ရှေးခေတ် အစ္စရေးလူတွေဟာ ယာကုပ်ဆိုတဲ့ အမျိုးသားတစ်ယောက်ကနေ ဆင်းသက်လာတဲ့အတွက် သူတို့ဟာ “ညီအစ်ကို” တွေ၊ မိသားစုဝင်တွေ ဖြစ်ကြတယ်။ ဒါကြောင့် ပွဲတော်တွေကျင်းပဖို့ ဂျေရုဆလင်မြို့မှာ သူတို့စုရုံးတဲ့အချိန်ဟာ ပျော်ရွှင်ကြည်နူးဖွယ် ဖြစ်ပါတယ်။ သူတို့လိုပဲ ဒီနေ့ခေတ် မိသားစု တော်တော်များများဟာ ခရစ္စမတ်ပွဲနေ့မှာ အတူတကွ စုဆုံဖို့၊ ပျော်ရွှင်ကြည်နူးဖို့ မျှော်လင့်ကြတယ်။

စွယ်စုံကျမ်း (The Encyclopedia of Christmas and New Year’s Celebrations) တစ်ကျမ်းမှာ ဒီလိုဖော်ပြထားတယ်– “ခရစ္စမတ်ရာသီမှာ မိသားစုတွေ အတူတကွ စုဆုံတဲ့အခါ တစ်နှစ်ပတ်လုံး ကြုံတွေ့ရတဲ့ ပြဿနာ အသေးအမွှားလေးတွေက ကြီးမားတဲ့ပြဿနာတွေ ဖြစ်လာနိုင်တယ်။”

“[သင်၏] မိဘဘိုးဘွားတို့ကို ကျေးဇူးဆပ်ကြပါစေ။” (၁ တိမောသေ ၅:၄) သင့်ရဲ့မိသားစုဆီ မှန်မှန်လည်ပတ်ဖို့ အတတ်နိုင်ဆုံး စီစဉ်ပါ။ ဆွေမျိုးသားချင်းတွေက ရပ်ဝေးမှာ နေထိုင်တယ်ဆိုရင်လည်း သူတို့ဆီ မကြာမကြာ အဆက်အသွယ် လုပ်နိုင်ပါတယ်။ စာရေးတာ၊ ဖုန်းဆက်တာ၊ အီးမေးလ်ပို့တာ၊ အွန်လိုင်းကနေတစ်ဆင့် စကားပြောတာတွေ လုပ်နိုင်ပါတယ်။ မှန်မှန် အဆက်အသွယ်လုပ်မယ်ဆိုရင် နားလည်မှုလွဲတာတွေ လျော့နည်းသွားနိုင်ပါတယ်။

‘သင်တို့မူကား ချစ်ခင်စုံမက်မှုကို ချုပ်တည်းထားကြ၏။ သင်တို့၏စိတ်နှလုံးကို ကျယ်ဝန်းစေကြလော့။’ (၂ ကောရိန္သု ၆:၁၂၊ ၁၃) ဆွေမျိုးသားချင်းတွေကို တစ်နှစ်မှာ တစ်ခါပဲ တွေ့ဆုံရတတ်တဲ့အတွက် ခပ်စိမ်းစိမ်း ဖြစ်သွားနိုင်ပါတယ်။ အထူးသဖြင့် ကလေးတွေနဲ့ စိမ်းသွားနိုင်တယ်။ ကလေးတချို့ဟာ အဘိုးအဘွားတွေ၊ ရပ်ဝေးက ဆွေမျိုးသားချင်းတွေနဲ့ မရင်းနှီးဘူးလို့ ခံစားရနိုင်တယ်။ ဒါကြောင့် သက်ကြီးဆွေမျိုးသားချင်းတွေကို ချစ်ခင်စုံမက်ဖို့၊ သားသမီးတွေရဲ့ စိတ်နှလုံးကို “ကျယ်ဝန်း” စေဖို့ သူတို့ကို အားပေးပါ။

“အခွင့်အခါနှင့် သင့်လျော်သည့်စကားကို ပြောဆိုနိုင်မှုသည် အလွန်ပင် ဝမ်းသာဖွယ်ဖြစ်ပါသည်တကား။” (သုတ္တံ ၁၅:၂၃၊ ခမ) မိသားစုဆက်ဆံရေးကို တင်းမာစေနိုင်တဲ့ နားလည်မှုလွဲတာတွေ မဖြစ်အောင် ဘယ်လိုတားဆီးနိုင်မလဲ။ နည်းတစ်နည်းကတော့ အရေးကြီးတဲ့ ကိစ္စရပ်တွေကို ဆွေးနွေးဖို့ “သင့်လျော်” တဲ့အချိန်ကို ရွေးဖို့ဖြစ်တယ်။ သင့်မိသားစုနဲ့ မှန်မှန်ဆက်သွယ်မယ်ဆိုရင် ပြဿနာတွေကို ဖြေရှင်းဖို့ မိသားစုဝင်တွေကို ချဉ်းကပ်ရ လွယ်ကူပါလိမ့်မယ်။ မိသားစုတွေ စုဆုံတဲ့အခါ ပိုပြီးပျော်ရွှင်ရပါလိမ့်မယ်။