“ယေဟောဝါ၏နေ့ကြီး နီးပြီ”
“ယေဟောဝါ၏နေ့ကြီး နီးပြီ”
“ယေဟောဝါ၏နေ့ကြီးနီးပြီ။ နီးပြီ။ အလျင်အမြန်လာ၏။” —ဇေဖနိ ၁:၁၄၊ ကဘ။
၁၊ ၂။ (က) အဘယ်အထူးနေ့ကို ခရစ်ယာန်များ စောင့်မျှော်နေကြသနည်း။ (ခ) အဘယ်မေးခွန်းများမေးရန် လိုအပ်သနည်း။ အဘယ်ကြောင့်နည်း။
ရွှင်လန်းတက်ကြွနေသော မိန်းမပျိုတစ်ဦးသည် လက်ထပ်ထိမ်းမြားမည့်နေ့ကို စိတ်ထက်သန်စွာ မျှော်လင့်စောင့်စားနေသည်။ ကိုယ်ဝန်ဆောင်မိခင်တစ်ဦးသည် မွေးဖွားလာမည့်ကလေးငယ်ကို မြတ်နိုးစွာ မျှော်လင့်နေသည်။ နွမ်းနယ်နေသောအလုပ်သမားတစ်ဦးသည် ကြာရှည်စွာစောင့်မျှော်ခဲ့ရသော အားလပ်ရက်ကို လွန်စွာတောင့်တနေသည်။ ထိုသူတို့တွင် အဘယ်ဆင်တူချက်ရှိသနည်း။ သူတို့အားလုံး၏ဘဝအပေါ် အကျိုးသက်ရောက်မှုရှိမည့် အထူးနေ့တစ်နေ့ကိုစောင့်မျှော်နေကြသည်။ သူတို့လွန်စွာစိတ်လှုပ်ရှားနေသော်လည်း တစ်ဦးနှင့်တစ်ဦးမတူကြပေ။ နောက်ဆုံး သူတို့စောင့်မျှော်သောနေ့ ရောက်လာမည်ဖြစ်ပြီး ယင်းအတွက် အသင့်ဖြစ်နေကြမည်ဖြစ်သည်။
၂ ယနေ့ ခရစ်ယာန်စစ်များလည်း အထူးနေ့တစ်နေ့ကို ထက်သန်စွာစောင့်မျှော်နေကြသည်။ ယင်းမှာ ‘ယေဟောဝါ၏နေ့ကြီး’ ဖြစ်သည်။ (ဟေရှာယ ၁၃:၉; ယောလ ၂:၁; ၂ ပေတရု ၃:၁၂) ရောက်လာမည့် ‘ယေဟောဝါ၏နေ့’ ကား အဘယ်နည်း။ ထိုနေ့ရောက်ရှိခြင်းက လူသားထုအပေါ် မည်သို့အကျိုးသက်ရောက်မည်နည်း။ ထိုနေ့ရက်အတွက် မည်သို့အသင့်ဖြစ်နေနိုင်သနည်း။ အဆိုပါမေးခွန်းများ၏အဖြေကို ယခုပင်ရှာဖွေရန် အလွန်အရေးကြီးသည်။ အကြောင်းမှာ “ယေဟောဝါ၏နေ့ကြီးနီးပြီ။ နီးပြီ။ အလျင်အမြန်လာ၏” ဟူသော ကျမ်းစကားများမှန်ကန်ကြောင်း သက်သေအထောက်အထားများက ဖော်ပြနေသောကြောင့်ပင်ဖြစ်သည်။—ဇေဖနိ ၁:၁၄၊ ကဘ။
“ယေဟောဝါ၏နေ့ကြီး”
၃။ “ယေဟောဝါ၏နေ့ကြီး” ကား အဘယ်နည်း။
၃ “ယေဟောဝါ၏နေ့ကြီး” ကား အဘယ်နည်း။ ကျမ်းစာတစ်အုပ်လုံးတွင် ‘ယေဟောဝါ၏နေ့’ ဟူသောအသုံးအနှုန်းသည် ကိုယ်တော်၏ရန်သူများကို တရားစီရင်ပြီး နာမတော်မြတ်ကို ဂုဏ်တင်သော အထူးအချိန်အခါများကို ရည်ညွှန်းသည်။ သစ္စာမဲ့သော ယုဒနှင့်ယေရုရှလင်၊ ရက်စက်ကြမ်းကြုတ်သော ဗာဗုလုန်နှင့်အီဂျစ်လူမျိုးတို့သည် ယေဟောဝါ၏တရားစီရင်ခြင်းခံရချိန်တွင် ‘ယေဟောဝါ၏နေ့’ ကို ရင်ဆိုင်ခဲ့ရသည်။ (ဟေရှာယ ၂:၁၊ ၁၀-၁၂; ၁၃:၁-၆; ယေရမိ ၄၆:၇-၁၀) သို့သော် “ယေဟောဝါ၏နေ့ကြီး” ရောက်လာရန် ရှိသေးသည်။ ထိုနေ့သည် ယေဟောဝါ၏နာမတော်အား ရှုတ်ချဂုဏ်ဖျက်သူများကို တရားစီရင်မည့် “နေ့” ဖြစ်သည်။ ယင်းသည် ကမ္ဘာ့အယူမှားဘာသာရေးအင်ပါယာဖြစ်သော “မဟာဗာဗုလုန်” ကိုဖျက်ဆီးခြင်းဖြင့် အစပြုမည်ဖြစ်ပြီး အစီအစဉ်စနစ်ဆိုး၏ ကျန်အစိတ်အပိုင်းများကို အာမဂေဒုန်တွင် လက်စတုံးဖျက်ဆီးခြင်းဖြင့် အထွတ်အထိပ်ရောက်ပေလိမ့်မည်။—ဗျာ. ၁၆:၁၄၊ ၁၆; ၁၇:၅၊ ၁၅-၁၇; ၁၉:၁၁-၂၁။
၄။ အလျင်အမြန်ချဉ်းကပ်လာနေသော ယေဟောဝါ၏နေ့ကို လူအများစု အဘယ်ကြောင့်ကြောက်ရွံ့သင့်သနည်း။
၄ ထိုအကြောင်းများကို လူအများစု သိသည်ဖြစ်စေ၊ မသိသည်ဖြစ်စေ အလျင်အမြန်ချဉ်းကပ်လာနေသော ယေဟောဝါ၏နေ့ရက်ကို သူတို့ ကြောက်ရွံ့သင့်၏။ အဘယ်ကြောင့်နည်း။ ပရောဖက်ဇေဖနိမှတစ်ဆင့် ယေဟောဝါဤသို့အဖြေပေးသည်– “ထိုနေ့သည် အမျက်ထွက်သောနေ့၊ ဆင်းရဲပူပန်ခြင်းကိုခံရသောနေ့၊ သုတ်သင်ပယ်ရှင်းဖျက်ဆီးရာနေ့၊ အလင်းကွယ်၍ မှောင်မိုက်သောနေ့၊ မိုးအုံ့၍ထူထပ်သောမှောင်မိုက် ဖုံးလွှမ်းသောနေ့” ဖြစ်၏။ အမှန်ကြောက်ရွံ့ဖွယ်ပင်! ပရောဖက်က ဤသို့ဆက်ဆိုသည်– ‘သူတို့သည် ထာဝရဘုရားသခင်ကို ပြစ်မှားသောကြောင့် သူတို့ကို ငါညှဉ်းဆဲမည်။’—ဇေဖနိ ၁:၁၅၊ ၁၇။
၅။ ယေဟောဝါ၏နေ့နှင့်ပတ်သက်၍ လူသန်းပေါင်းများစွာတွင် အဘယ်အပြုသဘောထားရှိသနည်း။ အဘယ်ကြောင့်နည်း။
၅ သို့သော် လူသန်းပေါင်းများစွာတို့မူ ယေဟောဝါ၏နေ့ ရောက်လာရန် ထက်သန်စွာ စောင့်မျှော်နေကြသည်။ အဘယ်ကြောင့်နည်း။ ထိုနေ့သည် ယေဟောဝါကိုယ်တိုင် ချီးမြှောက်ခံရပြီး ဘုန်းရှိသောနာမတော် သန့်ရှင်းမြင့်မြတ်မည့်နေ့ဖြစ်သည့်အပြင် ဖြောင့်မတ်သူတို့အတွက် ကယ်တင်ခြင်းနှင့် ကယ်နုတ်ချိန်လည်းဖြစ်ကြောင်း သူတို့သိရှိသောကြောင့်ဖြစ်သည်။ (ယောလ ၃:၁၆၊ ၁၇; ဇေဖနိ ၃:၁၂-၁၇) ထိုနေ့ကို ကြောက်ရွံ့ခြင်း သို့မဟုတ် ထက်သန်စွာ စောင့်မျှော်ခြင်းသည် ယနေ့ မိမိတို့အသက်တာကို အသုံးပြုနေပုံအပေါ် များစွာမူတည်သည်။ ချဉ်းကပ်လာနေသည့် ထိုနေ့ကို သင်မည်သို့ရှုမြင်သနည်း။ သင်အသင့်ဖြစ်နေပြီလော။ ယေဟောဝါ၏နေ့ အလွန်နီးပြီဟူသည့်အချက်က ယခုပင် သင့်နေ့စဉ်အသက်တာအပေါ် သက်ရောက်မှုရှိပါသလော။
‘ပြက်ရယ်ပြုတတ်သောသူတို့သည် ကဲ့ရဲ့ခြင်းနှင့်တကွ ပေါ်လာကြလိမ့်မည်’
၆။ လူအများစုသည် ယေဟောဝါ၏နေ့ကို မည်သို့ရှုမြင်ကြသနည်း။ ယင်းကို ခရစ်ယာန်စစ်များ အဘယ်ကြောင့် မအံ့သြကြသနည်း။
၆ ဤမျှအရေးကြီးသည့်အချိန်တွင် လူအများစုမှာ ချဉ်းကပ်လာနေသော ‘ယေဟောဝါ၏နေ့’ ကို အလေးမထားကြချေ။ ထိုနေ့ရောက်တော့မည်ဟု သတိပေးသူများကို သူတို့လှောင်ပြောင်ကြသည်။ ယင်းကို ခရစ်ယာန်စစ်များ မအံ့သြကြပေ။ တမန်တော်ပေတရု၏ ဤသတိပေးချက်ကို သူတို့အမှတ်ရကြသည်– “ရှေးဦးစွာသိမှတ်အပ်သောအရာမူကား နောက်ဆုံးသောကာလ၌ ပြက်ရယ်ပြုတတ်သောသူတို့သည် မိမိတို့တပ်မက်ခြင်းအတိုင်းကျင့်နေ၍ ‘သခင်ဘုရားကြွလာမည်ဟူသော ကတိတော်သည် အဘယ်မှာရှိသနည်း။ ဘိုးဘေးများအိပ်ပျော်သည်နောက် ခပ်သိမ်းသောအရာတို့သည် ဖန်ဆင်းစကဖြစ်သကဲ့သို့ ဖြစ်မြဲဖြစ်ကြ၏’ ဟုဆိုလျက် ကဲ့ရဲ့ခြင်းနှင့်တကွ ပေါ်လာကြလိမ့်မည်။”—၂ ပေတရု ၃:၃၊ ၄။
၇။ အရေးတကြီးသဘောထား ဆက်ရှိနေရန် အဘယ်အရာက ထောက်ကူပေးသနည်း။
၇ အဆိုပါအပျက်သဘောကို တွန်းလှန်ရန်နှင့် အရေးတကြီးသဘောထား ဆက်ရှိနေရန် အဘယ်အရာက ထောက်ကူပေးသနည်း။ ပေတရု ဤသို့ဆိုသည်– “သန့်ရှင်းသောပရောဖက်တို့သည် အထက်ကဟောပြောသော စကားများကိုလည်းကောင်း၊ ကယ်တင်တော်မူသောအရှင်သခင်ဘုရား၏ တမန်တော်ဖြစ်သော ငါတို့၏ပညတ်တို့ကိုလည်းကောင်း သင်တို့သည် အောက်မေ့စေခြင်းငှာ ဤစာနှစ်စောင်၌ သင်တို့၏ကြည်ဖြူသောစိတ်ဝိညာဉ် [“ကြည်လင်သော စဉ်းစားတွေးခေါ်နိုင်စွမ်း၊” ကဘ] တို့ကို ငါသတိပေး၍နှိုးဆော်၏။” (၂ ပေတရု ၃:၁၊ ၂) ပရောဖက်ပြုချက်ဆိုင်ရာ သတိပေးချက်များကို ဂရုပြုခြင်းက ကျွန်ုပ်တို့၏ ‘ကြည်လင်သော စဉ်းစားတွေးခေါ်နိုင်စွမ်းကို နှိုးဆော်’ နိုင်ရန် အထောက်အကူပြုသည်။ ထိုသတိပေးချက်များကို အထပ်ထပ်ကြားခဲ့ပြီးဖြစ်ပေမည်။ သို့သော် ယနေ့အချိန်သည် ယင်းတို့ကို ယခင်ကထက်ပို၍ ဂရုပြုနေရမည့်အချိန်ဖြစ်သည်။—ဟေရှာယ ၃၄:၁-၄; လုကာ ၂၁:၃၄-၃၆။
၈။ လူများစွာသည် ကျမ်းစာသတိပေးချက်များကို အဘယ်ကြောင့် လျစ်လျူရှုကြသနည်း။
၈ အဆိုပါသတိပေးချက်များကို အချို့သူတို့ အဘယ်ကြောင့် လျစ်လျူရှုကြသနည်း။ ပေတရု ဤသို့ဆက်ပြောသည်– ‘ရှေးကာလ၌ မိုးကောင်းကင်ကိုလည်းကောင်း၊ ရေထဲကထွက်၍ ရေဖြင့်တည်သောမြေကြီးကိုလည်းကောင်း ဘုရားသခင်၏နှုတ်မြွက်တော်သည် ဖြစ်စေတော်မူကြောင်းနှင့် ဖြစ်ဖူးသောလောကဓာတ်ကို ထိုသို့အားဖြင့် ရေနှင့်လွှမ်းမြှုပ်၍ဖျက်ဆီးကြောင်းကို ထိုသူတို့သည် မှတ်မိချင်သောစိတ်မရှိကြ။’ (၂ ပေတရု ၃:၅၊ ၆) မှန်ပါသည်၊ အချို့သူတို့သည် ယေဟောဝါ၏နေ့ရောက်လာရန် တောင့်တစိတ်မရှိကြပေ။ သူတို့၏အသက်တာကို အဘယ်အရာကမျှ ဝင်မစွက်စေလိုပေ။ ကိုယ်ကျိုးရှာဘဝပုံစံအတွက် ယေဟောဝါနှင့် စာရင်းမရှင်းလိုကြပေ။ ပေတရုဖော်ပြသကဲ့သို့ သူတို့သည် “မိမိတို့တပ်မက်ခြင်းအတိုင်းကျင့်နေ” ကြသည်။
၉။ နောဧနှင့်လောတလက်ထက်ရှိ လူတို့သည် အဘယ်သဘောထား တင်ပြခဲ့သနည်း။
၉ ထိုပြက်ရယ်ပြုသူများသည် လူ့အရေးကိစ္စများတွင် ယေဟောဝါ တစ်ချိန်ကဝင်စွက်ခဲ့ကြောင်း လျစ်လျူရှုလို “စိတ်” ရှိကြသည်။ “နောဧလက်ထက်” နှင့် “လောတလက်ထက်” တွင် ထိုသို့သောအခြေအနေမျိုးရှိခဲ့ကြောင်း ယေရှုခရစ်နှင့် တမန်တော်ပေတရုတို့ ဖော်ပြခဲ့သည်။ (လုကာ ၁၇:၂၆-၃၀; ၂ ပေတရု ၂:၅-၉) ရေလွှမ်းမိုးဘေးမတိုင်မီက လူတို့သည် နောဧ၏သတိပေးချက်ကို သတိမမူကြပေ။ ထိုနည်းတူ သောဒုံနှင့်ဂေါမောရမြို့မပျက်စီးမီ လောတ၏သမက်များသည် လောတ “ကျီစားဟန်ရှိသည်” ဟုထင်ခဲ့ကြသည်။—ကမ္ဘာဦး ၁၉:၁၄။
၁၀။ သတိမမူကြသူများကို ယေဟောဝါမည်သို့တုံ့ပြန်သနည်း။
၁၀ ယနေ့လည်း ထိုနည်းတူပင်။ သို့သော် သတိမမူသူများနှင့်ပတ်သက်၍ ယေဟောဝါ၏တုံ့ပြန်ပုံကို သတိပြုကြည့်ပါ– ‘“ထာဝရဘုရားသခင်သည် ကျေးဇူးကိုလည်းမပြု၊ အပြစ်ကိုလည်းမပေး” ဟုအောက်မေ့လျက် မိမိတို့အနည်အဖတ်ပေါ်၌ နေရာကျသောသူတို့ကို ငါစစ်ကြောမည်။ ထိုသူတို့၏ဥစ္စာကို သူတစ်ပါးလုယူ၍ သူတို့၏နေရာသည် လူဆိတ်ညံလျက်ရှိလိမ့်မည်။ အိမ်ကိုဆောက်သော်လည်း မနေရကြ။ စပျစ်ဥယျာဉ်ကိုစိုက်သော်လည်း စပျစ်ရည်ကိုမသောက်ရကြ။’ (ဇေဖနိ ၁:၁၂၊ ၁၃) လူတို့သည် မိမိတို့၏နေ့စဉ် “လုပ်ရိုးလုပ်စဉ်” များနှင့် ဆက်အလုပ်များနေကြပေမည်။ သို့သော် သူတို့၏ကြိုးစားအားထုတ်မှုများမှ မည်သည့်ရေရှည်အကျိုးကိုမျှ ရရှိကြမည်မဟုတ်ပါ။ အဘယ်ကြောင့်နည်း။ အကြောင်းမှာ ယေဟောဝါ၏နေ့ ရုတ်တရက်ရောက်လာမည်ဖြစ်ပြီး သူတို့စုဆောင်းရသော စည်းစိမ်ဥစ္စာက သူတို့ကို ကယ်တင်နိုင်မည်မဟုတ်သောကြောင့်ဖြစ်သည်။—ဇေဖနိ ၁:၁၈။
‘မျှော်လင့်လျက်နေလော့’
၁၁။ အဘယ်သတိပေးချက်ကို စိတ်စွဲမှတ်ထားသင့်သနည်း။
၁၁ ကျွန်ုပ်တို့ဝန်းကျင်ရှိ ဆိုးသွမ်းသောလောကနှင့်မတူဘဲ ပရောဖက်ဟဗက္ကုတ်ရေးသားသော ဤသတိပေးချက်ကို စိတ်စွဲမှတ်ထားရမည်– ‘ထိုစိတ်အာရုံသည် ချိန်းချက်သောအချိန်နှင့်ဆိုင်၍ အမှုကုန်ရသောကာလကို ဆိုလို၏။ မုသာနှင့်ကင်းလွတ်၏။ ဆိုင်းသော်လည်းမျှော်လင့်လော့။ နောက်မကျဘဲ ဧကန်အမှန်ရောက်လိမ့်မည်။’ (ဟဗက္ကုတ် ၂:၃) ထိုနေ့သည် မစုံလင်သောလူ့ရှုထောင့်မှကြည့်လျှင် နောက်ကျနေပုံရနိုင်သော်လည်း ယေဟောဝါသည် နှေးတော်မမူကြောင်း သတိရနေရမည်။ ကိုယ်တော်၏နေ့သည် လူသားများ မျှော်လင့်မထားသောအချိန်တွင် အတိအကျရောက်လာမည်ဖြစ်သည်။—မာကု ၁၃:၃၃; ၂ ပေတရု ၃:၉၊ ၁၀။
၁၂။ ယေရှု မည်သို့သတိပေးခဲ့သနည်း။ ယင်းသည် ကိုယ်တော့်သစ္စာရှိနောက်လိုက်များ၏ ပြုမူပုံနှင့် မည်သို့ကွာခြားသနည်း။
၁၂ ယေဟောဝါ၏နေ့ကို မျှော်လင့်နေရန် အရေးကြီးကြောင်း အလေးပေးလျက် ယေရှုက မိမိ၏နောက်လိုက်အချို့ပင် အရေးတကြီးသဘောထား ပျောက်ဆုံးသွားမည်ဟု သတိပေးခဲ့သည်။ သူတို့နှင့်ပတ်သက်၍ ဤသို့ကြိုပြောခဲ့သည်– “အကြင်ကျွန်ဆိုးက ‘ငါ့အရှင်လာခဲလိမ့်မည်’ ဟု စိတ်ထဲ၌အောက်မေ့သည်နှင့် ကျွန်ချင်းတို့ကိုရိုက်ပုတ်လျက် သေသောက်ကြူးသောသူတို့နှင့်တကွ စားသောက်လျက်နေ၏။ ထိုကျွန် မကြည့်မမျှော်သောနေ့ရက်၊ မကြားမသိသောအချိန်နာရီ၌ သခင်သည် ရောက်လာလျှင် ထိုကျွန်ကို ပြင်းပြစွာဆုံးမ၍ ငိုကြွေးခြင်း၊ အံသွားခဲကြိတ်ခြင်းရှိရာအရပ်၌ လျှို့ဝှက်သောသူတို့နှင့်တကွ နေရာချလတ္တံ့။” (မဿဲ ၂၄:၄၈-၅၁) ယင်းနှင့်ကွာခြားလျက် သစ္စာနှင့်သတိပညာရှိကျွန်အတန်းအစားသည် အရေးတကြီးသဘောထားကို သစ္စာရှိရှိ ဆက်ထိန်းထားကြသည်။ သူတို့သည် စောင့်နေကြပြီး ကိုယ်တိုင်အသင့်ဖြစ်နေကြသည်။ ထို့ကြောင့် ယေရှုသည် မြေကြီးပေါ်ရှိ “မိမိဥစ္စာရှိသမျှတို့ကို” သူတို့၌အပ်နှင်းတော်မူသည်။—မဿဲ ၂၄:၄၂-၄၇။
အရေးတကြီးပြုမူရန် လိုအပ်
၁၃။ အရေးတကြီးသဘောထားရှိရန် လိုအပ်ကြောင်း ယေရှုမည်သို့အလေးပေးခဲ့သနည်း။
၁၃ ပထမရာစုခရစ်ယာန်များတွင် အရေးတကြီးသဘောထားရှိနေရန် အလွန်အရေးကြီးသည်။ “ယေရုရှလင်မြို့ကို ဗိုလ်ခြေများဝန်းရံလျက်ရှိသည်ကို” သူတို့မြင်သောအခါ ထိုမြို့မှ ချက်ချင်းထွက်ပြေးရမည်ဖြစ်သည်။ (လုကာ ၂၁:၂၀၊ ၂၁) အေဒီ ၆၆ တွင် ယင်းသို့ဖြစ်ပျက်ခဲ့၏။ ထိုအချိန်မှခရစ်ယာန်များ အရေးတကြီးပြုလုပ်ရန် လိုအပ်ကြောင်း ယေရှု အလေးပေးဖော်ပြခဲ့ပုံကို သုံးသပ်ကြည့်ပါ– “အိမ်မိုးပေါ်မှာရှိသောသူသည် အိမ်ထဲကဥစ္စာကိုယူခြင်းငှာ မဆင်းစေနှင့်။ လယ်၌ရှိသောသူလည်း မိမိအဝတ်ကိုယူခြင်းငှာ နောက်သို့မပြန်စေနှင့်။” (မဿဲ ၂၄:၁၇၊ ၁၈) သို့သော် ယေရုရှလင်သည် နောက်ထပ်လေးနှစ်ကြာ မပျက်စီးဘဲ ဆက်လက်တည်ရှိခဲ့သည်ဟု သမိုင်းကဖော်ပြ၏။ သို့ဆိုလျှင် ခရစ်ယာန်များသည် အေဒီ ၆၆ တွင် ယေရှု၏စကားများကို အဘယ်ကြောင့် အရေးတကြီးလိုက်နာရန် လိုအပ်ခဲ့သနည်း။
၁၄၊ ၁၅။ ပထမရာစုခရစ်ယာန်များသည် ယေရုရှလင်မြို့ကို ဗိုလ်ခြေများဝန်းရံလျက်ရှိသည်ကို မြင်သောအခါ ချက်ချင်းထွက်ပြေးရန် အဘယ်ကြောင့် အလွန်အရေးကြီးသနည်း။
၁၄ ရောမစစ်တပ်သည် ယေရုရှလင်မြို့ကို အေဒီ ၇၀ ရောက်မှ ဖျက်ဆီးခဲ့သည်မှာ မှန်သော်လည်း ထိုလေးနှစ်တာကာလသည် ငြိမ်သက်အေးချမ်းခဲ့သလော။ ဝေးလေစွ! ထိုနှစ်များသည် အကြမ်းဖက်မှု၊ လူသတ်မှုများဖြင့် သွေးစွန်းခဲ့သည်။ သမိုင်းပညာရှင်တစ်ဦးက ထိုအချိန်အတွင်း ယေရုရှလင်ရှိအခြေအနေကို “ရက်စက်လွန်းအားကြီးသော အပြုအမူများဖြင့်ဒွန်တွဲနေသည့် ကြောက်ခမန်းလိလိ သွေးချောင်းစီးသော ပြည်တွင်းစစ်” အဖြစ် ဖော်ပြသည်။ စစ်အင်အားတောင့်တင်းစေရန်၊ လက်နက်များ သယ်ဆောင်ရန်နှင့် စစ်မှုထမ်းရန် လူငယ်များကို စုဆောင်းခဲ့သည်။ နေ့စဉ် စစ်ရေးလေ့ကျင့်ရသည်။ ဂျူးများကို အပြည့်အဝ မထောက်ခံသူများအား သစ္စာဖောက်များအဖြစ် ရှုမြင်ကြသည်။ ခရစ်ယာန်များသာ ထိုမြို့တွင်ဆက်ရှိနေပါက အလွန်အန္တရာယ်ရှိနိုင်သည်။—မဿဲ ၂၆:၅၂; မာကု ၁၂:၁၇။
၁၅ မှတ်သားစရာမှာ ယေရုရှလင်၌သာမဟုတ်ဘဲ “ယုဒပြည်၌ရှိသောသူတို့” ကိုထွက်ပြေးရန် ယေရှုမိန့်ဆိုခြင်းဖြစ်သည်။ ယင်းသို့ပြုလုပ်ရန် အရေးကြီးရခြင်းမှာ ရောမစစ်တပ်များသည် ယေရုရှလင်မှဆုတ်ခွာပြီး လအနည်းငယ်အကြာတွင် ပြန်လည်ထိုးစစ်ဆင်ခဲ့သောကြောင့်ဖြစ်သည်။ ဦးဆုံး အေဒီ ၆၇ တွင် ဂါလိလဲနယ်ကိုအောင်နိုင်သည်။ နောက်နှစ်တွင် ယုဒနယ်တစ်ဝန်းလုံးကို စနစ်တကျသိမ်းယူခဲ့သည်။ ယင်းကြောင့် ကျေးလက်ဒေသတစ်လျှောက်လုံး အကြီးအကျယ်ဒုက္ခရောက်ခဲ့သည်။ ယေရုရှလင်မှ ထွက်ပြေးလိုသည့် ဂျူးများအတွက် အလွန်ခက်ခဲလာသည်။ မြို့တံခါးများတွင် အစောင့်ချထားသည်။ ထွက်ပြေးဖို့ ကြိုးစားသူတိုင်း ရောမထံခိုလှုံသည်ဟု ယူမှတ်ခံရသည်။
၁၆။ ဆင်းရဲခက်ခဲသောကာလမှ လွတ်မြောက်နိုင်ရန် ပထမရာစုခရစ်ယာန်များတွင် အဘယ်သဘောထားရှိရမည်နည်း။
၁၆ ထိုအချက်အားလုံးကိုကြည့်လျှင် အချိန်အခါ၏အရေးကြီးမှုကို ယေရှုအဘယ်ကြောင့် အလေးပေးခဲ့ရကြောင်း နားလည်နိုင်ပါသည်။ ခရစ်ယာန်များသည် ရုပ်ပစ္စည်းပိုင်ဆိုင်မှုများကြောင့် အာရုံလွဲမသွားဘဲ ကိုယ်ကျိုးစွန့်ရန် လိုလိုလားလားရှိကြရမည်။ ယေရှု၏သတိပေးချက်ကို နာခံနိုင်ရန် ‘မိမိ၌ရှိသမျှကိုစွန့်’ သည်အထိ လိုလိုလားလားရှိရမည်။ (လုကာ ၁၄:၃၃) မဆိုင်းမတွနာခံပြီး ယော်ဒန်မြစ်တစ်ဖက်သို့ကူးသွားသူတို့သာ အသက်ချမ်းသာရခဲ့ကြသည်။
အရေးတကြီးသဘောထား ဆက်ထိန်းထားခြင်း
၁၇။ ကျွန်ုပ်တို့၏အရေးတကြီးသဘောထားကို အဘယ်ကြောင့် ခိုင်မာစေသင့်သနည်း။
၁၇ ကျမ်းစာပရောဖက်ပြုချက်များက ဆုံးခန်းကာလ၏အဆုံးပိုင်းတွင် ကျွန်ုပ်တို့အသက်ရှင်နေကြောင်း ရှင်းလင်းစွာဖော်ပြသည်။ တစ်ခါနှင့်မျှမတူအောင် အရေးတကြီးသဘောထားကို ခိုင်မာစေရမည်။ စစ်သားတစ်ဦးသည် ငြိမ်သက်အေးချမ်းနေချိန်တွင် စိုးရိမ်ပူပန်မှုနှင့် စစ်ပွဲ၏အန္တရာယ်ကို ခံစားရမည်မဟုတ်ပေ။ သို့သော် အရေးတကြီးသဘောထားမရှိသောကြောင့် ရုတ်တရက် စစ်တိုက်ထွက်ရမည်ဆိုပါက ကောင်းစွာအသင့်မဖြစ်ဘဲ သေဆုံးမည်သာဖြစ်သည်။ ဝိညာဉ်ရေးသဘောအရလည်း အလားတူပင်။ ကျွန်ုပ်တို့၏အရေးတကြီးသဘောထား ပျောက်ဆုံးမည်ဆိုပါက တိုက်ခိုက်မှုများကို ခုခံကာကွယ်ရန် အသင့်ဖြစ်မနေဘဲ ယေဟောဝါ၏နေ့ရောက်လာသောအခါ သတိမဲ့နေမည်ဖြစ်သည်။ (လုကာ ၂၁:၃၆; ၁ သက်သာလောနိတ် ၅:၄) ယေဟောဝါ၏ “နောက်တော်သို့မလိုက်၊ ဆုတ်သွားသောသူ” တို့အတွက် ယခုအချိန်သည် ကိုယ်တော်ကိုပြန်ရှာရမည့်အချိန်ဖြစ်သည်။—ဇေဖနိ ၁:၃-၆; ၂ သက်သာလောနိတ် ၁:၈-၁၀။
၁၈၊ ၁၉။ “ဘုရားသခင်၏နေ့ရောက်လိမ့်မည်” ကို မျှော်လင့်တောင့်တနေရန် အဘယ်အရာက ထောက်ကူသနည်း။
၁၈ ထို့ကြောင့် “ဘုရားသခင်၏နေ့ရောက်လိမ့်မည်” ကို မျှော်လင့်တောင့်တနေရန် တမန်တော်ပေတရုသတိပေးခဲ့ခြင်းမှာ အံ့အားသင့်စရာမဟုတ်ချေ။ မည်သို့မျှော်လင့်တောင့်တနိုင်သနည်း။ တစ်နည်းမှာ ‘သန့်ရှင်းသောအကျင့်ကိုကျင့်ခြင်း၊ ဘုရားသခင်ဝတ်၌မွေ့လျော်ခြင်းအားဖြင့်’ ဖြစ်သည်။ (၂ ပေတရု ၃:၁၁၊ ၁၂) ထိုသို့မပြတ်လုပ်ဆောင်နေခြင်းက ရောက်လာမည့် ယေဟောဝါ၏နေ့ကို ထက်သန်စွာမျှော်လင့်နေရန် ထောက်ကူပေးသည်။ “မျှော်လင့်တောင့်တ” ဟူသောဂရိစကားလုံးကို စာသားအရ “အရှိန်မြှင့်တင်ခြင်း” ဟုပြန်ဆိုနိုင်ပါသည်။ ကျွန်ုပ်တို့သည် ယေဟောဝါ၏နေ့ရောက်ရန် ကျန်ရှိနေသည့်အချိန်ကို အရှိန်မြှင့်တင်၍မရနိုင်ပါ။ သို့တိုင် ထိုနေ့ကိုစောင့်မျှော်စဉ် ဘုရားသခင့်လုပ်ငန်းတော်တွင် အလုပ်များနေပါက အချိန်သည် ကုန်မှန်းမသိ လျင်မြန်စွာကုန်ဆုံးသွားပေမည်။—၁ ကောရိန္သု ၁၅:၅၈။
၁၉ ထိုနည်းတူ ဘုရားသခင့်နှုတ်မြွက်တော်ပါ သတိပေးချက်များကို တွေးတောဆင်ခြင်ခြင်းက ထိုနေ့ “ရောက်လာရန် စိတ်ထက်သန်စွာတောင့်တ (မျှော်လင့်စောင့်စား၊ အရှိန်မြှင့်တင်)” စေပြီး “အဆက်မပြတ် မျှော်လင့်စောင့်စား” နေစေပါလိမ့်မည်။ (၂ ပေတရု ၃:၁၂၊ အကျယ်ဖွင့်ဆိုသည့်သမ္မာကျမ်း; ဝီလျံဘားကလေး၏ ဓမ္မသစ်ကျမ်း) ထိုသတိပေးချက်များတွင် ရောက်ရှိလာမည့် ယေဟောဝါ၏နေ့အကြောင်းသာမက ‘ယေဟောဝါကိုငံ့လင့်’ သူများအပေါ် ရွာသွန်းဖြိုးမည့် ကောင်းချီးအလျှံပယ်အကြောင်းကိုပါ ကြိုဟောထားသော ပရောဖက်ပြုချက်များပါဝင်သည်။—ဇေဖနိ ၃:၈။
၂၀။ အဘယ်တိုက်တွန်းချက်ကို နှလုံးသွင်းသင့်သနည်း။
၂၀ ယခုအချိန်သည် ပရောဖက်ဇေဖနိမှတစ်ဆင့်ပေးခဲ့သော ဤတိုက်တွန်းချက်ကို အမှန်ပင် နှလုံးသွင်းရမည့်အချိန်ဖြစ်သည်– ‘ထာဝရဘုရားသခင်၏ ပြင်းစွာသောအမျက်တော်သည် သင်တို့အပေါ်သို့မရောက်၊ ထာဝရဘုရားသခင်၏အမျက်တော်နေ့သည် သင်တို့အပေါ်သို့မရောက်မီ ကိုယ်ကိုစစ်ကြောကြလော့။ တရားတော်အတိုင်းကျင့်၍ စိတ်နှိမ့်ချသော ပြည်သူပြည်သားအပေါင်းတို့ ထာဝရဘုရားသခင်ကို ရှာကြလော့။ ဖြောင့်မတ်ခြင်းနှင့် စိတ်နှိမ့်ချခြင်းကိုလည်း ရှာကြလော့။ ထာဝရဘုရားသခင် အမျက်ထွက်တော်မူသောနေ့၌ သင်တို့သည် ပုန်းရှောင်ရာကို တွေ့ကောင်းတွေ့ကြလိမ့်မည်။’—ဇေဖနိ ၂:၂၊ ၃။
၂၁။ ၂၀၀၇ ခုနှစ်အတွင်း ယေဟောဝါလူမျိုး၏သန္နိဋ္ဌာန်ကား အဘယ်အရာဖြစ်မည်နည်း။
၂၁ ထို့ကြောင့် “ယေဟောဝါ၏နေ့ကြီး နီးပြီ” ဟူသောကျမ်းချက်ကို ၂၀၀၇ ပြက္ခဒိန်နှစ်၏ နှစ်ချုပ်ကျမ်းချက်အဖြစ် ရွေးချယ်ခြင်းက အလွန်သင့်တော်လှသည်! ထိုနေ့ရက် ‘နီးပြီ၊ အလျင်အမြန်လာ’ နေပြီဖြစ်ကြောင်း ဘုရားသခင့်လူမျိုးတို့ ယုံကြည်စိတ်ချကြသည်။ (ဇေဖနိ ၁:၁၄) ‘နောက်ကျ’ လိမ့်မည်မဟုတ်ပေ။ (ဟဗက္ကုတ် ၂:၃) ထို့ကြောင့် ထိုနေ့ကိုစောင့်ဆိုင်းစဉ် ကျွန်ုပ်တို့အသက်ရှင်နေသည့်အချိန်ကာလကို အမြဲသတိပြုနေပြီး အဆိုပါပရောဖက်ပြုချက်များ၏ နောက်ဆုံးပြည့်စုံချက်သည် လက်တစ်ကမ်းသာလိုတော့ကြောင်း သိနားလည်ကြပါစို့!
သင်ဖြေဆိုနိုင်သလော
• “ယေဟောဝါ၏နေ့ကြီး” ကားအဘယ်နည်း။
• အချိန်ကာလ၏အရေးကြီးမှုကို လူများစွာ အဘယ်ကြောင့် လျစ်လျူရှုကြသနည်း။
• ပထမရာစုရှိခရစ်ယာန်များသည် အရေးတကြီးသဘောထားဖြင့် ပြုမူရန် အဘယ်ကြောင့်လိုအပ်သနည်း။
• ကျွန်ုပ်တို့၏အရေးတကြီးသဘောထားကို မည်သို့ ခိုင်မာစေနိုင်သနည်း။
[လေ့လာရန်မေးခွန်းများ]
[စာမျက်နှာ ၁၉ ပါ အကျဉ်းဖော်ပြချက်]
၂၀၀၇ နှစ်ချုပ်ကျမ်းချက်– “ယေဟောဝါ၏နေ့ကြီး နီးပြီ။” —ဇေဖနိ ၁:၁၄၊ ကဘ။
[စာမျက်နှာ ၁၇ ပါ ရုပ်ပုံ]
နောဧလက်ထက်၌ဖြစ်သကဲ့သို့ ပြက်ရယ်ပြုသူများသည် ယေဟောဝါအရေးယူဆောင်ရွက်သောအခါ သတိမဲ့နေကြမည်
[စာမျက်နှာ ၁၈ ပါ ရုပ်ပုံ]
ခရစ်ယာန်များသည် ယေရုရှလင်မြို့ကို “ဗိုလ်ခြေများဝန်းရံလျက်ရှိသည်ကို” မြင်သောအခါ ချက်ချင်းထွက်ပြေးကြရ