သတင်းကောင်းကျမ်းများသည် မည်မျှ စိတ်ချအားထားရသနည်း

“သတင်းကောင်းကျမ်းများကို ရှေးခရစ်ယာန်ဒဏ္ဍာရီအဖြစ် ယခု ရှုမြင်ကြရမည်။”—ဘာတန်အယ်လ်မက်ခ်၊ ဓမ္မသစ်ကျမ်းလေ့လာမှုများ၏ အငြိမ်းစားပါမောက္ခ။

အထက်တွင် ကိုးကားထားသော ပါမောက္ခတစ်ဦးသာ ထိုသို့ယူဆသည်မဟုတ်ပါ။ မဿဲ၊ မာကု၊ လုကာ၊ ယောဟန်တို့ရေးခဲ့သော ယေရှု၏ဘဝနှင့်ဓမ္မအမှုမှတ်တမ်းများဖြစ်သည့် သတင်းကောင်းကျမ်းများ၏ စိတ်ချအားထားနိုင်မှုကို ကျမ်းပညာရှင်များစွာ သံသယဝင်ခဲ့ကြသည်။ အချို့က သတင်းကောင်းကျမ်းများကို ဒဏ္ဍာရီအဖြစ် အဘယ်ကြောင့် ရှုမြင်ကြသနည်း။ သူတို့၏ရှုမြင်ပုံကြောင့် သတင်းကောင်းကျမ်းများ၏မှန်ကန်မှုကို သင် သံသယဝင်သင့်သလော။ အထောက်အထားအချို့ကို ဆန်းစစ်ကြည့်ကြစို့။

သတင်းကောင်းကျမ်းများ၏ စိတ်ချအားထားနိုင်မှုကို စောဒကတက်ကြ

အေဒီ ၁၇ ရာစုအထိ သတင်းကောင်းကျမ်းများ၏ စိတ်ချအားထားနိုင်မှုကို မည်သူမျှ အကြီးအကျယ်စောဒကမတက်ခဲ့ကြပေ။ သို့သော် အထူးသဖြင့် ၁၉ ရာစုမှစ၍ ပညာရှင်များစွာသည် သတင်းကောင်းကျမ်းများကို ဘုရားသခင်ထံမှမဟုတ်ဘဲ လူတို့လုပ်ကြံရေးသားခဲ့သောကျမ်းများအဖြစ် ယူဆကြသည်။ ယေရှုနှင့်ပတ်သက်သောဖြစ်ရပ်များကို ကျမ်းရေးသူများ ကိုယ်တွေ့သိမြင်ခဲ့သည်ဟူသောအချက်ကို ထိုသူတို့လက်မခံကြပေ။ စိတ်ချအားထားရသောသမိုင်းကို ထိုကျမ်းရေးသူများ မှတ်တမ်းတင်နိုင်မည်မဟုတ်ဟုလည်း အခိုင်အမာဆိုကြသည်။ ထို့ပြင် “ရှုထောင့်တူများ” ဟုအဓိပ္ပာယ်ရသည့် စင်နောတစ် (synoptic) ဟုခေါ်သော ပထမသတင်းကောင်းကျမ်းသုံးကျမ်း၏ အရေးအသားနှင့်အကြောင်းအရာဆင်တူမှုများက ကျမ်းရေးသူများသည် အပြန်အလှန်ကူးချခဲ့ကြောင်း ဖော်ပြနေသည်ဟု သူတို့ကောက်ချက်ချကြသည်။ ဝေဖန်ရေးသမားများကလည်း သတင်းကောင်းကျမ်းများပါ ယေရှု၏အံ့ဖွယ်အမှုများနှင့် ကိုယ်တော်၏ရှင်ပြန်ထမြောက်မှုကို လက်မခံကြပေ။ ယေရှုသည် သမိုင်းဝင်ပုဂ္ဂိုလ်တစ်ဦးမဟုတ်ဟူ၍ပင် အချို့က အခိုင်အမာဆိုကြသည်။

မာကုသည် မဿဲနှင့်လုကာကျမ်းပါအချက်များမှလွဲ၍ အခြားအရေးပါသည့်အချက်အလက်များကို ထပ်မံဖြည့်စွက်ထားခြင်းမရှိသောကြောင့် သူ၏သတင်းကောင်းကျမ်းကို ဦးဆုံးရေးသားခဲ့ခြင်းဖြစ်ရမည်ဟု ထိုသူတို့ ကောက်ချက်ချကြသည်။ မဿဲနှင့်လုကာသည် မိမိတို့၏သတင်းကောင်းကျမ်းကိုရေးသားရာတွင် မာကုကျမ်းမှကူးချခဲ့သည့်အပြင် မူရင်းအချက်အလက်ဟု ကျမ်းပညာရှင်များခေါ်သောကျမ်းကိုလည်း မှီငြမ်းရေးသားခဲ့သည်ဟု ဝေဖန်ရေးသမားများယူဆကြ၏။ ကျမ်းပညာရှင် အေအက်ဖ်ဂျေကလန်၏အဆိုအရ ဤရေပန်းစားသောယူဆချက်က “သတင်းကောင်းကျမ်းရေးသူများသည် ကျမ်းရေးသူများမဟုတ်ဘဲ စုဆောင်းပြုစုသူများသာဖြစ်သည်ဟု သိက္ခာချလိုက်ခြင်းပင်။” ထိုယူဆချက်ကြောင့် သတင်းကောင်းကျမ်းရေးသူများကို ခိုးချကူးယူသူများ၊ ဒဏ္ဍာရီဖန်တီးသူများအဖြစ် ယူဆသွားစေသည်။ ယင်းယူဆချက်က ဘုရားသခင့်စွမ်းအားတော်ဖြင့် ရေးသားထားသော သမ္မာကျမ်းစာအပေါ် ယုံကြည်စိတ်ချမှုလျော့နည်းစေသည်။—၂ တိမောသေ ၃:၁၆။

သတင်းကောင်းကျမ်းရေးသူများသည် ခိုးချကူးယူသူများလော

သတင်းကောင်းကျမ်းများ၏ ဆင်တူမှုများက ကျမ်းရေးသူများသည် တစ်ဦးထံမှတစ်ဦး ကူးရေးရုံမျှပြုခဲ့ကြောင်း အမှန်တကယ် သက်သေထူပါသလော။ သက်သေမထူပါ။ အဘယ်ကြောင့်နည်း။ အကြောင်းရင်းတစ်ခုမှာ သန့်ရှင်းသောစွမ်းအားတော်သည် “[ယေရှု]ပြောခဲ့သမျှသောစကားတို့ကို မှတ်မိသောဉာဏ်” ပေးမည်ဟု တပည့်များကို ကိုယ်တော်ကတိပြုခဲ့၍ဖြစ်သည်။ (ယောဟန် ၁၄:၂၆) ထို့ကြောင့် ကျမ်းရေးသူများသည် တူညီသောအကြောင်းအရာများကို မှတ်မိ၍ မှတ်တမ်းတင်ခဲ့ခြင်းမှာ အံ့ဩစရာမဟုတ်ပေ။ ကျမ်းရေးသူအချို့သည် အခြားကျမ်းရေးသူများ၏အရေးအသားကို ဖတ်ရှုကာ ရည်ညွှန်းကြမည်ဖြစ်သော်လည်း ယင်းသည် ဂရုတစိုက်လေ့လာခြင်းဖြစ်ပြီး ခိုးချကူးယူခြင်းဟူ၍ မသတ်မှတ်နိုင်ပါ။ (၂ ပေတရု ၃:၁၅) ထို့ပြင် “ယေရှု၏ မမေ့နိုင်စရာစကားများကို တစ်ပုံစံတည်းမှတ်တမ်းတင်ထားခြင်းမှာ နှုတ်တိုက်လက်ဆင့်ကမ်းခြင်းဓလေ့ ကြောင့်ဖြစ်နိုင်သည်” ဟု ကျမ်းအဘိဓာန်တစ်အုပ်တွင် ဖော်ပြသည်။

လုကာသည် မျက်မြင်သက်သေများစွာနှင့် ပြောဆိုခဲ့ပြီး “ထိုအတ္ထုပ္ပတ္တိအလုံးစုံတို့ကို ရှေးဦးစွာမှစ၍ စေ့စေ့ဖွေရှာလိုက်စစ်” သည်ဟု ရေးသားခဲ့သည်။ (လုကာ ၁:၁-၄) ယင်းအချက်က သူသည် ခိုးချကူးယူသူ သို့မဟုတ် လုပ်ကြံရေးသားသူတစ်ဦးဖြစ်သည်ဟူသည့်သဘော သက်ရောက်ပါသလော။ လုံးဝပင်။ ရှေးဟောင်း သုတေသနပညာရှင် ဝီလျံရမ်စေးသည် လုကာကျမ်းကို စေ့စေ့စပ်စပ် ဆန်းစစ်လေ့လာပြီးနောက် ဤသို့ဆို၏– “လုကာသည် ထိပ်တန်းသမိုင်းပညာရှင်တစ်ဦးဖြစ်ပြီး သမိုင်းဝင်အချက်အလက်များကို မည်သို့မှတ်တမ်းတင်သင့်ကြောင်း သိရှိသူဖြစ်သည်၊ သူ၏ဖော်ပြချက်များကို ယုံကြည်စိတ်ချထိုက်သည်။ . . . ဤကျမ်းရေးသူကို အပြောင်မြောက်ဆုံး သမိုင်းပညာရှင်ကြီးများစာရင်းတွင် ထည့်သွင်းသင့်သည်။”

တတိယရာစုမှ ဘာသာရေးပညာရှင် ဩရီဂျင်အပါအဝင် အစောပိုင်းချာ့ခ်ျဘုန်းကြီးများက တမန်တော်မဿဲသည် သတင်းကောင်းကျမ်းကို ဦးဆုံးရေးခဲ့သူဟု ဖော်ပြသည်။ ဩရီဂျင် ဤသို့ရေးသည်– “တစ်ချိန်က အခွန်ခံတစ်ဦးဖြစ်ပြီး နောက်ပိုင်းတွင် ယေရှုခရစ်၏တမန်တော်ဖြစ်လာသူ မဿဲသည် ခရစ်ယာန်ဘာသာသို့ပြောင်းဝင်လာသော ဂျူးများအတွက် မဿဲသတင်းကောင်းကျမ်းကို ဟေဗြဲဘာသာစကားဖြင့် ဦးစွာရေးသားခဲ့သည်။” မျက်မြင်သက်သေဖြစ်သော တမန်တော်မဿဲသည် မျက်မြင်သက်သေမဟုတ်သော မာကုထံမှ ခိုးချကူးယူဖို့မလိုသည်မှာ ရှင်းနေပါသည်။ သို့ဆိုလျှင် မဿဲနှင့်လုကာသည် မာကုကျမ်းအပြင် မူရင်းအချက်အလက်ဟုယူမှတ်သောကျမ်းမှ ကူးချခဲ့သည်ဟုစွပ်စွဲရသော အကြောင်းရင်းများကား အဘယ်နည်း။

မာကုကျမ်းကို ဦးစွာရေးသားခဲ့သလော

မာကုကျမ်းကို ဦးစွာရေးသားခဲ့ပြီး မဿဲနှင့်လုကာတို့က ယင်းကိုကူးချခဲ့သည်ဟူသောယူဆချက်သည် “ယုတ္တိရှိသော အဆိုပြုချက်” မဟုတ်ကြောင်း ကျမ်းစာအဘိဓာန်တစ်အုပ်က ဆိုသည်။  သို့သော် မာကုသည် မိမိ၏သတင်းကောင်းကျမ်းကို မဿဲနှင့်လုကာထက် ဦးဆုံးရေးသားခဲ့သည်ဟု ကျမ်းပညာရှင်များစွာယူဆကြ၏၊ အကြောင်းမှာ မာကုကျမ်းတွင် အခြားသတင်းကောင်းကျမ်းများပါ အချက်များမှလွဲ၍ အခြားအချက်များမပါရှိသောကြောင့်ဟု သူတို့ဆိုကြသည်။ ဥပမာ၊ မာကုကျမ်းကို ဦးစွာရေးသားခဲ့သည်ဟု ၁၉ ရာစုမှ ကျမ်းပညာရှင်ဂျိုဟဲနပ်စ်ကွန်က အခိုင်အမာဆိုသည်။ သို့မဟုတ်ပါက “မာကုသည် မဿဲနှင့်လုကာတို့၏ကျမ်းနှစ်ကျမ်းကို အပိုင်းအစဖြစ်အောင် ညှပ်ပြီး အိုးတစ်လုံးတွင်ထည့်ကာ ရောမွှေပြီးနောက် ယင်းတို့မှ မိမိ၏သတင်းကောင်းကျမ်းကို ရေးသားခဲ့ခြင်းဖြစ်မည်” ဟုသူဆက်ပြောသည်။

မာကုကျမ်းသည် အတိုဆုံးဖြစ်သောကြောင့် ထူးခြားသောအကြောင်းအရာ အနည်းငယ်သာပါဝင်သည်မှာ အံ့ဩစရာမဟုတ်ပေ။ သို့သော် ယင်းက ဦးစွာရေးသားခဲ့သည်ဟူသော အထောက်အထားမဟုတ်ပါ။ မဿဲနှင့်လုကာကျမ်းတွင်ပါရှိသည့်အရာများမှလွဲ၍ အခြားအကြောင်းအရာများမပါရှိ ဟူသောအချက်မှာလည်း မမှန်ပေ။ ယေရှု၏ဓမ္မအမှုမှတ်တမ်းဖြစ်သော မာကုကျမ်းတွင် မဿဲနှင့်လုကာကျမ်း၌မတွေ့ရသော၊ ယေရှု၏ဘဝမှတ်တမ်းကိုထူးခြားစေသော ကျမ်းချက် ၁၈၀ ကျော်နှင့် စိတ်ဝင်စားဖွယ် အသေးစိတ်အချက်အလက်များ ပါဝင်သည်။— စာမျက်နှာ ၁၃ ရှိ လေးထောင့်ကွက်တွင် ကြည့်ပါ။

မူရင်းအချက်အလက်ဟူသည် အဘယ်နည်း

မဿဲနှင့်လုကာတို့ အဓိကမှီငြမ်းခဲ့သည်ဟု အချို့ဆိုသော မူရင်းအချက်အလက်နှင့်ပတ်သက်၍ အဘယ်အရာဆိုနိုင်သနည်း။ “မူရင်းအချက်အလက်သည် ကျွန်ုပ်တို့တွင်ရှိသော အရေးတကာ့အရေးကြီးဆုံး ခရစ်ယာန်ကျမ်းဖြစ်၏” ဟုဘာသာရေးပါမောက္ခ ဂျိမ်းအမ်ရောဘင်စင်က ဆိုသည်။ သို့သော် ယခု၊ ထိုကျမ်းမရှိတော့သည့်အပြင် ရှိခဲ့ကြောင်း မည်သူမျှသက်သေမပြနိုင်သောကြောင့် ထိုအဆိုမှာ ထူးဆန်းနေသည်။ ထိုကျမ်းမိတ္တူများစွာ ထုတ်ဝေခဲ့သည်ဟု ကျမ်းပညာရှင်များဆိုသော်လည်း ယခုကဲ့သို့ အစအနပျောက်နေခြင်းမှာ ပို၍ထူးဆန်းနေသည်။ ထို့ပြင် ချာ့ခ်ျဘုန်းကြီးများက ထိုကျမ်းကို မည်သည့်အခါမျှ ကိုးကားခဲ့ခြင်းမရှိပါ။

စဉ်းစားကြည့်ပါ။ မူရင်းအချက်အလက်သည် တကယ်ရှိခဲ့ပြီး ယင်းသည် မာကုကျမ်းကို ဦးဆုံးရေးသားခဲ့သည်ဟူသောအဆိုကို ထောက်ခံသည်ဟုယူဆရ၏။ ယင်းသည် မှန်းဆချက်တစ်ခုအပေါ် နောက်မှန်းဆချက်တစ်ခုထပ်ဆင့်ခြင်း မဟုတ်ပေလော။ ထိုသို့သောယူဆချက်များနှင့်ပတ်သက်လျှင် “ဉာဏ်တိမ်သောသူသည် သူတစ်ပါးပြောသမျှကိုယုံတတ်၏။ ပညာသတိရှိသောသူမူကား မိမိသွားရာလမ်းကို စေ့စေ့ကြည့်ရှုတတ်၏” ဟူသောစကားကို စိတ်စွဲမှတ်ခြင်းက ပညာရှိရာရောက်သည်။—သု. ၁၄:၁၅။

သတင်းကောင်းကျမ်းများ —ကျမ်းစစ်ကျမ်းမှန်ဖြစ်ပြီး စိတ်ချအားထားနိုင်

ကျမ်းဝေဖန်ရေးသမားများ၏ ယူဆချက်များနှင့် မခိုင်လုံသောမှန်းဆချက်များကြောင့် လူများစွာသည် ယေရှုဘဝနှင့်ဓမ္မအမှုမှတ်တမ်းများ၏ စိတ်ချအားထားနိုင်မှုကို မဆန်းစစ်လိုတော့ပေ။ အစောပိုင်းခရစ်ယာန်များသည် ယေရှု၏ဘဝ၊ ဓမ္မအမှု၊ သေခြင်း၊ ရှင်ပြန်ထမြောက်ခြင်းတို့ကို ဒဏ္ဍာရီအဖြစ်မရှုမြင်ခဲ့ကြောင်း ထိုကျမ်းစောင်များက ရှင်းလင်းစွာဖော်ပြနေသည်။ ရာနှင့်ချီသောမျက်မြင်သက်သေတို့ကလည်း ထိုအဖြစ်မှန်များ၏မှန်ကန်မှုကို ထောက်ခံကြသည်။ ယေရှုနောက်လိုက်သောကြောင့် နှိပ်စက်ညှဉ်းပန်းခြင်းနှင့်သေခြင်းကို ရင်ဆိုင်ဖို့အသင့်ရှိသော ထိုအစောပိုင်းခရစ်ယာန်များသည် ယေရှု၏ဓမ္မအမှုနှင့်ရှင်ပြန်ထမြောက်ခြင်းတို့သာ စိတ်ကူးသက်သက်ဖြစ်ခဲ့လျှင် ခရစ်ယာန်တစ်ဦးဖြစ်ခြင်းမှာ အဓိပ္ပာယ်မရှိတော့ကြောင်း ကောင်းစွာသိရှိထားကြသည်။—၁ ကောရိန္သု ၁၅:၃-၈၊ ၁၇၊ ၁၉; ၂ တိမောသေ ၂:၂။

မာကုကျမ်းကို ဦးဆုံးရေးသားခဲ့သည်ဟူသော မှန်းဆချက်နှင့် မူရင်းအချက်အလက် ထူးဆန်းစွာပျောက်ဆုံးနေခြင်းနှင့်ပတ်သက်သော အငြင်းပွားမှုကိုရည်ညွှန်း၍ ဘာသာရေးပါမောက္ခ ဂျော့ဒဘလျူဘူချန်နန်က ဤသို့ဆို၏– “မူလအစနှင့်ပတ်သက်သော မှန်းဆချက်များကို အာရုံစိုက်ခြင်းက ကျမ်းစာလေ့လာသူများအား ကျမ်းစာကိုဆန်းစစ်ရာမှ စိတ်ပျံ့လွင့်စေသည်။” ယင်းသည် တိမောသေကိုပေးသော တမန်တော်ပေါလု၏ ဤဆုံးမစကားနှင့်ကိုက်ညီသည်– ‘ဒဏ္ဍာရီစကားကို နားမထောင်ကြနှင့်ဟူ၍လည်းကောင်း၊ ယုံကြည်ခြင်း၌တည်သော ဘုရားသခင်၏ ခရစ်ယာန်သာသနာတော်ကိုပြုစုသည်ထက် အချင်းချင်းငြင်းခုံခြင်းကို သာ၍ပြုစုတတ်သော၊ ပြင်ဆင်၍မကုန်နိုင်သော ဆွေစဉ်မျိုးဆက်စာရင်းများကို ပမာဏမပြုကြနှင့်။’—၁ တိမောသေ ၁:၄။

သတင်းကောင်းကျမ်းများကို စိတ်ချအားထားနိုင်ပါသည်။ ယင်းတို့တွင် မျက်မြင်သက်သေများ၏ ယုံကြည်စိတ်ချထိုက်သောမှတ်တမ်းများ ပါဝင်သည်။ ထို့ပြင် စေ့စေ့စပ်စပ်လေ့လာပြီးမှ ရေးသားခဲ့ခြင်းဖြစ်၏။ ယင်းတို့သည် ယေရှုခရစ်၏ဘဝနှင့်ပတ်သက်သော စိတ်ဝင်စားဖွယ်အဖြစ်မှန်များစွာကို သိရှိစေသည်။ ထို့ကြောင့် တိမောသေကဲ့သို့ ကျွန်ုပ်တို့လည်း “အထက်ကသင်၍ နှလုံးသွင်းမိသောအယူဝါဒ၌ တည်နေလော့” ဟူသော ပေါလု၏စကားများကို နားထောင်သင့်သည်။ သတင်းကောင်းကျမ်းလေးကျမ်းအပါအဝင် “ကျမ်းစာရှိသမျှသည် ဘုရားသခင်မှုတ်သွင်းတော်မူ” ကြောင်း လက်ခံရန် အကြောင်းရင်းခိုင်လုံပါသည်။—၂ တိမောသေ ၃:၁၄-၁၇။

[စာမျက်နှာ ၁၃ ပါလေးထောင့်ကွက်]

 အောက်ပါအချက်များကို မာကုမရေးသားခဲ့လျှင် ကျွန်ုပ်တို့သိရှိနိုင်မည်မဟုတ် . . .

ယေရှုသည် အမျက်တော်နှင့် သူတို့ကိုပတ်လည် ကြည့်ရှု၍ သူတို့စိတ်နှလုံးမိုက်သောကြောင့် ဝမ်းနည်းတော်မူခြင်းရှိ၏ (မာကု ၃:၅)

ယာကုပ်နှင့်ယောဟန်အား ဗောနေရဂက်ဟူသော အမည်သစ်ကို ပေးတော်မူ၏ (မာကု ၃:၁၇)

မိန်းမတစ်ယောက်သည် ဥစ္စာရှိသမျှ ကုန်သော်လည်း သွေးသွန်နာ တိုးလေ၏ (မာကု ၅:၂၆)

ဟေရောဒိသည် နှစ်ခြင်းဆရာယောဟန်ကို ရန်ငြိုးဖွဲ့လေ၏၊ ဟေရုဒ်သည် ယောဟန်ကို ကြောက်ရွံ့ ရိုသေ၍ သူ့ကိုလည်း စောင့်မ၏ (မာကု ၆:၁၉၊ ၂၀)

ခဏအားဖြည့်၍ ငြိမ်သက်စွာနေကြဟု တပည့်များကို ယေရှုဖိတ်ခေါ်၏ (မာကု ၆:၃၁)

ဖာရိရှဲများသည် တံတောင်ဆစ်အထိလက်ဆေးလေ့ ရှိသည် (မာကု ၇:၂-၄၊ ကဘ)

ယေရှုသည် သူငယ်တို့ကိုချီပိုက်တော်မူ၏ (မာကု ၁၀:၁၆)

ယေရှုသည် အရာရှိလုလင်ကို ချစ်သောစိတ်ရှိ၏ (မာကု ၁၀:၂၁)

ပေတရု၊ ယာကုပ်၊ ယောဟန်နှင့် အန္ဒြေသည် ယေရှုကို အခြားသူမပါဘဲ မေးလျှောက်ကြ၏ (မာကု ၁၃:၃၊ ၄)

လုလင်တစ်ယောက်သည် ပိတ်ထည်ကို စွန့်၍ထွက်ပြေးလေ၏ (မာကု ၁၄:၅၁၊ ၅၂၊ ကဘ)

ထို့ပြင် ယေရှု၏ပုံဥပမာများထဲမှတစ်ခုနှင့် အံ့ဖွယ်အမှုနှစ်ခုကို မာကုကျမ်းတွင်သာ တွေ့ရှိနိုင်သည်။—မာကု ၄:၂၆-၂၉; ၇:၃၂-၃၇; ၈:၂၂-၂၆။

အခြားသတင်းကောင်းကျမ်းများ၌မတွေ့ ရသော အသေးစိတ်အချက်အလက်များစွာ မာကုကျမ်းတွင် ပါရှိသည်။ ထိုအသေးစိတ်အချက်အလက်အားလုံး၏တန်ဖိုးကို အချိန်ယူ၍တွေးတောဆင်ခြင်ပါက ယင်းတို့ကို တန်ဖိုးထားလေးမြတ်စိတ် အမှန်တိုးပွား လာပါလိမ့်မည်။