ကမ္ဘာတစ်ဝန်းမှလူတို့ အကျိုးခံစားရသော သင်တန်းကျောင်း
ကမ္ဘာတစ်ဝန်းမှလူတို့ အကျိုးခံစားရသော သင်တန်းကျောင်း
နိုင်ငံပေါင်း ၂၀၀ ကျော်ရှိ ယေဟောဝါသက်သေတို့၏အသင်းတော်ပေါင်း ၉၈,၀၀၀ ကျော်မှ လူမျိုးပေါင်းစုံတို့သည် ဘုရားသခင်၏သွန်သင်မှုကို ခံယူလျက်ရှိကြသည်။ အဓိကပြဋ္ဌာန်းစာအုပ်မှာ သမ္မာကျမ်းစာဖြစ်ပြီး ဤပညာရေး၏ရည်ရွယ်ချက်မှာ အဘယ်အရာသည် ဘုရားသခင့်အလိုတော်ဖြစ်ပြီး ယင်းအလိုတော်နှင့်အညီ မည်သို့အသက်ရှင်နေထိုင်ရမည်ကို သင်ယူခြင်းဖြင့် တစ်ဦးချင်းစီကို ဝိညာဉ်ရေးတွင် တိုးတက်စေဖို့ ကူညီပေးရန်ဖြစ်သည်။ ဤပညာရေးကို လက်ခံသင်ယူသူတို့သည် များစွာအကျိုးခံစားကြရသည်။ တပည့်ဖြစ်စေပါဟူသော ယေရှုခရစ်၏ညွှန်ကြားချက်နှင့်အညီ သူတို့သင်ယူရာများကို အခြားသူတို့အားလည်း ပြန်ဝေမျှကြသည်။—မဿဲ ၂၈:၁၉၊ ၂၀။
ယေဟောဝါသက်သေတို့၏အသင်းတော်များတွင် သွန်သင်ခြင်းအစီအစဉ်အမြဲရှိသည့်အပြင် အထူးသင်တန်းကျောင်းများစွာကိုလည်း တည်ထောင်ခဲ့ကြသည်။ ယင်းတို့ထဲမှ တစ်ခုမှာ ဓမ္မအမှုသင်တန်းကျောင်းဖြစ်သည်။ ယင်းကျောင်းကို အမေရိကန်ပြည်ထောင်စု၊ ပဲင်စီလ်ဘေးနီးယားပြည်နယ်၊ ပစ္စဘတ်မြို့တွင် ၁၉၈၇ ခုနှစ်၊ အောက်တိုဘာလတွင် ပထမဆုံးကျင်းပခဲ့သည်။ ပထမဆုံးသင်တန်းကို အင်္ဂလိပ်စကားပြောသင်တန်းသား ၂၄ ဦးဖြင့် ဖွဲ့စည်းထားသည်။ ထိုအချိန်မှစ၍ သင်တန်းကျောင်းများကို ဘာသာစကားပေါင်း ၂၁ ဘာသာဖြင့် ၄၃ နိုင်ငံတွင် ကျင်းပခဲ့သည်။ ယခုအချိန်တွင် နိုင်ငံပေါင်း ၉၀ ကျော်မှ တစ်ကိုယ်ရေအကြီးအကဲများနှင့် ဓမ္မအမှုထမ်းများ ပါဝင်စာရင်းသွင်းခဲ့ကြသည်။ ရှစ်ပတ်ကြာသင်တန်းပြီးဆုံးသောအခါ သင်တန်းဆင်းများသည် မိမိတို့နိုင်ငံတွင်ဖြစ်စေ၊ နိုင်ငံခြားတွင်ဖြစ်စေ လိုအပ်သည့်နေရာတွင် အမှုထမ်းရန် ခန့်အပ်ခံရကြသည်။ ၂၀၀၅ ခုနှစ်ကုန်ပိုင်းတွင် ၂၂,၀၀၀ ကျော်သောခရစ်ယာန်ဓမ္မအမှုဆောင်များသည် သင်တန်းကျောင်းကို တက်ရောက်အောင်မြင်ခဲ့ကြပြီ။ ဘုရားသခင့်နိုင်ငံတော်အကျိုးစီးပွားကို တိုးတက်စေရန်နှင့် အခြားသူများအကျိုးရရှိစေရန် သူတို့သည် နှိမ့်ချမှုရှိရှိကြိုးစားအားထုတ်ကြသောကြောင့် ကြွယ်ဝစွာကောင်းချီးခံစားခဲ့ကြသည်။—သု. ၁၀:၂၂; ၁ ပေတရု ၅:၅။
တက်ရောက်ရန် စီစဉ်ခြင်း
ဓမ္မအမှုသင်တန်းကျောင်းတက်ရောက်နိုင်ရန် သင်တန်းသားအများစုသည် မိမိတို့၏အချိန်ပိုင်းအလုပ် သို့မဟုတ် အချိန်ပြည့်လောကအလုပ်မှ ခွင့်ရရန်တောင်းခံဖို့ လိုအပ်လာသည်။ ယင်းသည် တစ်ခါတစ်ရံ စိန်ခေါ်ချက်ဖြစ်သည်။ သင်တန်းကျောင်းတက်ရောက်ရန် ဖိတ်ခေါ်ခံရသော ဟာဝိုင်ယီမှ ခရစ်ယာန်အမျိုးသားနှစ်ဦးသည် မိမိတို့၏ကျောင်းဆရာအလုပ်မှ ခွင့်ရရန်တောင်းခံဖို့ လိုအပ်ခဲ့သည်။ သူတို့သည် ယေဟောဝါကိုယုံကြည်လျက် သင်တန်းကျောင်းကို တက်ရောက်လိုသည့်အကြောင်းနှင့် ယင်းမှ မည်သို့အကျိုးခံစားရမည်ကို ရှင်းပြကာ သူတို့၏ခွင့်တောင်းခံလွှာကို တင်ပြခဲ့သည်။ နှစ်ဦးစလုံး ခွင့်ရရှိခဲ့ကြသည်။
အဖြစ်အပျက်အတော်များများတွင် အလုပ်မှခွင့်ရရှိရန်တောင်းဆိုသောသက်သေခံများသည် အလုပ်ပြန်လုပ်ခွင့်ရတော့မည်မဟုတ်ဟု အပြောခံခဲ့ကြရသည်။ မိမိတို့၏အလုပ်များ ဆုံးရှုံးသွားမည်ဖြစ်သည့်တိုင် ယေဟောဝါအဖွဲ့အစည်းမှလာသော လေ့ကျင့်မှုကိုလက်ခံဖို့ ရွေးချယ်ကြသည်။ ထိုသူတို့ထဲမှ အချို့မှာ သင်တန်းကျောင်းပြီးနောက် မိမိတို့၏ယခင်အလုပ်တွင် ပြန်အလုပ်လုပ်ရန် အလုပ်ရှင်များထံမှ ဖိတ်ခေါ်ချက်များကို နောက်ပိုင်းတွင် လက်ခံရရှိခဲ့ကြသည်။ သင်တန်းကျောင်းတက်ရောက်ရန် ဆုံးဖြတ်ချက်ချခြင်းကို ဤသို့အကျဉ်းချုံးဖော်ပြနိုင်သည်– အလုပ်ရှင်ကို ခွင့်တောင်းပါ၊ ယေဟောဝါအကူအညီပေးရန် ဆုတောင်းပါ၊ ကျန်အပိုင်းကို ကိုယ်တော့်ထံအပ်နှံထားပါ။—ဆာလံ ၃၇:၅။
“ယေဟောဝါ၏သွန်သင်တော်မူခြင်းခံရ”
ရှစ်ပတ်ကြာဤသင်တန်းကျောင်း၏ထူးခြားချက်မှာ သမ္မာကျမ်းစာကို အသေးစိတ်လေ့လာခြင်းဖြစ်သည်။ သင်တန်းသားများသည် ဘုရားသခင့်အလိုတော်ဆောင်ရန် ယေဟောဝါ၏လူမျိုးတော်အား ဖွဲ့စည်းထားပုံ၊ လယ်ကွင်းဓမ္မအမှုတွင်၊ အသင်းတော်အစည်းအဝေးများတွင်နှင့် စည်းဝေးပွဲများတွင် သမ္မာကျမ်းစာကို ပို၍ထိရောက်စွာအသုံးချနိုင်ပုံတို့ကို သင်ယူခဲ့ကြသည်။
ကျေးဇူးတင်လေးမြတ်စိတ်အပြည့်ရှိသော သင်တန်းဆင်းတစ်ဦးက သင်တန်းမတက်ရသေးသူတစ်ဦးအား ဤသို့စာရေးခဲ့သည်– “တကယ်ပါပဲဗျာ၊ ရရှိနိုင်တဲ့သင်တန်းကျောင်းပညာရေးအတွေ့အကြုံတွေထဲက အကောင်းဆုံးကို ခင်ဗျားတွေ့ကြုံရလိမ့်မယ်။ ‘ယေဟောဝါ၏သွန်သင်တော်မူခြင်းခံရ’ ဆိုတဲ့ သမ္မာကျမ်းစာဖော်ပြချက်ဟာ ပိုပြီးအဓိပ္ပာယ်ရှိလာတယ်။ အတွေ့အကြုံတစ်ခုလုံးက ကျွန်တော်တို့ကို ပုံသွင်းပေးပြီး ယေရှုခရစ်ရဲ့ပုံသက်သေကို ပိုပြီးအနီးကပ်လိုက်လျှောက်နိုင်ဖို့ စိတ်နှလုံးနဲ့ ဥပဓိရုပ်ကို တိုးတက်ကောင်းမွန်စေတယ်။ ခင်ဗျားရဲ့ဘဝအသက်တာမှာ အကောင်းဆုံးအတွေ့အကြုံကို ခင်ဗျားတွေ့ကြုံရပါလိမ့်မယ်။”—ဟေရှာယ ၅၄:၁၃၊ ကဘ။
ဧဝံဂေလိဟောပြောသူများ၊ သိုးထိန်းများနှင့် သွန်သင်သူများ
ဓမ္မအမှုသင်တန်းကျောင်းဆင်းများသည် ယခု ၁၁၇ နိုင်ငံတွင် အမှုထမ်းဆောင်နေကြသည်။ ယင်းတို့တွင် ယေဟောဝါသက်သေများ၏ဌာနခွဲရုံးရှိသော နိုင်ငံအများစုအပါအဝင် အတ္တလန္တိတ်သမုဒ္ဒရာရှိကျွန်းများ၊ ကရစ်ဘီယန်ကျွန်းနှင့် ပစိဖိတ်သမုဒ္ဒရာရှိကျွန်းများ ပါဝင်ကြသည်။ ကျောင်းသားများရရှိခဲ့သည့် ကောင်းမွန်လှသောလေ့ကျင့်မှုသည် ဧဝံဂေလိဟောပြောခြင်း၊ သိုးထိန်းခြင်းနှင့် သွန်သင်ခြင်းလုပ်ငန်းများတွင် ပေါ်လွင်ထင်ရှားခဲ့သည်ဟု ဌာနခွဲများက ဖော်ပြသည်။ သူတို့ရရှိသောလေ့ကျင့်မှုက လယ်ကွင်းဓမ္မအမှုတွင် သမ္မာကျမ်းစာကို ပို၍ထိရောက်စွာအသုံးပြုစေသည်။ (၂ တိမောသေ ၂:၁၅) အိမ်ရှင်တို့၏မေးခွန်းများကို ဖြေကြားရာတွင် ကျမ်းစာဖြင့် ကျိုးကြောင်းဆင်ခြင်ခြင်း * စာအုပ်ကိုလည်း မကြာခဏကိုးကားအသုံးပြုခဲ့ကြပြီး ဘုရားသခင်နိုင်ငံတော်ကြေညာသူများကို ထိုနည်းတူပြုလုပ်ကြရန် လေ့ကျင့်ပေးကြသည်။ ကျောင်းဆင်းတို့၏စိတ်ထက်သန်မှုသည် အသင်းတော်များတွင် ကူးစက်သွားကာ သူတို့၏လုပ်ဆောင်မှုများက အသင်းသားများကို ခွန်အားဖြစ်စေသည်။
အသင်းတော်အကြီးအကဲများသည် “သိုးတော်စုကို ထိန်း” ကျောင်းရန်၊ အခြားသူတို့၏ဝိညာဉ်ရေးလိုအပ်ရာများကို ကူညီစောင့်ရှောက်ပေးရန် အခွင့်ထူးရရှိကြသည်။ (၁ ပေတရု ၅:၂၊ ၃) အစီအစဉ်နှင့်ပတ်သက်၍ အကြီးအကဲတစ်ဦးက ဤသို့ပြောသည်– “ဘုရားသခင့်သိုးတော်စုကိုထိန်းကျောင်းရတဲ့တာဝန်မှာ အကူအညီပေးဖို့ ကောင်းစွာလေ့ကျင့်ခြင်းခံယူခဲ့တဲ့ညီအစ်ကိုတွေကို ဌာနခွဲရုံးက စေလွှတ်ပေးတဲ့အတွက် ကျွန်တော်တို့ ကျေးဇူးတင်လေးမြတ်ပါတယ်။” အရှေ့ဖျားဒေသရှိဌာနခွဲတစ်ခုကလည်း အလားတူမှတ်ချက်ပေးခဲ့သည်– “ကျောင်းဆင်းတွေဟာ တကယ့်ကို ကြင်နာမှုရှိကြတယ်။ အလုပ်ကို ကြိုးစားလုပ်ကြပြီး အသင်းတော်ရဲ့ရိုသေမှုကို ရယူနိုင်ခဲ့ကြတယ်။ သူတို့ရဲ့နှိမ့်ချမှု၊ နွေးထွေးမှုနှင့် စိတ်အားထက်သန်မှုတွေဟာ အများသိဖြစ်ပြီး အလွန်တန်ဖိုးထားခံရကြတယ်။ လိုလိုလားလားကိုယ်ကျိုးစွန့်ကြပြီး ထိန်းကျောင်းဖို့လိုအပ်တဲ့အသင်းတော်တွေဆီ ဝမ်းပန်းတသာ ပြောင်းရွှေ့ခဲ့ကြတယ်။” (ဖိလိပ္ပိ ၂:၄) ထိုသို့သောအမျိုးသားများသည် မိမိတို့၏ယုံကြည်သူချင်းများကို လန်းဆန်းစေကြပြီး ချီးမွမ်းခံထိုက်သူများဖြစ်သည်။—၁ ကောရိန္သု ၁၆:၁၈။
ထို့ပြင် ဓမ္မအမှုသင်တန်းကျောင်း၌ သင်တန်းပို့ချသူများသည် ကျောင်းသားများကို လူထုရှေ့ဟောပြောသူများအဖြစ် သူတို့၏အရည်အသွေးများကို တိုးတက်စေရန် ကူညီပေးကြသည်။ သူတို့ရရှိသောအကြံပေးချက်များနှင့် ညွှန်ကြားချက်တို့ကို လက်တွေ့ကျင့်သုံးကြသောကြောင့် များမကြာမီတွင် သင်တန်းဆင်းများစွာသည် တိုက်နယ်စည်းဝေးပွဲများနှင့် ခရိုင်စည်းဝေးကြီးအစီအစဉ်များတွင် အသုံးတော်ခံနိုင်ခဲ့ကြသည်။ သင်တန်းဆင်းများသည် “အထူးကောင်းမွန်သောဟောပြောချက်များနှင့် လျော်ကန်သောကျိုးကြောင်းဆင်ခြင်မှုကို အသုံးပြုခြင်းဖြင့် အကြောင်းအရာ၏ လက်တွေ့အသုံးချနိုင်မှုတို့ကို” တင်ပြကြကြောင်း တိုက်နယ်ကြီးကြပ်မှူးတစ်ဦးက ဖော်ပြခဲ့သည်။—၁ တိမောသေ ၄:၁၃။
အာဖရိကနိုင်ငံတစ်နိုင်ငံတွင် ဓမ္မအမှုသင်တန်းကျောင်းကို ဖွင့်လှစ်ခဲ့ပြီး သင်တန်းဆင်းများကို ထိုနိုင်ငံတွင် တာဝန်ခန့်အပ်ပြီးနောက် အသင်းတော်အစည်းအဝေးများ၌ သွန်သင်ခြင်းစွမ်းရည် သိသိသာသာတိုးတက်ကောင်းမွန်လာခဲ့သည်။ သင်တန်းကျောင်းမှစေလွှတ်ခံရသောအကြီးအကဲများသည် ဧဝံဂေလိဟောပြောခြင်း၊ သိုးထိန်းခြင်းနှင့် သွန်သင်ခြင်းတို့တွင် အကူအညီပေးခြင်းအားဖြင့် အသင်းတော်ကို ဝိညာဉ်ရေးအရ တည်ဆောက်ပေးနေကြသည်။—ဧဖက် ၄:၈၊ ၁၁၊ ၁၂။
အသင်းတော်ကိုကြီးကြပ်ရာတွင် တိုးတက်ကောင်းမွန်လာ
နေရာဒေသများစွာတွင် အကြီးအကဲများနှင့် ဓမ္မအမှုထမ်းများ ပို၍လိုအပ်လာသည်။ အချို့အသင်းတော်များသည် ဓမ္မအမှုသင်တန်းကျောင်းမှ သင်တန်းဆင်းများကို ထိုအသင်းတော်များသို့ မစေလွှတ်ခဲ့ပါက အကြီးအကဲများလုံးဝရှိမည်မဟုတ်ပါ။ ထို့ကြောင့် သင်တန်းဆင်းများစွာတို့သည် ထိုသို့သောလိုအပ်သည့်နေရာသို့ တာဝန်ခန့်အပ်ခံရကြသည်။
ဌာနခွဲအတော်များများက ဤအမျိုးသားများသည် “အဖွဲ့အစည်းဆိုင်ရာ အစီအစဉ်များကို ကောင်းစွာသိကျွမ်းကြောင်း၊” “မိမိတို့၏တာဝန်များကို အလေးအနက်သဘောထားကြကြောင်း၊” “ယေဟောဝါ၏အဖွဲ့အစည်းကို လေးမြတ်တန်ဖိုးထားကြရန် အခြားသူများကို ကူညီပေးကြကြောင်း” နှင့် “သူတို့တာဝန်ကျရာအသင်းတော်များ၏ နွေးထွေးမှုနှင့် ဝိညာဉ်ရေးရာများကို ထပ်တိုးစေကြကြောင်း” စသည်ဖြင့် ဖော်ပြကြသည်။ ယင်းသို့ဖြစ်ရခြင်းမှာ ဤသင်တန်းဆင်းများသည် ဘုရားသခင့်စကားတော်တွင် ရေးသားထားရာများကို လိုက်လျှောက်ပြီး မိမိတို့၏သိနားလည်မှုအပေါ်အမှီမပြု သို့မဟုတ် မိမိတို့ကိုယ်ကို ပညာရှိသည်ဟု အထင်မကြီးကြသောကြောင့်ဖြစ်သည်။ (သု. ၃:၅-၇) ထိုသို့သောအမျိုးသားများသည် သူတို့တာဝန်ကျရာအသင်းတော်များတွင် ဝိညာဉ်ရေးကောင်းချီးများဖြစ်လာကြသည်။
သီးခြားရပ်ကွက်များတွင် အမှုဆောင်ခြင်း
အထူးရှေ့ဆောင်များအဖြစ် တာဝန်ခန့်အပ်ခံရသောအချို့ကျောင်းဆင်းများသည် သီးခြားအုပ်စုများကို အသင်းတော်များဖြစ်လာရန် ကူညီပေးကြသည်။ ဂွာတီမာလာနိုင်ငံ၏ ဝေးလံသောဒေသရှိ အကြီးအကဲတစ်ဦးသည် ထိုသို့သောအကူအညီကို တန်ဖိုးထားကြောင်း ဤသို့ဖော်ပြသည်– “နှစ်ပေါင်း ၂၀ တိုင် ဒီကြီးမားတဲ့ရပ်ကွက်ကြီးကို ဘယ်လိုတာဝန်ယူလုပ်ဆောင်နိုင်မလဲဆိုပြီး စိုးရိမ်ခဲ့တယ်။ ဒီကိစ္စနှင့်ပတ်သက်ပြီး မကြာခဏဆုတောင်းလေ့ရှိတယ်။ ဓမ္မအမှုသင်တန်းကျောင်းက ညီအစ်ကိုတွေဟာ အဖွဲ့အစည်းဆိုင်ရာကိစ္စရပ်တွေမှာသာမဟုတ် စကားပြောတဲ့နေရာမှာလည်း တော်ကြတယ်၊ အခုဆိုရင် လယ်ကွင်းကို ကောင်းကောင်းတာဝန်ယူဆောင်ရွက်နေတာကို တွေ့မြင်ရလို့ ဝမ်းသာပါတယ်။”
သင်တန်းဆင်းများသည် ပြန့်ကျဲနေသောကျေးရွာများသို့ရောက်ရန် တောင်တန်းဒေသများကိုဖြတ်ကျော်ပြီး ဝေးလံလှသောရပ်ကွက်များတွင် ထိရောက်စွာအမှုဆောင်နိုင်ကြရန် သင်ယူခဲ့ကြသည်။ အခြားကြေညာသူများ မတတ်နိုင်သည့်တိုင် သူတို့မှာမူ ထိုဒေသများသို့သွားကာ သီးခြားအုပ်စုများကို အလျင်အမြန်ဖွဲ့စည်းတည်ထောင်ကြသည်။ ဥပမာ၊ နိုက်ဂျာနိုင်ငံရှိ အကြီးအကဲတစ်ဦးသည် ကျောင်းဆင်းများ၏အကူအညီကို တောင်းဆိုခဲ့သည်။ အကြောင်းမှာ သူတို့သည် သူနေထိုင်သောဒေသတွင် အကောင်းဆုံးလုပ်ဆောင်နိုင်ကြလိမ့်မည်ဟု ယုံကြည်သောကြောင့်ဖြစ်သည်။ အထူးသဖြင့် အိမ်ထောင်မရှိသောအမျိုးသားများသည် ဝေးလံသောဒေသများတွင် အထူးရှေ့ဆောင်များနှင့် တိုက်နယ်ကြီးကြပ်မှူးများအဖြစ် အမှုထမ်းဆောင်ရန် ပို၍လွယ်ကူပေမည်။ တမန်တော်ပေါလုကဲ့သို့ သူတို့သည် သူတို့အမှုထမ်းဆောင်သည့် အသင်းတော်များအတွက် စိုးရိမ်စရာများရှိမည်ဖြစ်သည့်အပြင် “မြစ်ကိုကူးသောဘေး၊ ဓားပြတိုက်သောဘေး၊ တော၌ရောက်သောဘေး၊” ကိုယ်ကိုတိုင်၏ အဆင်မပြေမှုများလည်း ကိုင်တွယ်ရကြမည်ဖြစ်သည်။—၂ ကောရိန္သု ၁၁:၂၆-၂၈။
လူငယ်များအကျိုးခံစားရ
သမ္မာကျမ်းစာက လူငယ်များအား မိမိတို့၏ဖန်ဆင်းရှင်ကို သတိရကြရန် တိုက်တွန်းထားသည်။ (ဒေ. ၁၂:၁) စိတ်အားထက်သန်သော ဓမ္မအမှုသင်တန်းကျောင်းဆင်းများသည် ခရစ်ယာန်လူငယ်များအတွက် ကောင်းသောပုံသက်သေများဖြစ်ကြသည်။ အမေရိကန်ပြည်ထောင်စုရှိ အသင်းတော်တစ်ခုသို့ သင်တန်းဆင်းနှစ်ဦးရောက်လာပြီးနောက် လယ်ကွင်းဓမ္မအမှုတွင် ညီအစ်ကိုများအသုံးပြုသောနာရီမှတ်တမ်းမှာ နှစ်ဆဖြစ်လာခဲ့သည်။ ထို့ပြင် မှန်မှန်ရှေ့ဆောင် သို့မဟုတ် အချိန်ပြည့်ဘုရားသခင့်နိုင်ငံတော်သတင်းကြွေးကြော်သူအရေအတွက်မှာ ၂ ဦးမှ ၁၁ ဦးအထိဖြစ်လာသည်။ ယင်းသည် အသင်းတော်များစွာတွင် ဖြစ်ပျက်ခဲ့သော နမူနာတစ်ခုဖြစ်သည်။
သင်တန်းကျောင်းဆင်းများသည် လူငယ်အမျိုးသားများကိုလည်း ဓမ္မအမှုသင်တန်းကျောင်းတက်ရောက်ရန် အားပေးကြသည်။ ယင်းက ဓမ္မအမှုထမ်းများမဖြစ်သေးသူအချို့အား ထိုအခွင့်ထူးကို တက်လှမ်းရန် တွန်းအားဖြစ်စေခဲ့သည်။ နယ်သာလန်ဌာနခွဲက ဓမ္မအမှုသင်တန်းကျောင်းဆင်းများကို “မိမိတို့၏အသက်တာတွင် မည်သည့်အရာလုပ်ဆောင်မည်ကို စဉ်းစားနေကြသော လူငယ်အမျိုးသားများအတွက် စံပြပုံသက်သေများ” ဟုခေါ်ဆိုသည်။
နိုင်ငံခြားဘာသာစကားပြော အသင်းတော်တွင်အမှုထမ်းဆောင်ခြင်း
ဒေသများစွာတွင် လူတို့အား သူတို့၏မိခင်ဘာသာစကားဖြင့် သတင်းကောင်းကိုပြောပြနိုင်ရန် ကြိုးစားအားထုတ်မှုများ အရှိန်မြှင့်လျက်ရှိသည်။ ဓမ္မအမှုသင်တန်းကျောင်းဆင်းများသည် ဘာသာခြားစကားကို သင်ယူလေ့ရှိပြီး တိုင်းတစ်ပါးမှပြောင်းရွှေ့လာကြသူများရှိရာ ရပ်ကွက်များတွင် အမှုထမ်းဆောင်ကြသည်။ ဥပမာ၊ ဘယ်လ်ဂျီယံနိုင်ငံရှိ အယ်လ်ဘေးနီးယန်း၊ ပါရှန်းနှင့် ရုရှားဘာသာစကားပြောလယ်ကွင်းများတွင် နိုင်ငံတော်ဟောပြောသူများ ပို၍လိုအပ်လာသည်။
ဂျာမနီ၊ ဗြိတိန်၊ မက္ကဆီကို၊ အမေရိကန်ပြည်ထောင်စု၊ အီတလီနှင့် အခြားနိုင်ငံများရှိ နိုင်ငံခြားဘာသာစကားပြောအသင်းတော်နှင့် အုပ်စုများသည် ဓမ္မအမှုသင်တန်းကျောင်းဆင်းများဖြစ်ကြသော နယ်လှည့်ကြီးကြပ်မှူးများ၊ အကြီးအကဲများနှင့် ဓမ္မအမှုထမ်းများကြောင့် များစွာအကျိုးကျေးဇူးခံစားခဲ့ကြပြီးဖြစ်သည်။ ကိုရီးယားနိုင်ငံရှိ ဌာနခွဲက “သင်တန်းဆင်း ၂၀၀ ကျော်သည် နိုင်ငံခြားဘာသာစကားပြောအသင်းတော်များနှင့် အုပ်စုများကို ကူညီပေးရာတွင် အရေးကြီးသောကဏ္ဍမှ ပါဝင်နေကြသည်” ဟု ဖော်ပြသည်။
အခြားသောအခွင့်အရေးများတွင် နှိမ့်ချစွာအမှုဆောင်ခြင်း
နိုင်ငံခြားဘာသာစကားပြောအုပ်စုများနှင့် အသင်းတော်များတွင် အမှုထမ်းဆောင်ခြင်းအပြင် ဓမ္မအမှုသင်တန်းကျောင်းဆင်းများသည် အကြီးအကဲများ၊ ဓမ္မအမှုထမ်းများနှင့် နယ်လှည့်ကြီးကြပ်မှူးများအဖြစ် အမှုထမ်းကြသည်။ အချို့သူတို့သည် ဌာနခွဲတစ်ခုရှိ လုပ်ငန်းတော်ဌာနတွင် အရေးတကြီးလိုအပ်နေမှုများကို ဖြည့်ဆည်းခြင်းဖြစ်နိုင်သည့် အခြားနိုင်ငံများတွင် တာဝန်ခန့်အပ်မှုများကို လက်ခံကြသည်။ ဆောက်လုပ်ရေးအတတ်ပညာများကို သင်ယူခဲ့ဖူးသူများသည် ဘုရားသခင့်နိုင်ငံတော်ခန်းမဆောက်လုပ်ရေးအစီအစဉ်တွင် ပါဝင်ကူညီပေမည်။
ကမ္ဘာတစ်ဝန်းတွင် အသင်းတော်များနှင့် တိုက်နယ်များအရေအတွက် တိုးများလာနေခြင်းက နယ်လှည့်ကြီးကြပ်မှူးများကို အမြဲလိုအပ်စေခဲ့သည်။ ဤလိုအပ်ချက်ကို ဖြည့်ဆည်းပေးနိုင်ရန် ဓမ္မအမှုသင်တန်းကျောင်းမှ ရွေးချယ်ထားသောသင်တန်းဆင်းများသည် နယ်လှည့်လုပ်ငန်းတွင် ဆယ်ပတ်ကြာ လေ့ကျင့်မှုခံယူပြီးနောက် အရန် သို့မဟုတ် ပုံမှန်တိုက်နယ်ကြီးကြပ်မှူးများအဖြစ် အမှုထမ်းဆောင်ကြသည်။ သင်တန်းဆင်း ၁,၃၀၀ ခန့်သည် ၉၇ နိုင်ငံတွင် နယ်လှည့်ကြီးကြပ်မှူးများအဖြစ် ယခုအမှုထမ်းဆောင်ကြသည်။ အာဖရိကနိုင်ငံတစ်နိုင်ငံတွင် နယ်လှည့်ကြီးကြပ်မှူးများ၏ ၅၅ ရာခိုင်နှုန်းမှာ ဓမ္မအမှုသင်တန်းကျောင်းမှ သင်တန်းဆင်းများဖြစ်ကြသည်။ အခြားအာဖရိကနိုင်ငံတွင်မူ ၇၀ ရာခိုင်နှုန်းဖြစ်သည်။
ကနေဒါ၊ အမေရိကန်ပြည်ထောင်စု၊ အရှေ့ဖျားဒေသ၊ ဥရောပနှင့် ဩစတြေးလျတို့တွင် ရာနှင့်ချီသောသင်တန်းဆင်းများသည် အခြားနိုင်ငံများရှိ အထူးလိုအပ်သောနေရာများသို့ စေလွှတ်ခံခဲ့ကြသည်။ ဤနည်းဖြင့် ကမ္ဘာတစ်ဝန်းတွင် ကျောင်း၏အကျိုးကျေးဇူးများကို ကျယ်ကျယ်ပြန့်ပြန့်ခံစားခဲ့ကြသည်။
ယေဟောဝါသည် ကိုယ်တော့်သားတော် ယေရှုခရစ်မှတစ်ဆင့် ဧဝံဂေလိဟောပြောသူများ၊ သိုးထိန်းများ၊ သွန်သင်သူများနှင့် ဘုရားသခင့်နိုင်ငံတော်အကျိုးစီးပွား တိုးတက်စေသောအခြားသူများကို ဤနောက်ဆုံးသောနေ့ရက်များတွင် ဖြစ်ပွားစေတော်မူခဲ့သည်။ ဘုရားသခင့်လူမျိုးတော်၏အရေအတွက်သည် ထပ်ဆင့်တိုးတက်ရန် အလားအလာရှိနေဆဲလော။ အမှန်ပင်တိုးတက်စရာရှိသေးသည်! ထို့ကြောင့် ပို၍ကြီးမားသောတာဝန်ကို တက်လှမ်းယူနိုင်ရန် အပ်နှံထားသောအမျိုးသားများ အရေအတွက် အစဉ်လိုအပ်လျက်ရှိသည်။ (ဟေရှာယ ၆၀:၂၂; ၁ တိမောသေ ၃:၁၊ ၁၃) ဓမ္မအမှုသင်တန်းကျောင်းက အကြီးအကဲများနှင့် ဓမ္မအမှုထမ်းများအား မိမိတို့၏ဓမ္မအမှုကို ကျယ်ပြန့်စေခြင်းဖြင့် မိမိတို့ကိုယ်တိုင်နှင့် ကမ္ဘာ့လယ်ကွင်းရှိ အခြားသူများပါ များစွာအကျိုးကျေးဇူးရရှိနိုင်ရန် အခွင့်အရေးကို ပေးလျက်ရှိသည်။
[အောက်ခြေမှတ်ချက်]
^ အပိုဒ်၊ 11 ယေဟောဝါသက်သေများထုတ်ဝေသည်။
[စာမျက်နှာ ၁၀ ပါ ရုပ်ပုံများ]
ဓမ္မအမှုသင်တန်းကျောင်းသည် ကမ္ဘာချီဘုရားသခင့်နိုင်ငံတော် အကျိုးစီးပွားကို တိုးတက်စေ
[စာမျက်နှာ ၁၃ ပါ ရုပ်ပုံများ]
ဓမ္မအမှုသင်တန်းကျောင်းတက်ရောက်ပြီး အခြားသူများကို အကျိုးကျေးဇူးခံစားစေရန် သင်မျှော်မှန်းသလော