သေလွန်သူများသည် အသက်ရှင်သူများကို ကူညီပေးနိုင်သလော

အနောက်အာဖရိကမှ တမ်ဘာဆိုသူ လူငယ်တစ်ဦးသည် မကြာမီ စာမေးပွဲဖြေရတော့မည်။ * စာမေးပွဲအောင်ဖို့ ကွယ်လွန်သူဆွေမျိုးများထံ အကူအညီတောင်းရန်လိုကြောင်း သူ့မိခင်က တိုက်တွန်းသည်။ ပလဲရ်မာမြို့၊ စစ္စလီကျွန်းတွင် ကမ္ဘာလှည့်ခရီးသည်များသည် ရာနှင့်ချီရှိသော ဆေးစိမ်ရုပ်အလောင်းများကို ပြသထားသည့် မြေအောက်သင်္ချိုင်းသို့ သွားရောက်ကြည့်ရှုကြသည်။ အဆိုပါမမ်မီရုပ်အလောင်းများက အသက်ရှင်သူများကို ကာကွယ်ပေးသည်ဟု အချို့က ယုံကြည်ကြ၏။ လူတို့သည် အမေရိကန်နိုင်ငံ၊ နယူးယောက်အနောက်ပိုင်းရှိ လီလီဒေလ်မြို့သို့ နှစ်စဉ် သွားလည်ပတ်ကြသည်။ ထိုမြို့တွင် နတ်ဝင်သည် အမြောက်အမြားရှိသည်ဟု လူသိများကြသည်။ ခရီးသည်များသည် သေလွန်သူ ဆွေမျိုးများ သို့မဟုတ် မိတ်ဆွေများနှင့် ဆက်သွယ်ပြီး အကူအညီရယူနိုင်မည်ဟူသော မျှော်လင့်ချက်ဖြင့် ထိုနေရာသို့ သွားကြခြင်းဖြစ်သည်။

သေလွန်သူများသည် အသက်ရှင်သူများကို အကူအညီပေးနိုင်သည်ဟု ကမ္ဘာတစ်ဝန်းတွင် လူတို့ ယုံကြည်နေဆဲဖြစ်၏။ သင်မည်သို့ထင်သနည်း။ သင်သည် ထိုသို့သောယုံကြည်ချက်ကို သွန်သင်ခံရပေမည် သို့မဟုတ် ထိုယုံကြည်ချက်ကို လက်ခံထားသူများနှင့် အတူနေထိုင်ရပေမည်။ ကွယ်လွန်သွားသော ချစ်မြတ်နိုးရသူများကို ကျွန်ုပ်တို့ လွမ်းဆွတ်သတိရကြသည်မှာ သဘာဝပင်။ နတ်ဝင်သည်များက သူတို့နှင့် တွေ့ ခွင့်ပေးမည်ဟု ကတိပြုကြသည်။ ဝိညာဉ်ဘုံနှင့်ဆက်သွယ်ရန် “အကူအညီတောင်းလျှင် ကူညီပေးဖို့ အမြဲအသင့်ရှိသည်” ဟု နတ်ဝင်သည်တစ်ဦးကဆိုကြောင်း တိုင်းမ်မဂ္ဂဇင်းတွင် ကိုးကားဖော်ပြသည်။ ယင်းသည် မှန်ကန်ပါသလော။ သေလွန်သူများသည် အသက်ရှင်သူများကို အမှန်ပင် ကူညီပေးနိုင်သလော။ သမ္မာကျမ်းစာ၏ ရှင်းလင်းတိကျသော အဖြေကြောင့် သင်အံ့သြသွားပေမည်။

သေလွန်သူများသည် တစ်နေရာရာတွင် အသက်ရှင်နေသလော

သမ္မာကျမ်းစာက သေလွန်သူများ၏ အခြေအနေကို ရိုးရှင်းပြီး နားလည်ရလွယ်သော စကားများဖြင့် ရှင်းပြထားသည်။ “အသက်ရှင်သောသူသည် မိမိသေရမည်ကိုသိ၏။ သေသောသူမူကား အဘယ်အရာကိုမျှမသိ” ဟုကျမ်းစာတွင် ဖော်ပြထားကြောင်း သတိပြုပါ။ (ဒေ. ၉:၅) သေလွန်သူများတွင် စိတ်ခံစားချက်များရှိသည်ဟုဆိုလျှင် ယင်းသည် ဖြစ်နိုင်မည်လော။ “သူ၏ ချစ်ခြင်း၊ မုန်းခြင်း၊ ငြူစူခြင်းလည်း ပျောက်ပျက်၏။ နေအောက်မှာပြုသမျှသောအမှု၌ သူတစ်ပါးနှင့်ရောနှော၍ မဆိုင်ရ” ဟု ကျမ်းစာဆိုသည်။ (ဒေ. ၉:၆) ထို့ပြင် “သင်ယခုသွား၍ ရောက်ရလတ္တံ့သော အရပ်တည်းဟူသော မရဏာနိုင်ငံ၌ လုပ်ဆောင်ခြင်းမရှိ။ ကြံစည်ခြင်းမရှိ။ သိပ္ပံအတတ်မရှိ။ ပညာမရှိပါတကား” ဟုလည်း ဖော်ပြထားသည်။ (ဒေ. ၉:၁၀) ဤတွင်အသုံးပြုထားသော “မရဏာနိုင်ငံ” သည် “သာမန်လူ့သင်္ချိုင်း” ကိုဆိုလို၏။ စိတ်ဝင်စားစရာမှာ ယေရှုခရစ်လည်း သေဆုံးသွားပြီးနောက် “မရဏာနိုင်ငံ” ၌ အချိန်အတန်ကြာ ရှိနေခဲ့သည်ဟု သမ္မာကျမ်းစာက ဖော်ပြသည်။—တမန်တော် ၂:၃၁၊ သမ္မာကျမ်း။

ယေရှုသည် မိမိအသက်ရှင်နေစဉ် လူများစွာကို ကူညီပေးခဲ့ပြီး မိမိသေရမည်ကိုလည်း သိတော်မူသည်။ သေဆုံးပြီးနောက် သင်္ချိုင်းတွင်ရှိနေစဉ် လူတို့ကို ကူညီပေးနိုင်ဦးမည်ဟု ကိုယ်တော် မျှော်လင့်ခဲ့သလော။ မမျှော်လင့်ခဲ့ပါ။ ယေရှုသည် မကြာမီ မိမိသေရတော့မည့်အချိန်ကို လုပ်ငန်းများလုပ်ဆောင်ရန်မဖြစ်နိုင်သည့် ညအချိန်နှင့် နှိုင်းယှဉ်ပြခဲ့၏။ (ယောဟန် ၉:၄) လူတို့သေဆုံးသောအခါ “သင်္ချိုင်းသား” များဖြစ်သွားကြောင်း ယေရှု ကောင်းစွာသိရှိတော်မူသည်။—ဟေရှာယ ၂၆:၁၄။

ယေရှုသည် သေခြင်းနှင့်ပတ်သက်သော အဆိုပါအချက်ကို ပေါ်လွင်စေရန် နှိုင်းယှဉ်ချက်တစ်ခုကိုလည်း အသုံးပြုခဲ့သည်။ မိတ်ဆွေလာဇရု သေဆုံးသောအခါ ယေရှုက သေခြင်းကို အိပ်ပျော်ခြင်းနှင့် နှိုင်းယှဉ်ခဲ့သည်။ (ယောဟန် ၁၁:၁၁-၁၃) အိပ်ပျော်နေသူတစ်ဦးသည် ကျွန်ုပ်တို့ကို ကူညီပေးမည်ဟု မျှော်လင့်နိုင်သလော။ အိပ်ပျော်နေသူတစ်ဦးသည် အဘယ်အရာကိုမျှမသိ၊ အခြားသူများ၏အကျိုးအတွက်လည်း မလုပ်ဆောင်ပေးနိုင်ချေ။

သေဆုံးပြီးနောက် ဝိညာဉ်ဆက်အသက်ရှင်သလော

ဝိညာဉ်ဟူသည် လူတစ်ဦး သေဆုံးပြီးနောက် ဆက်အသက်ရှင်နေသော၊ မမြင်နိုင်သောအရာတစ်ခုဖြစ်သည်ဟု လူအများ သွန်သင်ခံရ၏။ သမ္မာကျမ်းစာ၏သွန်သင်ချက်မှာ ယင်းနှင့်တခြားစီပင်။ “ပြစ်မှားသောဝိညာဉ် [ဟေဗြဲ၊ နီးဖက်ရှ်] သည် အသက်သေရမည်” ဟုကျမ်းစာကဆိုသည်။ (ယေဇကျေလ ၁၈:၄) ပထမလူသားအာဒံကို ဖန်ဆင်းခြင်းနှင့်စပ်လျဉ်း၍လည်း ကျမ်းစာက ဤသို့ဆိုသည်– “ထာဝရအရှင် ဘုရားသခင်သည် မြေမှုန့်ဖြင့် လူကိုဖန်ဆင်း၍ သူ၏နှာခေါင်းထဲသို့ ဇီဝအသက်ကို မှုတ်တော်မူလျှင် လူသည် အသက်ရှင်သောသတ္တဝါ [ဟေဗြဲ၊ နီးဖက်ရှ်] ဖြစ်လေ၏။”—ကမ္ဘာဦး ၂:၇။

 ဝိညာဉ်ဟူ၍ပြန်ဆိုထားသော မူရင်းဟေဗြဲစကားလုံး နီးဖက်ရှ် သည် “အသက်ရှူသောသတ္တဝါ” ဟူသောအဓိပ္ပာယ်ရှိ၏။ ဘုရားသခင်သည် ပထမဆုံးလူသား အာဒံကို ဖန်ဆင်းခဲ့ချိန်တွင် သူ၏ခန္ဓာကိုယ်ထဲသို့ ဝိညာဉ်ကိုမဟုတ်ဘဲ အသက်ရှူခြင်းအားဖြင့် ဆက်ရှင်စေမည့် အသက်စွမ်းအားကို ထည့်သွင်းပေးတော်မူခဲ့သည်။ ထို့ကြောင့် သမ္မာကျမ်းစာတွင် ဖော်ပြထားသော ဝိညာဉ်ဟူသည် အသက်ရှင်နေသောသတ္တဝါကို ဆိုလိုသည်။ ဘုရားသခင်ပေးထားသော အသက်စွမ်းအားမရှိတော့လျှင် ထိုဝိညာဉ် သို့မဟုတ် အသက်ရှင်နေသောသတ္တဝါသည် သေလေ၏။

သို့သော် ‘သေလွန်သူများနှင့်ဆက်သွယ်သူများ၊ သူတို့၏အသံကို ကြားရသူများ၊ သူတို့ကိုပင် မြင်တွေ့ရသူများ၏ ဖြစ်ရပ်များနှင့်ပတ်သက်၍ကော မည်သို့နည်း’ ဟုအချို့က မေးကြပေမည်။ ကမ္ဘာ့ဒေသများစွာတွင် ထိုအဖြစ်အပျက်များက အထူးအဆန်းမဟုတ်ချေ။ ထို့ကြောင့်လည်း လူများစွာသည် ကွယ်လွန်သူ ဆွေမျိုးများ သို့မဟုတ် မိတ်ဆွေများနှင့်ဆက်သွယ်နိုင်ရန် နတ်ဝင်သည်များကို ရှာဖွေကြသည်။

ထိုအဖြစ်အပျက်များသည် မှန်ကန်ပါသလော။ မှန်ကန်သည်ဟုဆိုလျှင် ကျမ်းစာကိုအခြေခံထားသော အထက်ပါဖော်ပြချက်များနှင့် ဆန့်ကျင်နေသည်မဟုတ်လော။ ဘုရားသခင့်စကားတော်သည် အမှန်တရားဖြစ်ပါ၏ဟု ခရစ်တော်ယေရှု မိန့်ဆိုခဲ့သည်။ (ယောဟန် ၁၇:၁၇) အမှန်တရားသည် ရှေ့နောက်ကိုက်ညီမှုရှိ၏။ သေလွန်သူတို့သည် အသက်ရှင်သူတို့အား ကူညီပေးနိုင်သည်ဟူသောအဆိုကို ကျွန်ုပ်တို့ မည်သို့ရှုမြင်သင့်ကြောင်း ရှင်းလင်းတိကျသော လမ်းညွှန်ချက်ကို သမ္မာကျမ်းစာတွင် ဖော်ပြထားသည်။ သေလွန်သူထံမှ အကူအညီရရန် ကြိုးစားခဲ့သူအကြောင်းကို သမ္မာကျမ်းစာတွင် ဖော်ပြထားသည်။ ဤမှတ်တမ်းကို အသေအချာ ဂရုတစိုက် ဖတ်ရှုလေ့လာမည်ဆိုလျှင် အမှန်တရားကို တွေ့ရှိရပါလိမ့်မည်။

သေလွန်သူထံ ရှင်ဘုရင်တစ်ပါး အကူအညီတောင်းဆို

ဤဇာတ်လမ်းသည် မြောက်ပိုင်းအစ္စရေးပြည်ရှိ စစ်မြေပြင်တွင် ဖြစ်ပျက်ခဲ့၏။ ဘုရင်ရှောလုနှင့် သူ၏စစ်တပ်သည် အင်အားကြီးမားသော ဖိလိတ္တိစစ်တပ်နှင့် ထိပ်တိုက်ရင်ဆိုင်ခဲ့ရသည်။ ဖိလိတ္တိတပ်စခန်းကို ရှောလုမြင်သောအခါ “ကြောက်၍ အလွန်တုန်လှုပ်သောစိတ်နှလုံးရှိ၏။” ထိုအချိန်တွင် ရှောလုသည် စစ်မှန်သောဝတ်ပြုရေးကို စွန့်လွှတ်ခဲ့ပြီဖြစ်၏၊ ထို့ကြောင့် ယေဟောဝါဘုရားသခင်သည် သူအကူအညီတောင်းသောအခါ မတုံ့ပြန်တော့ချေ။ သို့ဆိုလျှင် ရှောလု အဘယ်နေရာမှ အကူအညီတောင်းခံမည်နည်း။ ဘုရားသခင်၏ပရောဖက်ရှမွေလလည်း ကွယ်လွန်သွားလေပြီ။—၁ ဓမ္မရာဇဝင် ၂၈:၃၊ ၅၊ ၆။

ရှောလုသည် အင်ဒေါရမြို့ရှိ နတ်ဝင်သည်တစ်ဦးထံ အကူအညီတောင်းခဲ့သည်။ သေလွန်သူ “ရှမွေလကိုဖော်ပါ” ဟု နတ်ဝင်သည်ကို သူတောင်းဆိုသောအခါ နတ်ဝင်သည်က အရိပ်သဏ္ဌာန်တစ်ခုကို ဖော်လိုက်သည်။ တိုက်ပွဲတွင် ဖိလိတ္တိလူတို့ အနိုင်ရပြီး ရှောလုနှင့်သူ့သားများ သေဆုံးလိမ့်မည်ဟု “ရှမွေလ”အသွင်ဖြင့်ပေါ်လာသော ထိုအရိပ်သဏ္ဌာန်က ရှောလုကို ပြောပြသည်။ (၁ ဓမ္မရာဇဝင် ၂၈:၇-၁၉) ရှမွေလသည် သေရာမှ အမှန်တကယ် ပြန်ထလာခြင်းလော။

စဉ်းစားကြည့်ပါ။ လူတစ်ဦးသည် သေဆုံးသောအခါ “မြေသို့ပြန်သွားတတ်” ပြီး “သူ၏အကြံအစည်တို့သည် ပျက်စီးကြ၏” ဟု သမ္မာကျမ်းစာက ဖော်ပြသည်။ (ဆာလံ ၁၄၆:၄) ဘုရားသခင်သည် နတ်ဝင်သည်များနှင့်ဆက်သွယ်ခြင်းကို ပြစ်တင်ရှုတ်ချကြောင်း ရှောလုနှင့် ရှမွေလနှစ်ဦးစလုံး သိရှိကြသည်။ ထိုမတိုင်မီက ရှောလုကိုယ်တိုင် ဦးဆောင်၍ နတ်ဆိုးပညာလိုက်စားသူများကို တိုင်းပြည်မှ မောင်းထုတ်ခဲ့ပြီဖြစ်သည်။—ဝတ်ပြုရာ ၁၉:၃၁။

ဤအချက်ကို သုံးသပ်ကြည့်ပါ။ အကယ်၍ သစ္စာရှိသူ ရှမွေလသည် ဝိညာဉ်အဖြစ် အသက်ရှင်သေးလျှင် သူသည် ရှောလုနှင့်တွေ့ဆုံရန် ဘုရားသခင်၏ပညတ်ကို ချိုးဖောက်ပြီး နတ်ဝင်သည်နှင့်ပူးပေါင်းလုပ်ဆောင်မည်လော။ ယေဟောဝါဘုရားသခင်သည် ရှောလုနှင့် အဆက်အသွယ် မပြုလုပ်တော့ချေ။ သို့ဆိုလျှင် နတ်ဝင်သည်တစ်ဦးသည် အတိုင်းအဆမဲ့တန်ခိုးရှင် ဘုရားသခင်အား သေလွန်သူ ရှမွေလမှတစ်ဆင့် ရှောလုနှင့်ဆက်သွယ်ရန် စေခိုင်းနိုင်မည်လော။ မစေခိုင်းနိုင်ပါ။ ထို့ကြောင့် “ရှမွေလ” အသွင်ဖြင့်ပေါ်လာသော ထိုအရိပ်သဏ္ဌာန်သည် အဘယ်နည်းနှင့်မျှ ဘုရားသခင်၏သစ္စာရှိ ပရောဖက်မဟုတ်ကြောင်း ရှင်းနေပါသည်။ ၎င်းမှာ သေလွန်သူရှမွေလအဖြစ် ဟန်ဆောင်ထားသော နတ်ဆိုးတစ်ပါးဖြစ်သည်။

နတ်ဆိုးများသည် လူ့သမိုင်းအစတွင် ဘုရားသခင့်အခွင့်အာဏာကို ပုန်ကန်ခဲ့သော ကောင်းကင်တမန်များဖြစ်သည်။ (ကမ္ဘာဦး ၆:၁-၄; ယုဒ ၆) အဆိုပါနတ်ဆိုးများသည် အသက်ရှင်နေသော လူတို့ကို သတိပြုစောင့်ကြည့်နိုင်ပြီး လူတစ်ဦးချင်းစီ၏ ပြုမူပြောဆိုပုံကို သိရှိကြသည်။ သူတို့သည် သမ္မာကျမ်းစာ ပြောဆိုရာများ မှားသည်ဟူသော အယူအဆကို  အားပေးအားမြှောက်ပြုလိုကြသည်။ ထို့ကြောင့် သမ္မာကျမ်းစာတွင် နတ်ဆိုးများနှင့် အဆက်အသွယ်ပြုခြင်းကို ပြစ်တင်ရှုတ်ချထားသည်မှာ အံ့ဩစရာမဟုတ်ချေ။ (တရားဟောရာ ၁၈:၁၀-၁၂) ထိုနတ်ဆိုးများသည် ယနေ့ထိတိုင် လူတို့ကို လှည့်စားနေဆဲပင်။

သေလွန်သူများ၏အသံကို “ကြား” ရသည်၊ သို့မဟုတ် သူတို့ကို “မြင်” ရသည်ဟု လူအများ အဘယ်ကြောင့်ပြောဆိုသည်ကို ယခု ကျွန်ုပ်တို့ သဘောပေါက်ကြပေမည်။ ထိုသို့ကြုံတွေ့ရခြင်းသည် နှစ်သက်ဖွယ်ကောင်းသည်၊ အကျိုးရှိသည်ဟု ထင်ရသော်လည်း အမှန်မှာ နတ်ဆိုးများက လူတို့ကို လှည့်စားနေခြင်းသာဖြစ်သည်။ * (ဧဖက် ၆:၁၂) ထို့ပြင် ဤအချက်ကိုလည်း သုံးသပ်ကြည့်ပါ– ယေဟောဝါဘုရားသခင်သည် ကျွန်ုပ်တို့ကို စောင့်ရှောက်တော်မူသော မေတ္တာရှင်ဖြစ်သည်။ အကယ်၍ သေလွန်သူများသည် တစ်နေရာရာတွင် အသက်ရှင်နေပြီး သူတို့၏မိတ်ဆွေများနှင့် မိသားစုကို ကူညီပေးနိုင်သည်ဆိုလျှင် ကျွန်ုပ်တို့ချစ်မြတ်နိုးသော ဖန်ဆင်းရှင်သည် သူတို့နှင့် အဆက်အသွယ်ပြုခြင်းကို တားမြစ်ပြီး ယင်းကို “စက်ဆုပ်ရွံရှာ” ဖွယ်ရာအဖြစ် ဖော်ပြမည်လော။ (တရားဟောရာ ၁၈:၁၂) ဖော်ပြမည်မဟုတ်ပါ။ (၁ ပေတရု ၅:၇) သို့ဖြစ်လျှင် အကူအညီအတွက် ယုံကြည်အားကိုးနိုင်သောရင်းမြစ် ရှိသလော။

အသက်ရှင်သူများနှင့် သေလွန်သူများအတွက် စစ်မှန်သောအကူအညီ

သေလွန်သူများသည် အသက်ရှင်သူများကို ကူညီပေးနိုင်စွမ်းမရှိကြောင်း ဤဆောင်းပါး၏နိဒါန်းကတည်းက ကျွန်ုပ်တို့ သဘောပေါက်ခဲ့သည်။ သေလွန်သူများ၏အကူအညီရရှိရန် ကြိုးစားအားထုတ်မှုများသည် အကျိုးမရှိသည့်ပြင် သာ၍ပင် ဆိုးရွားလာစရာ အကြောင်းရှိသည်။ ထိုသို့ပြုလုပ်လျှင် ဘုရားသခင့်ပညတ်ကို ချိုးဖောက်ရာကျပြီး နတ်ဆိုးများ၏လွှမ်းမိုးမှုအောက် ကျရောက်သွားနိုင်သည့်အတွက် အလွန်အန္တရာယ်ရှိ၏။

အကောင်းဆုံးအကူအညီပေးနိုင်သော အရှင်မှာ ကျွန်ုပ်တို့၏ဖန်ဆင်းရှင် ယေဟောဝါဘုရားသခင်ဖြစ်ကြောင်း သမ္မာကျမ်းစာတွင် ဖော်ပြထားသည်။ ကိုယ်တော်သာလျှင် ကျွန်ုပ်တို့ကို သေခြင်းမှ ကယ်နုတ်ပေးနိုင်သည်။ (ဆာလံ ၃၃:၁၉၊ ၂၀) ယနေ့ ကိုယ်တော်သည် ကျွန်ုပ်တို့ကို ကူညီရန် အသင့်ရှိတော်မူသည်။ ထို့ကြောင့် ကိုယ်တော်ထံမှရရှိသည့် စစ်မှန်သောမျှော်လင့်ချက်သည် နတ်ဝင်သည်များထံမှရရှိသော မျှော်လင့်ချက်အတုအယောင်နှင့် မတူချေ။

နိဒါန်းပိုင်းတွင် ဖော်ပြခဲ့သော တမ်ဘာဆိုသူသည် နတ်ဝင်သည်များထံမှရရှိသော မျှော်လင့်ချက်အတုအယောင်နှင့် ယေဟောဝါဘုရားသခင်ထံမှရရှိသော အမှန်တရားတို့၏ ကွာခြားချက်ကို ကိုယ်တိုင်ကိုယ်ကျ လေ့လာသင်ယူခဲ့သည်။ သေလွန်သူဘိုးဘေးများကို ယဇ်မပူဇော်လျှင် သူ စာမေးပွဲကျမည်ဟု နတ်ဝင်သည်များက ဆိုသည်။ တမ်ဘာသည် ယေဟောဝါသက်သေများနှင့် ကျမ်းစာလေ့လာခဲ့ရာ သေလွန်သူများ၏ အခြေအနေမှန်ကိုသာမက သေလွန်သူဘိုးဘေးများ၏ အယောင်ဆောင်ထားသော နတ်ဆိုးများ၏ အခြေအနေမှန်ကိုပါ သိရှိခဲ့သည်။ မိခင်က နတ်ဝင်သည်ထံမှ အကူအညီတောင်းခံရန် အတင်းအကျပ်ပြောနေသည့်ကြားမှ တမ်ဘာက “တကယ်လို့ ကျွန်တော် စာမေးပွဲကျရင် နောက်နှစ်မှာ ပိုကြိုးစားမှာပေါ့” ဟူ၍ပြောကာ ငြင်းဆိုခဲ့သည်။

ရလဒ်ကားအဘယ်နည်း။ သူသည် စာမေးပွဲတွင် ပထမအဆင့်ဖြင့် အောင်မြင်ခဲ့၏။ သူ၏မိခင်မှာ အံ့ဩသွားပြီး နတ်ဝင်သည်များကို အယုံအကြည်မရှိတော့သည့်အပြင် ယဇ်ပူဇော်ရန်လည်း ဘယ်တော့မျှ မပြောတော့ချေ။ ‘အသက်ရှင်သောသူတို့အတွက် သေသူတို့၌ မဆည်းကပ်’ ရန် ယေဟောဝါဘုရားသခင် သတိပေးထားကြောင်း တမ်ဘာ သိရှိခဲ့သည်။ (ဟေရှာယ ၈:၁၉၊ သမ္မာ) ဘုရားသခင့်ပညတ်ကို လိုက်နာကျင့်သုံးမည်ဆိုလျှင် အောင်မြင်မည်ဖြစ်ကြောင်း ကျမ်းစာလေ့လာခြင်းအားဖြင့် သူယုံကြည်စိတ်ချသွားသည်။—ဆာလံ ၁:၁-၃။

သို့ဆိုလျှင် သေဆုံးသွားသော ကျွန်ုပ်တို့ချစ်မြတ်နိုးရသူများနှင့်ပတ်သက်၍ကော အသို့နည်း။ သူတို့အတွက် မျှော်လင့်ချက် ရှိပါဦးမည်လော။ ယေဟောဝါဘုရားသခင်သည် အသက်ရှင်နေသော ကျွန်ုပ်တို့ကို ကူညီပေးမည့်အပြင် သင်္ချိုင်းတွင်းရှိ သေလွန်သူများကိုလည်း ကူညီပေးမည်ဟု ကတိပြုထားတော်မူသည်။ သေလွန်သူများတွင် လုပ်ဆောင်နိုင်စွမ်းမရှိကြောင်း ဖော်ပြပြီးနောက် ပရောဖက်ဟေရှာယက အခန်းကြီး ၂၆၊ အခန်းငယ် ၁၉ တွင်ဤသို့ဆိုထားသည်ကို သတိပြုပါ– “ကိုယ်တော်၏လူသေတို့သည် အသက်ရှင်ကြပါလိမ့်မည်။ . . . မြေမှုန့်၌နေသောသူတို့ နိုး၍ သီချင်းဆိုကြလော့။” ထို့ပြင် “သင်္ချိုင်းသားတို့” သည် အသက်ပြန်ရှင်လာကြလိမ့်မည်ဟုလည်း ထိုပရောဖက်ပြုချက်ကပင် ဖော်ပြ၏။

ယင်းကို မြင်ယောင်ကြည့်ပါ။ သင်္ချိုင်း၌ အိပ်ပျော်နေသည့် သန်းထောင်နှင့်ချီသော အကူအညီမဲ့နေသူများသည် အသက်ပြန်ရှင်လာကြတော့မည်။ မှန်ပါသည်၊ ယေဟောဝါဘုရားသခင်သည် သေလွန်သူများ အသက်ရှင်လာရန် “တောင့်တတော်မူ” ၏ဟု သမ္မာကျမ်းစာက ဖော်ပြသည်။ (ယောဘ ၁၄:၁၄၊ ၁၅၊ သမ္မာ) ထိုကတိတော်များသည် အမှန်ပင် ပြည့်စုံလာမည်လော။ အမှန်ပင်ပြည့်စုံလာမည်ဖြစ်ကြောင်း ယေရှုခရစ် အာမခံခဲ့သည်။ အကြောင်းမှာ ယေဟောဝါဘုရားသခင့်အမြင်တွင် သေလွန်သူများ အသက်ရှင်နေကြသည်ဟု ကိုယ်တော်မိန့်ဆိုခဲ့၍ဖြစ်၏။—လုကာ ၂၀:၃၇၊ ၃၈။

ထိုမျှော်လင့်ချက်ကို အသင်လည်း ရရှိလိုပါသလော။ * သမ္မာကျမ်းစာ၏ တိကျမှန်ကန်သော အသိပညာကို ဆက်လက်ဆည်းပူးပါ။ သမ္မာကျမ်းစာကို သင် လေ့လာသောအခါ ယေဟောဝါဘုရားသခင်သည် အသက်ရှင်နေသူများနှင့် သေလွန်သူများကို ကူညီပေးနိုင်ကြောင်း၊ ကိုယ်တော်၏ကတိတော်များသည် “သစ္စာစကား၊ ဟုတ်မှန်သောစကား” ဖြစ်ကြောင်း သင် ယုံကြည်စိတ်ချလာပါလိမ့်မည်။—ဗျာ. ၂၁:၄၊ ၅။

[အောက်ခြေမှတ်ချက်]

[စာမျက်နှာ ၉ ပါ အကျဉ်းဖော်ပြချက်]

ကွယ်လွန်သွားသော ချစ်မြတ်နိုးရသူများကို ကျွန်ုပ်တို့ လွမ်းဆွတ်သတိရကြသည်မှာ သဘာဝပင်

[စာမျက်နှာ ၂၀ ပါရုပ်ပုံ]

ပရောဖက်ရှမွေလသည် သေရာမှ ပြန်ထလာပြီး ဘုရင်ရှောလုနှင့် ဆက်သွယ်ခဲ့သလော