၁။ လူတချို့က နိုင်ငံခြားသားတွေကို ဘယ်လိုသဘောထားသလဲ။ အဲဒီလိုသဘောထားတာက ဘာကြောင့်မှားသလဲ။

ပြီးခဲ့တဲ့ဆောင်းပါးမှာ လေ့လာခဲ့တဲ့အတိုင်း လူတချို့က တိုင်းတစ်ပါးသားတွေ၊ တခြားနိုင်ငံကလာတဲ့ နိုင်ငံခြားသားတွေကို မကြိုက်ကြဘူး။ သူတို့ကိုယ်သူတို့ နိုင်ငံခြားသားတွေထက် ပိုမြတ်တယ်လို့ ယူဆကြတယ်။ အဲဒီလိုသဘောထားတာက မေတ္တာမဲ့ရာကျပါတယ်။ လူတစ်ယောက်က တခြားတစ်ယောက်ထက် ပိုမြတ်တယ်ဆိုတာ မရှိပါဘူး။ လူသားမျိုးနွယ်ဆိုတဲ့စာအုပ်မှာ “သမ္မာကျမ်းစာတွင် ဖော်ပြသကဲ့သို့ လူသားမျိုးနွယ်အားလုံးသည် ညီအစ်ကိုမောင်နှမများ ဖြစ်ကြ၏” လို့ ဖော်ပြထားတယ်။ မောင်နှမတွေတောင်မှ တစ်ယောက်နဲ့တစ်ယောက် မတူကြဘူး၊ ဒါပေမဲ့ ညီအစ်ကိုမောင်နှမတွေပဲဖြစ်တယ်။

၂၊ ၃။ ရှေးခေတ်အစ္စရေးလူတွေကြားမှာနေတဲ့ နိုင်ငံခြားသားတွေကို ယေဟောဝါ ဘယ်လိုသဘောထားသလဲ။

^၂ ကျွန်ုပ်တို့ ဘယ်မှာပဲနေထိုင်ပါစေ အဲဒီနေရာမှာ နိုင်ငံခြားသားတွေ ရှိတယ်။ ရှေးခေတ်အစ္စရေးလူတွေဟာ ပညတ်ပဋိညာဉ်ကြောင့် ယေဟောဝါနဲ့ အထူးရင်းနှီးတဲ့ဆက်ဆံရေးရှိခဲ့ကြတယ်။ အစ္စရေးလူမျိုးမဟုတ်သူတွေက အစ္စရေးလူတွေလောက် အခွင့်အရေးမရကြဘူး၊ ဒါပေမဲ့ သူတို့ကို မျှမျှတတ၊ လေးလေးစားစား ဆက်ဆံဖို့ ပညတ်တရားက တောင်းဆိုတယ်။ ဒါက ကျွန်ုပ်တို့အတွက် ပုံသက်သေကောင်းပဲ။ ယနေ့နိုင်ငံတိုင်းမှာ နိုင်ငံခြားသားတွေရှိတယ်။ ခရစ်ယာန်စစ်တွေအနေနဲ့ နိုင်ငံခြားသားတွေကို မလိုလားတဲ့သဘောနဲ့ တစ်ဖက်စောင်းနင်း ဆက်ဆံတာမျိုး မလုပ်ရဘူး။ ဘာကြောင့်လဲ။ တမန်တော်ပေတရုက ‘ဘုရားသခင်သည် မျက်နှာလိုက်တော်မမူ၊ လူအမျိုးမျိုးတို့တွင် ဘုရားသခင်ကိုကြောက်ရွံ့၍ ဖြောင့်မတ်ခြင်းတရား ကျင့်သုံးသောသူကို နှစ်သက်လက်ခံတော်မူ၏’ လို့ပြောခဲ့တယ်။—တ. ၁၀:၃၄၊ ၃၅။

^၃ ရှေးခေတ်အစ္စရေးလူတွေကြားမှာနေထိုင်တဲ့ နိုင်ငံခြားသားတွေဟာ အကျိုးခံစားကြရတယ်။ ဘာကြောင့်လဲဆိုတော့ ယေဟောဝါက နိုင်ငံခြားသားတွေကို လက်ခံတယ်။ နောက်ပိုင်းမှာ တမန်တော်ပေါလုက ယေဟောဝါရဲ့သဘောထားနဲ့ပတ်သက်ပြီး ဒီလိုပြောခဲ့တယ်– “ကိုယ်တော်သည် ဂျူးတို့၏ဘုရားသခင်သာ ဖြစ်တော်မူသလော။ လူမျိုးခြားတို့၏ဘုရားသခင် လည်း ဖြစ်တော်မူသည် မဟုတ်လော။ မှန်ပေ၏။ လူမျိုးခြားတို့၏ဘုရားသခင်လည်း ဖြစ်တော်မူ၏။”—ရော. ၃:၂၉၊ ယောလ ၂:၃၂။

၄။ “ဘုရားသခင်၏အစ္စရေးလူမျိုး” မှာ ဘာကြောင့် နိုင်ငံခြားသားမရှိဘူးလို့ ပြောနိုင်သလဲ။

^၄ ဘိသိက်ခံခရစ်ယာန်တွေနဲ့ ပဋိညာဉ်တရားသစ်ဖွဲ့ပြီးနောက်မှာတော့ ဇာတိအစ္စရေးလူတွေဟာ ဘုရားသခင်နဲ့ အထူးဆက်ဆံရေးမရှိတော့ဘူး။ ဘိသိက်ခံခရစ်ယာန်တွေဟာ “ဘုရားသခင်၏အစ္စရေးလူမျိုး” ဖြစ်လာတယ်။ (ဂလ. ၆:၁၆) ဒီလူမျိုးသစ်မှာတော့ “ဂျူးလူမျိုး၊ ဂရိလူမျိုးဟူ၍လည်းကောင်း၊ အရေဖျားလှီးခြင်းခံသူ၊ မခံသူဟူ၍လည်းကောင်း၊ တိုင်းတစ်ပါးသား၊ သကုသိလူ ဟူ၍လည်းကောင်း၊ ကျွန်၊ လွတ်လပ်သူဟူ၍လည်းကောင်း မရှိတော့ချေ။ ခရစ်တော်မူကား အရာခပ်သိမ်းဖြစ်၍ အလုံးစုံတို့၌ ရှိတော်မူ၏” ဆိုပြီး ပေါလု ရှင်းပြခဲ့တယ်။ (ကော. ၃:၁၁) ဒါကြောင့် ဘိသိက်ခံ ခရစ်ယာန်အသင်းတော်မှာ ဘယ်သူ့ကိုမှ နိုင်ငံခြားသားလို့ ခေါ်လို့မရပါဘူး။

၅၊ ၆။ (က) ဟေရှာယ ၆၁:၅၊ ၆ နဲ့ပတ်သက်ပြီး ဘယ်မေးခွန်း ပေါ်လာနိုင်သလဲ။ (ခ) ဟေရှာယကျမ်းမှာပါတဲ့ “ယေဟောဝါရဲ့ယဇ်ပုရောဟိတ်တွေ” နဲ့ “တိုင်းတစ်ပါးသားတွေ” က ဘယ်သူတွေလဲ။ (ဂ) “ယေဟောဝါရဲ့ယဇ်ပုရောဟိတ်တွေ” နဲ့ “တိုင်းတစ်ပါးသားတွေ” ဟာ ဘယ်လိုနည်းနဲ့ အတူတကွ လုပ်ဆောင်ကြသလဲ။

^၅ ဒါပေမဲ့ တချို့က ခရစ်ယာန်အသင်းတော်မှာပြည့်စုံနေတဲ့ ပရောဖက်ပြုချက်တစ်ခုပါဝင်တဲ့ ဟေရှာယ ၆၁ ကို ထောက်ပြလာနိုင်တယ်။ အခန်းငယ် ၆ မှာ “ယေဟောဝါရဲ့ယဇ်ပုရောဟိတ်တွေ” အဖြစ် အမှုဆောင်မယ့်သူတွေအကြောင်း ဖော်ပြထားတယ်။ ဒါပေမဲ့ အငယ် ၅ မှာတော့ “ယဇ်ပုရောဟိတ်တွေ” ရဲ့အလုပ်ကို ကူညီပေးမယ့် “တိုင်းတစ်ပါးသားတွေ” အကြောင်း ဖော်ပြထားတယ်။ အဲဒါကို ဘယ်လိုနားလည်ရမလဲ။

^၆ အဲဒီမှာပါတဲ့ “ယေဟောဝါရဲ့ယဇ်ပုရောဟိတ်တွေ” ဟာ ဘိသိက်ခံခရစ်ယာန်တွေဖြစ်ပြီး “ပထမထမြောက်ခြင်း၌ ပါဝင်သောသူ” တွေဖြစ်တယ်၊ ‘ဘုရားသခင်နဲ့ ခရစ်တော်ရဲ့ယဇ်ပုရောဟိတ်များ ဖြစ်ကြလိမ့်မယ်။ ခရစ်တော်နဲ့အတူ ဘုရင်များအဖြစ် အနှစ်တစ်ထောင် အုပ်စိုးရလိမ့်မယ်။’ (ဗျာ. ၂၀:၆) သူတို့တွေအပြင် မြေကြီးပေါ်မှာ အသက်ရှင်ဖို့ မျှော်လင့်တဲ့ သစ္စာရှိခရစ်ယာန်တွေလည်း အများကြီး ရှိသေးတယ်။ သူတို့ဟာ ကောင်းကင်မှာအမှုဆောင်မယ့်သူတွေနဲ့ တရင်းတနှီးပေါင်းသင်းပြီး အတူတကွ လုပ်ဆောင်ကြတယ်။ ဒါပေမဲ့ မြေကြီးမျှော်လင့်ချက်ရှိသူတွေဟာ “ဘုရားသခင်၏အစ္စရေးလူမျိုး” မဟုတ်တဲ့အတွက် တိုင်းတစ်ပါးသားတွေနဲ့တူတယ်။ သူတို့ဟာ “ယေဟောဝါရဲ့ယဇ်ပုရောဟိတ်တွေ” နဲ့အတူ “လယ်သမားတွေ၊” “စပျစ်ခြံလုပ်သားတွေ” အဖြစ် ပျော်ပျော်ရွှင်ရွှင်လုပ်ဆောင်ကြတယ်။ သူတို့တွေဟာ တခြားသူတွေကို အမှန်တရားအကြောင်း ဟောပြောခြင်း၊ သွန်သင်ခြင်းအားဖြင့် ဘုရားသခင်ကိုဂုဏ်တင်တဲ့ ဘိသိက်ခံတွေကို ကူညီပေးကြတယ်။ ဘိသိက်ခံတွေရော၊ “အခြားသိုး”  တွေပါ လူတွေကို အမှန်တရားအကြောင်း သင်ပေးပြီး အမှန်တရားနဲ့အညီအသက်ရှင်ဖို့ မေတ္တာပါပါ ကူညီပေးကြတယ်။—ယော. ၁၀:၁၆။

၇။ ဒီနေ့ခရစ်ယာန်တွေဟာ အာဗြဟံနဲ့ ကျမ်းစာခေတ်က သစ္စာရှိသူတွေနဲ့ ဘယ်လိုတူသလဲ။

^၇ ပြီးခဲ့တဲ့ဆောင်းပါးမှာ လေ့လာခဲ့တဲ့အတိုင်း ခရစ်ယာန်စစ်တွေဟာ စာတန့်ဆိုးညစ်တဲ့လောကရဲ့ တိုင်းတစ်ပါးသားများ၊ ခေတ္တနေထိုင်သူများနဲ့တူတယ်။ သူတို့တွေဟာ စာတန့်လောကရဲ့အစိတ်အပိုင်းမဖြစ်လိုပဲ “ထိုပြည်တွင် သူစိမ်းများ၊ ခေတ္တနေထိုင်သူများ” အဖြစ်နေထိုင်ကြတဲ့ အာဗြဟံနဲ့ ကျမ်းစာခေတ်က သစ္စာရှိသူတွေနဲ့တူတယ်။ (ဟေဗြဲ ၁၁:၁၃) ကျွန်ုပ်တို့မှာကောင်းကင်မျှော်လင့်ချက်ရှိသည်ဖြစ်စေ၊ မြေကြီးမျှော်လင့်ချက်ရှိသည်ဖြစ်စေ အာဗြဟံလို ယေဟောဝါနဲ့ အထူးဆက်ဆံရေးရှိနိုင်ပါတယ်။ ကျမ်းရေးသူယာကုပ်က အဲဒီအချက်ကို ရှင်းပြခဲ့တယ်– “‘အာဗြဟံသည် ယေဟောဝါဘုရားကို ယုံကြည်သဖြင့် သူ၏ယုံကြည်ခြင်းကို ဖြောင့်မတ်ခြင်းဟု ယူမှတ်တော်မူ၏။’ . . . သို့ဖြင့် သူသည် ‘ယေဟောဝါဘုရား၏မိတ်ဆွေ’ ဟုလည်း အခေါ်ခံရ၏။’”—ယာ. ၂:၂၃။

၈။ အာဗြဟံကို ယေဟောဝါ ဘာကတိပေးခဲ့သလဲ။ ဒီကတိနဲ့ပတ်သက်ပြီး အာဗြဟံ ဘယ်လိုခံစားခဲ့ရသလဲ။

^၈ အာဗြဟံနဲ့ သူ့ရဲ့သားစဉ်မြေးဆက်တွေကြောင့် မြေကြီးပေါ်မှာရှိတဲ့ လူမျိုးတစ်မျိုးသာမဟုတ်ဘဲ လူမျိုးအားလုံး ကောင်းချီးခံစားရမယ်လို့ ဘုရားသခင် ကတိပေးခဲ့တယ်။ (ကမ္ဘာဦး ၂၂:၁၅-၁၈ ကိုဖတ်ပါ။) အာဗြဟံ သေဆုံးပြီးနောက်မှ ဘုရားသခင့်ကတိတော်ပြည့်စုံတာဖြစ်ပေမဲ့ ကတိတော်တကယ်ပြည့်စုံမယ်ဆိုတာကို အာဗြဟံယုံကြည်ခဲ့တယ်။ အာဗြဟံရဲ့သက်တမ်းတစ်ဝက်လောက်က မိသားစုနဲ့အတူ တစ်နေရာပြီး တစ်နေရာ ပြောင်းရွှေ့နေရတယ်။ အဲဒီအချိန်တစ်လျှောက်လုံးမှာ အာဗြဟံဟာ ယေဟောဝါနဲ့ရင်းနှီးတဲ့ဆက်ဆံရေးကို ဆက်ထိန်းသိမ်းခဲ့တယ်။

၉၊ ၁၀။ (က) အာဗြဟံကို ကျွန်ုပ်တို့ ဘယ်လိုတုပနိုင်သလဲ။ (ခ) ကျွန်ုပ်တို့ဟာ ဘာအတွက် လူတွေကို ဖိတ်ခေါ်နေသလဲ။

^၉ ယေဟောဝါရဲ့ကတိတော်ပြည့်စုံဖို့ ဘယ်လောက်အထိ စောင့်ရမလဲဆိုတာ မသိခဲ့ပေမဲ့ အာဗြဟံဟာ ယေဟောဝါကို ဆက်ချစ်ပြီး ဝတ်ပြုကိုးကွယ်ခဲ့တယ်။ မိမိဟာ ခေတ္တတည်းခိုသူသာဖြစ်တယ်ဆိုတဲ့အချက်ကို အမြဲသတိရလို့ တစ်နေရာမှာ အခြေချပြီး အမြဲနေထိုင်ဖို့ မလုပ်ဆောင်ခဲ့ဘူး။ (ဟေဗြဲ ၁၁:၁၄၊ ၁၅) ကျွန်ုပ်တို့ဟာ အာဗြဟံရဲ့နမူနာအတိုင်း လိုက်လျှောက်ပြီး ရိုးရှင်းတဲ့ဘဝနဲ့ နေထိုင်ဖို့လိုတယ်။ ဥစ္စာပစ္စည်းအများကြီးပိုင်ဆိုင်ဖို့၊ အသိုင်းအဝိုင်းမှာ ထင်ရှားကျော်ကြားဖို့၊ အလုပ်အကိုင်ကောင်းကောင်းရဖို့ စတာတွေကိုပဲ အလွန်အမင်း အာရုံမစိုက်ရဘူး။ ပျက်စီးတော့မယ့် ဒီလောကစနစ်မှာ သာမန်ဘဝပုံစံလို့ခေါ်တဲ့ ဘဝပုံစံမျိုးနဲ့ အသက်ရှင်ဖို့ ဘာကြောင့် ကြိုးစားနေမှာလဲ။ ခဏသာ တည်ရှိမယ့် ဒီလောကကို ဘာကြောင့် ဖက်တွယ်စွဲလမ်းနေမှာလဲ။ အာဗြဟံလိုပဲ ကျွန်ုပ်တို့ဟာ ဒီလောကထက် ပိုကောင်းတဲ့အရာကို စောင့်မျှော်နေကြတယ်၊ ဘုရားသခင့်ကတိတော်တွေ ပြည့်စုံလာမယ့်နေ့အထိ စိတ်ရှည်ရှည် စောင့်လိုစိတ်ရှိကြတယ်။—ရောမ ၈:၂၅ ကိုဖတ်ပါ။

^၁၀ အာဗြဟံနဲ့ အာဗြဟံရဲ့အမျိုးအနွယ်အားဖြင့် ကောင်းချီးတွေခံစားရဖို့ ယနေ့အချိန်ထိ လူမျိုးအပေါင်းကလူတွေကို ယေဟောဝါ ဖိတ်ခေါ်နေဆဲပဲ။ “ယေဟောဝါရဲ့ယဇ်ပုရောဟိတ်တွေ” ဖြစ်တဲ့ ဘိသိက်ခံတွေနဲ့ “တိုင်းတစ်ပါးသားတွေ” ဖြစ်တဲ့ အခြားသိုးတွေဟာ ကမ္ဘာတစ်ဝန်းမှာ ဘာသာစကား ၆၀၀ ကျော်နဲ့ ဖိတ်ခေါ်နေတယ်။

၁၁။ ဘာလုပ်ဖို့အတွက် လူမျိုးအားလုံးကို ရှောလမုန် ဖိတ်ခေါ်ခဲ့သလဲ။

^၁၁ ဘီစီ ၁၀၂၆ မှာ ဝတ်ပြုရာအိမ်တော်ကို ယေဟောဝါထံအပ်နှံတုန်းက ရှောလမုန်ရဲ့ဆုတောင်းချက်မှာ လူမျိုးအားလုံးအပေါ် ယေဟောဝါရဲ့သဘောထားကို သိမြင်နိုင်တယ်။ အိမ်တော်ကိုလာပြီး ဆုတောင်းတဲ့လူမျိုးအားလုံးရဲ့ဆုတောင်းချက်ကို နားထောင်ပေးဖို့ ရှောလမုန်က ယေဟောဝါကို တောင်းဆိုခဲ့တယ်။ ဒါက အာဗြဟံကို ယေဟောဝါပေးခဲ့တဲ့ကတိတော်ကနေ အကျိုးခံစားရစေတဲ့ နည်းတစ်နည်းဖြစ်တယ်။ ရှောလမုန် ဒီလိုဆုတောင်းခဲ့တယ်– “ဒါ့အပြင် ကိုယ်တော့်လူမျိုးအစ္စရေးမဟုတ်တဲ့ တိုင်းတစ်ပါးသားနဲ့ ကိုယ်တော့်နာမည်ကြောင့် ရပ်ဝေးကနေလာတဲ့သူဟာ (ကိုယ်တော်ရဲ့ ကြီးမြတ်တဲ့နာမည်၊ ကိုယ်တော်ရဲ့ တန်ခိုးကြီးတဲ့လက်၊ အားကြီးတဲ့လက်ရုံးအကြောင်း သူတို့ကြားသိတဲ့အတွက်) ဒီအိမ်တော်ကိုလာပြီး ဆုတောင်းမယ်ဆိုရင် ကိုယ်တော်နေထိုင်ရာအရပ်  ကောင်းကင်ကနေ နားထောင်ပေးပါ။ ကိုယ်တော့်ဆီမှာတိုင်းတစ်ပါးသားတွေ တောင်းလျှောက်သမျှအတိုင်း လုပ်ဆောင်ပေးပါ။ ဒီနည်းနဲ့ မြေကြီးပေါ်ကလူမျိုးအားလုံး ကိုယ်တော့်နာမည်ကို သိလာပြီး ကိုယ်တော့်လူမျိုးအစ္စရေးတွေလိုပဲ ကိုယ်တော့်ကိုကြောက်ရွံ့ဖို့ . . . ဖြစ်ပါတယ်။”—၃ ရာ. ၈:၄၁–၄၃၊ ကဘ။

၁၂။ ယေဟောဝါသက်သေတွေဟာ ဘာကြောင့် နိုင်ငံခြားသားတွေနဲ့တူသလဲ။

^၁၂ ယေဟောဝါသက်သေတွေဟာ နိုင်ငံခြားသားတွေနဲ့တူတယ်။ သူတို့ဟာ ကမ္ဘာတစ်ဝန်း နိုင်ငံများစွာမှာ နေထိုင်ကြတယ်၊ ဒါပေမဲ့ ဘုရားသခင့် ကောင်းကင်နိုင်ငံတော်နဲ့ ဘုရင်ယေရှုခရစ်ကိုသာ ထောက်ခံကြတယ်။ ဒါကြောင့် သူတို့ဟာ သူတို့နေထိုင်တဲ့နိုင်ငံရဲ့ နိုင်ငံရေးတွေမှာ မပါဝင်ကြဘူး၊ တခြားသူတွေက ယေဟောဝါသက်သေတွေ နိုင်ငံရေးမှာ ပါဝင်သင့်တယ်လို့ ယူဆရင်တောင် မပါဝင်ကြဘူး။

၁၃။ (က) ‘နိုင်ငံခြားသား’ ဆိုတာက ဘယ်လိုနည်းနဲ့ ရှုမြင်ချက်တစ်ခုသာဖြစ်သလဲ။ (ခ) ယေဟောဝါရဲ့မူလရည်ရွယ်ချက်မှာ နိုင်ငံခြားသားဆိုတာ ပါသလား။ ရှင်းပြပါ။

^၁၃ တစ်ခါတလေမှာ တချို့သူတွေရဲ့ စကားပြောဆိုပုံ၊ ထုံးစံဓလေ့၊ အသွင်အပြင်နဲ့ ဝတ်စားဖြီးလိမ်းပုံကြောင့် သူတို့ဟာ နိုင်ငံခြားသားတွေဖြစ်တယ်ဆိုတာ သိရတယ်။ ဒါပေမဲ့ လူမျိုးအားလုံးမှာရှိတဲ့ တူညီချက်တွေက အဲဒီမတူညီချက်တွေထက် ပိုအရေးပါတယ်။ ဒါကြောင့် လူတစ်ယောက်ကို ကျွန်ုပ်တို့နဲ့ မတူဘူးလို့ မစဉ်းစားဘူးဆိုရင် သူ့ကို နိုင်ငံခြားသားလို့ မမြင်တော့ဘူး။ ကမ္ဘာတစ်ခုလုံးမှာ အစိုးရတစ်ခု၊ နိုင်ငံတစ်ခုတည်းသာ ရှိမယ်ဆိုရင် ဘယ်သူမှ နိုင်ငံခြားသားဖြစ်တော့မှာမဟုတ်ဘူး။ ယေဟောဝါရဲ့မူလရည်ရွယ်ချက်က လူသားအားလုံးကို မိမိရဲ့ အုပ်ချုပ်မှုအောက်မှာ လူမျိုးတစ်မျိုးဖြစ်စေဖို့ပဲ။ လူမျိုးအားလုံးကလူတွေ တစ်ယောက်ကိုတစ်ယောက် နိုင်ငံခြားသားအဖြစ် မရှုမြင်ဖို့ဆိုတာ ဖြစ်နိုင်ပါ့မလား။

၁၄၊ ၁၅။ ယေဟောဝါသက်သေတွေဟာ အဖွဲ့တစ်ဖွဲ့အနေနဲ့ ဘာကို လုပ်ဆောင်နိုင်ခဲ့ကြသလဲ။

^၁၄ တစ်ကိုယ်ကောင်းဆန်ပြီး ကိုယ့်လူမျိုးသာ အမြတ်ဆုံးလို့ယူဆသူတွေ အများကြီးရှိတဲ့လောကမှာ ကျွန်ုပ်တို့ အသက်ရှင်နေထိုင်ကြတယ်။ ဒါပေမဲ့ လူမျိုးအားလုံးကိုချစ်တဲ့သူတချို့ ရှိသေးတယ်ဆိုတာ သိရလို့ ဝမ်းသာစရာပဲ။ တခြားလူတွေအပေါ် ရှုမြင်တဲ့ ကျွန်ုပ်တို့ရဲ့အမြင်ကို ပြုပြင်ဖို့ခက်တယ်ဆိုတာတော့ မှန်ပါတယ်။ စီအဲန်အဲန် ရုပ်မြင်သံကြားအသံလွှင့်ဌာနကို စတင်တည်ထောင်သူ တက်ဒ် တန်နာဟာ ကမ္ဘာတစ်ဝန်းက အရည်အချင်းရှိတဲ့ ပါရမီရှင်များစွာနဲ့အတူ တွဲအလုပ်လုပ်ခဲ့ပြီး ဒီလိုပြောခဲ့တယ်– “တခြားနိုင်ငံကလာတဲ့သူတွေဟာ ‘နိုင်ငံခြားသားတွေ’ မဟုတ်ဘဲ ကမ္ဘာဂြိုဟ်တစ်ခုရဲ့ နိုင်ငံသားချင်းတွေဖြစ်တယ်ဆိုတာ ကျွန်တော်သိမြင်လာတယ်။ ‘နိုင်ငံခြား’ ဆိုတဲ့စကားလုံးက ချိုးနှိမ်တဲ့စကားလုံးဖြစ်တယ်လို့ ကျွန်တော်စတင် ခံစားလာရတယ်၊ စီအဲန်အဲန်မှာ အသံလွှင့်တဲ့အခါမှာပဲဖြစ်ဖြစ်၊ ရုံးတွင်းမှာ အချင်းချင်းစကားပြောတဲ့အခါမှာပဲဖြစ်ဖြစ် ဒီစကားလုံးကို မသုံးဖို့ စည်းကမ်းထုတ်ခဲ့တယ်။ အဲဒီစကားလုံးအစား ‘နိုင်ငံတကာ’ ဆိုတဲ့စကားလုံးကို အသုံးပြုခဲ့တယ်။”

^၁၅ ယေဟောဝါသက်သေတွေဟာ လူမျိုးအားလုံးကလူတွေကို ဘုရားသခင်ရှုမြင်သလို ရှုမြင်တဲ့ တစ်ခုတည်းသော အဖွဲ့ဖြစ်တယ်။ ကိစ္စရပ်တွေကို ယေဟောဝါရှုမြင် သလို ရှုမြင်ခြင်းအားဖြင့် တခြားသူတွေအပေါ် သူတို့ရဲ့ထင်မြင်ယူဆပုံနဲ့ ခံစားချက်တွေကို ပြောင်းလဲခဲ့ကြတယ်။ တခြားနိုင်ငံကလာတဲ့သူတွေကို မယုံသင်္ကာစိတ်၊ သံသယစိတ်၊ မုန်းတီးစိတ်နဲ့ကြည့်မယ့်အစား လူတွေမှာရှိတဲ့ မတူညီတဲ့ ပင်ကိုစရိုက်နဲ့ အစွမ်းအစတွေကို တန်ဖိုးထားလေးမြတ်တတ်ဖို့ သင်ယူကြတယ်။ ယေဟောဝါသက်သေတွေ အဲဒီလိုလုပ်ဆောင်နိုင်တဲ့အကြောင်း၊ အဲဒါက တခြားသူတွေနဲ့ သင့်ဆက်ဆံပုံအပေါ် ဘယ်လိုအကျိုးသက်ရောက်တယ်ဆိုတဲ့အကြောင်း သင်အလေးအနက် စဉ်းစားဖူးသလား။

၁၆၊ ၁၇။ ဗျာဒိတ် ၁၆:၁၆ နဲ့ ဒံယေလ ၂:၄၄ ပြည့်စုံလာတဲ့အခါ သင့်အသက်တာ ဘယ်လိုရှိမလဲ။

^၁၆ မကြာခင် တိုင်းနိုင်ငံအားလုံးဟာ အာမဂေဒုန်မှာ ဘုရားသခင့်အုပ်ချုပ်မှုကို ဆန့်ကျင်တိုက်ခိုက်ပါလိမ့်မယ်။ (ဗျာ. ၁၆:၁၄၊ ၁၆၊ ၁၉:၁၁-၁၆) လွန်ခဲ့တဲ့ နှစ်ပေါင်း ၂,၅၀၀ ကျော်က ပရောဖက်ဒံယေလဟာ လူ့အစိုးရတွေကြုံတွေ့ရမယ့် အဖြစ်အပျက်အကြောင်း ဒီလို ရေးခဲ့တယ်– “အဲဒီဘုရင်တွေလက်ထက်မှာ ကောင်းကင်မှာရှိတဲ့ ဘုရားသခင်က ဘယ်တော့မှပျက်စီးမှာမဟုတ်တဲ့ နိုင်ငံတစ်ခုကို တည်ထောင်လိမ့်မယ်။ အဲဒီနိုင်ငံက တခြားလူတွေလက်ထဲ ရောက်သွားမှာမဟုတ်တဲ့အပြင် ဒီနိုင်ငံအားလုံးကို ခြေမွဖျက်ဆီးပြီး ကာလအစဉ်အဆက်တည်လိမ့်မယ်။”—ဒံ. ၂:၄၄၊ ကဘ။

^၁၇ ဒါက သင့်အတွက် ဘာအဓိပ္ပာယ်ရှိသလဲဆိုတာ စဉ်းစားကြည့်ပါ။ အခုအချိန်မှာ နိုင်ငံတွေကို ပိုင်းခြားထားတဲ့ နယ်ခြားမျဉ်းတွေနဲ့ ကန့်သတ်ထားလို့ ကျွန်ုပ်တို့အားလုံးကို နိုင်ငံခြားသားလို့ ခေါ်လို့ရတယ်။ ဒါပေမဲ့ အာမဂေဒုန်ပြီးတဲ့နောက်မှာတော့ နယ်ခြားမျဉ်းတွေ ရှိတော့မှာမဟုတ်ဘူး။ လူတွေက တစ်ယောက်နဲ့တစ်ယောက်မတူဘဲ အမျိုးမျိုးရှိနေဦးမှာဖြစ်ပေမဲ့ ဒါက မျိုးပေါင်းစုံလင်လှတဲ့ ဘုရားသခင့်ဖန်ဆင်းခြင်းလက်ရာဖြစ်ကြောင်း ဖော်ပြပါလိမ့်မယ်။ ကျွန်ုပ်တို့အားလုံးမှာ ဒီလောက်ကောင်းတဲ့အနာဂတ်ရှိနေလို့ ကျွန်ုပ်တို့ရဲ့ဖန်ဆင်းရှင်ကို ချီးမွမ်းဂုဏ်တင်ရာမှာ ဆက်ပြီး အစွမ်းကုန်လုပ်ဆောင်သင့်တယ်။

၁၈။ ယေဟောဝါသက်သေတွေဟာ တစ်ယောက်ကိုတစ်ယောက် နိုင်ငံခြားသားလို့ မရှုမြင်ကြောင်း ဘယ်ဥပမာက ဖော်ပြသလဲ။

^၁၈ ကမ္ဘာတစ်ဝန်းကလူတွေ တစ်ယောက်ကိုတစ်ယောက် နိုင်ငံခြားသားလို့ မရှုမြင်တော့ဘူးဆိုတာ တကယ်ဖြစ်နိုင်ပါ့မလား။ တကယ်ဖြစ်လာမယ်ဆိုတာ အကြွင်းမဲ့ ယုံကြည်စိတ်ချနိုင်ပါတယ်။ အခုအချိန်မှာတောင် ယေဟောဝါသက်သေတွေဟာ တစ်ယောက်ကိုတစ်ယောက် နိုင်ငံခြားသားလို့ မရှုမြင်ကြဘူး။ ဥပမာ၊ သိပ်မကြာသေးခင်က သေးငယ်တဲ့ဌာနခွဲရုံးတွေကို တခြားနိုင်ငံတွေရဲ့ ဌာနခွဲရုံးတွေနဲ့ ပေါင်းလိုက်တယ်။ ရည်ရွယ်ချက်ကတော့ ဟောပြောခြင်းလုပ်ငန်းကို အရိုးရှင်း၊ အလွယ်ကူဆုံးနည်းနဲ့ လုပ်ဆောင်ဖို့ဖြစ်တယ်။ (မ. ၂၄:၁၄) တရားဥပဒေက ခွင့်ပြုသရွေ့ ပိုင်းခြားကန့်သတ်တဲ့နယ်ခြားမျဉ်းတွေကို ထည့်မတွက်ဘဲ ဒီဆုံးဖြတ်ချက်တွေဟာ အတည်ဖြစ်နေမယ်။ ဘုရားသခင့်နိုင်ငံတော်ဘုရင်ဖြစ်တဲ့ ယေရှုခရစ်က ယေဟောဝါသက်သေတွေ နယ်ခြားမျဉ်းတွေနဲ့ ခွဲခြားမခံရဖို့ ကူညီပေးနေတယ်။ မကြာခင်မှာ ယေရှုဟာ “အပြီးအောင်မြင်” မှာဖြစ်ပြီး နယ်ခြားအတားအဆီးတွေကို ဖယ်ရှားပစ်ပါလိမ့်မယ်။—ဗျာ. ၆:၂။

၁၉။ အမှန်တရားက ယေဟောဝါသက်သေတွေကို ဘာဖြစ်စေသလဲ။

^၁၉ ယေဟောဝါသက်သေတွေဟာ နိုင်ငံအသီးသီးကဖြစ်ပြီး ဘာသာစကားအမျိုးမျိုး ပြောကြတယ်။ ဒါပေမဲ့ သူတို့တွေဟာ အမှန်တရားကြောင့် စည်းလုံးလာကြပြီး သူတို့ရဲ့စည်းလုံးမှုက ဘယ်တော့မှ ပြိုကွဲမှာမဟုတ်ဘူး။ (ဇေဖနိ ၃:၉ ကိုဖတ်ပါ။) ကွဲပြားနေတဲ့ ဒီဆိုးညစ်တဲ့လောကအလယ်မှာ သူတို့ဟာ အပြည်ပြည်ဆိုင်ရာမိသားစုတစ်ခုအဖြစ် ရပ်တည်နေကြတယ်။ အခုအချိန်မှာ စည်းလုံးနေတဲ့ ဒီမိသားစုက ကမ္ဘာသစ်မှာ နိုင်ငံခြားသားတစ်ယောက်မှ ရှိတော့မှာမဟုတ်ဘူးဆိုတာ သက်သေပြနေတယ်။ အဲဒီအချိန်ကျရင် ကမ္ဘာပေါ်မှာရှိတဲ့သူတိုင်းက လူမျိုးအသီးသီးက လူတွေကို ညီအစ်ကိုမောင်နှမတွေအဖြစ် ရှုမြင်ကြပါလိမ့်မယ်။