သင်သိပါသလား

ယေရှုအချိန်က စျာပနကိစ္စတွေမှာ လူတွေ ပလွေမှုတ်ခဲ့ကြသလား။

▪ ပွဲလမ်းသဘင်တွေမှာ ပလွေမှုတ်တယ်ဆိုတဲ့အကြောင်း ကျမ်းစာမှာ ဖော်ပြထားပါတယ်။ (၃ ရာ. ၁:၄၀; ဟေရှာယ ၅:၁၂; ၃၀:၂၉) ဒါ့အပြင် စျာပနကိစ္စတွေမှာလည်း ပလွေမှုတ်ခဲ့ကြတယ်လို့ ဖော်ပြထားပါသေးတယ်။ ဒါပေမဲ့ ပလွေတစ်မျိုးတည်းကိုပဲ ကျမ်းစာက ဖော်ပြတယ်။ ဂျူးအာဏာပိုင်တစ်ယောက်ဟာ သေခါနီးဖြစ်နေတဲ့ သူ့သမီးကို ကုသပေးဖို့ ယေရှုကို တောင်းဆိုတဲ့အကြောင်း ကျမ်းရေးသူ မဿဲက ဖော်ပြခဲ့ပါတယ်။ ဒါပေမဲ့ အာဏာပိုင်ရဲ့အိမ်ကို ယေရှုလည်းရောက်ရော သမီးငယ်က သေသွားပြီဖြစ်လို့ “ပလွေမှုတ်သူများနှင့် လူအုပ်သည် ဆူညံနေကြသည်ကို မြင်” တွေ့ခဲ့ရတယ်။—မဿဲ ၉:၁၈၊ ၂၃။

အဲဒီထုံးစံနဲ့ပတ်သက်ပြီး ကျမ်းရေးသူ မဿဲရဲ့ ဖော်ပြချက်က တိကျမှန်ကန်ပါသလား။ ကျမ်းစာဘာသာပြန်တစ်ဦးဖြစ်သူ ဝီလျံ ဘားကလေးက ဒီလိုပြောတယ်– “ရှေးအချိန်တုန်းက ရောမ၊ ဂရိ၊ ဖိုနီးရှား၊ အဆီးရီးယားနဲ့ ပါလက်စတိုင်းတို့လို ဒေသတော်တော်များများမှာ အသုဘကိစ္စရှိပြီဆိုရင် ပလွေမှုတ်တတ်ကြပြီး မှုတ်သံကလည်း ဝမ်းနည်းပူဆွေးစရာကောင်းတယ်။” ပထမရာစုခေတ်မှာ ဂျူးမုဆိုးဖိုဟာ ဆင်းရဲရင်တောင် သေသွားတဲ့ဇနီးသည်အတွက် ငိုကြွေးမြည်တမ်းဖို့ ပလွေသမားနှစ်ယောက်နဲ့ ငိုချင်းသည်တစ်ယောက်ကို ငှားပေးရတဲ့ ထုံးစံရှိတယ်ဆိုပြီး တာလ်မွဒ်ကျမ်းမှာ ဖော်ပြထားပါတယ်။ စီအီး ၆၇ မှာ ဂါလိလဲနယ်ကို ရောမတွေ တိုက်ခိုက်သိမ်းပိုက်လိုက်ပြီး မြို့သူမြို့သားတွေ အသတ်ခံလိုက်ရတယ်ဆိုတဲ့သတင်း ဂျေရုဆလင်မြို့ကို ရောက်လာတဲ့အခါ “ငိုချင်းချဖို့အတွက် ပလွေမှုတ်တဲ့သူတွေကို ငှားခဲ့တယ်” ဆိုပြီး ပထမရာစုက သမိုင်းပညာရှင် ဖလေးဗီးယပ်စ် ဂျိုစီဖတ်စ်ကလည်း မှတ်တမ်းတင်ခဲ့ပါတယ်။

ယေရှုဘေးနားမှာ စီရင်ခံရတဲ့ လူဆိုးတွေဟာ ဘယ်လိုရာဇဝတ်မှုကို ကျူးလွန်ခဲ့ကြတာလဲ။

▪ အဲဒီလူဆိုးတွေကို “ဓားပြ” တွေဆိုပြီး ကျမ်းစာမှာ ဖော်ပြထားပါတယ်။ (မဿဲ ၂၇:၃၈; မာကု ၁၅:၂၇) ရာဇဝတ်မှုတွေ တစ်မျိုးနဲ့တစ်မျိုး မတူဘူးဆိုတာကို ခွဲခြားသိဖို့အတွက် ကျမ်းစာမှာ ကွဲပြားတဲ့စကားလုံးတွေ သုံးထားတယ်ဆိုပြီး ကျမ်းစာအဘိဓာန်တချို့က ထောက်ပြတယ်။ ကလက်ပ်တက်စ် (kleptes) ဆိုတဲ့ ဂရိစကားလုံးက စစ်ဆေးမေးမြန်းခြင်းမခံရအောင် တိတ်တဆိတ်ခိုးဝှက်တဲ့ သူခိုးတွေကို ရည်ညွှန်းပါတယ်။ ယေရှုရဲ့တပည့်တွေ သုံးဖို့ထားတဲ့ ငွေသေတ္တာကနေ တိတ်တဆိတ် ခိုးယူတဲ့ ယုဒရှကာရုတ်ကိုပြောတဲ့အခါ အဲဒီစကားလုံးကို အသုံးပြုတယ်။ (ယောဟန် ၁၂:၆) ဒါပေမဲ့ လက်စ်တက်စ် (lestes) ဆိုတဲ့ စကားလုံးကျတော့ အကြမ်းဖက်လုယက်တဲ့သူတွေ၊ တော်လှန်ပုန်ကန်တဲ့သူတွေကိုတောင် ရည်ညွှန်းနိုင်ပါတယ်။ ယေရှုနဲ့အတူ စီရင်ခံရတဲ့သူတွေက ဒုတိယစကားလုံးနဲ့ သက်ဆိုင်တယ်။ စီရင်ခံရသူတစ်ယောက်က ဒီလိုပြောခဲ့တယ်– “ငါတို့သည် ကိုယ့်အပြစ်အတွက် ထိုက်သင့်သောပြစ်ဒဏ်ကို တရားသဖြင့် ခံရကြ၏။” (လုကာ ၂၃:၄၁) ဒီအချက်က သူတို့နှစ်ယောက်ဟာ သာမန်သူခိုးလောက်ပဲ မဟုတ်ဘူးဆိုတာ ဖော်ပြနေပါတယ်။

အဲဒီဓားပြနှစ်ယောက်လိုပဲ ဗာရဗ္ဗကိုလည်း လက်စ်တက်စ် လို့ခေါ်တယ်။ (ယောဟန် ၁၈:၄၀) ဒါကြောင့် ဗာရဗ္ဗဟာ သာမန်သူခိုးလောက်ပဲ မဟုတ်ဘူးဆိုတာ သေချာပါတယ်။ အကြောင်းရင်းကတော့ သူဟာ “မြို့ထဲ၌ပုန်ကန်မှု၊ လူသတ်မှုတို့ကြောင့် ထောင်ကျနေသူဖြစ်၏” ဆိုပြီး ကျမ်းစာမှာပြောထားလို့ပါပဲ။—လုကာ ၂၃:၁၉။

ယေရှုနဲ့အတူ စီရင်ခံရတဲ့ လူဆိုးတွေဟာ ဓားပြမှုကျူးလွန်တယ်လို့ ပြောပေမဲ့လည်း နိုင်ငံတော်ကိုပုန်ကန်မှု ဒါမှမဟုတ် လူသတ်မှုမှာတောင် ပါဝင်နိုင်ဖွယ်ရှိတယ်။ ဘာပြစ်မှုတွေပဲ ကျူးလွန်ခဲ့ပါစေ၊ သူတို့ကို ကွပ်မျက်စီရင်ထိုက်တဲ့သူတွေအဖြစ် ရောမအာဏာပိုင် ပုန္တိပိလတ်က ယူမှတ်ခဲ့ပါတယ်။