သာ၍ကြီးမြတ်သောဒါဝိဒ်၊ သာ၍ကြီးမြတ်သောရှောလမုန်ဖြစ်သူယေရှုကို တန်ဖိုးထားလေးမြတ်ခြင်း

“ဤနေရာတွင်ကား ရှောလမုန်ထက် သာ၍ကြီးမြတ်သူရှိ၏။”—မ. ၁၂:၄၂။

၁၊ ၂။ ဒါဝိဒ်အား ဘုရင်အဖြစ်ဘိသိက်ပေးရန် ရှမွေလညွှန်ကြားခံရသည့်အခါ လူ့ရှုထောင့်မှကြည့်လျှင် အဘယ်ကြောင့်အံ့အားသင့်စရာဖြစ်သနည်း။

သူသည် ဘုရင်တစ်ပါးပုံစံမျိုး မထွက်ပါ။ ပရောဖက်ရှမွေလ၏အမြင်တွင် လူငယ်သိုးကျောင်းသားလေးထက် ဘာမျှမပိုပေ။ ထို့ပြင် သူ၏ဇာတိမြို့ဖြစ်သော ဗက်လင်မြို့သည် ထင်ရှားကျော်ကြားသောမြို့မဟုတ်ပါ။ ယင်းကို ‘ယုဒမြို့တို့တွင် မြို့ငယ်’ ဖြစ်သည်ဟု ဖော်ပြထားသည်။ (မိ. ၅:၂) သို့သော် မြို့ငယ်လေးတစ်မြို့မှ အရေးပါပုံမရသော ယင်းလူငယ်လေးသည် အနာဂတ်ဣသရေလဘုရင်အဖြစ် ပရောဖက်ရှမွေလ၏ ဘိသိက်ပေးမှုကို ခံရတော့မည်ဖြစ်သည်။

^၂ လူငယ်ဒါဝိဒ်သည် ဘိသိက်ပေးမှုကိုခံယူရန် ရှမွေလထံသို့ ဖခင်ဖြစ်သူယေရှဲ ဦးဆုံးခေါ်ဆောင်လာခဲ့သူမဟုတ်ပါ၊ ဒုတိယ သို့မဟုတ် တတိယအနေနှင့် ခေါ်ဆောင်ခံရသူလည်းမဟုတ်ပါ။ တည်ကြည်သူယေရှဲ၏ သားများထဲမှတစ်ဦးကို တိုင်းပြည်၏ နောက်တက်မည့်ဘုရင်အဖြစ်ဘိသိက်ပေးရန် ယေရှဲ၏အိမ်သို့ ရှမွေလရောက်ရှိချိန်တွင် ယေရှဲ၏သားရှစ်ယောက်တွင် အငယ်ဆုံးဖြစ်သောဒါဝိဒ်သည် အိမ်၌ ပင်မရှိချေ။ သို့သော် ဒါဝိဒ်သည် ယေဟောဝါရွေးချယ်သူဖြစ်ပြီး ယင်းသည် အရေးအကြီးဆုံးဖြစ်သည်။—၁ ရာ. ၁၆:၁-၁၀။

၃။ (က) ယေဟောဝါသည် လူတစ်ဦးတစ်ယောက်ကို စစ်ဆေးသည့်အခါ အဘယ်အရာကို အရေးအကြီးဆုံးအရာအဖြစ် ရှုမြင်သနည်း။ (ခ) ဒါဝိဒ်အားဘိသိက်ပေးပြီးနောက် သူ့အပေါ် အဘယ်အရာသက်ရောက်လာခဲ့သနည်း။

^၃ ရှမွေလမမြင်နိုင်သည့်အရာကို ယေဟောဝါမြင်တော်မူခဲ့သည်။ ဒါဝိဒ်၏နှလုံးအခြေအနေကို ဘုရားသခင်သိတော်မူခဲ့ပြီး ယင်းကို ကိုယ်တော်နှစ်သက်တော်မူခဲ့သည်။ ဘုရားသခင်အဖို့ အရေးအကြီးဆုံးမှာ အပြင်ပန်းအသွင်အပြင်မျှသာမဟုတ်ဘဲ အဘယ်လူစားမျိုးဖြစ်သည်ဟူသော အတွင်းစိတ်ဖြစ်သည်။ (၁ ဓမ္မရာဇဝင် ၁၆:၇ ကိုဖတ်ပါ။) ထို့ကြောင့် ယေဟောဝါသည် ယေရှဲ၏သားအကြီးခုနစ်ဦးကို မည်သူ့ကိုမျှမရွေးကြောင်း ရှမွေလသိသည့်အခါ အငယ်ဆုံးသားကို စားကျက်မှခေါ်ခဲ့ရန် တောင်းဆိုခဲ့သည်။ မှတ်တမ်းက ဤသို့ဆို၏– ယေရှဲသည် လူကို ‘စေလွှတ်၍ [ဒါဝိဒ်] ကိုခေါ်ခဲ့၏။ သူသည် နီသောဆံပင်ရှိ၏။ လှသောအဆင်းနှင့် ချစ်ဖွယ်သောမျက်နှာလည်းရှိ၏။ ယေဟောဝါက ဤသူပေတည်း။ ထ၍ဘိသိက်ပေးလော့ဟု မိန့်တော်မူ၏။ ရှမွေလသည်လည်း ဆီဘူးကိုယူ၍ သူ၏အစ်ကိုစုထဲမှာ သူ့ကိုဘိသိက်ပေးလေ၏။ ထိုနေ့မှစ၍ ယေဟောဝါ၏စွမ်းအားတော်သည် ဒါဝိဒ်အပေါ်မှာသက်ရောက်လေ၏။’—၁ ရာ. ၁၆:၁၂၊ ၁၃။

ဒါဝိဒ်သည် ခရစ်တော်၏ ရှေ့ပြေးပုံရိပ်ဖြစ်

၄၊ ၅။ (က) ဒါဝိဒ်နှင့်ယေရှု၏ ဆင်တူချက်အချို့ကိုဖော်ပြပါ။ (ခ) ယေရှုကို သာ၍ကြီးမြတ်သောဒါဝိဒ်ဟု အဘယ်ကြောင့် ခေါ်ဆိုနိုင်သနည်း။

^၄ ယေရှုသည် ဒါဝိဒ်ကဲ့သို့ပင် ဗက်လင်မြို့၌ မွေးဖွားခဲ့သည်၊ ဒါဝိဒ်မွေးပြီး နှစ်ပေါင်း ၁,၁၀၀ ခန့်တွင်ဖြစ်သည်။ လူအများ၏အမြင်တွင် ယေရှုသည်လည်း ဘုရင်တစ်ပါးပုံစံမျိုးမထွက်ပါ။ ကိုယ်တော်သည် ဣသရေလလူများစွာမျှော်လင့်ခဲ့သည့် ဘုရင်ပုံစံမျိုးမဟုတ်ခဲ့ပါ။ သို့တိုင် ဒါဝိဒ်ကဲ့သို့ပင် ကိုယ်တော်သည် ယေဟောဝါရွေးချယ်သူဖြစ်သည်။ ဒါဝိဒ်ကဲ့သို့ပင် ကိုယ်တော်သည် ယေဟောဝါနှစ်သက်မြတ်နိုးသူဖြစ်သည်။ * (လု. ၃:၂၂) ယေရှု၏အဖြစ်တွင်လည်း ‘ယေဟောဝါ၏စွမ်းအားတော်သည် ကိုယ်တော့်အပေါ်မှာ သက်ရောက်လေသည်။’

^၅ ဒါဝိဒ်နှင့်ယေရှုတွင် ဆင်တူချက်များစွာရှိသေးသည်။ ဥပမာ၊ ဒါဝိဒ်သည် မိမိ၏အကြံပေးအရာရှိ အဟိသောဖေလ၏ သစ္စာဖောက်မှုကိုခံခဲ့ရပြီး ယေရှုသည် မိမိ၏တမန်တော် ယုဒရှကာရုတ်၏သစ္စာဖောက်မှုကို ခံခဲ့ရသည်။ (ဆာ. ၄၁:၉; ယော. ၁၃:၁၈) ဒါဝိဒ်နှင့်ယေရှုနှစ်ဦးစလုံးသည် ယေဟောဝါအားဝတ်ပြုရာနေရာအတွက် စိတ်ထက်သန်ခဲ့ကြသည်။ (ဆာ. ၂၇:၄; ၆၉:၉; ယော. ၂:၁၇) ယေရှုသည် ဒါဝိဒ်၏အမွေခံလည်းဖြစ်သည်။ ယေရှုမမွေးဖွားမီ ကောင်းကင်တမန်က မယ်တော်အား ဤသို့ဆိုခဲ့၏– “သူ့အဖ ဒါဝိဒ်၏ရာဇပလ္လင်ကို ယေဟောဝါဘုရားသခင်သည် သူ့အားပေးတော်မူမည်။” (လု. ၁:၃၂; မ. ၁:၁) သို့သော် မေရှိယနှင့်ဆိုင်သောကတိတော်အားလုံး ယေရှုတွင်ပြည့်စုံသောကြောင့် ကိုယ်တော်သည် ဒါဝိဒ်ထက်သာ၍ကြီးမြတ်သည်။ ကိုယ်တော်သည် သာ၍ကြီးမြတ်သောဒါဝိဒ်၊ ကြာရှည်စွာမျှော်လင့်ခဲ့ကြသော မေရှိယဘုရင်ဖြစ်သည်။—ယော. ၇:၄၂။

သိုးထိန်း-ဘုရင်နောက် လိုက်ပါ

၆။ ဒါဝိဒ်သည် အဘယ်နည်းများဖြင့် သိုးထိန်းကောင်းတစ်ဦးဖြစ်ခဲ့သနည်း။

^၆ ယေရှုသည် သိုးထိန်းတစ်ဦးလည်းဖြစ်တော်မူ၏။ သိုးထိန်းကောင်းတစ်ဦး၏ သွင်ပြင်လက္ခဏာများမှာ အဘယ်နည်း။ မိမိ၏သိုးအုပ်ကို တည်ကြည်စွာ၊ သတ္တိရှိစွာ ထိန်းကျောင်း၊ ကျွေးမွေး၊ စောင့်ရှောက်သူဖြစ်သည်။ (ဆာ. ၂၃:၂-၄) ငယ်စဉ်အချိန်က ဒါဝိဒ်သည် သိုးထိန်းတစ်ဦးဖြစ်ပြီး ဖခင်၏သိုးများကို ကောင်းစွာကြည့်ရှုစောင့်ရှောက်ခဲ့သည်။ ခြင်္သေ့တစ်ကောင်နှင့် ဝံတစ်ကောင်သည် သိုးအုပ်ကိုရန်ပြုသည့်အခါ မိမိ၏အသက်အန္တရာယ်ရှိသည့်ကြားမှ သိုးတို့ကိုကာကွယ်ရန် ရဲစွမ်းသတ္တိရှိခဲ့သည်။—၁ ရာ. ၁၇:၃၄၊ ၃၅။

၇။ (က) ဘုရင်အဖြစ် မိမိ၏တာဝန်များအတွက် ဒါဝိဒ်ကို အဘယ်အရာက ပြင်ဆင်ပေးခဲ့သနည်း။ (ခ) ယေရှုသည် သိုးထိန်းကောင်းဖြစ်ကြောင်း မည်သို့သက်သေထူခဲ့သနည်း။

^၇ ကွင်းပြင်များတွင်နှင့် တောင်ကုန်းများတွင် သိုးတို့ကိုထိန်းကျောင်းရင်း ဒါဝိဒ်ကုန်လွန်ခဲ့သည့်နှစ်များသည် ဣသရေလလူမျိုးကို ထိန်းကျောင်းရာတွင်လိုအပ်သော တာဝန်ဝတ္တရားများအတွက် ပြင်ဆင်ပေးခဲ့သည်။ * (ဆာ. ၇၈:၇၀၊ ၇၁) ယေရှုသည်လည်း စံပြသိုးထိန်းကောင်းဖြစ်ကြောင်း သက်သေထူခဲ့သည်။ ကိုယ်တော်သည် မိမိ၏ “သိုးစုငယ်” နှင့် “အခြားသိုးများ” ကို ထိန်းကျောင်းရာတွင် ယေဟောဝါထံမှ ခွန်အားနှင့်လမ်းညွှန်မှုရယူသည်။ (လု. ၁၂:၃၂; ယော. ၁၀:၁၆) ထို့ကြောင့် ယေရှုသည် သိုးထိန်းကောင်းဖြစ်သည်။ ကိုယ်တော်သည် မိမိသိုးအုပ်ကို ကောင်းစွာသိကျွမ်းသောကြောင့် သိုးတို့ကို နာမည်ဖြင့်ခေါ်သည်။ မိမိ၏သိုးတို့ကို အလွန်ချစ်မြတ်နိုးသောကြောင့် ကိုယ်တော်သည် မြေကြီးပေါ်ရှိစဉ် သိုးတို့အကျိုးအတွက် လိုလိုလားလားစွန့်လွှတ်အနစ်နာခံခဲ့သည်။ (ယော. ၁၀:၃၊ ၁၁၊ ၁၄၊ ၁၅) သိုးထိန်းကောင်းအနေနှင့် ယေရှုသည် ဒါဝိဒ်ဘယ်တော့မှမပြုလုပ်နိုင်ရာကို ပြီးမြောက်အောင်ဆောင်ရွက်တော်မူ သည်။ ကိုယ်တော်၏ရွေးနုတ်ဖိုးပူဇော်ရာယဇ်သည် လူသားတို့အား အပြစ်မှလွတ်မြောက်ရန် လမ်းပွင့်ခဲ့သည်။ ကိုယ်တော်သည် “သိုးစုငယ်” ကို မသေနိုင်သောကောင်းကင်အသက်တာသို့ ထိန်းကျောင်းခေါ်ဆောင်ခြင်းကိုနှင့် ကိုယ်တော်၏ “အခြားသိုးများ” ကို ဝံပုလွေနှင့်တူသောသားရဲများရန်မှကင်းဝေးသည့် ဖြောင့်မတ်ခြင်းတည်ရာကမ္ဘာသစ်တွင် ထာဝရအသက်ရရန် ဦးဆောင်ခေါ်သွားခြင်းကို မည်သည့်အရာကမျှ ရပ်တန့်စေနိုင်မည်မဟုတ်ပါ။—ယောဟန် ၁၀:၂၇-၂၉ ကိုဖတ်ပါ။

အောင်မြင်လျက်ရှိသောဘုရင်နောက် လိုက်ပါ

၈။ ဒါဝိဒ်သည် အောင်မြင်သောဘုရင်တစ်ပါးဖြစ်ကြောင်း မည်သို့သက်သေထူခဲ့သနည်း။

^၈ ဘုရင်အနေနှင့် ဒါဝိဒ်သည် ဘုရားသခင့်လူမျိုး၏ပြည်တော်ကိုကာကွယ်ခဲ့သူ ရဲစွမ်းသတ္တိရှိသောစစ်သူရဲတစ်ဦးဖြစ်ခဲ့ပြီး ‘ဒါဝိဒ်သွားလေရာရာ၌ ယေဟောဝါစောင့်မတော်မူ၏။’ ဒါဝိဒ်၏ဦးဆောင်မှုအောက်တွင် နိုင်ငံနယ်နိမိတ်သည် အီဂျစ်မြစ်နားမှ ဥဖရတ်မြစ်နားတိုင်အောင် ကျယ်ဝန်းခဲ့သည်။ (၂ ရာ. ၈:၁-၁၄) ယေဟောဝါ၏ခွန်အားဖြင့် ဒါဝိဒ်သည် တန်ခိုးအကြီးမားဆုံးဘုရင်ဖြစ်လာခဲ့သည်။ သမ္မာကျမ်းစာက ဤသို့ဖော်ပြ၏– ‘ဒါဝိဒ်သတင်းသည် အတိုင်းတိုင်းအပြည်ပြည်တို့၌ နှံ့ပြား၍ ခပ်သိမ်းသောလူမျိုးတို့သည် သူ့ကိုကြောက်ရွံ့စေခြင်းငှာ ယေဟောဝါစီရင်တော်မူ၏။’—၅ ရာ. ၁၄:၁၇။

၉။ မင်းလောင်းအနေနှင့်ယေရှုသည် အောင်မြင်သူတစ်ဦးမည်သို့ဖြစ်သည်ကို ရှင်းပြပါ။

^၉ ဘုရင်ဒါဝိဒ်ကဲ့သို့ လူသားယေရှုသည် ရဲစွမ်းသတ္တိရှိသူဖြစ်သည်။ မင်းလောင်းအနေနှင့် ကိုယ်တော်သည် နတ်ဆိုးစွဲနေသူတို့ကို ကယ်လွှတ်ပေးခြင်းဖြင့် နတ်ဆိုးများအပေါ် မိမိ၏အခွင့်အာဏာကိုပြခဲ့သည်။ (မာ. ၅:၂၊ ၆-၁၃; လု. ၄:၃၆) အဓိကရန်သူဖြစ်သောစာတန်ပင်လျှင် ကိုယ်တော့်ကို မချုပ်ကိုင်နိုင်ခဲ့ပါ။ ယေဟောဝါ၏ထောက်မမှုဖြင့် ယေရှုသည် စာတန့်ဩဇာအောက်တွင်ရှိသော လောကကိုအောင်ခဲ့သည်။—ယော. ၁၄:၃၀; ၁၆:၃၃; ၁ ယော. ၅:၁၉။

၁၀၊ ၁၁။ ကောင်းကင်တွင် စစ်သူကြီးဘုရင်အဖြစ် ယေရှု၏အခန်းကဏ္ဍမှာ အဘယ်နည်း။

^၁၀ ယေရှုသေဆုံးကာ ရှင်ပြန်ထမြောက်ပြီးနောက် နှစ်ပေါင်း ၆၀ ခန့်အကြာတွင် ကောင်းကင်တွင်စစ်သူကြီးဘုရင်အနေနှင့် ယေရှု၏အခန်းကဏ္ဍဆိုင်ရာ ပရောဖက်ပြုချက်စိတ်အာရုံတစ်ခုကို တမန်တော်ယောဟန်ရရှိခဲ့သည်။ ယောဟန်ဤသို့ရေး၏– “ထိုအခါ ငါကြည့်လိုက်သော် မြင်းဖြူတစ်စီးကို ငါမြင်၏။ မြင်းစီးသူရဲသည် လေးကိုကိုင်ထား၏။ သူ့အားသရဖူကိုပေး၏။ သူသည် အောင်မြင်လျက်လည်းကောင်း၊ အပြီးအောင်မြင်ရန်လည်းကောင်း ထွက်သွားလေ၏။” (ဗျာ. ၆:၂) မြင်းဖြူစီးသူမှာ ယေရှုဖြစ်သည်။ ကောင်းကင်နိုင်ငံတော်တွင် ဘုရင်အဖြစ်နန်းတင်ခံရချိန် ၁၉၁၄ ခုနှစ်တွင် “သူ့အား သရဖူပေး” ခဲ့သည်။ ယင်းနောက် ‘သူသည် အောင်မြင်လျက် ထွက်သွားလေ၏။’ မှန်ပါသည် ဒါဝိဒ်ကဲ့သို့ပင် ယေရှုသည် အောင်မြင်သောဘုရင်ဖြစ်သည်။ ဘုရားသခင့်နိုင်ငံတော်တွင် ဘုရင်အဖြစ် ခန့်အပ်ခံရပြီးမကြာမီတွင် စာတန်ကိုအောင်နိုင်ခဲ့ပြီး စာတန်နှင့် သူ၏နတ်ဆိုးများကို မြေကြီးသို့ပစ်ချခဲ့သည်။ (ဗျာ. ၁၂:၇-၉) ကိုယ်တော်၏အောင်ပွဲခံစီးနင်းမှုသည် စာတန်၏ဆိုးညစ်သောစနစ်ကို အပြီးအပိုင်ဖျက်ဆီးခြင်းဖြင့် “အပြီးအောင်မြင်” သည်အထိ ဆက်၍စီးနင်းမည်ဖြစ်သည်။—ဗျာ. ၁၉:၁၁၊ ၁၉-၂၁ ကိုဖတ်ပါ။

^၁၁ သို့သော် ဒါဝိဒ်ကဲ့သို့ပင် ယေရှုသည် ထောက်ထားစာနာတတ်သောဘုရင်ဖြစ်ပြီး အာမဂေဒုန်တစ်လျှောက် “လူအုပ်ကြီး” ကိုကာကွယ်တော်မူမည်။ (ဗျာ. ၇:၉၊ ၁၄) ထို့ပြင် ယေရှုနှင့် ကိုယ်တော်၏တွဲဖက်အမွေခံများဖြစ်ပြီး ရှင်ပြန်ထမြောက်ပြီဖြစ်သော ၁၄၄,၀၀၀ တို့၏ အုပ်ချုပ်မှုအောက်တွင် “ဖြောင့်မတ်သောသူ၊ မဖြောင့်မတ်သောသူတို့သည် ရှင်ပြန်ထမြောက်” ကြပါလိမ့်မည်။ (တ. ၂၄:၁၅) မြေကြီးပေါ်ရှင်ပြန်ထမြောက်လာကြသူတို့သည် ထာဝရအသက်ရှင်ရန် အလားအလာရှိကြမည်။ အလွန်ကောင်းမွန်သောအနာဂတ် စောင့်ကြိုလျက်ရှိသည်။ ကျွန်ုပ်တို့အားလုံးသည် ‘ကောင်းသောအကျင့်ကို’ ဆက်၍ကျင့်ကြရန် သန္နိဋ္ဌာန်ချနိုင်ကြပါစေ၊ သို့မှသာ သာ၍ကြီးမြတ်သောဒါဝိဒ်၏အုပ်ချုပ်မှုအောက် ဖြောင့်မတ်၊ ပျော်ရွှင်သောလက်အောက်ခံများ ပြည့်နေသည့်ကမ္ဘာတွင် အသက်ရှင်နိုင်ကြမည်။—ဆာ. ၃၇:၂၇-၂၉။

ဉာဏ်ပညာပေးရန် ရှောလမုန်၏ဆုတောင်းချက် ဖြေကြားခံရ

၁၂။ ရှောလမုန်သည် အဘယ်အရာတောင်းဆိုခဲ့သနည်း။

^၁၂ ဒါဝိဒ်၏သားရှောလမုန်သည်လည်း ယေရှု၏ရှေ့ပြေးပုံရိပ်ဖြစ်ခဲ့သည်။ * ရှောလမုန်ဘုရင်ဖြစ်လာသည့်အခါ ယေဟောဝါသည် အိပ်မက်တွင်ထင်ရှားလျက် သူတောင်းဆိုရာမှန်သမျှကိုပေးမည်ဖြစ်ကြောင်း မိန့်တော်မူခဲ့သည်။ ရှောလမုန်သည် စည်းစိမ်ဥစ္စာနှင့် တန်ခိုးပိုရှိရန် သို့မဟုတ် အသက်ပိုရှည်ရန် တောင်းဆိုနိုင်ခဲ့သည်။ သို့သော် သူသည် ကိုယ်ကျိုးမရှာဘဲ ယေဟောဝါအား ဤသို့တောင်းဆိုခဲ့၏– “အကျွန်ုပ်သည် ဤလူတို့ရှေ့မှာ ထွက်ဝင်နိုင်မည်အကြောင်း ဉာဏ်ပညာကို ပေးသနားတော်မူပါ။ ဤမျှလောက်များစွာသော ကိုယ်တော်၏လူတို့ကို အဘယ်သူသည် ကိုယ်အလိုအလျောက် တရားစီရင်နိုင်ပါမည်နည်း။” (၆ ရာ. ၁:၇-၁၀) ရှောလမုန်၏ဆုတောင်းချက်ကို ယေဟောဝါဖြေကြားခဲ့သည်။—၂ ရာဇဝင်ချုပ် ၁:၁၁၊ ၁၂ ကိုဖတ်ပါ။

၁၃။ ရှောလမုန်၏ဉာဏ်ပညာသည် မည်သို့ပြိုင်ဘက်ကင်းသနည်း၊ ယင်း၏ရင်းမြစ်မှာ အဘယ်နည်း။

 ^၁၃ ယေဟောဝါအပေါ် ရှောလမုန် တည်ကြည်သည်ကာလပတ်လုံး ရှောလမုန်၏ပညာရှိစကားများသည် သူ၏တစ်ခေတ်တည်းသားများအလယ်တွင် ပြိုင်ဘက်ကင်းခဲ့သည်။ ရှောလမုန်သည် ‘ပညာရှိစကားသုံးထောင်’ ပြောခဲ့သည်။ (၃ ရာ. ၄:၃၀၊ ၃၂၊ ၃၄) ယင်းတို့ထဲမှများစွာကို စာဖြင့်ရေးသားထားပြီး ပညာရှာမှီးလိုသူတို့အတွက် ယနေ့ထက်တိုင် အဖိုးတန်ဆဲဖြစ်သည်။ ရှေဘမိဖုရားသည် “နက်နဲခက်ခဲသောပြဿနာအားဖြင့်” ရှောလမုန်၏ပညာကိုစုံစမ်းရန် မိုင် ၁,၅၀၀ ခန့်ရှိသောခရီးကို နှင်လာခဲ့သည်။ သူသည် ရှောလမုန်ပြောဆိုရာနှင့် ရှောလမုန်နိုင်ငံ၏စည်းစိမ်တို့ကြောင့် စိတ်စွဲမှတ်ခဲ့သည်။ (၃ ရာ. ၁၀:၁-၉) ရှောလမုန်ဉာဏ်ပညာ၏ရင်းမြစ်ကို သမ္မာကျမ်းစာက ဤသို့ဖော်ပြ၏– “ရှောလမုန်၏နှလုံး၌ ဘုရားသခင်သွင်းပေးတော်မူသောပညာကို မြေကြီးသားအပေါင်းတို့သည် ကြားရအံ့သောငှာ မျက်နှာတော်ကိုဖူးလာကြ၏။”—၃ ရာ. ၁၀:၂၄။

ပညာရှိဘုရင်နောက် လိုက်ပါ

၁၄။ အဘယ်နည်းများဖြင့် ယေရှုသည် “ရှောလမုန်ထက် သာ၍ကြီးမြတ်သူ” ဖြစ်သနည်း။

^၁၄ လူသားတို့ထဲတွင် ဉာဏ်ပညာအရာ၌ ရှောလမုန်ထက် ထင်ရှားစွာသာလွန်သူ တစ်ဦးတည်းရှိသည်။ ထိုသူမှာ မိမိကိုယ်ကို “ရှောလမုန်ထက် သာ၍ကြီးမြတ်သူ” ဟုဆိုခဲ့သော ယေရှုခရစ်ဖြစ်သည်။ (မ. ၁၂:၄၂) ယေရှုသည် “ထာဝရအသက်နှင့်ဆိုင်သောစကား” ကိုပြောဆိုခဲ့သည်။ (ယော. ၆:၆၈) ဥပမာ၊ တောင်ပေါ်တရားတော်တွင် ရှောလမုန်၏ပညာရှိစကားများထဲမှ တချို့မူများကို အကျယ်ချဲ့တင်ပြထားသည်။ ယေဟောဝါအားဝတ်ပြုကိုးကွယ်သူတစ်ဦး ပျော်ရွှင်မှုရရှိစေသည့် အရာများစွာကို ရှောလမုန်ဖော်ပြခဲ့သည်။ (သု. ၃:၁၃; ၈:၃၂၊ ၃၃; ၁၄:၂၁; ၁၆:၂၀) စစ်မှန်သောပျော်ရွှင်မှုသည် ယေဟောဝါအားဝတ်ပြုကိုးကွယ်ခြင်း၊ ဘုရားသခင့်ကတိတော်များပြည့်စုံခြင်းနှင့် ဆက်နွှယ်သည့်အရာများကြောင့်သာရရှိကြောင်း ယေရှုအလေးပေးဖော်ပြခဲ့သည်။ ကိုယ်တော်ဤသို့မိန့်တော်မူခဲ့၏– “ဘုရားသခင်ကို မှီခိုရန်လိုကြောင်း သိမှတ်သူတို့သည် ပျော်ရွှင်ကြ၏။ အကြောင်းမူကား ကောင်းကင်နိုင်ငံတော်သည် ထိုသူတို့၏နိုင်ငံဖြစ်၏။” (မ. ၅:၃) ယေရှု၏သွန်သင်ချက်များတွင်တွေ့ရသောမူများကို လက်တွေ့ကျင့်သုံးသူတို့သည် “အသက်စမ်းရေတွင်း” သို့မဟုတ် အသက်၏ပင်ရင်းအမြစ်ဖြစ်သော ယေဟောဝါနှင့်ရင်းနှီးလာကြသည်။ (ဆာ. ၃၆:၉; သု. ၂၂:၁၁; မ. ၅:၈) ခရစ်တော်သည် “ဘုရားသခင်၏ဉာဏ်ပညာတော်” ကိုကိုယ်စားပြုသည်။ (၁ ကော. ၁:၂၄၊ ၃၀) မေရှိယဘုရင်အနေနှင့် ယေရှုခရစ်တွင် ‘ဉာဏ်ပညာကိုပေးသောစွမ်းအားတော်’ ရှိသည်။—ဟေရှာ. ၁၁:၂။

၁၅။ ဘုရားသခင်ထံကလာသောဉာဏ်ပညာမှ ကျွန်ုပ်တို့မည်သို့ အကျိုးရရှိနိုင်သနည်း။

^၁၅ သာ၍ကြီးမြတ်သောရှောလမုန်၏ နောက်လိုက်များအနေနှင့် ကျွန်ုပ်တို့သည် ဘုရားသခင်ထံကလာသော ဉာဏ်ပညာမှ မည်သို့အကျိုးရရှိနိုင်သနည်း။ ကိုယ်တော်၏နှုတ်မြွက်တော်တွင် ယေဟောဝါ၏ဉာဏ်ပညာဖော်ပြထားသောကြောင့် ကျွန်ုပ်တို့သည် သမ္မာကျမ်းစာကို၊ အထူးသဖြင့် မှတ်တမ်းတင်ထားသောယေရှု၏စကားများကို ဂရုတစိုက်လေ့လာခြင်း၊ ဖတ်ရှုရာကို တွေးတောဆင်ခြင်ခြင်းဖြင့် ဉာဏ်ပညာရှာတွေ့ရန် ကြိုးစားအားထုတ်ရမည်။ (သု. ၂:၁-၅) ထို့ပြင် ဉာဏ်ပညာပေးရန် ဘုရားသခင်ထံ စွဲစွဲမြဲမြဲတောင်းဆိုဖို့လိုသည်။ ကျွန်ုပ်တို့သည် စိတ်ရင်းမှန်နှင့် အကူအညီတောင်းဆိုသည်ကို ဖြေကြားခံရမည်ဖြစ်ကြောင်း ဘုရားသခင့်နှုတ်မြွက်တော်က အာမခံသည်။ (ယာ. ၁:၅) သန့်ရှင်းသောစွမ်းအားတော်အကူအညီဖြင့် ကျွန်ုပ်တို့သည် ဘုရားသခင့်နှုတ်မြွက်တော်တွင်ပါသော အဖိုးထိုက်ဉာဏ်ပညာကို ရှာတွေ့မည်ဖြစ်ပြီး ယင်းက အခက်အခဲများကို ရင်ဆိုင်ဖြေရှင်းရန်နှင့် ပညာရှိဆုံးဖြတ်ချက်များချရန် အထောက်အကူပြုနိုင်သည်။ (လု. ၁၁:၁၃) ရှောလမုန်အား “အသိပညာကိုဆက်လက်သွန်သင်သည့်” “စုစည်းသူ” ဟုလည်းခေါ်ဆိုထားသည်။ (ဒေ. ၁၂:၉၊ ၁၀၊ ကဘ) ခရစ်ယာန်အသင်းတော်၏ဦးခေါင်းဖြစ်သော ယေရှုသည်လည်း မိမိလူမျိုးကိုစုစည်းသူဖြစ်သည်။ (ယော. ၁၀:၁၆; ကော. ၁:၁၈) ထို့ကြောင့် ကျွန်ုပ်တို့ကို “ဆက်လက်သွန်သင်” လျက်ရှိသည့် အသင်းတော်အစည်းအဝေးများကို တက်ရောက်ဖို့သင့်လျော်လှသည်။

၁၆။ ရှောလမုန်နှင့် ယေရှုတွင် အဘယ်ဆင်တူချက်ရှိသနည်း။

^၁၆ ရှောလမုန်သည် အလွန်အလုပ်လုပ်သော ဘုရင်တစ်ပါးဖြစ်သည်။ နိုင်ငံတစ်ဝန်း ဆောက်လုပ်ရေးအစီအစဉ်ကို စီစဉ်ဖွဲ့စည်းခဲ့ပြီး နန်းတော်များ၊ လမ်းများ၊ ရေသွယ်စနစ်များ၊ ဘဏ္ဍာတော်သိုထားသောမြို့များ၊ ရထားတော်ထိန်းသောမြို့များ၊ မြင်းတော်ကျွေးသောမြို့များတည်ဆောက်ရာတွင် ကြီးကြပ်ခဲ့သည်။ (၃ ရာ. ၉:၁၇-၁၉) တစ်နိုင်ငံလုံးသည် သူ၏ဆောက်လုပ်ရေးလုပ်ငန်းမှ အကျိုးရရှိ ခဲ့သည်။ ယေရှုသည်လည်း တည်ဆောက်သူဖြစ်ခဲ့သည်။ ကိုယ်တော်သည် အသင်းတော်ကို “ကျောက်ဆောင်” ပေါ်တည်ဆောက်ခဲ့သည်။ (မ. ၁၆:၁၈) ကိုယ်တော်သည် ကမ္ဘာသစ်တွင်လုပ်ဆောင်မည့် ဆောက်လုပ်ရေးလုပ်ငန်းကိုလည်း ကြီးကြပ်တော်မူမည်။—ဟေရှာ. ၆၅:၂၁၊ ၂၂။

ငြိမ်သက်ခြင်းမင်းနောက်လိုက်ပါ

၁၇။ (က) ရှောလမုန်အုပ်ချုပ်မှု၏ ထူးခြားသောသွင်ပြင်လက္ခဏာတို့မှာ အဘယ်နည်း။ (ခ) ရှောလမုန်သည် အဘယ်အရာကို မလုပ်ဆောင်နိုင်ခဲ့သနည်း။

^၁၇ ရှောလမုန်အမည်သည် “ငြိမ်သက်ခြင်း” အဓိပ္ပာယ်ရှိသော ရင်းမြစ်မှ ဆင်းသက်လာသည်။ ဘုရင်ရှောလမုန်သည် “နှစ်ဆသောငြိမ်သက်ခြင်းပိုင်ဆိုင်ရာ” ဟုအဓိပ္ပာယ်ရှိသော ယေရုရှလင်မြို့မှ အုပ်ချုပ်ခဲ့သည်။ သူ၏အနှစ် ၄၀ အုပ်ချုပ်ချိန်တွင် ဣသရေလနိုင်ငံသည် ပြိုင်နှိုင်းစရာမရှိသည့် ငြိမ်သက်အေးချမ်းမှုဖြင့် ထင်ရှားခဲ့သည်။ ယင်းနှစ်များနှင့်ပတ်သက်၍ သမ္မာကျမ်းစာက ဤသို့ဆို၏– “လက်ထက်တော်ကာလပတ်လုံး ယုဒအမျိုးနှင့် ဣသရေလအမျိုးသားတို့သည် ဒန်မြို့မှစ၍ ဗေရရှေဘမြို့တိုင်အောင် အသီးအသီးမိမိစပျစ်ပင်၊ မိမိသင်္ဘောသဖန်းပင်အောက်မှာ ငြိမ်ဝပ်စွာနေရကြ၏။” (၃ ရာ. ၄:၂၅) သို့တိုင် ရှောလမုန်သည် မိမိ၏ဉာဏ်ပညာဖြင့် မိမိ၏လက်အောက်ခံတို့အား ဖျားနာမှု၊ အပြစ်နှင့်သေခြင်းအနှောင်အဖွဲ့မှ မလွတ်မြောက်စေနိုင်ခဲ့ပါ။ သို့သော် သာ၍ကြီးမြတ်သောရှောလမုန်သည် မိမိ၏လက်အောက်ခံတို့အား ယင်းတို့အားလုံးမှ လွတ်မြောက်စေမည်။—ရောမ ၈:၁၉-၂၁ ကိုဖတ်ပါ။

၁၈။ ခရစ်ယာန်အသင်းတော်တွင် အဘယ်အခြေအနေ၌ ကျွန်ုပ်တို့ပျော်မွေ့နေကြသနည်း။

^၁၈ ယခုအချိန်၌ပင် ကျွန်ုပ်တို့သည် ခရစ်ယာန်အသင်းတော်တွင် ငြိမ်သက်မှုခံစားကြရသည်။ မှန်ပါသည်၊ ကျွန်ုပ်တို့သည် စစ်မှန်သောဝတ်ပြုရေးနှင့်ဆိုင်သည့်ပရဒိသုတွင် ပျော်မွေ့နေကြသည်။ ကျွန်ုပ်တို့သည် ဘုရားသခင်နှင့်အပြင် လူသားချင်းနှင့် အသင့်အတင့်ရှိကြသည်။ ယနေ့ကျွန်ုပ်တို့ခံစားနေရသည့် အခြေအနေနှင့်ပတ်သက်၍ ဟေရှာယပရောဖက်ပြုထားသည်ကို သတိပြုကြည့်ပါ– “သူတို့ဓားလက်နက်များကို ထွန်သွားဖြစ်စေခြင်းငှာလည်းကောင်း၊ လှံများကို တံစဉ်ဖြစ်စေခြင်းငှာလည်းကောင်း ထုလုပ်ကြလိမ့်မည်။ တစ်ပြည်ကိုတစ်ပြည်စစ်မတိုက်၊ စစ်အတတ်ကိုလည်း နောက်တစ်ဖန်မသင်ရကြ။” (ဟေရှာ. ၂:၃၊ ၄) ကျွန်ုပ်တို့သည် ဘုရားသခင့်စွမ်းအားတော်နှင့်အညီ ပြုမူကြခြင်းဖြင့် ယင်းငြိမ်သက်မှုကို တိုးပွားစေကြသည်။

၁၉၊ ၂၀။ ကျွန်ုပ်တို့တွင် ရွှင်လန်းဝမ်းမြောက်ရန် အဘယ်အကြောင်းရင်းများရှိသနည်း။

^၁၉ သို့ရာတွင် အနာဂတ်သည် ပို၍ပင်ကောင်းမွန်ပါလိမ့်မည်။ နာခံမှုရှိသောလူသားတို့သည် ယေရှု၏အုပ်ချုပ်မှုအောက်တွင် ပြိုင်နှိုင်းစရာမရှိသည့်အတိုင်းအတာဖြင့် ငြိမ်သက်ပျော်ရွှင်ကြကာ သူတို့သည် လူ့စုံလင်ခြင်းသို့မရောက်မချင်း “ဖောက်ပြန်ပျက်စီးခြင်း အနှောင်အဖွဲ့မှ” တဖြည်းဖြည်း “လွတ်မြောက်” ကြမည်။ (ရော. ၈:၂၁) အနှစ်တစ်ထောင်အုပ်ချုပ်ချိန်အဆုံး၊ နောက်ဆုံးစမ်းသပ်မှုကို ကျော်လွန်သွားပြီးနောက် “စိတ်နှိမ့်ချသောသူတို့မူကား ပြည်တော်ကိုအမွေခံ၍ များပြားသောငြိမ်သက်ခြင်း၌ မွေ့လျော်ကြလိမ့်မည်။” (ဆာ. ၃၇:၁၁; ဗျာ. ၂၀:၇-၁၀) မှန်ပါသည်၊ ခရစ်တော်ယေရှု၏အုပ်ချုပ်မှုသည် ကျွန်ုပ်တို့မြင်ယောင်၍မရနိုင်သေးသော နည်းလမ်းများဖြင့် ရှောလမုန်ထက်သာလွန်မည်။

^၂၀ ဣသရေလလူမျိုးသည် မောရှေ၊ ဒါဝိဒ်နှင့် ရှောလမုန်တို့၏ ဦးစီးမှုအောက်တွင် ရွှင်လန်းဝမ်းမြောက်စရာ အကြောင်းကောင်းများရှိခဲ့သကဲ့သို့ ကျွန်ုပ်တို့သည် ခရစ်တော်၏အုပ်ချုပ်မှုအောက်တွင် ပို၍ပင်ရွှင်လန်းဝမ်းမြောက်စရာအကြောင်းရင်းများရှိသည်။ (၃ ရာ. ၈:၆၆) သာ၍ကြီးမြတ်သောမောရှေ၊ ဒါဝိဒ်နှင့် ရှောလမုန်ဖြစ်သည့် မိမိ၏တစ်ပါးတည်းသောသားတော်ကို ကျွန်ုပ်တို့အဖို့ စီစဉ်ပေးမှုအတွက် ကျွန်ုပ်တို့အားလုံး ယေဟောဝါအား ကျေးဇူးတင်ကြသည်။

[အောက်ခြေမှတ်ချက်များ]

သင်ရှင်းပြနိုင်သလော

• ယေရှုသည် မည်သို့အားဖြင့် သာ၍ကြီးမြတ်သောဒါဝိဒ်ဖြစ်သနည်း။

• ယေရှုသည် မည်သို့အားဖြင့် သာ၍ကြီးမြတ်သောရှောလမုန်ဖြစ်သနည်း။

• သာ၍ကြီးမြတ်သောဒါဝိဒ်၊ သာ၍ကြီးမြတ်သောရှောလမုန်လည်းဖြစ်သူကို အဘယ်ကြောင့် သင်တန်ဖိုးထားလေးမြတ်သနည်း။

[လေ့လာရန်မေးခွန်းများ]

[စာမျက်နှာ ၃၁ ပါ ရုပ်ပုံ]

ဘုရားသခင်ပေးသော ရှောလမုန်၏ ဉာဏ်ပညာက သာ၍ကြီးမြတ်သော ရှောလမုန်၏ ဉာဏ်ပညာကို ပုံရိပ်ပြခြင်းဖြစ်

[စာမျက်နှာ ၃၂ ပါ ရုပ်ပုံ]

ယေရှု၏အုပ်ချုပ်မှုသည် ကျွန်ုပ်တို့မြင်ယောင်၍မရနိုင်သေးသော နည်းလမ်းများဖြင့် ရှောလမုန်၊ ဒါဝိဒ်၏အုပ်ချုပ်မှုထက် သာလွန်မည်