၁၃၁ ကြိမ်မြောက် ဂိလဒ်သင်တန်းဆင်းပွဲ

“ယေဟောဝါဘုရားသခင်ကို ရွှင်ပြုံးစေပါ”

မိသားစုဝင်တွေ၊ မိတ်ဆွေတွေနဲ့ တခြားသူတွေဟာ ၂၀၁၁၊ စက်တင်ဘာ ၁၀ ရက်နေ့မှာ ကျင်းပခဲ့တဲ့ ဂိလဒ်ကင်းမျှော်စင် သမ္မာကျမ်းစာသင်တန်းရဲ့ ၁၃၁ ကြိမ်မြောက် သင်တန်းဆင်းပွဲမှာ စုရုံးခဲ့ကြပါတယ်။ အဲဒီနေ့ရဲ့ အစပိုင်းမှာ ဟောပြောသူတွေရော သင်တန်းသားတွေပါ အထူးအစီအစဉ်အတွက် စိတ်လှုပ်ရှားခဲ့ကြရပါတယ်။ အစီအစဉ်ရဲ့ နိဂုံးပိုင်းရောက်မှ တက်ရောက်သူ ၉,၀၆၃ ယောက်ဟာ ဟောပြောချက်တွေ၊ သရုပ်ပြတွေနဲ့ လူတွေ့မေးမြန်းခန်းတွေကို ကြားနာရှုစားခဲ့ရတဲ့အတွက် ပြုံးပျော်ခဲ့ကြရပါတယ်။

ယေဟောဝါသက်သေတွေရဲ့ အုပ်ချုပ်ရေးအဖွဲ့ဝင်တစ်ဦးလည်းဖြစ်၊ အစီအစဉ်သဘာပတိလည်းဖြစ်တဲ့ ညီအစ်ကို စတီဗင် လက်တ်က အဖွင့်ဟောပြောချက်ကို ပေးသွားပါတယ်။ ညီအစ်ကိုက ယေဟောဝါဘုရားသခင်မှာ ကိုယ်ခန္ဓာတစ်ခုရှိနေတဲ့အလား ရည်ညွှန်းထားတဲ့ ကျမ်းပိုဒ်တွေကို ဆန်းစစ်ပြသွားတယ်။ ဘုရားသခင်ဟာ ပုံဆောင် မျက်စိ၊ နား၊ လက်နဲ့ လက်မောင်းတွေကို ဘယ်လိုအသုံးပြုသွားတယ်ဆိုတာ ဆွေးနွေးထားတဲ့ အခန်းငယ်တွေကို အဓိကထားပြီး ဟောပြောသွားပါတယ်။

ဦးဆုံး၊ ဟောပြောသူက ၆ ရာ. ၁၆:၉ [သမ္မာ] ကို သုံးသပ်သွားတယ်။ အဲဒီကျမ်းချက်မှာ ယေဟောဝါဘုရားသခင်ဟာ “စုံလင်သော စိတ်နှလုံးရှိသူတို့ဘက်တွင် တန်ခိုးတော်ပြတော်မူခြင်းငှာ မျက်စိတော်သည် လျင်မြန်၍ မြေကြီးတစ်ပြင်လုံးကို တစ်ပြိုင်နက်နှံ့အောင် ကြည့်ရှုလျက်ရှိ၏” ဆိုပြီး ဖော်ပြထားတယ်။ သင်တန်းသားတွေဟာ ဘုရားသခင်အပေါ် လုံးလုံးဆည်းကပ်ဝတ်ပြုတဲ့ နှလုံးကို ထိန်းသိမ်းဖို့ အားပေးခံရကြပါတယ်။ လူတွေရဲ့ ကောင်းကွက်တွေကို ကြည့်ခြင်းအားဖြင့် ဘုရားသခင်ကို တုပနိုင်တဲ့အကြောင်းလည်း သိရှိခဲ့ရပါတယ်။ ညီအစ်ကို လက်တ်ဟာ နောက်ကျမ်းချက်တစ်ချက်ဖြစ်တဲ့ ၁ ပေတရု ၃:၁၂ ကိုသုံးသပ်ခဲ့တယ်။ အဲဒီကျမ်းချက်မှာ ဘုရားသခင်ရဲ့ နားတော်က ဖြောင့်မတ်သူတွေရဲ့ တိုးလျှိုးအသနားခံချက်ကို နားထောင်ပေးတယ်လို့ ဖော်ပြထားပါတယ်။ ဘုရားသခင်ဟာ မိမိတို့ရဲ့ ဆုတောင်းချက်တွေကို တကယ်ပဲ နားထောင်ပေးလိုတယ်ဆိုတာ သတိရပြီး ဆက်ဆုတောင်းနေဖို့ သင်တန်းသားတွေကို ညီအစ်ကိုက တိုက်တွန်းသွားပါတယ်။

ဒါ့အပြင် “သင်၏ဘုရားသခင်ထာဝရဘုရားက ‘မစိုးရိမ်နှင့်။ ငါ မစမည်’ ဟုသင့်အားဆိုလျက် သင်၏လက်ယာလက်ကို ကိုင်မည်” ဆိုတဲ့ ဟေရှာယ ၄၁:၁၃ ကို ဟောပြောသူက ဆန်းစစ်သွားတယ်။ “စိတ်နှလုံးကို ထိမိစေတဲ့ ယေဟောဝါဘုရားသခင်ရဲ့ အဲဒီစကားကို သတိပြုကြည့်ပါ။ ကိုယ်တော်ဟာ ကျွန်တော်တို့ရဲ့လက်ကို လှမ်းကိုင်စွဲထားတယ်” ဆိုပြီး ညီအစ်ကို လက်တ်က လှိုက်လှိုက်လှဲလှဲ ပြောသွားတယ်။ အဲဒီနောက် ဘုရားသခင်ကို အမြဲ ကူညီခွင့်ပြုဖို့၊ ကိုယ်တော်ရဲ့ အကူအညီကို ဘယ်တော့မှ မငြင်းပယ်ဖို့ သင်တန်းသားတွေကို ပြောကြားသွားတယ်။ ဒါ့အပြင် သင်တန်းသားတွေဟာ တခြားသူတွေကို လက်ကမ်းကူညီပေးခြင်းအားဖြင့် ဘုရားသခင်ကို တုပနိုင်တယ်ဆိုပြီးတော့လည်း ပြောကြားသွားပါတယ်။

နိဂုံးပိုင်းရောက်တော့ ညီအစ်ကို လက်တ်က ဟေရှာယ ၄၀:၁၁ [သမ္မာ] ကိုဖတ်ပြတယ်။ ညီအစ်ကိုက ပရိသတ်ကို အဲဒီကျမ်းချက်မှာ ဖော်ပြထားတဲ့ ချစ်ခင်တွယ်တာမှုကို မြင်ယောင်ကြည့်ခိုင်းတယ်။ “ယေဟောဝါက သူ့လက်ရုံးတော်နဲ့ ကျွန်တော်တို့ကို စုသိမ်းတယ်။ သူ့ရင်ခွင်မှာ ပိုက်ပွေ့ထားတယ်” လို့ညီအစ်ကိုက ပြောတယ်။ ဒါကို ဘယ်လိုတုံ့ပြန်သင့်သလဲ။ သင်တန်းသားတွေဟာ သိုးသငယ်လို နူးညံ့သိမ်မွေ့မှသာ ယေဟောဝါက သူတို့ကို ရင်ခွင်မှာ ပိုက်ပွေ့ထားချင်မှာဖြစ်တယ်လို့ ဟောပြောသူက ပြောကြားသွားပါတယ်။

“မြေအိုးများတွင် ထည့်ထားသော ဤဘဏ္ဍာသည် ငါတို့၌ ရှိ”

အုပ်ချုပ်ရေးအဖွဲ့ဝင် ဒေးဗစ် စပလိန်းက ကျမ်းစာကနေ ကောက်နုတ်ထားတဲ့ အဓိကအကြောင်းအရာကို ဆန်းစစ်သွားတယ်။ (၂ ကောရိန္သု ၄:၇) ဘဏ္ဍာဆိုတာ ဘာလဲ။ အဲဒါက အသိပညာလား၊ ဉာဏ်ပညာလား။ ဘယ်တစ်ခုမှ မဟုတ်ဘူးလို့ ဟောပြောသူက ဖြေဆိုတယ်။ တမန်တော်ပေါလု ပြောနေတဲ့ ဘဏ္ဍာဆိုတာ ‘အမှန်တရားကို ထင်ရှားစေခြင်း’ ဖြစ်တဲ့ ဘုရားသခင့်အမှုတော်ထမ်းဆောင်ခြင်းဖြစ်တယ်။ (၂ ကောရိန္သု ၄:၁၊ ၂၊ ၅) ငါးလကြာ သင်တန်းတက်ခဲ့ကြတဲ့ သင်တန်းသားတွေဟာ ဒီအလုပ်မှာ အထူးတာဝန်ထမ်းဆောင်ဖို့ အသင့်ပြင်ဆင်ခဲ့ကြတယ်ဆိုပြီး ညီအစ်ကို စပလိန်းက ပြောကြားသွားတယ်။ အဲဒီတာဝန်က အလွန်လေးမြတ်တန်ဖိုးထားရမယ့်အရာ ဖြစ်တယ်။

ဟောပြောသူက “မြေအိုး” ဆိုတာ ကိုယ်ခန္ဓာကို ပြောခြင်း ဖြစ်တယ်လို့ ရှင်းပြတယ်။ မြေနဲ့လုပ်ထားတဲ့အိုးနဲ့ ရွှေနဲ့လုပ်ထားတဲ့အိုးရဲ့ ကွာခြားချက်ကို ညီအစ်ကိုက ပြောပြတယ်။ အများအားဖြင့် ရွှေနဲ့လုပ်ထားတဲ့အိုးတွေကို သုံးခဲပါတယ်။ မြေနဲ့လုပ်ထားတဲ့အိုးတွေကိုကျတော့ တွင်တွင်ကျယ်ကျယ် အသုံးပြုကြပါတယ်။ ရွှေအိုးထဲမှာ ဘဏ္ဍာထည့်ထားမယ်ဆိုရင် အထဲမှာရှိတဲ့ဘဏ္ဍာထက် ရွှေအိုးကိုပဲ ပိုအာရုံစိုက်မိနိုင်တယ်။ ဒါကြောင့် “သင်တို့ဟာ ကိုယ့်အပေါ် လူတွေအာရုံစိုက်လာ အောင် လုပ်ချင်ကြမှာ မဟုတ်ပါဘူး။ ခရစ်ယာန်သာသနာပြုတွေဖြစ်တဲ့ သင်တို့ဟာ လူတွေကို ယေဟောဝါဆီ လမ်းညွှန်ပေးချင်ကြမှာပါ။ သင်တို့ဟာ ကျိုးနွံမှုရှိတဲ့ မြေအိုးတွေဖြစ်ကြပါတယ်” လို့ ညီအစ်ကို စပလိန်းက ပြောကြားသွားပါတယ်။

ဟောပြောသူဟာ ရွှေအိုးနဲ့မြေအိုးတို့ရဲ့ ကွာခြားချက်ကို ဆက်ပြောပြတယ်။ ရှေးအချိန်တုန်းက မီးဒဏ်ခံနိုင်တဲ့ မြေအိုးတချို့ရှိသလို လွယ်လွယ်နဲ့ မပဲ့နိုင်အောင် ပြုလုပ်ထားတဲ့ စဉ့်ရည်သုတ်အိုးတွေလည်း ရှိတယ်လို့ ဟောပြောသူက ပြောပြတယ်။ ခရစ်ယာန်သာသနာပြုတွေဟာ ဘယ်လိုနည်းနဲ့ မြေအိုးတွေနဲ့ တူပါသလဲ။ ငါးလကြာ သင်တန်းကာလအတွင်းမှာ သင်တန်းသားတွေဟာ အခက်အခဲတချို့ တွေ့ကြုံရနိုင်ပြီး အဲဒီအခက်အခဲတွေက သူတို့ကို စဉ့်ရည်သုတ်ထားတဲ့ အိုးတွေလို ခံနိုင်ရည်ရှိလာစေမယ်ဆိုတာ သေချာပါတယ်။ သူတို့ဟာ ဆတ်ဆတ်ထိမခံတဲ့သူတွေ၊ စိတ်ဆိုးလွယ်တဲ့သူတွေ ဖြစ်လာမှာမဟုတ်ပါဘူး။ “သင်တို့ ထင်ထားတာထက်တောင် ပိုပြီးခံနိုင်ရည်ရှိလာတာကို တွေ့ရပါလိမ့်မယ်” လို့ ညီအစ်ကို စပလိန်းက ပြောကြားသွားပါတယ်။ ယေဟောဝါဘုရားသခင်ဟာ ဒီဘဏ္ဍာကို ကောင်းကင်တမန်တွေကိုမပေးဘဲ မြေအိုးတွေဖြစ်တဲ့ လူသားတွေကို ပေးထားပါတယ်။ “အဲဒါက သင်တို့ကို ယေဟောဝါ ယုံကြည်စိတ်ချတယ်ဆိုတာ ဖော်ပြတယ်” လို့ ညီအစ်ကိုက ပြောပြီး ဟောပြောချက်ကို နိဂုံးချုပ်လိုက်ပါတယ်။

သင်သည် ခြေသည်တို့နှင့် ပြိုင်ပြေးခဲ့သော်လည်း မြင်းတို့နှင့်ကော ပြိုင်နိုင်မည်လော

“ဘယ်လောက်ဝေးဝေးနဲ့ ဘယ်လောက်မြန်မြန် သင် ပြေးနိုင်ပါသလဲ” လို့အုပ်ချုပ်ရေးအဖွဲ့ဝင် ညီအစ်ကို ဆယ်မြူရယ်လ် ဟာ့ဒ်က မေးခဲ့တယ်။ သင်တန်းသားတွေကို ဘာကြောင့် အဲလိုမေးတာလဲ။ သင်တန်းသားတွေရဲ့ အတွေ့အကြုံနဲ့ ပရောဖက် (ကြိုဟောသူ) ယေရမိရဲ့ အတွေ့အကြုံတွေကို ဟောပြောသူက နှိုင်းယှဉ်ဖော်ပြသွားတယ်။ ပရောဖက် ယေရမိဟာ စိန်ခေါ်ချက်တွေကို ရင်ဆိုင်ဖြေရှင်းနိုင်ခဲ့တယ်။ ဒါပေမဲ့ အဲဒီထက်မက ပိုပြီးကြီးမားတဲ့ စိန်ခေါ်ချက်တွေကိုလည်း သူရင်ဆိုင်ရပါဦးမယ်။ ဒါကြောင့် သူ့ကို ယေဟောဝါ ဒီလိုမေးခဲ့တယ်– “သင်သည် ခြေသည်တို့နှင့်ပြိုင်ပြေး၍ မောလျှင် မြင်းတို့နှင့် အဘယ်သို့ ပြိုင်နိုင်မည်နည်း။”—ယေရမိ ၁၂:၅။

အဲဒီအချက်က သင်တန်းသားတွေနဲ့ သက်ဆိုင်တယ်ဆိုတာကို ညီအစ်ကို ဟာ့ဒ်က ဒီလိုပြောပြတယ်– “သင်တို့ဟာ လေ့လာမှုတွေ အများကြီး ပြုလုပ်ခဲ့ကြတဲ့အတွက် မြင်းတွေနဲ့ ပြိုင်ပြေးခဲ့ရသလိုမျိုး ခံစားရနိုင်တယ်။ တကယ်တော့ သင်တို့ဟာ မြင်းတွေနဲ့မဟုတ်ဘဲ ခြေသည်တွေနဲ့ ပြိုင်ပြေးခဲ့ရတာပါ။ သင်တို့ရရှိမယ့်တာဝန်တွေမှာ မြင်းတွေနဲ့ ပြိုင်ပြေးရသလိုမျိုး သင်တို့ ကြိုမသိနိုင်တဲ့ ပိုပြီးကြီးမားတဲ့ စိန်ခေါ်ချက်တွေနဲ့ ရင်ဆိုင်ရပါလိမ့်မယ်။ သင်တို့ ဘယ်လိုရင်ဆိုင်ကြမလဲ။ ဒီသင်တန်းက သင်တို့ကို မြင်းတွေနဲ့ ပြိုင်ပြေးနိုင်အောင်၊ ခြေကုန်လက်ပန်းမကျအောင် လေ့ကျင့်ပေးခဲ့ပြီဖြစ်ပါတယ်။” ကျမ်းစာ မှန်မှန်ဖတ်ရှုခြင်းနဲ့ မှန်မှန်ဆုတောင်းခြင်းဆိုတဲ့ အလေ့အထကောင်းကို မွေးမြူပြီး ဘုရားသခင်နဲ့ ရင်းနှီးတဲ့ဆက်ဆံရေးကို ပြုစုပျိုးထောင်သွားကြဖို့ ဟောပြောသူက အားပေးတိုက်တွန်းသွားတယ်။

အနာဂတ်မှာ ခရစ်ယာန်သာသနာပြုတွေအဖြစ် စေလွှတ်ခံရသူတချို့ဟာ စိတ်ပျက်အားလျော့လာမယ် ဒါမှမဟုတ် လူတွေရဲ့လျစ်လျူရှုမှုကို တွေ့ကြုံရလိမ့်မယ်လို့ ညီအစ်ကို ဟာ့ဒ်က အသိပေးတယ်။ တချို့ဆိုရင် နာမကျန်းဖြစ်လာမယ် ဒါမှမဟုတ် အရည်အချင်းမပြည့်မီဘူးဆိုပြီး ခံစားလာနိုင်တယ်။ ဒါပေမဲ့ ဘယ်လိုအခြေအနေဆိုးကိုမဆို ရင်ဆိုင်ကျော်လွှားနိုင်အောင်၊ ခြေကုန်လက်ပန်းကျမသွားအောင် သူတို့ကို ကူညီပေးမယ့် ခွန်အားရင်းမြစ်တစ်ခု ရှိတယ်လို့ ညီအစ်ကိုက အာမခံခဲ့တယ်။ “ခြေသည်တွေနဲ့ပဲဖြစ်ဖြစ်၊ မြင်းတွေနဲ့ပဲဖြစ်ဖြစ် ပြိုင်ပြေးပါစေ ဘုရားသခင်ရဲ့ အားကြီးတဲ့လက်က သင်တို့ကို ပန်းတိုင်အရောက် တွန်းပို့ပေးနိုင်တယ်ဆိုတာ ယုံကြည်စိတ်ချပါ။ အဲဒီလိုဆိုရင် သင်တို့ဟာ ယေဟောဝါကို ဂုဏ်တင်ချီးမွမ်းတဲ့ အောင်မြင်တဲ့ ခရစ်ယာန်သာသနာပြုတွေ ဖြစ်လာပါလိမ့်မယ်။”

အစီအစဉ်မှ တခြားပေါ်လွင်ချက်များ

“များစွာသောအိုးတို့ကို ငှားယူလော့။” အမေရိကန်နိုင်ငံ ဌာနခွဲကော်မတီဝင်တစ်ဦးဖြစ်တဲ့ ညီအစ်ကို ဂျော်န် အက်ခ်ရန်က ပရောဖက် ဧလိရှဲ၊ သားတွေ ကျွန်အဖြစ် ရောင်းစားခံရတော့မယ့် မိခင်မုဆိုးမတစ်ယောက်တို့ရဲ့အကြောင်းကို ဆွေးနွေးသွားတယ်။ (၄ ရာ. ၄:၁-၇) အဲဒီမုဆိုးမမှာ ဆီထည့်ဖို့ အိုးလေးတစ်လုံးပဲရှိတယ်။ အိမ်နီးချင်းတွေဆီက “များစွာသောအိုးတွေ ငှားယူ” လာဖို့ မုဆိုးမကို ဧလိရှဲ ညွှန်ကြားခဲ့တယ်။ ယေဟောဝါဘုရားသခင်ဟာ ဧလိရှဲကို အသုံးပြုပြီး မုဆိုးမ ငှားယူလာတဲ့ အိုးအားလုံးမှာ ဆီပြည့်နေအောင် အံ့ဖွယ်နည်းနဲ့ ပြုလုပ်ပေးခဲ့တယ်။ မုဆိုးမက အဲဒီဆီအိုးတွေကို ရောင်းပြီး ရလာတဲ့ငွေတွေနဲ့ အကြွေးပြန်ဆပ်နိုင်တဲ့အပြင် မိသားစုကိုလည်း အချိန်အတော်ကြာ ထောက်ပံ့ပေးနိုင်ခဲ့တယ်။

ဒီမှတ်တမ်းကနေ ခရစ်ယာန်သာသနာပြုလောင်းတွေ ဘာသင်ယူနိုင်ပါသလဲ။ မုဆိုးမဟာ အိုးတွေ လိုက်စုဆောင်းတဲ့အခါ ဇီဇာကြောင်တဲ့ပုံမပေါက်ခဲ့ဘူး။ “သူဟာ ဆီထည့်လို့ရသမျှ အိုးကြီးကြီးငယ်ငယ်ကို လိုက်စုဆောင်းခဲ့ပါလိမ့်မယ်။ သူ့အတွက် အိုးပိုကြီးလေ ပိုကောင်းလေပေါ့” လို့ဟောပြောသူက ပြောပြတယ်။ အဲဒီနောက် ညီအစ်ကို အက်ခ်ရန်က သင်တန်းသားတွေကို တာဝန်ကြီးကြီးငယ်ငယ်၊ ဘယ်တာဝန်ကိုမဆို ယူတတ်ဖို့ အားပေးတိုက်တွန်းသွားတယ်။ “ဇီဇာမကြောင်ပါနဲ့” လို့ ပြောသွားပါသေးတယ်။ ဒါ့အပြင် မုဆိုးမ ရရှိခဲ့တဲ့ ကောင်းချီးအရေအတွက်က ဧလိရှဲရဲ့ ညွှန်ကြားချက်တွေကို သူ ဘယ်လောက်အလေးထားတယ်ဆိုတဲ့ အချက်နဲ့ တိုက်ရိုက်ဆက်နွှယ်နေတယ်လို့လည်း ဟောပြောသူက သတိပေးသွားတယ်။ ဒီကနေ ဘာတွေသင်ယူနိုင်ပါသလဲ။ ကျွန်ုပ်တို့ရရှိတဲ့ ကောင်းချီးအရေအတွက်က ကျွန်ုပ်တို့ပြသတဲ့ ဇွဲ၊ ယုံကြည်ခြင်းအတိုင်းအတာနဲ့ တိုက်ရိုက်ဆက်နွှယ်နေပါ တယ်။ ဟောပြောသူက “ကိုယ့်ကိုယ်ကိုယ် မညှာပါနဲ့” လို့ ပြောကြားသွားပါတယ်။

“သူတို့သည် ငါတို့စားစရာဖို့ ဖြစ်ကြ၏။” သီအိုကရက်တစ်ကျောင်းဌာန ကြီးကြပ်မှူးဖြစ်တဲ့ ဝီလျံ ဆဲမြူရယ်စန်က တောလည်ရာ ၁၄:၉ ကနေ ကောက်နုတ်ထားတဲ့ အဓိကအကြောင်းအရာကို အဆင့်ဆင့်တင်ပြသွားပါတယ်။ ယောရှုနဲ့ကာလက်တို့ရဲ့ စံနမူနာကောင်းကို သူ အလေးပေးဖော်ပြသွားတယ်။ ကျမ်းချက်မှာ အသုံးပြုထားတဲ့ “စားစရာ” ဆိုတာက ခါနာန်ပြည်သားတွေကို လွယ်လွယ်နဲ့ အနိုင်ယူပြီး အဲဒါက အစ္စရေးလူတွေကို ကြံ့ခိုင်စေမယ်ဆိုတဲ့ သဘောဆောင်တယ်။ သင်တန်းသားတွေအတွက် ဘာသင်ယူစရာ ရှိပါသလဲ။ “အနာဂတ်မှာ ဘုရားသခင့်အမှုတော်ကို ထမ်းဆောင်တဲ့အခါ စိန်ခေါ်ချက်တွေကို သင်တို့ကို ကြံ့ခိုင်စေတဲ့အရာအဖြစ် ရှုမြင်ပါ” ဆိုပြီး ဟောပြောသူက ပြောကြားပါတယ်။

“သူတို့ရဲ့ယုံကြည်ခြင်းသင်္ဘောက ရှေ့မှာရှိတဲ့ မုန်တိုင်းရဲ့ဒဏ်ကို ခံနိုင်ပါ့မလား။” သင်တန်းပို့ချသူတစ်ဦးဖြစ်တဲ့ ဆမ်ရော်ဘာစန်က “ယုံကြည်ခြင်းသင်္ဘောပျက်” ခဲ့ကြသူတချို့နဲ့ပတ်သက်တဲ့ တမန်တော်ပေါလုရဲ့ သတိပေးချက်ကို ဆွေးနွေးသွားတယ်။ (၁ တိမောသေ ၁:၁၉) ယေဟောဝါဘုရားသခင်ကို တခြားသူတွေ အခိုင်အမာယုံကြည်လာအောင် တည်ဆောက်ပေးပါလို့ သင်တန်းသားတွေကို သူတိုက်တွန်းခဲ့တယ်။ “သင်တို့ရဲ့လုပ်ငန်းကို ပန်းပဲသမားရဲ့အလုပ်နဲ့ နှိုင်းယှဉ်နိုင်တယ်” ဆိုပြီး ညီအစ်ကိုက ပြောတယ်။ ဘယ်လိုနည်းနဲ့ နှိုင်းယှဉ်နိုင်သလဲ။ ပန်းပဲသမားတစ်ယောက်ဟာ သင်္ဘောတစ်စင်း အန္တရာယ်ကင်းကင်းနဲ့ ကျောက်ချရပ်နားလို့ရအောင် သံကွင်းတွေကို ဂဟေဆော်ပေးရတယ်။ အဲဒီလိုပါပဲ၊ ခရစ်ယာန်သာသနာပြုတွေကလည်း ကျမ်းစာသင်သားတွေ ကယ်တင်ခြင်းရဖို့အတွက် လိုအပ်တဲ့အရည်အသွေးတွေကို ပြုစုပျိုးထောင်ပေးရတယ်။

ဟောပြောသူက သံကွင်းတွေကို ၂ ပေတရု ၁:၅-၈ မှာပါတဲ့ အရည်အသွေးရှစ်မျိုးနဲ့ ချိတ်ဆက်ဖော်ပြခဲ့တယ်။ အဲဒီအရည်အသွေးတွေကို ယေဟောဝါ ဘယ်လိုတင်ပြသွားတယ်ဆိုတာကို ကျမ်းစာသင်သားတွေ သိမြင်လာအောင် ကူညီပေးမယ်ဆိုရင် သူတို့ဟာ ယေဟောဝါကို ခိုင်ခိုင်မြဲမြဲ တွယ်ကပ်လာနိုင်စရာရှိတယ်လို့ ညီအစ်ကို ရော်ဘာစန်က ပြောသွားတယ်။ သူတို့ရဲ့ယုံကြည်ခြင်းကို စမ်းသပ်လာနိုင်တဲ့ မုန်တိုင်းနဲ့တူတဲ့ ဘယ်အခက်အခဲတွေကိုမဆို သူတို့ ခံနိုင်ရည်ရှိလာမှာဖြစ်တယ်။

တွေ့ကြုံမှုများနဲ့ လူတွေ့မေးမြန်းခန်းများ

သင်တန်းပို့ချသူတစ်ဦးဖြစ်တဲ့ မိုက်ကယ် ဘားနက်က ဂိလဒ်သင်တန်းသားတွေကို သင်တန်းကာလအတွင်း သူတို့ရဲ့ ဟောပြောခြင်းလုပ်ငန်း တွေ့ကြုံမှုတချို့ကို ပြန်လည်ပြောပြစေပြီး သရုပ်ပြစေခဲ့တယ်။ ဈေး၊ လေဆိပ်၊ လူနေအိမ်တွေမှာ ဘယ်လိုဟောပြောခဲ့ကြတယ်၊ ဖုန်းမှားဆက်တဲ့ သူတွေကိုတောင် ဖုန်းနဲ့ ဘယ်လိုသက်သေခံတယ်ဆိုတဲ့ အကြောင်းတွေကို သင်တန်းသားတွေ ပြောပြတဲ့အခါ ပရိသတ်တွေ နှစ်သက်ခဲ့ကြတယ်။

အဲဒီနောက် အမေရိကန်နိုင်ငံ ဗေသလမိသားစုဝင်တစ်ဦးဖြစ်တဲ့ မိုက်ကယ် ဟန်စန်က ခရစ်ယာန်သာသနာပြုတွေအဖြစ် နှစ်ပေါင်းများစွာ အမှုဆောင်ခဲ့ကြတဲ့ ညီအစ်ကိုသုံးယောက်ကို လူတွေ့မေးမြန်းခဲ့ပါတယ်။ သူတို့ကတော့ ပနားမားနိုင်ငံမှာ အမှုဆောင်ခဲ့တဲ့ ညီအစ်ကို စတီဗင် မက်ဒိုဝဲလ်၊ ကင်ညာနိုင်ငံမှာ အမှုဆောင်ခဲ့တဲ့ ညီအစ်ကို မာ့ခ် နူမာ၊ ပါရာဂွေးနိုင်ငံမှာ အမှုဆောင်ခဲ့တဲ့ ဝီလျံ ယာစိုစကီတို့ဖြစ်ပါတယ်။ ‘ယေဟောဝါရဲ့အလိုတော်ကို ဆောင်ရွက်ရာမှာ အားရဝမ်းမြောက်ပါ’ ဆိုတဲ့အပိုင်းကို သူတို့ အလေးပေးဖော်ပြသွားကြတယ်။ (ဆာလံ ၄၀:၈) ဥပမာ၊ မာ့ခ် နူမာဟာ သူတို့ဇနီးမောင်နှံ အမှုဆောင်ခဲ့ချိန်က ရရှိခဲ့တဲ့ရွှင်လန်းမှုတွေကို သတ်သတ်မှတ်မှတ် ဖော်ပြခဲ့တယ်။ ဒေသခံညီအစ်ကိုညီအစ်မတွေနဲ့ မိတ်ဖွဲ့ခွင့်ရခဲ့တဲ့အတွက် သူတို့ဇနီးမောင်နှံ အရမ်းကိုကျေနပ်အားရခဲ့တယ်။ ညွှန်ကြားချက်တွေကို ညီအစ်ကိုတွေ လိုက်လျှောက်တာ၊ သူတို့ရဲ့ဘဝကို ပြုပြင်ပြောင်းလဲကြတာ၊ သူတို့ရဲ့ကြိုးစားမှုကို ယေဟောဝါ ကောင်းချီးပေးတာတွေကို တွေ့မြင်ရတဲ့အတွက်လည်း အရမ်းအားရခဲ့ကြတယ်လို့ ဖော်ပြသွားတယ်။ သင်တန်းဆင်းတွေလည်း အနာဂတ်မှာ ဝမ်းမြောက်စရာတွေ အများကြီး တွေ့ကြုံခံစားရမှာပါလို့ ညီအစ်ကိုက အာမခံသွားပါတယ်။

၁၃၁ ကြိမ်မြောက် သင်တန်းဆင်းတွေရဲ့ ကျေးဇူးတင်လွှာကို သင်တန်းဆင်းတစ်ဦးက ဖတ်ပြသွားပြီးတဲ့နောက်မှာ ညီအစ်ကို လက်တ်က သင်တန်းဆင်းတွေကို ပညာရှိရှိ ပြုမူလုပ်ဆောင်ကြဖို့ အားပေးစကားပြောကြားရင်း အစီအစဉ်ကို နိဂုံးချုပ်လိုက်ပါတယ်။ သင်တန်းဆင်းတွေအနေနဲ့ ပညာရှိရှိ ပြုမူလုပ်ဆောင်သွားမယ်ဆိုရင် “ယေဟောဝါဘုရားသခင်ကို ရွှင်ပြုံး” စေရာရောက်မယ်လို့ ညီအစ်ကိုက ပြောကြားသွားပါတယ်။ ပူပူနွေးနွေး ခရစ်ယာန်သာသနာပြုတွေဟာ မိမိတို့ကျရာတာဝန်မှာ သစ္စာရှိရှိ အမှုဆောင်တဲ့အခါ ယေဟောဝါကို ရွှင်ပြုံးစေမယ်ဆိုတာ သေချာပါတယ်။—ဟေရှာယ ၆၅:၁၉။

 [စာမျက်နှာ ၃၁ ပါ ဇယားနှင့် မြေပုံ]

သင်တန်းဆိုင်ရာ အချက်အလက်များ

ကိုယ်စားပြုနိုင်ငံပေါင်း ၁၀

ပျမ်းမျှ အသက် ၃၄.၇

ပျမ်းမျှ နှစ်ခြင်းခံသက်တမ်း ၁၉.၀

ပျမ်းမျှ အချိန်ပြည့်အမှုဆောင်သက်တမ်း ၁၃.၅

[မြေပုံ]

(ကားချပ်အပြည့်အစုံများကို စာစောင်တွင်ကြည့်ပါ)

သင်တန်းဆင်းတွေရဲ့ တာဝန်ကျနိုင်ငံတွေက အောက်ပါအတိုင်းဖြစ်ပါတယ်

တာဝန်ကျနိုင်ငံများ

ဘီနင်

ဘရာဇီး

ဘူလ်ဂေးရီးယား

ဘရွန်ဒီ

ကင်မရွန်း

ကနေဒါ

ဗဟိုအာဖရိကသမ္မတနိုင်ငံ

ဂျာမနီ

ဂါနာ

ဟောင်ကောင်

အင်ဒိုနီးရှား

ကင်ညာ

လိုင်ဘေးရီးယား

လစ်သူရေးနီးယား

မလေးရှား

မိုဇမ်ဘစ်

နီပေါ

ပနားမား

ပါရာဂွေး

စီအဲရာ လေယွန်

စလိုဗားကီးယား

တောင်အာဖရိက

အမေရိကန်

ဗင်နီဇွဲလား

[စာမျက်နှာ ၃၀ ပါ ရုပ်ပုံ]

ဂိလဒ်သင်တန်း ဆင်းများ သူတို့ရဲ့ ဟောပြောခြင်းအတွေ့အကြုံ တစ်ခုကို ပြန်လည် သရုပ်ပြနေ

[စာမျက်နှာ ၃၁ ပါ ရုပ်ပုံ]

ဂိဒ်ကင်းမျှော်စင် သမ္မာကျမ်းစာသင်တန်းရဲ့ ၁၃၁ ကြိမ်မြောက် သင်တန်းဆင်းပွဲ

အောက်ပါစာရင်းမှာ အတန်းတွေကို ရှေ့တန်းကနေ နောက်တန်းကို ရေတွက်ပြီး နာမည်တွေကို လက်ဝဲဘက်ကနေ လက်ယာဘက်ကို စီထားပါတယ်။

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.