ယေရှုအကြောင်း ကလေးတို့ ဖတ်ရတာ ကြိုက်သလား။— * ကျမ်းတစ်စောင်ကိုမှ ယေရှု မရေးခဲ့ဘူးဆိုတာ သိရတဲ့အခါ လူတွေ အံ့ဩသွားကြတယ်။ ဒါပေမဲ့ ကျမ်းရေးသူရှစ်ယောက်က ယေရှုအကြောင်း အများကြီး ပြောပြခဲ့ကြတယ်။ သူတို့အားလုံးဟာ ယေရှု အသက်ရှင်တုန်းက ရှိခဲ့တဲ့သူတွေဖြစ်လို့ ယေရှု သင်ပေးခဲ့တဲ့အရာတွေကို သူတို့ ပြန်ပြောပြနိုင်တာပေါ့။ သူတို့တွေက ဘယ်သူတွေလဲ။— သူတို့တွေက မဿဲ၊ မာကု၊ လုကာနဲ့ ယောဟန်တို့ဖြစ်တယ်။ နောက်လေးယောက်က ပေတရု၊ ယာကုပ်၊ ယုဒနဲ့ ပေါလုတို့လေ။ သူတို့အကြောင်းကို ကလေးတို့ သိသလား။—

ယေရှုရဲ့တမန်တော် ၁၂ ပါးအဝင်ဖြစ်တဲ့ ကျမ်းရေးသူ သုံးယောက်အကြောင်းကို အရင်ဆုံး ပြောကြရအောင်။ သူတို့ရဲ့နာမည်ကို ကလေးတို့ သိသလား။— ပေတရု၊ ယောဟန်နဲ့ မဿဲတို့ပဲ။ ပေတရုက ခရစ်ယာန်ညီအစ်ကို၊ ညီအစ်မတွေအတွက် စာနှစ်စောင်ရေးခဲ့တယ်။ ယေရှု မိန့်ဆိုခဲ့ရာတွေ၊ ပြုလုပ်ခဲ့ရာတွေအကြောင်းကို အဲဒီစာထဲမှာ ရေးခဲ့တယ်။ ၂ ပေတရု ၁:၁၆-၁၈ ကို ဖွင့်ကြည့်ရအောင်။ ပြီးတော့ ယေရှုကို ကောင်းကင်ကနေ ယေဟောဝါဘုရားသခင် မိန့်ဆိုသံကို ပေတရု ကြားခဲ့တဲ့အကြောင်း ဖတ်ကြည့်ပါ။—မဿဲ ၁၇:၅။

တမန်တော်ယောဟန်က ကျမ်းငါးစောင် ရေးခဲ့တယ်။ ယေရှုနဲ့အတူ တပည့်တော်တွေ နောက်ဆုံးစားခဲ့တဲ့ ညစာစားပွဲမှာ ယောဟန်က ယေရှုအနားမှာ ရှိနေခဲ့တာလေ။ ယေရှုသေဆုံးချိန်မှာလည်း ယောဟန်က အနားမှာရှိနေတယ်။ (ယောဟန် ၁၃:၂၃-၂၆။ ၁၉:၂၆) ယောဟန်က ယေရှုရဲ့အသက်တာအကြောင်း ရေးသားတဲ့ ခရစ်ဝင်ကျမ်းလေးစောင်ထဲက တစ်စောင်ကို ရေးခဲ့တယ်။ ဒါ့ပြင် ယေရှုပေးခဲ့တဲ့ အဆင်းအာရုံအကြောင်းပါတဲ့ ကျမ်းတစ်စောင်နဲ့ သူ့နာမည်တပ်ထားတဲ့ စာသုံးစောင်ကိုလည်း ရေးခဲ့တယ်။ (ဗျာ. ၁:၁) ယေရှုရဲ့တမန်တော်တစ်ပါး ဖြစ်လာတဲ့ တတိယမြောက် ကျမ်းရေးသူကတော့ မဿဲဖြစ်တယ်။ သူက အခွန်ခံတစ်ယောက်လေ။

တခြားကျမ်းရေးသူနှစ်ယောက်က ယေရှုကို ကောင်းကောင်းသိကြတယ်။ သူတို့ကတော့ ယေရှုရဲ့ မိတူဖကွဲ ညီလေးတွေပေါ့။ (မဿဲ ၁၃:၅၅) အစပိုင်းမှာ သူတို့က ယေရှုရဲ့တပည့်တွေ မဟုတ်ဘူး။ ဟောပြောခြင်းလုပ်ငန်းမှာ ယေရှု ဇွဲရှိရှိပါဝင်တာကို အရူးဆိုပြီးတော့တောင် ထင်ခဲ့ကြတာ။ (မာကု ၃:၂၁) သူတို့က ဘယ်သူတွေလဲ။— တစ်ယောက်က ယာကုပ်လေ။ သူက ယာကုပ်ကျမ်းကို ရေးခဲ့တယ်။ နောက်တစ်ယောက်က ယုဒဖြစ်ပြီး ယုဒကျမ်းကို ရေးခဲ့တယ်။—ယုဒ ၁။

ယေရှုရဲ့အသက်တာအကြောင်းကို ရေးခဲ့တဲ့ နောက်နှစ်ယောက်က မာကုနဲ့ လုကာပါ။ မာကုရဲ့မိခင် မာရိက ဂျေရုဆလင်မြို့မှာ အိမ်ကြီးတစ်လုံးကို ပိုင်ဆိုင်ထားတယ်။ အဲဒီအိမ်မှာ တမန်တော်ပေတရု အပါအဝင် အစောပိုင်းခရစ်ယာန်တွေ စုဆုံကြတယ်။ (တမန်တော် ၁၂:၁၁၊ ၁၂) အစောပိုင်းနှစ်တွေတုန်းက ယေရှုနဲ့ သူ့ရဲ့တမန်တော်တွေ နောက်ဆုံးပသခါပွဲ ကျင်းပပြီးတဲ့နောက် ဂေသရှေမန်ဥယျာဉ်ကို သူတို့ထွက်သွားတဲ့အချိန်မှာ သူတို့နောက်ကနေ မာကု လိုက်သွားခဲ့ပုံရတယ်။ ယေရှု အဖမ်းခံရချိန်မှာ စစ်သားတွေက မာကုကို ဖမ်းမယ်လုပ်တော့ သူက ဝတ်ရုံကိုစွန့်ပြီး ကိုယ်လွတ်ထွက်ပြေးသွားတယ်။—မာကု ၁၄:၅၁၊ ၅၂။

လုကာက ဆရာဝန်တစ်ယောက်ဖြစ်ပြီး ယေရှုသေပြီးတဲ့နောက်မှ တပည့်တစ်ယောက် ဖြစ်လာပုံရတယ်။ သူက ယေရှုရဲ့အသက်တာ အကြောင်းကို သေသေချာချာ လေ့လာပြီး ရှင်းရှင်းလင်းလင်းနဲ့ တိတိကျကျ ရေးခဲ့တယ်။ နောက်ပိုင်းမှာ လုကာက တမန်တော်ပေါလုရဲ့ နယ်လှည့်အဖော် ဖြစ်လာတယ်။ တမန်တော်ကျမ်းကိုလည်း သူရေးခဲ့တယ်။—လုကာ ၁:၁-၃။ တမန်တော် ၁:၁။

ပေါလုက ယေရှုအကြောင်း ရေးခဲ့တဲ့ ရှစ်ယောက်မြောက်  ကျမ်းရေးသူပါ။ သူက နာမည်ကြီး ဥပဒေပညာရှင် ဂါမလျေလဆီမှာ ပညာသင်ခဲ့တယ်။ အဲဒီတုန်းက ပေါလုကို ရှောလုလို့ ခေါ်တယ်။ သူက ဖာရိရှဲတွေရဲ့ သွန်သင်မှုအောက်မှာ ကြီးပြင်းလာခဲ့တဲ့အတွက် ယေရှုရဲ့တပည့်တွေကို အရမ်းမုန်းပြီး သူတို့ကို သတ်တဲ့အခါ ကြံရာပါဖြစ်ခဲ့တယ်။ (တမန်တော် ၇:၅၈–၈:၃။ ၂၂:၁-၅။ ၂၆:၄၊ ၅) ယေရှုအကြောင်း အမှန်အတိုင်း ပေါလု ဘယ်လို သိလာသလဲဆိုတာ ကလေးတို့ သိသလား။—

ယေရှုရဲ့ တပည့်တွေကို ဖမ်းဖို့ ဒမတ်စကတ်မြို့ကို သွားတဲ့လမ်းမှာ ကောင်းကင်ကနေ တောက်ပတဲ့အလင်း ကျလာတဲ့အတွက် သူ့မျက်စိ ချက်ချင်း ကွယ်သွားတယ်။ “ရှောလု၊ ရှောလု အဘယ်ကြောင့် ငါ့ကို ညှဉ်းဆဲသနည်း” လို့ဆိုတဲ့အသံကို သူကြားလိုက်ရတယ်။ အဲဒါ ယေရှုအသံပဲ။ ဒမတ်စကတ်မြို့ကို သွားဖို့ ပေါလုကို ယေရှု မိန့်ဆိုခဲ့တယ်။ ပေါလုနဲ့ စကားပြောဖို့ တပည့်တစ်ယောက်ဖြစ်တဲ့ အာနနိကို ယေရှု ညွှန်ကြားခဲ့တယ်။ နောက်ပိုင်းမှာ ပေါလုလည်း ယေရှုရဲ့ တပည့်တစ်ယောက် ဖြစ်လာတယ်။ (တမန်တော် ၉:၁-၁၈) ပေါလုက ရောမကျမ်းကနေ ဟေဗြဲကျမ်းအထိ စုစုပေါင်းကျမ်း ၁၄ စောင် ရေးခဲ့တယ်။

ယေရှုအကြောင်းကို ကလေးတို့ စဖတ်နေပြီလား၊ ဒါမှမဟုတ် တစ်ယောက်ယောက်ကို ဖတ်ပြခိုင်းသလား။— ယေရှုအကြောင်း ရေးထားတဲ့ ကျမ်းစာစောင်တွေကို အသက်ငယ်တုန်း ဖတ်ရှုလေ့လာတာက ကလေးတို့ဘဝမှာ လုပ်နိုင်တဲ့ အကောင်းဆုံးအရာတစ်ခုပဲ။