၁၃၀ ကြိမ်မြောက် ဂိလဒ်သင်တန်းဆင်းပွဲ

မျှော်လင့်ချက်ကြီးစွာနဲ့ ပျော်ရွှင်စွာ စောင့်မျှော်ခဲ့ရတဲ့ နေ့တစ်နေ့

ဂိလဒ်ကင်းမျှော်စင် သမ္မာကျမ်းစာသင်တန်းရဲ့ ၁၃၀ ကြိမ်မြောက် သင်တန်းဆင်းပွဲကို မျှော်လင့်ချက်ကြီးစွာနဲ့ စောင့်မျှော်နေကြမှာ သေချာပါတယ်။ ၂၀၁၁၊ မတ်လ ၁၂ ရက်၊ စနေနေ့မှာ ကျင်းပတဲ့ အဲဒီပွဲမှာ သင်တန်းဆင်းတွေ၊ သူတို့ရဲ့မိသားစုတွေနဲ့ မိတ်ဆွေတွေအပါအဝင် တက်ရောက်သူ စုစုပေါင်း ၈,၅၀၀ ကျော်ရှိတယ်။ တက်ရောက်သူတွေဟာ အဲဒီနေ့အတွက်ပဲ စိတ်လှုပ်ရှားနေကြတာ မဟုတ်ပါဘူး။ မကြာခင် လူတွေကို ကျမ်းစာအမှန်တရားတွေ သွန်သင်ပေးဖို့ ကမ္ဘာအနှံ့ သွားကြတော့မယ့် ကောင်းစွာလေ့ကျင့်ခံထားရတဲ့ ယေဟောဝါသက်သေ သာသနာပြုတွေရဲ့ အနာဂတ်အတွက်ပါ စိတ်လှုပ်ရှားနေကြပါတယ်။

ယေဟောဝါဘုရားသခင်ကို ‘စောင့်မျှော်သောသူအပေါင်း ပျော်ရွှင်ကြ’

ယေဟောဝါသက်သေတွေရဲ့ အုပ်ချုပ်ရေးအဖွဲ့ဝင်ဖြစ်ပြီး အစီအစဉ်သဘာပတိဖြစ်သူ ဂျက်ဖရီ ဂျက်ဆင်က ဟေရှာယ ၃၀:၁၈ ကနေ ထုတ်နုတ်ထားတဲ့ နှစ်သိမ့်မှုဖြစ်စရာ အချက်ကို အဓိကထားပြီး ဟောပြောတင်ဆက်သွားတယ်။ သင်တန်းဆင်းတွေဟာ သင်တန်းကာလမှာ အခက်အခဲတွေ ရင်ဆိုင်ခဲ့ရပြီး သင်တန်းဆင်းမယ့်နေ့ကို ကြောက်ဒူးတုန်နေပေမဲ့ သင်တန်းကို အပြီးတက်ရောက်ခဲ့တဲ့အတွက် ဂုဏ်ပြုချီးကျူးခံထိုက်ပါတယ်လို့ သူက လှိုက်လှိုက်လှဲလှဲနဲ့ ဟာသနှောပြီး ပြောလိုက်တယ်။ သင်တန်းဆင်းတွေဟာ သူတို့ရရှိမယ့် တာဝန်တွေနဲ့ပတ်သက်ပြီး ဘယ်အရာတွေ ဖြစ်လာမယ်ဆိုတာကို မျှော်လင့်နိုင်သလဲ။ ဟေရှာယ ၃၀:၁၈-၂၁ က လက်တွေ့ကျတဲ့ အချက်သုံးချက်ကို ညီအစ်ကိုက အဆင့်ဆင့် တင်ဆက်သွားတယ်။

ပထမ၊ “သင်တို့ရဲ့ ဆုတောင်းချက်တွေကို ယေဟောဝါဘုရားသခင် နားညောင်းပေးမယ်ဆိုတာ မျှော်လင့်နိုင်တယ်” ဆိုပြီး ညီအစ်ကိုဂျက်ဆင်က ပြောတယ်။ “သင် အော်ဟစ်သံကို နားထောင်၍ ကယ်မသနားတော်မူလိမ့်မည်” ဆိုတဲ့ အခန်းငယ် ၁၉ က အာမခံချက်ကို သူထောက်ပြသွားတယ်။ အဲဒီအခန်းငယ်မှာ “သင်” လို့ဖော်ပြထားတဲ့အတွက် ဘုရားသခင်က ကျွန်ုပ်တို့ တစ်ဦးချင်းစီရဲ့ ဆုတောင်းချက်ကို နားညောင်းပေးတယ်လို့ ညီအစ်ကိုဂျက်ဆင်က ပြောသွားတယ်။ “အဖေတစ်ယောက်ဖြစ်တဲ့ ဘုရားသခင်ဟာ ‘မင်းက ဘာကြောင့် သူများတွေလို စွဲစွဲမြဲမြဲ ဆုမတောင်းတာလဲ’ လို့ မေးမှာမဟုတ်ဘူး။ အဲဒီအစား တစ်ဦးချင်းစီရဲ့ ဆုတောင်းချက်ကို ဂရုတစိုက် နားထောင်ပေးပြီး ဖြေကြားပေးတယ်။”

ဒုတိယ၊ ပြဿနာတွေကို မျှော်လင့်ထားရမယ်လို့ ဟောပြောသူက ပြောသွားတယ်။ “ဘဝက ဖြောင့်ဖြူးသာယာလိမ့်မယ်လို့ ယေဟောဝါဘုရားသခင် ကတိမပြုပေမဲ့ အကူအညီတော့ ပေးမှာပါ။” အခန်းငယ် ၂၀ မှာဖော်ပြထားတဲ့အတိုင်း ရှေးခေတ်အစ္စရေးပြည်ကို ရန်သူတွေ ဝိုင်းရံထားချိန်မှာ အစ္စရေးလူတွေဟာ စိတ်ဆင်းရဲမှုနဲ့ ဖိနှိပ်မှုတွေကို နေ့တိုင်း အစာစားသလိုမျိုး ကြုံတွေ့ရလိမ့်မယ်လို့ ဘုရားသခင် ကြိုပြောခဲ့တယ်။ ဒါပေမဲ့ ဘုရားသခင်က အစ္စရေးလူတွေကို ကယ်တင်ဖို့ အမြဲ အသင့်ရှိနေပါလိမ့်မယ်။ သင်တန်းဆင်းတွေလည်း ပြဿနာတွေ၊ စိန်ခေါ်ချက်တွေနဲ့ ရင်ဆိုင်ရမှာဖြစ်တယ်။ တချို့ပြဿနာတွေ၊ စိန်ခေါ်ချက်တွေကို သူတို့ထင်ထားတဲ့အတိုင်း ရင်ဆိုင်ရမှာဖြစ်ပြီး တချို့ကိုကျတော့ မထင်ထားတဲ့နည်းနဲ့ ရင်ဆိုင်ရမှာဖြစ်တယ်။ “ဒါပေမဲ့ စိန်ခေါ်ချက်တွေကို သင် ကိုင်တွယ်ဖြေရှင်းနိုင်အောင် ဘုရားသခင် အရန်သင့်ရှိနေမယ်ဆိုတာ သင် မျှော်လင့်နိုင်တယ်” လို့ ညီအစ်ကိုဂျက်ဆင်က ထပ်လောင်းပြောဆိုသွားတယ်။

တတိယ၊ အခန်းငယ် ၂၀ နဲ့ ၂၁ မှာ ဖော်ပြထားတဲ့အတိုင်း “လမ်းညွှန်ချက်ကို သင် မျှော်လင့်နိုင်တယ်။ ဒါကြောင့် လမ်းညွှန်ချက်ကို ရှာပါ” လို့ ညီအစ်ကိုဂျက်ဆင်က သင်တန်းဆင်းတွေကို သတိပေးသွားတယ်။ ကနေ့ ခရစ်ယာန်တစ်ဦးစီဟာ သမ္မာကျမ်းစာနဲ့ ကျမ်းစာအခြေပြု စာပေတွေကနေတစ်ဆင့် ဘုရားသခင် စကားပြောနေချိန်မှာ ဂရုတစိုက် နားထောင်ဖို့ လိုတယ်လို့လည်း ဖော်ပြသွားတယ်။ နေ့စဉ်ကျမ်းစာဖတ်ရှုခြင်းက ဘဝကို အဓိပ္ပာယ်ရှိစေတဲ့အတွက် အဲဒီအစီအစဉ်ကို နေ့တိုင်းလုပ်ဆောင်သွားဖို့ ဟောပြောသူက သင်တန်းဆင်းတွေကို လှိုက်လှိုက်လှဲလှဲ အားပေးသွားပါတယ်။

‘ယေဟောဝါဘုရားသခင်ကို ကြောက်ရွံ့သောစိတ်ရှိပါ’

အုပ်ချုပ်ရေးအဖွဲ့ဝင် အန်တိုနီ မောရစ္စက ‘ယေဟောဝါဘုရားသခင်ကို ကြောက်ရွံ့သောစိတ်’ ဆိုတဲ့ ကျမ်းစကားရဲ့ အဓိပ္ပာယ်ကို ရှင်းပြသွားတယ်။ (၆ ရာ. ၁၉:၇) ဘုရားသခင်ကို ကြောက်ရွံ့ပါလို့ပြောတဲ့အခါ သေမတတ် ထိတ်လန့်ကြောက်ရွံ့ဖို့ ပြောနေတာမဟုတ်ပါဘူး။ လူတစ်ဦးကို တုန်လှုပ်သွားစေသလိုမျိုး စိတ်ရင်းမှန်နဲ့ အလွန့်အလွန် ရိုသေလေးစားခြင်း၊ မှန်ကန်ရာကို ထက်ထက်သန်သန် လုပ်ဆောင်ချင်တဲ့ ဆန္ဒတို့ကို ဆိုလိုတယ်။ “သင်တို့ရဲ့ တာဝန်ကို အဲလိုကြောက်ရွံ့တဲ့စိတ်မျိုးနဲ့ ထမ်းဆောင်ပါ” လို့ညီအစ်ကို မောရစ္စက သင်တန်းဆင်းတွေကို အလေးအနက် တိုက်တွန်းသွားတယ်။ ဘုရားသခင်ကို အဲဒီလိုကြည်ညိုလေးမြတ်မှုမျိုး ဘယ်လိုပြသနိုင်မလဲ။  လက်တွေ့ကျတဲ့ နည်းနှစ်နည်းကို ဟောပြောသူက အလေးပေး ဖော်ပြသွားတယ်။

ပထမ၊ ယာကုပ် ၁:၁၉ မှာပါတဲ့ ‘နားထောင်ခြင်း၌ လျင်မြန်ရမည်။ စကားပြောခြင်း၌ နှေးရမည်’ ဆိုတဲ့ အကြံပေးချက်ကို သင်တန်းဆင်းတွေ လက်တွေ့ကျင့်သုံးကြဖို့ ညီအစ်ကို မောရစ္စက အားပေးသွားတယ်။ သင်တန်းဆင်းတွေဟာ သင်တန်းကာလ ငါးလအတွင်းမှာ အများကြီး သင်ယူလေ့လာခဲ့ကြတယ်။ ဒါပေမဲ့ တာဝန်ကျတဲ့နိုင်ငံမှာ သင်ယူခဲ့ရာတွေကို ကြွားဝါပြီး မထုတ်ဖော်ဖို့ ဂရုစိုက်ရမယ်ဆိုပြီးတော့လည်း ပြောသွားခဲ့တယ်။ “အရင်ဆုံး နားထောင်ရမယ်။ သင်တာဝန်ကျတဲ့နိုင်ငံက ဦးဆောင်သူတွေနဲ့ အသင်းတော်ရဲ့စကားကို နားထောင်ပါ။ သူတို့ရဲ့နိုင်ငံအကြောင်း၊ သူတို့ရဲ့ယဉ်ကျေးမှုအကြောင်း ပြောပြတာတွေကို နားထောင်ပါ။ ‘ကျွန်တော်/ကျွန်မ မသိဘူး’ လို့ပြောဖို့ မတွန့်ဆုတ်ပါနဲ့။ သင့်ရဲ့အသိပညာက အကျိုးရှိပြီး ထိရောက်နေရင်တောင် များများသင်ယူလေ ကိုယ်သိထားတာက ဘာမှမဟုတ်ဘူးဆိုတာ သိရလေပဲ” လို့ညီအစ်ကိုက ပြောသွားတယ်။

ဒုတိယ၊ “ငွေစစ်စရာဖို့ မိုက်ရှိ၏။ ရွှေစစ်စရာဖို့ မီးဖိုရှိ၏။ လူကိုစစ်စရာဖို့ သူတစ်ပါးချီးမွမ်းခြင်းရှိ၏” ဆိုတဲ့ကျမ်းပိုဒ်ကို ညီအစ်ကိုမောရစ္စက ဖတ်ပြတယ်။ (သု. ၂၇:၂၁) ရွှေငွေတွေကို သန့်စင်ဖို့လိုအပ်သလို ကျွန်ုပ်တို့လည်း ချီးမွမ်းစကားနဲ့ သန့်စင်ခံရနိုင်တယ်လို့ သူက ရှင်းပြတယ်။ ဘယ်လိုနည်းအားဖြင့်လဲ။ ချီးမွမ်းခံရခြင်းက လူတစ်ဦးရဲ့ ပင်ကိုစရိုက်နဲ့ပတ်သက်ပြီး စမ်းသပ်မှုဖြစ်စေနိုင်တယ်။ အဲဒါက မာနတက်စေနိုင်ပြီး ဘုရားသခင်နဲ့ဆက်ဆံရေး ပျက်ပြားသွားစေနိုင်တယ်။ ဒါမှမဟုတ် ကျွန်ုပ်တို့ရရှိထားတဲ့ ပင်ကိုစွမ်းရည်တွေအတွက် ဘုရားသခင်ကို ကျေးဇူးတင်ရမယ်ဆိုတာကို အသိအမှတ်ပြုဖို့၊ ကိုယ်တော်ရဲ့စံနှုန်းတွေနဲ့အညီ နေထိုင်မယ်ဆိုတဲ့ ဆုံးဖြတ်ချက်ကို ပိုမိုခိုင်မာစေဖို့ လှုံ့ဆော်ပေးနိုင်တယ်။ ဒါကြောင့် ရရှိလာနိုင်တဲ့ ဘယ်ချီးမွမ်းမှုကိုမဆို နည်းမှန်လမ်းကျ ခံယူသွားရမယ်လို့ သင်တန်းဆင်းတွေကို ညီအစ်ကို မောရစ္စက အားပေးသွားတယ်။ ‘ယေဟောဝါဘုရားသခင်ကို ကြောက်ရွံ့တဲ့စိတ်’ ကိုယ့်မှာ ရှိတယ်ဆိုတာကို သက်သေထူဖို့ ချီးမွမ်းခံရခြင်းကို အခွင့်အရေးတစ်ရပ်အနေနဲ့ ရှုမြင်ဖို့လည်း အားပေးသွားတယ်။

“သင့်ရဲ့တာဝန်ကို မြတ်နိုးပါ”

အုပ်ချုပ်ရေးအဖွဲ့ဝင်တစ်ဦးဖြစ်တဲ့ ဂိုင်ပီယပ်စ်က အစီအစဉ်ရဲ့ အဓိကဟောပြောချက်ကို တင်ဆက်သွားတယ်။ တခြားနိုင်ငံတွေဆီ လူတွေစေလွှတ်ပြီး တာဝန်အမျိုးမျိုး ထမ်းဆောင်စေတာမျိုးရှိတယ်။ အတော်များများက ဆေးဝါးကုသဖို့၊ ကမ္ဘာ့ပြဿနာတွေကို ဖြေရှင်းပေးဖို့ပဲ အာရုံစိုက်ကြတယ်။ “သင်တို့ကတော့ သူတို့နဲ့မတူပါဘူး” လို့သူကပြောတယ်။ ဘယ်လိုနည်းအားဖြင့်လဲ။

သင်တန်းဆင်းတွေဟာ ကျမ်းစာလေ့လာတဲ့အခါ ကာယရေးကုသမှုနဲ့ပတ်သက်တဲ့ ကျမ်းစာမှတ်တမ်း အတော်များများကို သုံးသပ်ခဲ့ကြပါတယ်။ မိန်းကလေးတစ်ယောက် အသက်ပြန်ရှင်လာအောင် ယေရှုလုပ်ပေးခဲ့တုန်းက မိန်းကလေးရဲ့ မိဘတွေဟာ “အလွန်အံ့သြမိန်းမော” ခဲ့ကြတယ်။ (မာကု ၅:၄၂) အဲဒီလိုပဲ မျက်မမြင်တဲ့သူတွေကို ကိုယ်တော် အံ့ဖွယ်နည်းနဲ့ ကုသပေးခဲ့တုန်းက သူတို့တတွေ အရမ်းဝမ်းသာခဲ့ကြတယ်။ အဲလိုအံ့ဖွယ်အမှုတွေလုပ်ရတဲ့ အကြောင်းရင်းတစ်ခုက ကျွန်ုပ်တို့ကို ကမ္ဘာသစ်ကျရင် ခရစ်တော် လုပ်ဆောင်ပေးဦးမယ့်အရာတွေကို သိရှိစေဖို့ဖြစ်ပါတယ်။ လက်ရှိအစီအစဉ်စနစ်ဆိုးကို ကပ်ကျော်ကြမယ့် ဖြောင့်မတ်တဲ့ “လူအုပ်ကြီး” ဟာ ကမ္ဘာသစ်မှာ ရောဂါအမျိုးမျိုး ကုသခံရပါတော့မယ်။ (ဗျာ. ၇:၉၊ ၁၄) ပြန်အသက်ရှင်လာကြတဲ့ ချစ်မြတ်နိုးရသူတွေရော သူတို့ကို ကြိုဆိုခွင့်ရတဲ့သူတွေပါ ကျန်းမာနေကြပါလိမ့်မယ်။ အဲဒီအခါကျရင် အားလုံး ဘယ်လောက်တောင် ပျော်ရွှင်နေကြမယ်ဆိုတာကို မြင်ယောင်ကြည့်နိုင်တယ်။

ဒါပေမဲ့ ညီအစ်ကိုပီယပ်စ် ရှင်းပြတဲ့အတိုင်း ကျန်းမာရေးကုသမှုက အရေးကြီးဆုံးအရာ မဟုတ်ပါဘူး။ ယေရှု ကုသပေးခဲ့တဲ့ လူမမာတွေဟာ နေထိုင်မကောင်း ပြန်ဖြစ်ကြတယ်။ အသက်ပြန်ရှင်လာတဲ့ လူသေတွေလည်း ပြန်သေသွားကြတယ်။ အဲဒါတွေထက် ဘုရားသခင်နဲ့ ပြန်လည်သင့်မြတ်ပြီး ဆက်ဆံရေးကောင်းရှိဖို့ဆိုတဲ့ ပိုပြီးအရေးကြီးတဲ့အရာကို ယေရှု လုပ်ဆောင်ခဲ့တယ်။ ဂိလဒ်သင်တန်းဆင်းတွေလည်း အဲလိုတာဝန်မျိုး ရရှိထားကြတယ်။ ဘုရားသခင်ရဲ့အမြင်မှာ လူတွေ ပြန်အသက်ရှင်လာဖို့ သူတို့ကို ဘုရားသခင်နဲ့ ပြန်လည်သင့်မြတ်အောင် ကူညီပေးကြတယ်။ ဘုရားသခင်နဲ့ ဆက်ဆံရေးကောင်းရှိတဲ့သူတွေပဲ ထာဝရအသက်ရရှိမှာဖြစ်တယ်။ “လူတွေ ဘုရားသခင်နဲ့ဆက်ဆံရေးကောင်းရှိအောင် ကူညီပေးတာက ဘုရားသခင်ကို ချီးမွမ်းတာဖြစ်တယ်။ အဲဒီလိုလုပ်တာက သင်တို့ရဲ့လုပ်ငန်းကို အောင်မြင်စေပါတယ်” လို့ညီအစ်ကို ပီယပ်စ်က ပြောသွားတယ်။

အစီအစဉ်မှ နောက်ထပ် ပေါ်လွင်ချက်သုံးခု

“ဒီနေ့က မင်္ဂလာရှိတဲ့နေ့ တစ်နေ့လား” ဒီအချိန်ကိုက်မေးခွန်းကို အမေရိကန်ဌာနခွဲ ကော်မတီဝင်တစ်ဦးဖြစ်တဲ့ ရောဘတ် ရိန်းစ်က မေးသွားတယ်။ ကိုယ့်ရဲ့အချိန်ကို ပညာရှိရှိ သုံးစွဲခြင်း၊ စိုးရိမ်ပူပန်မှုတွေ ရင်ဆိုင်ရတဲ့အခါ ကျမ်းစာဖတ်ရှုလေ့လာခြင်း၊ ဘုရားသခင်ဆီ အားကိုးတကြီးနဲ့ ဆုတောင်းခြင်းအားဖြင့် တာဝန်ထမ်းဆောင်တဲ့ နေ့ရက်တိုင်းကို မင်္ဂလာရှိတဲ့နေ့ ဖြစ်စေပါလို့ သင်တန်းဆင်းတွေကို သူအားပေးသွားတယ်။

“အဟောင်းကို အသစ်ဖြစ်စေမလား” ဂိလဒ်သင်တန်းပို့ချသူ မာ့ခ်နူမာရ်က သူ့ရဲ့ဟောပြောချက်မှာ အဲဒီမေးခွန်း မေးသွားတယ်။ ၁ ယောဟန် ၂:၇၊ ၈ မှာ တမန်တော်ယောဟန် ဖော်ပြထားတဲ့  “ပညတ်ဟောင်း” က “ပညတ်သစ်” လည်းဖြစ်တယ်ဆိုပြီး ဆွေးနွေးသွားတယ်။ အဲဒီဖော်ပြချက်နှစ်ခုစလုံးက ခရစ်တော်ရဲ့နောက်လိုက်တွေဟာ ကိုယ်ကျိုးစွန့်စိတ်ဓာတ်နဲ့ အချင်းချင်းကို ချစ်ရမယ်ဆိုတဲ့ ပညတ်တစ်ခုတည်းကိုပဲ ရည်ညွှန်းတယ်။ (ယောဟန် ၁၃:၃၄၊ ၃၅) အဲဒီမိန့်မှာချက်ကို ဆယ်စုနှစ်များစွာကတည်းက ခရစ်တော်ကိုယ်တိုင် မိမိရဲ့နောက်လိုက်တွေကို ပြောခဲ့တာဖြစ်တယ်။ အဲဒီမိန့်မှာချက်က အသစ်အဆန်းမဟုတ်ပေမဲ့ စိန်ခေါ်ချက်အသစ်တွေနဲ့ ရင်ဆိုင်နေရတဲ့ ကနေ့ခေတ် ခရစ်ယာန်တွေအတွက် အဲဒီမိန့်မှာချက်က အသစ်ဖြစ်သွားပြီး မေတ္တာကို နောက်တစ်နည်းနဲ့ တင်ပြဖို့ လိုအပ်လာတယ်။ ခရစ်ယာန်သာသနာပြုတွေလည်း အခြေအနေအသစ်တွေနဲ့ ရင်ဆိုင်ရပြီး မေတ္တာကို နည်းလမ်းအသစ်တွေနဲ့ ပြသတတ်ဖို့ လိုအပ်ပါတယ်။ အဲလိုလုပ်ဖို့အတွက် သော့ချက်က ဘာလဲ။

“သူတစ်ပါးရဲ့လုပ်ရပ်ကို ကိုယ်မကြိုက်ဘူးဆိုရင် သူ့အတိုင်း လိုက်မလုပ်ပါနဲ့” လို့ညီအစ်ကို နူမာရ်က တိုက်တွန်းသွားတယ်။ ကိုယ်မကြိုက်တဲ့ အပြုအမူကို သူများလုပ်နေတာ တွေ့တဲ့အခါ အဲဒီအတိုင်း လိုက်လုပ်မယ်ဆိုရင် ကိုယ်ပဲ ထိခိုက်လိမ့်မယ်လို့ သူသတိပေးသွားတယ်။ အဲလိုစိန်ခေါ်ချက်တွေကို နည်းလမ်းအသစ်တွေ ရှာဖွေပြီး မေတ္တာပြခြင်းအားဖြင့် တုံ့ပြန်သွားမယ်ဆိုရင် “စစ်မှန်သောအလင်းတော်” ကိုထွန်းလင်းရာရောက်တယ်။

“ဝန်ကိုထမ်းပါ။” လက်တွေ့ကျတဲ့ ဒီခေါင်းစဉ်ကို ဂိလဒ်သင်တန်းပို့ချသူ နောက်တစ်ဦးဖြစ်တဲ့ မိုက်ကယ် ဘားနက်က ဟောပြောသွားတယ်။ အာဖရိကနိုင်ငံသားတွေဟာ လေးလံတဲ့ ဝန်ထုပ်တွေကို သူတို့ခေါင်းပေါ် ရွက်သွားကြတယ်လို့ သူကပြောပြတယ်။ သက်သောင့်သက်သာနဲ့ ဟန်ချက်ညီညီ လမ်းလျှောက်သွားနိုင်အောင် အာဖရိကစကားနဲ့ ကာတာလို့ခေါ်တဲ့ ခေါင်းခုကို ခုထားကြတယ်။ ဂိလဒ်သင်တန်းဆင်းတွေဟာ တိုင်းတစ်ပါးမှာ လေးလံတဲ့ဝန်ထုပ်နဲ့တူတဲ့ တာဝန်ကြီးတွေကို ထမ်းဆောင်ရပါလိမ့်မယ်။ ဒါပေမဲ့ သူတို့ဟာ ခေါင်းခုနဲ့တူတဲ့ ငါးလတာ ကျမ်းစာအခြေပြုသင်တန်းကို တက်ရောက်ထားပြီးဖြစ်ပါတယ်။ ဒါကြောင့် သင်ယူခဲ့ရာတွေကို လက်တွေ့ကျင့်သုံးမယ်ဆိုရင် ကိုယ့်ရဲ့တာဝန်ကို ဟန်ချက်ညီညီ ထိထိရောက်ရောက် ထမ်းဆောင်နိုင်မှာဖြစ်တယ်။

တွေ့ကြုံမှုများနဲ့ လူတွေ့မေးမြန်းခန်းများ

ဂိလဒ်သင်တန်းမှာ ယေဟောဝါသက်သေတွေရဲ့ ဒေသန္တရအသင်းတော်နဲ့အတူ လူတွေကို ဟောပြောသွန်သင်ရတဲ့အချိန်လည်း ပါတယ်။ သီအိုကရက်တစ်ကျောင်းဌာန ကြီးကြပ်မှူးဖြစ်တဲ့ ဝီလျံ ဆဲမြူရယ်စန်က “မကြဲဘဲမနေနှင့်” ဆိုတဲ့ ခေါင်းစဉ်အောက်မှာ သင်တန်းဆင်းတွေရဲ့ တွေ့ကြုံမှုတချို့ကို ပြန်လည်သုံးသပ်သွားတယ်။ (ဒေ. ၁၁:၆) သင်တန်းဆင်းတွေဟာ လေယာဉ်ပျံတွေပေါ်မှာ၊ စားသောက်ဆိုင်တွေမှာ၊ ဓာတ်ဆီဆိုင်တွေမှာ အခွင့်အရေးရှာယူ သတင်းကောင်းဟောပြောရင်း ဘုရားသခင့်လုပ်ငန်းတော်မှာ ဝီရိယရှိရှိ ပါဝင်လုပ်ဆောင်ခဲ့ပုံတွေကို သဘာဝကျကျ ပြန်လည်သရုပ်ဖော် ပြသကြတယ်။ တစ်အိမ်မှတစ်အိမ်၊ အလွတ်သဘောအပြင် စာတွေနဲ့လည်း သက်သေခံခဲ့ကြတယ်။ ဘုရားသခင့်လုပ်ငန်းတော်မှာ မပြတ်တမ်း ပါဝင်လုပ်ဆောင်ခဲ့တဲ့အတွက် ရလဒ်ကောင်းတွေ ရရှိခဲ့ကြတယ်။

ဂိလဒ်အမှုထမ်းတစ်ဦးဖြစ်တဲ့ ကဲနက် စတိုဗာလ်က ခရစ်ယာန်သာသနာပြုလုပ်ငန်းမှာ အတွေ့အကြုံရှိ ညီအစ်ကိုသုံးယောက်ဖြစ်တဲ့ ဘာရီ ဟီလ်၊ အက်ဒီ မော်ဘလီနဲ့ တက် ဟန်စ်ဘာဂါတို့ကို လူတွေ့မေးမြန်းခဲ့တယ်။ ဘာရီဟီလ်က အီကွေဒေါနဲ့ ဒိုမီနီကန်သမ္မတနိုင်ငံတွေမှာ၊ အက်ဒီ မော်ဘလီက ကုတ်ဒီအဗွားနိုင်ငံမှာ၊ တက် ဟန်စ်ဘာဂါက စီနီဂဲလ်၊ ဘီနင်နဲ့ ဟေတီနိုင်ငံတွေမှာ အမှုဆောင်ခဲ့တယ်။ သူတို့သုံးယောက်စလုံးက “ယေဟောဝါဘုရားသခင်ကို စမ်းသပ်ပြီး ဆုကျေးဇူးတွေ ရိတ်သိမ်းပါ” ဆိုတဲ့ အဓိကအကြောင်းကို ဖွဲ့နွဲ့ပြီး အဆင့်ဆင့် တင်ပြသွားခဲ့ကြတယ်။ (မာလခိ ၃:၁၀) ဥပမာ၊ ပူပြင်းပြီး ဖုန်တထောင်းထောင်း ထနေရာကနေ ပူပြင်းပြီး ရွှံ့ဗွက်ထူတဲ့အထိ ပြောင်းလဲသွားတတ်တဲ့ အီကွေဒေါနိုင်ငံရဲ့ ရာသီဥတုနဲ့ အလိုက်အထိုက်နေထိုင်ဖို့ စိန်ခေါ်ချက်ကို သူတို့ဇနီးမောင်နှံ ဘယ်လိုရင်ဆိုင်ခဲ့တဲ့အကြောင်း ညီအစ်ကို ဟီလ်က ပြန်ပြောပြတယ်။ သူတို့ဟာ နှစ်နှစ်ခွဲကြာတဲ့အထိ ပုံးတွေနဲ့ ရေခပ်ပြီး ရေချိုးခဲ့ရတယ်။ အဲဒါက သူတို့အတွက် ခက်ခဲတဲ့ အခြေအနေဖြစ်ပေမဲ့ အဲဒီနိုင်ငံကနေ ထွက်ခွာဖို့ ဘယ်တော့မှ မစဉ်းစားခဲ့ကြဘူး။ သူတို့ရရှိထားတဲ့ တာဝန်က ဘုရားသခင်ဆီက ရရှိတဲ့ ဆုကျေးဇူးတစ်ခုဖြစ်တယ်လို့ သူတို့ ယူမှတ်ကြတယ်။ “အဲဒါက ကျွန်တော်တို့ရဲ့ အသက်မွေးဝမ်းကျောင်းလုပ်ငန်းဖြစ်ပြီး အရမ်းတန်ဖိုးထားတယ်” လို့ သူပြောသွားတယ်။

အစီအစဉ်ရဲ့ နိဂုံးပိုင်းမှာ သင်တန်းဆင်းတစ်ဦးက လှိုက်လှိုက်လှဲလှဲ ကျေးဇူးတင်ကြောင်း ဖော်ပြထားတဲ့စာကို အားလုံးရဲ့ကိုယ်စား ဖတ်ပြသွားတယ်။ “တစ်ခါမှ မရရှိခဲ့တဲ့ ယုံကြည်ခြင်းမျိုးကို ကျွန်ုပ်တို့ရရှိခဲ့တယ်။ ဒါပေမဲ့ လေ့ကျင့်ခံရမှုက မပြီးဆုံးသေးပါဘူး” လို့ စာထဲမှာ ဖော်ပြထားတယ်။ သင်တန်းဆင်းတွေကို ဒီပလိုမာ ပေးအပ်ချီးမြှင့်ပြီး နိုင်ငံအသီးသီးကို တာဝန်ချပေးလိုက်တယ်။ ရှေ့ဆက်ရမယ့် ဘဝခရီးမှာ အထူးသဖြင့် စိန်ခေါ်ချက်တွေ ရင်ဆိုင်ရတဲ့အခါ ဘုရားသခင်ရဲ့အကူအညီကို ရရှိနိုင်တယ်ဆိုပြီး ညီအစ်ကို ဂျက်ဆင်က သင်တန်းဆင်းတွေကို အားပေးရင်း အစီအစဉ်ကို နိဂုံးချုပ်လိုက်တယ်။ တက်ရောက်သူအားလုံးကလည်း မျှော်လင့်ချက်ကြီးစွာနဲ့ ပျော်ရွှင်စွာ ထွက်ခွာသွားကြတယ်။ ကောင်းမြတ်တဲ့လုပ်ငန်းကို ပြီးမြောက်စေဖို့ ခရစ်ယာန်သာသနာပြု အသစ်တွေကို ဘုရားသခင် အသုံးပြုသွားမယ်ဆိုတာ သေချာပါတယ်။

 [စာမျက်နှာ ၃၁ ပါဇယားနှင့်မြေပုံ]

သင်တန်းဆိုင်ရာ အချက်အလက်များ

ကိုယ်စားပြုနိုင်ငံပေါင်း ၉

ပျမ်းမျှ အသက် ၃၄.၀

ပျမ်းမျှ နှစ်ခြင်းခံသက်တမ်း ၁၈.၆

ပျမ်းမျှ အချိန်ပြည့်အမှုဆောင်သက်တမ်း ၁၃.၁

[မြေပုံ]

(ကားချပ်အပြည့်အစုံကို စာစောင်တွင်ကြည့်ပါ)

သင်တန်းဆင်းတွေရဲ့ တာဝန်ကျနိုင်ငံတွေက အောက်ပါအတိုင်း ဖြစ်ပါတယ်

တာဝန်ကျနိုင်ငံများ

အာဂျင်တီးနား

အာမေးနီးယား

ဘာကီနာဖာဆို

ဘရွန်ဒီ

ကွန်ဂို (ကင်ရှာဆာ)

ချက်ပြည်သူ့သမ္မတနိုင်ငံ

ဟေတီ

ဟောင်ကောင်

အင်ဒိုနီးရှား

ကင်ညာ

လစ်သူယေးနီးယား

မလေးရှား

မိုဇမ်ဘစ်

နီပေါ

ပါပူဝါ နယူးဂီနီ

ရိုမေးနီးယား

စီနီဂဲလ်

တန်ဇန်းနီးယား

ယူဂန္ဓာ

ဇင်ဘာဘွေ

[စာမျက်နှာ ၃၁ ပါရုပ်ပုံ]

ဂိလဒ်ကင်းမျှော်စင် သမ္မာကျမ်းစာသင်တန်း၏ ၁၃၀ ကြိမ်မြောက် သင်တန်းဆင်းပွဲ

အောက်ပါစာရင်းမှာ အတန်းတွေကို ရှေ့တန်းမှ နောက်တန်းကို ရေတွက်ပြီး နာမည်တွေကို လက်ဝဲမှ လက်ယာဘက်ကို စီထားပါတယ်။

(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.

(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.

(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.

(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.

(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.

(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.

(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.