စာရှုသူများထံမှ မေးခွန်းလွှာ

ဟေဗြဲကျမ်းစောင်တွေမှာပါတဲ့ မေရှိယနဲ့ပတ်သက်တဲ့ ပရောဖက်ပြုချက်အရေအတွက်ကို အတိအကျ ပြောနိုင်သလား။

ဟေဗြဲကျမ်းစောင်တွေကို ဂရုတစိုက်လေ့လာခြင်းက ယေရှုခရစ်မှာပြည့်စုံခဲ့တဲ့ ပရောဖက်ပြုချက်မြောက်မြားစွာကို သိရှိစေတယ်။ ဒီပရောဖက်ပြုချက်တွေမှာ မေရှိယရဲ့ဘဝနောက်ခံ၊ ပေါ်ထွန်းမယ့်အချိန်၊ လုပ်ဆောင်မှု၊ လူတွေ ကိုယ်တော့်ကိုဆက်ဆံပုံနဲ့ ယေဟောဝါဘုရားသခင်ရဲ့အစီအစဉ်မှာ ကိုယ်တော့်အခန်းကဏ္ဍတွေအကြောင်း အသေးစိတ် ကြိုဟောထားတယ်။ ဒီပရောဖက်ပြုချက်တွေကို ပေါင်းစပ်လိုက်တဲ့အခါ ယေရှုဟာ မေရှိယဖြစ်ကြောင်း ရုပ်လုံးပေါ်လာတယ်။ ဒါပေမဲ့ ဟေဗြဲကျမ်းစောင်တွေမှာပါတဲ့ မေရှိယနဲ့ပတ်သက်တဲ့ ပရောဖက်ပြုချက် အရေအတွက်အတိအကျကို ဖော်ပြရာမှာ သတိပြုဖို့လိုတယ်။

ကျမ်းချက်တစ်ချက်က မေရှိယနဲ့သက်ဆိုင်တယ်၊ မသက်ဆိုင်ဘူးဆိုတာနဲ့ပတ်သက်ပြီး တစ်ဦးစီမှာ မတူညီတဲ့အမြင်ကိုယ်စီ ရှိကြတယ်။ အဲလ်ဖရဒ် အယ်ဒရှိုင်းရေးတဲ့ စာအုပ်တစ်အုပ် (The Life and Times of Jesus the Messiah) မှာ ဟေဗြဲကျမ်းစောင်တွေမှာပါတဲ့ ကျမ်းပိုဒ် ၄၅၆ ပိုဒ်ထဲက အချက်အတော်များများက မေရှိယအကြောင်း ဖော်ပြထားတာမဟုတ်ပေမဲ့ ရှေးဂျူးဘာသာရေးခေါင်းဆောင်တွေရေးတဲ့ စာပေတွေမှာတော့ အဲဒီကျမ်းပိုဒ်တွေကို မေရှိယနဲ့သက်ဆိုင်တယ်လို့ သတ်မှတ်ကြောင်း ဖော်ပြထားတယ်။ ဒီကျမ်းပိုဒ် ၄၅၆ ပိုဒ်ကို အသေအချာလေ့လာကြည့်တဲ့အခါ တချို့ကျမ်းပိုဒ်တွေက ယေရှုခရစ်နဲ့သက်ဆိုင်တဲ့ ကျမ်းပိုဒ်ဟုတ်မဟုတ်ဆိုတာနဲ့ပတ်သက်ပြီး မေးခွန်းတွေပေါ်လာတယ်။ ဥပမာ၊ ကမ္ဘာဦး ၈:၁၁ က မေရှိယနဲ့သက်ဆိုင်တယ်လို့ ဂျူးတွေယူဆခဲ့ကြောင်း အယ်ဒရှိုင်း ပြောခဲ့တယ်။ “ချိုးငှက်ကိုက်ချီလာတဲ့ သံလွင်ရွက်က မေရှိယတောင်ကနေ ယူလာတာ” လို့ သူတို့ယုံကြည်ကြတယ်။ စာရေးသူက ထွက်မြောက်ရာ ၁၂:၄၂ ကိုလည်း ဖော်ပြခဲ့တယ်။ ဂျူးတွေ ဒီကျမ်းချက်ကို တလွဲနားလည်ခဲ့ကြပုံနဲ့ပတ်သက်ပြီး သူ ဒီလိုရေးခဲ့တယ်– “မောရှေက ကန္တာရကနေထွက်လာသလို မေရှိယလည်း ရောမကနေ ထွက်လာမယ်။” ကျမ်းပညာရှင်တွေနဲ့ တခြားသူတွေအတွက် ဒီကျမ်းနှစ်ချက်နဲ့ လွဲမှားတဲ့ရှင်းပြချက်တွေက ယေရှုခရစ်နဲ့ သက်ဆိုင်တယ်ဆိုတာကို လက်ခံရခက်မှာဖြစ်တယ်။

ယေရှုခရစ်မှာ တကယ်ပြည့်စုံခဲ့တဲ့ ပရောဖက်ပြုချက်တွေကိုပဲ လေ့လာမယ်ဆိုရင်တောင် အရေအတွက်အတိအကျနဲ့ပတ်သက်ပြီး သဘောတညီတညွတ်တည်းဖြစ်ဖို့ ခက်ပါလိမ့်မယ်။ ဥပမာ၊ မေရှိယနဲ့ပတ်သက်တဲ့ ပရောဖက်ပြုချက်များစွာပါဝင်တဲ့ ဟေရှာယအခန်းကြီး ၅၃ ကိုကြည့်ပါ။ ဟေရှာယ ၅၃:၂-၇ မှာ ဒီလိုပရောဖက်ပြုထားတယ်– “အဆင်းတင့်တယ်ခြင်းမရှိ။ . . . မထီမဲ့မြင်ပြုခြင်းကိုခံ၍ . . . သူတစ်ပါးမျက်နှာလွှဲခြင်းကို ခံရ[ကာ] . . . ငါတို့အနာရောဂါဝေဒနာများကို ယူတင်ဆောင်ရွက်လေ၏။ . . . ထိုသူသည် ငါတို့လွန်ကျူးခြင်းအပြစ်များကြောင့် နာကျင်စွာထိုးခြင်း၊ နှိပ်စက်ခြင်းကိုခံရလေ၏။ . . . အသေသတ်ခြင်းငှာဆောင်သွားသော သိုးသငယ်ကဲ့သို့ သူ့ကိုဆောင်သွား” ကြ၏။ ဟေရှာယ ၅၃ မှာပါတဲ့ ဒီကျမ်းပိုဒ်တစ်ပိုဒ်လုံးကို မေရှိယနဲ့ပတ်သက်တဲ့ ပရောဖက်ပြုချက်တစ်ခုလို့ ယူမှတ်မလား၊ ဒါမှမဟုတ် မေရှိယနဲ့ပတ်သက်တဲ့ အချက်တစ်ချက်ချင်းစီကို ပရောဖက်ပြုချက်တစ်ခုစီအဖြစ် ရှုမြင်မလား။

ဟေရှာယ ၁၁:၁ မှာဖတ်ရတဲ့ ဒီအချက်ကိုလည်း သုံးသပ်ကြည့်ပါ– “ယေရှဲအမျိုးအငုတ်၌ အတက်ပေါက်လိမ့်မည်။ သူ၏အမြစ်တို့တွင် အညွန့်သည် အသီးသီးလိမ့်မည်။” အခန်းငယ် ၁၀ မှာ ဒီစာသားတွေနဲ့ ခပ်ဆင်ဆင်စာသားတွေကို ထပ်တွေ့ရတယ်။ ဒီအခန်းငယ်နှစ်ခုကို ပရောဖက်ပြုချက် နှစ်ခုအဖြစ်ရေတွက်မလား၊ ဒါမှမဟုတ် တစ်ခုလို့ပဲ ရေတွက်မလား။ ဟေရှာယအခန်းကြီး ၅၃ နဲ့ အခန်းကြီး ၁၁ က မေရှိယနဲ့ပတ်သက်တဲ့ ပရောဖက်ပြုချက် အရေအတွက်စုစုပေါင်းအပေါ် အကျိုးသက်ရောက်မှုရှိတယ်လို့ ကောက်ချက်ချရမှာဖြစ်တယ်။

ဒါကြောင့် ဟေဗြဲကျမ်းစောင်တွေမှာ မေရှိယနဲ့သက်ဆိုင်တဲ့ ပရောဖက်ပြုချက်အရေအတွက် အတိအကျ ဘယ်လောက်ရှိတယ်ဆိုတာကိုသိဖို့ အရေးမကြီးဘူး။ ကျွန်ုပ်တို့ရဲ့စာပေတွေမှာ ယေရှုအကြောင်းပရောဖက်ပြုချက် အမြောက်အမြားရဲ့စာရင်းနဲ့ ဒါတွေ ဘယ်လိုပြည့်စုံလာတယ်ဆိုတာ တွေ့ရတယ်။ * ဒီအချက်တွေကို ကိုယ်ပိုင်လေ့လာမှု၊ မိသားစုလေ့လာမှုနဲ့ ဟောပြောခြင်းလုပ်ငန်းမှာ အသုံးပြုနိုင်တယ်။ ဒါက ယေဟောဝါမိန့်တော်မူသမျှ အမြဲပြည့်စုံတယ်ဆိုတဲ့အချက်အပေါ် ကျွန်ုပ်တို့ရဲ့ယုံကြည်စိတ်ချမှုကို ခိုင်မြဲစေနိုင်တယ်။

[အောက်ခြေမှတ်ချက်]