လွန်ခဲ့တဲ့ နှစ်ပေါင်း ၃,၅၀၀ လောက်ကို တို့တွေ ပြန်ရောက်သွားတယ်လို့ စိတ်ကူးကြည့်ပါ။ ခါနာန်ပြည်ထဲက ဂျေရိခိုမြို့ထဲကို တို့တွေ ရောက်နေတာပေါ့။ ဒီမြို့မှာ ရာခပ်ဆိုတဲ့ မိန်းကလေးတစ်ယောက် နေတယ်။ အစ္စရေးလူတွေကို အီဂျစ်ပြည် ကျွန်ဘဝကနေ မောရှေ ခေါ်ထုတ်လာပြီး ပင်လယ်နီရဲ့ ခြောက်သွေ့တဲ့ ပင်လယ်ကြမ်းပြင်တစ်လျှောက် ဦးဆောင်ခေါ်လာပြီးတဲ့နောက်ပိုင်းမှာ ရာခပ် မွေးဖွားခဲ့တာ။ အဲဒီအချိန်တုန်းက ရေဒီယိုတွေ၊ တီဗွီတွေ၊ အင်တာနက်တွေ မရှိတဲ့အပြင် ဒီအံ့ဖွယ်အမှုက ရာခပ် နေတဲ့နေရာရဲ့ အဝေးကြီးမှာ ဖြစ်ခဲ့ပေမဲ့ ဒီအကြောင်းကို ရာခပ် သိနေတယ်။ သူ ဘယ်လို သိခဲ့တယ်ဆိုတာ ကလေးတို့ သိသလား။— *

ခရီးသည်တွေက ဒီအံ့ဖွယ်အမှုတွေအကြောင်း ပြောပြကြမှာ သေချာတယ်။ ရာခပ် ကြီးပြင်းလာတာနဲ့အမျှ ယေဟောဝါရဲ့ လူမျိုးအတွက် ယေဟောဝါ လုပ်ပေးခဲ့တဲ့အမှုတွေကို အမှတ်ရနေမှာ။ နောက်ပိုင်း အစ္စရေးလူတွေနဲ့ပတ်သက်တဲ့ တခြားအံ့သြစရာတွေကို သူထပ်ကြားခဲ့တယ်။ တောထဲမှာ အနှစ် ၄၀ လှည့်လည်ပြီးတဲ့နောက် သူတို့ ခါနာန်ပြည်ထဲ ရောက်လာကြတယ်။ သူတို့ကိုဆန့်ကျင်တဲ့သူ ဘယ်သူ့ကိုမဆို အောင်နိုင်ဖို့ သူတို့ကို ဘုရားသခင် ကူညီပေးနေတယ်။ အခု အစ္စရေးလူတွေက ဂျေရိခိုမြို့ဘေးမှာရှိတဲ့ ဂျော်ဒန်မြစ်တစ်ဖက်မှာ တပ်ချထားတယ်ဆိုတာ ရာခပ် သိလိုက်ရတယ်။

ဧည့်သည်တွေ တည်းခိုနိုင်တဲ့နေရာမှာ ရာခပ် အလုပ်လုပ်တယ်ဆိုတာကို သိထားတဲ့ သူစိမ်းနှစ်ယောက်က တစ်ညနေမှာ ရာခပ်ဆီ ရောက်လာတယ်။ ဒါနဲ့ ရာခပ်က သူတို့ကို အိမ်ထဲခေါ်သွားလိုက်တယ်။ ညရောက်တော့ ဂျေရိခိုမင်းကြီးက အစ္စရေးသူလျှိုတွေ မြို့ထဲဝင်လာပြီး ရာခပ် အလုပ်လုပ်တဲ့အိမ်ကို သွားတယ်ဆိုတာ သိသွားရော။ ဒါနဲ့ ရာခပ်ဆီ လူလွှတ်ပြီး သူ့အိမ်ကိုရောက်လာတဲ့သူတွေကို ထုတ်ပေးဖို့ ပြောတယ်။ ဘယ်အကြောင်းကို ရာခပ် သိထားပြီး ဘာလုပ်ခဲ့တယ်ဆိုတာ ကလေးတို့သိသလား။—

ဒီဧည့်သည်တွေဟာ အစ္စရေးသူလျှိုတွေဖြစ်တယ်ဆိုတာကို မင်းကြီးလွှတ်လိုက်တဲ့လူတွေ မရောက်ခင်ကတည်းက ရာခပ် သိနှင့်နေတယ်။ ဒါကြောင့် သူတို့ကို အိမ်မိုးပေါ်မှာ ဝှက်ထားလိုက်ပြီး ‘ကျွန်မဆီ လူရောက်တာ မှန်ပါတယ်။ . . . မိုးချုပ်ပြီး တံခါးပိတ်ချိန်ရောက်တဲ့အခါ သူတို့ ထွက်သွားကြပါတယ်’ လို့ မင်းကြီးရဲ့လူတွေကို ပြန်ပြောလိုက်တယ်။ ‘အလျင်အမြန် လိုက်ကြပါ’ လို့တောင် ပြောလိုက်သေးတယ်။

သူလျှိုတွေကို ရာခပ် ဘာကြောင့် ကာကွယ်ပေးတယ်လို့ ကလေးတို့ ထင်သလဲ။— ‘ယေဟောဝါက သင်တို့ကို ဒီပြည်ကို ပေးမယ်ဆိုတာ. . . ကျွန်မ သိပါတယ်။ . . . သင်တို့ အီဂျစ်ပြည်ကနေ ထွက်လာတဲ့အခါ ဧဒုံပင်လယ်ရေ [ပင်လယ်နီ] ကို ယေဟောဝါ ခန်းခြောက်စေတယ်ဆိုတာ . . . ကျွန်မတို့ ကြားရကြပြီ’ လို့သူလျှိုတွေကို ရာခပ် ပြောတာကိုကြည့်ရင် သူတို့ကို သူ ဘာကြောင့် ကာကွယ်ပေးခဲ့သလဲဆိုတာ သိနိုင်တယ်။  တခြားရန်သူတွေကို အောင်နိုင်ဖို့ အစ္စရေးလူတွေကို ဘုရားသခင် ကူညီပေးခဲ့တယ်ဆိုတာလည်း ရာခပ် ကြားခဲ့တယ်။

သူလျှိုတွေကို ရာခပ် ကာကွယ်ပေးတာကို ယေဟောဝါ အရမ်းနှစ်သက်ခဲ့တယ်။ ဒါကို ဟေဗြဲ ၁၁:၃၁ မှာ တို့တွေ တွေ့နိုင်တယ်။ ‘သင်တို့ကို ကျွန်မ ကျေးဇူးပြုတဲ့အတွက် သင်တို့လည်း ဂျေရိခိုမြို့ကို လာတိုက်တဲ့အခါ ကျွန်မမိဘ၊ ညီအစ်မ၊ မောင်တို့ကို ကယ်တင်မယ်လို့ ကတိပေးပါ’ ဆိုပြီး သူလျှိုတွေဆီ ရာခပ် အသနားခံတာကိုလည်း ကိုယ်တော် နှစ်သက်တယ်။ ဒါနဲ့ သူလျှိုတွေက သူတို့ရဲ့ညွှန်ကြားချက်တွေကို လိုက်နာမယ်ဆိုရင် ရာခပ် ပြောသလို လုပ်ပါ့မယ်လို့ ကတိပေးလိုက်တယ်။ အဲဒီညွှန်ကြားချက်တွေက ဘာလဲဆိုတာ ကလေးတို့ သိသလား။—

‘ဒီကြိုးနီကို သင့်ရဲ့ပြတင်းပေါက်မှာ ချည်ထားပြီး သင့်ဆွေမျိုးတွေကို သင့်အိမ်မှာ ခေါ်ထားရမယ်။ အဲဒီလိုလုပ်မယ်ဆိုရင် အိမ်ထဲမှာရှိတဲ့သူတိုင်း အသက်လွတ်လိမ့်မယ်’ လို့ သူလျှိုတွေ မှာတယ်။ ရာခပ်လည်း သူလျှိုတွေပြောတဲ့အတိုင်း လုပ်ထားတယ်။ အဲဒီနောက် ဘာဖြစ်တယ်ဆိုတာ ကလေးတို့သိသလား။—

အစ္စရေးလူတွေက ဂျေရိခိုမြို့ရိုးရဲ့ အပြင်ဘက်ကို ရောက်လာကြတယ်။ မြို့ကို တစ်ရက် တစ်ကြိမ် ခြောက်ရက်တိတိ အသံမပေးဘဲ လှည့်ပတ်ချီတက်ကြတယ်။ ခုနစ်ရက်မြောက်နေ့မှာတော့ မြို့ကို ခုနစ်ကြိမ်ပတ်ပြီး ကျယ်တဲ့အသံနဲ့ ကြွေးကြော်ကြတယ်။ ပြတင်းပေါက်မှာ ကြိုးနီချထားတဲ့ နေရာကလွဲလို့ မြို့ရိုးတစ်ခုလုံး ပြိုကျသွားတယ်။ ရာခပ်နဲ့သူ့မိသားစု လွတ်မြောက်သွားတယ်။—ယောရှု ၂:၁-၂၄။ ၆:၁-၅၊ ၁၄၊ ၁၅၊ ၂၀-၂၅။

ရာခပ် လုပ်ဆောင်ခဲ့တဲ့အရာကနေ တို့တွေ ဘာသင်ယူနိုင်သလဲ။— မိမိလူမျိုးကို ကာကွယ်ပေးဖို့ ဘုရားသခင် လုပ်ဆောင်ခဲ့တဲ့ အမှုတွေနဲ့ပတ်သက်တဲ့ သတင်းတွေကို ရာခပ် နားထောင်ရုံသာမကဘဲ အခွင့်အရေးရတာနဲ့ ဘုရားသခင့်လူမျိုးကို ကူညီပေးခဲ့တယ်။ ဟုတ်တယ်၊ ရာခပ်က ယေဟောဝါရဲ့လူမျိုးနဲ့အတူ ကိုယ်တော့်ကို ဝတ်ပြုကိုးကွယ်ဖို့ ရွေးချယ်ခဲ့တယ်။ ကလေးတို့ကော အဲဒီလိုလုပ်ကြမလား။— အဲဒီလိုလုပ်ပါစေလို့ တို့တွေ ဆုတောင်းပေးပါတယ်။