ယေရှုဖွားမြင်ခြင်းက ငြိမ်သက်ခြင်းဆောင်ကြဉ်းပေးပုံ
ယေရှုဖွားမြင်ခြင်းက ငြိမ်သက်ခြင်းဆောင်ကြဉ်းပေးပုံ
“စေတနာစိတ်ရှိသူတို့တွင် ငြိမ်သက်ခြင်းရှိစေသတည်း” ဟူသော ကြွေးကြော်ချက်သည် ယေရှုဖွားမြင်ခြင်းနှင့်ဆက်စပ်သည့် တစ်ခုတည်းသောပရောဖက်ပြုချက် မဟုတ်ပါ။ ကောင်းကင်တမန်များသည် အံ့အားသင့်နေသော သိုးထိန်းများရှေ့ ထိုသို့ကြွေးကြော်ကြသည့်အပြင် မာရိနှင့် သူ့ခင်ပွန်းယောသပ်တို့အားလည်း မွေးကင်းစယေရှုနှင့်ပတ်သက်သော ဘုရားသခင့်သတင်းစကားများကို ကြွေးကြော်ခဲ့ကြသည်။ ထိုသတင်းစကားများကို သုံးသပ်ခြင်းဖြင့် ယေရှုဖွားမြင်ခြင်းအကြောင်း ပိုသိရှိနိုင်ပြီး လူတို့တွင် ငြိမ်သက်ခြင်းရှိစေသတည်းဟူသော ကောင်းကင်တမန်၏ကတိစကား နောက်ကွယ်ရှိ အဓိပ္ပာယ်အမှန်ကို နားလည်နိုင်သည်။
မာရိ ပဋိသန္ဓေမယူမီ သူ့ထံ ကောင်းကင်တမန်ဂါဗြေလ ရောက်ရှိလာသည်။ ‘ကျေးဇူးတော်ကိုခံရသောမိန်းမ၊ သင့်အား မင်္ဂလာဖြစ်စေသတည်း။ ယေဟောဝါသည် သင်နှင့်အတူရှိတော်မူ၏’ ဟုကောင်းကင်တမန်က နှုတ်ဆက်စကားဆိုလေ၏။ မာရိ အလွန်စိတ်လှုပ်ရှားပြီး ကြောက်ရွံ့နေမည်ကို သင်တွေးကြည့်နိုင်သည်။ ထိုသို့နှုတ်ဆက်ခြင်းက အဘယ်အဓိပ္ပာယ်ရှိသနည်း။
ဂါဗြေလ ဤသို့ရှင်းပြ၏– “သင်သည် ပဋိသန္ဓေစွဲယူ၍ သားယောက်ျားကိုဖွားမြင်လိမ့်မည်။ ထိုသားကို ယေရှုအမည်ဖြင့်မှည့်ရမည်။ ထိုသားသည်ကား ကြီးမြတ်သောသူဖြစ်လိမ့်မည်။ အမြင့်ဆုံးသောဘုရား၏သားတော်ဟု ခေါ်ဝေါ်သမုတ်ခြင်းကိုခံရလိမ့်မည်။ သူ့အဘဒါဝိဒ်၏ရာဇပလ္လင်ကို ထာဝရအရှင်ဘုရားသခင်သည် သူ့အားပေးတော်မူမည်။ ထိုသူသည်လည်း ယာကုပ်အမျိုးအနွယ်ကို အစဉ်မပြတ်အုပ်စိုးလိမ့်မည်။ သူ၏နိုင်ငံသည်လည်း ဆုံးခြင်းမရှိရ။” မာရိက မိမိသည် အပျိုကညာဖြစ်သောကြောင့် အဘယ်သို့ဖြစ်နိုင်မည်နည်းဟု ပြန်မေးလေ၏။ ကောင်းကင်တမန်ကလည်း ဘုရားသခင့် သန့်ရှင်းသောဝိညာဉ်တော်ဖြင့် ပဋိသန္ဓေစွဲမည်ဟုပြောဆိုသည်။ ထိုသားသည် သာမန်ကလေးမဟုတ်ချေ။—လုကာ ၁:၂၈-၃၅။
ကြိုဟောထားသော ဘုရင်တစ်ပါး
ဂါဗြေလ၏စကားအရ ထိုသားသည် ရှေးပရောဖက်ပြုချက်များ၏ အဓိကရည်စူးရာဖြစ်သည်ကို မာရိနားလည်ခဲ့ရသည်။ မာရိ၏သားကို “သူ့အဘဒါဝိဒ်၏ရာဇပလ္လင်” ပေးမည်ဟု ယေဟောဝါမိန့်ဆိုသည်။ ထိုစကားကြောင့် မာရိသာမက ကျမ်းစာအသိပညာရှိသော ဂျူးတို့သည် ဣသရေလဘုရင်ဒါဝိဒ်အား ဘုရားသခင်ပေးခဲ့သောကတိတော်ကို ပြန်သတိရမည်ဖြစ်သည်။
ပရောဖက်နာသန်မှတစ်ဆင့် ဒါဝိဒ်ကို ယေဟောဝါ ဤသို့မိန့်ဆို၏– “သင်၏အမျိုးအနွယ်နှင့် သင်၏နိုင်ငံသည် ငါ့ရှေ့မှာအစဉ်အမြဲတည်လိမ့်မည်။ သင်၏ရာဇပလ္လင်သည်လည်း အစဉ်အမြဲတည်လိမ့်မည်။” (၂ ဓမ္မရာဇဝင် ၇:၄၊ ၁၆) “သူ၏အမျိုးအနွယ်ကို အစဉ်အမြဲတည်စေမည်။ သူ၏ပလ္လင်သည် ကောင်းကင်ကာလကဲ့သို့ နိစ္စထာဝရဖြစ်လိမ့်မည်။ သူ၏အမျိုးအနွယ်သည် အစဉ်အမြဲတည်ရမည်။ သူ၏ပလ္လင်သည်လည်း ငါ့ရှေ့၌ နေကဲ့သို့ဖြစ်ရမည်” ဟုဒါဝိဒ်နှင့်ပတ်သက်၍ ယေဟောဝါမိန့်တော်မူ၏။ (ဆာလံ ၈၉:၂၀၊ ၂၉၊ ၃၅၊ ၃၆) ထို့ကြောင့် ဒါဝိဒ်မျိုးနွယ်မှ မာရိနှင့်ယောသပ်တို့ ဆင်းသက်လာခြင်းသည် တိုက်ဆိုင်မှုမဟုတ်ပါ။
ဒါဝိဒ်၏တော်ဝင်သားတော်နှင့်ပတ်သက်၍ ဟေဗြဲကျမ်းစာပါ ပရောဖက်ပြုချက်များမှာ ထိုမျှလောက်သာမဟုတ်ပါ။ မာရိသည် ဟေရှာယ၏ ဤပရောဖက်ပြုချက်ကိုလည်း အကျွမ်းဝင်ပေမည်– ‘ငါတို့အဖို့ သူငယ်ကိုဖွားမြင်၏။ ငါတို့အား သားကိုသနားတော်မူ၏။ ထိုသူသည် အုပ်စိုးခြင်းအာဏာစက်ရှိလိမ့်မည်။ နာမတော်ကား အံ့သြဖွယ်၊ တိုင်ပင်ဘက်၊ တန်ခိုးကြီးသောဘုရားသခင်၊ ထာဝရအဘ၊ ငြိမ်သက်ခြင်းအရှင်ဟု ခေါ်ဝေါ်သမုတ်ခြင်းကို ခံတော်မူလိမ့်မည်။ ဒါဝိဒ်မင်း၏ရာဇပလ္လင်ပေါ်မှာထိုင်၍ နိုင်ငံတော်ကို နောင်ကာလအစဉ်မပြတ် တရားတော်အတိုင်း ဖြောင့်မတ်စွာစီရင်၍ အမြဲတည်စေတော်မူမည်အကြောင်း အာဏာတော်တိုးတက်ခြင်းနှင့် ငြိမ်သက်တော်မူခြင်းသည် ထာဝရအမြဲရှိလိမ့်မည်။ ကောင်းကင်ဗိုလ်ခြေအရှင်ယေဟောဝါသည် အလိုတော်အားကြီး၍ ထိုအမှုကို ပြီးစီးစေတော်မူလိမ့်မည်။’—ဟေရှာယ ၉:၆၊ ၇။
မာရိကို ဂါဗြေလပြောသော သတင်းစကားသည် အံ့ဖွယ်နည်းဖြင့် သားယောက်ျားလေး ဖွားမြင်ခြင်းမျှသာမကပါ။ ထိုသားသည် ဘုရင်ဒါဝိဒ်၏ နန်းအမွေခံ၊ ဘုရားသခင်တည်ထောင်သည့်နိုင်ငံတော်၏ ထာဝရအမွေခံဖြစ်လိမ့်မည်။ ယေရှု၏ အနာဂတ်အခန်းကဏ္ဍနှင့်ပတ်သက်သော ဂါဗြေလ၏ပရောဖက်ပြုချက်များသည် ကျွန်ုပ်တို့အားလုံးအတွက် လေးနက်သည့်အဓိပ္ပာယ်ရှိပါသည်။
ဇနီးလောင်းဖြစ်သူ မာရိတွင် ကိုယ်ဝန်ရှိနေကြောင်း ယောသပ်ကြားသောအခါ စေ့စပ်ထားခြင်းကို ဖျက်သိမ်းရန် ဆုံးဖြတ်ခဲ့သည်။ သူနှင့် သူ့ဇနီးလောင်းတို့သည် လိင်ဆက်ဆံခဲ့ခြင်းမရှိသောကြောင့် ထိုကလေးသည် မိမိကလေးမဟုတ်ကြောင်း သူသိသည်။ ကိုယ်ဝန်ဆောင်ထားသည့်ကလေးနှင့်ပတ်သက်၍ မာရိ၏ရှင်းပြချက်ကို ယောသပ် မည်မျှယုံရခက်မည်ဖြစ်ကြောင်း သင်တွေးကြည့်နိုင်သည်။ ခရစ်ဝင်ကျမ်းမှတ်တမ်းက ဤသို့ဆို၏– ‘အိပ်မက်ကိုမြင်ရသည်မှာ ယေဟောဝါ၏ကောင်းကင်တမန်သည် ထင်ရှား၍ “ဒါဝိဒ်အမျိုးယောသပ်၊ သင်၏ခင်ပွန်းမာရိကို ထိန်းသိမ်းရမည့်အခွင့်ကို မစိုးရိမ်နှင့်။ ဤပဋိသန္ဓေသည် သန့်ရှင်းသောဝိညာဉ်တော်ကြောင့် ဖြစ်၏။ သားယောက်ျားကို ဖွားမြင်လိမ့်မည်။ ထိုသားသည် မိမိလူတို့ကို အပြစ်မှကယ်ချွတ်မည့်သူဖြစ်သောကြောင့် ယေရှုဟူသောအမည်ဖြင့် မှည့်ရမည်” ဟုကောင်းကင်တမန်ဆို၏။’—မဿဲ ၁:၂၀၊ ၂၁။
ထိုသားသည် အဘယ်နည်းဖြင့် “မိမိလူတို့ကို အပြစ်မှကယ်ချွတ်” ပေးမည်ကို ယောသပ် မည်မျှတိုင်နားလည်ကြောင်း ကျမ်းစာမဖော်ပြပါ။ သို့တိုင် ထိုစကားကြောင့် မာရိအမှားမကျူးလွန်ကြောင်း ယောသပ် ယုံကြည်စိတ်ချခဲ့သည်။ ကောင်းကင်တမန်ညွှန်ကြားသည့်အတိုင်း မာရိကို အိမ်သို့ခေါ်ဆောင်သွားသည်။ ထိုသို့ပြုခြင်းသည် မင်္ဂလာဆောင်ရာရောက်သည်။
ကျမ်းစာတွင်တွေ့ရသော အခြားအချက်အလက်များကြောင့် ကောင်းကင်တမန်ပြောသောစကား၏ အဓိပ္ပာယ်ကို ကျွန်ုပ်တို့နားလည်နိုင်သည်။ လူ့သမိုင်းအစတွင် ပုန်ကန်သောကောင်းကင်တမန်တစ်ပါးသည် ယေဟောဝါ၏အကြွင်းမဲ့ပိုင်သအုပ်စိုးမှုကို စိန်ခေါ်ခဲ့သည်။ ဘုရားသခင့်အုပ်ချုပ်ပုံသည် မမျှတ၊ လူတို့သည် စမ်းသပ်မှုကြုံရပါက ယေဟောဝါအပေါ် တည်ကြည်မည်မဟုတ် စသည်ဖြင့် သူစွပ်စွဲထားကြောင်း ဟေဗြဲကျမ်းစာတွင် ဖော်ပြသည်။ (ကမ္ဘာဦး ၃:၂-၅; ယောဘ ၁:၆-၁၂) အာဒံသည် ယေဟောဝါအပေါ် မတည်ကြည်ခဲ့ပေ။ သူ့အပြစ်၏အကျိုးဆက်အနေနှင့် လူသားတို့သည် အပြစ်ကိုအမွေခံရပြီး အပြစ်ကြောင့် သေကြရသည်။ (ရောမ ၅:၁၂; ၆:၂၃) သို့သော် ယေရှုသည် လူသားဖခင်တစ်ဦးအားဖြင့် မွေးဖွားလာခြင်းမဟုတ်သောကြောင့် အပြစ်မရှိပေ။ ယေရှုသည် အာဒံဆုံးရှုံးခဲ့ရာနှင့် တန်ဖိုးတူရွေးနုတ်ဖိုးအဖြစ် မိမိ၏စုံလင်သောလူ့အသက်ကို လိုလိုလားလားဆက်သခြင်းဖြင့် လူသားတို့ကို အပြစ်တရားလက်မှ ကယ်တင်ပြီး ထာဝရအသက် ကမ်းလှမ်းခဲ့လေသည်။—၁ တိမောသေ ၂:၃-၆; တိတု ၃:၆၊ ၇; ၁ ယောဟန် ၂:၂၅။
အပြစ်၏အကျိုးဆက်များကို ဖယ်ရှားခြင်းသည် ဘာကိုဆိုလိုကြောင်း မြေကြီးပေါ်အမှုဆောင်စဉ် ယေရှု နမူနာပြသခဲ့သည်။ အနာရောဂါအမျိုးမျိုးကို ကုသပေးခဲ့ပြီး သေသူကိုပင် အသက်ပြန်ရှင်စေခဲ့သည်။ (မဿဲ ၄:၂၃; ယောဟန် ၁၁:၁-၄၄) ထိုအံ့ဖွယ်အမှုများက အနာဂတ်တွင် ကိုယ်တော်ပြုလုပ်မည့်အရာ၏ ရှေ့ပြေးဖြစ်သည်။ ယေရှုကိုယ်တိုင် ဤသို့မိန့်ဆို၏– “သင်္ချိုင်းများမှာရှိသောသူအပေါင်းတို့သည် သားတော်၏စကားသံကိုကြား၍ ထွက်ရမည့်အချိန်ကာလရောက်လတ္တံ့။”—ယောဟန် ၅:၂၈၊ ၂၉။
ထိုရှင်ပြန်ထမြောက်ခြင်းကတိတော်က ယေရှုဖွားမြင်ခြင်း၊ အထူးသဖြင့် သေခြင်းသည် ကျွန်ုပ်တို့အတွက် အဘယ်ကြောင့်အရေးကြီးဆုံးဖြစ်ကြောင်း ရှင်းပြသည်။ ‘လောကသားတို့သည် ကိုယ်တော်အားဖြင့် ကယ်တင်ခြင်းသို့ရောက်မည်အကြောင်း’ ဘုရားသခင်သည် မိမိသားတော်ကို လောကသို့စေလွှတ်တော်မူ၏ဟု ယောဟန် ၃:၁၇ ကဆိုသည်။ ထိုသတင်းကောင်းက ယေရှုဖွားမြင်သည့်ညတွင် သိုးထိန်းများအားပြောဆိုခဲ့သော ကြွေးကြော်ချက်ကို သတိရစေသည်။
“အလွန်ဝမ်းမြောက်ဝမ်းသာစရာသတင်း”
“သခင်ခရစ်တော်တည်းဟူသော ကယ်တင်သောအရှင်” မွေးဖွားကြောင်းကို ကောင်းကင်တမန်များ ကြွေးကြော်ကြစဉ် ယင်းသည် လူသားများအတွက် “အလွန်ဝမ်းမြောက်ဝမ်းသာစရာသတင်း” အမှန်ဖြစ်ခဲ့၏။ (လုကာ ၂:၁၀၊ ၁၁) ထိုကလေးသည် ဘုရားသခင့်လူမျိုးတော် ကြာမြင့်စွာက စောင့်မျှော်ခဲ့သည့် ကြီးမြတ်သောပရောဖက်၊ အုပ်စိုးရှင် မေရှိယဖြစ်သည်။ (တရားဟောရာ ၁၈:၁၈; မိက္ခာ ၅:၂) မြေကြီးပေါ် ကိုယ်တော်အသက်ရှင်ခြင်းနှင့် သေခြင်းသည် ယေဟောဝါ၏ စကြဝဠာအကြွင်းမဲ့ပိုင်သအုပ်စိုးမှု သံသယကင်းရှင်းရေးကိစ္စတွင် အဓိကဖြစ်သောကြောင့် ကောင်းကင်တမန်များက “ကောင်းကင်ဘဝဂ်ဝယ် ဘုရားသခင်သည် [ဘုန်းတန်ခိုးတော်ရှိ] စေသတည်း” ဟုမြွက်ဆိုနိုင်ကြခြင်းဖြစ်သည်။—လုကာ ၂:၁၄။
‘နောက်ဆုံးအာဒံ’ ဟုကျမ်းစာတွင်ခေါ်ဆိုထားသော ယေရှုက လူတစ်ဦးသည် စမ်းသပ်မှုများကြုံရငြား ယေဟောဝါကိုသစ္စာရှိနိုင်ကြောင်း ပြသတော်မူခဲ့သည်။ (၁ ကောရိန္သု ၁၅:၄၅) ထို့ကြောင့် စာတန်သည် ဆိုးညစ်သောမုသာကောင်ဖြစ်ကြောင်း ကိုယ်တော် သက်သေထူခဲ့၏။ ယင်းကြောင့်လည်း ကောင်းကင်တွင် သစ္စာရှိကောင်းကင်တမန်များ ရွှင်လန်းခဲ့ကြ၏။
သို့သော် “ယေရှုဖွားမြင်သောညတွင် ကောင်းကင်တမန်ကြွေးကြော်သည့်အတိုင်း ပြည့်စုံလာမည်ဟု အမှန်ပင်မျှော်လင့်နိုင်သလော” ဟူသည့်မေးခွန်းကို ပြန်သုံးသပ်ကြည့်ကြစို့။ အဖြေမှာ မျှော်လင့်နိုင်ပါသည်။ ကမ္ဘာပေါ် ပရဒိသုပြန်လည်တည်ထောင်စေမည်ဟူသော ဘုရားသခင့်ရည်ရွယ်ချက် ပြည့်စုံရေးတွင် ငြိမ်သက်ခြင်းသည် အရေးကြီးသောအရာဖြစ်သည်။ ကမ္ဘာတစ်ခွင် ထိုသို့ဖြစ်လာသောအခါ လူခပ်သိမ်းတွင် မေတ္တာနှင့်သစ္စာတရား ရှိပါလိမ့်မည်။ ထို့ကြောင့် ယေဟောဝါ၏ရည်ရွယ်ချက် ပြည့်စုံရေးတွင် ကိုယ်တော်၏အကြွင်းမဲ့ပိုင်သအုပ်စိုးမှုအား ဆန့်ကျင်ပုန်ကန်သူအားလုံးကို ဖယ်ရှားခြင်းလည်းပါဝင်၏။ ယေဟောဝါ၏စံနှုန်းများသည် အကျိုးမပြုဟုဆိုကာ စာတန်ကိုထောက်ခံသူများအတွက် ယင်းသည် သတင်းကောင်းမဟုတ်ပါ။ ပျက်စီးခြင်းသာ ဖြစ်ပါလိမ့်မည်။—ဆာလံ ၃၇:၁၁; သု. ၂:၂၁၊ ၂၂။
လူအားလုံးတွင် ငြိမ်သက်ခြင်းရှိပြီး စေတနာစိတ်ရှိမည်ဟု သိုးထိန်းများကို ကောင်းကင်တမန်များ မပြောခဲ့ကြောင်း သတိပြုပါ။ ယင်းအစား “စတနာစိတ်ရှိသူတို့တွင် ငြိမ်သက်ခြင်းရှိစေသတည်း” ဟုပြောခဲ့သည်။ ယင်းက ဘုရားသခင့်မျက်နှာသာတော်နှင့် စေတနာခံစားရသူများကို ပြောနေခြင်းဖြစ်၏။ ထိုသူတို့သည် ယေဟောဝါကို အမှန်တကယ်ယုံကြည်ပြီး ယေရှု၏သစ္စာရှိနောက်လိုက်ဖြစ်လာကာ ကိုယ်တော်ကိုတုပသူများဖြစ်သည်။ ထိုသို့သော အမျိုးသားအမျိုးသမီးများသည် အခြားသူများကို တစ်နှစ်တွင် ရက်အနည်းငယ်သာမဟုတ်ဘဲ နေ့စဉ် ရက်ရောမှုနှင့် ကိုယ်ချင်းစာနာမှုတင်ပြကြသည်။
ခရစ်ယာန်စိတ်ဓာတ် တစ်နှစ်ပတ်လုံးရှိသလော
ယေရှုဟောပြောခဲ့သော သတင်းကောင်းသည် လူများစွာ၏အသက်တာကို ဩဇာလွှမ်းမိုးခဲ့သည်။ သူတို့အသက်တာ၏ ကဏ္ဍတိုင်းတွင် ခရစ်ယာန်မူများကို ကျင့်သုံးကြသည်။ ယခင်က အတ္တဆန်သူများသည် ယခု သူတို့ကြုံရသော အခြေအနေမျိုးတွင် ယေရှုဆိုလျှင် ဘာလုပ်မည်နည်းဟု မေးလာကြသည်။ ရုပ်ပစ္စည်းနှင့် အပျော်အပါးကို အဓိကထားခဲ့သူများသည် ယခု ဝိညာဉ်ရေးစံနှုန်းများ၏ အရေးကြီးမှုကို အသိအမှတ်ပြုလာပြီး ယင်းတို့ကို အိမ်နီးချင်းများအား ဝေမျှနေကြသည်။ ထိုသို့ပြုခြင်းဖြင့် ရက်ရောမှုနှင့် ကြင်နာမှုကို တစ်နှစ်ပတ်လုံး တင်ပြကြသည်။ ခရစ်ယာန်စစ်များသည် ထိုသို့ပင်ဖြစ်ရမည်ဟု သင်မျှော်လင့်သည်မဟုတ်လော။
ကောင်းကင်တမန်၏ ငြိမ်သက်ခြင်းသတင်းစကား နောက်ကွယ်ရှိ အဓိပ္ပာယ်ကို စိတ်ရင်းမှန်သူအားလုံး အလေးအနက်သုံးသပ်ပြီး ယင်းနှင့်အညီ ကျင့်ကြံမည်ဆိုပါက ကမ္ဘာကြီးအခြေအနေ ပိုကောင်းလာမည်မှာ သေချာပါသည်။
ဘုရားသခင့်စေတနာ ခံစားရသူများသည် စစ်မှန်သောငြိမ်သက်ခြင်းကို ထာဝစဉ်မွေ့လျော်နိုင်ကြောင်း ယေရှုဖွားမြင်ခြင်းနှင့်ပတ်သက်သော ပရောဖက်ပြုချက်များက စိတ်ချစေပါသည်။ ထိုသို့ပင် သင်လိုလားသည်မဟုတ်လော။ ယေရှုဖွားမြင်ချိန်တွင် ကောင်းကင်တမန်များ ကြွေးကြော်ခဲ့သော ငြိမ်သက်ခြင်းဆိုင်ရာ ပရောဖက်ပြုချက်သည် အမှန်ပြည့်စုံလာမည်ကို ကျွန်ုပ်တို့စိတ်ချနိုင်ကြပါသည်။ ခရစ္စမတ်အချိန်အခါတွင်ပြောသော အချည်းနှီးစကားများနှင့်မတူဘဲ ငြိမ်သက်ခြင်းသည် ထာဝရတည်ရှိလာမည်မှာ သေချာပါသည်။
[စာမျက်နှာ ၇ ပါ ရုပ်ပုံ]
ခရစ်ယာန်စိတ်ဓာတ်ကို တစ်နှစ်ပတ်လုံးတင်ပြနိုင်ပြီး တင်ပြသင့်