သင်သိပါသလား

နို့စို့သူငယ်ယေရှုဆီ ရောက်လာကြတဲ့ မာဂုပညာရှိတွေက ဘယ်သူတွေလဲ။

▪ ရှင်ဘုရင်အသစ်ပေါ်ထွန်းမယ့် ကြယ်ကို မြင်တွေ့ခဲ့တဲ့ “အရှေ့တိုင်း” ကဧည့်သည်တွေဟာ သူငယ်ယေရှုဆီ ရောက်လာပြီး လက်ဆောင်တွေ ပေးကြတယ်လို့ မဿဲခရစ်ဝင်ကျမ်းက ယေရှုမွေးဖွားခြင်းမှတ်တမ်းမှာ ဖော်ပြထားတယ်။ ဂရိဘာသာစကားနဲ့ ရေးထားတဲ့ ခရစ်ဝင်ကျမ်းမှာ အဲဒီဧည့်သည်တွေကို မာဂုပညာရှိတွေလို့ ခေါ်ထားတယ်။ (မဿဲ ၂:၁၊ အောက်ခြေမှတ်ချက်) သူတို့အကြောင်း ကျွန်ုပ်တို့ ဘာသိရသလဲ။

မာဂုပညာရှိတွေအကြောင်း ဦးဆုံးရေးသားဖော်ပြတဲ့သူက ဂရိသမိုင်းဆရာ ဟဲရိုဒိုတပ်စ်ဖြစ်ပါတယ်။ မာဂုပညာရှိတွေဟာ ပါရှန်းယဇ်ပုရောဟိတ်အတန်းအစားဝင်ဖြစ်ပြီး နက္ခတ်ဗေဒင်ဟောခြင်း၊ အိပ်မက်အနက်ဖွင့်ခြင်း၊ ပြုစားခြင်းစတဲ့ အတတ်ပညာတွေမှာ အထူးကျွမ်းကျင်ကြတယ်လို့ ဘီစီအီး ငါးရာစုမှာ အသက်ရှင်ခဲ့တဲ့ ဟဲရိုဒိုတပ်စ်က ဖော်ပြခဲ့တယ်။ ဟဲရိုဒိုတပ်စ်ခေတ်မှာ ပါရှန်းဘာသာတရားကို ဇိုရိုအာစ်ထရီယန်ဘာသာလို့ ခေါ်ဆိုကြတယ်။ ဒါကြောင့် မာဂုပညာရှိတွေဟာ အဲဒီဘာသာရဲ့ ယဇ်ပုရောဟိတ်တွေ ဖြစ်နိုင်ဖွယ်ရှိတယ်။ “အများအားဖြင့် ဂရိကြီးစိုးတဲ့ခေတ်က မာဂုပညာရှိတစ်ယောက်မှာ သဘာဝလွန်အသိပညာနဲ့ စွမ်းရည်ရှိတဲ့အပြင် မှော်အတတ်ပညာလည်း တတ်ကျွမ်းတယ်” ဆိုပြီး စွယ်စုံကျမ်းတစ်ကျမ်း (The International Standard Bible Encyclopedia) မှာဖော်ပြထားတယ်။

အမည်ခံခရစ်ယာန်ဖြစ်တဲ့ ဂျတ်စ်တင်မာတာ၊ ဩရီဂျင်နဲ့ တာတူလျန် အစရှိတဲ့ အစောပိုင်း ကျမ်းစာအနက်ဖွင့်တဲ့သူတွေက ယေရှုဆီရောက်လာတဲ့ မာဂုပညာရှိတွေကို နက္ခတ်ဗေဒင်ဆရာတွေဆိုပြီး ဖော်ပြခဲ့ကြတယ်။ ဥပမာ၊ တာတူလျန်က သူ့ရဲ့စာအုပ်တစ်အုပ် (On Idolatry) မှာဒီလိုရေးသားထားတယ်- “မှော်အတတ်နဲ့ နက္ခတ်ဗေဒင်တို့က ဆက်နွှယ်မှုရှိတယ်။ ဒါကြောင့် [ယေရှု] ကို ‘လက်ဆောင်တွေ’ ပေးဖို့ ပထမဆုံးရောက်လာတဲ့သူတွေဟာ . . . ကြယ်တွေကို ကြည့်ပြီး နိမိတ်ဖတ်တဲ့သူတွေဖြစ်ပါတယ်။” ဒီအချက်ကိုကြည့်ခြင်းအားဖြင့် ဘာသာပြန်ကျမ်းအတော်များများမှာ မာဂုပညာရှိတွေကို “နက္ခတ်ဗေဒင်ဆရာတွေ” လို့ ပြန်ဆိုထားကြပါတယ်။

ဇာခရိကျမ်းထဲက စကားတွေကို ပရောဖက်ယေရမိပြောတယ်လို့ မဿဲက ဘာကြောင့်ဆိုရတာလဲ။

▪ အဲဒီမေးခွန်းနဲ့ပတ်သက်တဲ့ အကြောင်းအရာကို မဿဲခရစ်ဝင်ကျမ်းမှာ တွေ့ရပါတယ်။ ယေရှုကိုသစ္စာဖောက်တဲ့အတွက် ယုဒရှကာရုတ် ငွေရရှိခဲ့တဲ့အကြောင်း ကျမ်းရေးသူက ဒီလိုဖော်ပြခဲ့တယ်– “သို့နှင့် ပရောဖက်ယေရမိအားဖြင့် ဆင့်ဆိုသည့် ဤစကားပြည့်စုံလေ၏။ ‘သူ့အတွက် အစ္စရေးအမျိုးသားတို့ သတ်မှတ်သောအဖိုး ငွေသုံးဆယ်ကို သူတို့သည် ယူ၍ . . . အိုးထိန်းသည်၏မြေကွက်ကို ဝယ်ကြ၏။’” (မဿဲ ၂၇:၉၊ ၁၀) ဒါပေမဲ့ ငွေ ၃၀ နဲ့ပတ်သက်တဲ့ ပရောဖက်ပြုချက်ကို ယေရမိကျမ်းမှာမတွေ့ရဘဲ ဇာခရိကျမ်းမှာ တွေ့ရပါတယ်။—ဇာခရိ ၁၁:၁၂၊ ၁၃။

ထိုခေတ်အချိန်က “ပရောဖက်ကျမ်းများ” ကိုစုစည်းထားတဲ့ စာအုပ်ကို ဟေရှာယကျမ်းနဲ့မစဘဲ ယေရမိကျမ်းနဲ့ အစပြုခဲ့ပုံရတယ်။ (မဿဲ ၂၂:၄၀) ဒါကြောင့် “ယေရမိ” လို့ မဿဲပြောတဲ့အခါ ပထမဆုံးကျမ်းစောင်ရဲ့အမည်ကို အစွဲပြုပြီး ခေါ်လိုက်တာဖြစ်တယ်။ အမှန်တော့ “ပရောဖက်ကျမ်းများ”ကို စုစည်းထားတဲ့စာအုပ်ကို သူရည်ညွှန်းနေတာပါ။ အဲဒီစာအုပ်ထဲမှာ ဇာခရိကျမ်းလည်းပါတယ်။

ယေရှုလည်း ရေးသားချက်များကျမ်းလို့ သိထားကြတဲ့ ကျမ်းစောင်တချို့ကိုခြုံပြီး “ဆာလံကျမ်း” လို့ခေါ်ခဲ့တယ်။ ဒါကြောင့် “မောရှေ၏ပညတ်ကျမ်း၊ ပရောဖက်ကျမ်းများနှင့် ဆာလံကျမ်းတို့တွင်” မိမိအကြောင်း ရေးသားချက်အားလုံး ပြည့်စုံရမယ်လို့ ယေရှုပြောတဲ့အခါ ဟေဗြဲကျမ်းစောင်တစ်အုပ်လုံးမှာပါတဲ့ ပရောဖက်ပြုချက်တွေကို ကိုယ်တော်ရည်ညွှန်းနေတာဖြစ်ပါတယ်။—လုကာ ၂၄:၄၄။