ရှောလမုန်သီချင်းမှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
ရှောလမုန်သီချင်းမှ ပေါ်လွင်ချက်များ
“ဆူးတောထဲမှာနှင်းပွင့်ထင်သကဲ့သို့ ငါချစ်သောသတို့သမီးသည် လူမျိုးသမီးစုထဲမှာထင်ပေ၏။” “တောပင်စုထဲမှာ ရှောက်ချိုပင်ကဲ့သို့ ငါချစ်ရာသခင်သည် လူမျိုးသားစုထဲမှာ ဖြစ်တော်မူ၏။” “လကဲ့သို့တင့်တယ်လျက်၊ နေကဲ့သို့ထွန်းလင်းလျက်၊ စစ်မျက်နှာကဲ့သို့ ကြောက်မက်ဖွယ်ဖြစ်လျက်၊ နံနက်ကဲ့သို့ မျှော်ရှုသောသတို့သမီးကား အဘယ်သူနည်း။” (ရှောလမုန်သီချင်း ၂:၂၊ ၃; ၆:၁၀) သမ္မာကျမ်းစာပါ ရှောလမုန်သီချင်းထဲမှ အဆိုပါအခန်းငယ်များသည် အလွန်သိမ်မွေ့နက်နဲလှသည်! ရှောလမုန်သီချင်းသည် အလွန်အဓိပ္ပာယ်ပြည့်ဝပြီး လှပစွာဖွဲ့နွဲ့ထားသည့် ကဗျာတစ်ပုဒ်ဖြစ်သောကြောင့် ယင်းကို “သီချင်းတကာတို့တွင် အထွတ် (အကောင်းဆုံး)” ဟုခေါ်ဆိုထားသည်။—ရှောလမုန်သီချင်း ၁:၁။
ရှေးဣသရေလဘုရင်ရှောလမုန်သည် မိမိ၏နန်းစံနှစ်ပေါင်း ၄၀ အတွင်း အစောပိုင်းအချိန်ဖြစ်သော ဘီစီ ၁၀၂၀ ပြည့်နှစ်ခန့်က ရေးစပ်ခဲ့ခြင်းဖြစ်နိုင်သည့် ဤသီချင်းမှာ သိုးထိန်းတစ်ဦးနှင့် ကျေးတောသူ ရှုလမိတ်တို့၏ မေတ္တာဖွဲ့ဇာတ်လမ်းတစ်ပုဒ်ဖြစ်သည်။ ကဗျာထဲတွင်ပါသော အခြားသူတို့မှာ မိန်းမပျိုလေး၏မိခင်နှင့် အစ်ကိုများ၊ “ယေရုရှလင်မြို့သမီးတို့ [နန်းတွင်းသူများ]၊” နှင့် “ဇိအုန်သတို့သမီးတို့ [ယေရုရှလင်မြို့သူ]” တို့ဖြစ်သည်။ (ရှောလမုန်သီချင်း ၁:၅; ၃:၁၁) သမ္မာကျမ်းစာဖတ်ရှုသူတစ်ဦးသည် ရှောလမုန်သီချင်းထဲမှ စကားပြောသူအားလုံးကို ခွဲခြားသိရှိရန် ခက်ခဲသော်လည်း သူတို့ပြောဆိုသည့်အကြောင်းအရာ သို့မဟုတ် သူတို့ကိုပြောသည့်အကြောင်းအရာကို သုံးသပ်ခြင်းဖြင့် ခွဲခြားသိနိုင်ပါသည်။
ဘုရားသခင့်နှုတ်မြွက်တော် အပိုင်းတစ်ပိုင်းဖြစ်သော ရှောလမုန်သီချင်းပါ အကြောင်းအရာသည် အကြောင်းရင်းနှစ်ရပ်အတွက် အလွန်အရေးပါ၏။ (ဟေဗြဲ ၄:၁၂) ပထမတစ်ခုမှာ ယင်းကျမ်းက အမျိုးသားတစ်ဦးနှင့် အမျိုးသမီးတစ်ဦးစပ်ကြားရှိ စစ်မှန်သောမေတ္တာသည် အဘယ်အရာဖြစ်ကြောင်း ကျွန်ုပ်တို့ကို သိစေသည်။ ဒုတိယမှာ ရှောလမုန်သီချင်းသည် ယေရှုခရစ်နှင့် ဝိညာဉ်တော်ဖွားခရစ်ယာန်အသင်းတော်ကြားတွင်ရှိသော မေတ္တာကို ပုံဖော်ပြသည်။—၂ ကောရိန္သု ၁၁:၂; ဧဖက် ၅:၂၅-၃၁။
‘ချစ်ခြင်းမေတ္တာသည် အလိုအလျောက်မနိုးမီ မလှုပ်မနှိုးကြပါနှင့်’
“သခင်နှုတ်ဆက်သောနမ်းခြင်းဖြင့် ကျွန်မကိုနမ်းပါစေ။ ကိုယ်တော်၏မေတ္တာ [“ချစ်မြတ်နိုးသည့်ဖော်ပြချက်များ၊” ကဘ] သည် စပျစ်ရည်ထက်သာ၍ကောင်းပါ၏။” (ရှောလမုန်သီချင်း ၁:၂) ရှောလမုန်မင်းကြီး၏ စခန်းချတဲသို့ ခေါ်ဆောင်ခံရသူ နှိမ့်ချသောကျေးတောသူလေး၏ အဆိုပါစကားများဖြင့် ရှောလမုန်သီချင်း အပြန်အလှန်စကားပြောဆိုချက်ကို အစပြုထားသည်။ ထိုနေရာသို့ သူ,မည်သို့ရောက်လာခဲ့သနည်း။
သူဤသို့ပြောပြ၏– ‘ငါ့မိခင်၏သားတို့သည် ငါ့ကိုမနာလိုသောစိတ်ရှိ၍ စပျစ်ဥယျာဉ်တို့ကို စောင့်စေကြ၏။’ သူ၏ချစ်သူ သိုးထိန်းလုလင်က သာယာသောနွေဦးနေ့တစ်နေ့တွင် မိမိနှင့်အတူ လမ်းလျှောက်ထွက်ရန် သူ့အားခေါ်သည်ကို သူ၏အစ်ကိုများက စိတ်ဆိုးကြသည်။ အစ်ကိုဖြစ်သူတို့က သူ,လမ်းလျှောက်မထွက်နိုင်ရန် ‘စပျစ်နွယ်ပင်တို့ကိုဖျက်သော မြေခွေးကလေးများ’ ကို ကာကွယ်စောင့်ကြပ်ဖို့ တာဝန်ပေးခဲ့ကြသည်။ သူအလုပ်လုပ်ရသည်မှာ ရှောလမုန်၏စခန်းနားတွင်ဖြစ်သည်။ “ချိုင့်ထဲမှာ သစ်သီးများကိုကြည့်ရှု” ရန်ဆင်းသွားချိန်တွင် သူ၏အလှကို မင်းကြီးသတိပြုမိသွားပြီး စခန်းသို့ ခေါ်ဆောင်စေခဲ့ခြင်းဖြစ်သည်။—ရှောလမုန်သီချင်း ၁:၆; ၂:၁၀-၁၅; ၆:၁၁။
မိန်းမပျိုလေးက မိမိ၏ချစ်သူသိုးထိန်းကိုသတိရကြောင်း နန်းတွင်းသူများကို ပြောပြသည့်အခါ သူတို့က “သိုးများခြေရာသို့လိုက်သွား၍” သိုးထိန်းကိုရှာရန် ပြောကြသည်။ သို့သော် ရှောလမုန်က သူ့ကိုထွက်ခွင့်မပြုပါ။ သူ၏အလှကို ချီးမွမ်းဖွဲ့နွဲ့ကာ မင်းကြီးက ဤသို့ကတိပြုသည်– “ငွေနှင့်အပြောက်ခြယ်သော ရွှေပုတီးအသွယ်သွယ်ကိုလည်းလုပ်၍ ပေးဦးမည်။” သို့သော် မိန်းမငယ်မှာ ယင်းကိုအလိုမရှိ။ သိုးထိန်းသည် ရှောလမုန်၏စခန်းသို့လိုက်လာရာ မိန်းမငယ်ကိုတွေ့သည်နှင့် ဤသို့ဆို၏– “ငါချစ်သောနှမ သင်သည် အဆင်းလှပေ၏။ အလွန်လှပေ၏။” မိန်းမပျိုလေးက နန်းတွင်းသူတို့အား ကတိပြုကျိန်ဆိုစေခဲ့သည်– “ချစ်ခြင်းမေတ္တာသည် အလိုအလျောက်မနိုးမီ မလှုပ်မနှိုး” ကြပါနှင့်။—ရှောလမုန်သီချင်း ၁:၈-၁၁၊ ၁၅; ၂:၇; ၃:၅၊ သမ္မာ။
ကျမ်းစာမေးခွန်းများ၏အဖြေ–
၁:၂၊ ၃—သိုးထိန်းလေး၏ ချစ်မြတ်နိုးသည့်ဖော်ပြချက်များနှင့် သူ၏အမည်ကို ပြန်အမှတ်ရခြင်းသည် စပျစ်ရည်ကဲ့သို့၊ နံ့သာဆီကဲ့သို့ အဘယ်ကြောင့်ဖြစ်သနည်း။ စပျစ်ရည်သည် လူတစ်ဦး၏စိတ်ကို ရွှင်လန်းစေပြီး ဦးခေါင်းပေါ် နံ့သာဆီသွန်းလောင်းခြင်းသည် စိတ်ချမ်းမြေ့စေသကဲ့သို့ သိုးထိန်းလုလင်၏မေတ္တာနှင့် သူ၏အမည်တို့ကို သတိရခြင်းက မိန်းမပျိုလေးအား ခွန်အားနှင့် နှစ်သိမ့်မှုကိုဖြစ်စေခဲ့သည်။ (ဆာလံ ၂၃:၅; ၁၀၄:၁၅) စစ်မှန်သောခရစ်ယာန်များ၊ အထူးသဖြင့် ဝိညာဉ်တော်ဖွားများသည်လည်း မိမိတို့အပေါ် ယေရှုခရစ်ပြသခဲ့သော မေတ္တာကို ပြန်အမှတ်ရခြင်းဖြင့် ခွန်အားနှင့်အားပေးမှုဖြစ်ကြောင်း တွေ့ရှိကြသည်။
၁:၅—ကျေးတောသူလေးသည် မိမိ၏မည်းသောအဆင်းကို “ကေဒတဲ” နှင့် အဘယ်ကြောင့် ပုံဖော်ပြသနည်း။ ဆိတ်မွေးဖြင့်ချည်ငင်ကာ အရာများစွာကို ပြုလုပ်ခဲ့ကြသည်။ (တောလည်ရာ ၃၁:၂၀) ဥပမာ၊ ‘ဆိတ်မွေးနှင့်လုပ်သော ကုလားကာများ’ ကို “တဲတော်ဖုံးအုပ်” ရာတွင် အသုံးပြုခဲ့ကြသည်။ (ထွက်မြောက်ရာ ၂၆:၇) သဲကန္တာရတွင်လှည့်လည်နေထိုင်သည့် မျက်မှောက်ခေတ်ဗက်ဒူအင်တို့၏တဲများကဲ့သို့ပင် ကေဒတဲတို့ကို အနက်ရောင်ဆိတ်မွေးဖြင့် ပြုလုပ်ခဲ့ခြင်းဖြစ်ပုံရသည်။
၁:၁၅—“သင်သည် . . . ချိုးမျက်စိနှင့် ပြည့်စုံ၏” ဟုသိုးထိန်းလေးဆိုရာတွင် သူအဘယ်အရာကို ဆိုလိုသနည်း။ ချိုးမျက်စိကဲ့သို့ပင် သူ၏ချစ်သူမိန်းမငယ်လေး၏မျက်ဝန်းသည် နူးညံ့သိမ်မွေ့ကြောင်းပြောဆိုခြင်းဖြစ်သည်။
၂:၇; ၃:၅—နန်းတွင်းသူတို့ကို အဘယ်ကြောင့် “တော၌ကျင်လည်သော သမင်ဒရယ်များကိုတိုင်တည်၍” ကျိန်ဆိုစေသနည်း။ သမင်ဒရယ်တို့သည် သူတို့၏တင့်တယ်လှပမှုကြောင့် ထင်ရှားကြသည်။ ရှုလမိတ်မိန်းမပျိုလေးသည် မိမိ၏ချစ်ခြင်းမေတ္တာကို နန်းတွင်းသူများ မလှုပ်မနှိုးစေရန် တင့်တယ်ချစ်ဖွယ်သော သတ္တဝါအားလုံးကိုတိုင်တည်၍ ကျိန်ဆိုစေခြင်းဖြစ်သည်။
ကျွန်ုပ်တို့အတွက်သင်ခန်းစာ–
၁:၂; ၂:၆။ ပိုးပန်းချိန်အတွင်း သန့်ရှင်းစင်ကြယ်သော ချစ်မြတ်နိုးသည့်ဖော်ပြချက်များသည် သင့်လျော်ပေမည်။ သို့သော် ယင်းသည် စစ်မှန်သောချစ်ခင်တွယ်တာမှု၏ ဖော်ပြချက်ဖြစ်သင့်သည်၊ မောင်နှံစုံသည် လိင်အကျင့်ပျက်ပြားခြင်းသို့ ရောက်သွားစေနိုင်သည့် မသန့်ရှင်းသောစိတ်ဆန္ဒဖြင့် မဖြစ်ရန် သတိပြုသင့်သည်။—ဂလာတိ ၅:၁၉။
၁:၆; ၂:၁၀-၁၅။ ရှုလမိတ်၏အစ်ကိုများက သူတို့၏ညီမအား သူ၏ချစ်သူလုလင်နှင့် လူခြေတိတ်သောတောင်ပေါ်သို့သွားရန် ခွင့်မပြုရခြင်းမှာ ရှုလမိတ်သည် အကျင့်မကောင်းသောကြောင့် သို့မဟုတ် မသင့်လျော်သော ရည်ရွယ်ချက်ရှိသောကြောင့် မဟုတ်ပါ။ သွေးဆောင်မှုဖြစ်သွားစေနိုင်သည့် အခြေအနေမှ သူ့ကို ကြိုတင်ကာကွယ်ပေးခဲ့ကြခြင်းဖြစ်သည်။ ပိုးပန်းနေသောစုံတွဲများအတွက် သင်ခန်းစာမှာ သူတို့သည် လူခြေတိတ်ဆိတ်သောနေရာများကို ရှောင်သင့်သည်။
၂:၁-၃၊ ၈၊ ၉။ ရှုလမိတ်မိန်းမပျိုလေးသည် လှပသော်လည်း မိမိသည် “ကွင်းပြင်၌ပေါက်သော နှင်းပွင့် [သာမန်ပန်းတစ်ပွင့်] မျှသာဖြစ်ပါ၏” ဟုကျိုးနွံစွာရှုမြင်ခဲ့သည်။ သူ၏လှပမှုနှင့် ယေဟောဝါအပေါ် သူ၏တည်ကြည်မှုကြောင့် သိုးထိန်းလုလင်က သူ့အား ‘ဆူးတောထဲမှ နှင်းပွင့်’ အဖြစ်ယူမှတ်ခဲ့သည်။ သိုးထိန်းကိုကော အဘယ်အရာပြောနိုင်သနည်း။ သူသည် ချောမောခန့်ညားသူဖြစ်သောကြောင့် ရှုလမိတ်အဖို့ သူသည် “သမင်ဒရယ်သငယ်” နှင့်တူသည်။ သူသည် ဝိညာဉ်ရေးလိုက်စားသူ၊ ယေဟောဝါအပေါ် တည်ကြည်သူဖြစ်ရပေမည်။ “တောပင်စုထဲမှာ [အရိပ်နှင့် အသီးကိုပေးသည့်] ရှောက်ချိုပင်ကဲ့သို့ ငါချစ်ရာသခင်သည် လူမျိုးသားစုထဲမှာ ဖြစ်တော်မူ၏” ဟုရှုလမိတ်ဆို၏။ အိမ်ထောင်ဖက်လောင်းကို ရှာဖွေရာတွင် ယုံကြည်ခြင်းနှင့် ဘုရားသခင်အားဆည်းကပ်ခြင်းတို့သည် နှစ်သက်ဖွယ်အရည်အသွေးကောင်းများမဟုတ်ပေလော။
၂:၇; ၃:၅၊ သမ္မာ။ ကျေးတောသူလေးသည် ရှောလမုန်အား စိတ်ကူးယဉ်ဆန်သောချစ်ခင်စွဲလမ်းခြင်းပင် မရှိခဲ့ပါ။ သိုးထိန်းလုလင်မှလွဲ၍ အခြားသူတစ်ဦးဦးကို ချစ်စိတ်ဝင်လာစေရန် မတိုက်တွန်းကြဖို့ နန်းတွင်းသူများအား ကတိပြုကျိန်ဆိုစေခဲ့သည်။ တစ်ဦးတစ်ယောက်ကို စိတ်ကူးယဉ်ဆန်ဆန်ချစ်ခြင်းသည် မဖြစ်နိုင်သည့်အပြင် မသင့်လျော်ရာလည်းဖြစ်သည်။ တစ်ကိုယ်ရေခရစ်ယာန်တစ်ဦးသည် ယေဟောဝါအပေါ် တည်ကြည်သည့်ကျေးကျွန်တစ်ဦးကိုသာ လက်ထပ်ရန် စဉ်းစားသင့်သည်။—၁ ကောရိန္သု ၇:၃၉။
“ရှုလမိတ်၌ အဘယ်သို့သောအရာကို တွေ့မြင်ကြလိမ့်မည်နည်း”
တစ်စုံတစ်ရာသည် “မီးရှို့၍ထသောမီးခိုးတိုင်သဏ္ဌာန်ရှိလျက် တောထဲကလာ” နေသည်။ (ရှောလမုန်သီချင်း ၃:၆) ယေရုရှလင်မြို့သမီးတို့သည် အပြင်သို့ထွက်၍ကြည့်သည့်အခါ အဘယ်အရာကိုမြင်ကြသနည်း။ ရှောလမုန်နှင့် သူ၏အခြွေအရံများ မြို့သို့ပြန်လာကြလေပြီ! မင်းကြီးသည် ရှုလမိတ်မိန်းမပျိုလေးကို မိမိနှင့်အတူ ခေါ်ဆောင်လာခဲ့သည်။
သိုးထိန်းလုလင်သည် မိန်းမပျိုနောက်သို့လိုက်လာရာ မကြာမီ သူမကို ရှာတွေ့လေသည်။ မိမိ၏မေတ္တာကို မိန်းမပျိုလေးအားစိတ်ချစေရာ ရှုလမိတ်က မြို့ထဲမှထွက်လိုကြောင်း ဤသို့ဆို၏– ‘မိုးမသောက်၊ မှောင်မိုက်အရိပ်မပြေးမီ ငါသည် မုရန်တောင်နှင့် လောဗန်ကုန်းသို့ ပြန်သွားတော့မည်။’ ရှုလမိတ်သည် သိုးထိန်းအား “ဥယျာဉ်တော်သို့ဝင်၍ ချိုသောအသီးကိုစား” ရန်ဖိတ်ခေါ်သည့်အခါ သူက “ငါ့နှမ၊ ငါ့ခင်ပွန်း၊ ငါ့ဥယျာဉ်ထဲသို့ ငါဝင်လာပြီ” ဟုပြန်ဖြေ၏။ ယေရုရှလင်မြို့သမီးတို့က သူတို့နှစ်ဦးအား ဤသို့ဆိုသည်– “မိတ်ဆွေတို့ စားကြလော့။ သောက်ကြလော့။ မေတ္တာနှင့် ရောင့်ရဲအောင် သောက်ကြလော့။”—ရှောလမုန်သီချင်း ၄:၆၊ ၁၆; ၅:၁၊ သမ္မာ။
ရှုလမိတ်မိန်းမပျိုလေးက နန်းတွင်းသူတို့အား မိမိ၏အိပ်မက်အကြောင်း ပြောပြပြီးနောက် “သူ့ကိုငါချစ်၍နာနေ” သည်ဟုပြောသည်။ သူတို့က “သင်ချစ်ရာသခင်သည် အခြားတစ်ပါးသောချစ်ရာသခင်ထက် အဘယ်သို့သာသနည်း” ဟုမေးကြရာ “ငါချစ်ရာသခင်သည် ဖြူသောအဆင်း၊ နီသောအဆင်းနှင့်ပြည့်စုံ၍ လူတစ်သောင်းတို့တွင် အထွတ်အမြတ်ဖြစ်တော်မူ၏” ဟုပြန်ဖြေ၏။ (ရှောလမုန်သီချင်း ၅:၂-၁၀) ရှောလမုန်က အမွှမ်းတင်ချီးမွမ်းသည့်အခါ သူက နှိမ့်ချစွာဤသို့ပြန်ပြော၏– “ရှုလမိတ်၌ အဘယ်သို့သောအရာကို တွေ့မြင်ကြလိမ့်မည်နည်း။” (ရှောလမုန်သီချင်း ၆:၄-၁၃) သူ၏မေတ္တာကိုအနိုင်ယူနိုင်သည့် အခွင့်အရေးအဖြစ် ယင်းကိုယူမှတ်ကာ ဘုရင်သည် ပို၍ချီးမြှောက်ပြောဆိုတော့သည်။ သို့ရာတွင် မိန်းမငယ်သည် သိုးထိန်းလုလင်အပေါ်သာ မေတ္တာခိုင်မြဲနေသည်။ နောက်ဆုံး ရှောလမုန်သည် သူ့ကိုအိမ်ပြန်ခွင့်ပြုရတော့သည်။
ကျမ်းစာမေးခွန်းများ၏အဖြေ–
၄:၁; ၆:၅—မိန်းမပျိုလေး၏ဆံပင်ကို “ဆိတ်စု” နှင့်အဘယ်ကြောင့် နှိုင်းယှဉ်ထားသနည်း။ အနက်ရောင်အမွေးရှိသော ဆိတ်များကဲ့သို့ သူ၏ဆံပင်သည် တောက်ပြောင်ပြီးအလွန်များသည်ကို နှိုင်းယှဉ်ထားခြင်းဖြစ်သည်။
၄:၁၁—ရှုလမိတ်၏ “နှုတ်ခမ်းသည် ပျားလပို့ကဲ့သို့ ယိုတတ်” ပြီး “လျှာအောက်မှာ နို့နှင့်ပျားရည်ရှိ” ခြင်းမှာ အဘယ်အရာကိုဆိုလိုသနည်း။ ပျားလပို့ထဲရှိပျားရည်သည် ပျားလပို့ထဲမှထုတ်ကာ လေသလပ်ထားသော ပျားရည်ထက် ပို၍အရသာရှိပြီး ပိုချိုသည်။ ဤနှိုင်းယှဉ်ချက်အပြင် ပျားရည်နှင့်နို့သည် မိန်းမပျိုလေး၏လျှာအောက်တွင်ရှိခြင်းက ရှုလမိတ်ပြောသောစကားများသည် ရိုးသားဖြောင့်မတ်ပြီး နှစ်လို့ဖွယ်ဖြစ်ကြောင်းကို အလေးပေးခြင်းဖြစ်သည်။
၅:၁၂—“မျက်စိတော်တို့သည် နို့၌ချိုးလျက် မြစ်ရေပေါ်မှာပုံ့ပုံ့ကြွကြွဝပ်သော ချိုးနှင့်တူကြ၏” ဟူသည့်ဖော်ပြချက်အဓိပ္ပာယ်မှာ အဘယ်နည်း။ မိန်းမပျိုလေးသည် သူ့ချစ်သူ၏ လှပသောမျက်ဝန်းအကြောင်း ပြောနေခြင်းဖြစ်သည်။ အဖြူရောင်မျက်လုံးအတွင်းရှိ မျက်နက်ဝန်းကို နို့ရည်တွင်ရေချိုးနေသည့် မွဲပြာရောင်ချိုးငှက်နှင့် ကဗျာဆန်ဆန် တင်စားဖော်ပြခြင်းဖြစ်ပေမည်။
၅:၁၄၊ ၁၅၊—သိုးထိန်း၏လက် [“ကို မျက်ရွဲစီသောပြောင်းလုံး၊” သမ္မာ] နှင့်ခြေတို့ကို အဘယ်ကြောင့် ထိုသို့ဖော်ပြသနည်း။ မိန်းမပျိုလေးက သိုးထိန်း၏လက်ချောင်းများကို ရွှေပြောင်းလုံးများနှင့်သော်လည်းကောင်း၊ သူ၏လက်သည်းများကို မျက်ရွဲနှင့်သော်လည်းကောင်း ရည်ညွှန်းထားခြင်းဖြစ်သည်။ သူ၏ခြေထောက်တို့သည် သန်မာပြီးလှသောကြောင့် “ကျောက်ဖြူတိုင်” နှင့်ခိုင်းနှိုင်းထားသည်။
၆:၄—မိန်းမပျိုလေးကို တိရဇမြို့နှင့် အဘယ်ကြောင့်နှိုင်းယှဉ်သနည်း။ ခါနာန်လူမျိုးတို့၏မြို့ဖြစ်သော ထိုမြို့ကို ယောရှုသိမ်းပိုက်ခဲ့ခြင်းဖြစ်ပြီး ရှောလမုန်ခေတ်နောက်ပိုင်းတွင် တိရဇမြို့သည် ဣသရေလလူမျိုး မြောက်ပိုင်းဆယ်နွယ်နိုင်ငံ၏ ပထမဦးဆုံးမြို့တော် ဖြစ်လာခဲ့သည်။ (ယောရှု ၁၂:၇၊ ၂၄; ၃ ဓမ္မရာဇဝင် ၁၆:၅၊ ၆၊ ၈၊ ၁၅) “ဤတွင်ဖော်ပြထားသည်ကိုထောက်လျှင် ယင်းမြို့သည် အလွန်လှပသောမြို့တစ်မြို့ ဖြစ်ပုံရသည်” ဟု စာအုပ်တစ်အုပ်တွင်ဆိုထား၏။
၇:၄—ရှောလမုန်သည် ရှုလမိတ်မိန်းမပျိုလေး၏လည်ပင်းကို “ဆင်စွယ်ရဲတိုက်” နှင့်အဘယ်ကြောင့် ခိုင်းနှိုင်းသနည်း။ အစောပိုင်းတွင် မိန်းမငယ်လေးသည် ဤချီးမွမ်းဖွဲ့နွဲ့မှုကို ခံခဲ့ရ၏– “လည်ပင်းသည်လည်း . . . ဒါဝိဒ်မင်း၏ရဲတိုက်နှင့်တူ၏။” (ရှောလမုန်သီချင်း ၄:၄) ရဲတိုက်တစ်ခုသည် ရှည်ပြီးသွယ်ကာ ဆင်စွယ်မှာမူ ချောမွတ်သည်။ ရှောလမုန်သည် မိန်းမငယ်၏ သေးသွယ်၊ ချောမွတ်သည့်လည်ပင်းကို သဘောကျစွဲမှတ်ခဲ့သည်။
ကျွန်ုပ်တို့အတွက်သင်ခန်းစာ–
၄:၁-၇။ ရှုလမိတ်သည် မစုံလင်သူဖြစ်သော်လည်း ရှောလမုန်၏ သွေးဆောင်ဖြားယောင်းမှုကို ခုခံခြင်းဖြင့် ကိုယ်ကျင့်တရားဘက်တွင် အပြစ်အနာအဆာမရှိကြောင်း တင်ပြခဲ့သည်။ သူ၏ကိုယ်ကျင့်တရားကြံ့ခိုင်မှုရှိခြင်းက သူ၏ကာယလှပမှုကို ပို၍အလှတိုးစေခဲ့သည်။ စစ်မှန်သောခရစ်ယာန်အမျိုးသမီးများလည်း ထိုသို့ပင်ဖြစ်သင့်သည်။
၄:၁၂။ သော့ခတ်ထားသောတံခါးဝဖြင့်သာ ဝင်ရောက်နိုင်သည့် ခြံစည်းရိုး သို့မဟုတ် အုတ်တံတိုင်းခတ်ထားသည့် လှပသောဥယျာဉ်တစ်ခုကဲ့သို့ပင် ရှုလမိတ်မိန်းမပျိုလေး၏ ခင်ပွန်းလောင်းသာလျှင် သူ၏ချစ်ခင်တွယ်တာမှုကို ရရှိနိုင်သည်။ လက်မထပ်ရသေးသော ခရစ်ယာန်အမျိုးသမီး၊ အမျိုးသားများအတွက် အလွန်ကောင်းသော ပုံသက်သေပင်!
“ဂျား၏မီးလျှံ”
ရှုလမိတ်အိမ်သို့ပြန်လာသည်ကို သူ၏အစ်ကိုများမြင်သည့်အခါ “မိမိချစ်သူကိုမှီလျက် တောမှလာနေသောထိုသူကား အဘယ်သူဖြစ်ပါလိမ့်မည်နည်း” ဟုမေးကြသည်။ အစောပိုင်းအချိန်တစ်ချိန်တွင် သူ၏အစ်ကိုတစ်ဦးက “သူသည် မြို့ရိုးဖြစ်လျှင် သူ့အပေါ်မှာ ငွေပြအိုးကိုဆောက်မည်။ တံခါးဖြစ်လျှင် အာရဇ်ပျဉ်ပြားဖြင့် ခိုင်ခံ့စေမည်” ဟုပြောခဲ့သည်။ ရှုလမိတ်၏မေတ္တာသည် စမ်းသပ်ခံပြီး၊ စစ်ဆေးခံပြီးဖြစ်၍ မသွေမဖည်တည်မြဲကြောင်း ယခု သူဤသို့ဆို၏– “ငါသည်မြို့ရိုးဖြစ်၏။ ငါ့သားမြတ်တို့သည် ပြအိုးကဲ့သို့ဖြစ်ကြ၏။ သို့ဖြစ်၍ ရှေ့တော်၌ မျက်နှာရသောကျေးဇူးရှိ၏။”—ရှောလမုန်သီချင်း ၈:၅၊ သမ္မာ၊ ၉၊ ၁၀။
မေတ္တာစစ်သည် “ဂျား၏မီးလျှံ” ဖြစ်သည်။ အဘယ်ကြောင့်နည်း။ ထိုသို့သောမေတ္တာသည် ယေဟောဝါထံမှ အစပြုသောကြောင့်ဖြစ်သည်။ ကိုယ်တော်သည် ကျွန်ုပ်တို့ကို မေတ္တာပြနိုင်သည့်စွမ်းရည်ရှိရန် ဖန်ဆင်းထားတော်မူသည်။ ယင်းမေတ္တာသည် မငြိမ်းသတ်နိုင်သော မီးတောက်တစ်ခုဖြစ်သည်။ ရှောလမုန်သီချင်းတွင် အမျိုးသားတစ်ဦးနှင့် အမျိုးသမီးတစ်ဦးကြားရှိ မေတ္တာသည် “သေခြင်းနှင့်အမျှတန်ခိုးကြီး [စွဲမြဲ]” ကြောင်း လှလှပပပုံဖော်ထားသည်။—ရှောလမုန်သီချင်း ၈:၆။
သီချင်းတကာတို့၏အထွတ်ဖြစ်သော ရှောလမုန်သီချင်းသည် ယေရှုခရစ်နှင့် ကောင်းကင် “သတို့သမီး” အဝင်တို့ကြားရှိ နှောင်ကြိုးကိုလည်း ဖော်ပြသည်။ (ဗျာ. ၂၁:၂၊ ၉) ဝိညာဉ်တော်ဖွားခရစ်ယာန်များအပေါ်ထားရှိသော ယေရှု၏မေတ္တာသည် အမျိုးသားတစ်ဦးနှင့် အမျိုးသမီးတစ်ဦးကြားရှိ မည်သည့်မေတ္တာထက်မဆို သာလွန်သည်။ သတို့သမီးအတန်းအစားအဝင်တို့၏ ကြီးမားသောမေတ္တာသည် တည်မြဲခိုင်ခံ့သည်။ ယေရှုသည် “အခြားသိုး” အတွက်လည်း မိမိ၏အသက်ကို မေတ္တာပါပါပေးခဲ့ခြင်းဖြစ်သည်။ (ယောဟန် ၁၀:၁၆) သို့ဖြစ်၍ စစ်မှန်သောဝတ်ပြုသူအားလုံးသည် ရှုလမိတ်၏ မယိမ်းယိုင်သောမေတ္တာ၊ ကြီးမားသောမေတ္တာပုံနမူနာကို အတုယူနိုင်သည်။
[စာမျက်နှာ ၁၈၊ ၁၉ ပါ ရုပ်ပုံ]
ရှောလမုန်သီချင်းက အိမ်ထောင်ဖက်ရှာဖွေနေသူတို့ကို အဘယ်အရာသွန်သင် ပေးသနည်း