ယေဟု စစ်မှန်တဲ့ဝတ်ပြုရေးကို ကာကွယ်သူ

ယေဟုဟာ စစ်မှန်တဲ့ဝတ်ပြုရေးကို ကာကွယ်သူတစ်ဦးဖြစ်တယ်။ သူက ရ,ထားတဲ့တာဝန်ကို အချိန်မဆွဲဘဲ တက်တက်ကြွကြွ၊ စွမ်းစွမ်းတမံ၊ သတ္တိရှိရှိလုပ်ဆောင်ခဲ့တယ်။ ယေဟုမှာရှိတဲ့ အရည်အသွေးတွေကို ကျွန်ုပ်တို့ တုပသင့်တယ်။

အစ္စရေးနိုင်ငံရဲ့အခြေအနေ အတော်ဆိုးနေတဲ့အချိန်မှာ ယေဟု တာဝန်တစ်ခုရခဲ့တယ်။ နိုင်ငံက လက်ရှိအုပ်စိုးနေတဲ့ ဘုရင်ယောရံရဲ့မယ်တော်၊ သေဆုံးသွားပြီဖြစ်တဲ့ဘုရင်အာဟပ်ရဲ့ မိဖုရားဆိုး ယေဇဗေလရဲ့ လွှမ်းမိုးချုပ်ကိုင်မှုအောက် ရောက်နေတယ်။ မိဖုရားဆိုးက ယေဟောဝါကိုဝတ်ပြုမယ့်အစား ဗာလကိုဝတ်ပြုဖို့ လူတွေကို ဖိအားပေးခဲ့တယ်၊ ဘုရားသခင့်ပရောဖက်တွေကိုသတ်ပြီး လူတွေကို လိင်အကျင့်ပျက်ပြားဖို့နဲ့ “ပြုစားသောအမှုများ” ကိုလိုက်စားစေခြင်းအားဖြင့် ယိုယွင်းဖောက်ပြန်အောင်လုပ်ခဲ့တယ်။ (၄ ရာ. ၉:၂၂; ၃ ရာ. ၁၈:၄၊ ၁၃) ယေဟောဝါက ယောရံနဲ့ ယေဇဗေလအပါအဝင် အာဟပ်အမျိုးကို သုတ်သင်ပယ်ရှင်းဖို့ အမိန့်ထုတ်ဆင့်ခဲ့တယ်။ ဒီတာဝန်ကို ယေဟု ဦးဆောင်ပြီး လုပ်ရမှာဖြစ်တယ်။

ကျမ်းစာမှာ ယေဟုကို စဖော်ပြခဲ့တာက ရာမုတ်-ဂိလဒ်မှာ အစ္စရေးလူတွေနဲ့ ရှုရိလူတွေ စစ်တိုက်နေချိန်ဖြစ်တယ်၊ အဲဒီမှာ သူက ဗိုလ်မင်းတစ်ဦးဖြစ်တယ်။ ပရောဖက်ဧလိရှဲက ပရောဖက်တစ်ဦးကို ယေဟုထံစေလွှတ်ပြီး ဘုရင်အဖြစ် ခန့်အပ်ခဲ့တယ်၊ ပြီးတော့ အယူဖောက်ပြန်တဲ့ အာဟပ်အမျိုးယောက်ျားရှိသမျှကို သတ်ဖို့ ညွှန်ကြားခဲ့တယ်။—၄ ရာ. ၈:၂၈; ၉:၁-၁၀။

ဗိုလ်မင်းတွေက ဒီပရောဖက်ရဲ့ လာရင်းရည်ရွယ်ချက်ကိုမေးတဲ့အခါ ယေဟု ပြန်ဖြေဖို့ တွန့်ဆုတ်နေခဲ့တယ်။ ပြောဖို့အတင်းတိုက်တွန်းတဲ့အခါ သူအမှန်အတိုင်းပြောပြပြီး သူနဲ့ သူ့အပေါင်းပါတွေက ယောရံကိုတိုက်ခိုက်ဖို့ စပြီးစီစဉ်ကြတယ်။ (၄ ရာ. ၉:၁၁-၁၄) သူတို့တွေက ဘုရင်နဲ့ ယေဇဗေလရဲ့ ဖိနှိပ်အုပ်ချုပ်မှုကို အောင့်အည်းသည်းခံခဲ့ရပုံပေါက်တယ်။ ဘယ်လိုပဲဖြစ်ပါစေ ယေဟုက သူ့တာဝန်ကိုထမ်းဆောင်ဖို့ အကောင်းဆုံးနည်းလမ်းကို စေ့စေ့စပ်စပ်၊ သေသေချာချာစဉ်းစားခဲ့တယ်။

ဘုရင်ယောရံက စစ်ပွဲမှာ ဒဏ်ရာရပြီး ပြန်နာလန်ထူနိုင်ဖို့ ယေဇရေလမြို့ကို ဆုတ်ခွာခဲ့တယ်။ ယေဟုက သူ့အကြံအစည်အောင်မြင်ရေးအတွက် ဒီသတင်းမပေါက်ကြားဖို့လိုတယ်ဆိုတာ သိတယ်။ “ယေဇရေလမြို့သို့သွား၍ သတင်းကြားပြောရသောသူတစ်စုံတစ်ယောက်ကိုမျှ မြို့ထဲကမထွက်မသွားစေနှင့်” ဆိုပြီး ယေဟု အမိန့်ထုတ်ခဲ့တယ်။ (၄ ရာ. ၉:၁၄၊ ၁၅) ယောရံကို သစ္စာခံတဲ့သူတွေ ပြန်ပြီးတိုက်ခိုက်မယ်လို့ ယေဟုမျှော်လင့်ထားပုံရတယ်။ ဒါကြောင့် သူတို့ ပြန်တိုက်ခိုက်နိုင်တဲ့ အခွင့်အရေးမရှိဖို့ သူ အသေအချာစီစဉ်လိုခဲ့တယ်။

အရှိန်ပြင်းပြင်းစီးနင်း

ရန်သူတွေအငိုက်မိသွားစေဖို့ ယေဟုက ရာမုတ်-ဂိလဒ်ကနေ ၄၅ မိုင်အကွာမှာရှိတဲ့ ယေဇရေလမြို့ကို မြင်းရထားနှင်ပြီး သွားခဲ့တယ်။ “ယေဟုနှင့် လိုက်လာသောအလုံးအရင်း” အရှိန်ပြင်းပြင်းနှင်လာတာကို မျှော်စင်ပေါ်မှာရှိတဲ့ ကင်းစောင့်က တွေ့တယ်။ (၄ ရာ. ၉:၁၇) ယေဟုက သေချာပေါက်အနိုင်ရဖို့ လူအများကြီး ခေါ်သွားပုံရတယ်။

မြင်းရထားတစ်စီးပေါ်မှာ ယေဟုပါလာတယ်လို့ထင်ပြီး ကင်းစောင့်က “ယေဟုနှင်တတ်သကဲ့သို့ အလွန်ပြင်းထန်စွာနှင်၍လာပါသည်” လို့ ပြောခဲ့တယ်။ (၄ ရာ. ၉:၂၀) ယေဟုက  သာမန်အချိန်မှာတောင် မြင်းရထားကို အရှိန်ပြင်းပြင်းနှင်တတ်သူဖြစ်လို့ ဒီအချိန်မှာ ပိုအရှိန်မြှင့်ပြီးနှင်မှာ ဖြစ်တယ်။

သတင်းမေးတဲ့သူနှစ်ယောက်ကို ဘာမှပြန်မပြောဘဲ ယေဟုက မြင်းရထားကိုယ်စီနဲ့ထွက်လာတဲ့ ဘုရင်ယောရံနဲ့ သူ့ရဲ့မဟာမိတ် ယုဒဘုရင်အာခဇိကို သွားတွေ့တယ်။ ယောရံက “ယေဟု ငြိမ်သက်ခြင်းရှိသလော” လို့မေးတဲ့အခါ ယေဟုက ‘သင့်အမိ ယေဇဗေလပြုသော လိင်အကျင့်ယိုယွင်းမှု၊ ပြုစားသောအမှုများသောကာလအတွင်းတွင် အဘယ်သို့သော ငြိမ်သက်ခြင်းရှိလိမ့်မည်နည်း’ လို့ပြန်ဖြေတယ်။ သူ့ရဲ့အဖြေကိုနားထောင်ပြီး အခြေအနေကိုသဘောပေါက်သွားလို့ ယောရံက ချက်ချင်းလှည့်ပြီး ထွက်ပြေးတယ်။ ဒါပေမဲ့ ယေဟုက ခြေမြန်လက်မြန်ပဲ လေးကိုတင်ပြီးပစ်လိုက်တဲ့အခါ ယောရံရဲ့နှလုံးကိုထိပြီး မြင်းရထားပေါ်မှာ သေဆုံးသွားတယ်။ အာခဇိထွက်ပြေးခဲ့ပေမဲ့ ယေဟုက အမီလိုက်ပြီး သူ့ကိုလည်း သတ်ပစ်ခဲ့တယ်။—၄ ရာ. ၉:၂၂-၂၄၊ ၂၇။

အာဟပ်မိသားစုမှာ သုတ်သင်ရမယ့်နောက်တစ်ယောက်ကတော့ မိဖုရားဆိုး ယေဇဗေလဖြစ်တယ်။ ယေဟုက သူ့ကို “ကျိန်အပ်သောမိန်းမ” လို့ သင့်တော်စွာပဲခေါ်ခဲ့တယ်။ ယေဟု မြင်းရထားနဲ့ ယေဇရေလမြို့ထဲ ဝင်တဲ့အခါ ယေဇဗေလက နန်းတော်ပြတင်းပေါက်ကနေ ငုံ့ကြည့်နေတာကို သူတွေ့လိုက်ရတယ်။ ယေဟုက အပိုတွေပြောမနေဘဲ ယေဇဗေလကို ပြတင်းပေါက်ကနေပစ်ချလိုက်ဖို့ နန်းတွင်းအရာရှိတွေကို အမိန့်ပေးလိုက်တယ်။ အဲဒီနောက် အစ္စရေးလူတွေကို ယိုယွင်းဖောက်ပြန်စေတဲ့ ဒီမိဖုရားဆိုးကို မြင်းတွေနဲ့ တက်နင်းလိုက်တယ်။ အဲဒီအပြင် ယေဟုက ဆိုးညစ်တဲ့အာဟပ်အမျိုး မိသားစုဝင်တွေကိုလည်း သုတ်သင်ခဲ့တယ်။—၄ ရာ. ၉:၃၀-၃၄; ၁၀:၁-၁၄။

ဒီလိုကြမ်းတမ်းရက်စက်တာက မနှစ်မြို့စရာဖြစ်ပေမဲ့ အဲဒီအချိန်တုန်းက ယေဟောဝါက မိမိကျေးကျွန်တွေကို အသုံးပြုပြီး တရားစီရင်ချက်တွေကို ဖော်ဆောင်တယ်ဆိုတာကို နားလည်သင့်တယ်။ ကျမ်းစာက ဒီလိုဆိုတယ်– ‘ဘုရားသခင်စီရင်တော်မူသည်အတိုင်း အာခဇိသည် ယောရံထံသို့ရောက်သောအားဖြင့် ဆုံးရှုံးလေသည်အကြောင်းအရာဟူမူကား အာဟပ်အမျိုးကို သုတ်သင်ပယ်ရှင်းစေခြင်းငှာ ယေဟောဝါခန့်အပ်တော်မူသော နိမ်ရှိသား ယေဟုကို ဆီးကြိုခြင်းငှာ ယောရံနှင့်အာခဇိတို့သည် ထွက်သွား၏။’ (၆ ရာ. ၂၂:၇) ယောရံရဲ့အလောင်းကို မြင်းရထားပေါ်ကနေ နာဗုတ်ရဲ့မြေကွက်မှာ ပစ်ချခဲ့တယ်၊ ဒါက နာဗုတ်ကို အာဟပ်သတ်ခဲ့တဲ့အတွက် ယေဟောဝါအပြစ်စီရင်မယ်ဆိုတဲ့ ကိုယ်တော့်ကတိတော်ပြည့်စုံချက်ဖြစ်တယ်ဆိုတာကို ယေဟုသတိရတယ်။ ဒါ့အပြင် ‘ဘုရားသခင့်ကျွန်တို့ကိုသတ်သောအပြစ်အလျောက် ယေဇဗေလကို ဒဏ်ပေး’ ဖို့ ယေဟုတာဝန်ရခဲ့တာဖြစ်တယ်။—၄ ရာ. ၉:၇၊ ၂၅၊ ၂၆; ၃ ရာ. ၂၁:၁၇-၁၉။

ဒီအချိန်မှာတော့ ယေဟောဝါရဲ့ကျေးကျွန်တစ်ယောက်မှ စစ်မှန်တဲ့ဝတ်ပြုရေးအတွက် တကယ့်စစ်မတိုက်ဘူး။ “လက်စားချေခြင်းသည် ငါ၏အမှုဖြစ်၏” လို့ ဘုရားသခင် မိန့်တော်မူတယ်။ (ဟေဗြဲ ၁၀:၃၀) ဒါပေမဲ့ အသင်းတော်အပေါ် မကောင်းတဲ့သြဇာမသက်ရောက်စေဖို့အတွက် ခရစ်ယာန် အကြီးအကဲတွေက ယေဟုလို ရဲရဲဝံ့ဝံ့ လုပ်ဆောင်ရမှာဖြစ်တယ်။ (၁ ကော. ၅:၉-၁၃) အသင်းတော်မှာရှိတဲ့သူအားလုံးလည်း နှင်ထုတ်ခံရတဲ့သူတွေနဲ့ အပေါင်းအသင်းမလုပ်ဖို့ စိတ်ပိုင်းဖြတ်ထားဖို့လိုတယ်။—၂ ယော. ၉-၁၁။

ယေဟောဝါဘက်မှာ စိတ်အားကြီးသူ ယေဟု

ရရှိတဲ့တာဝန်ကို လုပ်ဆောင်လိုတဲ့ ယေဟုရဲ့စိတ်သဘောထားကို နောက်ပိုင်း ယောနဒပ်ကိုပြောတဲ့ ဒီစကားတွေမှာ အထင်အရှားမြင်တွေ့နိုင်တယ်– ‘ငါနှင့်အတူလိုက်၍ ယေဟောဝါဘက်၌ စိတ်အားကြီးကြောင်းကို ကြည့်ရှုလော့။’ ယောနဒပ်က ဖိတ်ခေါ်ချက်ကိုလက်ခံပြီး ယေဟုရဲ့မြင်းရထားပေါ်တက်လိုက်တယ်၊ အဲဒီနောက် သူတို့ ရှမာရိမြို့ကို ခရီးနှင်ခဲ့ကြတယ်။ အဲဒီမှာ ယေဟုက “ဗာလကိုကိုးကွယ်သောသူတို့ကို ဖျက်ဆီးမည်အကြံနှင့် ပရိယာယ်” ဆင်ခဲ့တယ်။—၄ ရာ. ၁၀:၁၅-၁၇၊ ၁၉။

ယေဟုက ဗာလအတွက် “ယဇ်ကြီးကိုပူဇော်” မယ်လို့ ကြေညာခဲ့တယ်။ (၄ ရာ. ၁၀:၁၈၊ ၁၉) “ယေဟုက ဒီစကားကို အဓိပ္ပာယ်နှစ်မျိုးနဲ့ ပြောလိုက်ခြင်းဖြစ်တယ်။ ‘ပူဇော်’ ဆိုတဲ့ စကားလုံးကို အယူဖောက်ပြန်သူတွေကို ‘သတ်တယ်’ ဆိုတဲ့ အဓိပ္ပာယ်နဲ့လည်း အသုံးပြုနိုင်တယ်” လို့ ကျမ်းပညာရှင်တစ်ဦးကဆိုတယ်။ ဗာလဝတ်ပြုသူ တစ်ယောက်ကိုမှ အလွတ်မပေးလိုတဲ့အတွက် ယေဟုက သူတို့ဝတ်ဖို့ သီးသန့်ဝတ်စုံတွေကို ထုတ်ပေးပြီး ဗာလကျောင်းမှာ စုဝေးခိုင်းလိုက်တယ်။ “မီးရှို့ရာယဇ်ကို ပူဇော်မှုပြီးသောအခါ” မှာ ယေဟုရဲ့လက်နက်ကိုင်လူ ၈၀ က ဗာလဝတ်ပြုသူတွေကို သတ်ပစ်လိုက်တယ်။ ပြီးတဲ့နောက် ဗာလကျောင်းကို ဝတ်ပြုဖို့မသင့်တော်တဲ့နေရာဖြစ်သွားအောင် ကိုယ်လက်သန့်စင်တဲ့နေရာအဖြစ် လုပ်လိုက်တယ်။—၄ ရာ. ၁၀:၂၀-၂၇။

ယေဟုလက်မှာ သွေးအများကြီးစွန်းခဲ့တယ်ဆိုတာ အမှန်ပဲ။ ဒါပေမဲ့ သမ္မာကျမ်းစာမှာ သူ့ကို အစ္စရေးလူတွေကို ယေဇဗေလနဲ့ သူ့မိသားစုရဲ့ ဖိနှိပ်ချုပ်ချယ်မှုအောက်ကနေ လွတ်အောင်လုပ်ပေးခဲ့တဲ့ ရဲစွမ်းသတ္တိရှိသူအဖြစ် ဖော်ပြခဲ့တယ်။ ဘယ်အစ္စရေးခေါင်းဆောင်မဆို ဒီနေရာမှာအောင်မြင်ဖို့ ရဲစွမ်းသတ္တိ၊ ခိုင်မာပြတ်သားမှုနဲ့ ဇွဲရှိရမှာဖြစ်တယ်။ “ဒီအလုပ်က ခက်ခဲတဲ့အပြင် မပြီးမချင်း၊ မဆုတ်မနစ်လုပ်ဆောင်ရမှာဖြစ်တယ်။ နူးညံ့ကြင်နာနေမယ်ဆိုရင် အစ္စရေးနိုင်ငံကနေ ဗာလဝတ်ပြုရေးကို ဖယ်ရှားတဲ့နေရာမှာ အောင်မြင်နိုင်မှာမဟုတ်ဘူး” လို့ ကျမ်းစာအဘိဓာန်တစ်အုပ်က ဖော်ပြတယ်။

ဒီခေတ်အခြေအနေတွေကို ခရစ်ယာန်တွေ ရင်ဆိုင်တဲ့အခါမှာလည်း ယေဟုလို အရည်အသွေးတွေတင်ပြဖို့ လိုတယ်ဆိုတာ တွေ့နိုင်တယ်။ ဥပမာ၊ ယေဟောဝါ ပြစ်တင်ရှုတ်ချထားတဲ့ လုပ်ရပ်တစ်ခုခုကိုလုပ်ဖို့ သွေးဆောင်ခံရတဲ့အခါ ဘယ်လိုတုံ့ပြန်သင့်သလဲ။ တုံ့ဆိုင်းမနေဘဲ ရဲစွမ်းသတ္တိရှိရှိ၊ ပြတ်ပြတ်သားသား ငြင်းပယ်ရမှာဖြစ်တယ်။ ကျွန်ုပ်တို့ရဲ့ ဝတ်ပြုရေးနဲ့ပတ်သက်လာရင် ယေဟောဝါဘက်မှာ စိတ်အားကြီးရမှာဖြစ်တယ်။

ယေဟောဝါရဲ့တရားတော်လမ်းအတိုင်းလိုက်ဖို့ ဂရုပြုပါ

ဒီဇာတ်လမ်းအဆုံးမှာ သတိပေးချက်တစ်ခုရှိတယ်။ ယေဟုက “ဗေသလမြို့နှင့် ဒန်မြို့မှာရှိသော ရွှေနွားသငယ်တို့ကိုမစွန့်” ခဲ့ဘူး။ (၄ ရာ. ၁၀:၂၉) စစ်မှန်တဲ့ဝတ်ပြုရေးအတွက် အရမ်းထက်သန်ပုံပေါက်တဲ့လူတစ်ယောက်က ဘယ်လိုကြောင့် အရုပ်ကိုးကွယ်မှုကို လက်ခံလိုက်ရတာလဲ။

လွတ်လပ်တဲ့အစ္စရေးနိုင်ငံက ယုဒနိုင်ငံနဲ့မတူဖို့ သီးသန့်ဝတ်ပြုရေးပုံစံတစ်မျိုးရှိရမယ်လို့ ယေဟုယူဆခဲ့ပုံရတယ်။ ဒါကြောင့် ယေဟုက အရင်အစ္စရေးဘုရင်တွေလိုပဲ အစ္စရေးလူတွေကို နွားသငယ်ဝတ်ပြုရေးလိုက်စားစေခြင်းအားဖြင့် ယုဒနိုင်ငံနဲ့ သီးခြားဖြစ်စေခဲ့တယ်။ ဒါပေမဲ့ ဒါက သူ့ကို ဘုရင်အဖြစ်ခန့်အပ်ခဲ့တဲ့ ယေဟောဝါကို မယုံကြည်ကြောင်း ဖော်ပြလိုက်တာပဲ။

ယေဟုက “ဖြောင့်မတ်သောအကျင့်ကိုကျင့်၍ ကောင်းမွန်စွာပြုခဲ့” တယ်လို့ ယေဟောဝါ သူ့ကို ချီးမွမ်းခဲ့တယ်။ ဒါပေမဲ့ ယေဟုက ‘အစ္စရေးအမျိုး၏ဘုရားသခင် ယေဟောဝါ၏တရားတော်လမ်းသို့ စိတ်နှလုံးအကြွင်းမဲ့လိုက်ခြင်းငှာ သတိမပြု’ ခဲ့ဘူး။ (၄ ရာ. ၁၀:၃၀၊ ၃၁) အစောပိုင်းတုန်းက ယေဟုလုပ်ဆောင်ခဲ့ရာတွေကို ပြန်စဉ်းစားတဲ့အခါ သင် အံ့ဩပြီး စိတ်မကောင်းဖြစ်နိုင်တယ်။ ဒါပေမဲ့ ဒါက ကျွန်ုပ်တို့အတွက် သင်ခန်းစာတစ်ခုပဲ။ ယေဟောဝါနဲ့ ကျွန်ုပ်တို့ရဲ့ဆက်ဆံရေးက ဘယ်တော့မှ မပြတ်တောက်နိုင်ဘူးလို့ မထင်ပါနဲ့။ နေ့စဉ် သမ္မာကျမ်းစာလေ့လာခြင်း၊ ဆင်ခြင်သုံးသပ်ခြင်း၊ လှိုက်လှိုက်လှဲလှဲဆုတောင်းခြင်းအားဖြင့် ဘုရားသခင်အပေါ်ထားတဲ့ ကျွန်ုပ်တို့ရဲ့တည်ကြည်မှုကို ခိုင်ခံ့အောင် လုပ်နေရမှာဖြစ်တယ်။ ဒါကြောင့် ယေဟောဝါရဲ့တရားလမ်းအတိုင်း စိတ်နှလုံးအကြွင်းမဲ့ဆက်လိုက်ဖို့ အတတ်နိုင်ဆုံး လုပ်ဆောင်ကြပါစို့။—၁ ကော. ၁၀:၁၂။

[စာမျက်နှာ ၄ ပါလေးထောင့်ကွက်]

ယေဟုနဲ့ပတ်သက်တဲ့ လောကသမိုင်း

ကျမ်းစာမှာပါတဲ့ ဇာတ်ကောင်တွေ တကယ်ရှိမရှိဆိုတာကို ဝေဖန်ရေးသမားတွေက မေးခွန်းထုတ်လေ့ရှိတယ်။ ဒါကြောင့် ယေဟုနဲ့ပတ်သက်ပြီး ကျမ်းစာအပြင် တခြားအထောက်အထားတွေ ရှိသလား။

ဒီအစ္စရေးဘုရင်အကြောင်းကို အနည်းဆုံး အာရှုရိသမိုင်းမှတ်တမ်းသုံးခုမှာ နာမည်နဲ့တကွ ဖော်ပြထားတယ်။ အဲဒီထဲကတစ်ခုမှာ ယေဟု ဒါမှမဟုတ် သူ့ရဲ့သံတမန်တစ်ဦးက အာရှုရိဘုရင် ရှာလမနေဇာ ၃ ရဲ့ရှေ့မှောက်မှာ ဦးညွှတ်ပြီး လက်ဆောင်ပဏ္ဏာတွေ ဆက်သနေတဲ့ပုံ ဖော်ပြထားတယ်။ ပူးတွဲပါစာမှာ ဒီလိုဖတ်ရတယ်– “ဩမရိ (Hu-um-ri) ရဲ့သား ယေဟု (Ia-ú-a) ဆက်တဲ့ လက်ဆောင်ပဏ္ဏာများ၊ ငါကိုယ်တော်မြတ် လက်ခံရရှိတဲ့ ပစ္စည်းတွေက ငွေ၊ ရွှေ၊ ဆပ်ပလူး ပန်းကန်လုံးတစ်လုံး၊ ရွှေပန်းအိုးတစ်လုံး၊ ရွှေသောက်တော်ခွက်တစ်လုံး၊ ရွှေခြင်းတောင်းများ၊ သံဖြူ၊ ရာဇလှံတံတစ်ခု၊ သစ်သားထည်ပစ္စည်းတစ်ခု ဖြစ်တယ်။” ယေဟုဟာ “ဩမရိရဲ့သား” တော့မဟုတ်ဘူး၊ ဒါပေမဲ့ ဩမရိဟာ ဂုဏ်သတင်းကျော်စောပြီး အစ္စရေးနိုင်ငံရဲ့မြို့တော်ရှမာရိကို တည်ထောင်ခဲ့လို့ အစ္စရေးဘုရင်အရိုက်အရာကို ဆက်ခံတဲ့သူတွေအတွက် ဒီအသုံးအနှုန်းကို သုံးတာဖြစ်နိုင်တယ်။

ယေဟုဆက်သခဲ့ဖွယ်ရှိတဲ့ လက်ဆောင်ပဏ္ဏာတွေနဲ့ပတ်သက်ပြီး အာရှုရိဘုရင်ရဲ့ ပြောဆိုချက်ကို ထောက်ခံတဲ့တခြားအထောက်အထားတွေတော့ မရှိဘူး။ ဒါပေမဲ့ မော်ကွန်းကျောက်တိုင်မှာ၊ ရှာလမနေဇာရဲ့ ရုပ်တုမှာ၊ အာရှုရိတော်ဝင်သမိုင်းမှာ ယေဟုရဲ့ နာမည် သုံးကြိမ်ပါရှိတယ်။ ဒီအထောက်အထားတွေက ကျမ်းစာ ဇာတ်ကောင် တကယ်ရှိခဲ့တာကို သံသယဝင်နေသူတွေရဲ့ သံသယကို လျော့နည်းစေတယ်။