သင်သည် ‘ဘုရားသခင့်ဝိညာဉ်တော်ဖြင့် လျှောက်လှမ်း’ နေမည်လော

“ဘုရားသခင့်ဝိညာဉ်တော်ဖြင့် သင်တို့ လျှောက်လှမ်းနေကြမည်ဆိုလျှင် သွေးသားအလိုဆန္ဒနောက်သို့လိုက်ကြတော့မည် မဟုတ်။”—⁠ဂလာတိ ၅:၁၆၊ ကဘ။

၁။ ဝိညာဉ်တော်ကိုပြစ်မှားမိပြီဟူသည့် စိုးရိမ်သောကကို မည်သို့ဖယ်ရှားနိုင်သနည်း။

ယေဟောဝါ၏ သန့်ရှင်းသောဝိညာဉ်တော်ကို ပြစ်မှားမိပြီဟူသည့် စိုးရိမ်သောကကို ဖယ်ရှားနိုင်သော နည်းတစ်နည်းရှိသည်။ ယင်းမှာ “ဘုရားသခင့်ဝိညာဉ်တော်ဖြင့် သင်တို့ လျှောက်လှမ်းနေကြမည်ဆိုလျှင် သွေးသားအလိုဆန္ဒနောက်သို့ လိုက်ကြတော့မည် မဟုတ်” ဟူသော တမန်တော်ပေါလု၏စကားကို လိုက်နာခြင်းဖြစ်၏။ (ဂလာတိ ၅:၁၆၊ ကဘ) ဘုရားသခင့်ဝိညာဉ်တော်၏လမ်းပြမှုကို ခံယူမည်ဆိုလျှင် မလျောက်ပတ်သောသွေးသားဆန္ဒများ၏ လွှမ်းမိုးမှု ခံရတော့မည်မဟုတ်။—⁠ရောမ ၈:၂-၁၀။

၂၊ ၃။ ဝိညာဉ်တော်ဖြင့်လျှောက်လှမ်းနေမည်ဆိုလျှင် မည်သို့အကျိုးခံစားရမည်နည်း။

^၂ ကျွန်ုပ်တို့သည် ‘ဝိညာဉ်တော်ဖြင့် လျှောက်လှမ်းနေ’ သောကြောင့် ထိုတန်ခိုးတော်က ယေဟောဝါကိုနာခံရန် လှုံ့ဆော်ပေးပါလိမ့်မည်။ ခရစ်ယာန်ဓမ္မအမှု၊ အသင်းတော်၊ အိမ်နှင့်အခြားနေရာများတွင် ဘုရားရေးရာအရည်အသွေးများ တင်ပြကြပါလိမ့်မည်။ အိမ်ထောင်ဖက်၊ သားသမီး၊ ယုံကြည်သူချင်း၊ အခြားသူများနှင့်ဆက်ဆံရာတွင် ဝိညာဉ်တော်ကသီးပွင့်စေသော အရည်အသွေးများ ထင်ရှားနေလိမ့်မည်။

^၃ ‘ဘုရားသခင့်ရှေ့တော်၌ ဝိညာဉ်တော်အားဖြင့် အသက်ရှင်’ ခြင်းက အပြစ်ကိုရှောင်ရှားစေနိုင်သည်။ (၁ ပေတရု ၄:၁-၆) ဝိညာဉ်တော်၏လွှမ်းမိုးမှုကိုခံယူပါက ခွင့်မလွှတ်ထိုက်သောအပြစ်ကို ကျူးလွန်မည်မဟုတ်ပေ။ ထို့ပြင် ဝိညာဉ်တော်ဖြင့်လျှောက်လှမ်းနေမည်ဆိုလျှင် ကျွန်ုပ်တို့၏ဘဝတွင် အခြားအဘယ်ကောင်းကျိုးများ ရရှိမည်နည်း။

ဘုရားသခင်၊ ခရစ်တော်နှင့် နီးကပ်စွာနေလော့

၄၊ ၅။ ဝိညာဉ်တော်ဖြင့်လျှောက်လှမ်းခြင်းသည် ယေရှုနှင့်ပတ်သက်သော ကျွန်ုပ်တို့၏ရှုမြင်ပုံကို မည်သို့အကျိုးသက်ရောက်သနည်း။

^၄ ကျွန်ုပ်တို့သည် ဝိညာဉ်တော်ဖြင့်လျှောက်လှမ်းသောကြောင့် ဘုရားသခင်၊ ကိုယ်တော့်သားတော်နှင့် ရင်းနှီးသောဆက်ဆံရေး ထိန်းသိမ်းနိုင်ကြသည်။ ဝိညာဉ်ဆုကျေးဇူးနှင့်ပတ်သက်၍ ကောရိန္သုမြို့ရှိယုံကြည်သူချင်းများထံ ပေါလု ဤသို့ရေး၏– “ဘုရားသခင်၏ဝိညာဉ်တော်အားဖြင့်ဟောပြော၍ အဘယ်သူမျှ ယေရှုကိုမကျိန်ဆဲနိုင်သည်ကိုလည်းကောင်း၊ ယေရှုသည် သခင်ဘုရားဖြစ်တော်မူ၏ဟု သန့်ရှင်းသောဝိညာဉ်တော်ကိုအမှီမပြုလျှင် အဘယ်သူမျှမပြောနိုင်သည်ကိုလည်းကောင်း သင်တို့သည် [ယခင်က ရုပ်ပုံကိုးကွယ်သူတို့] သိနားလည်စေခြင်းငှာ ငါသတိပေး၏။” (၁ ကောရိန္သု ၁၂:၁-၃) ယေရှုအားကျိန်ဆဲရန် လူတို့ကိုလှုံ့ဆော်ပေးသော မည်သည့်ဝိညာဉ်မဆိုသည် စာတန်ထံမှအရင်းခံခြင်းသာ ဖြစ်၏။ သို့သော် ခရစ်ယာန်များသည် သန့်ရှင်းသောဝိညာဉ်တော်ဖြင့် လျှောက်လှမ်းနေသောကြောင့် ယေဟောဝါသည် ယေရှုကို သေခြင်းမှထမြောက်စေပြီး ဖန်ဆင်းရာအားလုံးထက် ချီးမြှောက်ကြောင်း ယုံကြည်စိတ်ချကြသည်။ (ဖိလိပ္ပိ ၂:၅-၁၁) ကျွန်ုပ်တို့သည် ခရစ်တော်၏ပူဇော်ရာယဇ်ကို ယုံကြည်ကြသည်၊ ဘုရားသခင်သည် ကိုယ်တော့်ကို ကျွန်ုပ်တို့၏သခင်အဖြစ်ခန့်အပ်ကြောင်း လက်ခံကြသည်။

^၅ အေဒီပထမရာစုမှ အမည်ခံခရစ်ယာန်အချို့သည် သွေးသားခန္ဓာနှင့် ယေရှုကြွလာခဲ့ကြောင်းကို ငြင်းပယ်ကြ၏။ (၂ ယောဟန် ၇-၁၁) ထိုမှားယွင်းသောအမြင်ကို လက်ခံကြသူအချို့သည် မေရှိယနှင့်ပတ်သက်သည့် စစ်မှန်သောသွန်သင်ချက်များကို ငြင်းပယ်ကြလေသည်။ (မာကု ၁:၉-၁၁; ယောဟန် ၁:၁၊ ၁၄) သန့်ရှင်းသောဝိညာဉ်တော်ဖြင့် လျှောက်လှမ်းခြင်းသည် ထိုသို့သောအယူဖောက်ပြန်မှုနောက် လိုက်ပါမသွားရန် တားဆီးပေးသည်။ သို့သော် ဝိညာဉ်ရေးတွင် နိုးနိုးကြားကြားရှိနေခြင်းဖြင့်သာ ယေဟောဝါ၏မဟာကရုဏာတော် ဆက်ခံစားရမည်ဖြစ်ပြီး ‘အမှန်တရား၌ကျင်လည်’ နိုင်မည်ဖြစ်သည်။ (၃ ယောဟန် ၃၊ ၄) ထို့ကြောင့် ကောင်းကင်ခမည်းတော်နှင့် ရင်းနှီးသောဆက်ဆံရေး ရှိနေနိုင်ရန် အယူဖောက်ပြန်မှုအားလုံးကို ငြင်းပယ်ဖို့ စိတ်ပိုင်းဖြတ်ထားကြပါစို့။

၆။ ဘုရားသခင့်ဝိညာဉ်တော်သည် ဝိညာဉ်တော်ဖြင့်လျှောက်လှမ်းသူတို့တွင် အဘယ်အရည်အသွေးများ သီးပွင့်စေသနည်း။

^၆ ပေါလုသည် ရုပ်ပုံကိုးကွယ်ခြင်းနှင့် သင်းခွဲခြင်းကို မတရားသောမေထုန်၌မှီဝဲခြင်း၊ အကျင့်ပျက်ခြင်းကဲ့သို့သော “ဇာတိပကတိအကျင့်” များနှင့်ယှဉ်တွဲဖော်ပြထားသည်။ သို့သော် “ခရစ်တော်နှင့်စပ်ဆိုင်သောသူတို့သည် ဇာတိပကတိကိုလည်းကောင်း၊ ဇာတိပကတိစိတ်များနှင့် အလိုဆန္ဒများကိုလည်းကောင်း လက်ဝါးကပ်တိုင်မှာရိုက်ထားကြပြီ။ သို့ဖြစ်၍ ငါတို့သည် ဝိညာဉ်ပကတိကြောင့်အသက်ရှင်လျှင် ဝိညာဉ်ပကတိအတိုင်းကျင့်ကြကုန်အံ့”  ဟုသူဆက်ရှင်းပြသည်။ (ဂလာတိ ၅:၁၉-၂၁၊ ၂၄၊ ၂၅) ဘုရားသခင့်ဝိညာဉ်တော်သည် ဝိညာဉ်တော်ဖြင့်လျှောက်လှမ်းသူတို့တွင် အဘယ်အရည်အသွေးများ သီးပွင့်စေသနည်း။ “ဝိညာဉ်ပကတိ၏အကျိုးမူကား ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်ခြင်း၊ ကျေးဇူးပြုခြင်း၊ ကောင်းမြတ်ခြင်း၊ [“ယုံကြည်ခြင်း၊” ကဘ]၊ နူးညံ့သိမ်မွေ့ ခြင်း၊ ချုပ်တည်းခြင်းပေတည်း” ဟုပေါလုရေးခဲ့သည်။ (ဂလာတိ ၅:၂၂၊ ၂၃) ထိုအရည်အသွေးများကို သုံးသပ်ကြည့်ကြစို့။

“အချင်းချင်းချစ်” ကြလော့

၇။ မေတ္တာဟူသည် အဘယ်နည်း၊ ယင်း၏ အသွင်အပြင်အချို့ကား အဘယ်နည်း။

^၇ ဝိညာဉ်တော်က သီးပွင့်စေသော အရည်အသွေးတစ်ခုမှာ ချစ်ခြင်းမေတ္တာဖြစ်သည်။ ယင်းတွင် အခြားသူများကို နက်နက်ရှိုင်းရှိုင်းချစ်ခြင်း၊ ကိုယ်ကျိုးမဖက်သောစိတ်ဝင်စားမှု တင်ပြခြင်း၊ သူတို့နှင့်ရင်းရင်းနှီးနှီးရှိခြင်းတို့ ပါဝင်လေ့ရှိသည်။ ဘုရားသခင်သည် မေတ္တာ၏အရင်းမူလဖြစ်သည်။ ထို့ကြောင့် “ဘုရားသခင်သည် ချစ်ခြင်းမေတ္တာဖြစ်တော်မူ၏” ဟုသမ္မာကျမ်းစာကဆိုထားသည်။ ယေရှုခရစ်၏ရွေးဖိုးပူဇော်သကာသည် လူသားတို့ကိုချစ်သော ဘုရားသခင်နှင့်ကိုယ်တော့်သားတော်၏ အကြီးမားဆုံးမေတ္တာပင်ဖြစ်သည်။ (၁ ယောဟန် ၄:၈; ယောဟန် ၃:၁၆; ၁၅:၁၃; ရောမ ၅:၈) အချင်းချင်းချစ်သောမေတ္တာက ကျွန်ုပ်တို့သည် ယေရှု၏နောက်လိုက်များဖြစ်ကြောင်း ခွဲခြားသိမြင်စေသည်။ (ယောဟန် ၁၃:၃၄၊ ၃၅) အမှန်မှာ “အချင်းချင်းချစ်” ရန် ကျွန်ုပ်တို့မိန့်မှာခံရ၏။ (၁ ယောဟန် ၃:၂၃) ထို့ပြင် မေတ္တာသည် စိတ်ရှည်တတ်၏၊ ကရုဏာပြတတ်၏၊ ဂုဏ်ပြိုင်ခြင်းမရှိ၊ ဝါကြွားခြင်းမရှိ၊ မလျောက်ပတ်စွာမကျင့်တတ်၊ ကိုယ်အကျိုးကိုမရှာတတ်၊ ဒေါသအမျက်မထွက်တတ်၊ အပြစ်ရှိသည်ဟုမထင်တတ်၊ မတရားသောအမှု၌ဝမ်းမြောက်ခြင်းမရှိတတ်၊ အမှန်တရား၌ဝမ်းမြောက်တတ်၏၊ ခပ်သိမ်းသောအရာကို ဖုံးအုပ်တတ်၏၊ ယုံတတ်၏၊ မျှော်လင့်တတ်၏၊ သည်းခံတတ်၏၊ ဖောက်ပြန်ခြင်းသဘောနှင့် အစဉ်ကင်းလွတ်၏ဟု ပေါလုဆိုသည်။—⁠၁ ကောရိန္သု ၁၃:၄-၈။

၈။ ယေဟောဝါကိုဝတ်ပြုသူချင်းတို့အား အဘယ်ကြောင့် မေတ္တာတင်ပြသင့်သနည်း။

^၈ ဘုရားသခင့်ဝိညာဉ်တော်၏လှုံ့ဆော်မှုကြောင့် ကျွန်ုပ်တို့တွင် ချစ်ခြင်းမေတ္တာရှိလာပါက ဘုရားသခင်နှင့်လူသားချင်းကို ကျွန်ုပ်တို့ချစ်မည်ဖြစ်သည်။ (မဿဲ ၂၂:၃၇-၃၉) “မိမိညီအစ်ကို,ကို မချစ်သောသူသည် သေခြင်း၌တည်၏။ မိမိညီအစ်ကို,ကို မုန်းသောသူမည်သည်ကား လူအသက်ကိုသတ်သောသူဖြစ်၏။ လူအသက်ကိုသတ်သောသူ တစ်စုံတစ်ယောက်မျှ ထာဝရအသက်မတည်သည်ကို သင်တို့သိကြ၏” ဟုတမန်တော်ယောဟန်ရေးသားခဲ့သည်။ (၁ ယောဟန် ၃:၁၄၊ ၁၅) ရှေးဣသရေလနိုင်ငံ၌ လူတစ်ဦးသည် မုန်းတီးစိတ်ကြောင့်မဟုတ်ဘဲ မတော်တဆလူသတ်မိမှသာ ခိုလှုံရာမြို့တွင် အကာအကွယ်ရရှိနိုင်မည်ဖြစ်သည်။ (တရားဟောရာ ၁၉:၄၊ ၁၁-၁၃) ကျွန်ုပ်တို့သည် သန့်ရှင်းသောဝိညာဉ်တော်၏ ဦးဆောင်မှုကို ခံယူနေလျှင် ဘုရားသခင်၊ ဝတ်ပြုသူချင်းနှင့် အခြားသူများကိုချစ်ကြောင်း တင်ပြမည်ဖြစ်သည်။

“ယေဟောဝါ၏ဝမ်းမြောက်ခြင်းသည်သင်တို့ခိုလှုံရာဖြစ်”

၉၊ ၁၀။ ဝမ်းမြောက်ခြင်းဟူသည် အဘယ်နည်း၊ ဝမ်းမြောက်စေသည့် အကြောင်းရင်းအချို့ကား အဘယ်နည်း။

^၉ ဝမ်းမြောက်ခြင်းသည် အလွန်ပျော်ရွှင်နေသော အခြေအနေဖြစ်သည်။ ယေဟောဝါသည် “ပျော်ရွှင်သောဘုရားသခင်” ဖြစ်တော်မူ၏။ (၁ တိမောသေ ၁:၁၁၊ ကဘ; ဆာလံ ၁၀၄:၃၁) သားတော်သည်လည်း ခမည်းတော်၏အလိုတော်ကို အားရဝမ်းမြောက်စွာ ထမ်းဆောင်ခဲ့သည်။ (ဆာလံ ၄၀:၈; ဟေဗြဲ ၁၀:၇-၉) “ယေဟောဝါ၏ဝမ်းမြောက်ခြင်းသည် [ကျွန်ုပ်]တို့ခိုလှုံရာဖြစ်သည်။”—⁠နေဟမိ ၈:၁၀၊ ကဘ။

^၁၀ ဘုရားသခင်ပေးတော်မူသော ဝမ်းမြောက်ခြင်းသည် ခက်ခဲချိန်၊ ဝမ်းနည်းကြေကွဲနေချိန် သို့မဟုတ် နှိပ်စက်ညှဉ်းပန်းခံရချိန်တွင်ပင် ဘုရားသခင့်အလိုတော်ထမ်းဆောင်ရာ၌ ကြီးစွာသောပျော်ရွှင်ကျေနပ်မှု ခံစားရစေသည်။ “ဘုရားသခင်ကိုသိသောဉာဏ်” သည် ကျွန်ုပ်တို့ကို အလွန်ပျော်ရွှင်စေသည်။ (သု. ၂:၁-၅) ဘုရားသခင်နှင့်ကျွန်ုပ်တို့၏ ပျော်ရွှင်ကျေနပ်ဖွယ်ဆက်ဆံရေးသည် တိကျမှန်ကန်သောအသိပညာရှိခြင်း၊ ဘုရားသခင်ကိုယုံကြည်ခြင်း၊ ယေရှု၏ရွေးနုတ်ဖိုးပူဇော်သကာကို ယုံကြည်ခြင်းတို့အပေါ် အခြေခံသည်။ (၁ ယောဟန် ၂:၁၊ ၂) အပြည်ပြည်ဆိုင်ရာညီအစ်ကိုအသင်းအပင်းတွင် ပါဝင်ခွင့်ရခြင်းသည်လည်း ကျွန်ုပ်တို့ကို ဝမ်းမြောက်စေသည့် နောက်အကြောင်းရင်းဖြစ်၏။ (ဇေဖနိ ၃:၉; ဟဂ္ဂဲ ၂:၇) ဘုရားသခင့်နိုင်ငံတော်မျှော်လင့်ချက်နှင့် သတင်းကောင်းကြေညာရသည့် အခွင့်ထူးကလည်း ဝမ်းမြောက်စေသည်။ (မဿဲ ၆:၉၊ ၁၀; ၂၄:၁၄) ထာဝရအသက်မျှော်လင့်ချက်သည်လည်း ထိုနည်းတူပင်။ (ယောဟန် ၁၇:၃) ထိုကောင်းမွန်လှသော မျှော်လင့်ချက်ကြောင့် “အမှန်ရွှင်လန်း” သင့်ပေသည်။—⁠တရားဟောရာ ၁၆:၁၅။

ငြိမ်သက်ခြင်းရှိပြီး စိတ်ရှည်လော့

၁၁၊ ၁၂။ (က) ငြိမ်သက်ခြင်းကို သင်မည်သို့အနက်ဖွင့်မည်နည်း။ (ခ) ဘုရားရေးရာငြိမ်သက်ခြင်းသည် ကျွန်ုပ်တို့ကို မည်သို့အကျိုးသက်ရောက်သနည်း။

^၁၁ ဝိညာဉ်တော်က သီးပွင့်စေသော နောက်အရည်အသွေးတစ်ခုမှာ ငြိမ်သက်ခြင်းဖြစ်သည်။ ယင်းသည် သောကကင်းဝေးငြိမ်းအေးသည့် အခြေအနေဖြစ်သည်။ ကျွန်ုပ်တို့၏ကောင်းကင်ခမည်းတော်သည် ငြိမ်သက်ခြင်းအရှင်ဖြစ်ပြီး “မိမိလူစုအား ငြိမ်သက်ခြင်းကောင်းချီးမင်္ဂလာကို ပေးတော်မူမည်” ဟုအာမခံထားသည်။ (ဆာလံ ၂၉:၁၁; ၁ ကောရိန္သု ၁၄:၃၃) ယေရှုသည် မိမိတပည့်များအား “ငြိမ်သက်ခြင်းကို သင်တို့ ၌ ငါထားခဲ့၏။ ငါ၏ငြိမ်သက်ခြင်းကို သင်တို့အား ငါပေး၏” ဟုဆိုခဲ့သည်။ (ယောဟန် ၁၄:၂၇) ငြိမ်သက်ခြင်းက ကိုယ်တော်၏နောက်လိုက်များကို မည်သို့ထောက်ကူမည်နည်း။

^၁၂ တပည့်များကို ယေရှုပေးခဲ့သောငြိမ်သက်ခြင်းသည် သူတို့စိတ်နှလုံးကို ငြိမ်သက်စေပြီး ကြောက်ရွံ့မှုလျော့ပါးစေသည်။ သန့်ရှင်းသောဝိညာဉ်တော်ရရှိချိန်တွင် အထူးသဖြင့် သူတို့၌ ငြိမ်သက်ခြင်းရှိခဲ့၏။ (ယောဟန် ၁၄:၂၆) ယနေ့ ကျွန်ုပ်တို့လည်း ဝိညာဉ်တော်၏သြဇာလွှမ်းမိုးမှုခံရခြင်း၊ ဆုတောင်းချက်များ ဖြေကြားခံရခြင်းဖြင့် အဘယ်သူမျှကြံ၍မမီနိုင်သော “ဘုရားသခင်၏ငြိမ်သက်ခြင်း” ခံစားရပြီး စိတ်နှလုံးကို ငြိမ်သက်စေသည်။ (ဖိလိပ္ပိ ၄:၆၊ ၇) ထို့ ပြင် ယေဟောဝါ၏ဝိညာဉ်တော်သည် ယုံကြည်သူချင်းများ၊ အခြားသူများနှင့် သင့်တင့်ငြိမ်သက်စေသည်။—⁠ရောမ ၁၂:၁၈; ၁ သက်သာလောနိတ် ၅:၁၃။

၁၃၊ ၁၄။ စိတ်ရှည်ခြင်းဟူသည် အဘယ်နည်း၊ ယင်းကို အဘယ်ကြောင့် တင်ပြသင့်သနည်း။

^၁၃ စိတ်ရှည်ခြင်းသည် ငြိမ်သက်ခြင်းနှင့်ဆက်စပ်နေ၏။ အကြောင်းမှာ အခြေအနေတိုးတက်ကောင်းမွန်လာမည်ဟူသော မျှော်လင့်ချက်ဖြင့် အမျက်ဒေါသကို ချုပ်တည်းစေသည် သို့မဟုတ် အမှားတစ်ခုကို သည်းခံစေသောကြောင့်ဖြစ်သည်။ ဘုရားသခင်သည် စိတ်ရှည်တော်မူ၏။ (ရောမ ၉:၂၂-၂၄) ယေရှုလည်း ထိုအရည်အသွေးကိုတင်ပြခဲ့သည်။ ‘ထာဝရအသက်အလို့ငှာ ယုံကြည်လတ္တံ့သောသူတို့ လိုက်စရာပုံသက်သေဖြစ်စေခြင်းငှာ အကြီးဆုံးသောအပြစ်ရှိသောငါ၌ ယေရှုခရစ်သည် ခပ်သိမ်းသောသည်းခံခြင်းကို ပြတော်မူမည်အကြောင်း ငါ့ကိုသနားတော်မူပြီ’ ဟုပေါလုရေးခဲ့သောကြောင့် ကျွန်ုပ်တို့လည်း ယေရှု၏သည်းခံခြင်းမှ အကျိုးကျေးဇူးရရှိနိုင်ပါသည်။—⁠၁ တိမောသေ ၁:၁၆။

^၁၄ စိတ်ရှည်ခြင်းအရည်အသွေးသည် အခြားသူတို့၏မကြင်မနာ၊ မစဉ်းမစား ပြောဆိုပြုမူရာများကို ခံရပ်နိုင်စေသည်။ ခရစ်ယာန်ချင်းများကို ပေါလုက “ခပ်သိမ်းသောသူတို့အား ရှည်သောစိတ်ရှိစေကြလော့” ဟုတိုက်တွန်းခဲ့သည်။ (၁ သက်သာလောနိတ် ၅:၁၄) ကျွန်ုပ်တို့အားလုံးသည် မစုံလင်သူများဖြစ်ပြီး မှားတတ်ကြရာ ကျွန်ုပ်တို့၏အမှားများကိုလည်း အခြားသူတို့ စိတ်ရှည်သည်းခံပေးရန် မျှော်လင့်မည်မှာသေချာသည်။ ထို့ကြောင့် “ဝမ်းမြောက်သောစိတ်နှင့် . . . စိတ်ရှည်” ရန်ကြိုးစားကြပါစို့။—⁠ကောလောသဲ ၁:၉-၁၂။

ကျေးဇူးပြုခြင်းနှင့်ကောင်းမြတ်ခြင်းကို တင်ပြလော့

၁၅။ ကျေးဇူးပြုခြင်းကို အနက်ဖွင့်ဆိုပြီး ယင်းနှင့်ပတ်သက်သောဥပမာများ ကိုးကားတင်ပြပါ။

^၁၅ ခင်မင်ရင်းနှီးသော၊ တည်ဆောက်မှုဖြစ်စေသော အပြောအဆိုအပြုအမူအားဖြင့် အခြားသူများကို စိတ်ဝင်စားမှုပြခြင်းသည် ကျေးဇူးပြုခြင်းဖြစ်၏။ ယေဟောဝါသည် ကျေးဇူးပြုသောဘုရားသခင်ဖြစ်ပြီး ကိုယ်တော့်သားတော်လည်း ထိုနည်းတူပင်။ (ရောမ ၂:၄; ၁ ပေတရု ၂:၁) ထို့ကြောင့် ဘုရားသခင်နှင့်ခရစ်တော်၏ကျေးကျွန်များသည် ကျေးဇူးပြုဖို့လို၏။  (ကောလောသဲ ၃:၁၂) ဘုရားသခင်နှင့်ရင်းနှီးသောဆက်ဆံရေးမရှိသူအချို့ပင် “အထူးသဖြင့် ကျေးဇူးပြုကြ၏။” (တမန်တော် ၂၇:၃; ၂၈:⁠၂) သို့ဖြစ်၍ ကျွန်ုပ်တို့သည် ‘ဘုရားသခင့်ဝိညာဉ်တော်ဖြင့် လျှောက်လှမ်းနေကြမည်ဆိုလျှင်’ အမှန်ကျေးဇူးပြုနိုင်ကြပါသည်။

၁၆။ ကျေးဇူးပြုသင့်သည့် အခြေအနေအချို့ကားအဘယ်နည်း။

^၁၆ တစ်စုံတစ်ဦး၏ ထိုးနှက်သောစကား သို့မဟုတ် စာနာမှုမဲ့သောလုပ်ရပ်သည် အမျက်ထွက်စရာဖြစ်သည့်တိုင် ကျွန်ုပ်တို့ ကျေးဇူးပြုနိုင်ပါသည်။ ‘အမျက်ထွက်ရာတွင် အပြစ်မရှိစေနှင့်။ အမျက်မပြေဘဲ နေမဝင်စေနှင့်။ စာတန်ကိုအခွင့်မပေးကြနှင့်။ . . . အချင်းချင်းကျေးဇူးပြုခြင်း၊ သနားစုံမက်ခြင်း၊ ဘုရားသခင်သည် ခရစ်တော်ကြောင့် သင်တို့၏အပြစ်ကိုလွှတ်တော်မူသကဲ့သို့ အချင်းချင်းအပြစ်လွှတ်ခြင်းရှိကြလော့’ ဟုပေါလုဆိုသည်။ (ဧဖက် ၄:၂၆၊ ၂၇၊ ၃၂) စမ်းသပ်မှုများရင်ဆိုင်နေရသူတို့ကို ကျေးဇူးပြုခြင်းသည် အထူးသင့်လျော်၏။ ခရစ်ယာန်အကြီးအကဲတစ်ဦးသည် “ကောင်းမွန်ခြင်း၊ ဖြောင့်မတ်ခြင်း၊ သစ္စာစောင့်ခြင်း” လမ်းစဉ်မှ သွေဖည်သွားတော့မည့်သူတစ်ဦး စိတ်ထိခိုက်မည်ကိုစိုး၍ ကျမ်းစာသွန်သင်ချက်မပေးပါက ကျေးဇူးပြုခြင်းမဖြစ်နိုင်ပေ။—⁠ဧဖက် ၅:၉-၁၀။

၁၇၊ ၁၈။ ကောင်းမြတ်ခြင်းကို မည်သို့အနက်ဖွင့်ထားသနည်း၊ ထိုအရည်အသွေးသည် ကျွန်ုပ်တို့အသက်တာ၏ မည်သည့်ကဏ္ဍတွင် ရှိသင့်သနည်း။

^၁၇ ကောင်းမြတ်ခြင်းဟူသည် ကောင်းမှုပြုခြင်း၊ ကိုယ်ကျင့်တရားဖြောင့်မတ်စင်ကြယ်ခြင်း သို့မဟုတ် ကောင်းမြတ်သောအရည်အသွေး၊ ကောင်းမြတ်သောအခြေအနေဖြစ်သည်။ ဘုရားသခင်သည် အပြည့်ဝဆုံးသဘောဖြင့် ကောင်းမြတ်တော်မူ၏။ (ဆာလံ ၂၅:၈; ဇာခရိ ၉:၁၇) ယေရှုသည် အခြားသူများကို ကောင်းမှုပြုပြီး ကိုယ်ကျင့်တရားဖြောင့်မတ်စင်ကြယ်၏။ သို့တိုင် “ကောင်းမြတ်သောဆရာ” ဟုအခေါ်ခံရစဉ် “ကောင်းမြတ်သော” ဟူသည့်ဂုဏ်ပုဒ်ကို လက်မခံခဲ့ပေ။ (မာကု ၁၀:၁၇၊ ၁၈) ဘုရားသခင်သာ အကောင်းမြတ်ဆုံးဖြစ်ကြောင်း သူအသိအမှတ်ပြုသည်မှာ ထင်ရှား၏။

^၁၈ အမွေခံရသောအပြစ်သည် ကျွန်ုပ်တို့၏ကောင်းမြတ်ခြင်းအရည်အသွေးကို အဟန့်အတားဖြစ်စေသည်။ (ရောမ ၅:၁၂) သို့တိုင် “ကောင်းမြတ်ခြင်းကို သွန်သင်တော်မူပါ” ဟုဘုရားသခင်ထံတောင်းလျှောက်မည်ဆိုလျှင် ထိုအရည်အသွေးကို တင်ပြနိုင်မည်ဖြစ်သည်။ (ဆာလံ ၁၁၉:၆၆၊ ကဘ) ရောမမြို့ရှိခရစ်ယာန်ချင်းတို့ကို ပေါလုက “ညီအစ်ကိုတို့၊ သင်တို့သည် ကောင်းသောပကတိသဘောနှင့်ပြည့်စုံ၍ အရာရာတို့ကိုသိနားလည်သဖြင့် အချင်းချင်းဆုံးမခြင်းငှာ တတ်နိုင်သည်ကို ငါသဘောကျလျက်ရှိ၏” ဟုဆိုသည်။ (ရောမ ၁၅:၁၄) ခရစ်ယာန်ကြီးကြပ်မှူးတစ်ဦးသည် “ကောင်းမြတ်ခြင်းကိုနှစ်သက်သောသူ” ဖြစ်ရမည်။ (တိတု ၁:၇၊ ၈၊ ကဘ) ဘုရားသခင့်ဝိညာဉ်တော်၏ ဦးဆောင်မှုကိုခံယူပါက ကျွန်ုပ်တို့၏ကောင်းမြတ်ခြင်းထင်ရှားလာမည်ဖြစ်ပြီး ယေဟောဝါသည် ‘ကျွန်ုပ်တို့ပြုသောကောင်းမြတ်ခြင်းအတွက် ကျွန်ုပ်တို့ကိုအောက်မေ့’ မည်ဖြစ်သည်။—⁠နေဟမိ ၅:၁၉; ၁၃:၃၁။

“ဟန်ဆောင်ခြင်းကင်းသောယုံကြည်ခြင်း”

၁၉။ ဟေဗြဲ ၁၁:၁ အရ ယုံကြည်ခြင်းကို အနက်ဖွင့်ဆိုပါ။

^၁၉ ဝိညာဉ်တော်က သီးပွင့်စေသော ယုံကြည်ခြင်းအရည်အသွေးသည် “မျှော်လင့်သောအရာများကို စိတ်ချစွာစောင့်မျှော်ခြင်း၊ မမြင်ရသော်လည်း အမှန်တည်ရှိသောအရာတို့၏ ထင်ရှားသောသက်သေဖြစ်၏။” (ဟေဗြဲ ၁၁:၁၊ ကဘ) ကျွန်ုပ်တို့တွင် ယုံကြည်ခြင်းရှိပါက ယေဟောဝါကတိပြုသမျှ အမှန်တကယ်ပြည့်စုံမည်ကို ယုံကြည်စိတ်ချမည်ဖြစ်သည်။ မမြင်ရသော်လည်း အမှန်တည်ရှိသောအရာတို့၏ ယုံကြည်စိတ်ချရသောသက်သေသည် အလွန်ခိုင်မာသည်၊ ကျွန်ုပ်တို့၏ယုံကြည်ခြင်းသည်လည်း ထိုသက်သေနည်းတူ ခိုင်မာ၏။ ဥပမာ၊ ဖန်ဆင်းရာများတည်ရှိခြင်းက ဖန်ဆင်းရှင်တစ်ပါးရှိကြောင်း ကျွန်ုပ်တို့ကို ယုံကြည်စိတ်ချစေသည်။ ကျွန်ုပ်တို့သည် ဘုရားသခင့်ဝိညာဉ်တော်ဖြင့် လျှောက်လှမ်းနေပါက ထိုသို့သောယုံကြည်ခြင်းမျိုး တင်ပြနိုင်ပေမည်။

၂၀။ ‘နှောင့်ယှက်တတ်သောအပြစ်’ ဟူသည်အဘယ်နည်း၊ ထိုအပြစ်နှင့် ဇာတိအကျင့်များကို မည်သို့ရှောင်နိုင်သနည်း။

 ^၂၀ ယုံကြည်ခြင်းကင်းမဲ့ခြင်းသည် ကျွန်ုပ်တို့ကို ‘နှောင့်ယှက်တတ်သောအပြစ်’ ဖြစ်၏။ (ဟေဗြဲ ၁၂:⁠၁) ယုံကြည်ခြင်းကိုပျက်စီးစေသည့် ဇာတိပကတိအကျင့်များ၊ ရုပ်ဝါဒဆန်ခြင်း၊ မှားယွင်းသောသွန်သင်ချက်များကို ရှောင်နိုင်ရန် ဘုရားသခင့်ဝိညာဉ်တော်ကို မှီခိုအားထားဖို့လိုသည်။ (ကောလောသဲ ၂:၈; ၁ တိမောသေ ၆:၉၊ ၁၀; ၂ တိမောသေ ၄:၃-၅) ကျမ်းစာမှတ်တမ်းတွင်ပါသော ခရစ်ယာန်ခေတ်မတိုင်မီကသက်သေခံများနှင့် အခြားသူများ၏ ယုံကြည်ခြင်းမျိုး တင်ပြနိုင်ရန် ယေဟောဝါ၏မျက်မှောက်ခေတ်ကျေးကျွန်များကို ဝိညာဉ်တော်က လှုံ့ဆော်ပေးသည်။ (ဟေဗြဲ ၁၁:၂-၄၀) ထို့ပြင် ကျွန်ုပ်တို့၏ “ဟန်ဆောင်ခြင်းကင်းသောယုံကြည်ခြင်း” သည် အခြားသူများ၏ယုံကြည်ခြင်းကို တိုးပွားစေနိုင်သည်။—⁠၁ တိမောသေ ၁:၅၊ သမ္မာ; ဟေဗြဲ ၁၃:၇။

နူးညံ့သိမ်မွေ့ခြင်းနှင့်ချုပ်တည်းခြင်း တင်ပြလော့

၂၁၊ ၂၂။ နူးညံ့သိမ်မွေ့ ခြင်းကို မည်သို့အနက်ဖွင့်ထားသနည်း၊ ယင်းကို အဘယ်ကြောင့်တင်ပြသင့်သနည်း။

^၂၁ နူးညံ့သိမ်မွေ့ခြင်းဟူသည် စိတ်သဘောနှင့်အပြုအမူတို့တွင် သိမ်မွေ့ ညင်သာခြင်းဖြစ်သည်။ ဘုရားသခင်၏အရည်အသွေးတစ်ခုမှာ စိတ်နူးညံ့သိမ်မွေ့ ခြင်းဖြစ်၏။ ထိုသို့ပြောနိုင်ရခြင်းမှာ နူးညံ့သိမ်မွေ့သော ယေရှုသည် ယေဟောဝါ၏ဥပဓိရုပ်တော်ကို အပြည့်အဝထင်ဟပ်သောကြောင့်ဖြစ်သည်။ (မဿဲ ၁၁:၂၈-၃၀; ယောဟန် ၁:၁၈; ၅:၁၉) သို့ဆိုလျှင် ဘုရားသခင့်ကျေးကျွန်များဖြစ်သော ကျွန်ုပ်တို့ အဘယ်အရာပြုဖို့လိုသနည်း။

^၂၂ ခရစ်ယာန်များဖြစ်သော ကျွန်ုပ်တို့သည် “ခပ်သိမ်းသောသူတို့ ၌ အလွန်နူးညံ့သိမ်မွေ့ စွာပြု” ဖို့လို၏။ (တိတု ၃:⁠၂) ခရစ်ယာန်ဓမ္မအမှုတွင် နူးညံ့သိမ်မွေ့ ခြင်း တင်ပြကြသည်။ အမှားပြုမိသော ခရစ်ယာန်တစ်ဦးကို “သိမ်မွေ့နူးညံ့သောသဘောနှင့်” သူ၏နေရာ၌တည်မြဲတည်စေပြန်ရန် ဝိညာဉ်ရေးအရည်အချင်းရှိသူတို့အား မိန့်မှာထားသည်။ (ဂလာတိ ၆:⁠၁) ကျွန်ုပ်တို့အားလုံးသည် “စိတ်နှိမ့်ချခြင်း၊ နူးညံ့သိမ်မွေ့ခြင်း” ကိုတင်ပြခြင်းဖြင့် ခရစ်ယာန်စည်းလုံးမှုနှင့် ငြိမ်သက်မှုတိုးပွားစေနိုင်သည်။ (ဧဖက် ၄:၁-၃) ဝိညာဉ်တော်ဖြင့်လျှောက်လှမ်းနေကာ ချုပ်တည်းခြင်းရှိမည်ဆိုလျှင် နူးညံ့သိမ်မွေ့ ခြင်း တင်ပြနိုင်မည်ဖြစ်သည်။

၂၃၊ ၂၄။ ချုပ်တည်းခြင်းဟူသည် အဘယ်နည်း၊ ယင်းသည် ကျွန်ုပ်တို့ကို မည်သို့ကူညီနိုင်သနည်း။

^၂၃ ချုပ်တည်းခြင်းသည် မှားယွင်းသော အတွေးအခေါ်၊ အပြောအဆို၊ အပြုအမူများကို တားဆီးပေးနိုင်သည်။ ယေဟောဝါသည် ယေရုရှလင်မြို့ကိုဖျက်ဆီးခဲ့သော ဗာဗုလုန်လူမျိုးနှင့်ဆက်ဆံရာတွင် “ကိုယ်ကိုချုပ်တည်း၍နေ” ခဲ့သည်။ (ဟေရှာယ ၄၂:၁၄) သားတော်ယေရှုသည်လည်း ဆင်းရဲဝေဒနာခံစားရချိန်တွင် ချုပ်တည်းမှုတင်ပြရာ၌ “ပုံသက်သေ” ချမှတ်ခဲ့၏။ ‘ပညာ၌ ချုပ်တည်းခြင်းကိုထပ်ဆင့်’ ရန် ခရစ်ယာန်ချင်းများကို တမန်တော်ပေတရု တိုက်တွန်းခဲ့သည်။—⁠၁ ပေတရု ၂:၂၁-၂၃; ၂ ပေတရု ၁:၅-၈။

^၂၄ ခရစ်ယာန်အကြီးအကဲများသည် ချုပ်တည်းမှုတင်ပြဖို့လို၏။ (တိတု ၁:၇၊ ၈) အမှန်မှာ၊ သန့်ရှင်းသောဝိညာဉ်တော်၏ဦးဆောင်မှု ခံယူသူအားလုံးသည် ချုပ်တည်းမှုတင်ပြနိုင်ကြ၏။ ဤနည်းဖြင့် အကျင့်ပျက်ပြားမှု၊ ညစ်ညမ်းသောအပြောအဆို သို့မဟုတ် ယေဟောဝါ၏မျက်နှာသာဆုံးရှုံးစေနိုင်သည့် အရာမှန်သမျှကို ရှောင်ရှားနိုင်ပေမည်။ ဘုရားသခင့်ဝိညာဉ်တော်၏လှုံ့ဆော်မှုဖြင့် ချုပ်တည်းမှုတင်ပြပါက ယင်းသည် ကျွန်ုပ်တို့၏အပြောအဆို၊ အပြုအမူတို့တွင် ပေါ်လွင်နေပြီး အခြားသူတို့ သတိပြုမိပါလိမ့်မည်။

ဝိညာဉ်တော်ဖြင့်လျှောက်လှမ်းနေလော့

၂၅၊ ၂၆။ ဝိညာဉ်တော်ဖြင့်လျှောက်လှမ်းခြင်းသည် ယခုနှင့်အနာဂတ်အလားအလာကို မည်သို့အကျိုးသက်ရောက်မှုရှိမည်နည်း။

^၂၅ ဝိညာဉ်တော်ဖြင့် လျှောက်လှမ်းနေပါက ကျွန်ုပ်တို့သည် သတင်းကောင်းကို ဇွဲရှိရှိဟောပြောကြမည်။ (တမန်တော် ၁၈:၂၄-၂၆) ကျွန်ုပ်တို့သည် နှစ်သက်ဖွယ်ကောင်းသူများဖြစ်လာမည်။ အထူးသဖြင့် ဘုရားသခင်ကို ဆည်းကပ်ဝတ်ပြုသူများသည် ကျွန်ုပ်တို့နှင့်ပေါင်းသင်းရသည်ကို နှစ်ခြိုက်ပေလိမ့်မည်။ သန့်ရှင်းသောဝိညာဉ်တော်၏ဦးဆောင်မှု ခံယူကြသော ကျွန်ုပ်တို့သည် ယေဟောဝါအားဝတ်ပြုသူချင်းတို့ကို ဝိညာဉ်ရေးအရ အားပေးတည်ဆောက်နိုင်ကြမည်။ (ဖိလိပ္ပိ ၂:၁-၄) ခရစ်ယာန်အားလုံး ထိုသို့ဖြစ်လိုကြသည် မဟုတ်လော။

^၂၆ စာတန့်ထိန်းချုပ်မှုအောက်ရှိ ဤလောကတွင် ဝိညာဉ်တော်ဖြင့် လျှောက်လှမ်းနေရန် မလွယ်ကူပေ။ (၁ ယောဟန် ၅:၁၉) သို့သော် ယနေ့ လူသန်းပေါင်းများစွာသည် ထိုသို့လျှောက်လှမ်းနေကြ၏။ ယေဟောဝါကို စိတ်နှလုံးအကြွင်းမဲ့ကိုးစားပါက ယခုပင် ပျော်ရွှင်သောအသက်တာကို ခံစားရနိုင်ပြီး သန့်ရှင်းသောဝိညာဉ်တော်ကို မေတ္တာဖြင့်ပြင်ဆင်ပေးရှင်၏ ဖြောင့်မတ်သောလမ်းစဉ်တွင် ထာဝစဉ်လျှောက်လှမ်းနိုင်ပါလိမ့်မည်။—⁠ဆာလံ ၁၂၈:၁; သု. ၃:၅၊ ၆။

သင့်အဖြေကားအဘယ်နည်း

• “ဝိညာဉ်တော်ဖြင့်လျှောက်လှမ်း” ခြင်းသည် ဘုရားသခင်၊ ကိုယ်တော့်သားတော်နှင့် ကျွန်ုပ်တို့၏ဆက်ဆံရေးကို မည်သို့အကျိုးသက်ရောက်သနည်း။

• သန့်ရှင်းသောဝိညာဉ်တော်က သီးပွင့်စေသော အရည်အသွေးများကား အဘယ်နည်း။

• ဘုရားသခင့်ဝိညာဉ်တော်၏ အရည်အသွေးများကို တင်ပြနိုင်သည့် နည်းလမ်းအချို့ကား အဘယ်နည်း။

• ဝိညာဉ်တော်ဖြင့်လျှောက်လှမ်းခြင်းသည် ယခုနှင့်အနာဂတ်အလားအလာကို မည်သို့အကျိုးသက်ရောက်မှု ရှိမည်နည်း။

[လေ့လာရန်မေးခွန်းများ]

 [စာမျက်နှာ ၂၃ ပါ ရုပ်ပုံ]

ယေဟောဝါ၏သန့် ရှင်းသောဝိညာဉ်တော်သည် ယုံကြည်သူချင်းများအားချစ်သောမေတ္တာကို တိုးပွားစေ

[စာမျက်နှာ ၂၄ ပါ ရုပ်ပုံ]

တည်ဆောက်မှုဖြစ်စေသော အပြောအဆိုအပြုအမူတို့အားဖြင့် ကျေးဇူးပြုပါ