ဂျော်ဂျီယာစည်းဝေးကြီးတစ်ခုမှ “အံ့ဖွယ်ရာ” နှစ်ခု

ဂျော်ဂျီယာနိုင်ငံတွင် ၂၀၀၆ ခုနှစ်က “အံ့ဖွယ်ရာ” အဖြစ်အပျက်နှစ်ခုထင်ကျန်ရစ်သော မမေ့နိုင်သည့်အဖြစ်အပျက်တစ်ခု ဖြစ်ခဲ့သည်။ ယေဟောဝါသက်သေတို့၏ “ကယ်နုတ်ချိန်နီးပြီ!” ခရိုင်စည်းဝေးကြီးကို နိုင်ငံတစ်ဝန်း ခြောက်နေရာတွင် ဇူလိုင် ၇ ရက်မှ ၉ ရက်နေ့အထိ သုံးရက်ကြာ ကျင်းပခဲ့သည်။ တက်ရောက်သူ ၁၇,၀၀၀ ကျော်တို့ ပျော်မွေ့ခဲ့ကြသည့် ဝိညာဉ်ရေးစားပွဲကြီးတစ်ခု ဖြစ်ခဲ့သည်။

စည်းဝေးကြီးကျင်းပမည်ဟုစီစဉ်ထားသည့် ဂျော်ဂျီယာနိုင်ငံ၏မြို့တော် တဘီလစီတွင် ထောင်နှင့်ချီသော တက်ရောက်သူတို့အတွက် သင့်တော်သည့်နေရာရရန် ၂၀၀၆၊ ဇန်နဝါရီလမှစ၍ ကြိုးစားရှာဖွေခဲ့ကြသည်။ စည်းဝေးကြီးကျင်းပမည့် အခြားနေရာများနှင့် တယ်လီဖုန်းဆက်သွယ်ရေးစနစ်ဖြင့် ချိတ်ဆက်ထားမည်ဖြစ်သည်။

လွန်ခဲ့သည့်နှစ်များအတွင်း ဂျော်ဂျီယာတွင် လွတ်လပ်စွာဝတ်ပြုကိုးကွယ်ခွင့်ကို တဖြည်းဖြည်းနှင့်ပို၍ပို၍ ရရှိလာခဲ့သည်။ ထို့ကြောင့် ယခင်က နေရာအနှံ့တွင် ဆန့်ကျင်မှုများရှိခဲ့သော်လည်း သက်သေခံတို့သည် မြို့တော်တွင် စည်းဝေးကြီးကျင်းပမည့်နေရာတစ်ခု တွေ့နိုင်မည်ဟု ယုံကြည်စိတ်ချလျက် ရှေ့ဆက်ကြိုးစားခဲ့ကြသည်။ ဂျော်ဂျီယာလူမျိုးတို့၏ သဘောသဘာဝမှာ အလွန်ရင်းနှီးဖော်ရွေပြီး ဧည့်ဝတ်ကျေပွန်သူတို့ဖြစ်ကြသည်။ သို့သော် အရာရှိတချို့သည် ဘာသာရေးစိတ်စွန်းကွက်မှု အလွန်ပြင်းထန်သည်။ သူတို့၏သဘောထားပျော့ပျောင်းလာကာ သက်သေခံများ အဆောက်အအုံငှားရမ်းသည်ကို ခွင့်ပြုကြပါမည်လော။

စည်းဝေးကြီးကော်မတီမှ ညီအစ်ကိုများသည် အားကစားကွင်းများနှင့် အားကစားရုံကြီးများစွာသို့ သွားခဲ့ကြသည်။ မန်နေဂျာများက အဆောက်အအုံအသုံးပြုခွင့်ပေးမည်ဟု ကတိပြုကြသော်လည်း ငှားရမ်းမည့် ရက်စွဲအတိအကျကိုပြောပြသည့်အခါ လက်မခံဘဲ ငြင်းပယ်ခဲ့ကြသည်။ ထို့ကြောင့် တဘီလစီကဇာတ်ရုံ၏ စီမံခန့်ခွဲရေးရုံးက အဆောက်အအုံကို ယေဟောဝါသက်သေတို့အား ငှားရမ်းဖို့ သဘောတူသည့်အခါ  စည်းဝေးကြီးကော်မတီသည် အံ့သြခဲ့ရသည်။ ကဇာတ်ရုံသည် မြို့လယ်ခေါင်တွင်တည်ရှိပြီး အရေးကြီးသောအခါသမယများစွာကို ကျင်းပသည့်နေရာလည်းဖြစ်သည်။

မိမိတို့၏ကြိုးစားအားထုတ်မှုသည် နောက်ဆုံးတွင် ရလဒ်ကောင်းရရှိခြင်းကြောင့်အားတက်ကာ စည်းဝေးကြီးကော်မတီသည် တဘီလစီစည်းဝေးကြီးအတွက်အပြင် နိုင်ငံတစ်ဝန်း တာ့နိုရီမြို့၊ ကူတအီစီမြို့၊ ဇုဒီဒီမြို့၊ ကက်စ်ပီမြို့နှင့် ဂိုရီမြို့တို့တွင်ကျင်းပမည့် စည်းဝေးကြီးများအတွက် စတင်စီစဉ်ကြသည်။ အစီအစဉ်ကို တစ်ပြိုင်တည်းကျင်းပနိုင်ရန် စည်းဝေးကြီးကျင်းပသည့်ယင်းနေရာအားလုံးကို တယ်လီဖုန်းလိုင်းဖြင့်ချိတ်ဆက်ရာတွင် အလုပ်များစွာလုပ်ခဲ့ကြရသည်။ အားလုံး အဆင်သင့်ဖြစ်နေပြီဖြစ်သည်။ စည်းဝေးကြီးကျင်းပဖို့တစ်ပတ်အလိုတွင် တဘီလစီကဇာတ်ရုံခန်းမ၏ စီမံခန့်ခွဲမှုရုံးက သဘောတူစာချုပ်ကို ရုတ်တရက်ဖျက်သိမ်းလိုက်သည်။ မည်သည့် ဖြေရှင်းချက်မျှလည်း မပေးခဲ့ပါ။

ပထမ “အံ့ဖွယ်ရာ”

အချိန်လွန်စွာနီးကပ်နေပြီဖြစ်သောကြောင့် ညီအစ်ကိုများ အဘယ်အရာပြုလုပ်နိုင်ကြမည်နည်း။ တစ်ခုတည်းသောရွေးချယ်စရာမှာ တဘီလစီမြို့ပြင် ၂၅ မိုင်အကွာရှိ စိုက်ပျိုးရေးခြံများရှိသော မာနီအူလီမြို့သို့ ပြောင်းရွှေ့ခြင်းဖြစ်သည်။ ယေဟောဝါသက်သေခံ မိသားစုတစ်စုပိုင်မြေတွင် စည်းဝေးကြီးများစွာကို ကျင်းပခဲ့ဖူးသည်။ ထိုနေရာသည် ယခင်က ဥယျာဉ်ကြီးတစ်ခုဖြစ်သည်။ လွန်ခဲ့သည့်ဆယ်နှစ်လုံးလုံး တဘီလစီရှိအသင်းတော်များအတွက် စည်းဝေးကြီးများကျင်းပသည့် တစ်ခုတည်းသောနေရာဖြစ်ခဲ့သည်။ သို့သော် မာနီအူလီမြို့တွင် ယေဟောဝါသက်သေများသည် ပြင်းထန်သည့်လူအုပ်ဖြင့်တိုက်ခိုက်မှုများနှင့်လည်း ကြုံတွေ့ ခဲ့ဖူးသည်။

၂၀၀၀ပြည့်နှစ်၊ စက်တင်ဘာ ၁၆ ရက်နေ့တွင် ယင်းသို့သောတိုက်ခိုက်မှုတစ်ခု ဖြစ်ပျက်ခဲ့သည်။ မာနီအူလီမြို့မှရဲသားများသည် ယေဟောဝါသက်သေများ စည်းဝေးကြီးကျင်းပသည့်နေရာသို့ မရောက်စေရန် လမ်းပိတ်ဆို့ခဲ့ကြသည်။ ထိုအချိန်တွင် ဩသိုဒေါက်ဘုန်းကြီးလူထွက် ဗာဆီလီ မခါးလားဗီရှ်ဗီလီ ဦးဆောင်သော အကြမ်းဖက်သမားများသည် ဘတ်စကားများဖြင့် ရောက်လာသည်။ မာနီအူလီစည်းဝေးကြီးသို့လာကြသော ကားများ၊ ဘတ်စကားများကို ရပ်ခိုင်းကာ ကိုယ်စားလှယ်အတော်များများကို ကားထဲမှဆွဲချကြ၊ ရက်ရက်စက်စက်ရိုက်နှက်ကြပြီး အခြားခရီးသည်များကိုလည်း သမ္မာကျမ်းစာနှင့် ကျမ်းစာစာပေများအပါအဝင် သူတို့၏ပိုင်ဆိုင်ရာများကို လုယူကြသည်။

မာနီအူလီရှိ စည်းဝေးကြီးကျင်းပသည့်နေရာတွင်လည်း အယောက် ၆၀ နီးပါးရှိသောလူအုပ်၏ တိုက်ခိုက်မှုကို ခံခဲ့ရသည်။ သက်သေခံအယောက် ၄၀ ခန့် ဒဏ်ရာရခဲ့သည်။ ညီအစ်ကိုတစ်ဦးသည် ရင်ဘတ်တွင် ဓားထိုးခံခဲ့ရသည်။ တိုက်ခိုက်သူအချို့သည် ဒေါသတကြီးဖြင့် လေထဲထောင်ပစ်ခဲ့သော ပြောင်းချောသေနတ်များကို ဝှေ့ယမ်းနေကြသည်။ ထိုသူတို့ထဲမှတစ်ဦးသည် ခြံပိုင်ရှင်ကို သေနတ်နှင့်ချိန်ကာ သူ၏ငွေများ၊ လက်ဝတ်ရတနာများကို တောင်းယူခဲ့သည်။ လူအုပ်သည် စည်းဝေးကြီးကျင်းပသည့်နေရာအစွန်တွင်ရှိသော ခြံပိုင်ရှင်၏အိမ်ကို မွှေနှောက်ရှာဖွေကာ သူ၏အဖိုးတန်ပစ္စည်းများကို ခိုးယူသွားကြသည်။ အိမ်ပြတင်းပေါက်အားလုံးကို ရိုက်ချိုးကြကာ ကျမ်းစာစာပေများနှင့် စည်းဝေးကြီးအတွက် အထူးပြုလုပ်ထားသော ခုံတန်းရှည်များကို မီးရှို့ဖျက်ဆီးခဲ့ကြသည်။ တစ်တန်ခွဲရှိသောစာပေများ ဖျက်ဆီးခံခဲ့ရသည်။ အကြမ်းဖက်မှုကိုထိန်းချုပ်မည့်အစား ရဲသားတို့သည် သက်သေခံတို့အား အကြမ်းဖက်ရာတွင် ပါဝင်ခဲ့ကြသည်။ a

စည်းဝေးကြီးကော်မတီသည် အကြမ်းဖက်မှုရန်ကိုသာမက ပုံမှန် ၂,၅၀၀ တက်ရောက်သည့် မြေနေရာတွင် ၅,၀၀၀ ဆံ့ရန်ဟူသည့်စိန်ခေါ်ချက်လည်း ရှိနေသည်။ ဤမျှအချိန်တိုလေးအတွင်း ယင်းပြဿနာတို့ကို မည်သို့ဖြေရှင်းနိုင်ခဲ့ကြသနည်း။ ကပ်လျက်ရှိသောမြေပိုင်ရှင်နှစ်ဦးက ညီအစ်ကိုများထံသို့လာကာ မိမိတို့၏ဥယျာဉ်ကို ငှားမည်ဟု ကမ်းလှမ်းသည့်အခါ အံ့ဖွယ်အမှုတစ်ခုအလား ဖြစ်ခဲ့သည်။

မြေကွက်တို့ကို စည်းဝေးကြီးကျင်းပဖို့ သင့်လျော်သည့်နေရာဖြစ်အောင် ပြုလုပ်ခြင်းသည် အတော်ပင်ခက်ခဲသောအလုပ်ဖြစ်ခဲ့သည်။ ရာသီဥတုက ပို၍ခက်ခဲစေခဲ့သည်—⁠စည်းဝေးကြီးမတိုင်မီ တစ်ပတ်လုံးလုံး မိုးရွာသွန်းခဲ့သည်။ အိမ်နီးချင်းမြေကွက်တို့တွင် အာလူးများစိုက်ပျိုးထားပြီး ယင်းတို့ကို ကောက်သိမ်းဖို့လိုသည်။ ဦးဆုံး စေတနာ့ဝန်ထမ်းများသည် မိုးရွာနေသည့်ကြားမှ အာလူးတူးကာ ကောက်သိမ်းပေးခဲ့သည်။ ယင်းနောက် ခြံစည်းရိုးများကိုရွှေ့ကာ တက်ရောက်သူပရိသတ် နေပူရှိန်နှင့် မိုးတို့မှ အကာအကွယ်ရဖို့ အမိုး မိုးရန် တိုင်များထောင်ရသည်။ နောက်ထပ်သစ်သားခုံရှည်များကို ပြုလုပ်ဖို့လိုခဲ့ပြီး နောက်ထပ်အသံချဲ့စက်ပစ္စည်းများကိုလည်း တပ်ဆင်ခဲ့ရသည်။ စေတနာ့ဝန်ထမ်းတို့သည် လွှတိုက်ခြင်း၊ သံရိုက်ခြင်း၊ လွန်ဖောက်ခြင်းတို့ကို နေ့ရောညပါလုပ်ဆောင်ခဲ့ကြပြီး အချို့မှာ မအိပ်ကြရပါ။

“စည်းဝေးကြီးအတွင်း မိုးသာဆက်ရွာနေရင် ဘယ်လိုလုပ်ကြမလဲ။ ရွှံ့ထူတဲ့ယာခင်းထဲမှာ ဧည့်သည်တွေ မြုပ်သွားလေမလား” ဟုလူတိုင်း ပူပန်ခဲ့ကြသည်။ စိုနေသောမြေကိုဖုံးရန် ကောက်ရိုးများကို ဝယ်ခဲ့ကြသည်။ နောက်ဆုံးတွင် နေထွက်လာသည်။ စည်းဝေးကြီးသုံးရက်စလုံး မြေပြင်ပေါ်တွင် လှပနွေးထွေးသောနေရောင်ခြည် ဖုံးလွှမ်းနေခဲ့သည်။

စည်းဝေးကြီးကိုယ်စားလှယ်များ ရောက်လာသည့်အခါ သူတို့ကို လှပသောသဘာဝရှုခင်းက ကြိုဆိုခဲ့သည်။ အေးဆေးငြိမ်ဝပ်မှုရှိသော ကျေးလက်ဒေသအခြေအနေကြောင့် ကမ္ဘာသစ်မြင်ကွင်းအလားဖြစ်ခဲ့သည်။ စည်းဝေးကြီးကိုယ်စားလှယ်များသည် သဖန်းပင်များနှင့် အခြားသစ်သီးပင်များ၊ ပြောင်းခင်းများနှင့် အာလူးခင်းများဝန်းရံလျက်ရှိသောနေရာတွင် သက်သောင့်သက်သာထိုင်ခဲ့ကြရသည်။ စင်မြင့်နောက်ခံကို စပျစ်နွယ်ပင်တို့ဖြင့် အလှဆင်ထားသည်။ အစီအစဉ်တင်ဆက်နေစဉ် ဧည့်သည်ပရိသတ်သည် တစ်ခါတစ်ရံ ကြက်ဖတွန်သံ၊ ကြက်ဥများကောက်သိမ်းလိုက်၍ ကြက်မတို့၏ ကတော်သံများကို ကြားနိုင်သည်။ ကျေးလက်ဒေသ၏ အခြားအသံဗလံများရှိသော်လည်း တက်ရောက်လာကြသူတို့အဖို့ ယင်းတို့သည် နှစ်သက်ဖွယ်ရာအသံသာကဲ့သို့ ဖြစ်ခဲ့သည်။ စိတ်လေလွင့်မည့်အစား ဧည့်သည်ပရိသတ်သည် အလွန်ကောင်းသော ကျမ်းစာအခြေပြုအစီအစဉ်ကို ကောင်းစွာအာရုံစိုက်နားထောင်ကြသည်။ သို့သော် ဤစည်းဝေးကြီးနှင့်ပတ်သက်၍ မမေ့နိုင်သောအရာများမှာ ယင်းတို့သာ မဟုတ်ပါ။

ဒုတိယ “အံ့ဖွယ်ရာ”

သောကြာနေ့နံနက်ပိုင်း  အစီအစဉ်၏  နိဂုံးပိုင်းတွင် ယေဟောဝါသက်သေတို့၏ အုပ်ချုပ်ရေးအဖွဲ့ဝင် ဂျက်ဖရီ ဂျက်ဆင်က ဂျော်ဂျီယာဘာသာစကားဖြင့် ကမ္ဘာသစ်ဘာသာပြန် သမ္မာကျမ်းစာအုပ် အပြည့်အစုံကို ထုတ်ဝေကြောင်းကြေညာလိုက်သောအခါ တက်ရောက်သူကိုယ်စားလှယ်များ အလွန်အံ့သြခဲ့ကြသည်။ b များစွာသောသူတို့သည် အလွန်အံ့သြဝမ်းသာကြရာ မျက်ရည်ကျခဲ့ကြသည်။ မိသားစုတစ်စုသည် စိတ်လှုပ်ရှားစွာ ဤသို့ထုတ်ဖော်ပြောဆိုခဲ့၏– “ဒီအံ့ဖွယ်အမှု—⁠ယေဟောဝါရဲ့အံ့ဖွယ်အမှုအတွက် ကျေးဇူးတင်ကြောင်းဖော်ပြချက်ကို မရပ်လိုက်နိုင်ဘူး။ ဒီအချိန်တိုလေးအတွင်းမှာ ဒီလောက်ကြီးမားတဲ့အလုပ်ကို လုပ်ခဲ့တဲ့အတွက်လေ!”

 အစီအစဉ်ကို တယ်လီဖုန်းလိုင်းဖြင့်နားထောင်ခဲ့ရသူ တလန်ဂျီဟာမြို့မှ ညီအစ်မတစ်ဦးက ဤသို့တုံ့ပြန်ခဲ့၏– “ကျမ်းစာအုပ်အပြည့်အစုံကို လက်ခံရရှိတဲ့အခါ ကျွန်မခံစားရတဲ့ရွှင်လန်းမှုကို စကားလုံးနဲ့ ထုတ်ဖော်မပြောပြတတ်ဘူး။ တကယ့်ကိုထူးခြားတဲ့ ဒီသုံးရက်ကြာစည်းဝေးကြီးအတွက် ကျေးဇူးတင်တယ်လို့ ပြောချင်ပါတယ်။ တကယ့်ကိုသမိုင်းတွင်မယ့်ဖြစ်ရပ်ပါ။” ဂျော်ဂျီယာအနောက်ပိုင်း၊ ပင်လယ်နက်အနီးရှိ အသင်းတော်တစ်ခုမှ မိသားစုတစ်စုက ဤသို့ဆို၏– “အခုချိန်အထိ ကျွန်တော်တို့မိသားစုမှာ ကျမ်းစာအုပ်တစ်အုပ်တည်းရှိတယ်၊ ဒါပေမဲ့ အခုတော့ ကျွန်တော်တို့လေးယောက်စလုံးမှာ ကိုယ်ပိုင် ကမ္ဘာသစ်ဘာသာပြန်ကျမ်းရှိပြီ။ အခု ကျွန်တော်တို့တစ်ယောက်ချင်း ကိုယ်ပိုင်ကျမ်းစာနဲ့ လေ့လာနိုင်ပြီ။”

သို့သော် နောက်ကွယ်မှအခြေအနေအရပ်ရပ်မှာ အလွန်အဆင်ပြေချောမွေ့ခဲ့သည်တော့ မဟုတ်ခဲ့ပါ။ ဥပမာ၊ ကမ္ဘာသစ်ဘာသာပြန်ကျမ်းအပြည့်အစုံကို ပုံနှိပ်ပြီး စည်းဝေးကြီးအတွက် ဂျော်ဂျီယာနိုင်ငံသို့ အချိန်မီတင်ပို့ခဲ့သော်လည်း အကောက်ခွန်ဌာနမှအရာရှိများက ဂျော်ဂျီယာသို့တင်ပို့ခြင်းကို ခွင့်မပြုခဲ့ကြချေ။ ညီအစ်ကိုများသည် အစိုးရဌာနများကို စုံစမ်းစစ်ဆေးသည့်အရာရှိရုံးသို့ အယူခံဝင်ခဲ့သည်။ ယင်းစုံစမ်းစစ်ဆေးရေးအရာရှိက ခရိုင်စည်းဝေးကြီးမတိုင်မီလေးတွင် ကျမ်းစာအုပ်များ ထုတ်ခွင့်ရရန် ပြုလုပ်ပေးနိုင်ခဲ့သည်။ သူသည် သူ၏ရုံးအတွက် ကျမ်းစာအုပ်အသစ်များရရှိဖို့ သူ၏လက်ထောက်ကို မာနီအူလီစည်းဝေးကြီးသို့ပင် စေလွှတ်ခဲ့သည်။

ဂျော်ဂျီယာလူမျိုးတို့၏လှိုက်လှိုက်လှဲလှဲကြိုဆိုသည့်ပုံစံ

မာနီအူလီခရိုင်စည်းဝေးကြီးသည် ဂျော်ဂျီယာရှိ ယေဟောဝါသက်သေခံများအတွက် အခြားအကြောင်းကြောင့်လည်း အထူးဖြစ်ခဲ့သည်။ အစီအစဉ်တွင် ယေဟောဝါသက်သေတို့၏ အုပ်ချုပ်ရေးအဖွဲ့ဝင်တစ်ဦးပါဝင်ခဲ့သည်။ တက်ရောက်လာသူအားလုံးသည် မည်မျှစိတ်လှုပ်ရှားခဲ့သနည်းဟူမူ မိမိတို့၏နွေးထွေးသော ရိုးရာဓလေ့နှုတ်ဆက်သည့်ပုံစံဖြင့် သူ့အား ကိုယ်တိုင်ကိုယ်ကျ နှုတ်ဆက်လိုခဲ့ကြသည်။ ညီအစ်ကိုဂျက်ဆင်သည် စည်းဝေးကြီမတိုင်မီ၊ နေ့လယ်နားချိန်တွင်နှင့် စည်းဝေးကြီးပြီးနောက်တွင် ရပ်နေခဲ့ရပြီး ညီအစ်ကိုညီအစ်မများကို နာရီနှင့်ချီ နှုတ်ဆက်ခဲ့ရသည်၊ သို့သော် ထိုသို့လုပ်ပေးရသည်ကို သူပျော်ရွှင်ခဲ့သည်။

လွန်ခဲ့သော ၁၉၀၃ ခုနှစ်က စည်းဝေးကြီးတစ်ခုအပြီးတွင် ညီအစ်ကိုတစ်ဦး ဤသို့ပြောခဲ့၏– “ကျွန်တော်ဟာ ဆင်းရဲပေမဲ့လည်း ဒီစည်းဝေးကြီးမှာရရှိခဲ့တဲ့ အကျိုးကျေးဇူးတွေကို ဒေါ်လာတစ်ထောင်နဲ့ မလဲနိုင်ဘူး။” ရာစုနှစ်တစ်ခုကျော်ခဲ့ပြီးနောက်တွင် ယင်းစကားများသည် ၂၀၀၆ ခုနှစ်နွေရာသီတွင် ဂျော်ဂျီယာ၌ကျင်းပခဲ့သည့် ထူးမြတ်ကောင်းမွန်သောစည်းဝေးကြီးများကို တက်ရောက်ခဲ့ကြသူ သက်သေခံများ၏ ခံစားချက်ပင်ဖြစ်သည်။

[အောက်ခြေမှတ်ချက်များ]

[စာမျက်နှာ ၂၀ ပါ လေးထောင့်ကွက်]

“သူငယ်တစ်ယောက်”ကြီးထွားလာလေပြီ

ဟေရှာယ ၆၀:၂၂ တွင်ပါရှိသော ဤစကားများသည် ဂျော်ဂျီယာတွင် အမှန်ပင်ဖြစ်လာခဲ့သည်– ‘သူငယ်တစ်ယောက်သည် လူတစ်ထောင်ဖြစ်ရလိမ့်မည်။ အားနည်းသောသူတစ်ယောက်သည် အားကြီးသောလူမျိုးဖြစ်ရလိမ့်မည်။ ငါထာဝရဘုရားသခင်သည် အချိန်ရောက်လျှင် ထိုအမှုကိုနှိုးဆော်မည်။’ အနှစ် ၂၀ ပင်မပြည့်သောအချိန်အတွင်း ဂျော်ဂျီယာရှိဘုရားသခင့်နိုင်ငံတော်ကြေညာသူ အရေအတွက်သည် ၁၀၀ ပင်မပြည့်သောအရေအတွက်မှ ၁၆,၀၀၀ ခန့်အထိ တိုးများလာလေသည်။ ဘုရားသခင့်နှုတ်မြွက်တော်ကိုဟောပြောသော ထိုထက်သန်သည့်အမှုဆောင်များသည် အပတ်တိုင်း အိမ်တွင်းကျမ်းစာသင်အံမှု ၈,၀၀၀ နီးပါးကျင်းပနေကြပြီး ယင်းက ဂျော်ဂျီယာတွင် နောက်ထပ်တိုးတက်ဦးမည့် အလွန်ကောင်းသောအလားအလာဖြစ်သည်။

[စာမျက်နှာ ၁၇ ပါ ပုံကြမ်း/ မြေပုံများ]

(ကားချပ်အပြည့်အစုံကို စာစောင်တွင်ကြည့်ပါ)

ရုရှားဖယ်ဒရေးရှင်း

ဂျော်ဂျီယာ

⇨ဇုဒီဒီ

⇨ကူတအီစီ

မာနီအူလီ ⇨ဂိုရီ

⇨ကက်စ်ပီ

⇨တာ့နိုရီ

တဘီလစီ

တူရကီ

အာမီးနီးယား

အဇာဘိုင်ဂျန်

[Credit Line]

Globe: Based on NASA/​Visible Earth imagery

[စာမျက်နှာ ၁၇ ပါ ရုပ်ပုံ]

တဘီလစီမြို့ရှိရုပ်တု

[စာမျက်နှာ ၁၈ ပါ ရုပ်ပုံများ]

မာနီအူလီစည်းဝေးကြီးနှင့် အခြားငါးနေရာကို မိုဘိုင်းဖုန်းဖြင့် ဆက်သွယ်ထား

[စာမျက်နှာ ၁၉ ပါ ရုပ်ပုံများ]

ဂျော်ဂျီယာဘာသာစကားဖြင့် “ကမ္ဘာသစ်ဘာသာပြန်ကျမ်း” အပြည့်အစုံကို ထုတ်ဝေသောကြောင့် စည်းဝေးကြီးကိုယ်စားလှယ်များ အလွန်ဝမ်းသာအံ့သြခဲ့ကြ