အန္တိခရစ် ဖော်ထုတ်ခံရ

ဖွင့်ပါ

အန္တိခရစ် ဖော်ထုတ်ခံရ

သေစေနိုင်သော ကူးစက်ရောဂါတစ်မျိုး သင့်ဒေသတွင် အလျင်အမြန်ပျံ့နှံ့လာနေသည် ဆိုပါစို့။ သင့်ကိုယ်သင် မည်သို့ကာကွယ်မည်နည်း။ ကိုယ်ခံအားကောင်းအောင် ကြိုးစားပြီး ရောဂါကူးစက်ခံရသူများကို ဝေးဝေးရှောင်ခြင်းဖြင့် ကာကွယ်ပေမည်။ ဝိညာဉ်ရေးသဘောအရလည်း ထိုသို့ပြုလုပ်ရမည်။ အန္တိခရစ်သည် “ဤလောက၌ယခုပင်ရှိ” သည်ဟု သမ္မာကျမ်းစာကဆိုသည်။ (၁ ယောဟန် ၄:၃၊ သမ္မာ) “ရောဂါကူးစက်” မခံလိုပါက “ရောဂါပိုးသယ်ဆောင်သူများ” ကိုသိရှိထားကာ ဝေးဝေးရှောင်ရမည်ဖြစ်သည်။ သမ္မာကျမ်းစာက အန္တိခရစ်နှင့်ပတ်သက်၍ အလင်းဖြာပေးသောကြောင့် ကျေးဇူးတင်စရာပင်။

“အန္တိခရစ်” ဟူသည် “ခရစ်တော်ကို ဆန့်ကျင်ခြင်း (သို့မဟုတ် အစားထိုးခြင်း)” ကိုဆိုလိုသည်။ ထို့ကြောင့် ထိုစကားလုံးသည် ခရစ်တော် သို့မဟုတ် ကိုယ်တော်၏ကိုယ်စားလှယ်များကို ဆန့်ကျင်သူအားလုံး၊ ခရစ်တော် သို့မဟုတ် ကိုယ်တော်၏ကိုယ်စားလှယ် အတုအယောင်များအားလုံးကို ဆိုလိုသည်။ “ငါ့ဘက်၌မနေသောသူသည် ငါ့ရန်ဘက် [သို့မဟုတ် အန္တိခရစ်] ဖြစ်၏။ ငါနှင့်အတူမစုမသိမ်းသောသူသည် ကြဲဖြန့်သောသူဖြစ်၏” ဟုယေရှုကိုယ်တိုင် မိန့်ဆိုခဲ့သည်။—လုကာ ၁၁:၂၃။

ယေရှုသေဆုံးကာ ကောင်းကင်သို့ထမြောက်ပြီးနောက် အနှစ် ၆၀ ကျော်မှ တမန်တော်ယောဟန်က အန္တိခရစ်အကြောင်း ရေးသားခဲ့သည်။ ထို့ကြောင့် မြေကြီးပေါ်ရှိ ယေရှု၏သစ္စာရှိနောက်လိုက်များကို အန္တိခရစ်များ မည်သို့ထိခိုက်စေကြောင်း သိရှိလျှင် အန္တိခရစ်၏လုပ်ဆောင်မှုများကို ကောင်းစွာနားလည်နိုင်မည်ဖြစ်သည်။—မဿဲ ၂၅:၄၀၊ ၄၅။

ခရစ်တော်၏နောက်လိုက်များကို ဆန့်ကျင်သူများသည် အန္တိခရစ်ဖြစ်

ယေရှုက လောကသားအများစုသည် မိမိနောက်လိုက်များကို မုန်းတီးမည်ဖြစ်ကြောင်း ဤသို့သတိပေးခဲ့၏– ‘လူများတို့သည် သင်တို့ကိုညှဉ်းဆဲခြင်း၊ အသေသတ်ခြင်းကိုခံစေခြင်းငှာ အပ်နှံကြလိမ့်မည်။ ငါ၏နာမကြောင့်လည်း ခပ်သိမ်းသောလူမျိုးတို့သည် သင်တို့ကိုမုန်းကြလိမ့်မည်။ ပရောဖက်အတုအယောင်အများတို့သည် ပေါ်လာ၍ လူအများတို့ကို လှည့်ဖြားကြလိမ့်မည်။’—မဿဲ ၂၄:၉၊ ၁၁။

“[ယေရှု] ၏နာမကြောင့်” တပည့်များ နှိပ်စက်ညှဉ်းပန်းခံရခြင်းဖြစ်ရာ ထိုနှိပ်စက်သူများသည် ခရစ်တော်ကိုဆန့်ကျင်သော အန္တိခရစ်များ အမှန်ဖြစ်ကြသည်။ တစ်ချိန်က ခရစ်ယာန်ဖြစ်ဖူးသူအချို့ ပါဝင်သော ‘ပရောဖက်အတုအယောင်’ များလည်း အန္တိခရစ်များဖြစ်ကြသည်။ (၂ ယောဟန် ၇) ထိုအန္တိခရစ်များသည် “ငါတို့ထံမှထွက်သွားကြ၏။ သို့သော်လည်း အထက်ကငါတို့နှင့်မစပ်ဆိုင်ကြ။ ငါတို့နှင့်စပ်ဆိုင်လျှင် ငါတို့နှင့်အတူနေကြလိမ့်မည်” ဟုယောဟန်ရေးခဲ့သည်။—၁ ယောဟန် ၂:၁၈၊ ၁၉။

ယေရှုနှင့်ယောဟန်တို့၏စကားများအရ အန္တိခရစ်သည် ပုဂ္ဂိုလ်တစ်ဦးတစ်ယောက်မဟုတ်ဘဲ အန္တိခရစ်အများဖြစ်ကြောင်း ထင်ရှားသည်။ ထို့ပြင် ပရောဖက်အတုအယောင်များဖြစ်သော သူတို့၏အဓိကရည်ရွယ်ချက်မှာ ဘာသာရေးလိမ်လည်လှည့်ဖြားရန်ဖြစ်သည်။ သူတို့၏နည်းပရိယာယ်အချို့ကား အဘယ်နည်း။

ဘာသာရေးလိမ်လည်မှုများကို ဝါဒဖြန့်ခြင်း

တမန်တော်ပေါလုသည် လုပ်ဖော်ဆောင်ဖက် တိမောသေအား အယူဖောက်ပြန်သူများ၏ သွန်သင်ချက်များကို ဂရုပြုရှောင်ရှားရန် သတိပေးခဲ့သည်။ ထိုသူတို့တွင် ဟုမေနဲနှင့်ဖိလက်တို့ပါဝင်ပြီး “သူတို့၏စကားသည် ခူနာကဲ့သို့စားလိမ့်မည်။” ထို့ပြင် ‘သူတို့က သေလွန်သောသူတို့သည် ထမြောက်ကြပြီဟုပြောလျက် အမှန်တရားလမ်းမှလွဲသွား၍ အချို့သောသူတို့၏ယုံကြည်ခြင်းကို မှောက်လှန်တတ်ကြ၏’ ဟုပေါလုဆိုခဲ့သည်။ (၂ တိမောသေ ၂:၁၆-၁၈) ဟုမေနဲနှင့်ဖိလက်တို့က ရှင်ပြန်ထမြောက်ခြင်းသည် ပုံဆောင်ချက်တစ်ခုဖြစ်ပြီး ခရစ်ယာန်များသည် ဝိညာဉ်ရေးသဘောအရ ထမြောက်ပြီးဖြစ်သည်ဟုဆိုခဲ့ပုံရသည်။ မှန်ပါသည်၊ လူတစ်ဦး ယေရှု၏တပည့်စစ်ဖြစ်လာသောအခါ ဘုရားသခင့်မျက်မှောက်တော်တွင် အသက်ရှင်လာသည်ဟု ပေါလုကိုယ်တိုင် ဆိုခဲ့သည်။ (ဧဖက် ၂:၁-၅) သို့သော် ဟုမေနဲနှင့်ဖိလက်တို့၏ သွန်သင်ချက်က ဘုရားသခင့်နိုင်ငံတော်အုပ်ချုပ်မှုအောက်တွင် လူသေများ အမှန်တကယ်ထမြောက်လာမည်ဟူသော ယေရှု၏ကတိတော်ကို မထီမဲ့မြင်ပြုခြင်းဖြစ်သည်။—ယောဟန် ၅:၂၈၊ ၂၉။

ပုံဆောင်ရှင်ပြန်ထမြောက်ခြင်း အယူအဆသည် နောက်ပိုင်းတွင် ဘာသာရေးအုပ်စုတစ်စုကြောင့် ပျံ့နှံ့လာသည်။ သူတို့က အသိပညာကို လျှို့ဝှက်ဆန်းကြယ်သောနည်းဖြင့် ရရှိနိုင်သည်ဟု ယုံကြည်ကြသောကြောင့် အယူဖောက်ပြန်သော ခရစ်ယာန်ဘာသာကို ဂရိအတွေးအခေါ်ပညာ၊ အရှေ့တိုင်း လျှို့ဝှက်ဆန်းကြယ်သည့်ပညာတို့နှင့် ရောနှောခဲ့သည်။ ဥပမာ၊ သူတို့က အသွေးအသားဟူသမျှသည် ဆိုးညစ်၏ဟု ခံယူထားကြသောကြောင့် ယေရှုတွင် လူ့ခန္ဓာကိုယ်ရှိပုံရသော်လည်း သွေးသားခန္ဓာနှင့် ကြွမလာခဲ့ဟူသော အယူမှားကို ယုံကြည်ခဲ့ကြသည်။ ကျွန်ုပ်တို့သိခဲ့ရသည်အတိုင်း ယင်းအချက်ကိုပင် တမန်တော်ယောဟန် သတိပေးခဲ့ခြင်းဖြစ်သည်။—၁ ယောဟန် ၄:၂၊ ၃; ၂ ယောဟန် ၇။

ရာစုနှစ်ချီကြာပြီးနောက် ပေါ်လာသော နောက်အယူမှားတစ်ခုမှာ သန့်ရှင်းသောသုံးပါးပေါင်းတစ်ဆူအယူ ဖြစ်သည်။ ထိုအယူအရ ယေရှုသည် အတိုင်းအဆမဲ့တန်ခိုးရှင် ဘုရားသခင်လည်းဖြစ်ပြီး ဘုရားသခင်၏သားတော်လည်းဖြစ်သည်။ The Church of the First Three Centuries (ပထမသုံးရာစုမှချာ့ခ်ျ) စာအုပ်တွင် ဒေါက်တာ အယ်လ်ဗန်လမ်စန် ဤသို့ဆိုသည်– သုံးပါးပေါင်းတစ်ဆူအယူသည် “ဂျူးနှင့်ခရစ်ယာန်ကျမ်းစောင်များ၏ ပြင်ပရင်းမြစ်မှ စတင်ခဲ့သည်။ ပလေတိုအယူကိုလက်ခံသော ချာ့ခ်ျဖခင်များ၏လက်ချက်ဖြင့် တဖြည်းဖြည်းအကောင်အထည်ပေါ်လာပြီး ခရစ်ယာန်ဘာသာအတွင်း ထည့်သွင်းဆက်ခံယူခဲ့သည်။” “ပလေတိုအယူကိုလက်ခံသော ချာ့ခ်ျဖခင်များ” မှာ မည်သူတို့နည်း။ သူတို့သည် အယူမှားဂရိအတွေးအခေါ်ပညာရှင် ပလေတို၏ သွန်သင်ချက်များကို ကြည်ညိုလေးမြတ်သော အယူဖောက်ပြန်သည့်ခရစ်ယာန်ဘုန်းကြီးများဖြစ်သည်။

သုံးပါးပေါင်းတစ်ဆူအယူသည် ဘုရားသခင်ကို လျှို့ဝှက်နက်နဲသူအဖြစ် မြင်စေပြီး ကိုယ်တော်နှင့်သားတော်တို့၏ဆက်ဆံရေးကို ဝေဝါးစေသောကြောင့် ယင်းသည် အန္တိခရစ်များ၏ အကြံပိုင်သောလုပ်ဆောင်ချက်တစ်ခုဖြစ်သည်။ (ယောဟန် ၁၄:၂၈; ၁၅:၁၀; ကောလောသဲ ၁:၁၅) ဘုရားသခင်သာ လျှို့ဝှက်နက်နဲရာဖြစ်ပါက သမ္မာကျမ်းစာတွင် အားပေးထားသည်အတိုင်း လူတစ်ဦးသည် အဘယ်နည်းဖြင့် “ဘုရားသခင်၌ချဉ်းကပ်” နိုင်မည်ကိုသာ စဉ်းစားကြည့်ပါ။—ယာကုပ် ၄:၈။

ပို၍ရှုပ်ထွေးစေသည်မှာ မူရင်းကျမ်းတွင် ဘုရားသခင်၏နာမတော် ယေဟောဝါသည် အကြိမ်ပေါင်း ၇,၀၀၀ ကျော်ပါရှိသော်လည်း ကျမ်းစာဘာသာပြန်သူများသည် ယင်းကို မိမိတို့၏ဘာသာပြန်ကျမ်းများမှ ထုတ်ပစ်ကြသည်။ အတိုင်းအဆမဲ့တန်ခိုးရှင်ကို လျှို့ဝှက်နက်နဲရာအဖြစ်သာမက အမည်မသိလျှို့ဝှက်နက်နဲရာ ဖြစ်စေရန်ပါ ကြိုးပမ်းခြင်းသည် ဖန်ဆင်းရှင်နှင့် ကိုယ်တော့်နှုတ်မြွက်တော်သမ္မာကျမ်းစာကို လုံးဝမထီမဲ့မြင်ပြုခြင်းပင်ဖြစ်သည်။ (ဗျာ. ၂၂:၁၈၊ ၁၉) ထို့ပြင် နာမတော်မြတ်ကို သခင်အရှင်၊ ဘုရားသခင် စသည်တို့နှင့်အစားထိုးခြင်းသည် ယေရှု၏စံပြဆုတောင်းချက်မှ “ကိုယ်တော်၏နာမတော် သန့်ရှင်းမြင့်မြတ်ခြင်းရှိပါစေသော” ဟူသည့်အချက်ကို ချိုးဖောက်ရာကျသည်။—မဿဲ ၆:၉၊ ကဘ။

အန္တိခရစ်များသည် ဘုရားသခင့်နိုင်ငံတော်ကို ငြင်းပယ်

အန္တိခရစ်များသည် ကျွန်ုပ်တို့အသက်ရှင်နေသည့် “ခဲယဉ်းသောကာလ” တွင် အထူးသဖြင့် တက်ကြွလှုပ်ရှားလာသည်။ (၂ တိမောသေ ၃:၁) မျက်မှောက်ခေတ်မှ ထိုလှည့်ဖြားသူများ၏ အဓိကရည်ရွယ်ချက်မှာ ကောင်းကင်နိုင်ငံတော်ဘုရင်အဖြစ် မြေကြီးတစ်ခွင်လုံးကို မကြာမီအုပ်ချုပ်တော့မည့် ယေရှု၏ကဏ္ဍကို လူတို့ ထင်ယောင်ထင်မှားဖြစ်စေရန်ဖြစ်သည်။—ဒံယေလ ၇:၁၃၊ ၁၄; ဗျာ. ၁၁:၁၅။

ဥပမာ၊ ဘာသာရေးခေါင်းဆောင်အချို့က ဘုရားသခင့်နိုင်ငံတော်သည် လူတို့၏နှလုံးထဲရှိ အခြေအနေဖြစ်သည်ဟူသော သမ္မာကျမ်းစာကိုလုံးဝအခြေမခံသည့်အယူအဆကို သွန်သင်ကြသည်။ (ဒံယေလ ၂:၄၄-၄၅) အခြားသူတို့က ခရစ်တော်သည် လူ့အစိုးရများ၊ အဖွဲ့အစည်းများကို အသုံးပြုနေသည်ဟုဆိုကြသည်။ သို့သော် ယေရှုက “ငါ၏နိုင်ငံသည် ဤလောကနှင့်မစပ်ဆိုင်” ဟုမိန့်ဆိုသည်။ (ယောဟန် ၁၈:၃၆) အမှန်မှာ “ဤလောကကိုအစိုးရသောမင်း” နှင့် ‘ဤလောကကိုအစိုးရသောဘုရားသခင်’ မှာ ယေရှုမဟုတ်ဘဲ စာတန်သာဖြစ်၏။ (ယောဟန် ၁၄:၃၀; ၂ ကောရိန္သု ၄:၄) ထိုအချက်က မကြာမီ လူ့အစိုးရအားလုံးကို ယေရှု အဘယ်ကြောင့် ဖျက်ဆီးမည်ဖြစ်ပြီး မြေကြီး၏ တစ်ပါးတည်းသောရှင်ဘုရင်ဖြစ်လာမည်ကို ရှင်းပြသည်။ (ဆာလံ ၂:၂၊ ၆-၉; ဗျာ. ၁၉:၁၁-၂၁) ဘုရားသခင်၏ “နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်မှာပြည့်စုံပါစေသော” ဟူသည့် သခင့်ဆုတောင်းချက်ကို လူတို့ရွတ်ဆိုရာတွင် ထိုသို့ဖြစ်လာရန် ဆုတောင်းနေခြင်းဖြစ်သည်။—မဿဲ ၆:၁၀။

ဘာသာရေးခေါင်းဆောင်များစွာသည် လောကနိုင်ငံရေးစနစ်များကို ထောက်ခံသူများဖြစ်သောကြောင့် ဘုရားသခင့်နိုင်ငံတော်အမှန်တရားကြေညာသူတို့ကို ဆန့်ကျင်ညှဉ်းပန်းကြသည်။ စိတ်ဝင်စားစရာမှာ ဗျာ.ကျမ်းစောင်တွင် “သန့်ရှင်းသူတို့၏အသွေး၊ ယေရှု၏သက်သေခံတို့၏အသွေးနှင့်ယစ်မူး” နေသည့် ပုံဆောင်ပြည့်တန်ဆာဖြစ်သော ‘မဟာဗာဗုလုန်’ အကြောင်းဖော်ပြထားသည်။ (ဗျာ. ၁၇:၄-၆) သူသည် မြေကြီး “ရှင်ဘုရင်” များ သို့မဟုတ် နိုင်ငံရေးအာဏာရှင်များကို ထောက်ခံခြင်းဖြင့် ဝိညာဉ်ရေးပြည့်တန်ဆာလုပ်နေရာ အပြန်အလှန်အားဖြင့် သူတို့၏မျက်နှာသာရရှိလေသည်။ ထိုပုံဆောင်မိန်းမသည် ကမ္ဘာ့အယူမှားဘာသာများမှလွဲ၍ အခြားမဖြစ်နိုင်ပေ။ သူသည် အန္တိခရစ်၏အဓိကအစိတ်အပိုင်းပင်ဖြစ်၏။—ဗျာ. ၁၈:၂၊ ၃; ယာကုပ် ၄:၄။

အန္တိခရစ်များသည် နားကိုယားစေကြ

ခရစ်ယာန်အမည်ခံသူများစွာသည် ကျမ်းစာအမှန်တရားကို ငြင်းပယ်သည့်အပြင် ရေပန်းစားနေသည့် ကိုယ်ကျင့်တရားကိုလက်ခံရန် ကျမ်းစာစံနှုန်းများကို စွန့်ပစ်ခဲ့ကြသည်။ ထိုသို့ဖြစ်မည်ကို သမ္မာကျမ်းစာက ဤသို့ကြိုပြောခဲ့၏– ‘နောင်ကာလ၌ လူတို့သည် [ဘုရားသခင်ကိုကိုးကွယ်သည်ဟု ဆိုသော်လည်း] စင်ကြယ်သောဆုံးမစကားကို နားမခံနိုင်ဘဲ ယားတတ်သောနားရှိလျှင် မိမိတပ်မက်ခြင်းအတိုင်း များပြားသောဆရာတို့နောက်သို့ လိုက်ကြလိမ့်မည်။’ (၂ တိမောသေ ၄:၃) ထိုဘာသာရေးလိမ်လည်သူများကို “ခရစ်တော်၏တမန်ဖြစ်ယောင်ဆောင်၍ လှည့်ဖြားတတ်သောအမှုစောင့်” ဟုလည်းခေါ်ထားသည်။ “သူတို့သည် ကိုယ်ကျင့်သောအကျင့်အတိုင်း နောက်ဆုံး၌ အကျိုးအပြစ်ကိုခံရကြလတ္တံ့” ဟုလည်း သမ္မာကျမ်းစာက ထပ်ဆိုသည်။—၂ ကောရိန္သု ၁၁:၁၃-၁၅။

သူတို့၏အကျင့်များတွင် မြင့်မားသောကိုယ်ကျင့်တရားစံနှုန်းများကို မျက်နှာပြောင်တိုက် လျစ်လျူရှုသည့် “ညစ်ညူးသောအကျင့်ဓလေ့” များပါဝင်သည်။ (၂ ပေတရု ၂:၁-၃၊ ၁၂-၁၄) ဘာသာရေးခေါင်းဆောင်များနှင့် သူတို့၏နောက်လိုက်များစွာသည် လိင်တူဆက်ဆံခြင်း၊ အိမ်ထောင်ရေးဖောက်ပြန်ခြင်းစသော ခရစ်ယာန်မဆန်သည့်အကျင့်များကို ကိုယ်တိုင်ပြုကျင့်နေသည်၊ ယုတ်စွအဆုံး ယင်းတို့ကို အရေးမယူဘဲ လျစ်လျူရှုထားကြောင်း မတွေ့ကြရပေလော။ လူများစွာလက်ခံထားသော ထိုအမြင်များနှင့်ဘဝပုံစံများကို ဝတ်ပြုရာ ၁၈:၂၂; ရောမ ၁:၂၆၊ ၂၇; ၁ ကောရိန္သု ၆:၉၊ ၁၀; ဟေဗြဲ ၁၃:၄; ယုဒ ၇ တို့တွင်ပါသော သမ္မာကျမ်းစာဖော်ပြချက်များနှင့် ကျေးဇူးပြု၍ အချိန်ယူနှိုင်းယှဉ်ကြည့်ပါ။

“စုံစမ်းကြလော့”

အထက်ပါအချက်များကြောင့် ဘာသာရေးသွန်သင်ချက်များကို ပေါ့ပေါ့တန်တန်သဘောမထားနှင့်ဟူသော တမန်တော်ယောဟန်၏စကားများကို အလေးဂရုပြုသင့်သည်။ သူဤသို့သတိပေး၏– ‘ခပ်သိမ်းသောစိတ်ဝိညာဉ်တို့ကို မယုံကြနှင့်။ စိတ်ဝိညာဉ်တို့သည် ဘုရားသခင်နှင့်စပ်ဆိုင်သည် မစပ်ဆိုင်သည်ကို စုံစမ်းကြလော့။ အကြောင်းမူကား ပရောဖက်အတုအယောင်အများတို့သည် ဤလောကသို့သွားကြပြီ။’—၁ ယောဟန် ၄:၁။

ပထမရာစုမှ စိတ်ထားမြင့်မြတ်သော ဗေရိမြို့သားအချို့၏ ပုံသက်သေကောင်းကို သုံးသပ်ကြည့်ပါ။ သူတို့သည် ‘အလွန်ကြည်ညိုသောစေတနာစိတ်နှင့် [ပေါလုနှင့်သိလတို့ဟောသော] နှုတ်မြွက်တော်ကိုခံယူ၍ မှန်သည်မမှန်သည်ကိုသိခြင်းငှာ ကျမ်းစာကို နေ့တိုင်းအစဉ် စေ့စေ့ကြည့်ရှုကြ၏။’ (တမန်တော် ၁၇:၁၀၊ ၁၁) ဗေရိမြို့သားများသည် အလွန်စိတ်ထက်သန်ကြသော်လည်း သူတို့ကြားသိပြီး လက်ခံရာများသည် သမ္မာကျမ်းစာတွင် အခိုင်အမာအခြေပြု,မပြု သေချာဆန်းစစ်ကြသည်။

ယနေ့လည်း ခရစ်ယာန်စစ်များသည် အမြဲပြောင်းလဲနေသော ရေပန်းစားသည့်ခေတ်အမြင်နောက် လိုက်ပါမသွားဘဲ သမ္မာကျမ်းစာအမှန်တရားကိုသာ အခိုင်အမာစွဲကိုင်ထားကြသည်။ တမန်တော်ပေါလု ဤသို့ရေးခဲ့၏– “ငါဆုတောင်းသောအချက်ဟူမူကား၊ သင်တို့၏မေတ္တာသည် တိကျမှန်ကန်သောအသိပညာနှင့် ပြည့်ဝစုံလင်သော ပိုင်းခြားဝေဖန်နိုင်စွမ်းတို့ဖြင့် တိုး၍ကုံလုံကြွယ်ဝနေနိုင်မည်အကြောင်းတည်း။”—ဖိလိပ္ပိ ၁: ၉၊ ကဘ။

သင်ထိုသို့မဖြစ်သေးပါက သမ္မာကျမ်းစာအမှန်တကယ်သွန်သင်ရာကို လေ့လာခြင်းဖြင့် “တိကျမှန်ကန်သောအသိပညာနှင့် ပြည့်ဝစုံလင်သောပိုင်းခြားဝေဖန်နိုင်စွမ်း” တို့ရရှိရန် ပန်းတိုင်ထားပါ။ ဗေရိမြို့သားများကို တုပသူတို့သည် အန္တိခရစ်များ၏ “ချော့မော့သောစကား” အားဖြင့် လှည့်ဖြားမခံရပေ။ (၂ ပေတရု ၂:၃) ယင်းအစား သူတို့သည် ခရစ်တော်အစစ်အမှန်နှင့် ကိုယ်တော့်နောက်လိုက်စစ်များ၏ ဝိညာဉ်ရေးအမှန်တရားကြောင့် လွတ်ငြိမ်းချမ်းသာကို ခံစားရလျက်ရှိသည်။—ယောဟန် ၈:၃၂၊ ၃၆။

[စာမျက်နှာ ၄ ပါ လေးထောင့်ကွက်/ရုပ်ပုံ]

အန္တိခရစ်နှင့် ပတ်သက်သည့် သမ္မာကျမ်းစာအဆို

“ချစ်သားတို့၊ ယခုကာလသည် [တမန်တော်များခေတ်အဆုံးဖြစ်ကြောင်း ထင်ရှားသည့်] နောက်ဆုံးသောကာလဖြစ်၏။ ခရစ်တော်၏ရန်သူတည်းဟူသော အန္တိခရစ်ပေါ်လာကြောင်းကို သင်တို့ကြားရသည်အတိုင်း ယခုပင် အန္တိခရစ်အများရှိ ကြ၏။”—၁ ယောဟန် ၂:၁၈။

“မုသာကိုသုံးသောသူကား အဘယ်သူနည်း။ ယေရှုသည် ခရစ်တော်မဟုတ်ဟု ငြင်းပယ်သောသူဖြစ်သတည်း။ ခမည်းတော်နှင့်သားတော်ကို ငြင်းပယ်သောသူသည် အန္တိခရစ်ဖြစ်၏။” —၁ ယောဟန် ၂:၂၂။

“လူဇာတိအားဖြင့်ကြွလာတော်မူသော ယေရှုခရစ်ကို ဝန်မခံသောသူမည်သည်ကား ဘုရားသခင်နှင့်မစပ်ဆိုင်။ ထိုသို့သောဝိညာဉ်ကား သင်တို့သည် ကြားခဲ့ပြီးသည်အတိုင်း ဤလောကသို့လာမည်ဖြစ်၍ ယခုပင်လာလျက်ရှိသော အန္တိခရစ်၏ဝိညာဉ်ဖြစ်၏။”—၁ ယောဟန် ၄:၃။

“လူဇာတိအားဖြင့်ကြွလာတော်မူသော ယေရှုခရစ်ကိုငြင်းပယ်လျက် လှည့်ဖြားသောသူအများတို့သည် လောကထဲသို့ဝင်ကြပြီ။ ထိုသို့သောသူသည် လှည့်ဖြားသောသူဖြစ်၏။ အန္တိခရစ်လည်းဖြစ်၏။” —၂ ယောဟန် ၇။

[စာမျက်နှာ ၅ ပါ လေးထောင့်ကွက်/ရုပ်ပုံ]

အသွင်အမျိုးမျိုးရှိသော လှည့်ဖြားသူတစ်ဦး

“အန္တိခရစ်” ဟူသောစကားလုံး၌ ယေရှုခရစ်နှင့်ပတ်သက်သော ကျမ်းစာအဆိုများကို ငြင်းပယ်သူအားလုံး၊ ကိုယ်တော့်နိုင်ငံတော်ကိုဆန့်ကျင်သူအားလုံး၊ ကိုယ်တော့်နောက်တော်လိုက်များကို မတော်မတရားပြုမူဆက်ဆံသူအားလုံး အကျုံးဝင်သည်။ ခရစ်တော်ကိုကိုယ်စားပြုသည်ဟု မှားယွင်းစွာဆိုသော သို့မဟုတ် ခရစ်တော်သာဆောင်ကြဉ်းပေးနိုင်သည့် စစ်မှန်သောငြိမ်သက်မှုနှင့်လုံခြုံမှု ရရှိစေမည်ဟု ရောင့်တက်စွာကတိပြုခြင်းဖြင့် မေရှိယ၏အခန်းကဏ္ဍကို မလျော်မကန်အစားဝင်သော ပုဂ္ဂိုလ်များ၊ အဖွဲ့အစည်းများနှင့် တိုင်းနိုင်ငံများလည်းပါဝင်သည်။

[Credit Line]

[စာမျက်နှာ ၇ ပါ ရုပ်ပုံ]

ဗေရိမြို့သားများကဲ့သို့ ကျွန်ုပ်တို့သည် “ကျမ်းစာကို နေ့တိုင်းအစဉ် စေ့စေ့ကြည့်ရှု” သင့်

ကင်းမျှော်စင်—လေ့လာရန် စာစောင်