သင် မှတ်မိသလား

မကြာသေးမီကထုတ်ဝေခဲ့တဲ့ ကင်းမျှော်စင်စာစောင်တွေကို သင် သေချာဖတ်ရှုသလား။ အောက်ပါမေးခွန်းတွေကို သင် ဖြေနိုင်သလားဆိုတာ စမ်းကြည့်ပါ–

ရှံဆုန်ရဲ့ခွန်အားက သူ့ရဲ့ဆံပင်ကနေရတာလား။

ရှံဆုန်ရဲ့ခွန်အားက သူ့ဆံပင်ကနေရတာ မဟုတ်ပါဘူး။ သူ့ရဲ့ဆံပင်က နာဇရိလူတစ်ဦးအနေနဲ့ ယေဟောဝါနဲ့ အထူးဆက်ဆံရေးရှိကြောင်း ဖော်ပြတဲ့အမှတ်အသား ဖြစ်တယ်။ ဒေလိလက ရှံဆုန်ရဲ့ဆံပင်တွေကို ညှပ်လိုက်တဲ့အချိန်မှာ ဒီအထူးဆက်ဆံရေးကို ထိခိုက်သွားတယ်။—၄/၁၅၊ စာမျက်နှာ ၉။

ပကတိနှလုံးကိုအကျိုးပြုတဲ့ ဘယ်အချက်သုံးချက်က ကျွန်ုပ်တို့ရဲ့ ပုံဆောင်နှလုံးပေါ် အကျိုးသက်ရောက်နိုင်ပါသလဲ။

(၁) အာဟာရ။ ကျွန်ုပ်တို့ရဲ့ပကတိနှလုံးအတွက် ကျန်းမာရေးနဲ့ညီညွတ်တဲ့ အစားအစာတွေကို စားသုံးပေးဖို့လိုသလို ပုံဆောင်နှလုံးအတွက်လည်း အကျိုးပြုတဲ့ပုံဆောင်အစားအစာကို လုံလုံလောက်လောက် စားသုံးဖို့လိုတယ်။ (၂) လေ့ကျင့်ခန်း။ အမှုဆောင်လုပ်ငန်းမှာ ထက်ထက်သန်သန် ပါဝင်ခြင်းက ပုံဆောင်နှလုံးကို ကျန်းမာနေစေမှာဖြစ်တယ်။ (၃) ပတ်ဝန်းကျင်။ ကျွန်ုပ်တို့ကို တကယ်ဂရုစိုက်တဲ့ ယုံကြည်သူချင်းတွေနဲ့ ပေါင်းသင်းခြင်းက ဖိစီးမှုတွေကို လျော့နည်းစေနိုင်ပါတယ်။—၄/၁၅၊ စာမျက်နှာ ၁၆။

အိမ်ထောင်ဖက်တစ်ဦးဦးက သစ္စာဖောက်ပြီးတဲ့နောက် ယုံကြည်မှုကို ဘယ်လိုပြန်တည်ဆောက်နိုင်သလဲ။

အိမ်ထောင်ဖက်တွေက ဒီလိုလုပ်ဆောင်သင့်ပါတယ်– (၁) တစ်ဦးနဲ့တစ်ဦး ရိုးသားပွင့်လင်းပါ။ (၂) အဖွဲ့တစ်ဖွဲ့လို အတူလုပ်ဆောင်ပါ။ (၃) အကျင့်ဟောင်းတွေကို အသစ်တွေနဲ့ အစားထိုးလိုက်ပါ။ (၄) နာကြည်းမှုကို ဖြေဖျောက်ပြီး ပြတ်တောက်သွားတဲ့ဆက်ဆံရေး ပြန်ကောင်းလာအောင် လုပ်ရမယ့်အချိန်ကို သိမြင်ပါ။—၅/၁၊ စာမျက်နှာ ၁၂-၁၅။

ဈာပနဟောပြောချက်ပေးသူတစ်ဦးက သေဆုံးသွားသူနဲ့ပတ်သက်ပြီး ဆာလံ ၁၁၆:၁၅ ကို ဘာကြောင့် အသုံးမပြုသင့်တာလဲ။

ကျမ်းချက်က ‘ယေဟောဝါရှေ့တော်၌ မိမိသန့်ရှင်းသူတို့၏သေခြင်းအရာသည် အဖိုးကြီးလှ၏’ ဆိုပြီး ဖော်ပြတယ်။ ဒီကျမ်းချက်က ဘုရားသခင်အတွက် မိမိရဲ့သစ္စာရှိသူအားလုံးရဲ့ သေခြင်းက အရမ်းတန်ဖိုးကြီးတယ်လို့ ဆိုလိုတယ်။ မိမိရဲ့သစ္စာရှိကျေးကျွန်တွေ ကမ္ဘာမြေကြီးပေါ်ကနေ အုပ်စုလိုက် ပျောက်ကွယ်သွားဖို့ ယေဟောဝါ ခွင့်ပြုမှာမဟုတ်ဘူး။—၅/၁၅၊ စာမျက်နှာ ၂၂။

ကော်လ်ပေါ်တာတွေက ဘယ်သူတွေလဲ။

ယခုအချိန်မှာ ရှေ့ဆောင်လို့ခေါ်တဲ့သူတွေကို ၁၉၃၁ ခုနှစ် မတိုင်ခင်က “ကော်လ်ပေါ်တာတွေ” လို့ခေါ်တယ်။—၅/၁၅၊ စာမျက်နှာ ၃၁။

သမ္မာကျမ်းစာဟာ လူတွေရေးတဲ့ စာအုပ်တစ်အုပ်လောက်ပဲမဟုတ်ဘူးဆိုတာကို ဖော်ပြတဲ့ အချက်တချို့က ဘာတွေလဲ။

သမ္မာကျမ်းစာမှာ ပြည့်စုံခဲ့တဲ့ပရောဖက်ပြုချက်များစွာ ပါဝင်တယ်။ ဒဏ္ဍာရီမဟုတ်ဘဲ တိကျခိုင်လုံတဲ့ သမိုင်းမှတ်တမ်းတွေ ပါရှိတယ်။ ဆေးသိပ္ပံအရလည်း တိကျမှန်ကန်တယ်။ ရှေ့နောက်ညီညွတ်မှုလည်းရှိတယ်။ ဒီနေ့ထက်တိုင် လက်တွေ့ကျအသုံးဝင်တယ်။—၆/၁၊ စာမျက်နှာ ၄-၈။

ဒံယေလ ၂:၄၅ မှာပါတဲ့ “အထက်ဆိုခဲ့ပြီးသော နိုင်ငံရှိသမျှ” ကို ဘယ်သူတွေနဲ့ ဖွဲ့စည်းထားတာလဲ။

ဒံယေလဖော်ပြခဲ့တဲ့ သတ္တုရုပ်တုကြီးရဲ့ အစိတ်အပိုင်းအသီးသီးနဲ့ ပုံဆောင်ထားတဲ့ အာဏာစက်တွေ ဒါမှမဟုတ် အစိုးရတွေကို ရည်ညွှန်းတယ်။—၆/၁၅၊ စာမျက်နှာ ၁၇။

အင်္ဂလိပ်-အမေရိကန်ကမ္ဘာ့အာဏာစက်က ဘယ်အချိန်မှာ ကျမ်းစာပရောဖက်ပြုချက်မှာပါတဲ့ သတ္တမမြောက် ကမ္ဘာ့အာဏာစက် ဖြစ်လာသလဲ။

ပထမကမ္ဘာစစ်အတွင်းမှာ ဗြိတိန်နဲ့ အမေရိကန်က သိသာထင်ရှားတဲ့နည်းနဲ့ ပေါင်းစည်းပြီး အတူလုပ်ဆောင်တဲ့အချိန်မှာ သူတို့ဟာ ပူးတွဲကမ္ဘာ့အာဏာစက်အဖြစ် တည်ရှိလာတယ်။—၆/၁၅၊ စာမျက်နှာ ၁၉။

ဘုရားသခင်က နောင်တယူသူတွေရဲ့အပြစ်ကို ဘယ်လိုနည်းနဲ့ ခွင့်လွှတ်ပြီး မေ့ပစ်လိုက်သလဲ။

ယေဟောဝါက မိမိချစ်မြတ်နိုးသူတွေကို ဒီလိုပြောတယ်– ‘ငါသည် သူတို့မကောင်းမှုများကိုလွှတ်၍ အပြစ်များကိုလည်း သတိမရဘဲနေမည်။’ (ယေ. ၃၁:၃၄၊ သမ္မာ) ဘုရားသခင်က ရွေးနုတ်ဖိုးအပေါ် အခြေခံပြီး အပြစ်တွေကို ခွင့်လွှတ်ပေးနိုင်တယ်။ ခွင့်လွှတ်လိုက်တဲ့အခါ ခွင့်လွှတ်ပြီးသားအပြစ်တွေကို အပြစ်ပေးဖို့ ပြန်မဖော်တဲ့ သဘောမျိုးနဲ့ မေ့ပစ်ခြင်းဖြစ်တယ်။—၇/၁၊ စာမျက်နှာ ၁၈။

သမ္မာကျမ်းစာပါ အံ့ဖွယ်အမှုတွေကို ကျွန်ုပ်တို့ ဘာကြောင့် ယုံကြည်စိတ်ချနိုင်သလဲ။

အံ့ဖွယ်ဖြစ်ရပ် တော်တော်များများက လူရှေ့သူရှေ့မှာ ဖြစ်ပျက်ခဲ့တာဖြစ်တယ်၊ တိတ်တဆိတ်ဖြစ်ပျက်ခဲ့တာမဟုတ်ဘူး။ အံ့ဖွယ်ဖြစ်ရပ်တွေက အရမ်းကိုရိုးရှင်းပါတယ်၊ အထူးဇာတ်ဝင်အသုံးအဆောင်တွေ မပါဘူး။ လူတွေကိုမဟုတ်ဘဲ ဘုရားသခင်ကို ဂုဏ်တင်ဖို့ ပြုလုပ်ခဲ့ကြတယ်။ အံ့ဖွယ်အမှုအမျိုးမျိုးကို ပြုလုပ်ခဲ့ပြီး အဲဒီအချိန်မှာရှိတဲ့ ဆန့်ကျင်သူတွေတောင် အံ့ဖွယ်အမှုတွေဖြစ်ခဲ့တာကို စောဒကမတက်ခဲ့ဘူး။ ဒါတွေက သမ္မာကျမ်းစာမှာပါတဲ့ အံ့ဖွယ်အမှုတွေကို ကျွန်ုပ်တို့ ယုံကြည်စိတ်ချနိုင်တဲ့ အကြောင်းရင်းတွေဖြစ်တယ်။—၈/၁၊ စာမျက်နှာ ၇-၈။