ကြိုးစားရကျိုးနပ်

မိသားစုဝတ်ပြုမှုနဲ့ ကျမ်းစာလေ့လာမှုဟာ ကလေးတွေကို ‘ယေဟောဝါ၏ ဆုံးမပဲ့ပြင်ခြင်းနှင့် စိတ်သဘောတော်အတိုင်း မွေးမြူ’ ရာမှာ မရှိမဖြစ်လိုအပ်တယ်။ (ဧ. ၆:၄) ဒါပေမဲ့ သင်ဟာ မိဘတစ်ဦးဖြစ်မယ်ဆိုရင် ကလေးတွေက အလွယ်တကူ ငြီးငွေ့တတ်တယ်ဆိုတာ သင်သိပါတယ်။ ကလေးတွေ စိတ်ဝင်စားအောင် သင်ဘယ်လိုလုပ်နိုင်သလဲ။ တချို့မိဘတွေ လုပ်ဆောင်ခဲ့ရာတွေကို သုံးသပ်ကြည့်ကြစို့။

အမေရိကန်နိုင်ငံ၊ ကယ်လီဖိုးနီးယားက ဂျော့ဂျ်က ဒီလိုပြောတယ်– “ကလေးတွေငယ်ငယ်တုန်းက ကျွန်တော်နဲ့ ကျွန်တော့်ဇနီးဟာ မိသားစုကျမ်းစာသင်အံမှုကို အမြဲအသစ်အဆန်းဖြစ်ဖို့ ကြိုးစားလုပ်ဆောင်ခဲ့ကြတယ်။ ကျွန်ုပ်၏ကျမ်းစာပုံပြင်စာအုပ်ကိုဖတ်တဲ့အခါ တစ်ခါတလေ ကျမ်းစာဇာတ်ကောင်တွေအတိုင်းဝတ်ဆင်ပြီး သရုပ်ဆောင်ခဲ့ကြတယ်။ ဇာတ်ဝင်ပစ္စည်းတွေဖြစ်တဲ့ ဓား၊ ရာဇလှံတံ၊ ခြင်းတောင်း စတာတွေကိုတောင် လုပ်ခဲ့ကြတယ်။ ‘ကျွန်ုပ်မည်သူနည်း’ ဆိုတဲ့ကစားနည်းနဲ့ ကျမ်းစာမေးခွန်းအမျိုးမျိုးပါတဲ့ ကျမ်းစာကစားနည်းကိုလည်း ကစားကြတယ်။ နောဧသင်္ဘောပုံစံငယ်ကို ဆောက်ကြတယ်၊ ကျမ်းစာအဖြစ်အပျက်တွေကို ခုနှစ်အလိုက် ရေးကြတယ်။ တစ်ခါတလေ ကျမ်းစာဇာတ်ကောင်တွေ ဒါမှမဟုတ် အဖြစ်အပျက်တွေကို ပုံဆွဲကြတယ်။ လောလောဆယ်တော့ ဧဖက် ၆:၁၁-၁၇ မှာပါတဲ့ ချပ်ဝတ်တန်ဆာတွေကို ပုံဆွဲပြီး တစ်ခုစီက ဘာကိုတင်စားတယ်ဆိုတာ ရှင်းပြတဲ့အစီအစဉ်လုပ်နေတယ်။ ဒီနည်းတွေက ကျွန်တော်တို့ရဲ့မိသားစုလေ့လာမှုကို ပျော်ရွှင်စရာဖြစ်စေတယ်။”

အမေရိကန်နိုင်ငံ၊ မစ်ရှီဂန်က ဒယ်ဘီလို့ခေါ်တဲ့ မိခင်တစ်ဦး ဒီလိုပြောပြတယ်– “ကျွန်မတို့သမီး သုံးနှစ်အရွယ်တုန်းက သူ့ရဲ့အာရုံကိုဆွဲဆောင်ဖို့ ကျွန်မနဲ့ ကျွန်မခင်ပွန်း အခက်တွေ့ခဲ့ကြတယ်။ ဒါနဲ့ တစ်နေ့မှာ ကျွန်ုပ်၏ကျမ်းစာပုံပြင်စာအုပ်ထဲက ဣဇာက်နဲ့ ရေဗက္ကအကြောင်းဖတ်ပြတဲ့အခါ အရုပ်နှစ်ရုပ်ယူပြီး သူတို့နှစ်ယောက် အပြန်အလှန်စကားပြောတဲ့ပုံ လုပ်ပြတယ်။ ဒါကို သူအသေအချာ လိုက်နားထောင်တယ်။ နောက်ပိုင်းလတွေမှာ ဒီအရုပ်နှစ်ရုပ်ကို တခြားကျမ်းစာဇာတ်ကောင်တွေအဖြစ်လည်း သုံးခဲ့တယ်။ ကျမ်းစာမှတ်တမ်းကိုဖတ်ပြီးတဲ့အခါ သမီးက အဲဒါတွေကို သရုပ်ဆောင်ဖို့ အရုပ်တွေ ပစ္စည်းတွေကို မွှေနှောက်ရှာဖွေတော့တာပဲ။ ဒါက ရတနာသိုက်ရှာတဲ့ ကစားနည်းနဲ့တူတယ်။ ရှူးဖိနပ်သေတ္တာနဲ့ ဖဲကြိုးနီက ကြိုးနီချထားတဲ့ ရာခပ်ရဲ့အိမ်ဖြစ်လာတယ်။ ငါးပေအရှည်ရှိတဲ့ ကစားစရာမြွေရုပ်ကို တံမြက်စည်းရိုးမှာ ပတ်လိုက်တဲ့အခါ တောလည်ရာ ၂၁:၄-၉ မှာပါတဲ့ ကြေးဝါမြွေရုပ် ဖြစ်သွားတယ်။ အဲဒီပစ္စည်းတွေကို အိတ်ကြီးတစ်လုံးထဲမှာ ထည့်ထားတယ်။ ကျွန်မတို့ရဲ့ သမီးလေးဟာ ဧည့်ခန်းမှာထိုင်ပြီး သူ့ရဲ့ ‘ကျမ်းစာပုံပြင်အိတ်’ ကိုမွှေနှောက်နေတာကိုကြည့်ရတာ ဝမ်းသာစရာပဲ။ အရုပ်တွေသုံးပြီး ပုံပြင်ထဲကအကြောင်းအရာတွေနဲ့ သူ့ဘာသာသူကစားနေတာကိုတွေ့ရတာ ကြည်နူးစရာ ကောင်းလှပါတယ်။”

ကလေးတွေကို ပြုစုပျိုးထောင်ရတာ မလွယ်ကူပါဘူး၊ ယေဟောဝါကို ဝတ်ပြုလိုစိတ်ရှိလာအောင် မိဘတွေက နေ့စဉ် နည်းလမ်းမျိုးစုံနဲ့ သွတ်သွင်းပေးရမှာဖြစ်တယ်။ ပတ်စဉ် မိသားစုဝတ်ပြုမှုနဲ့ ကျမ်းစာလေ့လာမှုက အရေးပါတဲ့ ကဏ္ဍတစ်ခုဖြစ်ပါတယ်။ ဒါက ကြိုးစားရကျိုးနပ်တယ်ဆိုတာ သေချာပါတယ်။