မီးငရဲအကြောင်း ယေရှုပြောခဲ့သလော

မီးငရဲအယူဝါဒကို ယုံကြည်သူတချို့သည် မာကု ၉:၄၈ (သို့မဟုတ် အခန်းငယ် ၄၄၊ ၄၆) တွင်မှတ်တမ်းတင်ထားသော ယေရှု၏စကားကို ထောက်ပြကြသည်။ ယေရှုသည် မသေသောပိုးနှင့် မငြိမ်းသောမီးအကြောင်း မိန့်ဆိုခဲ့သည်။ ထိုစကားများနှင့်ပတ်သက်၍ တစ်ယောက်ယောက်ကမေးလာခဲ့လျှင် သင်မည်သို့ရှင်းပြမည်နည်း။

အသုံးပြုသည့်ဘာသာပြန်ကျမ်းအပေါ်မူတည်၍ လူတစ်ဦးသည် အခန်းငယ် ၄၄၊ ၄၆ သို့မဟုတ် ၄၈ တွင်ဖတ်မိပေမည်၊ အကြောင်းမှာ အချို့သောဘာသာပြန်ကျမ်းများတွင် ထိုအခန်းငယ်သုံးခုကို ထပ်တူစကားမျိုးဖြင့် ဘာသာပြန်ဆိုထားသောကြောင့်ဖြစ်သည်။ * ကမ္ဘာသစ်ဘာသာပြန်ကျမ်းတွင် ဤသို့ဖတ်ရသည်– “သင်၏မျက်စိသည်လည်း သင့်ကိုမှားယွင်းစေလျှင် ထုတ်ပစ်လော့။ ဂေဟင်နာအရပ်သို့ မျက်စိနှစ်ဖက်စုံနှင့် ရောက်သည်ထက် ဘုရားသခင်၏နိုင်ငံတော်သို့ မျက်စိတစ်ဖက်နှင့် ဝင်ရခြင်းသည် သာ၍ကောင်း၏။ ထိုဂေဟင်နာသည် ပိုးမသေ၊ မီးမငြိမ်းရာအရပ်ဖြစ်၏။”—မာ. ၉:၄၇၊ ၄၈။

မည်သို့ပင်ဖြစ်ပါစေ၊ အချို့သူများသည် ယေရှု၏ထိုဖော်ပြချက်က သေပြီးနောက် ဆိုးညစ်သောဝိညာဉ်သည် ထာဝစဉ်ညှဉ်းဆဲခံရသည်ဆိုသည့်အချက်ကို ထောက်ခံကြောင်း အခိုင်အမာဆိုကြသည်။ ဥပမာ၊ စပိန်နိုင်ငံ နဗားရ်တက္ကသိုလ်မှ စာအုပ်တစ်အုပ် (Sagrada Biblia) တွင်ပါသောမှတ်ချက်တွင် ဤသို့ဆို၏– “ကျွန်ုပ်တို့သခင်သည် ညှဉ်းဆဲရာငရဲကို ရည်ညွှန်းရန် [ထိုစကားများ] ကိုအသုံးပြုသည်။ ‘မသေသည့်ပိုး’ ကို ငရဲကျခံရသူတို့၏ အဆုံးမရှိဝမ်းနည်းပူဆွေးရသည့်အဖြစ်နှင့် ‘မငြိမ်းနိုင်သည့်မီး’ ကို ကာယပိုင်းနာကျင်မှုခံစားစေသည့် အပြစ်ဒဏ်အဖြစ် ရှင်းပြလေ့ရှိသည်။”

သို့သော်၊ ယေရှု၏စကားများကို ဟေရှာယ၏ပရောဖက်ပြုချက် နောက်ဆုံးအခန်းငယ်နှင့် နှိုင်းယှဉ်ကြည့်ပါ။ * ယေရှုသည် ဟေရှာယ အခန်းကြီး ၆၆ ပါကျမ်းချက်ကို ရည်ညွှန်းနေခြင်းဖြစ်ကြောင်း ထင်ရှားပါသည်။ “တစ်ချိန်က လူသားယဇ်များကိုပူဇော်ခဲ့ပြီး (ယေ. ၇:၃၁) နောက်ပိုင်း ယေရုရှလင်မြို့၏အမှိုက်ပစ်သည့်နေရာဖြစ်လာသည့် ဟိန္နုံချိုင့် (ဂေဟင်နာ) ပတ်ဝန်းကျင်သို့” ထွက်သွားခြင်းကို ပရောဖက်က ရည်ညွှန်းနေပုံရသည်။ (The Jerome Biblical Commentary) ဟေရှာယ ၆၆:၂၄ ပါသရုပ်ဖော်ချက်မှာ ညှဉ်းဆဲခံနေရသည့်လူများကိုမဟုတ်ဘဲ လူသေကောင်များအကြောင်းကို ပြောနေခြင်းဖြစ်သည်မှာ ထင်ရှားသည်။ မသေသည့်အရာမှာ အသက်ရှင်သည့်လူသားများ သို့မဟုတ် မသေနိုင်သောဝိညာဉ်မဟုတ်ဘဲ ပိုးများကို ရည်ညွှန်းခြင်းဖြစ်သည်။ သို့ဆိုလျှင် ယေရှုစကားများ၏အဓိပ္ပာယ်မှာ အဘယ်နည်း။

စပိန်ကက်သလစ်စာအုပ်တစ်အုပ် (El evangelio de Marcos. Análisis lingüístico y comentario exegético, Volume Ii) တွင် မာကု ၉:၄၈ နှင့်ပတ်သက်သည့်မှတ်ချက်ကို သတိပြုပါ– “[ထို]စကားစုကို ဟေရှာယ (၆၆,၂၄) မှကောက်နုတ်ထားသည်။ ပရောဖက်သည် လူသေကောင်များကို ပျက်စီးစေသည့် နည်းလမ်းနှစ်ခုဖြစ်သော ပုပ်ပျက်ခြင်းနှင့် မီးရှို့ခြင်းကို ဖော်ပြခဲ့သည်။ . . . ကျမ်းချက်တွင် ပိုးနှင့်မီးကို ယှဉ်တွဲဖော်ပြထားခြင်းက ဖျက်ဆီးခြင်းအယူအဆကို ပို၍ခိုင်ခံ့စေသည်။ . . . အဖျက်စွမ်းအားနှစ်မျိုးစလုံးကို အစဉ်အမြဲ (မငြိမ်းနိုင်၊ မသေနိုင်) အနေဖြင့်ပုံဖော်ထားသည်၊ ၎င်းတို့ထံမှ လွတ်မြောက်ရာလမ်း မရှိပါ။ ထိုဖော်ပြချက်တွင် မပျောက်မပျက်ဘဲကျန်ရစ်သည့်အရာမှာ ပိုးနှင့်မီးသာဖြစ်သည်၊ လူမဟုတ်ပါ၊ ထို့ပြင် ၎င်းတို့၏ဖျက်ဆီးနိုင်စွမ်းအတွင်းသို့ကျရောက်လာသည့် မည်သည့်အရာကိုမဆို လုံးလုံးဖျက်ဆီးပစ်သည်။ ယင်းကြောင့် ထိုဖော်ပြချက်သည် ထာဝစဉ်ညှဉ်းဆဲခံရခြင်းကိုမဟုတ်ဘဲ လုံးလုံးဖျက်ဆီးခံရခြင်းကို ပုံဆောင်သည်၊ အဘယ်ကြောင့်ဆိုသော် ထိုကဲ့သို့ဖျက်ဆီးခံရသည့်အခါ ဘယ်သောအခါမျှ ပြန်ရှင်လာမည်မဟုတ်၊ ထိုသူတို့၏သေခြင်းသည် ထာဝစဉ်ဖြစ်သည်။ [မီး] သည် လုံးလုံးပျက်စီးသွားခြင်း၏ အမှတ်လက္ခဏာဖြစ်သည်။”

စစ်မှန်သောဘုရားသခင်သည် ချစ်ခြင်းမေတ္တာရှင်၊ တရားမျှတရှင်ဖြစ်ကြောင်း သိရှိသူမည်သူမဆိုသည် ယေရှု၏စကားများကို အထက်ဖော်ပြပါပုံစံအတိုင်း နားလည်ခြင်းသည် ကျိုးကြောင်းဆီလျော်လှကြောင်း သိမြင်နိုင်မည်။ ဆိုးသွမ်းသူများသည် ထာဝစဉ်ညှဉ်းဆဲခံရမည့်အကြောင်း ယေရှုပြောနေခြင်းမဟုတ်ခဲ့ပါ။ ယင်းအစား၊ ထိုသူတို့သည် ရှင်ပြန်ထမြောက်ခြင်းမျှော်လင့်ချက်မရှိသည့် လုံးလုံးဖျက်ဆီးခြင်း ခံရနိုင်စရာအကြောင်းရှိသည်။

[အောက်ခြေမှတ်ချက်များ]