ပထမဆုံးလူသား အာဒံဟာ ရာစုနှစ်များစွာ အသက်ရှင်ခဲ့ပါတယ်။ ဒါပေမဲ့ နောက်ဆုံးမှာ သူ အိုမင်းလာပြီး သေဆုံးခဲ့ရတယ်။ အဲဒီအချိန်ကစပြီး လူသားတွေဟာ မအိုမင်းအောင် နည်းမျိုးစုံနဲ့ ကြိုးစားခဲ့ကြတယ်။ ဒါပေမဲ့ ဘယ်သူကမှ သေခြင်းတရားကို မလွှဲရှောင်နိုင်ခဲ့ဘူး။ ဘာကြောင့်လဲ။ အာဒံ အိုမင်းလာပြီး သေဆုံးရတာက ဘုရားသခင့်စကား နားမထောင်ဘဲ အပြစ်ပြုလိုက်တဲ့အတွက် ဖြစ်ပါတယ်။ အာဒံရဲ့အပြစ်နဲ့ အပြစ်ရဲ့အဖိုးအခဖြစ်တဲ့ သေခြင်းကို ကျွန်ုပ်တို့ အမွေရထားတဲ့အတွက် အိုမင်းရခြင်း ဖြစ်ပါတယ်။—ကမ္ဘာဦး ၅:၅; ရောမ ၅:၁၂ တို့ကိုဖတ်ပါ။

ကျွန်ုပ်တို့ ထာဝစဉ်အသက်ရှင်နိုင်ပါတယ်။ ဒါပေမဲ့ တစ်ဦးတစ်ယောက်က ကျွန်ုပ်တို့အတွက် ရွေးဖိုးပေးရမှာဖြစ်တယ်။ (ယောဘ ၃၃:၂၄၊ ၂၅) ရွေးဖိုးဆိုတာ တစ်ဦးတစ်ယောက်ကို တစ်စုံတစ်ရာကနေ လွတ်မြောက်စေဖို့ ပေးရတဲ့ အဖိုးအခဖြစ်ပါတယ်။ ကျွန်ုပ်တို့က သေခြင်းကနေ လွတ်မြောက်ဖို့ လိုအပ်ပါတယ်။ (ထွက်မြောက်ရာ ၂၁:၂၉၊ ၃၀) ယေရှုဟာ အသေခံပေးခြင်းအားဖြင့် ရွေးဖိုးကို ပေးဆက်ခဲ့တဲ့အတွက် ကျွန်ုပ်တို့ ထာဝစဉ်အသက်ရှင်ဖို့ဆိုတာ ဖြစ်နိုင်တယ်။—ယောဟန် ၃:၁၆ ကိုဖတ်ပါ။

အိုနာသေခြင်းကနေ လူသားအားလုံးတော့ လွတ်မြောက်မှာ မဟုတ်ပါဘူး။ အာဒံလို ဘုရားသခင့်စကား နားမထောင်တဲ့သူတွေဟာ ထာဝရအသက် ရရှိမှာမဟုတ်ဘူး။ အပြစ်ကနေ ခွင့်လွှတ်ခံရတဲ့ သူတွေပဲ ထာဝစဉ်အသက်ရှင်နိုင်မှာဖြစ်ပါတယ်။—ဟေရှာယ ၃၃:၂၄; ၃၅:၃–၆ ကိုဖတ်ပါ။

အပြစ်ခွင့်လွှတ်ခံရဖို့ ကျွန်ုပ်တို့ လုပ်ဆောင်ရမယ့်အရာ ရှိပါတယ်။ သမ္မာကျမ်းစာကို လေ့လာရမယ်။ ဒီလိုလေ့လာမှသာ ဘုရားသခင်ကို သိကျွမ်းလာမယ်။ ပိုမိုကောင်းမွန်တဲ့ဘ၀နဲ့ ဘယ်လို နေထိုင်နိုင်တယ် ဆိုတာကို သိလာမယ်။ ဘုရားသခင်ရဲ့ နှစ်သက်လက်ခံမှုကိုရဖို့နဲ့ ထာဝစဉ်အသက်ရှင်နိုင်ဖို့ ဘာလုပ်ရမယ်ဆိုတာကိုလည်း သိလာမှာဖြစ်တယ်။—ယောဟန် ၁၇:၃; တမန်တော် ၃:၁၉ တို့ကိုဖတ်ပါ။