏ္ဍာကိုသာ စိတ်ဝင်စားနေချိန်တွင် ယေဟောဝါကိုချစ်မြတ်နိုးသူတို့မှာမူ ဝိညာဉ်ရေးဘဏ္ဍာများကို စိတ်အားထက်သန်စွာ ရှာဖွေနေကြသည်။ မှန်ပါသည်၊ ‘လူမျိုးအပေါင်းတို့ နှစ်သက်ဖွယ်သောအရာများ’ သည် ယခုအခါ ယေဟောဝါ၏ စင်ကြယ်သောဝတ်ပြုရေးသို့ ရောက်လာကြသည်!
[စာမျက်နှာ ၈ ပါ လေးထောင့်ကွက်]
ဂီနီနိုင်ငံ – ၂၀၀၅
အများဆုံးသက်သေခံအရေအတွက်– ၈၈၃
ကျမ်းစာသင်အံမှု– ၁,၇၁၀
သတိရအောက်မေ့ပွဲတက်ရောက်သူ– ၃,၂၅၅
[စာမျက်နှာ ၈ ပါ မြေပုံ]
(ကားချပ်အပြည့်အစုံကို စာစောင်တွင်ကြည့်ပါ)
ဂီနီ
ကိုနာကရီ
စီအဲရာ လေယွန်
လိုင်ဘေးရီးယား
[စာမျက်နှာ ၉ ပါ ရုပ်ပုံ]
အယ်လ်ဘတ်နှင့် လုခ်
[စာမျက်နှာ ၉ ပါ ရုပ်ပုံ]
ကိုနာကရီမြို့ရှိ ဘုရားသခင်နိုင်ငံတော်ခန်းမ
[စာမျက်နှာ ၁၀ ပါ ရုပ်ပုံ]
အာနက်စတင်း
[စာမျက်နှာ ၁၀ ပါ ရုပ်ပုံ]
မာတင်
[စာမျက်နှာ ၁၀ ပါ ရုပ်ပုံ]
ဇိုင်နပ်
[Picture Credit Line on page 8]
USAID