၁။ ဘုရားသခင်ကိုဝတ်ပြုသူတွေနဲ့ပတ်သက်ပြီး ဘယ်အချက်ကို လူတချို့ ယုံကြည်ထားသလဲ။

ကမ္ဘာ့ဘာသာကြီးတွေဟာ လူတွေကို ဘာမှမကူညီပေးနိုင်ဘူးဆိုတာ ဒီနေ့ခေတ်လူအများစု ဝန်ခံကြတယ်။ ဘုရားသခင်နဲ့ပတ်သက်တဲ့ အမှန်တရားအကြောင်း မသင်ပေးတဲ့အပြင် တကယ့်ကိုဆိုးဝါးတဲ့လုပ်ရပ်တွေ ကျူးလွန်နေတဲ့အတွက် အဲဒီဘာသာတရားတွေကို ဘုရားမနှစ်သက်ဘူးလို့ လူတချို့ ယူဆကြတယ်။ ဒါပေမဲ့ ဘာသာတရားတိုင်းမှာရှိတဲ့ လူကောင်းတွေကိုတော့ ဘုရားသခင်နှစ်သက်တယ်လို့ သူတို့ ယုံကြည်ထားတယ်။ အဲဒါ မှန်ရဲ့လား။ မိမိကိုဝတ်ပြုသူတွေဟာ အယူမှားဘာသာတွေနဲ့ သီးခြားနေရမယ်လို့ ဘုရားသခင် တောင်းဆိုထားသလား။ သမိုင်းတစ်လျှောက် ယေဟောဝါရဲ့ စစ်မှန်တဲ့ဝတ်ပြုသူတွေနဲ့ပတ်သက်ပြီး ကျမ်းစာမှာပြောထားတာကို ဆန်းစစ်ရင်း အဖြေရှာကြည့်ကြစို့။

၂။ ဘယ်သူတွေက ယေဟောဝါရဲ့လူတွေ ဖြစ်လာသလဲ။ သူတို့ဟာ ယေဟောဝါနဲ့ အထူးဆက်ဆံရေးရှိသူတွေဖြစ်တယ်ဆိုတာ ဘယ်အရာက မှတ်သားဖော်ပြသလဲ။ (ဆောင်းပါးအစမှာပါတဲ့ ရုပ်ပုံကိုကြည့်ပါ။)

^၂ လွန်ခဲ့တဲ့နှစ်ပေါင်း ၄,၀၀၀ လောက်မှာ ယေဟောဝါဟာ သူ့လူတွေဖြစ်လာမယ့် လူတစ်စုကို မြေကြီးပေါ်မှာ ရွေးချယ်ခဲ့တယ်။ “ယုံကြည်သူအပေါင်းတို့ ၏အဖ” လို့ အခေါ်ခံရတဲ့ အာဗြဟံဟာ လူပေါင်းရာနဲ့ချီရှိတဲ့ မိသားစုကြီးရဲ့ခေါင်းဆောင် ဖြစ်တယ်။ (ရော. ၄:၁၁; က. ၁၄:၁၄) ခါနာန်ပြည်သားတွေက သူ့ကို “ဘုရားသခင်နှင့်ဆိုင်သောမင်း” အဖြစ် လေးစားကြတယ်။ (က. ၂၁:၂၂; ၂၃:၆) ယေဟောဝါဟာ အာဗြဟံနဲ့ရော သူ့သားမြေးတွေနဲ့ပါ ပဋိညာဉ်ဖွဲ့ခဲ့တယ်။ (က. ၁၇:၁၊ ၂၊ ၁၉) ‘မင်းနဲ့ မင်းရဲ့သားစဉ်မြေးဆက်တွေ စောင့်ထိန်းရမယ့် ပဋိညာဉ်ကတော့ မင်းဆီမှာရှိတဲ့ ယောက်ျားတိုင်း အရေဖျားဖြတ်ရမယ်။ ဒါဟာ မင်းတို့နဲ့ငါဖွဲ့တဲ့ ပဋိညာဉ်ရဲ့ အမှတ်အသားပဲ’ လို့ အာဗြဟံကို ဘုရားသခင် ပြောတယ်။ (က. ၁၇:၁၀၊ ၁၁၊ ကဘ) ဒါကြောင့် အာဗြဟံနဲ့ အိမ်သားယောက်ျားအားလုံး အရေဖျားဖြတ်ခဲ့ကြတယ်။ (က. ၁၇:၂၄-၂၇) အရေဖျားဖြတ်ထားခြင်းက အာဗြဟံရဲ့သားမြေးတွေဟာ ယေဟောဝါနဲ့ အထူးဆက်ဆံရေးရှိသူတွေ ဖြစ်တယ်ဆိုတာ မှတ်သားဖော်ပြတယ်။

၃။ အာဗြဟံရဲ့သားမြေးတွေဟာ ‘လူအုပ်စုကြီး’ ဘယ်လိုဖြစ်လာသလဲ။

^၃ အာဗြဟံရဲ့မြေး ယာကုပ် (ခေါ်) အစ္စရေးမှာ သား ၁၂ ယောက်ရှိတယ်။ (က. ၃၅:၁၀၊ ၂၃-၂၆) အချိန်တန်တဲ့အခါ အဲဒီသားတွေဟာ အစ္စရေး ၁၂ နွယ်ရဲ့ ဖခင်တွေဖြစ်လာတယ်။ (တ. ၇:၈) ယာကုပ်ရဲ့သားတစ်ယောက်ဖြစ်တဲ့ ယောသပ်ဟာ အီဂျစ်ပြည်ကိုရောက်သွားပြီး နောက်ပိုင်းမှာ နန်းတော်အုပ်အဖြစ် ခန့်အပ်ခံခဲ့ရတယ်။ အငတ်ဘေးကျရောက်ချိန်မှာ ယာကုပ်နဲ့မိသားစုဟာ အီဂျစ်ပြည်ကိုရောက်လာတယ်။ (က. ၄၁:၃၉-၄၁; ၄၂:၆) ယာကုပ်ရဲ့သားမြေးတွေ ပွားများလာပြီး ‘လူအုပ်စုကြီး’ ဖြစ်လာတယ်။—က. ၄၈:၄၊ ကဘ; တမန်တော် ၇:၁၇ ကိုဖတ်ပါ။

၄။ အစပိုင်းမှာ အီဂျစ်လူတွေနဲ့ ယာကုပ်သားမြေးတွေရဲ့ဆက်ဆံရေး ဘယ်လိုရှိသလဲ။

^၄ ယာကုပ်ရဲ့သားမြေးတွေဟာ အီဂျစ်ပြည်၊ ဂေါရှင်အရပ်မှာ နှစ်ပေါင်း ၂၀၀ ကျော်နေထိုင်ခဲ့တယ်။ (က. ၄၅:၉၊ ၁၀) ဖာရောဟာ ယောသပ်ကိုသိပြီး လေးစားတဲ့အတွက် အစ္စရေးတွေကို အီဂျစ်ပြည်မှာ နေထိုင်ခွင့်ပြုတယ်။ (က. ၄၇:၁-၆) အစ္စရေးတွေဟာ နှစ်ပေါင်း ၁၀၀ လောက် အီဂျစ်လူတွေနဲ့ အေးအေးဆေးဆေး နေနိုင်ခဲ့တယ်။ မြို့လေးတွေမှာနေပြီး တိရစ္ဆာန်တွေ မွေးမြူတယ်။ အီဂျစ်တွေဟာ သိုးထိန်းတွေကို ရွံမုန်းပေမဲ့ ဖာရောအမိန့်ကို မလွန်ဆန်နိုင်တဲ့အတွက် အစ္စရေးတွေကို နေထိုင်ခွင့်ပေးတယ်။—က. ၄၆:၃၁-၃၄။

၅၊ ၆။ (က) အီဂျစ်ပြည်မှာ ဘုရားသခင့်လူတွေရဲ့အခြေအနေ ဘယ်လိုပြောင်းလဲသွားသလဲ။ (ခ) မောရှေ ဘာကြောင့် အသက်ရှင်လွတ်မြောက်သွားသလဲ။ ယေဟောဝါက သူ့လူတွေအတွက် ဘာလုပ်ဆောင်ပေးသလဲ။

^၅ သိပ်မကြာခင်မှာတော့ အစ္စရေးတွေရဲ့အခြေအနေ အကြီးအကျယ် ပြောင်းလဲသွားတယ်။ ‘နောက်ပိုင်း၊ အီဂျစ်ပြည်မှာ ယောသပ်ကိုမသိတဲ့ ဘုရင်တစ်ပါး  နန်းတက်လာတယ်။ သူက “အစ္စရေးလူတွေဟာ ငါတို့ထက် ပိုများပြီး ပိုအင်အားကြီးနေပြီ” လို့ သူ့လူတွေကိုပြောတယ်။ ဒါကြောင့် အစ္စရေးတွေကို ကျွန်အဖြစ် မတရားခိုင်းတယ်။ သူတို့ဘဝ ပိုပြီး ခက်ခဲကြမ်းတမ်းအောင် ရွှံ့စေးနဲ့ အုတ်ဖုတ်ခိုင်းတယ်။ လယ်ထဲမှာလည်း ကျွန်အလုပ်မှန်သမျှ လုပ်ခိုင်းပြီး ရက်ရက်စက်စက်၊ မညှာမတာ ခိုင်းစေတော့တယ်။’—ထွ. ၁:၈-၁၀၊ ၁၃၊ ၁၄၊ ကဘ။

^၆ ဒီဖာရောဘုရင်က မွေးဖွားလာတဲ့ အစ္စရေးသားယောက်ျားအားလုံးကို သတ်ပစ်ဖို့လည်း အမိန့်ပေးခဲ့တယ်။ (ထွ. ၁:၁၅၊ ၁၆) အဲဒီအချိန်မှာပဲ အစ္စရေးအမျိုးသမီး ယောခေဗက်ဟာ မောရှေကို မွေးဖွားတယ်။ မောရှေ သုံးလအရွယ်မှာ နိုင်းမြစ်ကမ်းနားက ကျူပင်တွေကြားမှာ သူ့ကို ဝှက်ထားတယ်။ ဖာရောရဲ့သမီးက မောရှေကိုတွေ့သွားပြီး မွေးစားလိုက်တယ်။ သူ့ကိုထိန်းဖို့ သူ့ရဲ့အမေ ယောခေဗက်ကိုပဲ တာဝန်ပေးလိုက်တယ်။ အချိန်တန်တဲ့အခါ မောရှေဟာ ယေဟောဝါရဲ့သစ္စာရှိကျေးကျွန်တစ်ယောက် ဖြစ်လာတယ်။ (ထွ. ၂:၁-၁၀; ဟေဗြဲ ၁၁:၂၃-၂၅) အီဂျစ်ပြည်မှာ သူ့လူတွေ ဒုက္ခရောက်နေတာကို ယေဟောဝါတွေ့တယ်။ ဒါကြောင့် မောရှေကိုသုံးပြီး သူတို့ကိုကယ်ဖို့ ဆုံးဖြတ်လိုက်တယ်။ (ထွ. ၂:၂၄၊ ၂၅; ၃:၉၊ ၁၀) ဒီနည်းနဲ့ ယေဟောဝါက အစ္စရေးတွေကို “ရွေးနုတ်” ကယ်တင်ခဲ့တယ်။—ထွ. ၁၅:၁၃; တရားဟောရာ ၁၅:၁၅ ကိုဖတ်ပါ။

၇၊ ၈။ ယေဟောဝါရဲ့လူတွေဟာ သန့်ရှင်းတဲ့လူမျိုး ဘယ်လိုဖြစ်လာသလဲ။

^၇ ယေဟောဝါက အစ္စရေးတွေကို သူ့လူတွေအဖြစ် အသိအမှတ်ပြုထားပေမဲ့ လူမျိုးတစ်မျိုးအဖြစ်တော့ မဖွဲ့စည်းသေးဘူး။ ဒါကြောင့် ‘အစ္စရေးတို့ရဲ့ဘုရားသခင် ယေဟောဝါက “တောမှာ ငါ့အတွက် ပွဲတော်ကျင်းပနိုင်ဖို့ ငါ့လူတွေကို လွှတ်ပေးပါ” လို့ပြောတယ်’ ဆိုပြီး ဖာရောကိုသွားပြောဖို့ မောရှေနဲ့အာရုန်ကို မိန့်မှာတယ်။—ထွ. ၅:၁၊ ကဘ။

^၈ ဒါပေမဲ့ ဖာရောက အစ္စရေးတွေကို မလွှတ်ပေးဘူး။ ဒါကြောင့် ယေဟောဝါက အီဂျစ်ပြည်အပေါ် ကပ်ဘေးဆယ်ခုကျရောက်စေပြီး ဖာရောနဲ့သူ့စစ်တပ်ကို ပင်လယ်နီမှာ ဖျက်ဆီးပစ်လိုက်တယ်။ (ထွ. ၁၅:၁-၄) နောက်သုံးလမပြည့်ခင် သိနာတောင်မှာ ယေဟောဝါက အစ္စရေးတွေနဲ့ ပဋိညာဉ်ဖွဲ့ပြီး ‘ငါ့စကားကို မြေဝယ်မကျနာခံပါ။ မင်းတို့နဲ့ငါဖွဲ့မယ့် ပဋိညာဉ်ကို စောင့်ထိန်းပါ။ ဒါဆိုရင် မင်းတို့ဟာ လူမျိုးအားလုံးထဲမှာ ငါတန်ဖိုးအထားဆုံးလူမျိုး ဖြစ်လာလိမ့်မယ်။ သန့်ရှင်းတဲ့လူမျိုး . . . ဖြစ်လာလိမ့်မယ်’ လို့ ပြောတယ်။—ထွ. ၁၉:၅၊ ၆၊ ကဘ။

၉၊ ၁၀။ (က) တရားဟောရာ ၄:၅-၈ မှာ ရှင်းပြထားတဲ့အတိုင်း ပညတ်တရားက အစ္စရေးတွေကို တခြားလူမျိုးတွေနဲ့ ဘယ်လိုကွာခြားစေသလဲ။ (ခ) ‘ယေဟောဝါဘုရားရဲ့ သန့်ရှင်းတဲ့လူမျိုး’ ဖြစ်တယ်ဆိုတာပြဖို့ အစ္စရေးတွေ ဘာလုပ်ရမလဲ။

^၉ ရာစုနှစ်တွေတစ်လျှောက် ယေဟောဝါရဲ့ကျေးကျွန်တွေကို အိမ်ထောင်ဦးစီးတွေက ဦးဆောင်ခဲ့တယ်။ သူတို့က အုပ်စိုးရှင်တွေ၊ တရားသူကြီးတွေ၊ ယဇ်ပုရောဟိတ်တွေအဖြစ်လည်း လုပ်ဆောင်တယ်။ အစ္စရေးတွေ အီဂျစ်ပြည်မှာ ကျွန်ဘဝမရောက်ခင်တုန်းက အဲဒီဦးဆောင်မှုစနစ်အတိုင်း လိုက်ခဲ့ကြတယ်။ (က. ၈:၂၀; ၁၈:၁၉; ယောဘ ၁:၄၊ ၅) ဒါပေမဲ့ ယေဟောဝါက သူတို့ကို ကျွန်ဘဝကနေ ကယ်လွှတ်ပြီးနောက် တခြားလူမျိုးအားလုံးနဲ့ ကွဲပြားခြားနားစေမယ့် ပညတ်တွေ ပေးခဲ့တယ်။ (တရားဟောရာ ၄:၅–၈ ကိုဖတ်ပါ; ဆာ. ၁၄၇:၁၉၊ ၂၀) ပညတ်တရားအရ သီးသန့်ယဇ်ပုရောဟိတ်အဖွဲ့ ရှိလာတယ်။ အဲဒီအပြင် အသိပညာ၊ ဉာဏ်ပညာကြွယ်ဝပြီး လေးစားခံရတဲ့ ‘အကြီး အကဲတွေ’ ဟာ တရားသူကြီးတွေအဖြစ် အမှုဆောင်ရမယ်လို့လည်း ပညတ်တရားမှာ ပြဋ္ဌာန်းထားတယ်။ (တရား. ၂၅:၇၊ ၈၊ ကဘ) ဝတ်ပြုရေးနဲ့ နေ့စဉ်ဘဝအတွက် လမ်းညွှန်ချက်တွေကိုလည်း ပေးထားတယ်။

^၁၀ အစ္စရေးတွေ ကတိထားရာပြည်ထဲ မဝင်ခင်လေးမှာ ယေဟောဝါက ပညတ်တရားတွေကို ထပ်ပြောပြတယ်။ သူတို့ကို မောရှေ ဒီလိုပြောတယ်– ‘ကိုယ်တော်ကတိပေးထားတဲ့အတိုင်း ခင်ဗျားတို့လည်း ကိုယ်တော် တန်ဖိုးအထားရဆုံးလူမျိုး ဖြစ်ပါ့မယ်၊ ပညတ်ချက်အားလုံးကို လိုက်နာပါ့မယ်ဆိုပြီး ယေဟောဝါဘုရားကို ဒီနေ့ ထုတ်ဖော်ပြောဆိုလိုက်ပြီ။ ယေဟောဝါဘုရားရဲ့ သန့်ရှင်းတဲ့လူမျိုးဖြစ်တယ်ဆိုတာကို ခင်ဗျားတို့ သက်သေပြတဲ့အတွက် ကိုယ်တော်က ကတိပေးထားတဲ့အတိုင်း ဖန်ဆင်းထားတဲ့လူမျိုးအားလုံးထက် ခင်ဗျားတို့ကို ချီးမြှောက်လိမ့်မယ်။ ချီးမွမ်းခြင်း၊ ကျော်ကြားခြင်း၊ ဂုဏ်သရေရှိခြင်းတို့ကို ပေးသနားလိမ့်မယ်။’—တရား. ၂၆:၁၈၊ ၁၉၊ ကဘ။

၁၁–၁၃။ (က) ဘုရားသခင့်လူတွေနဲ့အတူ ဘယ်သူတွေ ပူးပေါင်းလာသလဲ။ (ခ) လူမျိုးခြားတွေ ယေဟောဝါကို ၀တ်ပြုချင်ရင် ဘာလုပ်ဖို့လိုသလဲ။

^၁၁ ယေဟောဝါက အစ္စရေးတွေကို သူ့လူမျိုးအဖြစ် ရွေးချယ်ထားပေမဲ့ လူမျိုးခြားတွေကိုလည်း သူတို့နဲ့အတူ နေထိုင်ခွင့်ပေးတယ်။ ဥပမာ၊ အစ္စရေးတွေကို အီဂျစ်ပြည်ကနေ ဘုရားသခင် ကယ်နုတ်လာတုန်းက အီဂျစ်လူတွေအပါအဝင် လူအများကြီး လိုက်ပါလာတယ်လို့ ကျမ်းစာမှာ ဖော်ပြထားတယ်။ (ထွ. ၁၂:၃၈) အဲဒီထဲမှာ ခုနစ်ခုမြောက်ကပ်ဘေးတုန်းက မောရှေရဲ့သတိပေးချက်ကို လိုက်နာခဲ့တဲ့ ဖာရောရဲ့ကျွန်တချို့လည်း ပါဝင်နိုင်တယ်။—ထွ. ၉:၂၀။

^၁၂ ခါနာန်ပြည်ထဲဝင်ဖို့ အစ္စရေးတွေ ဂျော်ဒန်မြစ်ကို မကူးခင်မှာ မောရှေက သူတို့နဲ့အတူနေထိုင်တဲ့ ‘တိုင်းတစ်ပါးသားတွေကို ချစ်ရမယ်’ ဆိုပြီး ပြောတယ်။ (တရား. ၁၀:၁၇-၁၉၊ ကဘ) လူမျိုးခြားတွေဟာ ပညတ်တော်ဆယ်ပါးလို အခြေခံပညတ်တွေကို လိုလိုလားလား နာခံမယ်ဆိုရင် အစ္စရေးတွေက သူတို့နဲ့အတူနေထိုင်ခွင့်ပြုရမယ်။ (ဝတ်. ၂၄:၂၂) လူမျိုးခြားတချို့ဆိုရင် ယေဟောဝါကို ဝတ်ပြုသူတွေတောင်ဖြစ်လာတယ်။ ဥပမာ၊ မောဘအမျိုးသမီး ရုသဟာ ယေဟောဝါကို ဝတ်ပြုသူ ဖြစ်လာတယ်။ ‘အမေ့လူမျိုးဟာ ကျွန်မလူမျိုး။ အမေ့ဘုရားဟာ ကျွန်မဘုရားပါပဲ’ လို့ နောမိကို သူပြောတယ်။ (ရု. ၁:၁၆၊ ကဘ) ဒီလူမျိုးခြားတွေကို ဘာသာပြောင်းဝင်လာသူတွေလို့ ခေါ်တယ်။ ယောက်ျားလေးဖြစ်မယ်ဆိုရင် အရေဖျားဖြတ်ရတယ်။ (ထွ. ၁၂:၄၈၊ ၄၉) ယေဟောဝါက သူတို့ကို မိမိရွေးချယ်ထားတဲ့လူမျိုးဝင်အဖြစ် လိုလိုလားလား လက်ခံတယ်။—တော. ၁၅:၁၄၊ ၁၅။

^၁၃ ရှောလမုန်ရဲ့ဆုတောင်းချက်ကလည်း လူမျိုးခြား၀တ်ပြုသူတွေကို ယေဟောဝါ လက်ခံတယ်ဆိုတာ ဖော်ပြတယ်။ ဗိမာန်တော်အပ်နှံပွဲမှာ ရှောလမုန် အခုလိုဆုတောင်းတယ်– ‘ကိုယ်တော့်လူမျိုးအစ္စရေးမဟုတ်တဲ့ တိုင်းတစ်ပါးသားနဲ့ ရပ်ဝေးကနေလာတဲ့သူဟာ ကိုယ်တော်ရဲ့ ကြီးမြတ်တဲ့နာမည်၊ အားကြီးတဲ့လက်၊ တန်ခိုးကြီးတဲ့လက်ရုံးအကြောင်း ကြားသိတဲ့အတွက် ဒီအိမ်တော်ကိုလာပြီး ဆုတောင်းမယ်ဆိုရင် နေထိုင်ရာအရပ် ကောင်းကင်ကနေ နားထောင်ပေးပါ။ အဲဒီတိုင်းတစ်ပါးသား တောင်းလျှောက်သမျှအတိုင်း လုပ်ဆောင်ပေးပါ။ ဒီနည်းနဲ့ မြေကြီးပေါ်ကလူမျိုးအားလုံး ကိုယ်တော့်နာမည်ကို သိလာပြီး အစ္စရေးလူမျိုးတွေလိုပဲ ကိုယ်တော့်ကိုကြောက်ရွံ့ဖို့၊ ကျွန်တော်ဆောက်တဲ့ဒီအိမ်တော်မှာ ကိုယ်တော့်နာမည်တည်ရှိတယ်ဆိုတာသိဖို့ ဖြစ်ပါတယ်။’ (၆ ရာ. ၆:၃၂၊ ၃၃၊ ကဘ) ယေရှု ခေတ်မှာတောင် ယေဟောဝါကိုဝတ်ပြုလိုတဲ့ လူမျိုးခြားတွေဟာ ကိုယ်တော်ရွေးချယ်ထားတဲ့ လူမျိုးနဲ့အတူ ဝတ်ပြုနိုင်တယ်။—ယော. ၁၂:၂၀; တ. ၈:၂၇။

၁၄–၁၆။ (က) အစ္စရေးတွေဟာ ယေဟောဝါအတွက် သက်သေဖြစ်မယ့်လူမျိုး ဘယ်လိုဖြစ်လာသလဲ။ (ခ) ဒီနေ့အချိန်မှာ ယေဟောဝါက သူ့လူတွေဆီကနေ ဘာမျှော်လင့်သလဲ။

^၁၄ အစ္စရေးတွေက ယေဟောဝါဘုရားသခင်ကို ဝတ်ပြုပေမဲ့ တခြားလူမျိုးတွေက သူတို့ရဲ့ဘုရားတွေကို ဝတ်ပြုကြတယ်။ ဒါကြောင့် ဘုရားစစ်ဘုရားမှန် ဘယ်သူလဲဆိုတဲ့ အရေးကြီးမေးခွန်း ပေါ်လာတယ်။ ဒီမေးခွန်းကို တရားရုံးမှာ အမှုရင်ဆိုင်တဲ့ပုံစံမျိုးနဲ့ အဖြေပေးရမယ်ဆိုပြီး ပရောဖက်ဟေရှာယခေတ်မှာ ယေဟောဝါ ပြောတယ်။ လူမျိုးခြားဘုရားတွေက ဘုရားမှန်ဖြစ်တယ်ဆိုရင် သက်သေခေါ်လာပါလို့ ကိုယ်တော်ပြောတယ်။ ‘သူတို့က မှန်တယ်ဆိုတာကိုပြဖို့ သက်သေတွေကို ခေါ်လာပါစေ။ ဒါမှမဟုတ် နားထောင်ပြီး “ဒါဟာ အမှန်တရားပဲ” လို့ပြောကြပါစေ’ လို့ ကိုယ်တော်ပြောတယ်။—ဟေရှာ. ၄၃:၉၊ ကဘ။

^၁၅ လူမျိုးခြားဘုရားတွေက ဘုရားမှန်ဖြစ်တယ်ဆိုတာ သက်သေမပြနိုင်ဘူး။ သူတို့က စကားမပြောနိုင်တဲ့၊ မလှုပ်ရှားနိုင်တဲ့ ရုပ်တုတွေပဲ။ (ဟေရှာ. ၄၆:၅-၇) ဒါပေမဲ့ ယေဟောဝါကတော့ အဲဒီလိုမဟုတ်ဘူး။ ‘သင်တို့က ငါ့ကိုသိပြီး ယုံကြည်လာဖို့၊ ငါဟာ မပြောင်းလဲတတ်တဲ့အရှင်ဖြစ်တယ်ဆိုတာကို နားလည်လာဖို့ ငါရွေးချယ်ထားတဲ့ငါ့ကျွန်၊ ငါ့သက်သေတွေဖြစ်တယ်။ ငါ့ထက်အရင် ဘယ်ဘုရားမှ မရှိခဲ့ဘူး။ ငါ့နောက်မှာလည်း ဘယ်ဘုရားမှ မရှိဘူး။ ငါဟာ ယေဟောဝါဖြစ်တယ်။ ငါကလွဲလို့ တခြားကယ်တင်ရှင်မရှိဘူး။ . . . သင်တို့ဟာ ငါ့သက်သေတွေဖြစ်တယ်။ ငါဟာ ဘုရားသခင်ပဲ’ လို့ အစ္စရေးတွေကို ပြောတယ်။—ဟေရှာ. ၄၃:၁၀-၁၂၊ ကဘ။

 ^၁၆ ယေဟောဝါရဲ့လူတွေဟာ တရားရုံးမှာ သက်သေလိုက်ပေးသူတွေလို ယေဟောဝါသာလျှင် ဘုရားမှန်ဖြစ်တယ်ဆိုတာ သက်သေထွက်ဆိုခွင့်ရထားတယ်။ ဒါကြောင့် ‘သူတို့ဟာ ငါ့ကိုချီးမွမ်းနိုင်ဖို့ ငါပုံသွင်းခဲ့သူတွေဖြစ်တယ်’ လို့ ဘုရားသခင် ပြောတယ်။ (ဟေရှာ. ၄၃:၂၁၊ ကဘ) သူတို့ဟာ ယေဟောဝါရဲ့နာမည်ကို ခံယူထားသူတွေဖြစ်တယ်။ ယေဟောဝါက သူတို့ကို အီဂျစ်ပြည်ကနေ လွတ်မြောက်အောင် ကယ်တင်ခဲ့တဲ့အတွက် ကိုယ်တော့်ကို အချုပ်အခြာအာဏာရှင်အဖြစ် ဂုဏ်တင်ပြီး လိုလိုလားလား နာခံဖို့ သူတို့ဆီကနေ ကိုယ်တော်မျှော်လင့်တယ်။ ဒီနေ့အချိန်မှာလည်း ယေဟောဝါက သူ့လူတွေဆီကနေ အဲဒီလိုပဲ မျှော်လင့်တယ်။ ဘုရားသခင့်လူတွေမှာရှိသင့်တဲ့ သဘောထားကို ပရောဖက်မိက္ခာ အခုလိုပြောတယ်– ‘လူအားလုံးက သူတို့ဘုရားရဲ့နာမည်နဲ့အညီ အသက်ရှင်ကြပေမဲ့ ငါတို့ကတော့ ငါတို့ဘုရားသခင် ယေဟောဝါရဲ့နာမည်နဲ့အညီ အစဉ်ထာဝရအသက်ရှင်ကြမယ်။’—မိ. ၄:၅၊ ကဘ။

၁၇။ ယေဟောဝါက အစ္စရေးတွေကို သုံးစားလို့မရတော့တဲ့ စပျစ်ပင်အဖြစ် ဘာကြောင့်ရှုမြင်သလဲ။

^၁၇ ဝမ်းနည်းစရာကတော့ အစ္စရေးတွေဟာ ယေဟောဝါအပေါ် သစ္စာမရှိခဲ့ကြဘူး။ သစ်သားဘုရား၊ ကျောက်ဘုရားတွေကိုကိုးကွယ်တဲ့ လူမျိုးခြားတွေကို အတုခိုးပြီး အယူမှားဘုရားတွေအတွက် ယဇ်ပလ္လင်တွေ ဆောက်လုပ်ခဲ့တယ်။ ဘီစီရှစ်ရာစုလောက်မှာ ပရောဖက်ဟောရှေက အစ္စရေးတွေဟာ အသီးကောင်းမသီးတော့တဲ့ စပျစ်ပင်နဲ့တူတယ်လို့ ပြောတယ်။ အဲဒီနောက် ‘သူတို့ရဲ့စိတ်နှလုံးက ဟန်ဆောင်တတ်တယ်။ အခုတော့ သူတို့မှာ အပြစ်ရှိတယ်ဆိုတာ ထင်ရှားလာလိမ့်မယ်’ လို့ ဆက်ပြောတယ်။ (ဟော. ၁၀:၂၊ ကဘ) နှစ်ပေါင်း ၁၅၀ လောက်ကြာပြီးနောက် ယေရမိကလည်း ပုန်ကန်တဲ့အစ္စရေးတွေကို စပျစ်ပင်နဲ့ ခိုင်းနှိုင်းခဲ့တယ်။ သူတို့ဟာ အစတုန်းကတော့ အကောင်းဆုံးစပျစ်မျိုးဖြစ်ပေမဲ့ သုံးစားလို့မရတော့တဲ့ စပျစ်ပင်အဖြစ် ပြောင်းလဲသွားတယ်။ ဒါကြောင့် ယေရမိကတစ်ဆင့် ယေဟောဝါ အခုလိုပြောတယ်– ‘သင့်အတွက် သင်လုပ်ခဲ့တဲ့ဘုရားတွေ ဘယ်မှာလဲ။ သင်ဘေးဆိုးကြုံရချိန်မှာ သူတို့က သင့်ကိုကယ်တင်နိုင်တယ်ဆိုရင် ထပြီး ကယ်တင်ပါစေ။ . . . ငါ့လူတွေက ငါ့ကိုမေ့လျော့သွားပြီ။’—ယေ. ၂:၂၁၊ ၂၈၊ ၃၂၊ ကဘ။

၁၈၊ ၁၉။ (က) မြေကြီးပေါ်မှာ လူမျိုးသစ်တစ်မျိုး ရွေးချယ်မယ့်အကြောင်း ယေဟောဝါ ဘယ်လိုကြိုပြောခဲ့သလဲ။ (ခ) နောက်ဆောင်းပါးမှာ ဘာအကြောင်း ဆွေးနွေးမလဲ။

^၁၈ အစ္စရေးတွေဟာ အယူမှားဝတ်ပြုရေးကြောင့် မကောင်းတဲ့အသီးတွေ သီးလာတယ်။ ကိုယ်တော့်သက်သေတွေ ဆက်ဖြစ်မယ့်အစား ရုပ်တုတွေ ကိုးကွယ်လာတယ်။ ဒါကြောင့် ယေရှုက သူ့ခေတ်မှာရှိတဲ့ ဆိုးညစ်တဲ့ ဂျူးဘာသာရေးခေါင်းဆောင်တွေကို “ဘုရားသခင်၏နိုင်ငံတော်ကို သင်တို့ထံမှနုတ်ယူ၍ အသီးသီးမည့် လူမျိုးအား ပေးရလိမ့်မည်” လို့ ပြောတယ်။ (မ. ၂၁:၄၃) အဲဒီလူမျိုးသစ်ကတော့ ပုံဆောင်အစ္စရေးလူမျိုးပဲ။ ယေဟောဝါ ရွေးချယ်မယ့်သူတွေသာ အဲဒီလူမျိုးအဝင်ဖြစ်ခွင့်ရမယ်။ ကိုယ်တော်ဟာ သူတို့နဲ့ “ပဋိညာဉ်တရားသစ်” ကိုဖွဲ့မယ်။ “ငါသည် သူတို့၏ဘုရားဖြစ်မည်။ သူတို့သည်လည်း ငါ၏လူ ဖြစ်ကြလိမ့်မည်” လို့ ယေဟောဝါပြောတယ်။—ယေ. ၃၁:၃၁-၃၃။

^၁၉ အစ္စရေးတွေ သစ္စာမဲ့သွားပြီးနောက် ယေဟောဝါက ပထမရာစုမှာ ပုံဆောင်အစ္စရေးကို သူ့လူမျိုးဖြစ်လာဖို့ ရွေးချယ်ခဲ့တယ်။ ဒါပေမဲ့ ဒီနေ့ခေတ်မှာ ဘယ်သူတွေက ကိုယ်တော့်လူတွေလဲ။ ဘုရားသခင်ကို ဝတ်ပြုလိုသူတွေဟာ စစ်မှန်တဲ့ဝတ်ပြုသူတွေကို ဘယ်လိုခွဲခြားသိနိုင်မလဲ။ ဒီအကြောင်းတွေကို နောက်ဆောင်းပါးမှာ ဆွေးနွေးပါမယ်။