ကောင်းကင်တမန်များ—‘အမှုထမ်းရန် စေလွှတ်ခံရသော ဝိညာဉ်သတ္တဝါများ’

‘ကောင်းကင်တမန်များသည် ကယ်တင်ခြင်းရမည့်သူတို့အတွက် အမှုထမ်းရန် စေလွှတ်ခံရသော ဝိညာဉ်သတ္တဝါများ ဖြစ်သည်မဟုတ်လော။’—ဟေဗြဲ ၁:၁၄။

၁။ မဿဲ ၁၈:၁၀ နှင့် ဟေဗြဲ ၁:၁၄ မှအဘယ်နှစ်သိမ့်မှုရယူနိုင်သနည်း။

ယေရှုခရစ်သည် မိမိ၏နောက်လိုက်များကို ထိမိလဲမိစေနိုင်သည့် မည်သူမဆိုအား ဤသို့သတိပေးခဲ့၏– “ဤသူငယ်တစ်ယောက်ကို မထီမဲ့မြင် မပြုမိစေကြနှင့်။ သူတို့၏ကောင်းကင်တမန်တို့သည် ကောင်းကင်ဘုံရှိ ငါ့အဖ၏မျက်နှာတော်ကို အစဉ်မပြတ်ဖူးမြင်ကြ၏။” (မ. ၁၈:၁၀) ဖြောင့်မတ်သောကောင်းကင်တမန်များကို ရည်ညွှန်းကာ တမန်တော်ပေါလု ဤသို့ရေးခဲ့၏– ‘ထိုကောင်းကင်တမန်များသည် ကယ်တင်ခြင်းရမည့်သူတို့အတွက် အမှုထမ်းရန် စေလွှတ်ခံရသော ဝိညာဉ်သတ္တဝါများ ဖြစ်သည်မဟုတ်လော။’ (ဟေဗြဲ ၁:၁၄) ယင်းစကားများက ဘုရားသခင်သည် လူသားတို့ကိုကူညီရန် ကောင်းကင်သတ္တဝါများကို အသုံးပြုတော်မူကြောင်း နှစ်သိမ့်မှုဖြစ်စေသည့်အာမခံချက်တစ်ခုဖြစ်သည်။ ကောင်းကင်တမန်များနှင့်ပတ်သက်၍ သမ္မာကျမ်းစာက အဘယ်အရာဖော်ပြထားသနည်း။ သူတို့သည် ကျွန်ုပ်တို့ကို မည်သို့ကူညီကြသနည်း။ သူတို့၏ပုံသက်သေမှ ကျွန်ုပ်တို့ အဘယ်အရာသင်ယူနိုင်သနည်း။

၂၊ ၃။ ကောင်းကင်ဝိညာဉ်သတ္တဝါများ၏ တာဝန်တချို့မှာအဘယ်နည်း။

^၂ ကောင်းကင်တွင် တည်ကြည်သောကောင်းကင်တမန် သန်းနှင့်ချီရှိသည်။ သူတို့အားလုံးသည် ‘တန်ခိုးကြီး၍ အမိန့်တော်အတိုင်းဆောင်ရွက်’ ကြသည်။ (ဆာ. ၁၀၃:၂၀; ဗျာ. ၅:၁၁ ကိုဖတ်ပါ။) ဘုရားသခင်၏ ထိုဝိညာဉ်သတ္တဝါသားများတွင် ပင်ကိုစရိုက်လက္ခဏာများ၊ ဘုရားသခင့်အရည်အသွေးများနှင့် လွတ်လပ်စွာလုပ်ပိုင်ခွင့်တို့ရှိကြသည်။ သူတို့ကို အထူးဖွဲ့စည်းထားပြီး ဘုရားသခင့်အစီအစဉ်တွင် အဆင့်မြင့်အနေအထားများ၌ရှိကြကာ ကောင်းကင်တမန်မင်းမှာ မိက္ခေလ (ယေရှု၏ကောင်းကင်အမည်) ဖြစ်သည်။ (ဒံ. ၁၀:၁၃; ယု. ၉) “ဖန်ဆင်းရာအပေါင်းတို့တွင် သားဦး” ဖြစ်သောဤသူသည် ‘နှုတ်မြွက်တော်’ သို့မဟုတ် ဘုရားသခင်၏ပြောရေးဆိုခွင့်ရှိသူဖြစ်ပြီး အခြားအရာအားလုံးကိုဖန်ဆင်းရာတွင် ယေဟောဝါအသုံးပြုသူဖြစ်သည်။—ကော. ၁:၁၅-၁၇; ယော. ၁:၁-၃။

^၃ ကောင်းကင်တမန်မင်း၏အောက်တွင် သရပ်များရှိပြီး သူတို့သည် ယေဟောဝါ၏သန့်ရှင်းမှုကို ကြွေးကြော်ကြကာ ကိုယ်တော်၏လူမျိုးကို ဝိညာဉ်ရေးသန့်ရှင်းနေစေရန် အကူအညီပေးကြသည်။ ခေရုဗိမ်များလည်းရှိပြီး သူတို့သည် ကိုယ်တော်၏ပိုင်သအုပ်စိုးမှုကို ထောက်ခံသူများအဖြစ် အမှုဆောင်ကြသည်။ (က. ၃:၂၄; ဟေရှာ. ၆:၁-၃၊ ၆၊ ၇) အခြားကောင်းကင်တမန်များ သို့မဟုတ် သတင်းသယ်ဆောင်သူများသည် ဘုရားသခင့်အလိုတော်ကိုဆောင်ရာတွင် တာဝန်အမျိုးမျိုးရှိကြသည်။—ဟေဗြဲ ၁၂:၂၂၊ ၂၃။

၄။ မြေကြီးအုတ်မြစ်တည်ချိန်တွင် ကောင်းကင်တမန်တို့ မည်သို့ပြုမူခဲ့ကြသနည်း၊ လွတ်လပ်စွာလုပ်ပိုင်ခွင့်ကို တော်လျော်စွာအသုံးပြုခဲ့မည်ဆိုပါက လူသားတို့အတွက် အဘယ်အဓိပ္ပာယ်ရှိနိုင်သနည်း။

^၄ ‘မြေကြီးအုတ်မြစ်ကိုတည်’ ချိန်တွင် ကောင်းကင်တမန်အပေါင်းတို့သည် ဝမ်းမြောက်ရွှင်လန်းခဲ့ကြပြီး အာကာသတွင် ထူးခြားသောရတနာအလားဖြစ်သည့် မြေကြီးကို လူ့စံအိမ်အဖြစ်မွမ်းမံချိန်တွင် သူတို့သည် မိမိတို့တာဝန်ကို ရွှင်လန်းစွာလုပ်ဆောင်ခဲ့ကြသည်။ (ယောဘ  ၃၈:၄၊ ၇) ယေဟောဝါသည် လူသားကို “ကောင်းကင်တမန်များထက် အနည်းငယ်နိမ့်ကျ” စေသော်လည်း ကိုယ်တော့် “ပုံသဏ္ဌာန်” နှင့်ဖန်ဆင်းထားခြင်းဖြစ်၍ လူသားတို့သည် ဖန်ဆင်းရှင်၏မြင့်မားသောအရည်အသွေးများကို တင်ပြနိုင်စွမ်းရှိကြသည်။ (ဟေဗြဲ ၂:၇; က. ၁:၂၆) အာဒံနှင့်ဧဝသည် လွတ်လပ်စွာလုပ်ပိုင်ခွင့်ဆုကျေးဇူးကို တော်လျော်စွာအသုံးပြုခဲ့မည်ဆိုပါက သူတို့နှင့် သူတို့၏သားမြေးများသည် ယေဟောဝါ၏ အသိဉာဏ်ရှိသတ္တဝါများဖြင့်ဖွဲ့စည်းထားသည့် စကြဝဠာမိသားစုဝင်များအနေနှင့် ပရဒိသုစံအိမ်တွင် ပျော်မွေ့ခံစားနိုင်ကြမည်ဖြစ်သည်။

၅၊ ၆။ ကောင်းကင်တွင် အဘယ်ပုန်ကန်မှုဖြစ်ခဲ့ပြီး ဘုရားသခင် မည်သို့တုံ့ပြန်ခဲ့သနည်း။

^၅ သန့်ရှင်းသောကောင်းကင်တမန်တို့သည် ဘုရားသခင့်မိသားစုတွင် ပုန်ကန်မှုစတင်သည်ကို မြင်ရသည့်အခါ ထိတ်လန့်တုန်လှုပ်ခဲ့ကြမည်မှာ သေချာသည်။ သူတို့ထဲမှတစ်ပါးသည် ကိုးကွယ်ခံလိုစိတ်ကြောင့် ယေဟောဝါအားချီးမွမ်းခြင်းတွင် မပျော်မွေ့တော့ပါ။ ယေဟောဝါ၏အုပ်စိုးပိုင်ထိုက်မှုကို သံသယဖြစ်စေခဲ့ပြီး ပြိုင်ဘက်အုပ်စိုးရှင်ဖြစ်ရန် ရည်မှန်းချက်ကြီးစွာ ကြိုးစားလုပ်ဆောင်ခဲ့ခြင်းဖြင့် မိမိကိုယ်ကို (“ဆန့်ကျင်သူ” ဟုအဓိပ္ပာယ်ရသော) စာတန်ဖြစ်စေခဲ့သည်။ ဦးဆုံးမှတ်တမ်းတင်ထားသော မုသာစကားဖြင့် စာတန်သည် မေတ္တာပြည့်ဝသည့်ဖန်ဆင်းရှင်အား ပုန်ကန်ရာတွင် မိမိနှင့်အတူပူးပေါင်းရန် ပထမလူသားမောင်နှံကို စဉ်းလဲစွာသွေးဆောင်ခဲ့သည်။—က. ၃:၄၊ ၅; ယော. ၈:၄၄။

^၆ ယေဟောဝါသည် ဦးဆုံးကျမ်းစာပရောဖက်ပြုချက်ကို ဖော်ပြခြင်းဖြင့် စာတန်ကို အလျင်အမြန်တရားစီရင်ခဲ့သည်– “သင်နှင့်မိန်းမကိုလည်းကောင်း၊ သင်၏အမျိုးအနွယ်နှင့် မိန်းမ၏အမျိုးအနွယ်ကိုလည်းကောင်း ငါသည် ရန်ငြိုးဖွဲ့စေမည်။ သူသည် သင်၏ခေါင်းကိုကြိတ်လိမ့်မည်၊ သင်သည်သူ၏ဖနောင့်ကိုကြိတ်လိမ့်မည်။” (က. ၃:၁၅) စာတန်နှင့် ဘုရားသခင့် “မိန်းမ” ကြားတွင် ရန်ငြိုးတည်ရှိနေမည်ဖြစ်သည်။ မှန်ပါသည်၊ ယေဟောဝါသည် တည်ကြည်သောဝိညာဉ်သတ္တဝါများပါရှိသည့် ကောင်းကင်အဖွဲ့အစည်းကို ခင်ပွန်းသည်အလားဖြစ်သောကိုယ်တော်နှင့် နှောင်ကြိုးတွယ်လျက်ရှိသော ချစ်မြတ်နိုးရသည့်ဇနီးတစ်ဦးအဖြစ် ရှုမြင်ခဲ့သည်။ ယင်းပရောဖက်ပြုချက်၏ အသေးစိတ်အချက်အလက်များသည် တဖြည်းဖြည်းဖွင့်ပြမည့် “မြင့်မြတ်သောလျှို့ဝှက်ချက်” အဖြစ်တည်ရှိမည်ဖြစ်သော်လည်း ယင်းသည် မျှော်လင့်ချက်အတွက် သေချာသောအခြေခံဖြစ်သည်။ ဘုရားသခင့်ရည်ရွယ်ချက်မှာ ဘုရားသခင့်ကောင်းကင်အဖွဲ့အစည်းအဝင်မှတစ်ဦးသည် ပုန်ကန်မှုအားလုံးကို ချေဖျက်မည်ဖြစ်ကာ “ကောင်းကင်ပေါ်ရှိအရာများနှင့် မြေကြီးပေါ်ရှိအရာများ” ကိုပြန်လည်စုစည်းမည်။—ဧ. ၁:၈-၁၀။

၇။ နောဧခေတ်တွင် ကောင်းကင်တမန်အချို့သည် အဘယ်အရာပြုလုပ်ခဲ့ကြသနည်း၊ သူတို့အဘယ်အကျိုးဆက်ခံရသနည်း။

^၇ နောဧခေတ်တွင် ကောင်းကင်တမန်အမြောက်အမြားသည် မြေကြီးပေါ်တွင် တစ်ကိုယ်ကောင်းဆန်သောပျော်ရွှင်မှုကို လိုက်စားရန် မိမိတို့၏ “နေသင့်ရာအရပ်” ကိုစွန့်ကာ အသွေးအသားကိုယ်ခန္ဓာကို ဖန်တီးယူခဲ့ကြသည်။ (ယု. ၆; က. ၆:၁-၄) ယေဟောဝါသည် ထိုပုန်ကန်သူတို့ကို မှောင်မိုက်ရာအရပ်တွင်ပစ်ထားရာ သူတို့သည် စာတန်နှင့်ပူးပေါင်းခြင်းဖြင့် “နတ်ဆိုးများ၊” ဘုရားသခင့်ကျေးကျွန်များ၏ ရက်စက်ကြမ်းကြုတ်သည့်ရန်သူများ ဖြစ်လာကြသည်။—ဧ. ၆:၁၁-၁၃; ၂ ပေ. ၂:၄။

ကောင်းကင်တမန်များ ကျွန်ုပ်တို့ကို မည်သို့ကူညီကြသနည်း

၈၊ ၉။ ယေဟောဝါသည် လူတို့ကိုကူညီရန် ကောင်းကင်တမန်များကို မည်သို့အသုံးပြုခဲ့သနည်း။

^၈ အာဗြဟံ၊ ယာကုပ်၊ မောရှေ၊ ယောရှု၊ ဟေရှာယ၊ ဒံယေလ၊ ယေရှု၊ ပေတရု၊ ယောဟန်နှင့် ပေါလုတို့သည် ကောင်းကင်တမန်တို့၏ ကြည့်ရှုပြုစုမှုခံရသူတို့ထဲတွင် ပါဝင်ကြသည်။ ဖြောင့်မတ်သောကောင်းကင်တမန်များသည် ဘုရားသခင့်တရားစီရင်ချက်များကို လုပ်ဆောင်ပေးခဲ့ကြသည်၊ မောရှေပညတ်အပါအဝင် ပရောဖက်ပြုချက်များ၊ လမ်းညွှန်ချက်များကို ကြားသိစေခဲ့ကြသည်။ (၄ ရာ. ၁၉:၃၅; ဒံ. ၁၀:၅၊ ၁၁၊ ၁၄; တ. ၇:၅၃; ဗျာ. ၁:၁) ယခု ကျွန်ုပ်တို့သည် ဘုရားသခင့်နှုတ်မြွက်တော်အပြည့်အစုံကို ရရှိထားပြီဖြစ်သောကြောင့် ဘုရားသခင့်သတင်းစကားများကိုသယ်ပို့ပေးဖို့ ကောင်းကင်တမန်များ လိုအပ်တော့မည်မဟုတ်ပါ။ (၂ တိ. ၃:၁၆၊ ၁၇) သို့သော် မျက်မြင်မရနယ်ပယ်မှနေ၍ ကောင်းကင်တမန်များသည် ဘုရားသခင့်အလိုတော်ဆောင်ရွက်ရာတွင်နှင့် ကိုယ်တော့်ကျေးကျွန်များကိုထောက်မရာတွင် အလုပ်များလျက်ရှိကြသည်။

^၉ သမ္မာကျမ်းစာက ကျွန်ုပ်တို့ကို ဤသို့အာမခံထား၏– ‘ယေဟောဝါကိုကြောက်ရွံ့သောသူတို့ပတ်လည်၌ ကောင်းကင်တမန်တော်တို့သည် တပ်ချ၍ ကယ်လွှတ်တတ်ကြ၏။’ (ဆာ. ၃၄:၇; ၉၁:၁၁) စာတန်ပေါ်ပေါက်စေခဲ့သော သမာဓိစောင့်သိခြင်းဆိုင်ရာအရေးကိစ္စကြောင့် ယေဟောဝါသည် စမ်းသပ်မှုအမျိုးမျိုးကို ကျွန်ုပ်တို့ကြုံတွေ့ရန် ခွင့်ပြုထားသည်။ (လု. ၂၁:၁၆-၁၉) သို့သော် ကျွန်ုပ်တို့သည် စမ်းသပ်မှုတစ်ခုကို မည်သည့်အတိုင်းအတာတစ်ခုအထိခံရပ်ခဲ့ပြီဆိုလျှင် ဘုရားသခင်အပေါ် ဆက်၍တည်ကြည်မည်ကို ကိုယ်တော်သိတော်မူ၏။ (၁ ကောရိန္သု ၁၀:၁၃ ကိုဖတ်ပါ။) ကောင်းကင်တမန်များသည် ဘုရားသခင့်အလိုတော်နှင့်အညီကြားဝင်ရန် အမြဲနိုးနိုးကြားကြားရှိကြသည်။ သူတို့သည် ရှာဒရက်၊ မေရှက်၊ အဗေဒနေဂေါ၊ ဒံယေလနှင့် ပေတရုတို့ကို ကယ်တင်ခဲ့သော်လည်း သတေဖန်နှင့်ယာကုပ်ကို ရန်သူတို့လက်ချက်ဖြင့် မသေဆုံးစေရန် မဆီးတားခဲ့ကြပါ။ (ဒံ. ၃:၁၇၊ ၁၈၊ ၂၈; ၆:၂၂; တ. ၇:၅၉၊ ၆၀; ၁၂:၁-၃၊ ၇၊ ၁၁) အခြေအနေများ၊ ကိစ္စရပ်များသည် မတူကြပါ။ အလားတူပင် ကျွန်ုပ်တို့၏ညီအစ်ကိုအချို့သည် နာဇီချွေးတပ်စခန်းများ၌ အသတ်ခံခဲ့ကြရသည်၊ သို့သော် အများစုကိုမူ အသက်ရှင်လွတ်မြောက်ရန် ယေဟောဝါကူညီခဲ့သည်။

၁၀။ ကောင်းကင်တမန်အကူအညီအပြင် အဘယ်အကူအညီကို ကျွန်ုပ်တို့ရရှိနိုင်သနည်း။

 ^၁၀ လူတိုင်းတွင် ကိုယ်စောင့်ကောင်းကင်တမန်တစ်ပါးရှိသည်ဟူ၍ သမ္မာကျမ်းစာတွင် မသွန်သင်ထားပါ။ “အလိုတော်နှင့်အညီ ငါတို့တောင်းသမျှကို [ဘုရားသခင်] နားညောင်းတော်မူကြောင်း” ကျွန်ုပ်တို့ယုံကြည်စိတ်ချကြသည်။ (၁ ယော. ၅:၁၄) ယေဟောဝါသည် ကျွန်ုပ်တို့ကို အကူအညီပေးရန် ကောင်းကင်တမန်တစ်ပါးကို စေလွှတ်နိုင်သည်မှာမှန်သော်လည်း အကူအညီသည် တခြားနည်းဖြင့်လာနိုင်ပါသည်။ အကူအညီနှင့်နှစ်သိမ့်မှုပေးရန် ခရစ်ယာန်ချင်းများ လှုံ့ဆော်ခံရနိုင်သည်။ “စာတန်၏တမန်” ကြောင့်ခံစားရသည့် “ကိုယ်၌စူးသောဆူး” ကိုရင်ဆိုင်ဖြေရှင်းရာတွင် လိုအပ်သည့်ဉာဏ်ပညာနှင့် အတွင်းခွန်အားကို ဘုရားသခင်ပေးပေမည်။—၂ ကော. ၁၂:၇-၁၀; ၁ သက်. ၅:၁၄။

ယေရှုကိုတုပပါ

၁၁။ ယေရှုအားထောက်ကူရန် ကောင်းကင်တမန်များကို မည်သို့အသုံးပြုခဲ့သနည်း၊ ကိုယ်တော်သည် ဘုရားသခင်အပေါ်တည်ကြည်ခြင်းဖြင့် အဘယ်အရာကို ပြီးမြောက်အောင်မြင်စေခဲ့သနည်း။

^၁၁ ယေရှု၏အဖြစ်တွင် ကောင်းကင်တမန်များအား ယေဟောဝါအသုံးပြုပုံကို သုံးသပ်ကြည့်ပါ။ ယေရှုမွေးဖွားခြင်း၊ ရှင်ပြန်ထမြောက်ခြင်းကို သူတို့ကြေညာခဲ့ကြပြီး ယေရှုမြေကြီးပေါ်ရှိစဉ် ကိုယ်တော်ကို သူတို့ကြည့်ရှုပြုစုခဲ့ကြသည်။ ကိုယ်တော်အဖမ်းခံရခြင်းနှင့် ရက်ရက်စက်စက်သေဆုံးခြင်းကို ကောင်းကင်တမန်များ ဆီးတားနိုင်ပါသည်။ သို့သော် ယင်းသို့ပြုမည့်အစား ကိုယ်တော့်ကိုအားပေးရန် ကောင်းကင်တမန်တစ်ပါး စေလွှတ်ခံခဲ့ရသည်။ (မ. ၂၈:၅၊ ၆; လု. ၂:၈-၁၁; ၂၂:၄၃) ယေဟောဝါ၏ရည်ရွယ်ချက်နှင့်အညီ ယေရှုသည် ပူဇော်ရာယဇ်အနေနှင့်သေဆုံးခဲ့ပြီး စုံလင်သောလူသားသည် ပြင်းထန်သည့်စမ်းသပ်မှုကြုံရသည့်ကြားမှ ဘုရားသခင်အပေါ် သမာဓိစောင့်ထိန်းနိုင်ကြောင်း သက်သေပြခဲ့သည်။ ထို့ကြောင့် ယေဟောဝါသည် ယေရှုကို မသေနိုင်သောကောင်းကင်အသက်တာသို့ ရှင်ပြန်ထမြောက်ပေးခဲ့ပြီး ကိုယ်တော်အား “အခွင့်အာဏာရှိသမျှ” ကိုအပ်နှင်းခဲ့ရာ ကောင်းကင်တမန်များသည် ကိုယ်တော့်ကို လက်အောက်ခံကြသည်။ (မ. ၂၈:၁၈; တ. ၂:၃၂; ၁ ပေ. ၃:၂၂) သို့ဖြင့် ယေရှုသည် ဘုရားသခင့် “မိန်းမ” ၏ “အမျိုးအနွယ်” အဓိကအပိုင်းဖြစ်ကြောင်း သက်သေထူခဲ့သည်။—က. ၃:၁၅; ဂလ. ၃:၁၆။

၁၂။ ယေရှု၏မျှတမှုရှိသောပုံသက်သေကို အဘယ်နည်းဖြင့် ကျွန်ုပ်တို့တုပနိုင်သနည်း။

^၁၂ ပညာမဲ့စွာပြုမူပြီး ကောင်းကင်တမန်များ မိမိအားကယ်တင်ရန်မျှော်လင့်ခြင်းဖြင့် ယေဟောဝါအားစမ်းသပ်ခြင်းသည်မှားကြောင်း ယေရှုသိတော်မူခဲ့သည်။ (မဿဲ ၄:၅-၇ ကိုဖတ်ပါ။) သို့ဖြစ်၍ ကျွန်ုပ်တို့သည် နှိပ်စက်ညှဉ်းပန်းမှုကို သတ္တိရှိရှိရင်ဆိုင်ကြသည့်တိုင် မလိုလားအပ်သောစွန့်စားမှုများမပြုဘဲ ‘သမာသတိရှိရှိ’ နေထိုင်ခြင်းဖြင့် ယေရှု၏ပုံသက်သေကို တုပကြစို့။—တိ. ၂:၁၂။

တည်ကြည်သောကောင်းကင်တမန်များထံမှ သင်ယူနိုင်ရာ

၁၃။ ၂ ပေတရု ၂:၉-၁၁ တွင်ဖော်ပြထားသည့် ဖြောင့်မတ်သောကောင်းကင်တမန်တို့၏ပုံသက်သေမှ အဘယ်အရာသင်ယူနိုင်သနည်း။

^၁၃ ယေဟောဝါဘိသိက်ပေးထားသော  ကျေးကျွန်များအား “ရင့်ရင့်သီးသီးပြောဆို” သူတို့ကို အပြစ်ဖော်ပြဆုံးမရာတွင် ဖြောင့်မတ်သောကောင်းကင်တမန်တို့၏ ပုံသက်သေကောင်းကို တမန်တော်ပေတရု ဖော်ပြ၏။ ကောင်းကင်တမန်တို့သည် တန်ခိုးကြီးမားကြသည့်တိုင် ‘ယေဟောဝါကို လေးစားသောကြောင့်’ တရားစီရင်သည့်စွပ်စွဲချက်များပြောခြင်းကို နှိမ့်ချစွာရှောင်ကြဉ်ကြသည်။ (၂ ပေတရု ၂:၉-၁၁ ကိုဖတ်ပါ။) ကျွန်ုပ်တို့လည်း မတော်မလျော်စီရင်ခြင်းမပြုဘဲနေကာ အသင်းတော်ကိုကြည့်ရှုစောင့်ထိန်းရန် တာဝန်ရထားသူတို့ကိုလေးစားပြီး ကိစ္စရပ်များကို တရားသူကြီးချုပ်ဖြစ်သော ယေဟောဝါလက်ထဲအပ်ထားကြစို့။—ရော. ၁၂:၁၈၊ ၁၉; ဟေဗြဲ ၁၃:၁၇။

၁၄။ နှိမ့်ချမှုနှင့်ပတ်သက်၍ ကောင်းကင်တမန်တို့ထံမှ အဘယ်အရာသင်ယူနိုင်သနည်း။

^၁၄ ယေဟောဝါ၏ကောင်းကင်တမန်တို့သည် နှိမ့်ချစွာအသုံးတော်ခံခြင်းတွင် ကျွန်ုပ်တို့အဖို့ ပုံသက်သေကောင်းဖြစ်သည်။ ကောင်းကင်တမန်အချို့သည် လူတို့အား မိမိတို့၏အမည်ကိုပြောပြရန် ငြင်းဆိုခဲ့ကြသည်။ (က. ၃၂:၂၉; သူကြီး. ၁၃:၁၇၊ ၁၈) ကောင်းကင် တွင် ဝိညာဉ်သတ္တဝါ သန်းနှင့်ချီရှိသော်လည်း သမ္မာကျမ်းစာတွင် မိက္ခေလနှင့် ဂါဗြေလအမည်ကိုသာ ဖော်ပြထားသည်။ ယင်းက ကျွန်ုပ်တို့သည် ကောင်းကင်တမန်တို့အား အလွန်အကျွံဂုဏ်တင်ခြင်းမပြုရန် အကာအကွယ်ဖြစ်ပေမည်။ (လု. ၁:၂၆; ဗျာ. ၁၂:၇) တမန်တော်ယောဟန်သည် ကောင်းကင်တမန်တစ်ပါးရှေ့ ပျပ်ဝပ်ကိုးကွယ်သည့်အခါ သူက “သတိထားလော့။ ဤသို့မပြုနှင့်။ ငါသည် သင်နှင့် သင့်ညီအစ်ကိုပရောဖက်များ၊ ဤစာလိပ်၌ပါသောစကားများကို လိုက်နာသူများ၏ ကျွန်ချင်းသာဖြစ်၏” ဟုဆိုခဲ့သည်။ (ဗျာ. ၂၂:၈၊ ၉) ကျွန်ုပ်တို့သည် ဘုရားသခင်တစ်ပါးတည်းကိုသာ ဝတ်ပြုကိုးကွယ်ကာ ဆုတောင်းသင့်သည်။—မဿဲ ၄:၈-၁၀ ကိုဖတ်ပါ။

၁၅။ ကောင်းကင်တမန်တို့သည် သည်းခံမှုတွင် မည်သို့ပုံသက်သေပြကြသနည်း။

^၁၅ ကောင်းကင်တမန်တို့သည် သည်းခံမှုတွင်လည်း ပုံသက်သေပြကြသည်။ သူတို့သည် ဘုရားသခင်၏မြင့်မြတ်သောလျှို့ဝှက်ချက်ကို အလွန်စိတ်ဝင်စားခဲ့ကြသော်လည်း အားလုံးကို သူတို့မသိခဲ့ကြပါ။ “ကောင်းကင်တမန်များသည် ထိုအရာများကို စေ့စေ့ကြည့်ရှုလိုစိတ် ရှိကြ၏” ဟုသမ္မာကျမ်းစာကဆိုသည်။ (၁ ပေ. ၁:၁၂) သို့ဖြင့် သူတို့အဘယ်အရာပြုလုပ်ကြသနည်း။ “မျိုးပေါင်းစုံလင်လှသော ဉာဏ်ပညာတော်ကို အသင်းတော်အားဖြင့် သိစေ” သည့် ဘုရားသခင်သတ်မှတ်ထားချိန်အထိ စိတ်ရှည်စွာစောင့်ဆိုင်းခဲ့ကြသည်။—ဧ. ၃:၁၀၊ ၁၁။

၁၆။ ကျွန်ုပ်တို့၏အမူအကျင့်သည် ကောင်းကင်တမန်များအပေါ် မည်သို့သက်ရောက်မှုရှိနိုင်သနည်း။

^၁၆ စမ်းသပ်မှုခံနေရသည့် ခရစ်ယာန်များသည် ‘ကောင်းကင်တမန်တို့ရှေ့တွင် ပွဲဝင်သောသူများ ဖြစ်ကြ၏။’ (၁ ကော. ၄:၉) ကောင်းကင်တမန်တို့သည် ကျွန်ုပ်တို့၏ တည်ကြည်သည့်လုပ်ရပ်များကိုမြင်လျှင် ကြီးစွာစိတ်ကျေနပ်ကြပြီး အပြစ်သားတစ်ဦးနောင်တရလျှင်ပင် ဝမ်းမြောက်ကြသည်။ (လု. ၁၅:၁၀) ခရစ်ယာန်အမျိုးသမီးတို့၏ ဘုရားသခင်ကိုကြောက်ရွံ့သည့်အမူအကျင့်ကို ကောင်းကင်တမန်တို့ သတိပြုမိကြသည်။ “ကောင်းကင်တမန်တို့ကိုထောက်၍ မိန်းမသည် လက်အောက်ခံသည့်အထိမ်းအမှတ်အဖြစ် ခေါင်းကိုဖုံးအပ်၏” ဟုသမ္မာကျမ်းစာကဆိုသည်။ (၁ ကော. ၁၁:၃၊ ၁၀) မှန်ပါသည် ခရစ်ယာန်အမျိုးသမီးများနှင့် မြေကြီးပေါ်ရှိ ဘုရားသခင့်ကျေးကျွန်အားလုံးသည် သီအိုကရက်တစ်အစီအစဉ်နှင့်ဦးစီးမှုအတိုင်း လိုက်နာကြသည်ကို ကောင်းကင်တမန်တို့နှစ်သက်ကြသည်။ ထိုကဲ့သို့သောနာခံမှုသည် ဘုရားသခင်၏ ထိုကောင်းကင်သားများအဖို့ သင့်လျော်သည့်သတိပေးချက်ဖြစ်သည်။

ဟောပြောခြင်းလုပ်ငန်းကို ကောင်းကင်တမန်တို့ တက်ကြွစွာထောက်မကြ

၁၇၊ ၁၈။ ကောင်းကင်တမန်တို့သည် ဟောပြောခြင်းလုပ်ငန်းကို ထောက်မလျက်ရှိသည်ဟု အဘယ်ကြောင့်ပြောနိုင်သနည်း။

^၁၇ “သခင့်နေ့တော်” အတွင်းဖြစ်ပျက်လျက်ရှိသည့် ထူးခြားသည့်အခြင်းအရာတချို့တွင် ကောင်းကင်တမန်များ ပါဝင်ကြသည်။ ယင်းတို့တွင် ၁၉၁၄ ခုနှစ်၌ ဘုရားသခင့်နိုင်ငံတော်စတည်ထောင်ပြီး “မိက္ခေလနှင့် သူ၏ကောင်းကင်တမန်တို့” သည် စာတန်နှင့်သူ၏နတ်ဆိုးများကို ကောင်းကင်မှနှင်ချခြင်းပါဝင်သည်။ (ဗျာ. ၁:၁၀; ၁၁:၁၅; ၁၂:၅-၉)  ‘ကောင်းကင်အလယ်တွင် ကောင်းကင်တမန်တစ်ပါးပျံဝဲ’ နေသည်ကို တမန်တော်ယောဟန်မြင်တွေ့ခဲ့ပြီး ‘မြေကြီးပေါ်တွင်နေထိုင်သောသူတို့အားကြေညာရန် ထာဝရသတင်းကောင်း သူ၌ရှိသည်။’ ထိုကောင်းကင်တမန်က ‘ဘုရားသခင်အားကြောက်ရွံ့၍ တန်ခိုးတော်ကိုချီးမွမ်းကြလော့။ အကြောင်းမူကား ကိုယ်တော်တရားစီရင်တော်မူရာအချိန် ကျရောက်ပြီ။ ကောင်းကင်၊ မြေကြီး၊ ပင်လယ်နှင့် စမ်းရေများကို ပြုလုပ်တော်မူသောအရှင်အား ကိုးကွယ်ကြလော့’ ဟုကြွေးကြော်ခဲ့သည်။ (ဗျာ. ၁၄:၆၊ ၇) ထို့ကြောင့် ယေဟောဝါ၏ကျေးကျွန်များသည် တည်ထောင်ပြီးဖြစ်သော ဘုရားသခင့်နိုင်ငံတော်သတင်းကောင်းကို ဟောပြောရာတွင် စာတန်၏ပြင်းထန်သောဆန့်ကျင်မှုရှိသော်လည်း ကောင်းကင်တမန်တို့ ထောက်မနေသည်ကို ယုံကြည်စိတ်ချကြသည်။—ဗျာ. ၁၂:၁၃၊ ၁၇။

^၁၈ ကောင်းကင်တမန်တစ်ပါးသည် ဖိလိပ္ပုအား အီသီယိုးပီးယားအမတ်ထံသွားရန် ပြောဆိုလမ်းညွှန်ခဲ့သကဲ့သို့ ယနေ့ ကျွန်ုပ်တို့ကို စိတ်နှလုံးရိုးဖြောင့်သူတို့ထံသွားရန် ကောင်းကင်တမန်တို့သည် စကားဖြင့်လမ်းညွှန်မည်မဟုတ်ပါ။ (တ. ၈:၂၆-၂၉) သို့သော် မျက်မှောက်ခေတ်တွေ့ကြုံမှုများစွာက ကောင်းကင်တမန်များသည် မျက်မြင်မရနယ်ပယ်မှနေ၍ ဘုရားသခင့်နိုင်ငံတော်ဟောပြောခြင်းလုပ်ငန်းကို ထောက်မပေးနေပြီး “ထာဝရအသက်ကိုလိုလားသူ” တို့ထံလမ်းညွှန်လျက်ရှိကြောင်း ထင်ရှားသည်။ * (တ. ၁၃:၄၈) “စွမ်းအားတော်၏လမ်းပြမှုကိုခံယူ၍ အမှန်တရားနှင့်အညီ ခမည်းတော်ကိုကိုးကွယ်” လိုကြသူတို့ကိုရှာဖွေရာတွင် ကျွန်ုပ်တို့ဘက်မှ လုပ်ဆောင်နိုင်ရာကိုလုပ်ရန် ဓမ္မအမှုတွင်မှန်မှန်ပါဝင်ဖို့ အလွန်အရေးကြီးပေသည်။—ယော. ၄:၂၃၊ ၂၄။

၁၉၊ ၂၀။ “လောကစနစ်နိဂုံးပိုင်း” ကိုမှတ်သားဖော်ပြသည့် အဖြစ်အပျက်များတွင် ကောင်းကင်တမန်တို့သည် အဘယ်အပိုင်းမှပါဝင်ကြသနည်း။

^၁၉ ယေရှုက ကျွန်ုပ်တို့ခေတ်ကိုရည်ညွှန်းကာ “လောကစနစ်နိဂုံးပိုင်းတွင်” ကောင်းကင်တမန်တို့သည် “ဖြောင့်မတ်သူတို့အလယ်မှ ဆိုးညစ်သူတို့ကိုခွဲထုတ်” မည်ဟုမိန့်တော်မူခဲ့သည်။ (မ. ၁၃:၃၇-၄၃၊ ၄၉) ကောင်းကင်တမန်တို့သည် ဘိသိက်ပေးခြင်းခံရသူတို့ကို အပြီးသတ်စုသိမ်းခြင်းနှင့် တံဆိတ်ခတ်ခြင်းတို့တွင် ပါဝင်ကြသည်။ (မဿဲ ၂၄:၃၁ ကိုဖတ်ပါ; ဗျာ. ၇:၁-၃) ထို့ပြင် “သိုးနှင့်ဆိတ်တို့ကိုခွဲခြား” ချိန်တွင် ယေရှုသည် ကောင်းကင်တမန်တို့နှင့်အတူ ကြွလာမည်။—မ. ၂၅:၃၁-၃၃၊ ၄၆။

^၂၀ “သခင်ယေရှုသည် တန်ခိုးရှိသောကောင်းကင်တမန်များနှင့်အတူ ကောင်းကင်ဘုံမှပေါ်ထွန်းတော်မူသောအခါ” “ဘုရားသခင်ကိုမသိသောသူတို့နှင့် ငါတို့၏သခင်ယေရှုနှင့်ဆိုင်သော သတင်းကောင်းကို မနာယူသောသူ” အားလုံးကို ဖျက်ဆီးတော်မူမည်။ (၂ သက်. ၁:၆-၁၀) ထိုအဖြစ်အပျက်ကိုပင် ယောဟန်သည် စိတ်အာရုံ၌တွေ့မြင်ခဲ့ရာ ယေရှုနှင့်ကောင်းကင်တမန်ကောင်းကင်ဗိုလ်ခြေတို့သည် ဖြောင့်မတ်သောစစ်ပွဲကိုဆင်နွှဲရန် မြင်းဖြူများကိုစီးလျက် စစ်ချီနေကြသည်ဟု ဖော်ပြထား၏။—ဗျာ. ၁၉:၁၁-၁၄။

၂၁။ “လက်ထဲ၌ တွင်းနက်ကြီး၏သော့နှင့် သံကြိုးကြီးကိုကိုင်” ထားသောကောင်းကင်တမန်သည် စာတန်နှင့်သူ၏နတ်ဆိုးတို့ကို အဘယ်အရာပြုလုပ်မည်နည်း။

^၂၁ “ကောင်းကင်တမန်တစ်ပါးသည် လက်ထဲ၌ တွင်းနက်ကြီး၏သော့နှင့် သံကြိုးကြီးကိုကိုင်လျက် ကောင်းကင်မှဆင်းလာသည်ကို” လည်းယောဟန်မြင်ခဲ့သည်။ ယင်းကောင်းကင်တမန်မှာ ကောင်းကင်တမန်မင်း မိက္ခေလမှလွဲ၍ တခြားမည်သူမျှမဖြစ်နိုင်ပါ၊ သူသည် စာတန်ကိုဖမ်းဆီးပြီး တွင်းနက်ကြီးထဲသို့ပစ်ချမည်ဖြစ်ရာ ယင်းတွင် နတ်ဆိုးများလည်းပါမည်မှာ ထင်ရှားသည်။ စာတန်နှင့်နတ်ဆိုးတို့သည် ခရစ်တော်၏အနှစ်တစ်ထောင် အုပ်ချုပ်ချိန်ကုန်ဆုံးချိန်တွင် ခေတ္တလွတ်လာကြမည်ဖြစ်ပြီး စုံလင်ပြီဖြစ်သောလူသားတို့ကို နောက်ဆုံးစမ်းသပ်မည်။ ယင်းနောက် စာတန်နှင့် အခြားပုန်ကန်သူအားလုံး ဖျက်ဆီးခံရမည်။ (ဗျာ. ၂၀:၁-၃၊ ၇-၁၀; ၁ ယော. ၃:၈) ဘုရားသခင်အားပုန်ကန်သူအားလုံး ဖယ်ရှားခံရမည်။

၂၂။ ကောင်းကင်တမန်တို့သည် ရှေ့လက်တစ်ကမ်းတွင် မည်သို့ပါဝင်လုပ်ဆောင်ကြဦးမည်နည်း၊ သူတို့၏အခန်းကဏ္ဍနှင့်ပတ်သက်၍ ကျွန်ုပ်တို့စိတ်တွင် မည်သို့ဖြစ်ပေါ်သင့်သနည်း။

^၂၂ စာတန်၏ဆိုးသွမ်းသောလောကစနစ်မှ လွတ်မြောက်မှုကြီးသည် ရှေ့လက်တစ်ကမ်းတွင်ရှိသည်။ ယေဟောဝါ၏အကြွင်းမဲ့ပိုင်သအုပ်စိုးမှု သံသယကင်းရှင်းပြီး မြေကြီးနှင့်လူသားတို့အတွက် ကိုယ်တော်၏ရည်ရွယ်ချက် အပြီးသတ်ပြည့်စုံမည့် ယင်းအထူးအရေးပါသောအဖြစ်အပျက်များတွင် ကောင်းကင်တမန်တို့သည် အရေးကြီးသည့်အခန်းကဏ္ဍမှ ပါဝင်ကြမည်။ အမှန်ပင် ဖြောင့်မတ်သောကောင်းကင်တမန်တို့သည် ‘ကယ်တင်ခြင်းရမည့်သူတို့အတွက် အမှုထမ်းရန် စေလွှတ်ခံရသော ဝိညာဉ်သတ္တဝါများဖြစ်သည်။’ ထို့ကြောင့် ဘုရားသခင့်အလိုတော်ဆောင်ရန်နှင့် ထာဝရအသက်ရရန် ကျွန်ုပ်တို့ကိုအကူအညီပေးဖို့ ကောင်းကင်တမန်များကို ကိုယ်တော်အသုံးပြုသည့်နည်းအတွက် ယေဟောဝါဘုရားသခင်အား ကျေးဇူးတင်ကြပါစို့။

[အောက်ခြေမှတ်ချက်]

သင်မည်သို့ဖြေဆိုမည်နည်း

• ကောင်းကင်ဝိညာဉ်သတ္တဝါများကို မည်သို့ဖွဲ့စည်းထားသနည်း။

• နောဧခေတ်တွင် ကောင်းကင်တမန်တချို့ အဘယ်အရာ ပြုခဲ့ကြသနည်း။

• ဘုရားသခင်သည် ကျွန်ုပ်တို့ကိုကူညီရန် ကောင်ကင်တမန်တို့ကို မည်သို့အသုံးပြုသနည်း။

• ကျွန်ုပ်တို့ခေတ်တွင် ဖြောင့်မတ်သောကောင်းကင်တမန်တို့သည် အဘယ်အခန်းကဏ္ဍတွင်ပါဝင်နေကြသနည်း။

[လေ့လာရန်မေးခွန်းများ]

[စာမျက်နှာ ၂၁ ပါ ရုပ်ပုံ]

ကောင်းကင်တမန်တို့သည် ဘုရားသခင့်အလိုတော်ဆောင်ခြင်းတွင် ဝမ်းမြောက်ကြ

[စာမျက်နှာ ၂၃ ပါ ရုပ်ပုံ]

ဒံယေလ၏အဖြစ်တွင်ကဲ့သို့ ကောင်းကင်တမန်တို့သည် ဘုရားသခင့် အလိုတော်နှင့်အညီ ကြားဝင်ဆောင်ရွက်ရန် အစဉ်နိုးနိုးကြားကြားရှိကြ

[စာမျက်နှာ ၂၄ ပါ ရုပ်ပုံ]

ဘုရားသခင့်နိုင်ငံတော် ဟောပြောခြင်းလုပ်ငန်းကို ကောင်းကင်တမန်များထောက်မနေကြ၍ ရဲစွမ်းသတ္တိရှိပါ

[Credit Line]

Globe: NASA photo