ကိုမင်းဦး– ဘာသာရေးကို ကျွန်တော် သိပ်စိတ်မဝင်စားဘူး။ ဒါကြောင့် ခင်ဗျားနဲ့ ကျွန်တော် ပြောစရာများများစားစား ရှိမှာမဟုတ်ဘူး။

ကိုရဲဇော်– ခုလိုပြောပြတာကို ကျေးဇူးတင်ပါတယ်။ ကျွန်တော့်နာမည် ရဲဇော်လို့ ခေါ်ပါတယ်။ ခင်ဗျားနာမည်ကော။

ကိုမင်းဦး– မင်းဦးပါ။

ကိုရဲဇော်– တွေ့ရတာ ဝမ်းသာပါတယ်၊ ကိုမင်းဦး။

ကိုမင်းဦး– ကျွန်တော်လည်း ဝမ်းသာပါတယ်။

ကိုရဲဇော်– စိတ်မရှိရင် တစ်ခုလောက် မေးချင်တယ်၊ ခင်ဗျားက ဘာသာတရားကိုင်းရှိုင်းတဲ့ မိသားစုမှာ ကြီးပြင်းလာတာလား။

ကိုမင်းဦး– ဟုတ်ပါတယ်။ ဒါပေမဲ့ ကောလိပ်စတက်ကတည်းက ဘုရားတရား မလုပ်ဖြစ်တော့ဘူး။

ကိုရဲဇော်– ဪ၊ ဒါနဲ့ ကောလိပ်တက်တုန်းက ဘာမေဂျာယူခဲ့တာလဲ။

ကိုမင်းဦး– လူမှုရေးနဲ့ သမိုင်းဘာသာကို ယူခဲ့တယ်။ ကျွန်တော်က သမိုင်းကို စိတ်ဝင်စားတယ်။ သမိုင်းတစ်လျှောက်မှာ လူသားတွေ ဘယ်လိုဖွံ့ဖြိုးတိုးတက်လာသလဲဆိုတာ ခင်ဗျားလည်း သိမှာပါ။

ကိုရဲဇော်– သိတာပေါ့၊ သမိုင်းဆိုတာ အရမ်းစိတ်ဝင်စားစရာကောင်းတာ။ ကျမ်းစာက သမိုင်းကြောင်းတွေပါတဲ့ စာအုပ်ဆိုတာ ခင်ဗျားလည်းသိမှာပါ။ ခင်ဗျား သုတေသနလုပ်တဲ့ စာအုပ်တွေထဲမှာ ကျမ်းစာအုပ်ရော ပါလား။

ကိုမင်းဦး– မပါဘူး။ ကျမ်းစာက စာကောင်းပေကောင်းဖြစ်မှန်းတော့ သိပါတယ်။ ဒါပေမဲ့ ကျမ်းစာကို သမိုင်းနဲ့ဆိုင်တဲ့စာအုပ်လို့ ဘယ်တုန်းကမှ မထင်ခဲ့ဘူး။

ကိုရဲဇော်– ခင်ဗျားကို ကြည့်ရတာ ပွင့်ပွင့်လင်းလင်း ပြောတတ်ပုံပဲ။ အချိန်ရမယ်ဆိုရင် ကျမ်းစာထဲက တိကျမှန်ကန်တဲ့ သမိုင်းကြောင်းတွေကို ပြပေးချင်တယ်။ ရတယ်မဟုတ်လား။

ကိုမင်းဦး– ရပါတယ်။ ဒါပေမဲ့ ကျွန်တော့်မှာ ကျမ်းစာအုပ် မရှိဘူး။

ကိုရဲဇော်– ကိစ္စမရှိပါဘူး။ ကျွန်တော့်ကျမ်းစာအုပ်ကနေ ပြပေးလို့ရပါတယ်။ ဦးဆုံးပြပေးချင်တဲ့ အချက်ကတော့ ၁ ရာဇဝင်ချုပ် အခန်းကြီး ၂၉၊ အခန်းငယ် ၂၆ နဲ့ ၂၇ ပဲ။ ဒီလိုဖတ်ရတယ်– “ယေရှဲ၏သား ဒါဝိဒ်သည် ဣသရေလတစ်နိုင်ငံလုံးကို အစိုးရသောမင်း ဖြစ်တော်မူ၏။ ဟေဗြုန်မြို့၌ ခုနစ်နှစ်၊ ယေရုရှလင်မြို့၌ သုံးဆယ့်သုံးနှစ် မင်းပြု၍ ဣသရေလနိုင်ငံကို စိုးစံသောနှစ်ပေါင်းကား အနှစ်လေးဆယ်တည်း။”

ကိုမင်းဦး– ဒီအကြောင်းနဲ့ သမိုင်းဆိုင်ရာ တိကျမှန်ကန်မှုနဲ့က ဘယ်လိုပတ်သက်နေလို့လဲ။

ကိုရဲဇော်– ဘုရင်ဒါဝိဒ်ဆိုတာ ဘယ်တုန်းကမှ မရှိခဲ့ဘူးလို့ ဝေဖန်ရေးသမားတွေ အခိုင်အမာ ပြောခဲ့ကြတယ်။

ကိုမင်းဦး– ဟုတ်လား။ သူတို့က ဒါဝိဒ်အသက်ရှင်ခဲ့တာကို ဘာဖြစ်လို့ သံသယဝင်ခဲ့တာလဲ။

ကိုရဲဇော်– ဒါဝိဒ် တကယ်အသက်ရှင်ခဲ့တဲ့ အထောက်အထားကို ကျမ်းစာကလွဲလို့ တခြားနေရာတွေမှာ သိပ်မတွေ့ရဘူး။ ဒါပေမဲ့ ၁၉၉၃ ခုနှစ်မှာ “ဒါဝိဒ်ရဲ့ အိမ်တော်” လို့စာတန်းပါတဲ့ ရှေးခေတ်ကျောက်စာတစ်ချပ်ကို ရှေးဟောင်းသုတေသီတစ်ဖွဲ့က တွေ့ရှိခဲ့ကြတယ်။

ကိုမင်းဦး– ဟုတ်လား၊ စိတ်ဝင်စားစရာပဲ။

ကိုရဲဇော်– ကျမ်းစာမှာပါတဲ့ ပုန္တိပိလတ်မင်း အသက်ရှင်ခဲ့တာကိုလည်း သံသယဖြစ်ခဲ့ကြတယ်။ သူဟာ ယေရှုခေတ်တုန်းက ဘုရင်ခံတစ်ယောက်ပေါ့။ သူ့နာမည်ကို လုကာအခန်းကြီး ၃၊ အခန်းငယ် ၁ မှာ သူ့ခေတ်က တခြားအရာရှိတွေရဲ့နာမည်နဲ့တွဲပြီး ဖော်ပြထားတယ်။

ကိုမင်းဦး– ဟုတ်တယ်။ “ပုန္တိပိလတ်သည် ယုဒပြည်၏ဘုရင်ခံ၊ ဟေရုဒ် သည် ဂါလိလဲနယ်စားမင်း” ဖြစ်တယ်လို့ ကျမ်းစာမှာ ဖော်ပြထားတာပဲ။

ကိုရဲဇော်– ကျေးဇူးပဲ။ ပုန္တိပိလတ်မင်းဟာ တကယ်အသက်ရှင်ခဲ့တာ ဟုတ်မဟုတ်ဆိုတာ နှစ်အတော်ကြာတဲ့အထိ ပညာရှင်တချို့ သံသယဝင်ခဲ့ကြတယ်။ ပုန္တိပိလတ်နာမည် ရှင်းရှင်းလင်းလင်း ရေးထိုးထားတဲ့ ကျောက်ပြားတစ်ချပ်ကို အရှေ့အလယ်ပိုင်းဒေသမှာ လွန်ခဲ့တဲ့နှစ် ၅၀ လောက်က တွေ့ရှိခဲ့တယ်။

ကိုမင်းဦး– ဟုတ်လား၊ အံ့ဩစရာပဲ။ ဒီလောက်အသေးစိတ်ကျတဲ့ အချက်တွေကို အရင်တုန်းက ကျွန်တော် မသိခဲ့ဘူး။

ကိုရဲဇော်– ခုလို ခင်ဗျားကို ဒီအကြောင်းတွေ ပြောပြခွင့်ရတာ ဝမ်းသာတယ်ဗျာ။

ကိုမင်းဦး– ရိုးရိုးသားသား ပြောရမယ်ဆိုရင်တော့ ကျမ်းစာကို စာပေတစ်ခုအဖြစ် အမြဲလေးစားခဲ့ပါတယ်။ ဒါပေမဲ့ ဒီနေ့ခေတ်နဲ့သက်ဆိုင်တယ်လို့ တစ်ခါမှ မတွေးမိဘူး။ ကျမ်းစာမှာ တိကျတဲ့သမိုင်းမှတ်တမ်းတွေ ပါနိုင်ပေမဲ့ လက်တွေ့ကျတဲ့ အချက်တွေရှိမယ်လို့တော့ မထင်ဘူး။

ကိုရဲဇော်– လူအတော်များများလည်း ခင်ဗျားလိုပဲ ရှုမြင်ကြတယ်။ ကျွန်တော်တော့ အဲဒီလိုမမြင်ဘူး။ ဘာဖြစ်လို့လဲဆိုတော့ လူသားတွေရဲ့ အခြေခံလိုအပ်ရာတွေက အရင်ကတည်းက ဒီလိုပဲ၊ ပြောင်းလဲသွားတယ်ဆိုတာမှ မရှိတာ။ ဥပမာပြောရရင်၊ လူတိုင်းရဲ့ အခြေခံလိုအပ်ရာက စားဝတ်နေရေးဖြစ်တယ်။ ဒါ့အပြင် လူတွေက လူမှုဆက်ဆံရေးကောင်း ရှိချင်ကြတယ်။ ပြီးတော့ သာယာချမ်းမြေ့တဲ့ မိသားစုဘဝကိုလည်း ပိုင်ဆိုင်ချင်ကြတယ်။ ဒါတွေအားလုံးကို ကျွန်တော်တို့ တန်ဖိုးထားကြတယ် မဟုတ်လား။

ကိုမင်းဦး– ဟုတ်ပါတယ်။

ကိုရဲဇော်– အဲဒီအချက်တွေအားလုံး ကျွန်တော်တို့မှာရှိနိုင်ဖို့ ကျမ်းစာက ကူညီပေးနိုင်ပါတယ်။ ဒါကြောင့် ကျမ်းစာကို ရှေးကျပေမဲ့ ခေတ်မီတဲ့စာအုပ်လို့ ကျွန်တော်တို့ ပြောနိုင်တာပေါ့။

ကိုမင်းဦး– ဘာကိုပြောချင်တာလဲ။

ကိုရဲဇော်– အင်း၊ ပြောရရင်တော့ဗျာ၊ ကျမ်းစာကို လွန်ခဲ့တဲ့နှစ်ပေါင်းများစွာက ရေးခဲ့ပေမဲ့ ဒီနေ့ထိ လက်တွေ့ကျတဲ့ လမ်းညွှန်ချက်တွေပါတယ်။

ကိုမင်းဦး– ဟုတ်လား၊ ဘယ်ကိစ္စတွေမှာလဲ။

ကိုရဲဇော်– ငွေကြေးအပေါ် မျှတတဲ့အမြင်ရှိအောင်၊ သာယာချမ်းမြေ့တဲ့ မိသားစုဘဝရအောင်၊ မိတ်ဆွေကောင်းဖြစ်အောင် စတဲ့ကိစ္စတွေမှာ ကျမ်းစာလမ်းညွှန်ချက်တွေက ထောက်ကူပေးနိုင်တယ်။ ကျမ်းစာက ဘဝမှာ အောင်မြင်မှုရစေတဲ့ လမ်းညွှန်မြေပုံနဲ့တူတယ်။ ဥပမာ၊ ဒီနေ့ခေတ်မှာ ခင်ပွန်းကောင်း၊ ဖခင်ကောင်းဖြစ်ဖို့ ဘယ်လောက်ခက်မှန်း ခင်ဗျားသိတယ် မဟုတ်လား။

ကိုမင်းဦး– ဟုတ်တယ်၊ ခင်ဗျား ပြောတာတွေကို ကျွန်တော် လက်ခံတယ်။ ကျွန်တော် အိမ်ထောင်ကျတာ တစ်နှစ်လောက်ရှိပြီ။ ဒါပေမဲ့ ကျွန်တော်တို့ လင်မယားနှစ်ယောက် တစ်ခါတလေ သဘောထားကွဲလွဲကြတယ်။

ကိုရဲဇော်– မှန်တာပေါ့။ ဒါပေမဲ့ ကျမ်းစာမှာ ရိုးရှင်းတဲ့လမ်းညွှန်ချက်တွေပါတယ်။ ဥပမာ၊ ဧဖက် အခန်းကြီး ၅၊ အခန်းငယ် ၂၂၊ ၂၃ နဲ့ ၂၈ တို့ကို ဖတ်ကြည့်ရအောင်။ ကျေးဇူးပြု၍ ဖတ်ပေးနိုင်မလား။

ကိုမင်းဦး– ရပါတယ်။ “ဇနီးဖြစ်သူတို့၊ သခင်ကို လက်အောက်ခံသကဲ့သို့ ကိုယ့်ခင်ပွန်းကို လက်အောက်ခံကြလော့။ ခရစ်တော်သည် မိမိ၏ခန္ဓာကိုယ်တည်းဟူသော အသင်းတော်ကို ကယ်တင်၍ ထိုအသင်းတော်၏ ဦးခေါင်းဖြစ်တော်မူသကဲ့သို့ ခင်ပွန်းသည် ဇနီး၏ဦးခေါင်းဖြစ်၏။” အခန်းငယ် ၂၈ မှာ “ထိုနည်းတူ ခင်ပွန်းသည်လည်း ကိုယ့်ကိုယ်ကိုယ် ချစ်သကဲ့သို့ ဇနီးကို ချစ်သင့်၏။ မိမိဇနီးကို ချစ်သောသူသည် ကိုယ့်ကိုယ်ကိုယ် ချစ်သောသူဖြစ်၏။”

ကိုရဲဇော်– ကျေးဇူးပဲ။ ဒီလိုရိုးရှင်းတဲ့ အကြံပြုချက်တွေကို လင်မယားနှစ်ယောက်စလုံး ကြိုးစားကျင့်သုံးမယ်ဆိုရင် မိသားစုဘဝ အောင်မြင်လာမယ်ဆိုတာ အမှန်ပဲမဟုတ်လား။

ကိုမင်းဦး– မှန်တာပေါ့၊ ဒါပေမဲ့ အပြောလွယ်သလောက် အလုပ်ခက်တယ်။

ကိုရဲဇော်– မှန်ပါတယ်၊ ဘယ်သူမှ ခြောက်ပြစ်ကင်းသဲလဲစင် မဟုတ်ပါဘူး။ ကျွန်တော်တို့ကို အကျိုးသင့်အကြောင်းသင့်ရှိဖို့ ကျမ်းစာက အားပေးထားပါတယ်။ * မိတ်ဆွေအချင်းချင်း၊ လင်မယားအချင်းချင်း ဆက်ဆံတဲ့အခါ ဟန်ချက်ညီဖို့၊ အလျှော့ပေးတတ်ဖို့ လိုတယ်။ အဲဒီလို ဟန်ချက်ညီအောင် ကျမ်းစာက ထောက်ကူပေးနိုင်မှန်း ကျွန်တော်တို့ဇနီးမောင်နှံ တွေ့ရှိခဲ့တယ်။

ကိုမင်းဦး– ခင်ဗျားပြောတာ အဓိပ္ပာယ်ရှိပုံပဲ။

ကိုရဲဇော်– ယေဟောဝါသက်သေတွေရဲ့ တရားဝင်ဝက်ဘ်ဆိုက်ပေါ်မှာ မိသားစုဘဝ အောင်မြင်ဖို့ လမ်းညွှန်ချက်ကောင်းတွေ တင်ထားပေးတယ်။ ခင်ဗျား အချိန်ရမယ်ဆိုရင် ဝက်ဘ်ဆိုက်ထဲက နမူနာတစ်ခုလောက် ပြပေးချင်ပါတယ်။

ကိုမင်းဦး– ရပါတယ်။

ကိုရဲဇော်– ကျွန်တော်တို့ရဲ့ ဝက်ဘ်ဆိုက် www.pr418.com/mya ကိုဖွင့်ဖွင့်ချင်း ဒီပင်မစာမျက်နှာကို တွေ့ရမယ်။

ကိုမင်းဦး– ဓာတ်ပုံတွေက ကောင်းလှချည်လား။

ကိုရဲဇော်– ဟုတ်တယ်။ ဒီပုံတွေက ကျမ်းစာအကြောင်း ကမ္ဘာတစ်ဝန်းမှာ ဟောပြောနေတဲ့ပုံတွေဖြစ်တယ်။ ဒီမှာ “ဇနီးမောင်နှံများနဲ့ မိဘများ” ဆိုတဲ့ အပိုင်းရှိတယ်။ အဲဒီအပိုင်းအောက်မှာ အခြေအနေအမျိုးမျိုးကို ကိုင် တွယ်ဖြေရှင်းဖို့ အကြံပေးထားတဲ့ ဆောင်းပါးတိုတွေရှိတယ်။ ဘယ်အကြောင်းကို ခင်ဗျားစိတ်ဝင်စားလဲ။

ကိုမင်းဦး– “အိမ်ထောင်ရေးပြဿနာများကို ဖြေရှင်းခြင်း” အကြောင်းစိတ်ဝင်စားတယ်။ အဲဒါကို ကျွန်တော် စမ်းကြည့်ချင်တယ်။

ကိုရဲဇော်– ပြဿနာတွေကို ဖြေရှင်းနိုင်မယ့် အဆင့်လေးဆင့်ကို ဒီဆောင်းပါးမှာ ဖော်ပြထားတယ်။ ဒီစာပိုဒ်လေးက တော်တော်ကောင်းတာ။ ဖတ်ပေးနိုင်မလား ကိုမင်းဦး။

ကိုမင်းဦး– ရတာပေါ့။ “အိမ်ထောင်တွင် ပြောဆိုဆက်ဆံရေးသည် အသက်သွေးကြောဖြစ်ပါက မေတ္တာနဲ့ လေးစားမှုသည် နှလုံးနှင့်အဆုတ်များဖြစ်သည်။” ဒီလိုရှင်းပြချက်ကို ကျွန်တော်ကြိုက်တယ်ဗျာ။

ကိုရဲဇော်– ဖတ်ပေးတဲ့အတွက် ကျေးဇူးပဲ။ ဒီမှာ ကျမ်းချက်တစ်ချက်လည်း ညွှန်းထားသေးတယ်။ အဲဒီကျမ်းချက်ကို ကလစ်လေးထောက်ပြီး ဖွင့်ပေးနိုင်မလား။

ကိုမင်းဦး– ရပါတယ်။ တွေ့ပြီ၊ ဧဖက် ၅:၃၃ ပဲ။ “သို့ဖြစ်၍ သင်တို့အသီးသီးသည် ကိုယ့်ကိုယ်ကိုယ် ချစ်သကဲ့သို့ ကိုယ့်ဇနီးကို ချစ်ကြလော့။ ဇနီးသည်လည်း မိမိ၏ခင်ပွန်းကို အလွန်ရိုသေသင့်၏။”

ကိုရဲဇော်– ဒီကျမ်းချက်မှာ လင်မယားအချင်းချင်း အပြန်အလှန် မျှော်လင့်ရာတွေကို ဖြည့်ဆည်းပေးဖို့ အလေးပေးထားတယ်ဆိုတာ ခင်ဗျား တွေ့လား။

ကိုမင်းဦး– ခင်ဗျား ဘာကိုဆိုလိုနေမှန်း သိပ်သဘောမပေါက်ဘူး။

ကိုရဲဇော်– ရှင်းရှင်းလေးပြောရရင် ခင်ပွန်းဖြစ်သူက ဇနီးသည်ရဲ့ ရိုသေလေးစားမှုကို လိုချင်သလို ဇနီးဖြစ်သူကလည်း ခင်ပွန်းသည်ရဲ့ မေတ္တာကို လိုချင်ကြတယ် မဟုတ်လား။

ကိုမင်းဦး– ဟုတ်တယ်။ ခင်ဗျားပြောတာ မှန်တယ်။

ကိုရဲဇော်– ခင်ပွန်းဖြစ်သူက ဇနီးကိုချစ်ကြောင်းပြမယ်ဆိုရင် ဇနီးဖြစ်သူကလည်း ခင်ပွန်းကို ရိုသေလေးစားဖို့ လွယ်တယ်မဟုတ်လား။

ကိုမင်းဦး– ခင်ဗျား ပြောတဲ့အချက်က အဓိပ္ပာယ်ရှိပုံပဲ။

ကိုရဲဇော်– ဒါကြောင့် လွန်ခဲ့တဲ့နှစ်ပေါင်း ၂၀၀၀ ဝန်းကျင်လောက်က ရေးခဲ့တဲ့ ဒီကျမ်းချက်တစ်ချက်ထဲမှာပဲ လင်မယားတွေရဲ့ အပြန်အလှန် လိုချင်ရာတွေအပြင် လက်တွေ့ကျတဲ့ လမ်းညွှန်ချက်ကို ဖော်ပြပေးထားတယ်။ အဲဒီလမ်းညွှန်ချက်ကို ကျင့်သုံးမယ်ဆိုရင် အောင်မြင်နိုင်မယ်။ အစပိုင်းက ပုံဥပမာအတိုင်း “နှလုံးနဲ့အဆုတ်” ဖြစ်တဲ့ မေတ္တာနဲ့လေးစားမှုရှိရင် အိမ်ထောင်က သာယာချမ်းမြေ့နေမှာဖြစ်တယ်။

ကိုမင်းဦး– ကျမ်းစာက ကျွန်တော်ထင်ထားတာထက်တောင် ပိုလက်တွေ့ကျသေးတယ်။

ကိုရဲဇော်– အခုလို ကြားရတာဝမ်းသာတယ်ဗျာ၊ ကိုမင်းဦး။ ဝက်ဘ်ဆိုက်ပေါ်မှာ * ကျွန်တော်တို့ ဖတ်ခဲ့တဲ့ ဆောင်းပါးထဲက “ပြဿနာဖြေရှင်းရန် အဆင့်လေးဆင့်” ကို အတူတူ ဆွေးနွေးဖို့ ခင်ဗျားနဲ့ ပြန်တွေ့ချင်တယ်။ ဖြစ်မလား။

ကိုမင်းဦး– ဖြစ်တာပေါ့။ ကျွန်တော်တို့ လင်မယားနှစ်ယောက် အဲဒီအကြောင်းကို အတူတူ သေသေချာချာ ဖတ်ထားလိုက်မယ်နော်။.