ဘုရင်ဒါဝိဒ်နှင့် တေးဂီတ

ကျမ်းစာခေတ်မှ တေးဂီတအကြောင်းစဉ်းစားလိုက်သည်နှင့် ဦးစွာ စိတ်ထဲပေါ်လာသူမှာ ဒါဝိဒ်ဖြစ်သည်။ သူသည် လွန်ခဲ့သော နှစ်ပေါင်း ၃,၀၀၀ ခန့်တွင် အသက်ရှင်ခဲ့သော အထင်ကရ ပုဂ္ဂိုလ်တစ်ဦးဖြစ်သည်။ လူငယ်သိုးကျောင်းသားဘ၀မှ ဘုရင်နှင့် ကောင်းစွာစီစဉ်ဖွဲ့စည်းနိုင်သူတစ်ဦး ဖြစ်ချိန်အထိ ဒါဝိဒ်၏ လုပ်ဆောင်ချက်များကို ကျမ်းစာတွင် မှတ်တမ်းတင်ထားသည်၊ ယင်းတို့မှတစ်ဆင့် ထိုခေတ်၏တေးဂီတအကြောင်းကို ကျွန်ုပ်တို့ များစွာ သိရှိရသည်။

ကျွန်ုပ်တို့သည် ကျမ်းစာခေတ်မှ တေးဂီတအကြောင်းကို ဒါဝိဒ်မှတစ်ဆင့် များစွာ သိရှိနိုင်သည်။ ဥပမာ၊ မည်သည့်တူရိယာအမျိုးအစားများနှင့် သီချင်းအမျိုးအစားများကို တီးမှုတ်သီဆိုခဲ့ကြသနည်း။ တေးဂီတသည် ဒါဝိဒ်၏ဘ၀နှင့် အစ္စရေးလူတို့တွင် အဘယ်အခန်းကဏ္ဍ၌ ပါဝင်ခဲ့သနည်း။

ရှေးခေတ်အစ္စရေးလူမျိုးတွင် တေးဂီတ၏အခန်းကဏ္ဍ

တေးစာသားများကို ဆိုညည်းလိုက်သောအခါ ယင်းတို့၏သံစဉ်ကိုပါ မှတ်မိတတ်ကြသည်။ ကျမ်းစာတွင် တေးစာသားများစွာ ပါဝင်သော်လည်း ယင်းတို့၏သံစဉ်များကိုမူ မည်သူမျှ မသိကြတော့ချေ။ သို့တိုင် ထိုတေးသံများသည် သာယာငြိမ့်ညောင်းရုံသာမက အဆင့်လည်းမြင့်ရပေမည်။ ကဗျာဆန်သော ဆာလံကျမ်း၏ မြင့်မြတ်မှုကြောင့် ယင်း၏တေးသံများလည်း ထပ်တူ သာယာနာပျော်ဖွယ်ဖြစ်မည်ဟု ကောက်ချက်ချနိုင်သည်။

တူရိယာများနှင့်ပတ်သက်၍မူ ကျမ်းစာတွင် အနည်းငယ်သာ ဖော်ပြထားသည်။ ( “ကျမ်းစာခေတ်မှ တူရိယာများ” လေးထောင့်ကွက်ကို ကြည့်ပါ။) မည်သည့်စောင်းအမျိုးအစားကို ဒါဝိဒ်အသုံးပြုခဲ့ကြောင်းပင် အတိအကျ မသိရချေ။ သို့သော် အစ္စရေးလူတို့သည် ရှားပါးသောအဖိုးတန်သစ်များဖြင့် ပြုလုပ်ထားသည့် စောင်းများကဲ့သို့သော တူရိယာအတော်များများကို တီထွင်ခဲ့သည်မှာ မှတ်သားဖွယ်ဖြစ်သည်။—၂ ရာဇဝင်ချုပ် ၉:၁၁; အာမုတ် ၆:၅။

သို့တိုင် သေချာသည့်အရာတစ်ခုရှိသည်။ ယင်းမှာ တေးဂီတသည် ဟေဗြဲလူတို့၏အသက်တာတွင်၊ အထူးသဖြင့် ဘုရားသခင်ကို ဝတ်ပြုကိုးကွယ်ရာတွင် အရေးပါသောအခန်းကဏ္ဍ၌ ပါဝင်ခဲ့သည်ဟူသောအချက်ဖြစ်၏။ နန်းတက်ပွဲများ၊ ဘာသာရေးအခမ်းအနားများ၊ စစ်ပွဲများတွင် တေးသီချင်းများ သီဆိုတီးမှုတ်ကြ သည်။ တေးဂီတကြောင့် ဘုရင့်နန်းတော်သည် နှစ်သက်ကြည်နူးဖွယ်ကောင်းသောနေရာ ဖြစ်ခဲ့သည်၊ မင်္ဂလာပွဲများနှင့် မိသားစု စုဆုံချိန်များ သက်ဝင်လှုပ်ရှားခဲ့သည်၊ စပျစ်သီးနှင့်ကောက်ပဲသီးနှံများ ဆွတ်ခူးရိတ်သိမ်းသော ပွဲချိန်များတွင် ပျော်ရွှင်မြူးထူးခဲ့ရသည်။ ဝမ်းနည်းဖွယ်မှာ တေးဂီတကို အကျင့်ပျက်သော နေရာများနှင့်လည်း ဆက်စပ်ဖော်ပြထားခြင်းဖြစ်သည်။ ထို့ပြင် လူတစ်ဦးသေဆုံးသွားသောအခါ တေးဂီတသည် ကြေကွဲနေသော ကျန်ရစ်သူများကို စိတ်သက်သာရာ ရစေခဲ့သည်။

အစ္စရေးပြည်တွင် တေးဂီတသည် အခြားကဏ္ဍများတွင်လည်း ပါဝင်ပတ်သက်သည်။ တေးဂီတသည် စိတ်အားတက်လာစေသည့်အတွက် ပရောဖက်များကို ဘုရားသခင်ထံမှ လမ်းညွှန်ချက်များရယူရန် အသင့်ဖြစ်စေသည်။ စောင်းတီးသံကြားသည်နှင့်တစ်ပြိုင်နက် ဧလိရှဲသည် ယေဟောဝါဘုရားသခင်ထံမှ လမ်းညွှန်ချက် ရရှိခဲ့သည်။ (၄ ဓမ္မရာဇဝင် ၃:၁၅) ထို့ပြင် အထူးအချိန်အခါများကို ကြေညာရာတွင်လည်း တေးဂီတကို အသုံးပြုသည်။ လဆန်းနေ့များနှင့် ပွဲခံချိန်များ ဆိုက်ရောက်ကြောင်း ကြေညာရန် ငွေခရာနှစ်လုံးကို မှုတ်ကြသည်။ ယုဘိလနေ့တွင်မှုတ်သော တံပိုးသံသည် အစေခံကျွန်များ လွတ်မြောက်မည်ဖြစ်ကြောင်း၊ ဆုံးရှုံးခဲ့သောမြေယာများနှင့် နေအိမ်များကို ပိုင်ရှင်များ ပြန်လည်ရရှိမည်ဖြစ်ကြောင်း ကြေညာခြင်းဖြစ်သည်။ ကျွန်ဘ၀မှလွတ်မြောက်မည် သို့မဟုတ် ပိုင်ဆိုင်ရာများ ပြန်လည်ရရှိမည်ဟု ကြေညာသည့်တေးသံများ ကြားရသောအခါ ဆင်းရဲသားများ မည်မျှပျော်ရွှင်လိုက်မည်ဖြစ်ခြင်း။—ဝတ်ပြုရာ ၂၅:၉; တောလည်ရာ ၁၀:၁၀။

အစ္စရေးအချို့သည် အလွန်ကျွမ်းကျင်သော ဂီတပညာရှင်များ သို့မဟုတ် တေးဆိုသူများ ဖြစ်မည်မှာ သေချာသည်။ အာရှုရိဘုရင်သနာခရိပ်သည် အမျိုးသားများနှင့်အမျိုးသမီးများ ပါဝင်သော ဂီတပညာရှင်အဖွဲ့တစ်ဖွဲ့ကို ဆက်သရန် ဘုရင်ဟေဇကိအား တောင်းဆိုခဲ့သည်ဟု ဖောင်းကြွရုပ်လုံးတစ်ခုတွင် ဖော်ပြထားသည်။ ထိုသူတို့သည် ပထမတန်းစား ဖျော်ဖြေရေးအနုပညာရှင်များ ဖြစ်ဖွယ်ရှိသည်။ သို့တိုင် ကျွမ်းကျင်သောထိုဂီတပညာရှင်များအနက် အထင်ပေါ်ဆုံးမှာ ဒါဝိဒ်ဖြစ်သည်။

ကျွမ်းကျင်ပြောင်မြောက်သော ဂီတပညာရှင်

ဒါဝိဒ်သည် တေးဂီတနှင့်ကဗျာစပ်ဆိုခြင်း နှစ်မျိုးစလုံးတွင် ကျွမ်းကျင်ပြောင်မြောက်သူဖြစ်သည်။ ဆာလံသီချင်းထက်ဝက်ကျော်ကို သူ ရေးစပ်သီကုံးခဲ့သည်ဟု ယူဆရသည်။ သူသည် ငယ်ရွယ်စဉ်က သိုးကျောင်းသားတစ်ဦးဖြစ်ရာ ဘက်သလီဟင်မြို့၏ သဘာ၀ရှုခင်းများက သူ၏အာရုံခံစားမှုနှင့် စိတ်ကူးဉာဏ်တို့ကို ပို၍အားသန်စေခဲ့သည်။ စမ်းချောင်းလေးများ တသွင်သွင်စီးဆင်းနေသံများ၊ မိမိခေါ်သံကို တုံ့ပြန်လိုက်သော သိုးကလေးများ၏ အော်သံများကို ကြားရခြင်းသည် အလွန်နှစ်သက်ဖွယ်ဖြစ်ကြောင်း သူသိခဲ့ပေမည်။ ဝန်းကျင်ရှိ သာယာနာပျော်ဖွယ် ထို “ဂီတသံ” များကြောင့် အာရုံဝင်စားလာကာ စောင်းကိုကောက်ကိုင်လိုက်ပြီး ဘုရားသခင်ကို သူ ချီးမွမ်းသီချင်းဆိုလေတော့သည်။ သူစပ်ဆိုခဲ့သော ဆာလံသီချင်း ၂၃ ကို နားဆင်ရခြင်းသည် မည်မျှနှစ်သက်ကြည်နူးဖွယ် ကောင်းလိုက်မည်နည်း။

ဒါဝိဒ်သည် ငယ်ရွယ်စဉ်ကတည်းက ကျွမ်းကျင်ပိုင်နိုင်စွာ စောင်းတီးတတ်သောကြောင့် ဘုရင်ရှောလုအပါးတွင် ဖျော်ဖြေပေးရန်ပင် ရွေးချယ်ခံခဲ့ရသည်။ ဒါဝိဒ်သည် ဘုရင်ရှောလု စိတ်မငြိမ်မသက်ဖြစ်နေချိန်တွင် ရှေ့တော်သို့ ဝင်ရောက်ပြီး စောင်းတီးပေးရ၏။ သာယာငြိမ့်ညောင်းသော သူ၏စောင်းတီးသံက ဘုရင်၏စိတ်နှလုံးကို ငြိမ်သက်အေးချမ်းသွားစေသည်။ ရှောလုကို နှောင့်ယှက်နေသော ဆိုးညစ်သည့်အတွေးများနှင့် စိတ်မငြိမ်မသက်ဖြစ်မှုတို့ ပြယ်ပျောက်သွားလေ၏။—၁ ဓမ္မရာဇဝင် ၁၆:၁၆။

 ဒါဝိဒ်အလွန်နှစ်သက်ခဲ့သော၊ သူ့ကို ပျော်ရွှင်မှုပေးခဲ့သော တေးဂီတသည် တစ်ခါတစ်ရံ ပြဿနာများ ပေါ်ပေါက်စေသည်။ တစ်နေ့တွင် ဖိလိတ္တိလူတို့ကို ဒါဝိဒ်နှင့် ဘုရင်ရှောလုတို့ စစ်နိုင်လျက် ပြန်လာချိန်တွင် ရွှင်လန်းဖွယ် အောင်ပွဲခံသီချင်းဆိုသံကို ဘုရင်ကြားလိုက်ရသည်။ အမျိုးသမီးများက “ရှောလုအထောင်ထောင်၊ ဒါဝိဒ်အသောင်းသောင်း သတ်လေစွတကား” ဟုသီချင်းဆိုနေကြသည်။ ယင်းကို ရှောလုကြားသော် အလွန်အမျက်ထွက်ကာ မနာလိုစိတ်ဝင်လာပြီး “ထိုနေ့မှစ၍ ဒါဝိဒ်ကို အစဉ်ချောင်းမြောင်းလျက်နေ၏။”—၁ ဓမ္မရာဇဝင် ၁၈:၇-၉။

တေးဂီတကြောင့် လှုံ့ဆော်ခံရ

ဘုရားသခင့်စွမ်းအားတော် လှုံ့ဆော်မှုဖြင့် ဒါဝိဒ်ရေးဖွဲ့ခဲ့သော သီချင်းများသည် နည်းအမျိုးမျိုးတွင် ပြောင်မြောက်လှသည်။ သူ့သီချင်းများတွင် လေးလေးနက်နက် စဉ်းစားဆင်ခြင်စေသော သီချင်းများနှင့် ကျေးလက်သဘာ၀နှင့်ဆိုင်သော သီချင်းများဟူ၍ နှစ်မျိုးပါဝင်သည်။ ယင်းတို့တွင် ချီးမွမ်းစကားများမှသည် သမိုင်းကို ဇာတ်ကြောင်းပြန်ခြင်းအထိ၊ စပျစ်သီးဆွတ်ခူးချိန်၏ ရွှင်လန်းမှုမှသည် နန်းတော်ဖွင့်ပွဲ၏ ခမ်းနားမှုအထိ၊ အောက်မေ့သတိရခြင်းများမှသည် မျှော်လင့်ချက်များအထိ၊ တောင်းဆိုချက်များမှသည် အသနားခံချက်များအထိ အမျိုးမျိုးပါဝင်သည်။ (ဆာလံကျမ်း အခန်းကြီး ၃၂၊ ၂၃၊ ၁၄၅၊ ၈၊ ၃၀၊ ၃၈၊ ၇၂၊ ၅၁၊ ၈၆ နှင့်၎င်းတို့၏ ထိပ်စီးခေါင်းစဉ်များကို ကြည့်ပါ။) ရှောလုနှင့်သူ၏သား ယောနသန်သေဆုံးချိန်တွင် ဒါဝိဒ်သည် ငိုချင်းတစ်ပုဒ် စပ်ဆိုခဲ့သည်။ ယင်းကို “လေးသီချင်း” ဟုခေါ်ပြီး “အို [အစ္စရေး] ဂုဏ်အသရေ၊ သင်၏မြင့်သောအရပ်တို့၌ သင်သည် အသေခံလေပြီ” ဟူ၍အစပြုထားကာ သံစဉ်မှာ ဝမ်းနည်းပူဆွေးဖွယ်ဖြစ်သည်။ ဒါဝိဒ်သည် စိတ်ခံစားမှု အမျိုးမျိုးကို စကားလုံးများဖြင့်ရော၊ စောင်းသံဖြင့်ပါ မည်သို့ဖော်ကျူးရမည်ကို ကောင်းစွာသိရှိသူဖြစ်သည်။—၂ ဓမ္မရာဇဝင် ၁:၁၇-၁၉။

ဒါဝိဒ်သည် ဖျတ်လတ်တက်ကြွသော သူ့ပင်ကိုစရိုက်နှင့်အညီ အလွန်စည်းဝါးကျသော ရွှင်မြူးဖွယ် တေးဂီတကို နှစ်သက်သည်။ ဇိအုန်တောင်သို့ ပဋိညာဉ်သေတ္တာတော်ကို သယ်ဆောင်လာစဉ် သူသည် အစွမ်းကုန်အားထုတ်၍ ကခုန်လျက် လိုက်ပါလာခဲ့သည်။ ထိုတေးသီချင်းသံသည် အလွန်နိုးကြားတက်ကြွစေသော သီချင်းသံဖြစ်မည်ဟု ကျမ်းစာမှတ်တမ်းက ဖော်ပြသည်။ ထိုမြင်ကွင်းကို သင် မြင်ယောင်ကြည့်ပါ။ ဇနီးဖြစ်သူ မိခါလက သူ့ကို အပြစ်တင် သည်။ သို့သော် ယင်းကို ဒါဝိဒ် အလေးမထားခဲ့ချေ။ ယေဟောဝါဘုရားသခင်ကို သူ ချစ်မြတ်နိုးသည်၊ ထိုတေးဂီတသံကြောင့် သူ ရွှင်လန်းပြီး ဘုရားသခင့်ရှေ့တော်တွင် ကခုန်ခဲ့ခြင်းဖြစ်သည်။—၂ ဓမ္မရာဇဝင် ၆:၁၄၊ ၁၆၊ ၂၁။

ထိုမျှမကသေးပါ၊ ဒါဝိဒ်သည် တူရိယာပစ္စည်းသစ်များ တီထွင်ဖန်တီးရာတွင်လည်း အထူးထင်ရှားခဲ့သူဖြစ်သည်။ (၂ ရာဇဝင်ချုပ် ၇:၆) ဒါဝိဒ်သည် တူရိယာများ တီထွင်ဖန်တီးသူ၊ ကဗျာရေးဖွဲ့သူ၊ တေးရေးသူနှင့် ဖျော်ဖြေသူဖြစ်ရာ အနုပညာ အထုံပါရမီရှိသူတစ်ဦးဖြစ်နိုင်သည်။ သို့သော် ထိုထက်ပို၍ကြီးကျယ်သောအရာများကိုပင် သူလုပ်ဆောင်ခဲ့သေးသည်။

ဝတ်ပြုရာအိမ်တော်တွင် သီဆိုခြင်းနှင့် တီးမှုတ်ခြင်း

ဒါဝိဒ်ထားရစ်ခဲ့သောအမွေအနှစ်တစ်ခုမှာ ယေဟောဝါဘုရားသခင်၏အိမ်တော်တွင် သီချင်းများကို သီဆိုတီးမှုတ်ရန် စီစဉ်ဖွဲ့စည်းခဲ့ခြင်းဖြစ်သည်။ တေးဆိုသူများနှင့် ဂီတပညာရှင်ပေါင်း ၄,၀၀၀ ကိုဦးဆောင်ရန် အာသပ်၊ ဟေမန်နှင့် ယေဒုသုန် (ဧသန်ဟူ၍လည်းခေါ်) တို့ကို ခန့်အပ်ခဲ့သည်။ ထို့နောက် ကျန်အုပ်စုဝင်များကို လေ့ကျင့်ပေးရန်နှင့် ကြီးကြပ်ကွပ်ကဲရန် ကျွမ်းကျင်သော ဂီတပညာရှင် ၂၈၈ ဦးကိုလည်း သူတို့နှင့်အတူ ပူးပေါင်းလုပ်ဆောင်စေခဲ့သည်။ တေးဆိုသူနှင့် ဂီတပညာရှင် ၄,၀၀၀ သည် တစ်နှစ်လျှင် သုံးကြိမ်ကျင်းပသော ပွဲတော်ချိန်များတွင် ဝတ်ပြုရာအိမ်တော်၌ အားလုံးရောက်ရှိနေရသည်။ ထိုသူတို့၏သံပြိုင်သီဆိုသံသည် မည်မျှကြီးကျယ်ခမ်းနားလိုက်မည်ဖြစ်ကြောင်း မှန်းဆကြည့်ပါ။—၁ ရာဇဝင်ချုပ် ၂၃:၅; ၂၅:၁၊ ၆၊ ၇။

ဝတ်ပြုရာအိမ်တော်တွင် အမျိုးသားများသာ သီဆိုရသည်။ ‘သီချင်းဆိုသောသူတို့သည် တညီတညွတ်တည်း’ ဖြစ်၏ဟု ၂ ရာဇဝင်ချုပ် ၅:၁၃ တွင် ဖော်ပြထားသောကြောင့် သူတို့ သံပြိုင်သီဆိုကြမည်ဟု နားလည်နိုင်သည်။ ထိုသီချင်းများသည် ဆာလံ ၃ နှင့် ဒါဝိဒ်၏အခြားဆာလံသီချင်းများကဲ့သို့သော သီချင်းများဖြစ်နိုင်သည်၊ တစ်ခါတစ်ရံ ယင်းတို့တွင် ဆာလံ ၄၂:၅၊ ၁၁ နှင့် ၄၃:၅ ကဲ့သို့သော ထပ်ကျော့ပိုဒ်များလည်း ပါဝင်သည်။ ထို့ပြင် သံပြိုင်သီဆိုသောအဖွဲ့ နှင့်/သို့မဟုတ် တစ်ကိုယ်တော်သီဆိုသူများ အလှည့်ကျ အပြန်အလှန်သီဆိုရသော သီချင်းများသည် အလွန်နှစ်သက်ဖွယ်ကောင်းလှသည်။ ဆာလံ ၂၄ ၏သီဆိုဟန်သည် ထိုသို့ပင်ဖြစ်ပြီး ပဋိညာဉ်သေတ္တာကို ဇိအုန်တောင်သို့ ဒါဝိဒ်သယ်ဆောင်လာစဉ် ယင်းကိုသီဆိုရန် ရေးစပ်ထားခြင်းဖြစ်မည်မှာ သေချာသည်။—၂ ဓမ္မရာဇဝင် ၆:၁၁-၁၇။

သို့သော် ဝတ်ပြုရာအိမ်တော်တွင် အမှုထမ်းသူများသာ သီချင်းဆိုရမည်ဟူ၍ မကန့်သတ်ထားပါ။ ဂျေရုဆလင်မြို့တွင် နှစ်စဉ်ကျင်းပသော ပွဲတော်များသို့ တက်ရောက်သူများလည်း သီဆိုကြသည်။ သူတို့သည် ဆာလံ ၁၂၀ မှ ၁၃၄ ကိုသီဆိုကြဖွယ်ရှိသည်။ ဥပမာ၊ ဒါဝိဒ်သည် ထိုအခါသမယများတွင် အစ္စရေးလူတို့ တွေ့ကြုံခံစားရသော ညီရင်းအစ်ကိုစိတ်ဓာတ်ကို ဆာလံ ၁၃၃ တွင် ဂုဏ်တင်ချီးမွမ်းထားသည်။ “ညီအစ်ကိုတို့သည် သဘောတူ လျက် ပေါင်းဖော်ကြသည့်အရာမှာ အလွန်ကောင်းပေ၏။ အလွန်တင့်တယ်လျောက်ပတ်ပေ၏” ဟူသောစကားများဖြင့် သူ နိဒါန်းပျိုးထားသည်။ ထိုသီချင်းနှင့်အတူ ယင်း၏တေးသံကို ကြားယောင်ကြည့်လိုက်ပါဦး။

ယေဟောဝါဘုရားသခင်အား ဝတ်ပြုကိုးကွယ်ခြင်းနှင့် တေးဂီတ

ကျမ်းစာ၏ဆယ်ပုံတစ်ပုံသည် တေးသီချင်းများဖြစ်ပြီး ဘုရားသခင်ကို လူသားအားလုံး ချီးမွမ်းကြရန် ဆာလံကျမ်းတွင် အားပေးထားသည်။ (ဆာလံ ၁၅၀) တေးဂီတသည် ဘ၀၏စိုးရိမ်ပူပန်မှုများကို မေ့ပျောက်စေနိုင်စွမ်းရှိပြီး တေးသီဆိုခြင်းက စိတ်ဒဏ်ရာများကို သက်သာစေနိုင်သည်။ သို့သော် ပျော်ရွှင်နေသူများလည်း ဆာလံသီချင်းများကို သီဆိုသင့်ကြောင်း ကျမ်းစာတွင် အကြံပြုထားသည်။—ယာကုပ် ၅:၁၃။

သီချင်းဆိုခြင်းသည် ဘုရားသခင်အပေါ် မိမိ၏ယုံကြည်ခြင်းနှင့်မေတ္တာကို ဖော်ပြသော လုပ်ရပ်တစ်ခုဖြစ်သည်။ ယေရှုအသတ်မခံရမီ ညတွင် ကိုယ်တော်နှင့် တမန်တော်များသည် ညစာစားပွဲကို သီချင်းဆိုပြီး နိဂုံးချုပ်ခဲ့ကြသည်။ (မဿဲ ၂၆:၃၀) ဒါဝိဒ်မှဆင်းသက်လာသူ၊ ဘုရားသခင်စံမြန်းရာ ကောင်းကင်ညီလာခံရှိ ဘုန်းကျက်သရေရှိသော သီချင်းဆိုသံကို ကောင်းစွာသိရှိသူ သခင်ယေရှု၏အသံသည် အလွန်ကောင်းမည်မှာ သေချာ၏။ ထိုညတွင် သူတို့သည် ဆာလံ ၁၁၃ မှ ၁၁၈ ပါ ဟာလဲလ်သီချင်းကို သီဆိုခဲ့ဟန်တူသည်။ ထိုသို့ဆိုလျှင် ယေရှုသည် ရှေ့တွင်ဖြစ်ပျက်တော့မည့်အရာအားလုံးကို သတိမမူမိသော တမန်တော်များနှင့်အတူ အားပါးတရ ဤသို့သီဆိုခဲ့ပေမည်– ‘ယေဟောဝါဘုရားသခင်သည် ငါတောင်းပန်ခြင်းအသံကို ကြားတော်မူသောကြောင့် ငါနှစ်သက်၏။ သေခြင်းကြိုးတို့သည် ငါ့ကိုဝိုင်း၍ မရဏာနိုင်ငံဘေးတို့သည် ငါ့ကိုဖမ်းမိသဖြင့် ဆင်းရဲဝေဒနာနှင့်ငါတွေ့ကြုံရ၏။ “အို ယေဟောဝါဘုရားသခင်၊ အကျွန်ုပ်အသက်ကို ကယ်နုတ်တော်မူပါ။”’—ဆာလံ ၁၁၆:၁-၄။

တေးဂီတကို တီထွင်ဖန်တီးသူမှာ လူသားမဟုတ်ပါ။ ကောင်းကင်တွင် တေးသီချင်းများကို သီဆိုတီးမှုတ်နေကြောင်း ကျမ်းစာတွင် ဖော်ပြထားသည်။ ထိုတွင် ကောင်းကင်တမန်များသည် ပုံဆောင်သဘောအရ စောင်းများကို တီးခတ်ကာ ယေဟောဝါဘုရားသခင် စံမြန်းရာနေရာပတ်လည်တွင် ချီးမွမ်းသီချင်း ဆိုနေကြသည်။ (ဗျာ. ၅:၉; ၁၄:၃; ၁၅:၂၊ ၃) ယေဟောဝါဘုရားသခင်သည် လူသားတို့၏စိတ်နှလုံးထဲတွင် တေးဂီတကို နှစ်သက်မြတ်နိုးစိတ်၊ စိတ်ကူးများနှင့်ခံစားချက်များကို တူရိယာတီးခတ်ခြင်း သို့မဟုတ် တေးသီဆိုခြင်းဖြင့် ဖော်ကျူးလိုစိတ်များ ထည့်သွင်းပေးထားသည်။ ထို့ထက်ကား ယုံကြည်ခြင်းရှိသူတစ်ဦးအဖို့ တေးဂီတသည် ဘုရားသခင်ထံမှ ဆုလက်ဆောင်တစ်ခုပင်ဖြစ်သည်။—ယာကုပ် ၁:၁၇။

[စာမျက်နှာ ၂၇ ပါ အကျဉ်းဖော်ပြချက်]

“သင်တို့သည် ရွှင်လန်းခြင်းကိုပြုသောနေ့၊ ပွဲသဘင်နေ့ . . . တို့၌

. . . တံပိုးမှုတ်ရကြမည်။” —တောလည်ရာ ၁၀:၁၀

[စာမျက်နှာ ၂၈ ပါ အကျဉ်းဖော်ပြချက်]

‘ယေဟောဝါဘုရားသခင်သည် ငါ၏သိုးထိန်းဖြစ်တော်မူ၏။ ငါသည် ဆင်းရဲမခံရ။ စိမ်းလန်းသောကျက်စားရာအရပ်၌ ငါ့ကိုအိပ်စေတော်မူ၏။ သာယာသောမြစ်နားသို့ လမ်းပြတော်မူ၏။’ —ဆာလံ ၂၃:၁၊ ၂

[စာမျက်နှာ ၂၉ ပါ အကျဉ်းဖော်ပြချက်]

‘ထိုသူတို့တွင် . . . လေးထောင်တို့သည် “ချီးမွမ်းစရာဖို့ ငါလုပ်ခဲ့သည်” ဟူ၍ ဒါဝိဒ်ဆိုသော တူရိယာများနှင့် ထာဝရဘုရားသခင်၏ဂုဏ်တော်ကို ချီးမွမ်းရကြ၏။’ —၁ ရာဇဝင်ချုပ် ၂၃:၄၊ ၅၊ သမ္မာ

[စာမျက်နှာ ၂၉ ပါ အကျဉ်းဖော်ပြချက်]

ဒါဝိဒ်သည် စိတ်ခံစားမှုအမျိုးမျိုးကို စကားလုံးများဖြင့်ရော၊ တေးဂီတသံဖြင့်ပါ ဖော်ကျူးခဲ့

[စာမျက်နှာ ၃၀ ပါ အကျဉ်းဖော်ပြချက်]

‘ဘုရားသခင်ကို ချီးမွမ်းကြလော့။ . . . ပတ်သာတီးလျက်၊ ကခုန်လျက်နှင့် ချီးမွမ်းကြလော့။ . . . အသက်ရှိသောသူအပေါင်း တို့သည် ထာဝရဘုရားသခင်ကို ချီးမွမ်းကြစေ။’ —ဆာလံ ၁၅၀:၁၊ ၄၊ ၆

 [စာမျက်နှာ ၂၈ ပါ လေးထောင့်ကွက်နှင့်ရုပ်ပုံ]

ကျမ်းစာခေတ်မှ တူရိယာများ

ကြိုးတပ်တူရိယာများတွင်  ဗျပ်စောင်း၊  စောင်းနှင့် ကြိုးဆယ်ပင်ရှိသောတူရိယာများ ပါဝင်သည်။ (ဆာလံ ၉၂:၃) ယင်းတို့ကို အာလမုတ်သံနှင့် ရှေမိနိတ်သံဟူ၍ အသံညှိထားသည်။ ထိုအသုံးအနှုန်းများသည် အနိမ့်သံနှင့် အမြင့်သံကို ရည်ညွှန်းခြင်းဖြစ်နိုင်သည်။ (၁ ရာဇဝင်ချုပ် ၁၅:၂၀၊ ၂၁၊ သမ္မာ) လေမှုတ်ကြေးတူရိယာများတွင် ပလွေ၊ တံပိုး၊ ကျယ်လောင်သောအသံကိုပေးတတ်သော ခရာတို့ပါဝင်သည်။ (၂ ရာဇဝင်ချုပ် ၇:၆; ၁ ဓမ္မရာဇဝင် ၁၀:၅; ဆာလံ ၁၅၀:၃၊ ၄) ဝတ်ပြုရာအိမ်တော်အပ်နှံပွဲတွင် ခရာသံနှင့် သီချင်းသည်တို့၏အသံသည် “တညီတညွတ်တည်း” ဖြစ်ခဲ့သည်။ (၂ ရာဇဝင်ချုပ် ၅:၁၂၊ ၁၃) ယင်းသည် အသံတညီတည်းဖြစ်အောင် ညှိယူထားခြင်းကို ဆိုလိုဟန်တူသည်။ စည်းချက်တီးတူရိယာများတွင် ပတ်သာ (ချူတပ်ဗုံ) များနှင့် လှုပ်ချူများအပြင် ထင်းရှူးသားဖြင့်လုပ်သော တူရိယာမျိုးစုံပါဝင်သည်။ သာယာနာပျော်ဖွယ်တေးသံကို ပေးတတ်သော လင်းကွင်းငယ်များနှင့် “အသံကျယ်သောလင်းကွင်း” ဟူ၍ ခေါ်ဆိုသည့် လင်းကွင်းကြီးများလည်းပါဝင်သည်။— ၂ ဓမ္မရာဇဝင် ၆:၅; ဆာလံ ၁၅၀:၅၊ သမ္မာ။

[ရုပ်ပုံများ]

အထက်– အီတလီနိုင်ငံ၊ ရောမမြို့ရှိ တိုက်တပ်စ်မုခ်ခုံးပေါ်တွင် အေဒီ ၇၀ ၌ ဂျေရုဆလင်မြို့ရှိ ဝတ်ပြုရာအိမ်တော်မှ ယူဆောင်လာသည့် ခရာများကို ပုံဖော်ထား။ ဂျူးတို့၏တူရိယာပစ္စည်းများကို ပုံဖော်ထားသည့် အေဒီ ၁၃၀ ခန့် ရက်စွဲပါ ဒင်္ဂါးများ

[Credit Line]

Coins: © 2007 by David Hendin. All rights reserved.