နိုးကြား မှ အကျိုးရ

သင့်အသင်းတော်ရပ်ကွက်တွင် ဟောပြောဖို့ မမျှော်လင့်ဘဲပေါ်လာနိုင်သည့် အခွင့်အရေးများအတွက် နိုးနိုးကြားကြားရှိသလော။ ဖင်လန်နိုင်ငံ၊ သမိုင်းဝင်ဆိပ်ကမ်းဖြစ်သော တူရ်ကူမြို့ရှိ ခရစ်ယာန်ညီအစ်ကိုများသည် ယင်းအခွင့်အရေးမျိုးရရှိခဲ့ပြီး သူတို့၏နိုးကြားမှုမှ ရလဒ်ကောင်းများရရှိခဲ့သည်။

မကြာသေးမီအချိန်က တူရ်ကူမြို့ရှိ ညီအစ်ကိုများသည် မိမိတို့ဒေသရှိသင်္ဘောကျင်းတစ်ခုတွင် ဇိမ်ခံသင်္ဘောကြီးတစ်စင်းကို ဆောက်လုပ်ရန် ရောက်ရှိနေသော အာရှတိုက်သားများကို သတိပြုမိခဲ့ကြသည်။ နောက်ပိုင်း ထိုနိုင်ငံခြားသား အလုပ်သမားများတည်းခိုသည့် ဟိုတယ်ကို ညီအစ်ကိုတစ်ဦး သိရှိခဲ့သည်။ အလုပ်သမားများသည် မြို့ထဲရှိဟိုတယ်မှ ဆိပ်ကမ်းသို့ နံနက်စောစော ဘတ်စကားများဖြင့် သွားကြကြောင်းကိုလည်း သိရှိခဲ့ရသည်။ သူသည် တူရ်ကူရှိ အင်္ဂလိပ်စကားပြောအသင်းတော်မှ ညီအစ်ကိုများကို ချက်ချင်း အသိပေးခဲ့သည်။

နိုင်ငံခြားသားများစွာ ရောက်ရှိနေခြင်းက သူတို့ကို ဘုရားသခင့်နိုင်ငံတော်သတင်းဝေငှနိုင်သည့် မမျှော်လင့်ဘဲပေါ်လာသောအခွင့်အရေးဖြစ်ကြောင်း ထိုအသင်းတော်မှအကြီးအကဲများ တွေ့ရှိခဲ့ရာ အထူးကင်ပိန်းတစ်ခုပြုလုပ်ရန် အမြန်စီစဉ်ခဲ့ကြသည်။ ထိုအပတ် တနင်္ဂနွေနေ့ နံနက်ခုနစ်နာရီတွင် ကြေညာသူဆယ်ဦးသည် ဘတ်စကားမှတ်တိုင်အနီးတွင် စုဝေးခဲ့ကြ၏။ အစပိုင်းတွင် အလုပ်သမားတစ်ဦးမျှ ပေါ်မလာချေ။ ‘ငါတို့များ နောက်ကျသွားပြီလား။ သူတို့တွေ တူရ်ကူကနေ ပြန်သွားကြပြီလား’ ဟု ညီအစ်ကိုများ ဇဝေဇဝါဖြစ်ခဲ့ကြသည်။ သို့သော် မကြာမီ အလုပ်ဝတ်စုံဝတ်ထားသောအလုပ်သမားတစ်ဦး လမ်းထောင့်မှ ပေါ်လာသည်။ ထို့နောက် တစ်ယောက်ပြီးတစ်ယောက် ထွက်လာကြသည်။ မကြာမီ အလုပ်သမားအုပ်စုကြီးသည် ကားမှတ်တိုင်အနီးသို့ စုဝေးရောက်ရှိလာကြသည်။ ကြေညာသူများသည် အင်္ဂလိပ်စာပေများသုံးကာ အလုပ်သမားများကို ဟောပြောကြသည်။ အဆင်ပြေသွားသည်မှာ၊ အလုပ်သမားအားလုံး ဘတ်စကားပေါ်တွင်နေရာယူရန် တစ်နာရီမျှကြာသွားရာ သူတို့အများစုနှင့် စကားပြောရန် ညီအစ်ကိုများအတွက် အချိန်ရရှိသွားစေသည်။ ဘတ်စကားထွက်သွားသည့်အခါ အလုပ်သမားများနှင့်အတူ စာအုပ်ငယ် ၁၂၆ အုပ်နှင့် မဂ္ဂဇင်း ၃၂၉ စောင်ပါသွားသည်။

ယင်းရလဒ်ကောင်းများက ညီအစ်ကိုများအား တိုက်နယ်အပတ်ဖြစ်သော နောက်အပတ်တွင် ယင်းကင်ပိန်းကိုထပ်လုပ်ရန် အားပေးမှုဖြစ်စေသည်။ ထိုနေ့တွင်မိုးရွာနေပြီး နံနက် ခြောက်နာရီခွဲတွင် တိုက်နယ်ကြီးကြပ်မှူးသည် လယ်ကွင်းလုပ်ငန်းစုဆုံမှုပြုလုပ်ခဲ့ကာ ကြေညာသူ ၂၄ ဦးသည်ဘတ်စကားမှတ်တိုင်သို့ သွားကြသည်။ နိုင်ငံခြားသားများစွာသည် ဖိလစ်ပိုင်နိုင်ငံမှဖြစ်ကြောင်းသိရှိခဲ့ရာ ဤတစ်ကြိမ်တွင် တဂါးလော့ဘာသာစကားဖြင့် စာပေများကိုလည်း ယူဆောင်သွားကြသည်။ ယင်းနံနက်တွင် ဆိပ်ကမ်းသို့ ဘတ်စကားများထွက်ခွာသွားချိန်တွင် အလုပ်သမားများနှင့်အတူ စာအုပ်ကြီး ၇ အုပ်၊ စာအုပ်ငယ် ၆၉ အုပ်နှင့် မဂ္ဂဇင်း ၄၇၉ စောင်ပါသွားသည်။ ယင်းကင်ပိန်းတွင်ပါဝင်ခဲ့ကြသော ညီအစ်ကို၊ ညီအစ်မများ၏ ရွှင်လန်းမှုနှင့် စိတ်လှုပ်ရှားမှုကို မြင်ယောင်ကြည့်ပါ။

အလုပ်သမားများ မိမိတို့၏နေရင်းနိုင်ငံသို့မပြန်မီ ညီအစ်ကိုများသည် သူတို့တည်းခိုသောဟိုတယ်သို့ အကြိမ်ကြိမ်လည်ပတ်နိုင်ခဲ့ပြီး ဘုရားသခင့်နိုင်ငံတော်သတင်းကို ပို၍အသေးစိတ်ဝေမျှနိုင်ခဲ့ကြသည်။ အချို့အလုပ်သမားများက ယခင်အခြားနိုင်ငံများတွင် အလုပ်လုပ်စဉ် သက်သေခံများနှင့် တွေ့ဆုံဖူးကြောင်း ပြောပြကြသည်။ ဖင်လန်တွင်ရှိစဉ် မိမိတို့ကို အစပြုဆက်သွယ်ရန် ညီအစ်ကိုများ ကြိုးစားအားထုတ်ခဲ့သည့်အတွက် ကျေးဇူးတင်ကြောင်း ပြောကြသည်။

သင့်အသင်းတော်ရပ်ကွက်တွင် မမျှော်လင့်ဘဲပေါ်လာနိုင်သည့် အခွင့်အရေးများအတွက် နိုးနိုးကြားကြားရှိသလော။ နောက်ခံအမျိုးမျိုးရှိသူများထံ သတင်းကောင်းရောက်ရှိရန် သင်အစပြုလုပ်ဆောင်ပါသလော။ ထိုသို့ပြုမည်ဆိုလျှင် တူရ်ကူရှိညီအစ်ကိုများခံစားရသည့် ရွှင်လန်းမှုကို သင်လည်းခံစားရပေမည်။

[စာမျက်နှာ ၃၂ ပါမြေပုံ]

ဖင်လန်

ဟဲလ်စင်ကီ

တူရ်ကူ

[Credit Line]

STX Europe