ယောလနှင့်အာမုတ်ကျမ်းမှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
ယောလနှင့်အာမုတ်ကျမ်းမှ ပေါ်လွင်ချက်များ
မိမိသည် “ပေသွေလ၏သား ယောလ” ဖြစ်သည်ဟူသောအချက်မှလွဲ၍ မိမိနှင့်ပတ်သက်သည့်အခြားအချက်များကို ယောလ မဖော်ပြထားပေ။ (ယောလ ၁:၁) သူ့အမည်တပ်ထားသောကျမ်းစောင်တွင် သူ၏သတင်းစကားမှလွဲ၍ အခြားအကြောင်း အနည်းငယ်သာဖော်ပြထားသည်။ သူပရောဖက်ပြုသည့်အချိန်မှာ ယုဒပြည်တွင် ဩဇိဘုရင်ဖြစ်ပြီးနောက် ကိုးနှစ်အကြာ ဘီစီ ၈၂၀ ခန့်တွင်ဖြစ်သည်ဟု ခန့်မှန်းကြ၏။ ယောလသည် မိမိအကြောင်း အဘယ်ကြောင့် အနည်းငယ်သာဖော်ပြခဲ့သနည်း။ သတင်းတရားကြေညာသူကိုမဟုတ်ဘဲ သတင်းတရားကိုသာ အလေးပေးလိုသောကြောင့် ဖြစ်နိုင်သည်။
ထို့ပြင် ဘုရင်သြဇိလက်ထက်တွင် ယုဒပြည်မှ “နွားကျောင်းသောသူ၊ သဖန်းသီးကိုဆွတ်သောသူ” အာမုတ်သည်လည်း ပရောဖက်အဖြစ် ခန့်အပ်ခံရသည်။ (အာမုတ် ၇:၁၄) ယောလသည် ယုဒပြည်တွင် ပရောဖက်ပြုပြီး အာမုတ်မူကား မြောက်ပိုင်းဆယ်နွယ်နိုင်ငံတွင် ပရောဖက်ပြုရန် စေလွှတ်ခံရသည်။ သူယုဒပြည်သို့ပြန်လာပြီးနောက် ဘီစီ ၈၀၄ ခန့်တွင် အာမုတ်ကျမ်းကို ရေးသားပြီးစီးခဲ့သည်။ အရေးအသားမှာ ရိုးရှင်းပြီး ကွက်ကွက်ကွင်းကွင်း ပီပြင်လှသည်။
“ထိုနေ့ရက်ကြောင့် အမင်္ဂလာရှိ၏”—အဘယ်ကြောင့်နည်း
ဂါဇံကျိုင်း၊ အရာဘကျိုင်း၊ ယာလက်ကျိုင်း၊ ခါသိလကျိုင်းစသည့် ကျိုင်းကောင်ကပ်ဘေးများနှင့်ပတ်သက်သော အဆင်းအာရုံကို ယောလတွေ့မြင်ခဲ့သည်။ ထိုကျိုင်းကောင်များကို “အများဖြစ်၍ အားကြီးသောအမျိုး” နှင့် “သူရဲ” အဖြစ်ခိုင်းနှိုင်းထားသည်။ (ယောလ ၁:၄; ၂:၂-၇) ‘ထိုနေ့ရက်ကြောင့် အမင်္ဂလာရှိ၏။ ထာဝရဘုရားသခင်၏နေ့ရက်နီးပြီ။ အတိုင်းအဆမဲ့တန်ခိုးရှင်ဖျက်ဆီးခြင်းဘေးကဲ့သို့ ရောက်လာလိမ့်မည်’ ဟုယောလညည်းတွားလေသည်။ (ယောလ ၁:၁၅) “စိတ်နှလုံးအကြွင်းမဲ့ ငါ့ထံသို့ပြန်လာကြလော့” ဟုဇိအုန်မြို့သားတို့ကို ယေဟောဝါသတိပေးသည်။ ထိုသို့ပြုလုပ်မည်ဆိုပါက ယေဟောဝါသည် “မိမိလူတို့ကို ကယ်မသနားတော်မူ” ပြီး ကျိုင်းကောင်များဖြစ်သော “မြောက်မျက်နှာတပ်သား” တို့ကို ဖယ်ရှားပေးလိမ့်မည်။ သို့သော် ယေဟောဝါသည် မိမိ၏နေ့ကြီးမတိုင်မီ ‘လူမျိုးတကာတို့အပေါ်သို့ ဝိညာဉ်တော်ကို သွန်းလောင်း’ ပြီး “မိုးကောင်းကင်၌လည်းကောင်း၊ မြေကြီးပေါ်၌လည်းကောင်း အံ့ဖွယ်သောအရာ” တို့ကိုထင်ရှားစေလိမ့်မည်။—ယောလ ၂:၁၂၊ ၁၈-၂၀၊ ၂၈-၃၁။
“သံထွန်သွားများကို ဓားဖြစ်စေခြင်းငှာလည်းကောင်း၊ တံစဉ်များကို လှံဖြစ်စေခြင်းငှာလည်းကောင်း ထုလုပ်” ပြီး တိုက်ပွဲအတွက် အသင့်ပြင်ရန် လူမျိုးတို့ကို ယေဟောဝါစိန်ခေါ်ထားသည်။ တရားစီရင်ဖျက်ဆီးခံရမည့် “ယောရှဖတ်ချိုင့်သို့တက်လာ” ရန် သူတို့ကို ကိုယ်တော်အမိန့်ပေးသည်။ “ယုဒပြည်မူကား ထာဝရပြည် . . . ဖြစ်လိမ့်မည်။”—ယောလ ၃:၁၀၊ ၁၂၊ ၂၀။
ကျမ်းစာမေးခွန်းများအဖြေ–
၁:၁၅; ၂:၁၊ ၁၁၊ ၃၁; ၃:၁၄—‘ထာဝရဘုရားသခင်၏နေ့ရက်’ ကား အဘယ်နည်း။ ယေဟောဝါ၏နေ့ဟူသည် ကိုယ်တော်၏ရန်သူများကို ဖျက်ဆီးပြီး စစ်မှန်သောဝတ်ပြုသူများကို ကယ်တင်သည့် တရားစီရင်ချိန်ဖြစ်သည်။ ဥပမာ၊ ရှေးဗာဗုလုန်ကို မေဒိပေရသိတို့သိမ်းပိုက်သည့် ဘီစီ ၅၃၉ တွင် ဗာဗုလုန်အပေါ် ယေဟောဝါ၏နေ့ရက် အမှန်ပင်ကျရောက်ခဲ့သည်။ (ဟေရှာယ ၁၃:၁၊ ၆) အနာဂတ်တွင် ကမ္ဘာ့အယူမှားဘာသာရေးအင်ပါယာဖြစ်သော “ဗာဗုလုန်မြို့ကြီး” ကိုတရားစီရင်မည့် “ယေဟောဝါ၏နေ့” လည်း နီးကပ်နေပါသည်။—ဗျာ. ၁၈:၁-၄၊ ၂၁။
၂:၁-၁၀၊ ၂၈—ကျိုင်းကောင်ကပ်ဘေးနှင့်ပတ်သက်သော ပရောဖက်ပြုချက် မည်သို့ပြည့်စုံခဲ့သနည်း။ ယောလကျမ်းတွင်ဖော်ပြသည့်အတိုင်း ယုဒပြည်တွင် အလွန်ကြီးမားသည့်ကျိုင်းကောင်ကပ်ဘေးကြီး ကျရောက်ခဲ့ကြောင်း ကျမ်းစာမှတ်တမ်းတွင် မတွေ့ရပါ။ ထို့ကြောင့် ယောလဖော်ပြသော ကပ်ဘေးသည် အေဒီ ၃၃ တွင်ပြည့်စုံသော ပရောဖက်ပြုချက်ဖြစ်သည်။ ထိုအချိန်တွင် ယေဟောဝါသည် ခရစ်တော်၏ အစောပိုင်းနောက်လိုက်များအပေါ် စွမ်းအားတော်စတင်သွန်းလောင်းခဲ့ရာ သူတို့သည် အယူမှားဘာသာရေးခေါင်းဆောင်များအား စိတ်အနှောင့်အယှက်ဖြစ်စေသော သတင်းကို စတင်ဟောပြောခဲ့ကြသည်။ (တမန်တော် ၂:၁၊ ၁၄-၂၁; ၅:၂၇-၃၃) ယနေ့လည်း ထပ်တူလုပ်ငန်းတွင် ကျွန်ုပ်တို့ပါဝင်ခွင့်ရရှိထားကြသည်။
၂:၃၂၊ ကဘ—“ယေဟောဝါ၏နာမတော်ကိုခေါ်ခြင်း” ဟူသည် အဘယ်အရာကိုဆိုလိုသနည်း။ ဘုရားသခင့်နာမတော်ကိုခေါ်ခြင်းဟူသည် ထိုနာမတော်ကိုသိခြင်း၊ အလွန်ရိုသေလေးစားခြင်း၊ ထိုနာမတော်ပိုင်ဆိုင်ထားသောအရှင်အား ယုံကြည်ကိုးစားခြင်းကိုဆိုလို၏။—ရောမ ၁၀:၁၃၊ ၁၄။
၃:၁၄—“ကွပ်မျက်ရာချိုင့်” ကားအဘယ်နည်း။ ယင်းသည် ဘုရားသခင်တရားစီရင်သော ပုံဆောင်နေရာဖြစ်သည်။ “ယေဟောဝါသည် တရားသူကြီးဖြစ်တော်မူ၏” ဟုအဓိပ္ပာယ်ရသည့် ဘုရင်ယောရှဖတ်အုပ်စိုးချိန်တွင် ယုဒပြည်ကိုဝိုင်းရံထားသော စစ်တပ်များကို ရှုပ်ထွေးစေခြင်းဖြင့် ယုဒပြည်ကို ဘုရားသခင်ကယ်တင်ခဲ့သည်။ ထို့ကြောင့် ထိုနေရာကို “ယောရှဖတ်ချိုင့်” ဟုလည်းခေါ်သည်။ (ယောလ ၃:၂၊ ၁၂) ယနေ့အချိန်တွင် ယင်းသည် စပျစ်သီးနယ်ရာကျင်းရှိ စပျစ်သီးများနင်းချေခံရသကဲ့သို့ လူမျိုးများဖျက်ဆီးခံရမည့် ပုံဆောင်နေရာကိုဆိုလိုသည်။—ဗျာ. ၁၉:၁၅။
ကျွန်ုပ်တို့အတွက် သင်ခန်းစာများ–
၁:၁၃၊ ၁၄။ စစ်မှန်သောနောင်တရခြင်း၊ ယေဟောဝါကို စစ်မှန်သောဘုရားသခင်အဖြစ် အသိအမှတ်ပြုခြင်းသည် ကယ်တင်ခြင်းအတွက် အရေးပါ၏။
၂:၁၂၊ ၁၃။ စစ်မှန်သောနောင်တသည် နှလုံးအကြွင်းမဲ့ဖြစ်ရမည်။ ယင်းတွင် “အဝတ်ကိုမဆုတ်ဘဲ” “နှလုံးကိုဆုတ်” ခြင်းပါဝင်သည်။
၂:၂၈-၃၂၊ ကဘ။ “ယေဟောဝါ၏ ကြောက်မက်ဖွယ်သောနေ့ကြီး” တွင် “ယေဟောဝါ၏နာမကို ခေါ်သောသူ” များသာ “ကယ်တင်တော်မူခြင်းသို့ ရောက်ရကြလတ္တံ့။” ယေဟောဝါသည် မိမိ၏ “အံ့ဖွယ်သောအမှုတို့ကို” ဟောပြောခြင်းဖြစ်သော ပရောဖက်ပြုလုပ်ငန်းတွင်ပါဝင်နေသည့် လူကြီးလူငယ်၊ ယောက်ျားမိန်းမ၊ လူမျိုးတကာအပေါ်သို့ စွမ်းအားတော်ကို သွန်းလောင်းသောကြောင့် ကျွန်ုပ်တို့အလွန်ကျေးဇူးတင်ကြသည်။ (တမန်တော် ၂:၁၁) ယေဟောဝါ၏နေ့ကြီးနီးလာသည်နှင့်အမျှ ကျွန်ုပ်တို့သည် ‘သန့်ရှင်းသောအကျင့်ကိုကျင့်ခြင်း၊ ဘုရားသခင်ဝတ်၌မွေ့လျော်ခြင်း’ တို့ဖြင့် ကြွယ်ဝနေသင့်သည်မဟုတ်လော။—၂ ပေတရု ၃:၁၀-၁၂။
၃:၄-၈၊ ၁၉။ ယုဒပြည်၏ ပတ်ဝန်းကျင်နိုင်ငံများသည် ဘုရားသခင့်ရွေးချယ်ခံလူမျိုးကို မတရားဆက်ဆံသောကြောင့် စာရင်းရှင်းခံရမည်ဟု ယောလပရောဖက်ပြုသည်။ ထိုပရောဖက်ပြုချက်အတိုင်း တုရုမြို့သည် ဗာဗုလုန်ဘုရင်နေဗုခဒ်နေဇာ၏လက်ချက်ဖြင့် ဖျက်ဆီးခံခဲ့ရသည်။ နောက်ပိုင်း ထိုမြို့ကို မဟာအလက်ဇန္ဒားသိမ်းပိုက်ခဲ့ပြီး ထောင်နှင့်ချီသော စစ်သားများ၊ အထင်ကရပုဂ္ဂိုလ်များကိုသတ်ကာ မြို့သား ၃၀,၀၀၀ ကို ကျွန်အဖြစ်ရောင်းခဲ့သည်။ အလက်ဇန္ဒားနှင့် သူ့ကိုဆက်ခံသူများသည် ဖိလိတ္တိလူတို့ကိုလည်း အလားတူပြုလုပ်ခဲ့၏။ ဧဒုံပြည်သည်လည်း ဘီစီလေးရာစုတွင် လူသူကင်းမဲ့ခဲ့၏။ (မာလခိ ၁:၃) ထိုပရောဖက်ပြုချက်များ ပြည့်စုံခြင်းက ယေဟောဝါသည် မိမိကတိတော်များကို ပြည့်စုံစေသောအရှင်ဖြစ်သည်ဟူသော ယုံကြည်ချက်ကို ပို၍ခိုင်မာစေသည်။ ထို့ပြင် ယနေ့ ကိုယ်တော့်လူမျိုးအား နှိပ်စက်ညှဉ်းပန်းသောတိုင်းနိုင်ငံတို့ကိုလည်း မည်သို့စီရင်မည်ကို ဖော်ပြသည်။
၃:၁၆-၂၁။ “မိုးကောင်းကင်နှင့်မြေကြီးသည် တုန်လှုပ်” ပြီး လူမျိုးတို့သည် ယေဟောဝါ၏တရားစီရင်ခြင်းကို ခံရလိမ့်မည်။ သို့သော် ‘ထာဝရဘုရားသခင်သည် မိမိလူတို့၏ခိုလှုံရာ’ ဖြစ်ပြီး သူတို့ကို ပရဒိသုတွင် အသက်ရှင်ခွင့်ပေးတော်မူမည်။ ဆိုးသွမ်းသောလောကအပေါ် ဘုရားသခင်တရားစီရင်မည့်နေ့ နီးလာသည်နှင့်အမျှ ကိုယ်တော့်ထံချဉ်းကပ်ရန် အခိုင်အမာစိတ်ပိုင်းဖြတ်သင့်သည် မဟုတ်လော။
“သင်၏ဘုရားသခင်နှင့်တွေ့ခြင်းငှာ ကိုယ်ကိုပြင်ဆင်လော့”
ယုဒ၊ ဣသရေလနှင့် ဣသရေလပြည်ဝန်းကျင်ရှိ ရန်သူနိုင်ငံများအတွက် သတင်းစကားများကို အာမုတ်ကြေညာခဲ့သည်။ ရှုရိ၊ ဖိလိတ္တိ၊ တုရု၊ ဧဒုံနှင့် မောဘပြည်တို့သည် ဘုရားသခင်၏လူမျိုးကို ရက်စက်ကြမ်းကြုတ်စွာဆက်ဆံသောကြောင့် ဖျက်ဆီးခံရမည်ဖြစ်၏။ ယုဒအမျိုးသည် ‘ထာဝရဘုရားသခင် စီရင်တော်မူချက်တို့ကိုမစောင့်’ သောကြောင့် ဖျက်ဆီးခံရမည်ဖြစ်သည်။ (အာမုတ် ၂:၄) ဣသရေလဆယ်နွယ်နိုင်ငံသားများကော မည်သို့နည်း။ သူတို့၏အပြစ်များတွင် ဆင်းရဲသားများကို မတရားဖိနှိပ်ခြင်း၊ အကျင့်ပျက်ခြင်းနှင့် ဘုရားသခင့်ပရောဖက်များကို မလေးစားခြင်းတို့ပါဝင်သည်။ ယေဟောဝါသည် ‘ဗေသလ ယဇ်ပလ္လင်တို့ကို စစ်ကြော’ ပြီး “ဆောင်းကာလ၌စံသောနန်းတော်နှင့် နွေကာလ၌စံသောနန်းတော်တို့ကို” ဖျက်ဆီးမည်ဟု အာမုတ်သတိပေးသည်။—အာမုတ် ၃:၁၄၊ ၁၅။
ရုပ်ပုံကိုးကွယ်သောဣသရေလလူမျိုးသည် ပြစ်ဒဏ်အမျိုးမျိုးခံခဲ့ရသော်လည်း ဆက်၍ခေါင်းမာနေဆဲဖြစ်၏။ ထို့ကြောင့် အာမုတ်က “သင်၏ဘုရားသခင်နှင့်တွေ့ခြင်းငှာ ကိုယ်ကိုပြင်ဆင်လော့” ဟုဆိုခဲ့သည်။ (အာမုတ် ၄:၁၂) ဣသရေလလူမျိုးအတွက် ယေဟောဝါ၏နေ့ဟူသည် အာရှုရိပြည်ရှိ “ဒမာသက်မြို့တစ်ဖက်သို့ သိမ်းသွား” ခံရခြင်းကို ဆိုလိုပေလိမ့်မည်။ (အာမုတ် ၅:၂၇) အာမုတ်သည် ဗေသလမြို့ရှိ ယဇ်ပုရောဟိတ်၏ဆန့်ကျင်မှုကို ကြုံရသော်လည်း မကြောက်ရွံ့ခဲ့ပေ။ “နောက်ဆုံးကာလသည် ငါ၏လူဣသရေလအမျိုး၌ရောက်လေပြီ။ နောက်တစ်ဖန် သူတို့ကိုသည်းမခံ” ဟုအာမုတ်ကို ယေဟောဝါမိန့်ဆို၏။ (အာမုတ် ၈:၂) မရဏာနိုင်ငံဖြစ်စေ၊ တောင်များဖြစ်စေ ဘုရားသခင့်စီရင်ချက်မှ မကာကွယ်ပေးနိုင်ပါ။ (အာမုတ် ၉:၂၊ ၃) သို့သော် ပြည်တော် ပြန်လည်ထူထောင်မည်ဟု ကတိပြုထားသည်။ “သိမ်းသွားခြင်းကိုခံရသော ငါ၏လူဣသရေလအမျိုးသားတို့ကို တစ်ဖန်ငါဆောင်ခဲ့သဖြင့် သူတို့သည် ပျက်စီးသောမြို့များကို ပြုပြင်၍နေကြလိမ့်မည်။ စပျစ်ဥယျာဉ်များကိုစိုက်၍ စပျစ်ရည်ကိုသောက်ကြလိမ့်မည်။ လယ်ယာများကိုပြုစု၍ အသီးတို့ကိုစားကြလိမ့်မည်” ဟုယေဟောဝါမိန့်ဆိုသည်။—အာမုတ် ၉:၁၄။
ကျမ်းစာမေးခွန်းများအဖြေ–
၄:၁—“ဗာရှန်နွားတို့” ကား မည်သူတို့ကို ပုံဆောင်သနည်း။ ဂါလိလဲပင်လယ်အရှေ့ဘက်ဒေသရှိ ဗာရှန်ကုန်းမြင့်သည် နွားအပါအဝင် တိရစ္ဆာန်မွေးမြူရေးအတွက် အကောင်းဆုံးနေရာဖြစ်၏။ ထိုဒေသတွင် စားကျက်မြေ ပေါများသည်။ အာမုတ်သည် စည်းစိမ်ယစ်နေသည့်ရှမာရိအမျိုးသမီးများကို ဗာရှန်နွားများနှင့် ခိုင်းနှိုင်းထားသည်။ ထိုအမျိုးသမီးများသည် မိမိတို့ချမ်းသာကြွယ်ဝရေးအတွက် ဆင်းရဲသားများကို လိမ်လည်လှည့်စားရန် “မိမိသခင်တို့” သို့မဟုတ် ခင်ပွန်းတို့အား တွန်းအားပေးခဲ့သည်မှာ သေချာ၏။
၄:၆—“သွားတို့၏စင်ကြယ်ခြင်း” ဟူသောအသုံးအနှုန်းက အဘယ်အရာကို ဆိုလိုသနည်း။ အစာမရှိသောကြောင့် သွားများစင်ကြယ်နေသည့် အစာခေါင်းပါးချိန်ကို ဆိုလိုခြင်းဖြစ်နိုင်သည်။
၅:၅—ဣသရေလလူတို့သည် မည်သည့်နည်းဖြင့် “ဗေသလမြို့ကို မရှာကြ” သနည်း။ ယေရောဗောင်သည် ဗေသလမြို့တွင် နွားရုပ်ကိုးကွယ်မှုကို အစပြုခဲ့သည်။ ထိုအချိန်မှစ၍ ထိုမြို့သည် မှားယွင်းသောဝတ်ပြုရေးဗဟိုဖြစ်လာ၏။ ဂိလဂါလနှင့်ဗေရရှေဘမြို့တွင်လည်း အယူမှားဝတ်ပြုရေးတည်ရှိခဲ့ပေမည်။ ကြိုပြောထားသောဘေးဆိုးမှ လွတ်မြောက်ရန် ဣသရေလလူတို့သည် ထိုနေရာများသို့ သွားရောက်ဝတ်ပြုခြင်းမပြုတော့ဘဲ ယေဟောဝါကို ရှာဖွေရန်လိုအပ်သည်။
၇:၁—“ရှင်ဘုရင်ဆိုင်သောမြက်ပင်” သည် အဘယ်အရာကို ဆိုလိုသနည်း။ ရှင်ဘုရင်၏မြင်းသည်တော်များနှင့် တိရစ္ဆာန်များအတွက် အခွန်ကောက်ခံခြင်းကို ဆိုလိုခြင်းဖြစ်နိုင်သည်။ “နောက်မြက်ပင်ပေါက်စကာလ၌” ထိုအခွန်ကို ပေးဆက်ရန်ဖြစ်၏။ ပြီးနောက် လူတို့သည် ကောက်ပဲသီးနှံများရိတ်သိမ်းနိုင်သည်။ သို့သော် ထိုသို့မရိတ်သိမ်းမီ ကျိုင်းကောင်အုပ်ရောက်လာပြီး ကောက်ပဲသီးနှံများကို ဖျက်ဆီးလိုက်သည်။
၈:၁၊ ၂—“နွေကာလအသီးပါသောတောင်း” ကား အဘယ်အရာကို ပုံဆောင်သနည်း။ ယင်းက ယေဟောဝါ၏နေ့ကြီးနီးပြီကို ပုံဆောင်သည်။ နွေကာလအသီးကို စိုက်ပျိုးရေးနှစ်အကုန်ပိုင်းဖြစ်သော ရိတ်သိမ်းချိန်အဆုံးပိုင်းတွင် ဆွတ်ခူးသည်။ “နွေကာလအသီးပါသောတောင်း” ကို အာမုတ်အား ယေဟောဝါပြခြင်းက ဣသရေလလူမျိုး၏အဆုံး နီးပြီဖြစ်ကြောင်း ဆိုလိုသည်။ ထို့ကြောင့် ယေဟောဝါက “နောက်ဆုံးကာလသည် ငါ၏လူဣသရေလအမျိုး၌ရောက်လေပြီ။ နောက်တစ်ဖန် သူတို့ကို သည်းမခံ” ဟု အာမုတ်ကို မိန့်ဆိုခဲ့သည်။
ကျွန်ုပ်တို့အတွက် သင်ခန်းစာများ–
၁:၃၊ ၆၊ ၉၊ ၁၁၊ ၁၃; ၂:၁၊ ၄၊ ၆။ ယေဟောဝါသည် ဣသရေလ၊ ယုဒနှင့် သူတို့၏ပတ်ဝန်းကျင်မှ နိုင်ငံခြောက်နိုင်ငံတို့အပေါ် အမျက်ထွက်ကာ “ငါသည် ဒဏ်မပေးဘဲမနေ” ဟုဆိုသည်။ ယေဟောဝါ၏တရားစီရင်ချက်မှ မလွတ်မြောက်နိုင်ပေ။—အာမုတ် ၉:၂-၅။
၂:၁၂။ ကြိုးစားလုပ်ဆောင်နေသော ရှေ့ဆောင်များ၊ နယ်လှည့်ကြီးကြပ်မှူးများ၊ ခရစ်ယာန်သာသနာပြုများနှင့် ဗေသလအိမ်သားများအား အချိန်ပြည့်လုပ်ငန်းကိုစွန့်လွှတ်ပြီး သာမန်ဘဝပုံစံမျိုးဖြင့်နေထိုင်ရန် မတိုက်တွန်းသင့်ပေ။ ယင်းအစား သူတို့၏မွန်မြတ်သောလုပ်ငန်းကို ဆက်လုပ်ဆောင်နိုင်ရန် အားပေးသင့်သည်။
၃:၈။ လူတစ်ဦးသည် ခြင်္သေ့ဟောက်သောအခါ ကြောက်လန့်သကဲ့သို့ “သင်သွားလော့။ ငါ၏လူ ဣသရေလအမျိုးတွင် ပရောဖက်ပြုလော့” ဟူသော ယေဟောဝါ၏မိန့်ဆိုသံကို အာမုတ်ကြားသောအခါ မဟောဘဲမနေနိုင်ပေ။ (အာမုတ် ၇:၁၅) ဘုရားသခင်ကိုကြောက်ရွံ့ခြင်းက သတင်းကောင်းကို ထက်သန်စွာဟောပြောရန် လှုံ့ဆော်ပေးသည်။
၃:၁၃-၁၅; ၅:၁၁။ နိမ့်ကျသောနွားကျောင်းသား အာမုတ်သည် မိမိတို့ကိုယ်ကိုကျေနပ်နေသော ကြွယ်ဝချမ်းသာသူတို့ကို ယေဟောဝါ၏အကူအညီဖြင့် “ဆင့်ဆို” နိုင်ခဲ့သည်။ မည်မျှခက်ခဲသည့်ရပ်ကွက်တွင် ဖြစ်ပါစေ သတင်းကောင်းဟောပြောနိုင်ရန် ကျွန်ုပ်တို့ကိုလည်း ယေဟောဝါကူညီပေးနိုင်ပါသည်။
၄:၆-၁၁; ၅:၄၊ ၆၊ ၁၄။ ဣသရေလလူတို့သည် ယေဟောဝါထံ ‘ပြန်လာ’ ရန် အကြိမ်ကြိမ်ပျက်ကွက်သော်လည်း ‘ထာဝရဘုရားသခင်ကိုရှာကြလော့။ ရှာလျှင် အသက်ချမ်းသာရကြလိမ့်မည်’ ဟုသူတို့ကိုတိုက်တွန်းထားသည်။ ဤအစီအစဉ်စနစ်ဆိုး ဆက်ရှိနေရန် ယေဟောဝါစိတ်ရှည်စွာ ခွင့်ပြုထားသရွေ့ ကိုယ်တော့်ထံ လူတို့ပြန်လာရန် ကျွန်ုပ်တို့တိုက်တွန်းသင့်သည်။
၅:၁၈၊ ၁၉။ အဆင်သင့်မဖြစ်ဘဲ ‘ထာဝရဘုရားသခင်၏နေ့ရက်ကို တောင့်တသောသူတို့’ သည် မိုက်မဲလှသည်။ ထိုသို့ပြုသောလူတစ်ဦး၏အခြေအနေမှာ ခြင်္သေ့ရှိရာမှပြေး၍ ဝံကိုတွေ့သော၊ ဝံရှိရာမှပြေး၍ မြွေကိုက်ခံရသောသူကဲ့သို့သာဖြစ်သည်။ ကျွန်ုပ်တို့သည် စစ်မှန်သောဝတ်ပြုရေးတွင် နိုးကြား၍ “စောင့်နေကြ” ပြီး အသင့်ရှိနေခြင်းက ပညာရှိရာရောက်သည်။—လုကာ ၂၁:၃၆။
၇:၁၂-၁၇။ ကျွန်ုပ်တို့သည် ဘုရားသခင့်သတင်းစကားကို မကြောက်မရွံ့၊ ရဲရင့်စွာ ကြေညာသင့်သည်။
၉:၇-၁၀။ သစ္စာမဲ့ဣသရေလလူတို့သည် သစ္စာရှိဘိုးဘေးများ၊ ဘုရားသခင့်ရွေးချယ်ခံလူမျိုးအဖြစ် အီဂျစ်မှကယ်လွှတ်ခံရသူများ၏ သားစဉ်မြေးဆက်များဖြစ်သော်လည်း ကုရှအမျိုးသားများကဲ့သို့ ဘုရားသခင့်မျက်နှာသာ ဆုံးရှုံးခဲ့ရသည်။ မျက်နှာမလိုက်သောဘုရားသခင့်ရှေ့ မျက်နှာသာရရှိခြင်းသည် မျိုးရိုးစဉ်ဆက်အပေါ် မမူတည်ဘဲ “ဘုရားသခင်ကိုကြောက်ရွံ့၍ တရားသဖြင့်ကျင့်ဆောင်” ခြင်းအပေါ် မူတည်သည်။—တမန်တော် ၁၀:၃၄၊ ၃၅။
ကျွန်ုပ်တို့ လုပ်ဆောင်သင့်သည့်အရာ
စာတန့်လောကအပေါ် ဘုရားသခင် တရားစီရင်မည့်နေ့ နီးကပ်နေပြီ။ ဘုရားသခင်သည် မိမိလူမျိုးအပေါ် စွမ်းအားတော်သွန်းလောင်းပြီး ကျရောက်လာမည့်နေ့ကြီးအကြောင်း လူတို့ကိုသတိပေးရန် အသင့်ပြင်ဆင်ပေးနေသည်။ လူတို့ ယေဟောဝါကိုသိပြီး ‘ကိုယ်တော့်နာမကိုခေါ်’ ရန် ကူညီပေးသည့်လုပ်ငန်းတွင် ကျွန်ုပ်တို့ အပြည့်အဝပါဝင်သင့်သည်မဟုတ်လော။—ယောလ ၂:၃၁၊ ၃၂။
‘မကောင်းမှုကိုမုန်း၍ ကောင်းမှုကိုချစ်ကြလော့။ မြို့တံခါးဝတွင် တရားကိုတည်စေကြလော့’ ဟုအာမုတ်တိုက်တွန်းခဲ့သည်။ (အာမုတ် ၅:၁၅) ယေဟောဝါ၏နေ့နီးလာသည်နှင့်အမျှ ကိုယ်တော့်ထံချဉ်းကပ်ခြင်း၊ ဆိုးညစ်သောလောကနှင့် အကျင့်ပျက်ပြားသောပေါင်းသင်းမှုများမှ သီးခြားနေခြင်းသည် ပညာရှိလမ်းစဉ်ဖြစ်၏။ ထိုသို့လုပ်ဆောင်နိုင်ရန် ယောလနှင့်အာမုတ်ကျမ်းမှ အချိန်တန်သင်ခန်းစာများကို ကျွန်ုပ်တို့သင်ယူနိုင်ကြသည်။—ဟေဗြဲ ၄:၁၂။
[စာမျက်နှာ ၁၂ ပါ ရုပ်ပုံ]
‘ထာဝရဘုရားသခင်၏ နေ့ရက်နီးပြီ’ ဟု ယောလပရောဖက်ပြုခဲ့
[စာမျက်နှာ ၁၅ ပါ ရုပ်ပုံ]
အာမုတ်ကဲ့သို့ ကျွန်ုပ်တို့သည် ဘုရားသခင့်သတင်းစကားကို မကြောက်မရွံ့၊ ရဲရင့်စွာ ကြေညာသင့်