ဂျပန်နိုင်ငံ၊ နာဂိုယာမြို့မှာ ၂၀၁၃၊ ဧပြီ ၂၈ တုန်းက ကျင်းပခဲ့တဲ့ အထူးစည်းဝေးတစ်ခုမှာ အုပ်ချုပ်ရေးအဖွဲ့ဝင် ညီအစ်ကို အန်တိုနီမောရစ်က စိတ်လှုပ်ရှားစရာ ကြေညာချက်တစ်ခု ကြေညာခဲ့တယ်။ သမ္မာကျမ်းစာ—မဿဲခရစ်ဝင်ကျမ်း ဆိုတဲ့ စာအုပ်သစ်ကို ဂျပန်စကားနဲ့ထုတ်ဝေလိုက်ကြောင်း ကြေညာခဲ့တယ်။ စည်းဝေးကို တိုက်ရိုက်ဖြစ်စေ၊ ဗီဒီယိုချိတ်ဆက်မှုကတစ်ဆင့်ဖြစ်စေ လူပေါင်း ၂၁၀,၀၀၀ ကျော် တက်ရောက်ခဲ့တယ်။ ဒီကြေညာချက်ကို ကြေညာတဲ့အခါ ပရိသတ်က ဝမ်းသာလွန်းလို့ အချိန်အကြာကြီး လက်ခုပ်တီးခဲ့ကြတယ်။

ဒီမဿဲခရစ်ဝင်ကျမ်းစာအုပ်ကို ကမ္ဘာသစ်ဘာသာပြန်ကျမ်းထဲကနေ ကောက်နုတ်ပြီး ပုံနှိပ်ထားတာဖြစ်တယ်။ ဒါပေမဲ့ ၁၂၈ မျက်နှာရှိတဲ့ ဒီစာအုပ်က ထူးခြားတယ်။ ဂျပန်လူမျိုးတွေကို ကူညီပေးဖို့ အထူးထုတ်ဝေထားတယ်ဆိုပြီး ညီအစ်ကိုမောရစ် ပြောတယ်။ ဒီစာအုပ်ရဲ့ ထူးခြားချက်က ဘာလဲ။ ဒီစာအုပ်ကို ဘာကြောင့် လိုအပ်သလဲ။ လူတွေ ဘယ်လိုတုံ့ပြန်သလဲ။

လူများစွာဟာ စာအုပ်ပုံစံကြောင့် အံ့အားသင့်ခဲ့ကြတယ်။ ဂျပန်အက္ခရာတွေကို အလျားလိုက်ဖြစ်စေ၊ ဒေါင်လိုက်ဖြစ်စေ စီလို့ရတယ်။ အဖွဲ့အစည်းထုတ်စာပေတွေ အပါအဝင် ပုံနှိပ်စာပေအများစုမှာ အလျားလိုက် စီကြတယ်။ ဒါပေမဲ့ ဒီစာအုပ်အသစ်မှာတော့ ဂျပန်သတင်းစာနဲ့ တခြားစာပေအတော်များများရဲ့ ပုံစံအတိုင်း ဒေါင်လိုက်စီထားတယ်။ ဒီပုံစံက ဂျပန်လူမျိုးအများစုအတွက် ဖတ်ရပိုလွယ်တယ်။ စာမျက်နှာထိပ်ပိုင်းမှာ ထားလေ့ရှိတဲ့ ခေါင်းစဉ်တွေကို ခေါင်းစဉ်ခွဲတွေအဖြစ် စာကိုယ်ထဲ ထည့်ထားတယ်။ ဒါကြောင့် အဓိကအချက်တွေကို အလွယ်တကူ မြင်တွေ့နိုင်တယ်။

ဂျပန်ညီအစ်ကိုညီအစ်မတွေဟာ စာအုပ်ရတာနဲ့ ချက်ချင်း ဖတ်ကြတယ်။ အသက် ၈၀ အရွယ် ညီအစ်မတစ်ယောက် အခုလိုပြောတယ်– “မဿဲကျမ်းကို အရင်က ခဏခဏ ဖတ်ဖူးပါတယ်။ ဒါပေမဲ့ အခုလို ခေါင်းစဉ်ခွဲတွေနဲ့ ဒေါင်လိုက်ပုံစံစီထားတာတွေက တောင်ပေါ်ဒေသနာကို ပိုအပြည့်အဝနားလည်ဖို့ ကူညီပေးတယ်။” ညီအစ်မငယ်တစ်ယောက်ကလည်း အခုလိုရေးခဲ့တယ်– “မဿဲကျမ်းစာအုပ်ကို ကျွန်မ တစ်ထိုင်တည်းနဲ့ အပြီးဖတ်လိုက်တယ်။ ဂျပန်လူမျိုးအတော်များများက အလျားလိုက်စီထားတဲ့ပုံစံကို ဖတ်နေကျဖြစ်ပေမဲ့ ဒေါင်လိုက်စီထားတဲ့ပုံစံကို ပိုကြိုက်ကြတယ်။”

ဒီစာအုပ်က ဂျပန်လူမျိုးတွေအတွက် ဘာကြောင့် အထူးအသုံးဝင်တာလဲ။ ဂျပန်လူမျိုးအများစုက ကျမ်းစာအကြောင်း သိပ်မသိပေမဲ့ ကျမ်းစာဖတ်ချင်စိတ်ရှိတယ်။ ကျမ်းစာကို တစ်ခါမှမမြင်ဖူးသူတွေဟာ အခု ကျမ်းစာရဲ့ တစ်စိတ်တစ်ပိုင်းကို လက်ဝယ်ဖတ်ရှုခွင့်ရနိုင်ပြီ။

မဿဲကျမ်းကိုမှ ဘာကြောင့် ရွေးချယ်တာလဲ။ “ကျမ်းစာ” ဆိုတဲ့စကားလုံးကို ကြားလိုက်တာနဲ့ ဂျပန်လူမျိုးအများစုက ယေရှုခရစ်အကြောင်း တွေးမိကြတယ်။ ဒါကြောင့် ယေရှုမွေးဖွားခြင်းနဲ့ မျိုးရိုး၊ တောင်ပေါ်ဒေသနာ၊ နောက်ဆုံးကာလနဲ့ပတ်သက်တဲ့ ယေရှုရဲ့ပရောဖက်ပြုချက်တွေပါဝင်တဲ့ မဿဲကျမ်းကို ရွေးလိုက်တာဖြစ်တယ်။ အဲဒီအကြောင်းအရာတွေကို ဂျပန်လူမျိုးတွေ စိတ်ဝင်စားကြတယ်။

ဂျပန်နိုင်ငံက ကြေညာသူတွေဟာ ဒီစာအုပ်အသစ်ကို တစ်အိမ်တက်ဆင်းနဲ့ ပြန်လည်ပတ်မှုတွေမှာ ထက်ထက်သန်သန် စတင်ဝေငှကြတယ်။ ညီအစ်မတစ်ယောက် အခုလိုရေးတယ်– “ရပ်ကွက်မှာရှိတဲ့  လူတွေကို ဘုရားသခင့်စကားတော်ကို ဝေငှဖို့ ပိုအခွင့်အရေး ရလာတယ်။ တကယ်တော့ အဲဒီအထူးစည်းဝေးပြီးတဲ့ မွန်းလွဲပိုင်းမှာပဲ မဿဲကျမ်းစာအုပ်တစ်အုပ် ဝေငှနိုင်ခဲ့တယ်။”

ကြေညာသူတွေဟာ ဒီစာအုပ်အသစ်ကို ဘယ်လိုဝေငှကြသလဲ။ ဂျပန်လူမျိုးအတော်များများက “ကျဉ်းသောဂိတ်တံခါး၊” ‘ဝက်တွေရှေ့က ပုလဲ၊’ ‘မနက်ဖြန်အတွက် ဘယ်တော့မှ မစိုးရိမ်နဲ့’ စတဲ့အသုံးအနှုန်းတွေကို သိထားကြတယ်။ (မ. ၆:၃၄; ၇:၆၊ ၁၃) အဲဒီစကားတွေဟာ ယေရှုခရစ်ပြောခဲ့တဲ့စကားတွေဖြစ်မှန်း သိလာရလို့ သူတို့ အံ့အားသင့်ကြတယ်။ အဲဒီစကားတွေကို မဿဲကျမ်းစာအုပ်မှာ တွေ့လိုက်ရတဲ့အခါ “ကျမ်းစာကို အနည်းဆုံးတစ်ခေါက်လောက်တော့ ဖတ်ကြည့်ချင်နေတာ” လို့ အများစုတုံ့ပြန်ကြတယ်။

မဿဲကျမ်းစာအုပ်လက်ခံထားတဲ့ အိမ်ရှင်တွေဆီ ပြန်လည်ပတ်တဲ့အခါ စာအုပ်ထဲက အကြောင်းအရာတချို့ ဒါမှမဟုတ် တစ်အုပ်လုံးကိုတောင် ချက်ချင်းဖတ်ပြီးပြီလို့ သူတို့ပြောကြတယ်။ အသက် ၆၀ အရွယ် အမျိုးသားက “ဒီစာအုပ်ကို အထပ်ထပ် ဖတ်ပြီးပြီ။ တော်တော်နှစ်သိမ့်မှုရတယ်။ ကျမ်းစာအကြောင်း ထပ်သင်ပေးပါဦး” လို့ ကြေညာသူတစ်ယောက်ကို ပြောတယ်။

မဿဲကျမ်းစာအုပ်ကို လူထုရှေ့သက်သေခံခြင်းမှာလည်း ဝေငှတယ်။ သက်သေခံတစ်ယောက်က ဟောပြောပြီးနောက် စာအုပ်လက်ခံတဲ့ အမျိုးသမီးငယ်တစ်ယောက်ကို အီးမေးလ်လိပ်စာ ပေးလိုက်တယ်။ တစ်နာရီကြာတော့ အဲဒီအမျိုးသမီးက ချက်ချင်း အီးမေးလ်ပြန်ပို့ပြီး စာအုပ်ရဲ့အကြောင်းအရာတချို့ကို ဖတ်ပြီးပြီ၊ နောက်ထပ်သိချင်တယ်လို့ ပြောတယ်။ တစ်ပတ်ကြာတော့ အဲဒီအမျိုးသမီးနဲ့ ကျမ်းစာသင်အံမှုအစပြုပြီး မကြာခင်မှာပဲ အစည်းအဝေးတွေ တက်ရောက်နေပြီ။

ဂျပန်နိုင်ငံမှာရှိတဲ့ အသင်းတော်တွေဆီ မဿဲကျမ်းစာအုပ် ၁,၆၀၀,၀၀၀ ကျော် ပို့ပေးထားတယ်။ သက်သေခံတွေက လတိုင်း စာအုပ်ထောင်ပေါင်းများစွာ ဝေငှနေတယ်။ စာအုပ်ရဲ့ အမှာစကားမှာ “ဒီစာအုပ်ကိုဖတ်ရှုခြင်းကြောင့် ကျမ်းစာကို သင်ပိုစိတ်ဝင်စားလာမယ်လို့ မျှော်လင့်ပါတယ်” ဆိုပြီး စာအုပ်ထုတ်ဝေသူတွေရဲ့ ဆန္ဒမွန်ကို ဖော်ပြထားတယ်။