၁၊ ၂။ (က) ဘယ်သူ့ရဲ့မင်္ဂလာပွဲကြောင့် ကောင်းကင်မှာ ရွှင်လန်းကြမလဲ။ (ခ) ဘယ်မေးခွန်းတွေကို ဆွေးနွေးကြမလဲ။

မင်္ဂလာပွဲတစ်ပွဲအတွက် ပြင်ဆင်ဖို့ဆိုတာ အမြဲ အချိန်ယူရတယ်။ နှစ်ပေါင်း ၂,၀၀၀ လောက် အချိန်ယူပြင်ဆင်ခဲ့ရတဲ့ မင်္ဂလာပွဲတစ်ခုအကြောင်း ဆွေးနွေးကြည့်ကြစို့။ မကြာခင်မှာ သတို့သားနဲ့ သတို့သမီး တွေ့ဆုံပေါင်းဖက်ရပါတော့မယ်။ ဘုရင့်နန်းတော်တစ်ခုလုံးမှာ ပျော်ရွှင်စရာတေးဂီတသံတွေ ဖုံးလွှမ်းနေမှာဖြစ်ပြီး ကောင်းကင်ကအသံတွေက ဒီလိုသီဆိုပါလိမ့်မယ်– “ယကိုချီးမွမ်းကြလော့။ အကြောင်းမူကား ငါတို့၏ ဘုရားသခင်၊ အနန္တတန်ခိုးရှင် ယေဟောဝါသည် ဘုရင်အဖြစ် စတင်စိုးစံတော်မူပြီ။ ငါတို့သည် ဝမ်းမြောက်၍ အလွန်ရွှင်လန်းကြစို့။ ဘုရားသခင်၏ ဘုန်းတော်ကို ချီးမွမ်းကြစို့။ အကြောင်းမူကား သိုးသငယ်၏ထိမ်းမြားမင်္ဂလာပွဲ ရောက်ပြီဖြစ်၍ ကိုယ်တော်၏ဇနီးသည် မိမိကိုယ်ကို အသင့်ပြင်ဆင်ထားလေပြီ။”—ဗျာ. ၁၉:၆၊ ၇။

^၂ အဲဒီကျမ်းချက်မှာပါတဲ့ “သိုးသငယ်” က ယေရှုခရစ်ပဲ။ (ယော. ၁:၂၉) သူ့ရဲ့မင်္ဂလာပွဲက ကောင်းကင်မှာ အလွန်ပျော်ရွှင်စေပါလိမ့်မယ်။ မင်္ဂလာပွဲအတွက် သူ ဘယ်လိုဝတ်ဆင်ထားသလဲ။ သူ့ရဲ့သတို့သမီးက ဘယ်သူလဲ။ မင်္ဂလာပွဲအတွက် သူ ဘယ်လိုပြင်ဆင်ထားသလဲ။ ဘယ်အချိန်မှာ မင်္ဂလာပွဲကျင်းပမလဲ။ ဒီမင်္ဂလာပွဲက ကောင်းကင်မှာ ရွှင်လန်းမှုဖြစ်စေတယ်ဆိုတော့ မြေကြီးပေါ်မှာ ထာဝစဉ်အသက်ရှင်ဖို့ မျှော်လင့်တဲ့သူတွေကော ရွှင်လန်းမှု ခံစားရမလား။ ဒီမေးခွန်းတွေရဲ့အဖြေကို ကျွန်ုပ်တို့ သိပ်သိချင်နေကြပါတယ်။ ဒါကြောင့် ဆာလံ ၄၅ ကို ဆက်ဆွေးနွေးကြည့်ကြစို့။

၃၊ ၄။ (က) သတို့သားဝတ်ရုံတွေအကြောင်း ဆာလံဆရာ ဘာပြောသလဲ။ ဘာက သတို့သားကို ပိုပြီး ပျော်ရွှင်စေသလဲ။ (ခ) သတို့သားနဲ့အတူ ဝမ်းမြောက်တဲ့ “ကြင်ရာတော်” နဲ့ “ဘုရင်တွေရဲ့သမီးတော်တွေ” က ဘယ်သူတွေလဲ။

^၃ ဆာလံ ၄၅:၈၊ ၉ ကိုဖတ်ပါ။ သတို့သားယေရှုခရစ်ဟာ သတို့သားဝတ်ရုံတွေကို ဝတ်ဆင်ထားတယ်။ သူ့ရဲ့ဝတ်ရုံတွေက ‘အကောင်းဆုံးအမွှေးနံ့သာ’ လို မွှေးကြိုင်နေတယ်၊ အဲဒီအနံ့က ရှေးခေတ် အစ္စရေးနိုင်ငံမှာသုံးတဲ့ သန့်ရှင်းတဲ့ဘိသိက်ဆီမှာပါတဲ့ မုရန်သစ်စေး၊ သစ်ကြံပိုးတွေရဲ့အနံ့နဲ့ တူတယ်။—ထွ. ၃၀:၂၃-၂၅။

^၄ မင်္ဂလာပွဲကျင်းပမယ့်အချိန် နီးလာတာနဲ့အမျှ နန်းတော်မှာပျံ့လွှင့်နေတဲ့ သာယာတဲ့တေးဂီတသံက သတို့သားကို ပိုပြီးပျော်ရွှင်စေတယ်။ သတို့သားနဲ့အတူ ပျော်ရွှင်သူက “ကြင်ရာတော်” ဖြစ်တယ်၊ ကြင်ရာတော်က ဘုရားသခင့်အဖွဲ့အစည်းရဲ့ ကောင်းကင်ဆိုင်ရာအပိုင်းဖြစ်တယ်။ အဲဒီအဖွဲ့အစည်းထဲမှာ “ဘုရင်တွေရဲ့သမီးတော်တွေ” ပါတယ်။ သူတို့က သန့်ရှင်းတဲ့ကောင်းကင်တမန်တွေဖြစ်တယ်။ ကောင်းကင်ကအသံတွေက “ဝမ်းမြောက်၍ အလွန်ရွှင်လန်းကြစို့။ . . . အကြောင်းမူကား သိုးသငယ်၏ထိမ်းမြားမင်္ဂလာပွဲ ရောက်ပြီ” လို့ပြောတယ်။

၅။ သတို့သမီးက ဘယ်သူလဲ။

^၅ ဆာလံ ၄၅:၁၀၊ ၁၁ ကိုဖတ်ပါ။ သတို့သားက ဘယ်သူလဲဆိုတာ သိရပြီ၊ သတို့သမီးကကော ဘယ်သူလဲ။ သူက တကယ့်အမျိုးသမီးတစ်ယောက်တော့ မဟုတ်ပါဘူး။ သူက အရေအတွက် ၁၄၄,၀၀၀ ရှိတဲ့ ဘိသိက်ခံခရစ်ယာန်အုပ်စုတစ်ခုလုံးကို ကိုယ်စားပြုတယ်။ ယေရှုက အဲဒီဘိသိက်ခံအသင်းတော်ရဲ့ ဦးခေါင်းဖြစ်တယ်။ (ဧဖက် ၅:၂၃၊ ၂၄ ကိုဖတ်ပါ။) သူတို့က မေရှိယနိုင်ငံတော်မှာ ခရစ်တော်နဲ့အတူ အုပ်ချုပ်မှာဖြစ်တယ်။ (လု. ၁၂:၃၂) သူတို့က “သိုးသငယ် သွားလေရာရာနောက်သို့ အစဉ်တစိုက် လိုက်ပါသူများ” လည်းဖြစ်တယ်။ (ဗျာ. ၁၄:၁-၄) သူတို့က ‘သိုးသငယ်ရဲ့ဇနီး’ ဖြစ်လာပြီး သိုးသငယ်နဲ့အတူ ကောင်းကင်စံအိမ်မှာ အတူနေကြတယ်။—ဗျာ. ၂၁:၉; ယော. ၁၄:၂၊ ၃။

၆။ ဘိသိက်ခံတွေကို ဘာဖြစ်လို့ “ဘုရင့်သမီးတော်” လို့ခေါ်သလဲ။ ဘာကြောင့် သူတို့ကို ကိုယ့်လူမျိုးကို မေ့ပစ်လိုက်ပါလို့ ပြောတာလဲ။

^၆ သတို့သမီးကို ‘ဘုရင့်သမီးတော်’ လို့လည်း ခေါ်တယ်။ (ဆာ. ၄၅:၁၃) “ဘုရင်” ကဘယ်သူလဲ။ ယေဟောဝါပဲ။ ကိုယ်တော်ဟာ ဘိသိက်ခံခရစ်ယာန်တွေကို “သားသမီး” တွေအဖြစ်မွေးစားတယ်။ (ရော. ၈:၁၅-၁၇) “ကိုယ့်လူမျိုးနဲ့ ကိုယ့်[လူသား]ဖခင်ရဲ့အိမ်ကို မေ့ပစ်လိုက်ပါ” လို့ ဘိသိက်ခံတွေကိုပြောတယ်။ သူတို့က ကောင်းကင်မှာ သတို့သမီးဖြစ်ရမယ့်အတွက်ကြောင့် “မြေကြီးပေါ်ရှိအရာများကို မစွဲလမ်းဘဲ အထက်အရပ်ရှိအရာများကို စွဲလမ်းနေ” ရမယ်။—ကော. ၃:၁-၄။

၇။ (က) ခရစ်တော်ဟာ သူ့ရဲ့သတို့သမီးလောင်းကို ဘယ်လိုပြင်ဆင်ခဲ့သလဲ။ (ခ) သတို့သမီးက သူ့ရဲ့ခင်ပွန်းလောင်းကို ဘယ်လို သဘောထားသလဲ။

^၇ ခရစ်တော်ဟာ ကောင်းကင်မှာကျင်းပမယ့် မင်္ဂလာပွဲအတွက် သတို့သမီးလောင်းကို ရာစုနှစ်များစွာ အချိန်ယူပြီး ပြင်ဆင်ခဲ့တယ်။ တမန်တော်ပေါလုက “ခရစ်တော်သည် အသင်းတော်ကို ချစ်သဖြင့် အသင်းတော်အတွက် အသက်စွန့်တော်မူ [သည်]။ ကိုယ်တော်သည် အသင်းတော်ကို သန့်ရှင်းမြင့်မြတ်စေရန် တရားစကားတော်ရေအားဖြင့် စင်ကြယ်စေတော်မူမည်။ အစွန်းအကွက်ရှိခြင်း၊ အရေတွန့်ခြင်း အစရှိသည်တို့နှင့်ကင်းစင်လျက် သန့်ရှင်း၍ အပြစ်အနာအဆာကင်းသော၊ အသရေတင့်တယ်လျက်ရှိသော အသင်းတော်ကို မိမိအား ဆက်သစေမည်အကြောင်းတည်း” လို့ရေးခဲ့တယ်။ (ဧ. ၅:၂၅-၂၇) ပေါလုက ရှေးခေတ်ကောရိန္သုအသင်းတော်မှာရှိတဲ့ ဘိသိက်ခံခရစ်ယာန်တွေကို “ငါသည် ဘုရားရေးရာ ဝန်တိုစိတ်မျိုးနှင့် သင်တို့ကို ဝန်တို၏။ ခရစ်တော်တည်းဟူသော ခင်ပွန်းထံ အပျိုစင်ကဲ့သို့ သင်တို့ကိုဆက်သပြီး ထိမ်းမြားစေမည်ဟု ရည်ရွယ်ထား၏” လို့ရေးခဲ့တယ်။ (၂ ကော. ၁၁:၂) သတို့သမီးရဲ့ဝတ်ပြုရေးက သန့်ရှင်းစင်ကြယ်တယ်၊ သူ့ရဲ့ဝတ်ပြုရေးကို ဘုရားသခင် လက်ခံတယ်။ ဒါကြောင့် ဘုရင်ယေရှုခရစ်က သူ့ရဲ့သတို့သမီးကို လှတယ်လို့ ရှုမြင်တယ်။ သတို့သမီးက သူ့ရဲ့ခင်ပွန်းလောင်းရှေ့မှာ ဦးညွှတ်ပြီး သူ့ကို “သခင်” အဖြစ် လိုလိုလားလား လက်ခံတယ်။

၈။ ဘာကြောင့် သတို့သမီးကို “ဂုဏ်ကျက်သရေအပြည့်” ရှိတယ်လို့ ပြောတာလဲ။

^၈ ဆာလံ ၄၅:၁၃၊ ၁၄က ကိုဖတ်ပါ။ သတို့သမီးက “ခင်ပွန်းအတွက် တန်ဆာဆင်” ထားပြီး မင်္ဂလာပွဲအတွက် “ဂုဏ်ကျက်သရေအပြည့်” ရှိနေတယ်။ ဗျာဒိတ် ၂၁:၂ မှာ သတို့သမီးကို ဂျေရုဆလင်မြို့သစ်နဲ့ နှိုင်းယှဉ်ထားတယ်။ ဒီကောင်းကင်မြို့တော်ဟာ “ဘုရားသခင်၏ဘုန်းအသရေတော်” နဲ့ ထွန်းလင်းနေတယ်၊ ‘အလွန်အဖိုးထိုက်သော ကျောက်မျက်ရတနာလိုဖြစ်ပြီး သလင်းကျောက်သဖွယ် ကြည်လင်တဲ့နဂါးသွဲ့နဲ့တူ’ တယ်။ (ဗျာ. ၂၁:၁၀၊ ၁၁) ထွန်းလင်းတောက်ပနေတဲ့ ဂျေရုဆလင်မြို့သစ်ရဲ့အသွင်အပြင်ကို ဗျာဒိတ်ကျမ်းမှာ လှလှပပဖော်ပြထားတယ်။ (ဗျာ. ၂၁:၁၈-၂၁) တကယ့်ကို “ဂုဏ်ကျက်သရေအပြည့်” ရှိတဲ့ သတို့သမီးပါပဲ။ အဲဒါက ကောင်းကင်မှာကျင်းပမယ့် မင်္ဂလာပွဲပါပဲ။

၉။ သတို့သမီးကို ဘယ်သူ့ဆီ ခေါ်သွားသလဲ၊ သူ ဘယ်လိုဝတ်ဆင်ထားသလဲ။

^၉ သတို့သမီးကို သတို့သားဖြစ်တဲ့ မေရှိယဘုရင်ဆီ ခေါ်သွားတယ်။ သတို့သားက သတို့သမီးကို “တရားစကားတော်ရေအားဖြင့် စင်ကြယ်စေ” ပြီး ပြင်ဆင်ခဲ့တယ်။ သတို့သမီးက ‘သန့်ရှင်းပြီး အပြစ်အနာအဆာကင်း’ တယ်။ (ဧ. ၅:၂၆၊ ၂၇) သတို့သမီးဟာ မင်္ဂလာပွဲနဲ့သင့်တော်တဲ့ အဝတ်အစားတွေကိုလည်း ဝတ်ဆင်ထားရမှာဖြစ်တယ်။ အဲဒီလို တကယ်ဝတ်ဆင်ထားတယ်။ “သူ့ရဲ့အဝတ်ကို ရွှေနဲ့ တန်ဆာဆင်ထားတယ်။ သူ့ကို ပန်းထိုးထားတဲ့ဝတ်ရုံဝတ်ဆင်ပေးပြီး မင်းကြီးဆီ ခေါ်ဆောင်လာလိမ့်မယ်။” သိုးသငယ်ရဲ့မင်္ဂလာပွဲမှာ သတို့သမီးဟာ ‘တောက်ပသန့်စင်တဲ့ ချည်ချောထည်ကို ဆင်မြန်းခွင့်ရတယ်။ ဘာဖြစ်လို့လဲဆိုတော့ ချည်ချောထည်ဟာ သန့်ရှင်းသူတွေရဲ့ ဖြောင့်မတ်တဲ့လုပ်ဆောင်မှုတွေကို ကိုယ်စားပြုတယ်။’—ဗျာ. ၁၉:၈။

၁၀။ သိုးသငယ်ရဲ့မင်္ဂလာပွဲမတိုင်ခင်မှာ ဘယ်အဖြစ်အပျက် ဖြစ်မလဲ။

^၁၀ ဗျာဒိတ် ၁၉:၇ ကိုဖတ်ပါ။ သိုးသငယ်ရဲ့မင်္ဂလာပွဲကို ဘယ်အချိန်မှာ ကျင်းပမလဲ။ ဗျာဒိတ် ၁၉:၇ မှာ မင်္ဂလာပွဲအတွက် “ကိုယ်တော်၏ဇနီးသည် မိမိကိုယ်ကို အသင့်ပြင်ဆင်ထားလေပြီ” လို့ ပြောထားပေမဲ့ နောက်အခန်းငယ်တွေမှာ မင်္ဂလာပွဲအကြောင်း ဆက်မဖော်ပြတော့ဘူး။ အဲဒီအစား ကြီးစွာသောဒုက္ခရဲ့ နောက်ဆုံးအပိုင်းအကြောင်းကို ရှင်းရှင်းလင်းလင်း ဖော်ပြထားတယ်။ (ဗျာ. ၁၉:၁၁-၂၁) အဲဒါက ဘုရင် အပြီးသတ်အောင်ပွဲမခံခင်မှာ မင်္ဂလာပွဲကျင်းပမယ်ဆိုတဲ့ အဓိပ္ပာယ်လား။ မဟုတ်ပါဘူး။ ဗျာဒိတ်ကျမ်းမှာ ကြိုဟောထားတဲ့အဖြစ်အပျက်တွေက အစဉ်အတိုင်း ဖော်ပြထားတာမဟုတ်ဘူး။ ဆာလံ ၄၅ မှာ ဘုရင်ယေရှုခရစ်က ဓားကိုခါးမှာချိတ်ပြီး ရန်သူတွေအပေါ် အောင်ပွဲဆင်တယ်၊ အဲဒီနောက်မှာ မင်္ဂလာပွဲကို ကျင်းပတယ်လို့ ဖော်ပြထားတယ်။—ဆာ. ၄၅:၃၊ ၄။

၁၁။ မင်္ဂလာပွဲမကျင်းပခင်မှာ ခရစ်တော် ဘာလုပ်မလဲ။

^၁၁ အောက်ပါအဖြစ်အပျက်တွေက အခုလိုအစဉ်အတိုင်း ဖြစ်ပျက်မယ်ဆိုတာ ကျမ်းစာလေ့လာခြင်းကနေ သိရတယ်– အရင်ဆုံး အယူမှားဘာသာရေးဖြစ်တဲ့ မဟာဗာဗုလုန် “ပြည့်တန်ဆာကြီး” ဖျက်ဆီးခံရမယ်။ (ဗျာ. ၁၇:၁၊ ၅၊ ၁၆၊ ၁၇; ၁၉:၁၊ ၂) အဲဒီနောက် ခရစ်တော်ဟာ “အနန္တတန်ခိုးရှင် ဘုရားသခင်၏နေ့ကြီး” အာမဂေဒုန်မှာ စာတန်ရဲ့ ကျန်ရှိနေတဲ့လောကကို ဖျက်ဆီးမယ်။ (ဗျာ. ၁၆:၁၄-၁၆; ၁၉:၁၉-၂၁) နောက်ဆုံးမှာ ဘုရင်ဟာ စာတန်နဲ့ သူ့ရဲ့နတ်ဆိုးတွေကို တွင်းနက်ကြီးထဲပစ်ချပြီး အပြီးသတ်အောင်ပွဲခံမယ်။ အဲဒီအချိန်မှာ သူတို့ဟာ ဘယ်သူ့ကိုမှ အန္တရာယ်မပေးနိုင်တော့ဘဲ သေနေတာနဲ့ တူပါလိမ့်မယ်။—ဗျာ. ၂၀:၁-၃။

၁၂၊ ၁၃။ (က) ဘယ်အချိန်မှာ သိုးသငယ်ရဲ့မင်္ဂလာပွဲ ကျင်းပမလဲ။ (ခ) ကောင်းကင်မှာ ဘယ်သူတွေက သိုးသငယ်ရဲ့မင်္ဂလာပွဲကြောင့် ပျော်ရွှင်မလဲ။

^၁၂ နောက်ဆုံးသောနေ့ရက်တွေမှာ သေတဲ့အထိ သစ္စာရှိတဲ့ ဘိသိက်ခံခရစ်ယာန်အကြွင်းအကျန်တွေဟာ ကောင်းကင်ကို ရှင်ပြန်ထမြောက်သွားပါလိမ့်မယ်။ မဟာဗာဗုလုန်ပျက်စီးပြီး အာမဂေဒုန်မတိုင်ခင် တစ်ချိန်ချိန်မှာ ခရစ်တော်ဟာ ဘိသိက်ခံခရစ်ယာန် ၁၄၄,၀၀၀ အားလုံး ကောင်းကင်မှာ သူနဲ့အတူရှိနေဖို့ အပြီးသတ်စုသိမ်းပါလိမ့်မယ်။ (၁ သက်. ၄:၁၆၊ ၁၇) အဲဒီနောက် အာမဂေဒုန်ပြီးတဲ့အခါ သိုးသငယ်ရဲ့မင်္ဂလာပွဲကို ကျင်းပနိုင်မှာဖြစ်တယ်။ အဲဒီမင်္ဂလာပွဲမှာ ဘယ်လောက်တောင် ပျော်ရွှင်ဖို့ကောင်းလိုက်မလဲ။ ဗျာဒိတ် ၁၉:၉ မှာ “သိုးသငယ်၏ ထိမ်းမြားမင်္ဂလာညစာစားပွဲသို့ ဖိတ်ကြားခံရသူတို့သည် ပျော်ရွှင်ကြ၏” လို့ ရေးထားတယ်။ သတို့သမီးအဖြစ် တင်စားထားတဲ့ ၁၄၄,၀၀၀ ဟာ တကယ်ပျော်နေမှာ သေချာပါတယ်။ ဒါ့အပြင် သတို့သားဖြစ်တဲ့ ဘုရင်လည်း သူ့ရဲ့ဘိသိက်ခံအပေါင်းပါတွေအားလုံး ကောင်းကင်မှာ သူနဲ့အတူရှိနေလို့ ပျော်နေမှာဖြစ်တယ်။ (လု. ၂၂:၁၈၊ ၂၈-၃၀) ဒါပေမဲ့ သတို့သမီးနဲ့ သတို့သားပဲပျော်တာ မဟုတ်ဘူး။

^၁၃ အစပိုင်းမှာ ဖတ်ရသလိုပဲ ကောင်းကင်ကအသံတွေက “ငါတို့သည် ဝမ်းမြောက်၍ အလွန်ရွှင်လန်းကြစို့။ ဘုရားသခင် ၏ဘုန်းတော်ကို ချီးမွမ်းကြစို့။ အကြောင်းမူကား သိုးသငယ်၏ထိမ်းမြားမင်္ဂလာပွဲ ရောက်ပြီဖြစ်၍ ကိုယ်တော်၏ဇနီးသည် မိမိကိုယ်ကို အသင့်ပြင်ဆင်ထားလေပြီ” လို့ သီဆိုကြတယ်။ (ဗျာ. ၁၉:၆၊ ၇) ယေဟောဝါရဲ့ မြေကြီးပေါ်က ကျေးကျွန်တွေကော ဘယ်လိုလဲ။ သူတို့လည်း အဲဒီပွဲမှာ ပါဝင်ကြမလား။

၁၄။ ဆာလံ ၄၅ မှာပါတဲ့ သတို့သမီးရဲ့ “အပျိုစင်အခြွေအရံတွေ” က ဘယ်သူတွေလဲ။

^၁၄ ဆာလံ ၄၅:၁၂၊ ၁၄ခ၊ ၁၅ ကိုဖတ်ပါ။ နောက်ဆုံးသောနေ့ရက်တွေမှာ ကမ္ဘာတစ်ဝန်းကလူတွေဟာ မြေကြီးပေါ်မှာကျန်ရှိနေတဲ့ ဘိသိက်ခံတွေနဲ့အတူ ယေဟောဝါကို ပျော်ရွှင်စွာအမှုဆောင်ကြမယ်လို့ ပရောဖက်ဇာခရိက ကြိုဟောခဲ့တယ်။ “အဲဒီအချိန်မှာ ဘာသာစကားအသီးသီးကို ပြောတဲ့လူမျိုးတွေထဲက လူဆယ်ယောက်ဟာ ဂျူးလူမျိုးတစ်ယောက်ရဲ့ဝတ်ရုံကို မြဲမြဲကိုင်ပြီး ‘သင်နဲ့အတူ ဘုရားသခင်ရှိတယ်လို့ ကြားတဲ့အတွက် သင်နဲ့အတူ ငါတို့လည်း လိုက်ချင်ပါတယ်’ လို့ပြောကြလိမ့်မယ်” ဆိုပြီး သူရေးခဲ့တယ်။ (ဇာ. ၈:၂၃၊ ကဘ) “လူဆယ်ယောက်” ဆိုတာကို ဆာလံ ၄၅:၁၂ မှာ “တိုင်ရာသမီးပျို” နဲ့ “အချမ်းသာဆုံးလူတွေ” ဆိုပြီး ရည်ညွှန်းထားတယ်။ သူတို့က ဘိသိက်ခံတွေရဲ့ မျက်နှာသာရဖို့၊ ယေဟောဝါရဲ့အမှုဆောင်ရာမှာ အကူအညီရဖို့ ဘိသိက်ခံတွေကို လက်ဆောင်တွေပေးတယ်။ မြေကြီးပေါ်မှာ ကျန်ရှိနေသေးတဲ့ ဘိသိက်ခံတွေဟာ ၁၉၃၅ ခုနှစ်ကစပြီး သန်းနဲ့ချီတဲ့လူတွေကို “ဖြောင့်မတ်ခြင်းတရားလမ်းထဲသို့” ခေါ်ဆောင်ခဲ့တယ်၊ ဆိုလိုတာက သူတို့ကို ယေဟောဝါနဲ့ပတ်သက်တဲ့ အမှန်တရား သင်ပေးခဲ့တယ်။ (ဒံ. ၁၂:၃) အဲဒီ “လူဆယ်ယောက်” ဟာ ဘိသိက်ခံတွေရဲ့ သစ္စာရှိအပေါင်းပါတွေဖြစ်တယ်၊ သူတို့ဟာ အယူမှားဝတ်ပြုရေးအားလုံးကနေထွက်ပြီး သူတို့ရဲ့အသက်တာကို သန့်စင်ခဲ့ကြတယ်။ ဒါကြောင့် သူတို့ကို “အပျိုစင်အခြွေအရံတွေ” လို့ခေါ်တယ်။ သူတို့ဟာ သူတို့ရဲ့အသက်တာကို ယေဟောဝါထံ ဆက်ကပ်အပ်နှံခဲ့ကြပြီး ဘုရင်ယေရှုခရစ်ရဲ့ သစ္စာရှိကျေးကျွန်တွေဖြစ်ကြောင်း သက်သေပြခဲ့ကြတယ်။

၁၅။ “အပျိုစင်အခြွေအရံတွေ” ဟာ ဘိသိက်ခံအကြွင်းအကျန်နဲ့အတူ ဘယ်လို ပူးပေါင်းလုပ်ဆောင်သလဲ။

 ^၁၅ ဘိသိက်ခံအကြွင်းအကျန်တွေဟာ အဲဒီ “အပျိုစင်အခြွေအရံတွေ” ကို သိပ်ကျေးဇူးတင်တယ်၊ ဘာကြောင့်လဲဆိုတော့ သူတို့က မြေတစ်ပြင်လုံးမှာ ‘နိုင်ငံတော်သတင်းကောင်း’ ဟောပြောရာမှာ ထက်ထက်သန်သန် ကူညီပေးကြလို့ပဲ။ (မ. ၂၄:၁၄) ‘စွမ်းအားတော်နဲ့ သတို့သမီးက’ ပဲ “လာလော့” လို့ ပြောတာမဟုတ်ဘူး၊ ကြားတဲ့သူတွေကလည်း “လာလော့” လို့ပြောတယ်။ (ဗျာ. ၂၂:၁၇) ဆိုလိုတာက “လာလော့” လို့ ဘိသိက်ခံတွေပြောတာကို ‘အခြားသိုးတွေ’ ကကြားတယ်။ သူတို့ကလည်း ဘိသိက်ခံတွေနဲ့ ပူးပေါင်းပြီး တစ်ကမ္ဘာလုံးမှာရှိတဲ့လူတွေကို “လာလော့” ဆိုပြီး ဖိတ်ခေါ်ကြတယ်။—ယော. ၁၀:၁၆။

၁၆။ ယေဟောဝါက အခြားသိုးတွေကို ဘယ်အခွင့်အရေး ပေးသလဲ။

^၁၆ ဘိသိက်ခံအကြွင်းအကျန်က အခြားသိုးကိုချစ်တယ်။ ယေဟောဝါက အခြားသိုးတွေကိုလည်း မင်္ဂလာပွဲမှာပျော်ရွှင်ဖို့ အခွင့်အရေးပေးတာကို ဘိသိက်ခံတွေ ဝမ်းသာတယ်။ အဲဒီ “အပျိုစင်အခြွေအရံတွေ” ကို “ရွှင်လန်းဝမ်းမြောက်စွာ ခေါ်ဆောင်လာလိမ့်မယ်” လို့ ကျမ်းစာမှာ ကြိုပြောထားတယ်။ ကောင်းကင်မှာ သိုးသငယ်မင်္ဂလာပွဲကျင်းပတဲ့အခါ မြေကြီးပေါ်မှာ ထာဝစဉ်အသက်ရှင်ဖို့ မျှော်လင့်တဲ့ အခြားသိုးတွေဟာ စကြဝဠာတစ်ခုလုံးနဲ့အတူ ရွှင်လန်းဝမ်းမြောက်ကြပါလိမ့်မယ်။ မြေကြီးပေါ်မှာ ယေဟောဝါကို ဝတ်ပြုနေတဲ့ “လူအုပ်ကြီး” ဟာ ‘ပလ္လင်တော်ရှေ့၊ သိုးသငယ်ရှေ့မှာ ရပ်နေကြ’ တယ်လို့ ဗျာဒိတ်ကျမ်းမှာ ဖော်ပြထားတယ်။ သူတို့က ယေဟောဝါရဲ့စင်ကြယ်တဲ့ဝတ်ပြုရေးအစီအစဉ်ဖြစ်တဲ့ ပုံဆောင်ဗိမာန်တော်ရဲ့ မြေကြီးဆိုင်ရာအပိုင်းမှာ ကိုယ်တော့်အမှုတော်ကို ထမ်းဆောင်နေကြတယ်။—ဗျာ. ၇:၉၊ ၁၅။

၁၇၊ ၁၈။ သိုးသငယ်ရဲ့မင်္ဂလာပွဲက ကမ္ဘာသစ်မှာရှိနေသူတွေကို ဘယ်လို အကျိုးခံစားရစေမလဲ။ ခရစ်တော်ဟာ အနှစ်တစ်ထောင်အုပ်ချုပ်ချိန်အတွင်းမှာ ဘယ်သူတွေရဲ့အဖေ ဖြစ်လာမလဲ။

^၁၇ ဆာလံ ၄၅:၁၆ ကိုဖတ်ပါ။ ခရစ်တော်ရဲ့ ကောင်းကင်သတို့သမီးရဲ့ “အပျိုစင်အခြွေအရံတွေ” ဟာ မင်္ဂလာပွဲကြောင့် ကမ္ဘာသစ်မှာ အကျိုးကျေးဇူးတွေခံစားရတာကို မြင်တွေ့ရတဲ့အခါ ပိုပြီး ဝမ်းမြောက်ကြပါလိမ့်မယ်။ ဘုရင်ယေရှုခရစ်ဟာ သူ့ရဲ့ မြေကြီးပေါ်က “ဘိုးဘေးတွေ” ကို အသက်ပြန်ရှင်လာအောင် လုပ်ပေးမယ်။ ခရစ်တော်က အဲဒီ “ဘိုးဘေးတွေ” ကို အသက်ပြန်ရှင်အောင် လုပ်ပေးတဲ့အတွက် သူတို့က ခရစ်တော်ရဲ့ “သားတွေ” ဖြစ်လာကြမယ်။ (ယော. ၅:၂၅-၂၉; ဟေဗြဲ ၁၁:၃၅) ခရစ်တော်က အဲဒီ “သားတွေ” ထဲက တချို့ကိုရွေးချယ်ပြီး “မြေကြီးတစ်ခွင်မှာ မင်းညီမင်းသားတွေအဖြစ် ခန့်အပ်လိမ့်မယ်။” ယနေ့အချိန်မှာရှိတဲ့ သစ္စာရှိအကြီးအကဲတချို့ကိုလည်း ရွေးချယ်ပြီး ကမ္ဘာသစ်မှာဦးဆောင်ဖို့ ‘မင်းညီမင်းသားတွေ’ အဖြစ် ခန့်အပ်မယ်လို့ မျှော်လင့်နိုင်ပါတယ်။—ဟေရှာ. ၃၂:၁။

^၁၈ ခရစ်တော်ဟာ အနှစ်တစ်ထောင်အုပ်ချုပ်ချိန်အတွင်းမှာ တခြားသူတွေရဲ့အဖေလည်း ဖြစ်လာပါလိမ့်မယ်။ ဘယ်လိုနည်းနဲ့လဲ။ ယေရှုရဲ့ ရွေးနုတ်ဖိုးပူဇော်သကာကို ယုံကြည်သူတွေဟာ မြေကြီးပေါ်မှာ ထာဝစဉ်အသက်ရှင်ရမှာဖြစ်တယ်။ (ယော. ၃:၁၆) အဲဒီအခါ ခရစ်တော်က သူတို့ရဲ့ ‘ထာဝရဖခင်’ ဖြစ်လာပါလိမ့်မယ်။—ဟေရှာ. ၉:၆၊ ၇။

၁၉၊ ၂၀။ ဆာလံ ၄၅ မှာပါတဲ့အဖြစ်အပျက်တွေက ယနေ့ခရစ်ယာန်စစ်အားလုံးအပေါ် ဘယ်လို အကျိုးသက်ရောက်သလဲ။

^၁၉ ဆာလံ ၄၅:၁၊ ၁၇ ကိုဖတ်ပါ။ ခရစ်ယာန်အားလုံးဟာ ဆာလံ ၄၅ မှာပါတဲ့ အဖြစ်အပျက်တွေကို စိတ်ဝင်စားသင့်တယ်။ မြေကြီးပေါ်မှာ ကျန်ရှိနေသေးတဲ့ ဘိသိက်ခံတွေဟာ မကြာခင် ကောင်းကင်မှာ သူတို့ရဲ့ ညီအစ်ကိုတွေနဲ့ရော သတို့သားဖြစ်တဲ့ ယေရှုခရစ်နဲ့ပါ ပေါင်းစည်းရတော့မယ်ဆိုတာ သိရလို့ စိတ်လှုပ်ရှားနေကြပါတယ်။ အခြားသိုးတွေဟာ ဘုန်းကြီးတဲ့ဘုရင်ကို ပိုပြီးလက်အောက်ခံဖို့ လှုံ့ဆော်ခံရကြပါတယ်။ သူတို့ဟာ မြေကြီးပေါ်မှာ ကျန်ရှိနေသေးတဲ့ သတို့သမီးအဖွဲ့ဝင်တွေနဲ့ ပူးပေါင်းခွင့်ရလို့လည်း ဝမ်းမြောက်ကြပါတယ်။ မင်္ဂလာပွဲကျင်းပပြီးနောက်မှာ ခရစ်တော်နဲ့ သူ့ရဲ့သတို့သမီးကြောင့် လူသားတွေရရှိမယ့်ကောင်းချီးတွေဟာ ကျွန်ုပ်တို့ မျှော်လင့်ထားတာထက်ကို ပိုများမှာဖြစ်တယ်။—ဗျာ. ၇:၁၇; ၂၁:၁-၄။

^၂၀ မေရှိယဘုရင်နဲ့ပတ်သက်တဲ့ ပရောဖက်ပြုချက်တွေ ပြည့်စုံဖို့ စောင့်မျှော်နေချိန်မှာ သူ့ရဲ့နာမည်ကို လူတွေသိအောင်ပြောဖို့ ကျွန်ုပ်တို့ လှုံ့ဆော်ခံရမှာ သေချာပါတယ်။ ဒါကြောင့် ဘုရင်ကို “အစဉ်ထာဝရ” ချီးမွမ်းကြပါစို့။