သင် မှတ်မိသလား

မကြာသေးမီကထုတ်ဝေခဲ့တဲ့ ကင်းမျှော်စင်စာစောင်တွေကို သင် အသေအချာဖတ်ရှုခဲ့ပါသလား။ ဒီမေးခွန်းတွေကို သင် ဖြေနိုင်သလားဆိုတာ စမ်းကြည့်ပါ–

ရှောလမုန်ရဲ့အဖြစ်အပျက်က ဘယ်လိုသဘောနဲ့ ကျွန်ုပ်တို့အတွက် သတိပေးပုံနမူနာဖြစ်နိုင်သလဲ။

ဘုရားသခင်က ရှောလမုန်ကို ကောင်းချီးပေးခဲ့တယ်၊ အသုံးပြုခဲ့တယ်။ ဒါပေမဲ့ ရှောလမုန်က သူအုပ်ချုပ်ချိန်အတွင်းမှာ ဘုရားသခင့်ညွှန်ကြားချက်ကို ဆက်မနာခံခဲ့ဘူး။ ဖာရောရဲ့သမီးနဲ့လက်ထပ်ပြီး မယားအများကြီးယူခဲ့တယ်၊ အယူမှားနတ်ဘုရားတွေကို ကိုးကွယ်တဲ့ဒီအမျိုးသမီးတွေက တဖြည်းဖြည်းနဲ့ ရှောလမုန်ပါ ဒီမှောက်မှားတဲ့ဘုရားတွေကို ကိုးကွယ်အောင် လုပ်ဆောင်နိုင်ခဲ့ကြတယ်။ ကျွန်ုပ်တို့လည်း မှားယွင်းတဲ့သဘောထားတွေ ဒါမှမဟုတ် အလိုဆန္ဒတွေကို တဖြည်းဖြည်း ကြီးထွားလာဖို့ ခွင့်မပြုရဘူး။ (တရား. ၇:၁-၄; ၁၇:၁၇; ၃ ရာ. ၁၁:၄-၈)—၁၂/၁၅၊ စာမျက်နှာ ၁၀-၁၂။

စာရာကို ဘုရားသခင်ကိုကြောက်ရွံ့သူ၊ အဖိုးတန်တဲ့ဇနီးတစ်ဦးအဖြစ် ဘာကြောင့် သတ်မှတ်နိုင်သလဲ။

ဥရမြို့ကနေထွက်ခွာဖို့ အာဗြဟံကို ဘုရားသခင်မိန့်မှာတဲ့အထဲမှာ မသိတဲ့နေရာတစ်ခုကိုသွားဖို့ မိသားစု၊ မိတ်ဆွေတွေနဲ့ သူအသက်ရှင်ခဲ့တဲ့ဘဝပုံစံကိုစွန့်ခြင်း ပါဝင်တယ်။ ဒါပေမဲ့ စာရာက ဘုရားသခင် သူ့ကိုကောင်းချီးပေးမယ်ဆိုတာကို ယုံကြည်စိတ်ချပြီး ပူးပေါင်းလုပ်ဆောင်ခဲ့တယ်။ စာရာဟာ အရည်အသွေးကောင်းတွေ တင်ပြခြင်းအားဖြင့် အာဗြဟံကို ရိုသေလေးစားခဲ့တယ်။—၁/၁၊ စာမျက်နှာ ၈။

အရမ်းချစ်တဲ့သားဖြစ်သူကို ပူဇော်ဖို့ အာဗြဟံကို ယေဟောဝါ ဘာကြောင့်တောင်းဆိုခဲ့တာလဲ။

ဣဇာက်ကို တကယ်ယဇ်ပူဇော်ဖို့ ဘုရားသခင်ခွင့်မပြုခဲ့ဘူးဆိုတဲ့ အချက်ကို သတိရဖို့ အရေးကြီးတယ်။ ဒီအဖြစ်အပျက်က မိမိရဲ့သားတော်ယေရှုကို ယဇ်အဖြစ်ပေးဆက်ဖို့ ဘုရားသခင် ဘယ်လောက်အထိ အနစ်နာခံရတယ်ဆိုတာ ဖော်ပြတယ်။—၁/၁၊ စာမျက်နှာ ၂၃။

ပထမရာစုအချိန်ကနေစပြီး မြေကြီးပေါ်မှာ စစ်မှန်တဲ့ကောင်းကင်အတန်းအစားခရစ်ယာန်တချို့ မပြတ်ရှိနေမယ်ဆိုတာ ဘာကဖော်ပြသလဲ။

ယေရှုပြောခဲ့တဲ့ “စပါးပင်” နဲ့ “ပေါင်းပင်” ပုံဥပမာမှာပါတဲ့ “ကောင်းသောမျိုးစေ့” က “နိုင်ငံတော်သားများ” ဖြစ်တယ်။ (မ. ၁၃:၂၄-၃၀၊ ၃၈) ရိတ်သိမ်းချိန်မတိုင်ခင်အထိ ပေါင်းပင်တွေက စပါးပင်တွေနဲ့အတူ ရှင်သန်ကြီးထွားနေမှာဖြစ်တယ်။ ဒါကြောင့် စပါးပင်တွေက ဘယ်သူတွေဆိုတာကို အတိအကျ မပြောနိုင်ပေမဲ့ ကျွန်ုပ်တို့အချိန်အထိ ဘုရားသခင်အပေါ်တည်ကြည်သူတချို့ မပြတ်ရှိနေတာသေချာတယ်။—၁/၁၅၊ စာမျက်နှာ ၇။

ဘယ်အဖြစ်အပျက်တွေက အာမဂေဒုန်ဆီ တိုက်ရိုက်ဦးတည်သွားမလဲ။

တိုင်းနိုင်ငံတွေက “ငြိမ်းချမ်းပြီ၊ လုံခြုံပြီ” ဆိုတဲ့ သိသာထင်ရှားတဲ့ကြေညာချက်ကို ထုတ်ပြန်ပါလိမ့်မယ်။ (၁ သက်. ၅:၃) အစိုးရတွေက မှောက်မှားတဲ့ဝတ်ပြုရေးတွေကို တိုက်ခိုက်မှာဖြစ်တယ်။ (ဗျာ. ၁၇:၁၅-၁၈) စစ်မှန်တဲ့ဝတ်ပြုသူတွေ ရုတ်တရက် တိုက်ခိုက်ခံရပါလိမ့်မယ်။ အဲဒီနောက် အဆုံးရောက်လာမှာဖြစ်တယ်။—၂/၁၊ စာမျက်နှာ ၉။

မနာလိုတဲ့သဘောထားကို အနိုင်ယူနိုင်ဖို့ ဘာလုပ်နိုင်သလဲ။

ကျွန်ုပ်တို့ကို ကူညီပေးနိုင်တဲ့အချက်တွေက အောက်ပါအတိုင်းဖြစ်တယ်– မေတ္တာနဲ့ ညီရင်းအစ်ကိုချစ်ခင်စုံမက်မှုကို မွေးမြူပါ၊ ဘုရားသခင်ကို ကြောက်ရွံ့သူတွေနဲ့ ပေါင်းသင်းပါ၊ ကောင်းတာကို လုပ်ပါ၊ “ဝမ်းမြောက်သောသူတို့နှင့်အတူ ဝမ်းမြောက်” ပါ။ (ရော. ၁၂:၁၅)—၂/၁၅၊ စာမျက်နှာ ၁၆-၁၇။

နာဝါးလ်ဘာသာစကားကို ဘယ်သူတွေပြောကြသလဲ၊ သူတို့တွေအတွက် ဘာလုပ်ပေးထားသလဲ။

နာဝါးလ်ဘာသာစကားဟာ ရှေးခေတ် အက်ဇ်တက်စ်လူမျိုးတွေရဲ့ ဘာသာစကားဖြစ်ပြီး မက္ကဆီကိုမှာရှိတဲ့ လူဦးရေ ၁.၅ သန်းက ဒီနေ့အထိ အဲဒီစကားကို ပြောဆိုနေကြဆဲဖြစ်တယ်။ သက်သေခံတွေက နာဝါးလ် ဘာသာစကားနဲ့ဟောပြောကြပြီး အဖွဲ့အစည်းထုတ်စာပေတချို့တောင် အဲဒီဘာသာစကားနဲ့ ရရှိနိုင်ပါတယ်။—၃/၁၊ စာမျက်နှာ ၁၃-၁၄။

အကြံပေးတဲ့အခါ ဘယ်ကျမ်းစာမူတွေကို စိတ်စွဲမှတ်ထားသင့်ပါသလဲ။

အခြေအနေမှန်ကို ကောင်းကောင်း သိအောင်လုပ်ပါ။ အလျင်စလို အကြံမပေးပါနဲ့။ ဘုရားသခင့်တရားစကားကို နှိမ့်ချစွာကျင့်သုံးပါ။ ဖြစ်နိုင်မယ်ဆိုရင် အဖွဲ့အစည်းထုတ်စာပေတွေကို သုံးပါ။ တခြားသူတွေအတွက် ဆုံးဖြတ်ချက်ချပေးတာမျိုး မလုပ်ပါနဲ့။—၃/၁၅၊ စာမျက်နှာ ၇-၉။

ယေရှုက နားထောင်နေသူတွေကို ခရီးနှစ်မိုင်သွားဖို့ တိုက်တွန်းခဲ့တယ်။ (မ. ၅:၄၁) ကိုယ်တော် ဘာကိုဆိုလိုချင်တာလဲ။

အစ္စရေးနိုင်ငံမှာ အဲဒီအချိန်တုန်းက ကျူးကျော်ဝင်ရောက်လာတဲ့ရောမတွေက လူတစ်ဦးကို အတင်းအကျပ်စေခိုင်းနိုင်ပုံရတယ်။ နားထောင်နေသူတွေကို ခရီးနှစ်မိုင်သွားဖို့ ယေရှုတိုက်တွန်းတာက အာဏာပိုင်တွေ တရားဝင်တောင်းဆိုတဲ့အလုပ်တွေကို ကြည်ကြည်ဖြူဖြူ လုပ်ဆောင်ပေးဖို့ ပြောနေခြင်းဖြစ်တယ်။—၄/၁၊ စာမျက်နှာ ၉။