ချိုင့်ဝှမ်းဒေသတစ်ခုမှာ ဘုရားသခင့်နာမကိုတွေ့ရ

စိန့်မောရစ်ဇ်ဆိုတာ ဆွစ်ဇာလန်နိုင်ငံရဲ့ နာမည်ကြီးအပန်းဖြေစခန်းတစ်ခုဖြစ်တယ်။ စိန့် မောရစ်ဇ်က အီတလီနယ်စပ်အနား ဆွစ်ဇာလန်နိုင်ငံရဲ့ အရှေ့တောင်ဘက်စွန်း နှင်းဖုံးအဲလ်ပ်တောင်တန်းကြား ရင်သပ်ရှုမောဖွယ်ကောင်းတဲ့ အဲန်းဂဒင်းချိုင့်ဝှမ်းမှာ တည်ရှိတယ်။ ဒီချိုင့်ဝှမ်းမှာ ဖန်ဆင်းရှင်ယေဟောဝါကို ချီးမွမ်းမှုဖြစ်စေတဲ့ သဘာဝရှုခင်းတွေ၊ အရောင်အသွေးအစုံစုံ၊ အလှတရားအဖုံဖုံရှိတဲ့ သစ်ပင်ပန်းမာန်နဲ့ တိရစ္ဆာန်မျိုးစိတ်များစွာရှိတဲ့ အမျိုးသားဥယျာဉ်လည်း ရှိတယ်။ (ဆာ. ၁၄၈:၇-၁၀) ၁၇ ရာစု အလယ်လောက်တုန်းကရှိခဲ့တဲ့ ရိုးရာယဉ်ကျေးမှုအကြွင်းအကျန်တွေ ရှိတဲ့နေရာလည်းဖြစ်တယ်။

ဒီချိုင့်ဝှမ်းမှာရှိတဲ့ အိမ်အတော်များများမှာ တွေ့ရတဲ့အရာတစ်ခုက သင့်အာရုံကို ဖမ်းစားပါလိမ့်မယ်။ အိမ်တံခါးမကြီးပေါ်မှာ၊ အိမ်မျက်နှာစာတွေမှာ ဘုရားသခင့်နာမ ရေးထိုးထားတာကို မြင်တွေ့နိုင်ပါတယ်။ အဲဒီ ၁၇ ရာစုတုန်းက အိမ်မျက်နှာစာတွေမှာ ဆေးနဲ့ရေးတာ၊ အင်္ဂတေပေါ်မှာရေးတာ၊  ကျောက်သားမှာရေးထွင်းတာက အစဉ်အလာဖြစ်ခဲ့တယ်။ ဘေဗာရွာက အိမ်တစ်အိမ်ရဲ့ပုံကို သင်တွေ့ရမယ်။ ရေးသားထားချက်ရဲ့ အဓိပ္ပာယ်က– “၁၇၁၅ ခုနှစ်တွင် တည်ဆောက်သည်။ ယေဟောဝါသည် အစဖြစ်သည်၊ ယေဟောဝါသည် အဆုံးဖြစ်သည်။ အရာခပ်သိမ်း ဘုရားသခင်ကြောင့်ဖြစ်တည်သည်၊ ကိုယ်တော်မပါဘဲ ဘယ်အရာမျှ မဖြစ်မြောက်နိုင်။” ဒီရေးထိုးထားချက်မှာ ဘုရားသခင့်နာမတော် နှစ်ကြိမ်ပါရှိတယ်။

အဲဒီထက်ပိုရှေးကျတဲ့ ရေးသားထားချက်ကို မဒူလန်ရွာမှာ တွေ့နိုင်တယ်။ အဓိပ္ပာယ်က– “ဆာလံ ၁၂၇။ ယေဟောဝါသည် အိမ်ကိုဆောက်တော်မမူလျှင် ဆောက်သောသူတို့သည် အချည်းနှီးလုပ်ဆောင်ကြ၏။ လူချီယပ်စ် ရူမီးဒီရပ်စ်။ ၁၆၅၄ ခုနှစ်တွင် တည်ဆောက်သည်။”

ဒီချိုင့်ဝှမ်းဒေသမှာ ဘုရားသခင့်နာမတော်ကို လူမြင်သာတဲ့နေရာမှာ ဘာကြောင့်ရေးခဲ့ကြတာလဲ။ ခရစ်ယာန်ဘာသာ ပြုပြင်ပြောင်းလဲရေးကာလတုန်းက အဲန်းဂဒင်းမှာ လက်တင်စကားကိုအခြေခံတဲ့ ရိုမန့်ခ်ျ ဘာသာစကားကိုပြောပြီး အဲဒီဘာသာစကားနဲ့ သမ္မာကျမ်းစာကို ထုတ်ဝေခဲ့တယ်။ ဒါက အဲဒီဘာသာစကားနဲ့ ထုတ်ဝေတဲ့ ပထမဆုံးကျမ်းစာဖြစ်တယ်။ ဒေသခံတွေက ကျမ်းစာဖတ်ရှုရာကနေ လှုံ့ဆော်ခံရတဲ့အတွက် သူတို့ရဲ့နာမည်ကိုသာမက ဘုရားသခင့်နာမတော်ပါတဲ့ ကျမ်းချက်တွေကို သူတို့ရဲ့အိမ်မျက်နှာစာတွေမှာ ရေးသားခဲ့ကြတယ်။

အဲဒီရေးသားထားချက်တွေက ရေးတဲ့အချိန်ကနေ ဒီနေ့အချိန်အထိ လူတွေ ယေဟောဝါရဲ့နာမတော်ကို သိရှိပြီး ချီးမွမ်းစေတယ်။ ဒီချိုင့်ဝှမ်းဒေသမှာ နေထိုင်တဲ့သူတွေရော အလည်အပတ်လာတဲ့သူတွေပါ ဘုရားသခင့်နာမတော်ရေးသားထားတဲ့ နောက်အဆောက်အဦတစ်ခုဖြစ်တဲ့ ဘေဗာရွာက ယေဟောဝါသက်သေတွေရဲ့ ဝတ်ပြုရာခန်းမကို လည်ပတ်ခြင်းအားဖြင့် ကြီးမြတ်တဲ့ဘုရားသခင် ယေဟောဝါအကြောင်း ပိုသင်ယူသိရှိနိုင်ပါတယ်။

[Picture Credit Line on page 7]

© Stähli Rolf A/​age fotostock