လူကောင်းအားလုံး ကောင်းကင်သွားသလော

ယေရှုသည် တမန်တော်များကို ကောင်းကင်တွင် နေစရာပေးမည်ဖြစ်ကြောင်း အသတ်မခံရမီညတွင် သူတို့နှင့် နောက်ဆုံးညစာစားပြီးနောက် ကတိပြုခဲ့သည်။ “ငါ့အဖ၏အိမ်တော်၌ နေစရာအခန်းများစွာ ရှိ၏။ သို့မဟုတ်လျှင် မဟုတ်ကြောင်း သင်တို့အား ငါ ပြောမည်။ အကြောင်းမူကား သင်တို့နေစရာအရပ်ကို ပြင်ဆင်ရန် ငါသွားရမည်” ဟုကိုယ်တော် မိန့်ဆိုခဲ့သည်။ (ယောဟန် ၁၄:၂) ယေရှုသည် တမန်တော်များအတွက် ကောင်းကင်တွင် နေစရာအရပ်ကို အဘယ်ကြောင့် ပြင်ဆင်ပေးမည်နည်း။ ထိုတွင် သူတို့ အဘယ်အရာ လုပ်ဆောင်ကြမည်နည်း။

ယေရှုသည် မိမိတပည့်များကို အထူးတာဝန်ပေးရန် စဉ်းစားထားပြီးသားဖြစ်၏။ ထိုညနေခင်းတွင်ပင် ကိုယ်တော် ဤသို့မိန့်ဆိုခဲ့၏– “စုံစမ်းသွေးဆောင်ခြင်းကို ငါခံရစဉ်တွင် သင်တို့သည် ငါ၌မှီဝဲသောသူများ ဖြစ်ကြ၏။ ငါ့ခမည်းတော်သည် ငါနှင့်ပဋိညာဉ်ဖွဲ့သည့်နည်းတူ ငါသည်လည်း နိုင်ငံတော်အတွက် သင်တို့နှင့် ပဋိညာဉ်ဖွဲ့၏။” (လုကာ ၂၂:၂၈၊ ၂၉) ယေရှုသည် လူသားတို့အတွက် အလိုအပ်ဆုံးအရာတစ်ခုဖြစ်သော အုပ်ချုပ်မှုကောင်းကို ဖွဲ့စည်းတည်ထောင်ပေးမည့် ဘုရင်ဖြစ်မည်ဟု ဘုရားသခင် ကတိပြုပြီးသားဖြစ်သည်။ ယေရှုသည် ဆင်းရဲခက်ခဲနေသူများကို ကယ်တင်ပြီး ညှဉ်းဆဲသူများကို ဖျက်ဆီးပစ်မည်။ ကိုယ်တော်၏လက်အောက်ခံများသည် “မြေကြီးစွန်းတိုင်အောင်” ရှိမည်ဖြစ်သော်လည်း ကိုယ်တော်နန်းထိုင်ရာအရပ်မှာ ကောင်းကင်တွင်ဖြစ်မည်။—ဆာလံ ၇၂:၄၊ ၈၊ သမ္မာ; ဒံယေလ ၇:၁၃၊ ၁၄။

သို့သော် ယေရှုတစ်ဦးတည်းက အုပ်ချုပ်သွားမည်မဟုတ်ပေ။ ထို့ကြောင့်ပင် ကောင်းကင်တွင် နေစရာအရပ် ပြင်ဆင်ပေးမည်ဟု တမန်တော်များကို ကိုယ်တော် ကတိပြုခဲ့ခြင်းဖြစ်သည်။ တမန်တော်များသည် “ဘုရင်များအဖြစ် မြေကြီးကို အုပ်စိုး” ရန် ဦးဆုံးရွေးချယ်ခံရသူများ ဖြစ်ကြသည်။—ဗျာ. ၅:၁၀။

ကောင်းကင်သွားမည့်သူ မည်မျှရှိသနည်း။ လူ့အစိုးရများနည်းတူ ဘုရားသခင့်ကောင်းကင်နိုင်ငံတော်တွင် အုပ်ချုပ်မည့်သူများမှာ လက်အောက်ခံများနှင့်နှိုင်းယှဉ်လျှင် အနည်းငယ်သာဖြစ်သည်။ ယေရှုက မိမိနှင့်အတူ အုပ်စိုးမည့်သူများအား “သိုးစုငယ်၊ မကြောက်ကြနှင့်။ အကြောင်းမူကား သင်တို့၏အဖသည် သင်တို့အား နိုင်ငံတော်ကိုပေးရန် အလိုရှိတော်မူ၏” ဟုမိန့်ဆိုခဲ့သည်။ (လုကာ ၁၂:၃၂) အဆိုပါ “သိုးစုငယ်” ၏အရေအတွက်မှာ နောက်ဆုံးတွင် ၁၄၄,၀၀၀ ဖြစ်လာမည်။ (ဗျာ. ၁၄:၁) ထိုအရေအတွက်မှာ ဘုရားသခင့်နိုင်ငံတော်ကို သစ္စာရှိရှိထောက်ခံသော လက်အောက်ခံများအဖြစ် ကမ္ဘာမြေပေါ်တွင် ထာဝစဉ်အသက်ရှင်မည့် သန်းပေါင်းများစွာနှင့်နှိုင်းယှဉ်လျှင် နည်းပါးလှ၏။—ဗျာ. ၂၁:၄။

သို့ဖြစ်၍ လူကောင်းအားလုံး ကောင်းကင်မသွားကြချေ။ မင်းကောင်းဒါဝိဒ်နှင့်ပတ်သက်၍ တမန်တော်ပေတရုက “ဒါဝိဒ်သည် ကောင်းကင်သို့ တက်သည်မဟုတ်” ဟုရှင်းရှင်းလင်းလင်း မိန့်ဆိုခဲ့၏။ (တမန်တော် ၂:၃၄) နှစ်ခြင်းဆရာယောဟန်သည် လူကောင်းတစ်ဦးဖြစ်၏။ သို့တိုင် သူသည် ကောင်းကင်တွင် ဘုရင်အဖြစ်အုပ်စိုးရန် ချီးမြှောက်ခံရမည်မဟုတ်ဟု ယေရှုဖော်ပြခဲ့သည်။ ယေရှုက “မိန်းမတို့ဖွားမြင်သူများတွင် နှစ်ခြင်းဆရာယောဟန်ထက် သာ၍ကြီးမြတ်သောသူ မပေါ်မထွန်းသေး။ သို့ရာတွင် ကောင်းကင်နိုင်ငံတော်၌ အငယ်ဆုံးသောသူသည် ထိုသူထက် သာ၍ကြီးမြတ်၏” ဟုမိန့်ဆိုခဲ့သည်။—မဿဲ ၁၁:၁၁။

လူကောင်းများရရှိမည့် ဆုကျေးဇူးကို သင်လည်း ရရှိမည်လော

ကမ္ဘာမြေကြီးပေါ်တွင် ထာ၀စဉ်အသက်ရှင်မည့် ဆုကျေးဇူးကို ရလိုပါက အဘယ်အရာလုပ်ဆောင်ရမည်နည်း။ “ဘုရားသခင်၏သားတော်ကို ယုံကြည်ကြောင်းတင်ပြသူ အပေါင်းတို့သည် ပျက်စီးခြင်းသို့မရောက်ဘဲ ထာ၀ရအသက်ကိုရစေရန် ဘုရားသခင်သည် မိမိ၏တစ်ပါးတည်းသော သားတော်ကို စွန့်တော်မူသည်တိုင်အောင် ဤလောကကို ချစ်တော်မူ၏” ဟုယေရှု မိန့်ဆိုခဲ့သည်။ (ယောဟန် ၃:၁၆) ဤလောကကို ဘုရားသခင်ချစ်တော်မူသည့်အတွက် လူသားအားလုံး ထာ၀ရအသက်ရနိုင်သော်လည်း “ယုံကြည်ကြောင်းတင်ပြ” သူတို့သာလျှင် ထိုဆုကျေးဇူးကို ရရှိနိုင်မည်ဖြစ်ကြောင်း သတိပြုပါ။

ယုံကြည်ခြင်းသည် တိကျမှန်ကန်သောအသိပညာအပေါ် အခြေပြုရန်လိုသည်။ (ယောဟန် ၁၇:၃) သင်သည် လူသားတို့အတွက် ဘုရားသခင်ရည်ရွယ်ထားရာများကို ပိုမိုလေ့လာသင်ယူခြင်းအားဖြင့် လူကောင်းတစ်ဦးဖြစ်ကြောင်း တင်ပြနိုင်ပါသည်။ သင်ယူသိရှိခဲ့ရာများကို ယုံကြည်ကြောင်း လက်တွေ့ပြပါ။ သင် အမှန်ပင် ထာ၀စဉ်အသက်ရှင်ခွင့် ရရှိမည်ကိုလည်း စိတ်ချပါ။

 [စာမျက်နှာ ၇ ပါပုံစာ]

သမ္မာကျမ်းစာ၏အဆိုကား အဘယ်နည်း

မေးခွန်း-

လူကောင်းများ သေဆုံးသောအခါ ဘာဖြစ်သွားကြသနည်း။

အဖြေ-

“သေသောသူမူကား အဘယ်အရာကိုမျှမသိ။”—ဒေ. ၉:၅။

မေးခွန်း-

ကျမ်းစာသည် သေလွန်သွားသော လူကောင်းများအတွက် အဘယ်မျှော်လင့်ချက် ပေးသနည်း။

အဖြေ-

“သင်္ချိုင်းများမှာ ရှိသောသူအပေါင်းတို့သည် [ယေရှု၏] စကားသံကိုကြား၍ ထွက်ရမည့်အချိန်ကာလ ရောက်လိမ့်မည်။”—ယောဟန် ၅:၂၈၊ ၂၉။

မေးခွန်း-

လူကောင်းအများစုသည် မည်သည့်နေရာတွင် နေထိုင်ကြမည်နည်း။

အဖြေ-

“ဖြောင့်မတ်သောသူတို့သည် ပြည်တော် [“မြေကြီး၊” ကဘ] ကို အမွေခံ၍ အစဉ်အမြဲ နေရကြလိမ့်မည်။”—ဆာလံ ၃၇:၂၉။