ယေဟောဝါ ‘တရားစီရင်တော်မူမည်’
ယေဟောဝါ ‘တရားစီရင်တော်မူမည်’
“ဘုရားသခင်ရွေးကောက်တော်မူသောသူတို့သည် ညနေ့မပြတ်အော်ဟစ်၍ တောင်းလျှောက်လျှင် ဘုရားသခင်သည် သူတို့ဘက်၌ တရားမစီရင်ဘဲ နေတော်မူမည်လော။”—လုကာ ၁၈:၇။
၁။ မည်သူတို့သည် သင့်အတွက် အားပေးမှုရင်းမြစ်ဖြစ်သနည်း။ အဘယ်ကြောင့်နည်း။
ကမ္ဘာတစ်ဝန်းရှိ ယေဟောဝါသက်သေများသည် ယေဟောဝါကို နှစ်ပေါင်းများစွာ သစ္စာရှိရှိဝတ်ပြုနေသော ခရစ်ယာန်ညီအစ်ကိုညီအစ်မများနှင့် ပျော်မွေ့စွာပေါင်းသင်းနေကြသည်။ ထိုချစ်စရာကောင်းသူအချို့ကို သင်ရင်းနှီးကျွမ်းဝင်ပါသလော။ လွန်ခဲ့သောနှစ်ပေါင်းများစွာက နှစ်ခြင်းခံခဲ့ပြီး ဘုရားသခင့်နိုင်ငံတော်ခန်းမတွင် အစည်းအဝေးပျက်ခဲသော သက်ကြီးညီအစ်မတစ်ဦးကို သင်သတိရပေမည်။ သို့မဟုတ် အသင်းတော်၏ လယ်ကွင်းလုပ်ငန်းတွင် တစ်ပတ်ပြီးတစ်ပတ် ဆယ်စုနှစ်များစွာ သစ္စာရှိရှိပါဝင်ခဲ့သူ သက်ကြီးညီအစ်ကိုတစ်ဦးအကြောင်း တွေးမိပေမည်။ ယခုဆိုလျှင် အာမဂေဒုန်လာပြီးလောက်ပြီဟု အဆိုပါသစ္စာရှိသူများစွာ ထင်ခဲ့ကြသည်မှာမှန်ပါသည်။ သို့သော် တရားမဲ့လောက ယခုထိဆက်တည်ရှိနေခြင်းက ယေဟောဝါ၏ကတိတော်များအပေါ် သူတို့၏ယုံကြည်ကိုးစားမှုနှင့် “အဆုံးတိုင်အောင်တည်ကြည်” မည်ဟူသည့် သူတို့၏သန္နိဋ္ဌာန်ကို လျော့နည်းမသွားစေခဲ့ပေ။ (မဿဲ ၂၄:၁၃) ထိုသစ္စာရှိကျေးကျွန်များ၏ ခိုင်မြဲသောယုံကြည်ခြင်းသည် အသင်းတော်တစ်ခုလုံးအတွက် အားပေးမှုရင်းမြစ် အမှန်ဖြစ်သည်။—ဆာလံ ၁၄၇:၁၁။
၂။ အဘယ်အခြေအနေကြောင့် ကျွန်ုပ်တို့ဝမ်းနည်းရသနည်း။
၂ သို့သော် တစ်ခါတစ်ရံ ယင်းနှင့်ဆန့်ကျင်ဘက်သဘောထားကို ကျွန်ုပ်တို့ သတိပြုမိပေမည်။ ခရစ်ယာန်ဓမ္မအမှုတွင် နှစ်ပေါင်းများစွာပါဝင်ခဲ့သော သက်သေခံအချို့သည် ယေဟောဝါအပေါ် ယုံကြည်ကိုးစားမှုလျော့နည်းလာပြီး အသင်းတော်နှင့် မပေါင်းသင်းကြတော့ပေ။ ထိုသူတို့ ယေဟောဝါကိုစွန့်ခွာသွားခြင်းက ကျွန်ုပ်တို့ကို ဝမ်းနည်းစေပြီး “ပျောက်သောသိုး” တစ်ကောင်စီကို သိုးခြံသို့ပြန်လာရန် လှိုက်လှိုက်လှဲလှဲ ဆက်ကူညီပေးလိုကြသည်။ (ဆာလံ ၁၁၉:၁၇၆; ရောမ ၁၅:၁) သို့တိုင် ထိုသို့ယုံကြည်ခြင်းမဲ့သွားသူအချို့ရှိသော်လည်း အချို့မှာ ယုံကြည်ခြင်းဆက်ခိုင်မာနေသောကြောင့် မေးစရာမေးခွန်းများပေါ်လာသည်။ အခြားသူများ ယုံကြည်ခြင်းပျောက်ဆုံးသွားချိန်တွင် အဘယ်အရာက သက်သေခံများစွာအား ယေဟောဝါ၏ကတိတော်များကို ဆက်ယုံကြည်နေစေသနည်း။ “ယေဟောဝါ၏နေ့ကြီး” နီးပြီဖြစ်ကြောင်း အခိုင်အမာယုံကြည်စိတ်ချနေစေရန် ကျွန်ုပ်တို့တစ်ဦးစီ အဘယ်အရာပြုလုပ်နိုင်သနည်း။ (ဇေဖနိ ၁:၁၄၊ ကဘ) လုကာခရစ်ဝင်ကျမ်းတွင်တွေ့ရသော ပုံဥပမာတစ်ခုကို သုံးသပ်ကြည့်ကြစို့။
‘လူသားကြွလာ’ ချိန်တွင် အသက်ရှင်နေသူများအတွက် သတိပေးချက်
၃။ မုဆိုးမနှင့်တရားသူကြီးပုံဥပမာမှ မည်သူတို့ အထူးသဖြင့် အကျိုးရနိုင်သနည်း။ အဘယ်ကြောင့်နည်း။
၃ လုကာ အခန်းကြီး ၁၈ တွင် မုဆိုးမနှင့်တရားသူကြီးပုံဥပမာကို ယေရှုမိန့်ဆိုခဲ့သည်။ ယင်းသည် ရှေ့ဆောင်းပါးတွင် လေ့လာခဲ့သည့် အားမလျှော့သောအိမ်ရှင်ပုံဥပမာနှင့် ဆင်တူသည်။ (လုကာ ၁၁:၅-၁၃) သို့သော် မုဆိုးမနှင့်တရားသူကြီးပုံဥပမာ၏ ရှေ့နောက်ကျမ်းစကားက ယင်းသည် ဘုရားသခင့်နိုင်ငံတော်အာဏာဖြင့် ‘လူသားကြွလာ’ ချိန်တွင် အသက်ရှင်သူများနှင့် အထူးသက်ဆိုင်ကြောင်း ဖော်ပြသည်။ ထိုအချိန်သည် ၁၉၁၄ ခုနှစ်၌စတင်သည်။—လုကာ ၁၈:၈။ *
၄။ လုကာ အခန်းကြီး ၁၈ ပါပုံဥပမာကို မမိန့်ဆိုမီ အဘယ်အကြောင်းကို ယေရှုဆွေးနွေးခဲ့သနည်း။
၄ ပုံဥပမာကို ယေရှုမမိန့်ဆိုမီ “ကောင်းကင်တစ်ဖက်မှ ပြက်သောလျှပ်စစ်သည် ကောင်းကင်အနှံ့အပြားထွန်းလင်းသကဲ့သို့” ဘုရားသခင့်နိုင်ငံတော်အာဏာနှင့်တကွ မိမိရောက်ရှိခြင်း၏ သက်သေအထောက်အထားကို အထင်အရှားသိမြင်နိုင်မည်ဟု ဖော်ပြခဲ့သည်။ (လုကာ ၁၇:၂၄; ၂၁:၁၀၊ ၂၉-၃၃) သို့သော် “အမှုကုန်ရသည်ကာလ” တွင်အသက်ရှင်နေသော လူများစွာသည် ထိုသိသာထင်ရှားသော အထောက်အထားကို ဂရုမပြုကြပေ။ (ဒံယေလ ၁၂:၄) အဘယ်ကြောင့်နည်း။ နောဧနှင့်လောတလက်ထက်မှလူများ ယေဟောဝါ၏သတိပေးချက်များကို လျစ်လျူရှုခဲ့သောအကြောင်းရင်းနှင့် အတူတူပင်ဖြစ်သည်။ ထိုသူတို့သည် ‘သုတ်သင်ပယ်ရှင်းသည်နေ့တိုင်အောင် စားသောက်ရောင်းဝယ်လျက်၊ စိုက်ပျိုးလျက်၊ အိမ်ဆောက်လျက်နေ’ ခဲ့ကြသည်။ (လုကာ ၁၇:၂၆-၂၉) ဘုရားသခင့်အလိုတော်ကို ဂရုမပြုဘဲ ပုံမှန်လုပ်ရိုးလုပ်စဉ်များနှင့်သာ လုံးပန်းနေကြရာ အသက်ဆုံးရှုံးခဲ့ရလေ၏။ (မဿဲ ၂၄:၃၉) ယနေ့လည်း လူအများစုသည် နေ့စဉ်လုပ်ငန်းဆောင်တာများတွင် အလွန်အမင်းအာရုံနစ်မြုပ်နေကြရာ တရားမဲ့လောက၏အဆုံးနီးနေပြီဟူသော သက်သေအထောက်အထားကို မတွေ့မြင်ကြပေ။—လုကာ ၁၇:၃၀။
၅။ (က) မည်သူများကို ယေရှုသတိပေးခဲ့သနည်း။ အဘယ်ကြောင့်နည်း။ (ခ) အချို့သူများ အဘယ်ကြောင့် ယုံကြည်ခြင်းပျောက်ဆုံးသွားကြသနည်း။
၅ ယေရှုသည် မိမိနောက်လိုက်များလည်း ‘နောက်သို့လှည့်ပြန်’ သွားသည်အထိ စာတန်လောကကြောင့် အာရုံလွဲသွားမည်ကို စိုးရိမ်ပြီး သတိပေးခဲ့သည်။ (လုကာ ၁၇:၂၂၊ ၃၁) ခရစ်ယာန်အချို့ ထိုသို့ပင် အမှန်ဖြစ်ခဲ့သည်။ သူတို့သည် ဤဆိုးယုတ်သောလောကအား ယေဟောဝါအဆုံးစီရင်မည့်နေ့ကို နှစ်ပေါင်းများစွာ စောင့်မျှော်လာခဲ့ကြသည်။ သို့သော် သူတို့မျှော်လင့်သောအချိန်တွင် အာမဂေဒုန် မရောက်လာသောကြောင့် စိတ်ဓာတ်ကျခဲ့ကြသည်။ ယေဟောဝါ၏တရားစီရင်ရာနေ့ နီးပြီဖြစ်ကြောင်း ယုံကြည်စိတ်ချမှု လျော့နည်းသွားသည်။ ခရစ်ယာန်ဓမ္မအမှုတွင် အရှိန်လျှော့လိုက်ပြီး တဖြည်းဖြည်း ဝိညာဉ်ရေးကိစ္စများကို အချိန်မပေးနိုင်တော့သည်အထိ လောကရေးရာများတွင်သာ အလုပ်များလာသည်။ (လုကာ ၈:၁၁၊ ၁၃၊ ၁၄) အတန်ကြာသော် ‘နောက်သို့လှည့်ပြန်’ သွားကြသည်။ အလွန်ဝမ်းနည်းဖွယ်ပင်!
“အစဉ်မပြတ်ဆုတောင်း” ရန် လိုအပ်
၆-၈။ (က) မုဆိုးမနှင့်တရားသူကြီးပုံဥပမာကို ပြောပြပါ။ (ခ) ထိုဥပမာ၏သက်ဆိုင်ပုံကို ယေရှုမည်သို့ဖော်ပြသနည်း။
၆ ယေဟောဝါ၏ကတိတော်များ ပြည့်စုံလာမည်ကို အခိုင်အမာယုံကြည်စိတ်ချနေစေရန် အဘယ်အရာပြုလုပ်နိုင်သနည်း။ (ဟေဗြဲ ၃:၁၄) စာတန်၏ဆိုးယုတ်သောလောကသို့ ပြန်လှည့်မသွားရန် တပည့်များကို သတိပေးပြီးနောက် အဆိုပါမေးခွန်းနှင့်စပ်လျဉ်း၍ ယေရှုမိန့်ဆိုခဲ့သည်။
၇ “လူတို့သည် အားမလျှော့ဘဲ ကြိုးစား၍ [“အစဉ်မပြတ်၊” သမ္မာ] ဆုတောင်းရမည်အကြောင်းကို ဥပမာစကားအားဖြင့် [ယေရှု] မိန့်တော်မူသည်” ဟုလုကာမှတ်တမ်းကဆို၏။ ယေရှု ဤသို့မိန့်ဆိုသည်– “မြို့တစ်မြို့၌ ဘုရားသခင်ကိုမကြောက်ရွံ့၊ လူကိုအားမနာတတ်သော တရားသူကြီးတစ်ယောက်ရှိ၏။ ထိုမြို့၌နေသော မုဆိုးမတစ်ယောက်သည် တရားသူကြီးထံသို့သွား၍ ‘ကျွန်မရန်ဘက်ကို လက်စားချေလောက်အောင် အပြစ်အလျောက်ဒဏ်စီရင်ပါ’ ဟုတောင်းပန်သော်လည်း တရားမစီရင်ဘဲ ကြာမြင့်စွာနေ၏။ ထို့နောက် တရားသူကြီးက ‘ငါသည် ဘုရားသခင်ကိုမကြောက်ရွံ့၊ လူကိုအားမနာတတ်သောသူဖြစ်သော်လည်း ဤမုဆိုးမသည် ငါ့ကိုနှောင့်ယှက်သောကြောင့် သူ့ဘက်၌တရားစီရင်မည်။ သို့မဟုတ် အစဉ်လာ၍ ငါ့ကိုပင်ပန်းစေလိမ့်မည်’ ဟုစိတ်ထဲ၌အကြံရှိ၏။”
၈ ပုံဥပမာကို မိန့်ဆိုပြီးနောက် ယင်း၏သက်ဆိုင်ပုံကို ယေရှုဤသို့ရှင်းပြသည်– “မတရားသော ထိုတရားသူကြီး၏အကြံကို မှတ်ကြလော့။ ဘုရားသခင်ရွေးကောက်တော်မူသောသူတို့သည် ညနေ့မပြတ်အော်ဟစ်၍ တောင်းလျှောက်လျှင် ဘုရားသခင်သည် သူတို့ဘက်၌ တရားမစီရင်ဘဲနေတော်မူမည်လော။ ကြာမြင့်စွာသည်းခံတော်မူမည်လော။ ငါဆိုသည်ကား သူတို့ဘက်၌အလျင်အမြန် တရားစီရင်တော်မူမည်။ သို့သော်လည်း လူသားသည် ကြွလာသောအခါ ယုံကြည်ခြင်းကို မြေကြီးအပေါ်မှာတွေ့မည်လော။”—လုကာ ၁၈:၁-၈။
“အပြစ်အလျောက်ဒဏ်စီရင်ပါ”
၉။ မုဆိုးမနှင့်တရားသူကြီးပုံဥပမာတွင် အဘယ်အဓိကအကြောင်း ပေါ်လွင်သနည်း။
၉ ထိုပုံဥပမာ၏အဓိကဆိုလိုရင်းမှာ အလွန်ရှင်းပါသည်။ ယင်းကို ပုံဥပမာထဲမှဇာတ်ကောင်များအပြင် ယေရှုကိုယ်တိုင် ဖော်ပြခဲ့သည်။ မုဆိုးမက “အပြစ်အလျောက်ဒဏ်စီရင်ပါ” ဟုတရားသူကြီးကို တောင်းပန်သည်။ တရားသူကြီးက “သူ့ဘက်၌တရားစီရင်မည်” ဟုဆိုသည်။ ယေရှုက “ဘုရားသခင်သည် သူတို့ဘက်၌ တရားမစီရင်ဘဲနေတော်မူမည်လော” ဟုမေးခဲ့သည်။ ယေဟောဝါသည် “သူတို့ဘက်၌အလျင်အမြန် တရားစီရင်တော်မူမည်” ဟုကိုယ်တော်မိန့်ဆိုသည်။ (လုကာ ၁၈:၃၊ ၅၊ ၇၊ ၈) ယေဟောဝါသည် အထူးသဖြင့် မည်သည့်အချိန်တွင် “တရားစီရင်တော်မူမည်” နည်း။
၁၀။ (က) ပထမရာစုတွင် အဘယ်အချိန်၌ ဒဏ်စီရင်ခြင်းနေ့ရက်ကာလ ရောက်ရှိခဲ့သနည်း။ (ခ) ယနေ့ ဘုရားသခင့်လူမျိုးတော်အတွက် မည်သည့်အချိန်တွင် မည်သို့ တရားစီရင်တော်မူမည်နည်း။
၁၀ ပထမရာစုတွင် ယေရုရှလင်နှင့်ဝတ်ပြုရာအိမ်တော် ဖျက်ဆီးခံရသော အေဒီ ၇၀ ၌ “ဒဏ်စီရင်ခြင်းနေ့ရက်ကာလ” (နိုင်ငံတော်စာကြောင်းကြားညှပ်ကျမ်းအရ “ကလဲ့စားချေရာနေ့”) ရောက်ရှိခဲ့သည်။ (လုကာ ၂၁:၂၂) ယနေ့ ဘုရားသခင့်လူမျိုးတော်အတွက် “ယေဟောဝါ၏နေ့ကြီး” တွင် တရားသဖြင့်စီရင်တော်မူမည်။ (ဇေဖနိ ၁:၁၄၊ ကဘ; မဿဲ ၂၄:၂၁) ထိုအချိန်တွင် “ဘုရားသခင်ကိုမသိသောသူ၊ ငါတို့သခင်ယေရှုခရစ်၏ ဧဝံဂေလိတရားကို နားမထောင်သောသူတို့ကို မီးလျှံအားဖြင့် ဒဏ်ပေးတော်မူသောအခါ” ယေဟောဝါသည် မိမိလူမျိုးအား “ဆင်းရဲစေဖူးသောသူတို့၌ ဆင်းရဲခြင်းကို” ဆပ်ပေးတော်မူလိမ့်မည်။—၂ သက်သာလောနိတ် ၁:၆-၈; ရောမ ၁၂:၁၉။
၁၁။ အဘယ်နည်းဖြင့် “အလျင်အမြန်” တရားစီရင်မည်နည်း။
၁၁ သို့သော် ယေဟောဝါ “အလျင်အမြန်” တရားစီရင်တော်မူမည်ဟူသော ယေရှု၏ကတိတော်ကို မည်သို့နားလည်သင့်သနည်း။ ယေဟောဝါသည် “သည်းခံ” တော်မူသော်လည်း အချိန်တန်လျှင် အလျင်အမြန်တရားစီရင်မည်ဖြစ်ကြောင်း ကျမ်းစာကဖော်ပြသည်။ (လုကာ ၁၈:၇၊ ၈; ၂ ပေတရု ၃:၉၊ ၁၀) နောဧခေတ်တွင် ရေလွှမ်းမိုးဘေးဖြင့် လူဆိုးတို့ကို မနှောင့်မနှေးသုတ်သင်ပယ်ရှင်းခဲ့သည်။ တစ်ဖန် လောတခေတ်တွင် ကောင်းကင်မှမီးကျပြီး လူဆိုးတို့ကို ဖျက်ဆီးခဲ့သည်။ ထိုနည်းတူ “လူသားပေါ်ထွန်းသောနေ့၌ ဖြစ်လိမ့်မည်” ဟုယေရှုမိန့်ဆို၏။ (လုကာ ၁၇:၂၇-၃၀) လူဆိုးတို့သည် “လျင်မြန်စွာသောပျက်စီးခြင်း” နှင့်တွေ့ကြုံရဦးမည်ဖြစ်သည်။ (၁ သက်သာလောနိတ် ၅:၂၊ ၃) ယေဟောဝါ၏တရားမျှတမှုက စာတန့်လောကကို သတ်မှတ်ထားသည့်အချိန်ထက် တစ်ရက်ပင်ပို၍ တည်ရှိခွင့်ပြုမည်မဟုတ်ကြောင်း ကျွန်ုပ်တို့ အပြည့်အဝယုံကြည်စိတ်ချနိုင်သည်။
‘သူတို့ဘက်၌ တရားစီရင်တော်မူမည်’
၁၂၊ ၁၃။ (က) ယေရှု၏ မုဆိုးမနှင့်တရားသူကြီးပုံဥပမာမှ အဘယ်သင်ခန်းစာရသနည်း။ (ခ) ယေဟောဝါသည် ကျွန်ုပ်တို့၏ဆုတောင်းချက်များကို နားညောင်းပြီး တရားစီရင်တော်မူမည်ဖြစ်ကြောင်း အဘယ်ကြောင့် ယုံကြည်စိတ်ချနိုင်သနည်း။
၁၂ မုဆိုးမနှင့်တရားသူကြီးပုံဥပမာသည် အခြားအရေးပါအမှန်တရားများကိုလည်း ပေါ်လွင်စေသည်။ ပုံဥပမာ၏သက်ဆိုင်ပုံကို ယေရှုဤသို့ဆိုသည်– ‘မတရားသော ထိုတရားသူကြီး၏အကြံကို မှတ်ကြလော့။ ဘုရားသခင်သည် ရွေးကောက်တော်မူသောသူတို့ဘက်၌ တရားမစီရင်ဘဲနေတော်မူမည်လော။’ ထိုတရားသူကြီးနည်းတူ ယေဟောဝါသည် ယုံကြည်သူများကို ဆက်ဆံမည်ဟူသည့်သဘောမျိုးဖြင့် ယေရှုနှိုင်းယှဉ်နေခြင်းမဟုတ်ပါ။ ယင်းအစား တရားသူကြီးနှင့်ဘုရားသခင်၏ ခြားနားမှုကို ပေါ်လွင်စေခြင်းဖြင့် ဘုရားသခင်နှင့်ပတ်သက်၍ နောက်လိုက်များအား သင်ကြားပေးနေခြင်းဖြစ်သည်။ မည်သည့်နည်းများဖြင့် ခြားနားသနည်း။
၁၃ ယေရှု၏ပုံဥပမာပါ တရားသူကြီးသည် “မတရားသော” သူဖြစ်သော်လည်း “ဘုရားသခင်သည် တရားသဖြင့်စီရင်သော” တရားသူကြီးဖြစ်တော်မူ၏။ (ဆာလံ ၇:၁၁; ၃၃:၅) တရားသူကြီးသည် မုဆိုးမကို ပုဂ္ဂိုလ်ရေးအရစိတ်မဝင်စားသော်လည်း ယေဟောဝါမူကား ကျွန်ုပ်တို့တစ်ဦးစီကို စိတ်ဝင်စားတော်မူသည်။ (၂ ရာဇဝင်ချုပ် ၆:၂၉-၃၁) တရားသူကြီးသည် မုဆိုးမကို မကူညီလိုသော်လည်း ယေဟောဝါသည် မိမိအားဝတ်ပြုသူများကို ကူညီလိုစိတ်ပြင်းပြတော်မူသည်။ (ဟေရှာယ ၃၀:၁၈၊ ၁၉) အဘယ်သင်ခန်းစာရသနည်း။ မတရားသော ထိုတရားသူကြီးပင် မုဆိုးမ၏တောင်းဆိုမှုကို လိုက်လျောပြီး တရားစီရင်ပေးသည်ဆိုလျှင် ယေဟောဝါသည် မိမိလူမျိုး၏ဆုတောင်းချက်များကို သာ၍နားထောင်ပြီး သေချာပေါက် တရားစီရင်ပေးတော်မူမည်။—သု. ၁၅:၂၉။
၁၄။ ဘုရားသခင်၏ တရားစီရင်ရာနေ့ရောက်လာမည်ကို အဘယ်ကြောင့် ဆက်ယုံကြည်နေသင့်သနည်း။
၁၄ ထို့ကြောင့် ဘုရားသခင်၏ တရားစီရင်ရာနေ့ရောက်မည်ကို မယုံကြည်တော့သူများအတွက် အမှားကြီးမှားခြင်းပင်။ အဘယ်ကြောင့်နည်း။ “ယေဟောဝါ၏နေ့ကြီးနီးပြီ” ကို သူတို့အခိုင်အမာမယုံကြည်ခြင်းက ယေဟောဝါသည် မိမိကတိတော်များကို သစ္စာရှိစွာ မပျက်မကွက်ပြည့်စုံစေသည့်အရှင်ဖြစ်၊ မဖြစ်ကို သူတို့သံသယရှိကြောင်း ဖော်ပြရာရောက်သည်။ သို့သော် ယေဟောဝါ၏သစ္စာရှိမှုကို မည်သူမျှ သံသယဝင်ပိုင်ခွင့်မရှိပေ။ (ယောဘ ၉:၁၂) မေးသင့်သည်မှာ ကျွန်ုပ်တို့ကိုယ်တိုင် သစ္စာရှိနေသလောဟူ၍ဖြစ်သည်။ ယင်းသည် မုဆိုးမနှင့်တရားသူကြီးပုံဥပမာ၏အဆုံးတွင် ယေရှုပြောဆိုခဲ့သော အကြောင်းအရာပင်ဖြစ်သည်။
“လူသားသည် ကြွလာသောအခါ ထိုသို့သော ယုံကြည်ခြင်းကို မြေကြီးအပေါ်မှာတွေ့မည်လော”
၁၅။ (က) အဘယ်မေးခွန်းကို ယေရှုမေးခဲ့သနည်း။ အဘယ်ကြောင့်နည်း။ (ခ) ကျွန်ုပ်တို့ကိုယ်ကို အဘယ်မေးခွန်းမေးသင့်သနည်း။
၁၅ “လူသားသည် ကြွလာသောအခါ ထိုသို့သောယုံကြည်ခြင်းကို မြေကြီးအပေါ်မှာတွေ့မည်လော” ဟူသည့်စိတ်ဝင်စားဖွယ်မေးခွန်းကို ယေရှုမေးခဲ့၏။ (လုကာ ၁၈:၈၊ ကဘ၊ အောက်ခြေမှတ်ချက်) “ထိုသို့သောယုံကြည်ခြင်း” ဟူသည် ယေဘုယျသဘောဖြင့်သုံးနှုန်းသော ယုံကြည်ခြင်းမဟုတ်ဘဲ မုဆိုးမတင်ပြခဲ့သော ထူးခြားသည့်ယုံကြည်ခြင်းမျိုးဖြစ်၏။ ယေရှုသည် ထိုမေးခွန်း၏အဖြေကို မပေးခဲ့ပါ။ တပည့်များသည် နောက်ပြန်လှည့်သွားနိုင်သည်အထိ ယုံကြည်ခြင်းအားနည်းလာပြီလော။ သို့မဟုတ် သူတို့တွင် မုဆိုးမ၏ယုံကြည်ခြင်းမျိုး ရှိသလော။ ယင်းကို ပြန်လည်ဆန်းစစ်နိုင်ရန် ယေရှု ထိုသို့မေးခဲ့ခြင်းဖြစ်သည်။ ယနေ့ ကျွန်ုပ်တို့လည်း ‘ငါ့နှလုံးထဲမှာ ဘယ်လိုယုံကြည်ခြင်းမျိုးကို “လူသား” တွေ့မလဲ’ ဟုမိမိကိုယ်ကိုမေးသင့်သည်။
၁၆။ မုဆိုးမတွင် မည်သို့သောယုံကြည်ခြင်းမျိုးရှိသနည်း။
၁၆ ကျွန်ုပ်တို့ဘက်၌ ယေဟောဝါ တရားစီရင်ပေးစေလိုလျှင် မုဆိုးမ၏ပုံသက်သေကို လိုက်လျှောက်ရမည်။ မုဆိုးမတွင် မည်သို့သောယုံကြည်ခြင်းမျိုးရှိသနည်း။ “ကျွန်မရန်ဘက်ကို လက်စားချေလောက်အောင် အပြစ်အလျောက်ဒဏ်စီရင်ပါ” ဟု “တရားသူကြီးထံသို့” အကြိမ်ကြိမ်သွားပြောခြင်းဖြင့် သူ၏ယုံကြည်ခြင်းကို တင်ပြခဲ့သည်။ မုဆိုးမသည် မိမိအတွက်တရားစီရင်ပေးရန် မတရားသူတစ်ဦးထံ အကြိမ်ကြိမ်သွားခဲ့သည်။ ယနေ့ ဘုရားသခင့်ကျေးကျွန်များလည်း မျှော်လင့်ထားသည်ထက် ပိုကြာနေလျှင်ပင် မိမိဘက်၌ ယေဟောဝါ တရားစီရင်ပေးမည်ကို ယုံကြည်စိတ်ချနိုင်ပါသည်။ ထို့ပြင် ယေဟောဝါထံ အားမလျှော့ဘဲ “ညနေ့မပြတ်အော်ဟစ်၍ တောင်းလျှောက်” ခြင်းဖြင့် ကိုယ်တော့်ကတိတော်များကို ယုံကြည်စိတ်ချကြောင်း သူတို့ဖော်ပြကြသည်။ (လုကာ ၁၈:၇) အမှန်မှာ၊ ခရစ်ယာန်တစ်ဦးသည် တရားစီရင်ပေးပါရန် ဆုမတောင်းတော့လျှင် မိမိကျေးကျွန်များအတွက် ယေဟောဝါ အရေးယူဆောင်ရွက်တော်မူမည်ကို မယုံကြည်ကြောင်း ဖော်ပြရာရောက်သည်။
၁၇။ ဆုတောင်းခြင်းကို အမြဲပြုရန်နှင့် ယေဟောဝါ၏တရားစီရင်ရာနေ့ မုချရောက်လာမည်ကို ဆက်ယုံကြည်နေရန် အဘယ်အကြောင်းရင်းများရှိသနည်း။
၁၇ မုဆိုးမ၏ အခြေအနေအချို့က အားမလျှော့ဘဲဆုတောင်းရန် ထပ်ဆင့်အကြောင်းရင်းများရှိကြောင်း ဖော်ပြသည်။ သူနှင့်ကျွန်ုပ်တို့၏ အခြေအနေကွာခြားမှုအချို့ကို သုံးသပ်ကြည့်ပါ။ မုဆိုးမကို တရားသူကြီးထံဆက်သွားရန် အားပေးမည့်သူမရှိသော်လည်း ‘ဆုတောင်းခြင်းအမှုကို အမြဲပြု’ ရန် ကျွန်ုပ်တို့ကို သမ္မာကျမ်းစာက များစွာအားပေးထားသည်။ (ရောမ ၁၂:၁၂) မုဆိုးမတွင် မိမိတောင်းဆိုချက်များ ပြည့်ဝမည်ဟူသည့် အာမခံချက်မရှိသော်လည်း ကျွန်ုပ်တို့တွင်မူ တရားစီရင်ပေးမည်ဟူသော ယေဟောဝါ၏ အာမခံချက်ရှိသည်။ မိမိပရောဖက်မှတစ်ဆင့် ကိုယ်တော်ဤသို့မိန့်တော်မူ၏– “ဆိုင်းသော်လည်း မျှော်လင့်လော့။ နောက်မကျဘဲ ဧကန်အမှန်ရောက်လိမ့်မည်။” (ဟဗက္ကုတ် ၂:၃; ဆာလံ ၉၇:၁၀) မုဆိုးမ၏အသနားခံချက်ကို ပိုအလေးစီးစေရန် သူ့ကိုယ်စား ကူညီတောင်းလျှောက်ပေးမည့်သူမရှိပေ။ သို့သော် ယေရှုသည် “ဘုရားသခင်၏လက်ယာတော်ဘက်၌နေလျက် [ကျွန်ုပ်]တို့အဖို့ ဆုတောင်း” ပေးကာ ကူညီတော်မူသည်။ (ရောမ ၈:၃၄; ဟေဗြဲ ၇:၂၅) ထို့ကြောင့် မုဆိုးမသည် မိမိဘက်၌တရားစီရင်ပေးမည်ဟူသော မျှော်လင့်ချက်ဖြင့် တရားသူကြီးထံ ခက်ခဲသောအခြေအနေကြားမှ ဆက်အသနားခံသည်ဆိုလျှင် ကျွန်ုပ်တို့လည်း ယေဟောဝါ၏တရားစီရင်ရာနေ့ မုချရောက်လာမည်ကို သာ၍ယုံကြည်နေသင့်သည်မဟုတ်လော!
၁၈။ ဆုတောင်းခြင်းသည် ယုံကြည်ခြင်းကို မည်သို့ခိုင်မာစေပြီး ကျွန်ုပ်တို့ဘက်၌ ဘုရားသခင်တရားစီရင်ပေးရန် မည်သို့ကူညီသနည်း။
၁၈ ဆုတောင်းခြင်းနှင့် ယုံကြည်ခြင်းတို့ အနီးကပ်ဆက်စပ်နေကြောင်း၊ အားမလျှော့ဘဲဆုတောင်းခြင်းသည် ယုံကြည်ခြင်းအားနည်းသွားစေနိုင်သော ဩဇာလွှမ်းမိုးမှုများကို တားဆီးနိုင်ကြောင်း မုဆိုးမပုံဥပမာက သင်ကြားပေးသည်။ သို့သော် ဟန်ပြဆုတောင်းရုံဖြင့် ယုံကြည်ခြင်းကို ဆက်ထိန်းထားနိုင်မည်မဟုတ်ပါ။ (မဿဲ ၆:၇၊ ၈) ကျွန်ုပ်တို့သည် ဘုရားသခင်ကို လုံးလုံးလျားလျားမှီခိုအားထားနေရကြောင်း သိနားလည်ကာ ဆုတောင်းမှသာ ဘုရားသခင်နှင့်ရင်းနှီးလာပြီး ယုံကြည်ခြင်းခိုင်မာလာသည်။ ကယ်တင်ခံရရန် ယုံကြည်ခြင်းလိုအပ်သောကြောင့် “အားမလျှော့ဘဲ ကြိုးစား၍ဆုတောင်း” ရန် တပည့်များကို အားပေးဖို့လိုသည်ဟု ယေရှုယူမှတ်ခဲ့ခြင်းဖြစ်သည်။ (လုကာ ၁၈:၁; ၂ သက်သာလောနိတ် ၃:၁၃) လာလတ္တံ့သော “ယေဟောဝါ၏နေ့ကြီး” သည် ကျွန်ုပ်တို့၏ဆုတောင်းချက်များအပေါ် မမူတည်ပေ။ ထိုနေ့အတွက် ဆုတောင်းသည်ဖြစ်စေ၊ မတောင်းသည်ဖြစ်စေ ဧကန်ရောက်လာမည်ဖြစ်၏။ သို့သော် ကျွန်ုပ်တို့ဘက်၌ ဘုရားသခင်တရားစီရင်မည်၊ မစီရင်မည်၊ ကျွန်ုပ်တို့ကိုယ်တိုင် ဘုရားသခင့်စစ်ပွဲတွင် ကယ်တင်ခံရမည်၊ မခံရမည်တို့သည် ကျွန်ုပ်တို့၏ယုံကြည်ခြင်းနှင့် ဆုတောင်းချက်များအတိုင်း ဖြောင့်မတ်စွာကျင့်နေခြင်းအပေါ် လုံးလုံးလျားလျားမူတည်ပါသည်။
၁၉။ ဘုရားသခင် ‘တရားစီရင်တော်မူမည်’ ကို အခိုင်အမာယုံကြည်စိတ်ချကြောင်း ကျွန်ုပ်တို့ မည်သို့သက်သေထူကြသနည်း။
၁၉ “လူသားသည် ကြွလာသောအခါ ယုံကြည်ခြင်းကို မြေကြီးအပေါ်မှာတွေ့မည်လော” ဟုယေရှုမေးခဲ့သည်ကို ကျွန်ုပ်တို့အမှတ်ရကြသည်။ ထိုစိတ်ဝင်စားဖွယ်မေးခွန်း၏ အဖြေကား အဘယ်နည်း။ ယနေ့ ကမ္ဘာတစ်ဝန်းရှိ ယေဟောဝါ၏သစ္စာရှိကျေးကျွန် သန်းပေါင်းများစွာသည် ဆုတောင်းခြင်း၊ စိတ်ရှည်ခြင်းနှင့် အားမလျှော့ခြင်းတို့ဖြင့် ထိုယုံကြည်ခြင်းမျိုးရှိကြောင်း သက်သေထူနေကြ၍ ဝမ်းသာစရာပင်! ထို့ကြောင့် ယေရှု၏မေးခွန်းကို ဟုတ်ကဲ့ဟုဖြေဆိုနိုင်ပေသည်။ လက်ရှိအချိန်တွင် စာတန့်လောက၏ တရားမမျှတမှုများကို ခံစားနေရသော်လည်း ဘုရားသခင်သည် မိမိ ‘ရွေးကောက်တော်မူသောသူတို့ဘက်၌ တရားစီရင်တော်မူမည်’ ကို ကျွန်ုပ်တို့အခိုင်အမာယုံကြည်ကြပါသည်။
[အောက်ခြေမှတ်ချက်]
^ အပိုဒ်၊ 3 ထိုဥပမာ၏အဓိပ္ပာယ်ကို အပြည့်အဝနားလည်နိုင်ရန် လုကာ ၁၇:၂၂-၃၃ ကိုဖတ်ကြည့်ပါ။ လုကာ ၁၇:၂၂၊ ၂၄၊ ၃၀ ပါ “လူသား” ဟူသောအသုံးအနှုန်းများသည် လုကာ ၁၈:၈ ပါမေးခွန်းနှင့် မည်သို့သက်ဆိုင်ကြောင်း ဂရုပြုကြည့်ပါ။
သင်မှတ်မိသလော
• ခရစ်ယာန်အချို့ အဘယ်ကြောင့် ယုံကြည်ခြင်းပျောက်ဆုံးသွားသနည်း။
• ယေဟောဝါ၏တရားစီရင်ရာနေ့ ရောက်လာမည်ကို ကျွန်ုပ်တို့ အဘယ်ကြောင့် အခိုင်အမာယုံကြည်နိုင်သနည်း။
• ဆုတောင်းခြင်းကို အမြဲပြုရန် အဘယ်အကြောင်းရင်းများရှိသနည်း။
• အားမလျှော့ဘဲဆုတောင်းခြင်းသည် ယုံကြည်ခြင်းဆက်ထိန်းထားနိုင်ရန် မည်သို့ကူညီပေးမည်နည်း။
[လေ့လာရန်မေးခွန်းများ]
[စာမျက်နှာ ၂၆ ပါ ရုပ်ပုံ]
မုဆိုးမနှင့် တရားသူကြီးပုံဥပမာတွင် အဘယ်အရာ ပေါ်လွင်သနည်း
[စာမျက်နှာ ၂၉ ပါ ရုပ်ပုံ]
ဘုရားသခင် ‘တရားစီရင်တော်မူမည်’ ကို ယနေ့ လူသန်းပေါင်းများစွာ အခိုင်အမာယုံကြည်စိတ်ချကြ