သင်မှတ်မိသလော

မကြာသေးမီက ထုတ်ဝေခဲ့သော ကင်းမျှော်စင်စာစောင်များကို ဖတ်ရှုရ၍ တန်ဖိုးထားလေးမြတ်ခဲ့ပါသလော။ အောက်ပါမေးခွန်းများကို သင်ဖြေဆိုနိုင်၊ မဖြေဆိုနိုင် စမ်းကြည့်ပါ–

• ကျွန်ုပ်တို့သည် ခရစ်ယာန်သမာဓိစောင့်ထိန်းရန် အဘယ်ကြောင့်အလွန်အရေးကြီးသနည်း။

သမာဓိစောင့်ထိန်းခြင်းက ကျွန်ုပ်တို့သည် ယေဟောဝါ၏အကြွင်းမဲ့ပိုင်သအုပ်စိုးမှုဘက် မေတ္တာဖြင့်ရပ်တည်ပြီး စာတန်သည် မုသာကောင်ဖြစ်ကြောင်း သက်သေထူရာရောက်သည်။ ထို့ပြင် ကျွန်ုပ်တို့၏သမာဓိသည် ဘုရားသခင် ကျွန်ုပ်တို့ကိုတရားစီရင်နိုင်သည့်အခြေခံဖြစ်ပြီး ယင်းသည် ကျွန်ုပ်တို့၏အနာဂတ်မျှော်လင့်ချက်အတွက် မရှိမဖြစ်လိုအပ်ရာဖြစ်သည်။—၁၂/၁၅၊ စာမျက်နှာ ၄-၆။

• ဘုရားသခင့်ရည်ရွယ်တော်မူချက်တွင် ယေရှု၏ကဏ္ဍကိုဖော်ပြသည့် ဘွဲ့နာမအချို့မှာ အဘယ်နည်း။

တစ်ပါးတည်းသောသားတော်။ နှုတ်မြွက်တော်။ အာမင်။ ပဋိညာဉ်တရားသစ်၏ဖျန်ဖြေသူ။ ယဇ်ပုရောဟိတ်မင်းကြီး။ ကတိထားရာ အမျိုးအနွယ်။—၁၂/၁၅၊ စာမျက်နှာ ၁၅။

• ဧလိယသည် မိုးရွာသွန်းရန် ဆုတောင်းနေစဉ် မိမိကျွန်အား ပင်လယ်ဘက်ကြည့်စေခြင်းသည် အဘယ်ကြောင့်ထူးခြားသနည်း။ (၃ ရာ. ၁၈:၄၃-၄၅)

ဧလိယသည် ရေသံသရာကိုသိကြောင်း ဖော်ပြ၏။ မိုးတိမ်များသည် ပင်လယ်ထက်တွင် ငွေ့ရည်ဖွဲ့ကာ ကုန်းဘက်သို့ရွေ့ပြီး မိုးရွာသွန်းနိုင်သည်။—၁/၁၊ စာမျက်နှာ ၁၅-၁၆။

• ဓမ္မအမှုတွင်ခံစားရသော ကျွန်ုပ်တို့၏ရွှင်လန်းမှုကို မည်သို့တိုးစေနိုင်သနည်း။

ကျွန်ုပ်တို့သည် အခြားသူများကို မည်မျှကူညီပေးနိုင်ကြောင်း အာရုံစိုက်ခြင်းဖြင့် ကျွန်ုပ်တို့၏နှလုံးကို ပြင်ဆင်နိုင်သည်။ ကျမ်းစာသင်အံမှုများစတင်ရန်ရည်ရွယ်ချက်ဖြင့် ဟောပြောနိုင်သည်။ လျစ်လျူရှုမှုများ ရင်ဆိုင်ရပါက ကျွန်ုပ်တို့၏တင်ဆက်မှုကိုပြောင်းပြီး ရပ်ကွက်ရှိလူတို့စိတ်ဝင်စားသည့်အရာများကို ပြောဆိုနိုင်သည်။—၁/၁၅၊ စာမျက်နှာ ၈-၁၀။

• သမ္မာကျမ်းစာတွင်ဖော်ပြထားသော နူနာရောဂါသည် ယနေ့နူနာရောဂါအဖြစ်သိကြသည့် ရောဂါဖြစ်သလော။

နူနာရောဂါခေါ် ဗက်တီးရီးယားကူးစက်ရောဂါသည် သမ္မာကျမ်းစာခေတ်တွင် အမှန်ပင်ရှိခဲ့သည်။ (ဝတ်. ၁၃:၄၊ ၅) အဝတ်အစားများနှင့် အိမ်များတွင်စွဲတတ်သော နူနာအကြောင်းကိုလည်း သမ္မာကျမ်းစာတွင်ဖော်ပြသည်။ ယင်း “နူနာ” မှာမှိုတက်ခြင်း သို့မဟုတ် ဖားဥစွဲခြင်းတစ်မျိုးကို ရည်ညွှန်းခြင်းဖြစ်ပေမည်။ (ဝတ်. ၁၃:၄၇-၅၂)—၂/၁၊ စာမျက်နှာ ၁၉။

• သမ္မာကျမ်းစာသွန်သင်ချက်များက အသုဘအခမ်းအနားနှင့်ပတ်သက်၍ ခရစ်ယာန်တစ်ဦး၏သဘောထားအပေါ် မည်သို့သက်ရောက်သင့်သနည်း။

ခရစ်ယာန်တစ်ဦးသည် ချစ်ရသူသေဆုံးခြင်းကြောင့် ဝမ်းနည်းပူဆွေးမည်ဖြစ်သော်လည်း သေလွန်သူသည် အဘယ်အရာမျှမသိကြောင်း သိထားသည်။ သူ့ကို မယုံကြည်သူများဝေဖန်လျှင်ပင် သေလွန်သူသည် အသက်ရှင်သူတို့ကို လွှမ်းမိုးခြယ်လှယ်နိုင်သည်ဟူသော ယုံကြည်ချက်နှင့်ဆက်နွှယ်သည့် ဓလေ့ထုံးတမ်းများကို ရှောင်ကြဉ်သည်။ ခရစ်ယာန်အချို့သည် ပြဿနာများကိုရှောင်ရန် အသုဘအစီအစဉ်များနှင့်ပတ်သက်သော မိမိတို့၏ရပ်တည်ချက်ကို ရေးထားကြသည်။—၂/၁၅၊ စာမျက်နှာ ၂၉-၃၁။

• ကျွန်ုပ်တို့ပျော်ရွှင်ဖို့ဆိုလျှင် ဆာလံ ၁:၁ အရ အဘယ်အရာသုံးခုကို ရှောင်ကြဉ်ရမည်နည်း။

ယင်းအခန်းငယ်တွင် “မတရားသောသူတို့၏တိုက်တွန်းခြင်း၊” “လူဆိုးတို့၏လမ်း၊” “မထီမဲ့မြင်ပြုသောသူတို့၏ အစည်းအဝေး” တို့ကိုဖော်ပြသည်။ ကျွန်ုပ်တို့သည် ပျော်ရွှင်မှုခံစားနိုင်ရန် မထီမဲ့မြင်ပြုသူ သို့မဟုတ် ဘုရားသခင့်ပညတ်များကို လျစ်လျူရှုသူတို့အား ရှောင်ရှားဖို့လိုသည်။ ကျွန်ုပ်တို့သည် ယေဟောဝါ၏ပညတ်တရားတော်တွင် ပျော်မွေ့သင့်သည်။—၃/၁၊ စာမျက်နှာ ၁၇။

• “ယာရှာ၏စာ” နှင့် ‘ထာဝရဘုရားသခင်စစ်တိုက်စာ’ သည် ပျောက်ဆုံးသွားသော သမ္မာကျမ်းစာ,စာစောင်များလော။ (ယောရှု ၁၀:၁၃; တော. ၂၁:၁၄)

မဟုတ်ပါ။ ယင်းကျမ်းစောင်တို့သည် သမ္မာကျမ်းစာခေတ်တွင် တည်ရှိခဲ့ပြီး ကျမ်းရေးသူများ ရည်ညွှန်းခဲ့ကြသည့် မှုတ်သွင်းမခံရသောမှတ်တမ်းများဖြစ်ပုံရသည်။—၃/၁၅၊ စာမျက်နှာ ၃၂။

• ခေတ်သစ်လက်တင်ကျမ်းစာဘာသာပြန်ကျမ်းတွင် အဘယ်ထူးခြားသောပြောင်းလဲမှု ပြုလုပ်ထားသနည်း။

၁၉၇၉ ခုနှစ်တွင် ဒုတိယမြောက် ပုပ်ရဟန်းမင်းဂျွန်ပေါလ်သည် လက်တင်ဘာသာပြန်ကျမ်းသစ်ဖြစ်သော နိုဗာဗားလ်ဂါတာကို အတည်ပြုခဲ့သည်။ ပထမအကြိမ်ပုံနှိပ်ထုတ်ဝေသောအခါ အချို့နေရာများတွင် ဘုရားသခင့်နာမတော် ယောဝါ ပါရှိသည်။ (ထွ. ၃:၁၅; ၆:၃) သို့သော် ၁၉၈၆ ခုနှစ်တွင် ဒုတိယအကြိမ်တရားဝင်ပုံနှိပ်ထုတ်ဝေသောအခါ ယောဝါဟူသောဘုရားသခင့်နာမတော်နေရာတွင် ဒိုမီနပ်စ် [သခင်] ကို အစားထိုးလိုက်ကြသည်။—၄/၁၊ စာမျက်နှာ ၂၂။