“နှုတ်ဖြင့်မမြွက်ဆိုအပ်သော နာမတော်” လော

မစ်ဆူရီပြည်နယ်၊ စိန့်လူးဝစ္စမြို့၏ မြစ်ကမ်းဘေးတွင်တည်ရှိသည့် ပေ ၆၃၀ မြင့်သော မုခ်ခုံးသည် အမေရိကန်ပြည်ထောင်စုတွင် အမြင့်ဆုံးအထိမ်းအမှတ်ဖြစ်သည်။ ထိုမုခ်ခုံးအနီးတွင် ရှေးဟောင်းဘုရားရှိခိုးကျောင်းဟု အမည်တွင်သော မနိမ့်မမြင့်ချာ့ခ်ျတစ်ခုရှိသည်။

ထိုချာ့ခ်ျထုတ်ဝေသော ရှေးဟောင်းဘုရားရှိခိုးကျောင်းပုံပြင်စာအုပ်ငယ်တွင် ချာ့ခ်ျအဝင်ပေါက်၏ဗိသုကာလက်ရာအကြောင်း ဤသို့ဆိုသည်– “ဆင်ဝင်ပေါ်ရှိ လှပသောတြိဂံပုံ မြင်းမိုရ်ပိတ်၏အလယ်တွင် နှုတ်ဖြင့်မမြွက်ဆိုအပ်သော ဘုရားသခင့်နာမတော်ကို ရွှေရောင်ဟေဗြဲအက္ခရာစာလုံးကြီးများဖြင့် ပုံဖော်ထားသည်။” ဓာတ်ပုံတွင်ပါသည့်အတိုင်း ဘုရားသခင့်နာမတော်ကိုရည်ညွှန်းသော ဟေဗြဲအက္ခရာလေးလုံး יהוה (ယဟဝဟ) သို့မဟုတ် တက်တြာဂရမ်မီတန်ကို ရှင်းလင်းစွာတွေ့ မြင်နိုင်သည်။

ထိုဘုရားကျောင်းတည်ဆောက်ခဲ့သော ၁၈၃၄ ခုနှစ်တွင် စိန့်လူးဝစ္စမြို့ရှိ ခရစ်ယာန်ဂိုဏ်းအုပ် ကြီးစိုးရာနယ်မြေ၌ နေထိုင်သူများသည် ဟေဗြဲအက္ခရာလေးလုံးပါသော နာမတော်ကို အရေးကြီးသည်ဟုယူဆခဲ့ကြ၏။ သို့ဆိုလျှင် ထိုနာမတော်မြတ်ကို “နှုတ်ဖြင့်မမြွက်ဆိုအပ်သော” နာမအဖြစ် အဘယ်ကြောင့် ယူဆခဲ့ကြသနည်း။

ဘီစီခြောက်ရာစုတွင် ဗာဗုလုန်သုံ့ပန်းဘဝမှ ဂျူးတို့ပြန်လာပြီးနောက် အဘယ်အရာဖြစ်ပျက်ခဲ့ကြောင်း ကက်သလစ်စွယ်စုံကျမ်းသစ်က ဤသို့ရှင်းပြ၏– “ယာဝေးနာမ [သရအက္ခရာပေါင်းစပ်ထားသော တက်တြာဂရမ်မီတန်] ကို အထူးလေးမြတ်ကြည်ညိုရာအဖြစ် ယူဆလာသောကြောင့် ယင်းနေရာတွင် အဒိုးနေး [သခင်] သို့မဟုတ် အီလိုဟင် [ဘုရားသခင်] ဟူသောစကားလုံးဖြင့် အစားထိုးသည့်ဓလေ့ ပေါ်ပေါက်လာ၏။ . . . ယင်းကြောင့် နောက်ဆုံးတွင် ယာဝေးနာမ၏ အသံထွက်အမှန်ကို မည်သူမျှမသိကြတော့ပေ။” သို့နှင့် ဘုရားသခင့်နာမတော်ကို လူတို့အသုံးမပြုကြတော့ချေ။ နောက်ဆုံးတွင် ထိုနာမတော်၏ မူရင်းအသံထွက်အတိအကျကို မသိတော့ဘဲ နှုတ်ဖြင့်မမြွက်ဆိုအပ်သောနာမ ဖြစ်လာသည်။

ကျွန်ုပ်တို့သည် ဘုရားသခင့်နာမတော်၏ အသံထွက်အတိအကျကို ထွက်ဆိုနိုင်မည်မဟုတ်သော်လည်း အရေးကြီးသည်မှာ ဘုရားသခင့်နာမတော်ကို အသုံးပြုခြင်းသည် ကျွန်ုပ်တို့အား ကိုယ်တော်ထံ ပို၍ချဉ်းကပ်စေနိုင်သည်ဟူသောအချက်ဖြစ်၏။ သင့်မိတ်ဆွေများက သင့်အမည်ကိုအသုံးမပြုလိုဟုပြောလျှင် သင်မည်သို့ခံစားရမည်နည်း။ သူတို့သည် ဘာသာခြားစကားတစ်မျိုးကို ပြောဆိုပြီး သင့်အမည်၏ အသံထွက်အတိအကျအတိုင်း မထွက်ဆိုနိုင်သည့်တိုင် သင့်ကို အမည်ဖြင့်တပ်၍ခေါ်ဆိုသည်ကို သင် ပို၍နှစ်သက်သည်မဟုတ်လော။ ဘုရားသခင်နှင့်ပတ်သက်၍လည်း အလားတူပင်။ ကိုယ်တော်သည် ယေဟောဝါဟူသော မိမိ၏ကိုယ်ပိုင်နာမတော်ကို ကျွန်ုပ်တို့အား အသုံးပြုစေလိုသည်။

မြန်မာဘာသာစကားတွင် ဘုရားသခင်၏နာမကို “ယေဟောဝါ” ဟုအသံထွက်လေ့ရှိသည်။ ဘုရားသခင်ကို ချစ်သောသူအပေါင်းတို့သည် ကိုယ်တော်၏ကိုယ်ပိုင်နာမကို အသုံးပြုခြင်းဖြင့် ကိုယ်တော့်ထံချဉ်းကပ်ခြင်းက သင့်လျော်လှသည်မဟုတ်ပေလော။ အကြောင်းမှာ “ဘုရားသခင်၌ ချဉ်းကပ်ကြလော့။ သို့ပြုလျှင် သင်တို့၌ ချဉ်းကပ်တော်မူလိမ့်မည်” ဟုသမ္မာကျမ်းစာက ဆိုထားသောကြောင့်ဖြစ်၏။—ယာကုပ် ၄:၈။