“ငြိမ်သက်ခြင်းကို ပေးသနားတော်မူသော ဘုရားသခင်” ယေဟောဝါ

“ငြိမ်သက်ခြင်းကို ပေးသနားတော်မူသော ဘုရားသခင်သည် သင်တို့အပေါင်းနှင့်အတူ ရှိတော်မူပါစေ။” —ရော. ၁၅:၃၃။

၁၊ ၂။ ကမ္ဘာဦး အခန်းကြီး ၃၂ နဲ့ ၃၃ မှာ ဘယ်တင်းမာတဲ့အခြေအနေကို ဖော်ပြထားသလဲ၊ နောက်ဆုံးမှာ ဘယ်လိုဖြစ်သွားသလဲ။

နေရာ​ကတော့ ယော်ဒန်မြစ်အရှေ့ဘက် ယဗ္ဗုတ်ချောင်းအနားက ပေနွေလအနီးမှာဖြစ်တယ်။ အမြွှာညီဖြစ်သူယာကုပ် အိမ်ပြန်လာပြီဆိုတာ ဧသောကြားတယ်။ ဧသော သူ့ရဲ့သားဦးအရာကို ရောင်းခဲ့တာ အနှစ် ၂၀ ရှိပြီ။ ဧသောက လူ ၄၀၀ ကိုခေါ်ပြီး ယာကုပ်ကိုတွေ့ဖို့ ထွက်သွားတယ်။ ဒါနဲ့ ယာကုပ်က ဧသောရန်မူမှာကြောက်လို့ အိမ်မွေးတိရစ္ဆာန်အကောင် ၅၅၀ ကျော်ကို အုပ်စုလေးတွေခွဲပြီး တစ်အုပ်စုမှာကျွန်တစ်ယောက်စီနဲ့ ရှေ့ကနေသွားခိုင်းတယ်။ အုပ်စုတစ်စုနဲ့တွေ့တိုင်း ယာကုပ်ရဲ့ကျွန်က ဒါတွေဟာ ညီယာကုပ်ရဲ့လက်ဆောင်တွေဖြစ်ကြောင်း ပြောတယ်။

^၂ နောက်ဆုံးတော့ မျက်နှာချင်းဆိုင်တွေ့ကြပြီ။ ယာကုပ်က ဧသောထံ ရဲရဲဝံ့ဝံ့လျှောက်သွားပြီး ခုနစ်ကြိမ် ဦးညွှတ်ခဲ့တယ်။ ယာကုပ်က အစ်ကိုဖြစ်သူရဲ့သဘောထား ပျော့ပြောင်းစေဖို့ အရေးကြီးဆုံးအချက်ကို လုပ်ခဲ့ပြီးဖြစ်တယ်။ ဒါကတော့ ဧသောရန်ကနေကာကွယ်ပေးဖို့ ယေဟောဝါထံ ဆုတောင်းခြင်းဖြစ်တယ်။ သူ့ရဲ့ဆုတောင်းချက်ကို ယေဟောဝါ ဖြေကြားခဲ့သလား။ ဖြေကြားခဲ့တယ်။ ကျမ်းစာမှာ “ဧသောသည် ကြိုဆိုခြင်းငှာပြေးလာ၍ လည်ချင်းယှက်လျက် ပိုက်ဖက်နမ်းရှုပ်ခြင်းကိုပြု” တယ်လို့ ဖော်ပြထားတယ်။—က. ၃၂:၁၁-၂၀; ၃၃:၁-၄။

၃။ ယာကုပ်နဲ့ဧသောရဲ့မှတ်တမ်းကနေ ကျွန်ုပ်တို့ ဘာသိရသလဲ။

^၃ ယာကုပ်နဲ့ဧသောရဲ့အဖြစ်အပျက်က အသင်းတော်ရဲ့ငြိမ်သက်မှုကို ပျက်ပြားစေတဲ့ပြဿနာတွေပေါ်လာတဲ့အခါ ဖြေရှင်းဖို့ လက်တွေ့ကျကျ ကြိုးစားလုပ်ဆောင်သင့်တယ်ဆိုတာ ဖော်ပြတယ်။ ပြဿနာကိုဖြေရှင်းဖို့ ယာကုပ်ကြိုးစားတာက သူ့မှာအပြစ်ရှိလို့၊ တောင်းပန်ရမယ့် ဝတ္တရားရှိလို့မဟုတ်ဘူး။ ဧသောဟာ မိမိရဲ့သားဦးအရာကို အလေးမထားဘဲ ယာကုပ်ထံမှာ ပဲဟင်းတစ်ခွက်နဲ့ လဲခဲ့တာဖြစ်တယ်။ (က.  ၂၅:၃၁-၃၄; ဟေဗြဲ ၁၂:၁၆) ဒါပေမဲ့ ယာကုပ်ရဲ့ပုံနမူနာက ညီအစ်ကိုညီအစ်မတွေနဲ့ သင့်မြတ်ငြိမ်သက်တဲ့ဆက်ဆံရေးရှိဖို့ အတတ်နိုင်ဆုံးလုပ်ဆောင်လိုတဲ့ဆန္ဒ ရှိသင့်တယ်ဆိုတာ ဖော်ပြတယ်။ ငြိမ်သက်ခြင်းရှိစေဖို့ ကျွန်ုပ်တို့ရဲ့ဆုတောင်း ကြိုးစားမှုကို စစ်မှန်တဲ့ဘုရားသခင် ကောင်းချီးပေးတယ်ဆိုတာကိုလည်း ဖော်ပြတယ်။ တခြားသူတွေနဲ့ သင့်မြတ်ငြိမ်သက်အောင် လုပ်ဆောင်တဲ့ တခြားပုံနမူနာများစွာ သမ္မာကျမ်းစာမှာ ပါရှိတယ်။ တချို့ကို သုံးသပ်ကြည့်ကြစို့။

အကောင်းဆုံးပုံနမူနာ

၄။ လူသားတွေကို အပြစ်နဲ့သေခြင်းကနေ ကယ်တင်ဖို့ ဘုရားသခင် ဘယ်လိုစီစဉ်ပေးခဲ့သလဲ။

^၄ အကောင်းဆုံးပုံနမူနာကတော့ “ငြိမ်သက်ခြင်းကိုပေးသနားတော်မူသောဘုရားသခင်” ယေဟောဝါဖြစ်တယ်။ (ရော. ၁၅:၃၃) ယေဟောဝါနဲ့ ကျွန်ုပ်တို့ ရင်းနှီးတဲ့ဆက်ဆံရေးရှိဖို့ ကိုယ်တော်လုပ်ဆောင်ခဲ့ရာကို စဉ်းစားကြည့်ပါ။ ကျွန်ုပ်တို့က အာဒံနဲ့ဧဝထံက ဆင်းသက်လာတဲ့ အပြစ်ရှိသူတွေဖြစ်လို့ “အပြစ်တရား၏အခ” ကိုခံထိုက်တယ်။ (ရော. ၆:၂၃) ဒါပေမဲ့ ယေဟောဝါရဲ့ကြီးမားတဲ့မေတ္တာကြောင့် မိမိချစ်မြတ်နိုးတဲ့သားတော်ကို မြေကြီးပေါ်စေလွှတ်ပြီး စုံလင်တဲ့လူသားတစ်ဦးအဖြစ် မွေးဖွားစေခြင်းအားဖြင့် ကျွန်ုပ်တို့ကိုကယ်တင်ဖို့ စီစဉ်ခဲ့တယ်။ သားတော်ကလည်း လိုလိုလားလား လိုက်လျောခဲ့တယ်။ ဘုရားသခင့်ရန်သူတွေလက်ချက်နဲ့ အသေခံခဲ့တယ်။ (ယော. ၁၀:၁၇၊ ၁၈) စစ်မှန်တဲ့ဘုရားသခင်က သားတော်ကို ထမြောက်ပေးခဲ့ပြီး ယေရှုက မိမိရဲ့ပူဇော်ရာယဇ်တန်ဖိုးကို ယေဟောဝါထံ ဆက်သခဲ့တယ်။ ဒီပူဇော်ရာယဇ်တန်ဖိုးက နောင်တရတဲ့အပြစ်သားတွေကို ထာဝစဉ်သေခြင်းကနေ ကယ်လွှတ်ပေးတယ်။—ဟေဗြဲ ၉:၁၄၊ ၂၄ ကိုဖတ်ပါ။

၅၊ ၆။ ယေရှုသွန်းလောင်းတဲ့အသွေးတော်က ဘုရားသခင်နဲ့ အပြစ်ရှိလူသားတွေကြားက ပြတ်တောက်နေတဲ့ဆက်ဆံရေးအပေါ် ဘယ်လိုအကျိုးသက်ရောက်သလဲ။

^၅ ဘုရားသခင့်သားတော်ရဲ့ ပူဇော်ရာယဇ်က ဘုရားသခင်နဲ့ အပြစ်ရှိလူသားတွေကြားက ပြတ်တောက်နေတဲ့ဆက်ဆံရေးအပေါ် ဘယ်လိုအကျိုးသက်ရောက်သလဲ။ ဟေရှာယ ၅၃:၅ မှာ ဒီလိုဖော်ပြထားတယ်– “ငါတို့၏ ငြိမ်သက်ခြင်းချမ်းသာကိုဖြစ်စေသော ဆုံးမခြင်းသည် သူ့အပေါ်သို့ရောက်၍ သူခံရသောဒဏ်ချက်အားဖြင့် ငါတို့သည် အနာပျောက်လျက်ရှိကြ၏။” အခုဆိုရင် နာခံတဲ့လူသားတွေက ဘုရားသခင့်ရန်သူတွေအဖြစ် ရှုမြင်ခံရမယ့်အစား ဘုရားသခင်နဲ့ငြိမ်သက်တဲ့ဆက်ဆံရေး ရှိနိုင်ပြီဖြစ်တယ်။ ‘ငါတို့သည် သားတော်၏ အသွေးတော်အားဖြင့် ရွေးနုတ်တော်မူခြင်းခံရ၏။ ဘုရားသခင်၏ မဟာကြင်နာမှုကြောင့် အပြစ်လွတ်ခွင့်ရ၏။’—ဧ. ၁:၇။

^၆ သမ္မာကျမ်းစာမှာ “ဘုရားသခင်သည် ခပ်သိမ်းသောပြည့်စုံခြင်းကို သားတော်၌ တည်ရှိစေရန် အလိုရှိတော်မူ၏” လို့ဖော်ပြထားတယ်။ အကြောင်းကတော့ ခရစ်တော်ဟာ ဘုရားသခင့်ရည်ရွယ်ချက်ပြည့်စုံရေးမှာ အဓိကပုဂ္ဂိုလ်ဖြစ်လို့ပဲ။ ယေဟောဝါရဲ့ ရည်ရွယ်ချက်ကဘာလဲ။ ခရစ်တော်ယေရှု “သွန်းလောင်းသော အသွေးတော်အားဖြင့် ငြိမ်သက်ခြင်းကို ဖြစ်စေ” ပြီး “အရာခပ်သိမ်းကို သားတော်အားဖြင့် မိမိနှင့် ပြန်လည်သင့်မြတ်စေ” ဖို့ဖြစ်တယ်။ မိမိနဲ့ ပြန်လည်သင့်မြတ်မယ့် “အရာခပ်သိမ်း” က “ကောင်းကင်ပေါ်ရှိအရာများ” နဲ့ “မြေကြီးပေါ်ရှိအရာများ” ဖြစ်တယ်။ အဲဒီအရာတွေက ဘာတွေလဲ။—ကောလောသဲ ၁:၁၉၊ ၂၀ ကိုဖတ်ပါ။

၇။ ဘုရားသခင်နဲ့ ပြန်လည်သင့်မြတ်မယ့် “ကောင်းကင်ပေါ်ရှိအရာများ” နဲ့ “မြေကြီးပေါ်ရှိအရာများ” က ဘာတွေလဲ။

^၇ ရွေးနုတ်ဖိုးက စွမ်းအားတော်သွန်းလောင်းပြီး ရွေးချယ်ထားတဲ့ခရစ်ယာန်တွေကို “ဖြောင့်မတ်ရာသို့ရောက်” စေပြီး ဘုရားသခင့်သားများအနေနဲ့ “ဘုရားသခင့်ရှေ့တော်၌ ငြိမ်သက်ခြင်းကိုခံစား” ရစေတယ်။ (ရောမ ၅:၁ ကိုဖတ်ပါ။) သူတို့တွေက ကောင်းကင်မျှော်လင့်ချက်ရှိသူတွေဖြစ်လို့ “ကောင်းကင်ပေါ်ရှိအရာများ” ဖြစ်ပြီး “ဘုရင်များအဖြစ်မြေကြီးကိုအုပ်စိုး” မယ့် ဘုရားသခင့်ယဇ်ပုရောဟိတ်တွေလည်း ဖြစ်တယ်။ (ဗျာ. ၅:၁၀) “မြေကြီးပေါ်ရှိအရာများ” ကတော့ နောက်ဆုံးမှာ မြေကြီးပေါ် ထာဝစဉ်အသက်ရှင်ခွင့်ရကြမယ့် နောင်တရတဲ့လူသားတွေဖြစ်တယ်။—ဆာ. ၃၇:၂၉။

၈။ အသင်းတော်မှာ ပြဿနာတွေပေါ်လာတဲ့အခါ ယေဟောဝါရဲ့ပုံသက်သေက သင့်ကိုဘယ်လိုကူညီပေးသလဲ။

^၈ ပေါလုက ယေဟောဝါရဲ့ပြင်ဆင်ပေးချက်ကို ကျေးဇူးတင်ကြောင်းဖော်ပြရာမှာ ဧဖက်မြို့က ကောင်းကင်မျှော်လင့်ချက်ရှိတဲ့ ခရစ်ယာန်တွေကို ဒီလိုရေးခဲ့တယ်– ‘သနားကြင်နာခြင်းနှင့် ကြွယ်ဝတော်မူသော ဘုရားသခင်သည် မကောင်းမှု၌ သေလွန်သူများဖြစ်သော ငါတို့ကိုပင် ခရစ်တော်နှင့်အတူ အသက်ရှင်စေတော်မူပြီ။ သင်တို့သည် မဟာကြင်နာမှုကြောင့်သာ ကယ်တင်ခြင်းသို့ ရောက်ကြရ၏။’ (ဧ. ၂:၄၊ ၅) ကျွန်ုပ်တို့က  ကောင်းကင်မျှော်လင့်ချက်ရှိသူဖြစ်စေ၊ မြေကြီးမျှော်လင့်ချက်ရှိသူဖြစ်စေ ဘုရားသခင်ရဲ့သနားကြင်နာမှုအတွက် အလွန်ကျေးဇူးတင်ကြပါတယ်။ လူသားတွေ မိမိနဲ့ပြန်လည်သင့်မြတ်ဖို့ ယေဟောဝါလုပ်ဆောင်ပေးရာတွေကို စဉ်းစားတဲ့အခါ ကိုယ်တော်ကို ကျေးဇူးတင်စိတ် တဖွားဖွားပေါ်လာတယ်။ အသင်းတော်ရဲ့ စည်းလုံးငြိမ်သက်မှုကို ပျက်ပြားစေနိုင်တဲ့အခြေအနေမျိုး ကြုံတွေ့ရတဲ့အခါ ဘုရားသခင်ရဲ့ပုံသက်သေကို ကျေးဇူးတင်လေးမြတ်စိတ်နဲ့ စဉ်းစားပြီး ညီအစ်ကိုညီအစ်မတွေနဲ့ ပြန်လည်သင့်မြတ်အောင် အတတ်နိုင်ဆုံးလုပ်ဆောင်သင့်တယ်။

အာဗြဟံနဲ့ ဣဇာက်ထံမှသင်ယူပါ

၉၊ ၁၀။ တခြားသူတွေနဲ့ သင့်မြတ်ငြိမ်သက်တဲ့ဆက်ဆံရေးကို ဆက်ထိန်းသိမ်းလိုကြောင်း အာဗြဟံ ဘယ်လိုတင်ပြခဲ့သလဲ။

^၉ ဘိုးဘေးအာဗြဟံနဲ့ပတ်သက်ပြီး သမ္မာကျမ်းစာက ဒီလိုပြောတယ်– ‘“အာဗြဟံသည် ယေဟောဝါကို ယုံကြည်သဖြင့် သူ၏ယုံကြည်ခြင်းကို ဖြောင့်မတ်ခြင်းဟု ယူမှတ်တော်မူ၏” ဟူသောကျမ်းစကားသည် ပြည့်စုံလေ၏။ သို့ဖြင့် သူသည် “ယေဟောဝါ၏မိတ်ဆွေ” ဟုလည်း အခေါ်ခံရ၏။’ (ယာ. ၂:၂၃) အာဗြဟံ ယေဟောဝါကို ယုံကြည်ကြောင်းတင်ပြတဲ့ နည်းတစ်နည်းက တခြားသူတွေနဲ့ သင့်မြတ်ငြိမ်သက်စွာနေခြင်းဖြစ်တယ်။ ဥပမာ၊ အာဗြဟံရဲ့တိရစ္ဆာန်တွေ တိုးပွားလာတဲ့အတွက် အာဗြဟံရဲ့ကျွန်တွေနဲ့ သူ့တူလောတရဲ့ကျွန်တွေကြားမှာ ပြဿနာဖြစ်လာတယ်။ (က. ၁၂:၅; ၁၃:၇) အကောင်းဆုံးဖြေရှင်းနည်းက တစ်ယောက်တစ်နေရာစီခွဲနေခြင်းဖြစ်တယ်လို့ ဆုံးဖြတ်လိုက်ကြတယ်။ ဒီအခြေအနေကို အာဗြဟံဘယ်လိုဖြေရှင်းခဲ့သလဲ။ သူ့ရဲ့အသက်အရွယ်၊ ဘုရားသခင်နဲ့သူ့ရဲ့ဆက်ဆံရေးကို အခွင့်ကောင်းယူပြီး သူ့တူလောတကို အမိန့်ပေးမယ့်အစား ငြိမ်သက်တဲ့ဆက်ဆံရေးကို ဆက်ထိန်းသိမ်းလိုကြောင်း သူတင်ပြခဲ့တယ်။

^၁၀ အာဗြဟံက လောတကို ဒီလိုပြောခဲ့တယ်– “ငါတို့သည် ညီအစ်ကိုချင်းဖြစ်လျက် ငါနှင့် သင်၌လည်းကောင်း၊ ငါ့နွားကျောင်းသားတို့နှင့် သင့်နွားကျောင်းသားတို့၌လည်းကောင်း ခိုက်ရန်မရှိပါစေနှင့်။ မြေတစ်ပြင်လုံးသည် သင့်ရှေ့မှာရှိသည်မဟုတ်လော။ ငါနှင့်ခွာ၍နေပါလော့။ သင်သည် လက်ဝဲဘက်သို့သွားလျှင် ငါသည် လက်ယာဘက်သို့သွားမည်။ သင်သည် လက်ယာဘက်သို့သွားလျှင် ငါသည် လက်ဝဲဘက်သို့သွားမည်ဟုဆို၏။” ဒါနဲ့ လောတက အကောင်းဆုံးနေရာကိုရွေးလိုက်တယ်၊ ဒါကို အာဗြဟံ မကျေမနပ်မဖြစ်ခဲ့ဘူး။ (က. ၁၃:၈-၁၁) နောက်ပိုင်း လောတကို ကျူးကျော်သူတွေဖမ်းသွားတဲ့အခါ အာဗြဟံ ချက်ချင်းသွားကယ်ခဲ့တယ်။—က. ၁၄:၁၄-၁၆။

၁၁။ အာဗြဟံက အနီးအနားက ဖိလိတ္တိလူတွေနဲ့ သင့်မြတ်အောင် ဘယ်လိုလုပ်ဆောင်ခဲ့သလဲ။

^၁၁ ခါနာန်ပြည်အနီးအနားက ဖိလိတ္တိလူတွေနဲ့ သင့်မြတ်အောင် အာဗြဟံ ဘယ်လိုလုပ်ဆောင်တယ်ဆိုတာကိုလည်း စဉ်းစားကြည့်ပါ။ ဗေရရှေဘမှာ အာဗြဟံရဲ့ကျွန်တွေတူးထားတဲ့ရေတွင်းကို ဖိလိတ္တိလူတွေက “အနိုင်အထက်လုယူ” လိုက်တယ်။ ဘုရင်လေးဦးလက်ကနေ တူဖြစ်သူကိုကယ်တင်ခဲ့တဲ့ အာဗြဟံ ဒီကိစ္စကို ဘယ်လိုကိုင်တွယ်ခဲ့သလဲ။ ရေတွင်းပြန်ရဖို့ တိုက်ခိုက်မယ့်အစား ရေငုံနှုတ်ပိတ်နေခဲ့တယ်။ နောက်ပိုင်း ဖိလိတ္တိဘုရင်က အာဗြဟံနဲ့ ငြိမ်သက်ခြင်းပဋိညာဉ်ဖွဲ့ဖို့ ရောက်လာတယ်။ ဖိလိတ္တိဘုရင်က မိမိရဲ့သားစဉ်မြေးဆက်အပေါ် ကြင်နာမှုပြဖို့ အာဗြဟံကို ကျိန်ဆိုစေပြီးတဲ့နောက်မှ အာဗြဟံက ရေတွင်းလုယူတဲ့ကိစ္စကို ဖွင့်ပြောခဲ့တယ်။ ဘုရင်အရမ်းထိတ်လန့်သွားပြီး ရေတွင်းကို ပြန်ပေးလိုက်တယ်။ အာဗြဟံက အဲဒီပြည်မှာ တိုင်းတစ်ပါးသားတစ်ဦးအနေနဲ့ အေးဆေးငြိမ်သက်စွာ ဆက်နေထိုင်ခဲ့တယ်။—က. ၂၁:၂၂-၃၁၊ ၃၄။

၁၂၊ ၁၃။ (က) ဣဇာက်က ဖခင်ရဲ့ခြေရာကို ဘယ်လိုနင်းခဲ့သလဲ။ (ခ) သင့်မြတ်ငြိမ်သက်စွာနေဖို့ ဣဇာက်ကြိုးစားခဲ့တာကို ယေဟောဝါ ဘယ်လိုကောင်းချီးပေးခဲ့သလဲ။

^၁၂ အာဗြဟံရဲ့သား ဣဇာက်ကလည်း သူ့ဖခင်ခြေရာနင်းပြီး သင့်မြတ်စွာနေတဲ့နည်းအတိုင်း လုပ်ဆောင်ခဲ့တယ်။ ဒါကို ဖိလိတ္တိလူတွေနဲ့ဆက်ဆံပုံမှာ တွေ့ရတယ်။ အစာခေါင်းပါးတဲ့အတွက် ဣဇာက်နဲ့ သူ့မိသားစုကြီးက တောင်ပြည်ဖြစ်တဲ့ နေဂဒ်ခရိုင်၊ ဗေရလဟဲရောကနေ စိမ်းလန်းစိုပြည်တဲ့ ဖိလိတ္တိပြည် ဂေရာမြို့ဘက်ကို ပြောင်းသွားတယ်။ အဲဒီမှာရှိတုန်း ယေဟောဝါက ဣဇာက်ကို ကောက်ပဲသီးနှံတွေဖြစ်ထွန်းစေပြီး တိရစ္ဆာန်တွေ တိုးပွားစေခြင်းအားဖြင့် ကောင်းချီးပေးခဲ့တယ်။ ဖိလိတ္တိလူတွေက ဣဇာက်ကို မနာလိုဖြစ်လာတယ်။ သူ့ဖခင်လို မကြီးပွားစေလိုတဲ့အတွက် သူတို့ရဲ့ရေတွင်းကို ဖို့လိုက်ကြတယ်။ နောက်တော့ ဖိလိတ္တိဘုရင်က ဣဇာက်ကို “ငါတို့ထံမှ ထွက်သွားလော့” လို့ပြောခဲ့တယ်။ အိမ်နီးချင်းတွေနဲ့ ပြဿနာမဖြစ်လိုတဲ့အတွက် ဣဇာက် ထွက်သွားလိုက်တယ်။—က. ၂၄:၆၂; ၂၆:၁၊ ၁၂-၁၇။

^၁၃ အဝေးကိုပြောင်းသွားပြီးတဲ့နောက် သူ့သိုးကျောင်းသား တွေက နောက်ရေတွင်းတစ်တွင်းကို တူးကြတယ်။ ဒါကို ဖိလိတ္တိသိုးကျောင်းသားတွေက သူတို့ရေတွင်းလို့ပြောပြန်တယ်။ ဣဇာက်ဟာ ဖခင်အာဗြဟံလိုပဲ ရေတွင်းအတွက် အငြင်းပွားမနေဘဲ နောက်တစ်တွင်းတူးလိုက်တယ်။ ဒီတစ်ခါလည်း ဖိလိတ္တိလူတွေက သူတို့ရေတွင်းလို့ပြောပြန်တယ်။ အငြင်းမပွားလိုတဲ့အတွက် နောက်တစ်နေရာကို ပြောင်းသွားပြန်တယ်။ အဲဒီမှာ သူ့ကျွန်တွေ ရေတွင်းတစ်တွင်းတူးတော့ ဣဇာက်က ရဟောဘုတ်လို့ အမည်ပေးခဲ့တယ်။ နောက်ပိုင်း သူက ပိုပြီးသီးပွင့်ဖြစ်ထွန်းတဲ့ ဗေရရှေဘဘက်ကိုပြောင်းသွားပြီး ယေဟောဝါက သူ့ကိုကောင်းချီးပေးကာ ဒီလိုမိန့်တော်မူခဲ့တယ်– “မစိုးရိမ်နှင့်။ ငါသည်သင့်ဘက်မှာရှိ၏။ ငါသည်ကောင်းချီးပေးမည်။ ငါ၏ကျွန်အာဗြဟံအတွက် သင်၏အမျိုးအနွယ်ကို ငါများပြားစေမည်။”—က. ၂၆:၁၇-၂၅။

၁၄။ ဖိလိတ္တိဘုရင် ပဋိညာဉ်ဖွဲ့ဖို့လာတဲ့အခါ သူတို့နဲ့သင့်မြတ်လိုကြောင်း ဣဇာက်ဘယ်လိုတင်ပြခဲ့သလဲ။

^၁၄ ဣဇာက်မှာ သူ့ကျွန်တွေတူးထားတဲ့ရေတွင်းတွေကို ပြန်ရအောင်တိုက်ခိုက်နိုင်တဲ့ စွမ်းရည်ရှိတယ်။ အကြောင်းကတော့ ဣဇာက်လုပ်လေသမျှကို ယေဟောဝါ ကောင်းချီးပေးလို့ပဲ၊ ဒါကို ဖိလိတ္တိဘုရင်ကတောင် သိမြင်ခဲ့တယ်။ ဘုရင်က သူ့ရဲ့အရာရှိတွေနဲ့ ဣဇာက်ရှိရာ ဗေရရှေဘကိုရောက်လာပြီး သူနဲ့ပဋိညာဉ်ဖွဲ့တဲ့အခါ ‘ယေဟောဝါသည် သင့်ဘက်မှာရှိတော်မူကြောင်းကို ငါတို့ အမှန်သိမြင်သည်’ လို့ပြောခဲ့တယ်။ တကယ်ဆိုရင် ဣဇာက်ဟာ အငြင်းမပွားချင်လို့ တစ်ကြိမ်ထက်မက ပြောင်းရွှေ့ခဲ့ရတယ်။ ဘုရင်နဲ့ သူ့အရာရှိတွေ လာတဲ့အချိန်မှာလည်း ဣဇာက်က သင့်မြတ်ငြိမ်သက်မှုရှိဖို့ လုပ်ဆောင်ခဲ့တယ်။ သမ္မာကျမ်းစာမှာ ဒီလိုဖော်ပြထားတယ်– “ဣဇာက်သည် သူတို့အဖို့စားသောက်ပွဲကိုလုပ်၍ အတူစားသောက်ကြ၏။ နံနက်စောစောထ၍ အချင်းချင်း တစ်ဦးနှင့်တစ်ဦး သစ္စာပြုကြပြီးမှ ဣဇာက်သည် သူတို့ကိုလွှတ်လိုက်၍ သူတို့သည် ငြိမ်ဝပ်စွာသွားရကြ၏။”—က. ၂၆:၂၆-၃၁။

ယောသပ်ထံမှ သင်ယူပါ

၁၅။ ယောသပ်ရဲ့အစ်ကိုတွေက ဘာကြောင့် ယောသပ်ကို စကားအကောင်းမပြောကြတာလဲ။

^၁၅ ဣဇာက်ရဲ့သား ယာကုပ်ဟာ “စိတ်ကောင်းသောသူ” ဖြစ်တယ်။ (က. ၂၅:၂၇) ဆောင်းပါးရဲ့အစပိုင်းမှာ ဆွေးနွေးခဲ့တဲ့အတိုင်း ယာကုပ်ဟာ အစ်ကိုဖြစ်သူဧသောနဲ့ ပြန်သင့်မြတ်ဖို့ အတတ်နိုင်ဆုံးလုပ်ဆောင်ခဲ့တယ်။ ယာကုပ်ဟာ သူ့ဖခင် ဣဇာက်ရဲ့ပုံသက်သေကနေ အကျိုးခံစားခဲ့ရတာ သေချာတယ်။ ယာကုပ်ရဲ့သားတွေနဲ့ပတ်သက်ပြီး ဘာပြောနိုင်သလဲ။ သား ၁၂ ယောက်ထဲမှာ ယာကုပ်က ယောသပ်ကိုအချစ်ဆုံးပဲ။ ယောသပ်ဟာ နာခံမှုရှိပြီး လေးစားတတ်သူဖြစ်တဲ့အတွက် ဖခင်ရဲ့ယုံကြည်စိတ်ချမှုခံရတဲ့ သားဖြစ်တယ်။ (က. ၃၇:၂၊ ၁၄) ဒါပေမဲ့ ယောသပ်ရဲ့အစ်ကိုတွေက မနာလိုဖြစ်လာပြီး သူ့ကိုစကားအကောင်းမပြောကြဘူး။ သူတို့က ယုတ်မာစွာနဲ့ ယောသပ်ကို ကျွန်အဖြစ်ရောင်းစားပြီး သားရဲကိုက်လို့သေပြီလို့ ဖခင်ကိုအယုံသွင်းခဲ့ကြတယ်။—က. ၃၇:၄၊ ၂၈၊ ၃၁-၃၃။

၁၆၊ ၁၇။ ယောသပ်ဟာ သူ့အစ်ကိုတွေနဲ့ သင့်မြတ်ငြိမ်သက်စွာနေထိုင်လိုကြောင်း ဘယ်လိုတင်ပြခဲ့သလဲ။

^၁၆ ယေဟောဝါက ယောသပ်နဲ့အတူရှိခဲ့တယ်။ နောက်ပိုင်းမှာ ယောသပ်ဟာ အီဂျစ်ပြည်ရဲ့ဝန်ကြီးချုပ်ဖြစ်လာပြီး ဖာရောပြီးရင် ဒုတိယအာဏာအရှိဆုံးပုဂ္ဂိုလ် ဖြစ်လာတယ်။ အငတ်ဘေးဆိုက်တဲ့အခါ ယောသပ်ရဲ့အစ်ကိုတွေ အီဂျစ်ပြည်ကိုရောက်လာတယ်၊ ဒါပေမဲ့ အီဂျစ်အရာရှိအဝတ်အစားဝတ်ဆင်ထားတဲ့ သူ့ကို အစ်ကိုတွေက မမှတ်မိကြဘူး။ (က. ၄၂:၅-၇) ဒါက သူနဲ့ သူ့အဖေအပေါ် အစ်ကိုတွေရဲ့ရက်စက်ယုတ်မာမှုကို လက်စားချေဖို့ အခွင့်ကောင်းပဲ။ ဒါပေမဲ့ လက်စားချေမယ့်အစား သူတို့နဲ့ ပြန်သင့်မြတ်အောင် ကြိုးစားလုပ်ဆောင်ခဲ့တယ်။ သူ့အစ်ကိုတွေ တကယ်နောင်တရတယ်ဆိုတာ သိတဲ့အခါ သူဘယ်သူလဲဆိုတာဖွင့်ပြောပြီး ဒီလိုဆက်ပြောခဲ့တယ်– “သင်တို့သည် ကျွန်ုပ်ကို ဤအရပ်သို့ရောင်းလိုက်မိသောကြောင့် စိတ်မညှိုးငယ်ကြနှင့်။ ကိုယ်ကိုအမျက်မထွက်ကြနှင့်။ အကြောင်းမူကား၊ ဘုရားသခင်သည် လူတို့အသက်ကိုစောင့်မစေခြင်းငှာ သင်တို့ရှေ့မှာ ကျွန်ုပ်ကိုစေလွှတ်တော်မူပြီ။” အဲဒီနောက် အစ်ကိုအားလုံးကိုနမ်းပြီး သူတို့နဲ့ အတူငိုခဲ့တယ်။—က. ၄၅:၁၊ ၅၊ ၁၅။

^၁၇ သူတို့ဖခင် ယာကုပ်သေဆုံးသွားပြီးတဲ့နောက် ယောသပ် သူတို့ကို အငြိုးထားမယ်လို့ အစ်ကိုတွေ တွေးထင်ခဲ့ကြတယ်။ သူတို့ရဲ့စိုးရိမ်မှုကို ပြောပြတဲ့အခါ သင့်မြတ်ငြိမ်သက်မှုကိုလိုလားတဲ့ ယောသပ်က “မျက်ရည်ကျ” ပြီး “မစိုးရိမ်ကြနှင့်။ သင်တို့နှင့်သူငယ်များကို ကျွန်ုပ်ကျွေးမွေးမည်ဟုဆိုလျက် သူတို့ကိုနှစ်သိမ့်စေ၍ မေတ္တာစကားကို ပြော” ခဲ့တယ်။—က. ၅၀:၁၅-၂၁။

 “ငါတို့ကို ဆုံးမသွန်သင်ရန်ဖြစ်၏”

၁၈၊ ၁၉။ (က) ဒီဆောင်းပါးမှာ ဆွေးနွေးခဲ့တဲ့ ပုံနမူနာတွေကနေ ကျွန်ုပ်တို့ ဘာသိရှိခဲ့ရပြီလဲ။ (ခ) နောက်ဆောင်းပါးမှာ ကျွန်ုပ်တို့ ဘာအကြောင်း သုံးသပ်ကြမလဲ။

^၁၈ “ကျမ်းစာတွင် ရေးထားနှင့်သမျှသည် ငါတို့ကို ဆုံးမသွန်သင်ရန်ဖြစ်၏။ ငါတို့သည် ကျမ်းစာမှရရှိသော ခံနိုင်ရည်၊ နှစ်သိမ့်ခြင်းတို့အားဖြင့် မျှော်လင့်ခွင့်ရရှိစေရန် ထိုသို့ရေးထားရခြင်းဖြစ်၏” လို့ ပေါလုရေးခဲ့တယ်။ (ရော. ၁၅:၄) အကောင်းဆုံးပုံနမူနာ ယေဟောဝါအပြင် ကျမ်းစာပုံနမူနာတွေဖြစ်တဲ့ အာဗြဟံ၊ ဣဇာက်၊ ယာကုပ်နဲ့ ယောသပ်တို့ထံကနေ ကျွန်ုပ်တို့ ဘာသိရှိခဲ့ရပြီလဲ။

^၁၉ အပြစ်ရှိလူသားတွေနဲ့ ဘုရားသခင်အကြား ပြတ်တောက်သွားတဲ့ဆက်ဆံရေး ပြန်ကောင်းလာဖို့အတွက် ယေဟောဝါလုပ်ဆောင်ခဲ့ရာတွေကို တွေးတောဆင်ခြင်တဲ့အခါ တခြားသူတွေနဲ့သင့်မြတ်အောင် အတတ်နိုင်ဆုံးလုပ်ဆောင်ဖို့ ကျွန်ုပ်တို့ လှုံ့ဆော်ခံရတယ်မဟုတ်လား။ မိဘရဲ့ပုံသက်သေက ကလေးတွေအပေါ် ဩဇာသက်ရောက်နိုင်တယ်ဆိုတာကို အာဗြဟံ၊ ဣဇာက်၊ ယာကုပ်နဲ့ ယောသပ်တို့ရဲ့ပုံသက်သေကောင်းကနေ သိရတယ်။ ဒါ့အပြင် ဒီမှတ်တမ်းတွေက သင့်မြတ်ဖို့ကြိုးစားလုပ်ဆောင်သူတွေကို ယေဟောဝါကောင်းချီးပေးတယ်ဆိုတာကိုလည်း ဖော်ပြတယ်။ ပေါလုက ယေဟောဝါကို “ငြိမ်သက်ခြင်းကိုပေးသနားတော်မူသော ဘုရားသခင်” အဖြစ် ရည်ညွှန်းပြောဆိုခဲ့တာက အံ့ဩစရာမဟုတ်ဘူး။ (ရောမ ၁၅:၃၃; ၁၆:၂၀ တို့ကိုဖတ်ပါ။) ငြိမ်သက်မှုကို ထိန်းသိမ်းဖို့လိုပြီး ငြိမ်သက်မှုရှိအောင် လုပ်ဆောင်နိုင်ပုံအကြောင်း ပေါလု အလေးပေးပြောဆိုခဲ့ရာတွေကို နောက်ဆောင်းပါးမှာ ဆွေးနွေးကြမယ်။

သင် ဘာသိရှိခဲ့ပြီလဲ

• ဧသောနဲ့မတွေ့ခင်လေးမှာ သင့်မြတ်ငြိမ်သက်တဲ့ဆက်ဆံရေးရှိဖို့ ယာကုပ် ဘာလုပ်ဆောင်ခဲ့သလဲ။

• လူသားတွေနဲ့ သင့်မြတ်တဲ့ဆက်ဆံရေးပြန်ရရှိဖို့ ယေဟောဝါလုပ်ဆောင်ခဲ့ရာတွေက သင့်အပေါ် ဘယ်လိုအကျိုးသက်ရောက်သလဲ။

• အာဗြဟံ၊ ဣဇာက်၊ ယာကုပ်နဲ့ ယောသပ်တို့ရဲ့ ပုံနမူနာကနေ သင် ဘာသင်ယူသိရှိခဲ့ပြီလဲ။

[လေ့လာရန်မေးခွန်းများ]

[စာမျက်နှာ ၂၃ ပါ ရုပ်ပုံ]

ဧသောနဲ့ ပြန်သင့်မြတ်ဖို့ ယာကုပ် ဘယ်အရေးကြီးဆုံးအချက်ကို လုပ်ဆောင်ခဲ့သလဲ