ဆင်းရဲတဲ့မုဆိုးမဟာ သူ့ရဲ့တစ်ဦးတည်းသောသားကို ဖက်ထားတယ်။ သူ့မျက်စိကို သူမယုံနိုင်အောင် ဖြစ်နေတယ်။ ခုနတုန်းကပဲ အသက်မရှိတော့တဲ့ သူ့သားရဲ့အလောင်းကို ထွေးပိုက်ထားတာ။ အခုတော့ အသက်ပြန်ရှင်လာတဲ့ သားလေးရဲ့အပြုံးမျက်နှာကို စိတ်လှုပ်ရှားစွာ မြင်တွေ့နေရတယ်။ သူ့အိမ်မှာတည်းတဲ့ဧည့်သည်က “ဒီမှာကြည့်၊ သင့်သားအသက်ရှင်ပြီ” လို့ပြောတယ်။

စိတ်လှုပ်ရှားစရာ ဒီအဖြစ်အပျက်က လွန်ခဲ့တဲ့ အနှစ် ၃,၀၀၀ နီးပါးက ဖြစ်ပျက်ခဲ့တယ်။ ဒီအကြောင်းကို ၃ ဓမ္မရာဇဝင် အခန်းကြီး ၁၇ မှာဖတ်ရတယ်။ ဧည့်သည်ကတော့ ဘုရားသခင့်ပရောဖက် ဧလိယပဲ။ အမေက ဘယ်သူလဲ။ သူကတော့ ဇရတ်တမြို့မှာနေတဲ့ အမည်မဖော်ပြထားတဲ့ မုဆိုးမတစ်ယောက်ဖြစ်တယ်။ သူ့သား ရှင်ပြန်ထမြောက်လာတာဟာ သူ့ဘဝမှာ ယုံကြည်ခြင်းခိုင်ခံ့စေတဲ့ အဖြစ်အပျက်တစ်ခုပဲ။ သူ့အကြောင်းကို ဖတ်တဲ့အခါ ကျွန်ုပ်တို့အတွက် အရေးကြီးတဲ့သင်ခန်းစာတချို့ ရရှိစေတယ်။

မင်းဆိုးအာဟပ်အုပ်စိုးချိန်အတွင်းမှာ အချိန်အတန်ကြာ မိုးခေါင်စေမယ်လို့ ယေဟောဝါ ဆုံးဖြတ်ထားတယ်။ မိုးစခေါင်တဲ့အခါ ဘုရားသခင်က ဧလိယကို အာဟပ်ရန်ကနေလွတ်အောင် ဝှက်ထားပြီး အံ့ဩစရာကောင်းတဲ့နည်းနဲ့ ကျွေးမွေးခဲ့တယ်။ ကျီးအတွေက ဧလိယဆီ မုန့်နဲ့အသား ချီလာပေးတယ်။ အဲဒီနောက် ယေဟောဝါက ဧလိယကို “ထပါ၊ ဆိုင်ဒုန်ပြည်၊ ဇရတ်တမြို့ကိုသွားပြီး အဲဒီမှာနေထိုင်ပါ။ သင့်ကိုအစားအစာကျွေးဖို့ အဲဒီက မုဆိုးမတစ်ယောက်ကို ငါမှာထားမယ်” လို့ ပြောခဲ့တယ်။—၃ ရာ. ၁၇:၁-၉၊ ကဘ။

ဇရတ်တမြို့ကို ဧလိယရောက်တဲ့အခါ ထင်းကောက်နေတဲ့ ဆင်းရဲတဲ့မုဆိုးမတစ်ယောက်ကို တွေ့တယ်။ ဒီအမျိုးသမီးက ပရောဖက်ကို အစားအသောက်ပေးမယ့် သူလား။ သူကိုယ်တိုင်က ဆင်းရဲနေလို့ ဘယ်လိုလုပ်ပြီး တခြားသူကို ကျွေးနိုင်ပါ့မလဲ။ ဧလိယစိတ်ထဲမှာ အမျိုးမျိုးစဉ်းစားနေပေမဲ့ အဲဒီအမျိုးသမီးနဲ့ စကားစပြောခဲ့တယ်။ ဧလိယက “ငါသောက်ဖို့ ရေနည်းနည်းယူလာပါ” လို့ပြောတယ်။ မုဆိုးမက ရေယူဖို့ သွားတဲ့အခါမှာ ဧလိယက “ကျေးဇူးပြုပြီး မုန့်တစ်ချပ်ကိုလည်း ယူလာပေးပါ” လို့ ထပ်ပြောတယ်။ (၃ ရာ. ၁၇:၁၀၊ ၁၁၊ ကဘ) သောက်ဖို့ရေတစ်ခွက် ပေးရတာက မုဆိုးမအတွက် ပြဿနာမရှိပါဘူး၊ မုန့်ပေးဖို့ကျတော့ ခက်နေတယ်။

အမျိုးသမီးက “သင့်ဘုရားသခင်ယေဟောဝါ အသက်ရှင်တာ သေချာတဲ့အတိုင်း ကျွန်မမှာ ဘာမုန့်မှမရှိဘူး။ အိုးကြီးထဲမှာ ဂျုံမှုန့်လက်တစ်ဆုပ်စာနဲ့ အိုးသေးထဲမှာ ဆီနည်းနည်းပဲရှိတော့တယ်။ အိမ်ပြန်ပြီး ကျွန်မနဲ့ ကျွန်မသားအတွက် မုန့်လုပ်ဖို့ အခု ထင်းခွေနေတာပါ။ စားပြီးရင်တော့ ကျွန်မတို့သေဖို့ပဲရှိတယ်” လို့ ပြန်ပြောတယ်။ (၃ ရာ. ၁၇:၁၂၊ ကဘ) ဒီအပြန်အလှန် စကားပြောခန်းကနေ ကျွန်ုပ်တို့ ဘာသင်ယူနိုင်သလဲ။

ဧလိယဟာ ဘုရားသခင်ကိုကိုးကွယ်တဲ့ အစ္စရေးလူမျိုးတစ်ယောက်ဆိုတာကို မုဆိုးမသိတယ်။ ဒီအချက်ကို “သင့်ဘုရားသခင်ယေဟောဝါ အသက်ရှင်တာ သေချာတဲ့အတိုင်း” ဆိုတဲ့ မုဆိုးမရဲ့စကားအရ သိရတယ်။ မုဆိုးမက အစ္စရေးရဲ့ဘုရားသခင်အကြောင်း အနည်းအကျဉ်းသိပုံရပေမဲ့ ယေဟောဝါကို ကိုးကွယ်သူ မဟုတ်ဘူး။ သူက ယေဟောဝါကို “ငါ့ဘုရားသခင်” လို့မခေါ်ခဲ့ဘူး။ သူက ဆိုင်ဒုန်ပြည်၊ ဖိုနီးရှားမြို့တစ်မြို့ဖြစ်တဲ့ ဇရတ်တမြို့မှာ နေတယ်။ အဲဒီမြို့မှာ ဗာလဘုရားကို၀တ်ပြုသူတွေ အများကြီးရှိပုံရတယ်။ ဘယ်လိုပဲဖြစ်ပါစေ၊ ယေဟောဝါဟာ အဲဒီမုဆိုးမမှာရှိတဲ့ ထူးခြားချက်တစ်ခုကို မြင်တွေ့ခဲ့တယ်။

ဇရတ်တမြို့က ဆင်းရဲတဲ့မုဆိုးမဟာ ရုပ်တုကိုးကွယ်သူတွေကြားမှာ နေထိုင်တာဖြစ်ပေမဲ့ ယေဟောဝါကို ယုံကြည်ကြောင်း တင်ပြခဲ့တယ်။ ယေဟောဝါဟာ မုဆိုးမနဲ့ ပရောဖက် နှစ်ယောက်စလုံး အကျိုးခံစားရဖို့အတွက် ဧလိယကို မုဆိုးမဆီ လွှတ်လိုက်တယ်။ အဲဒီကနေ ကျွန်ုပ်တို့ အရေးကြီးတဲ့ သင်ခန်းစာတစ်ခု သင်ယူနိုင်ပါတယ်။

ဇရတ်တမြို့မှာနေတဲ့ ဗာလဝတ်ပြုသူအားလုံးဟာ အကျင့်ပျက်သူတွေ မဟုတ်ဘူး။ ယေဟောဝါဟာ ဧလိယကို မုဆိုးမဆီစေလွှတ်ခြင်းအားဖြင့် မိမိကိုမကိုးကွယ်သေးတဲ့ စိတ်နှလုံးကောင်းရှိသူတွေကို ဂရုစိုက်တယ်ဆိုတာ ဖော်ပြခဲ့တယ်။ “လူအမျိုးမျိုးတို့တွင် ဘုရားသခင်ကိုကြောက်ရွံ့၍ ဖြောင့်မတ်ခြင်းတရား ကျင့်သုံးသူကို နှစ်သက်လက်ခံတော်မူ” တယ်။—တ. ၁၀:၃၅။

သင့်ဒေသမှာ ဇရတ်တမြို့က မုဆိုးမနဲ့တူတဲ့သူ ဘယ်နှစ်ယောက်ရှိသလဲ။ သူတို့က အယူမှားဘာသာကို ကိုးကွယ်သူတွေအလယ်မှာ နေပေမဲ့ ပိုကောင်းတဲ့အရာတစ်ခုခုကို လိုလားတောင့်တနေတာဖြစ်နိုင်တယ်။ သူတို့ဟာ ယေဟောဝါအကြောင်း အနည်းအကျဉ်းသိတာ ဒါမှမဟုတ် လုံးဝမသိတာဖြစ်နိုင်တယ်၊ ဒါကြောင့် သူတို့ စစ်မှန်တဲ့ဘာသာကိုဝတ်ပြုဖို့ အကူအညီလိုတယ်။ ဒီလိုလူတွေကို သင်ရှာဖွေပြီး ကူညီပေးနေသလား။

ဧလိယက မုဆိုးမကို ဘာလုပ်ခိုင်းနေသလဲဆိုတာကို သေချာစဉ်းစားကြည့်ပါ။ မုဆိုးမက သူနဲ့ သူ့သားအတွက် တစ်နပ်စာမုန့်လုပ်ပြီး စားမယ်၊ စားပြီးရင်သေမယ်လို့ ဧလိယကို ပြောပြီးသားပဲ။ ဒါပေမဲ့ ဧလိယက “မစိုးရိမ်ပါနဲ့။ အိမ်ပြန်ပြီး သင်ပြောတဲ့အတိုင်းလုပ်ပါ။ ဒါပေမဲ့ ရှိတာလေးနဲ့ မုန့်လေးတစ်လုံးအရင်လုပ်ပြီး ငါ့အတွက် ယူလာပေးပါ။ ပြီးမှ သင်နဲ့ သင့်သားစားဖို့ လုပ်ပါ။ အစ္စရေးလူမျိုးရဲ့ဘုရားသခင် ယေဟောဝါက ‘မြေပေါ်မှာ ယေဟောဝါမိုးရွာစေတဲ့နေ့ မရောက်မချင်း အိုးကြီးထဲက ဂျုံမှုန့်ကုန်မှာမဟုတ်ဘူး။ အိုးသေးထဲက ဆီလည်း ပြတ်မှာမဟုတ်ဘူး’ ဆိုပြီး ပြောထားလို့ပဲ” လို့ ပြောလိုက်တယ်။—၃ ရာ. ၁၇:၁၁-၁၄၊ ကဘ။

‘ငါတို့မှာရှိတဲ့ နောက်ဆုံးစားစရာကို ပေးရမယ်၊ နောက်နေတာလား’ လို့ တချို့က ပြန်ပြောနိုင်ပါတယ်။ ဒါပေမဲ့ မုဆိုးမက အဲဒီလို ပြန်မပြောဘူး။ သူ ယေဟောဝါအကြောင်း အများကြီးမသိပေမဲ့ ဧလိယပြောတာကိုယုံပြီး ပြောတဲ့အတိုင်း လုပ်ခဲ့တယ်။ ဒီတောင်းဆိုမှုက သူ့အတွက် တကယ့် ယုံကြည်ခြင်းစမ်းသပ်မှုကြီးပဲ။ ဒါပေမဲ့ မုဆိုးမဟာ တကယ်မှန်ကန်တဲ့ဆုံးဖြတ်ချက် ချခဲ့တယ်။

ဘုရားသခင်က ဆင်းရဲတဲ့ အဲဒီမုဆိုးမကို လျစ်လျူမရှုခဲ့ဘူး။ ဧလိယ ကတိပေးထားတဲ့အတိုင်းပဲ ယေဟောဝါဟာ အစားအစာ ထပ်ဖြည့်ပေးခဲ့လို့ ဧလိယနဲ့ မုဆိုးမသားအမိဟာ မိုးခေါင်တဲ့ကာလ ကုန်တဲ့အထိ စားစရာအလုံအလောက် ရှိခဲ့တယ်။ အမှန်ပါပဲ “ဧလိယကတစ်ဆင့်ပြောတဲ့ ယေဟောဝါရဲ့စကားအတိုင်း အိုးကြီးထဲကဂျုံမှုန့် မကုန်ဘူး။ အိုးသေး ထဲကဆီလည်း မပြတ်ဘူး။” (၃ ရာ. ၁၇:၁၆၊ ကဘ; ၁၈:၁) မုဆိုးမသာ ဧလိယပြောတဲ့အတိုင်း မလုပ်ခဲ့ဘူးဆိုရင် သူ့မှာရှိတဲ့ ဂျုံမှုန့်နဲ့ဆီက တကယ်ပဲ သူ့ရဲ့ နောက်ဆုံးစားစရာဖြစ်သွားနိုင်တယ်။ ဒါပေမဲ့ သူက ယေဟောဝါကိုယုံကြည်ပြီး ဧလိယကို အရင်ကျွေးခဲ့တယ်။

ဘုရားသခင်ဟာ သူ့ကို ယုံကြည်ကြောင်းတင်ပြသူတွေကို ကောင်းချီးပေးတယ်ဆိုတာ ဒီအဖြစ်အပျက်ကနေ သင်ယူရရှိနိုင်ပါတယ်။ သင့်ရဲ့သစ္စာသမာဓိ စမ်းသပ်ခံရတဲ့အခါ ယေဟောဝါကို ယုံကြည်တယ်ဆိုရင် ကိုယ်တော် သင့်ကို ကူညီပေးပါလိမ့်မယ်။ သင် ခံနိုင်ရည်တင်ပြနိုင်ဖို့အတွက် ကိုယ်တော်ဟာ သင့်ရဲ့ ထောက်ပံ့ပေးသူ၊ ကာကွယ်ပေးသူနဲ့ မိတ်ဆွေဖြစ်ပါလိမ့်မယ်။—ထွ. ၃:၁၃-၁၅။

၁၈၉၈၊ ဇိအုန်ကင်းမျှော်စင်မှာ ဒီသင်ခန်းစာ သင်ပေးထားတယ်– “မုဆိုးမက ယုံကြည်ခြင်းရှိပြီး နာခံမှုပြတယ်ဆိုရင် ပရောဖက်ကတစ်ဆင့် ကိုယ်တော် ကူညီထောက်မတာကို ရရှိမယ်။ အကယ်၍ သူ့မှာ ယုံကြည်ခြင်းမရှိဘူးဆိုရင်တော့ နောက်မုဆိုးမတစ်ယောက်ကို ရှာမှာဖြစ်တယ်။ ကျွန်ုပ်တို့လည်း အဲဒီအတိုင်းပဲ။ ကျွန်ုပ်တို့ဘဝမှာ ယုံကြည်ခြင်းစမ်းသပ်ခံရတဲ့အချိန်တွေ ရှိတယ်။ ကျွန်ုပ်တို့မှာ ယုံကြည်ခြင်းရှိတယ်ဆိုရင် ကောင်းချီးခံစားရမယ်။ [ယုံကြည်ခြင်း] မရှိဘူးဆိုရင် ကောင်းချီးမခံစားရဘူး။”

အခက်အခဲတွေ ရင်ဆိုင်ရတဲ့အခါ ယေဟောဝါရဲ့လမ်းညွှန်မှုရဖို့ ကျမ်းစာနဲ့ အဖွဲ့အစည်းထုတ်စာပေတွေမှာ ရှာဖွေရမှာဖြစ်တယ်။ အဲဒီနောက် လိုက်လျှောက်ဖို့ ခက်ခဲတယ်ဆိုရင်တောင် ယေဟောဝါရဲ့လမ်းညွှန်မှုအတိုင်း လုပ်ဆောင်သင့်တယ်။ ဒီပညာရှိသုတ္တံစကားအတိုင်း လုပ်ဆောင်မယ်ဆိုရင် ကောင်းချီးခံစားရမယ်– “ယေဟောဝါကို စိတ်နှလုံးအကြွင်းမဲ့ ယုံကြည်ကိုးစားပါ။ ကိုယ့်ရဲ့သိနားလည်မှုကို အားမကိုးနဲ့။ သင့်လမ်းစဉ်တိုင်းမှာ ကိုယ်တော့်ကို ထည့်စဉ်းစားပါ။ သင့်လမ်းတွေကို ကိုယ်တော်ဖြောင့်ဖြူးစေလိမ့်မယ်။”—သု. ၃:၅၊ ၆၊ ကဘ။

မုဆိုးမဟာ ယုံကြည်ခြင်းစမ်းသပ်မှု နောက်တစ်ခုနဲ့ ကြုံရတော့မှာဖြစ်တယ်။ ကျမ်းစာမှာ “အဲဒါတွေဖြစ်ပြီးတဲ့နောက် အိမ်ရှင်မရဲ့သားလေးက ရောဂါဖြစ်လာတယ်။ ရောဂါ ပြင်းထန်လွန်းတဲ့အတွက် ကလေးသေသွားရှာတယ်” လို့ပြောတယ်။ ဒီလိုအဖြစ်ဆိုး ကြုံတွေ့ရတဲ့အကြောင်းရင်းကို ရှာဖွေနေတဲ့ သောကရောက်နေတဲ့မုဆိုးမက ဧလိယကို ဒီလိုပြောလိုက်တယ်– “စစ်မှန်တဲ့ဘုရားသခင်ရဲ့လူ၊ ရှင်က ကျွန်မနဲ့ ဘာဆိုင်လို့လဲ။ ကျွန်မရဲ့အပြစ်ကို ပြန်သတိရစေဖို့၊ ကျွန်မသားကိုသေစေဖို့ သင်ရောက်လာတာလား။” (၃ ရာ. ၁၇:၁၇၊ ၁၈၊ ကဘ) နာကြည်းချက်ပါတဲ့ ဒီစကားတွေက ဘာကိုဆိုလိုသလဲ။

မုဆိုးမဟာ သူ့ကိုစိတ်အနှောင့်အယှက်ဖြစ်စေတဲ့ အတိတ်က အပြစ်တစ်ခုကို သတိရသွားတာလား။ သူ့သားသေတာက ဘုရားသခင် ဒဏ်ခတ်တာဖြစ်တယ်၊ ဧလိယက ဘုရားသခင်ရဲ့သေမင်းတမန် ဖြစ်တယ်လို့ သူ စဉ်းစားနေတာလား။ အဲဒီအချက်တွေကို ကျမ်းစာမှာ မဖော်ပြထားဘူး။ ဒါပေမဲ့ မုဆိုးမက ဘုရားသခင် မတရားလုပ်တယ်လို့ မစွပ်စွဲဘူးဆိုတာကိုတော့ သိရတယ်။

ဧလိယဟာ မုဆိုးမရဲ့သား သေဆုံးသွားလို့၊ ကလေးသေသွားတာ သူ့ကြောင့်ဆိုပြီး စွပ်စွဲခံရလို့ တုန်လှုပ်သွားမှာပဲ။ ဧလိယဟာ ပျော့ခွေနေတဲ့ကလေးရဲ့အလောင်းကို အထက်ခန်းကို ယူသွားပြီး “ကျွန်တော့်ဘုရားသခင် ယေဟောဝါ၊ ကျွန်တော်တည်းခိုနေတဲ့အိမ်က ဒီမုဆိုးမရဲ့သားကို သေစေခြင်းအားဖြင့် သူ့ကိုလည်း ကိုယ်တော်ဒုက္ခရောက်စေတာလား” လို့ ပြောခဲ့တယ်။ ကြင်နာတတ်ပြီး ဧည့်ဝတ်ကျေပွန်တဲ့ မုဆိုးမကို နောက်ထပ်ဒုက္ခခံရဖို့ ယေဟောဝါခွင့်ပြုမယ်ဆိုရင် ကိုယ်တော့်နာမည် ရှုတ်ချခံရမှာပဲလို့ စဉ်းစားမိတဲ့အခါ ဧလိယ တကယ်စိတ်မကောင်းဖြစ်ခဲ့တယ်။ ဒါကြောင့် ဧလိယက “ကျွန်တော့်ဘုရားသခင် ယေဟောဝါ၊ ကျေးဇူးပြုပြီး ဒီကလေးကို အသက်ပြန်ရှင်စေပါ” လို့ပြောခဲ့တယ်။—၃ ရာ. ၁၇:၂၀၊ ၂၁၊ ကဘ။

ယေဟောဝါဟာ ဆုတောင်းချက်ကို နားထောင်ခဲ့တယ်။ မုဆိုးမဟာ ယုံကြည်ခြင်းတင်ပြပြီး ဧလိယလိုအပ်တာကို ဂရုစိုက်ပေးခဲ့တယ်။ မုဆိုးမရဲ့သား အသက်ပြန်ရှင်လာတဲ့အကြောင်းက ကျမ်းစာထဲမှာမှတ်တမ်းတင်ထားတဲ့ ပထမဆုံး ရှင်ပြန်ထမြောက်ခြင်းမှတ်တမ်းဖြစ်တယ်။ အဲဒီမှတ်တမ်းက အနာဂတ်မှာ သန်းနဲ့ချီတဲ့သူတွေကို မျှော်လင့်ချက်ပေးမှာဖြစ်လို့ ဘုရားသခင်က မုဆိုးမရဲ့သား သေဆုံးဖို့ ခွင့်ပြုလိုက်တာ ဖြစ်နိုင်တယ်။ ယေဟောဝါဟာ ဧလိယရဲ့ဆုတောင်းချက်ကို နားထောင်ပြီး ကလေးကို အသက်ပြန်ရှင်လာအောင် လုပ်ပေးခဲ့တယ်။ “ဒီမှာကြည့်၊ သင့်သားအသက်ရှင်ပြီ” လို့ ဧလိယပြောလိုက်တဲ့အခါ မုဆိုးမ ဘယ်လောက် ဝမ်းသာသွားမလဲဆိုတာ စဉ်းစားကြည့်ပါ။ အဲဒီအခါမှာ မုဆိုးမက ဧလိယကို “သင်ဟာ တကယ်ပဲ ဘုရားသခင်ရဲ့လူဖြစ်တယ်။ သင်ပြောတဲ့ ယေဟောဝါရဲ့စကားလည်း မှန်တယ်ဆိုတာ အခု ကျွန်မသိပါပြီ” လို့ ပြောခဲ့တယ်။—၃ ရာ. ၁၇:၂၂-၂၄၊ ကဘ။

၃ ဓမ္မရာဇဝင် အခန်းကြီး ၁၇ မှာ အဲဒီမုဆိုးမအကြောင်း ထပ်မပြောတော့ဘူး။ ဒါပေမဲ့ ယေရှုက သူ့အကြောင်း အကောင်းပြောခဲ့တာကိုကြည့်ရင် သူဟာ ကျန်ရှိတဲ့အသက်တာမှာ ယေဟောဝါကို သစ္စာရှိရှိဝတ်ပြုခဲ့တာ ဖြစ်နိုင်တယ်။ (လု. ၄:၂၅၊ ၂၆) ဘုရားသခင်ဟာ မိမိရဲ့ကျေးကျွန်တွေအပေါ် ကောင်းမှုပြုသူတွေကို ကောင်းချီးပေးတယ်ဆိုတာ ဒီအဖြစ်အပျက်က သင်ပေးတယ်။ (မ. ၂၅:၃၄-၄၀) ဘုရားသခင်ဟာ မိမိအပေါ်သစ္စာရှိသူတွေ အခက်အခဲကြုံတွေ့ချိန်မှာ ခံနိုင်ရည်တင်ပြတယ်ဆိုရင် ထောက်မပေးတယ်ဆိုတာ ဒီအဖြစ်အပျက်က ဖော်ပြတယ်။ (မ. ၆:၂၅-၃၄) ယေဟောဝါဟာ သေသွားတဲ့သူတွေကို ပြန်အသက်ရှင်စေချင်တယ်၊ ပြန်အသက်ရှင်အောင် လုပ်ပေးနိုင်တယ်ဆိုတာကိုလည်း ဖော်ပြတယ်။ (တ. ၂၄:၁၅) ဇရတ်တမြို့က မုဆိုးမကို သတိရဖို့ အကြောင်းကောင်းတွေ အများကြီးရှိတာ သေချာပါတယ်။