ဗိမာန်တော်ရဲ့ အလှူငွေပုံးတွေကို အမျိုးသမီးရင်ပြင်မှာ ထားရှိပါတယ်။ စာအုပ်တစ်အုပ်မှာ ဒီလိုဖော်ပြထားတယ်– “ပတ်ပတ်လည်မှာ တိုင်လုံးစဉ်တန်း တစ်တန်းရှိတယ်။ တိုင်လုံးစဉ်တန်းနဲ့ နံရံကြားမှာ အလှူငွေပုံး ၁၃ ပုံးကို တွေ့ရပါတယ်။”—The Temple—Its Ministry and Services.

အလှူငွေပုံးတွေဟာ ထိပ်ဝက ကျဉ်းပြီး အောက်ခြေမှာ ကျယ်သွားတဲ့ ကတော့ပုံစံဖြစ်ပါတယ်။ အလှူငွေပုံးတစ်ပုံးစီမှာ သတ်သတ်မှတ်မှတ် အလှူငွေထည့်နိုင်ဖို့ အလှူငွေအမျိုးအစားတွေနဲ့တွဲပြီး နံပါတ်တွေ တပ်ထားပါတယ်။ ယေရှုဟာ အမျိုးသမီးရင်ပြင်မှာရှိနေတုန်း အလှူငွေထည့်နေကြတဲ့ ဆင်းရဲသားမုဆိုးမအပါအဝင် လူတွေကို သတိပြုမိခဲ့တယ်။—လုကာ ၂၁:၁၊ ၂။

ဗိမာန်တော်အခွန်ဆောင်ဖို့ အလှူငွေပုံး နှစ်ပုံးထားတယ်။ တစ်ပုံးက လက်ရှိနှစ်အတွက်၊ နောက်တစ်ပုံးက ပြီးခဲ့တဲ့နှစ်အတွက် အခွန်ဆောင်ဖို့ဖြစ်တယ်။ ၃ ကနေ ၇ အထိ အလှူငွေပုံးတွေမှာ ချိုးငှက်၊ ခို၊ ထင်း၊ အမွှေးနံ့သာနဲ့ ရွှေအိုးတွေအတွက် အလှူငွေထည့်ရပါတယ်။ ပူဇော်ရာယဇ်အတွက် သီးသန့်ဖယ်ထားတဲ့ငွေနဲ့ လိုအပ်ရာကို ဝယ်ပြီးနောက် ပိုလာတဲ့ငွေကို သက်ဆိုင်တဲ့အလှူငွေပုံးမှာ ထည့်လိုက်ကြတယ်။ အလှူငွေပုံး ၈ မှာ အပြစ်ဖြေရာယဇ်ပူဇော်ပြီးနောက် ကျန်တဲ့ငွေကို ထည့်ကြတယ်။ ၉ ကနေ ၁၂ အထိ အလှူငွေပုံးတွေမှာ ကျူးလွန်မှုဖြေရာယဇ်၊ ပူဇော်ရာငှက်၊ နာဇရိလူတွေရဲ့ ပူဇော်ရာယဇ်၊ အနူသည်တွေရဲ့ ပူဇော်ရာယဇ်ဝယ်ပြီးနောက် ကျန်တဲ့ငွေကို ထည့်ကြတယ်။ အလှူငွေပုံး ၁၃ မှာတော့ စေတနာစိတ်နဲ့ အလှူငွေထည့်ဝင်ကြတယ်။

လုကာဟာ သူ့နာမည်ပါတဲ့ လုကာကျမ်းနဲ့ တမန်တော်ကျမ်းကို ရေးသားခဲ့ပါတယ်။ “အကြောင်းအရာအလုံးစုံကို အစမှ သေချာစွာ လေ့လာစိစစ်ထား” တယ်လို့ လုကာပြောထားပေမဲ့ ကျမ်းပညာရှင်တချို့က လုကာရေးသားထားတဲ့ ကျမ်းမှတ်တမ်းတွေကို ဝေဖန်ကြတယ်။ (လုကာ ၁:၃) လုကာရဲ့ရေးသားချက်တွေက ဘယ်လောက်ထိ တိကျမှန်ကန်မှုရှိသလဲ။

သမိုင်းဆိုင်ရာ အချက်အလက်တွေကို လုကာ ရေးသားထားတဲ့အတွက် အဲဒီအချက်တွေကို မှန်မမှန် စစ်ဆေးနိုင်ပါတယ်။ ဥပမာ၊ ဖိလိပ္ပိမြို့က စစ်ကဲမင်း၊ သက်သာလောနိတ်မြို့က မြို့အရာရှိ၊ ဧဖက်မြို့က ပွဲကြပ် စတဲ့ ရောမအရာရှိမင်းတွေရဲ့ လူသိနည်းတဲ့ ဘွဲ့နာမည်တွေကို လုကာ အသုံးပြုထားပါတယ်။ (တမန်တော် ၁၆:၂၀; ၁၇:၆; ၁၉:၃၁) ဟေရုဒ်အန္တိပနဲ့ ဆိုက်ပရပ်စ်ကျွန်းက သေရဂိပေါလုကိုလည်း နယ်စားမင်းလို့ သုံးနှုန်းခေါ်ဆိုထားပါတယ်။—တမန်တော် ၁၃:၁၊ ၇။

ဘွဲ့နာမည်တွေကို လုကာ မှန်မှန်ကန်ကန် ခေါ်ဆိုသွားတာက မှတ်သားထိုက်ပါတယ်။ ဘာကြောင့်လဲဆိုရင် ရောမနယ်ပယ်တစ်ခုက အခြေအနေပြောင်းလဲသွားရင် အုပ်ချုပ်သူရဲ့ ဘွဲ့နာမည်လည်း ပြောင်းလဲသွားလို့ဖြစ်တယ်။ ဒါပေမဲ့ “တမန်တော်ကျမ်းမှာပါတဲ့ ဒီဘွဲ့နာမည်တွေ ပြောင်းလဲမှုတွေက နေရာဒေသ၊ အချိန်အခါနဲ့အလိုက် တစ်ထပ်တည်းကျနေတယ်” လို့ ကျမ်းပညာရှင် ဘရုစ် မက်စ်ဂါ ပြောပြတယ်။ ဒါ့အပြင် ကျမ်းပညာရှင် ဝီလျံရမ်ဆေကလည်း လုကာကို “တိကျပြီး စေ့စပ်တဲ့ သမိုင်းပညာရှင်” လို့ခေါ်ဆိုခဲ့ပါတယ်။