ကမ္ဘာတစ်ဝန်းက သန်းနဲ့ချီတဲ့ ကက်သလစ်တွေဟာ ၁၈၇၀၊ ပထမဗက်တီကန်ကောင်စီရဲ့ ထုတ်ပြန်ချက်ကို ချာ့ခ်ျကျောင်းရဲ့ မပြောင်းလဲနိုင်တဲ့ တရားသေအယူဝါဒအဖြစ် ရှုမြင်ထားကြတယ်။ ဒါပေမဲ့ မေးစရာက အဲဒီသွန်သင်ချက်ဟာ ကျမ်းစာနဲ့ ကိုက်ညီရဲ့လား။ ဒီအပြင် ပုပ်ရဟန်းမင်း ဖရန်စစ်က တမန်တော်ပေတရုနေရာကိုဆက်ခံသူ တကယ်ဟုတ်သလား။ ပေတရုက ဦးဆုံးပုပ်ရဟန်းမင်းလား။

၁၈၇၀၊ ဗက်တီကန်ကောင်စီရဲ့ထုတ်ပြန်ချက်ဟာ မဿဲ ၁၆:၁၆-၁၉၊ ယောဟန် ၂၁:၁၅-၁၇ တို့ရဲ့ အနက်ကောက်ယူမှုအပေါ် အခြေခံထားတယ်။ အဲဒီကျမ်းချက်တွေနဲ့ တခြားကျမ်းချက်တွေမှာဖတ်ရတဲ့ ပေတရုနဲ့ ယေရှုတို့ရဲ့ အပြန်အလှန်စကားအရ အစောပိုင်းခရစ်ယာန်ဘာသာသမိုင်းကြောင်းမှာ ပေတရုဟာ အရေးပါသူတစ်ဦးဖြစ်ကြောင်း သိရတယ်။ ယေရှုက ပေတရုကို တွေ့တွေ့ချင်း သူဟာ ကျောက်လိုခိုင်မာတဲ့ အရည်အသွေးတွေ ပြသမယ်လို့ ကြိုပြောခဲ့တယ်။ (ယောဟန် ၁:၄၂) ဒါပေမဲ့ ယေရှုဟာ ပေတရုကို ခေါင်းဆောင်အာဏာ ပေးခဲ့သလား။

မဿဲ ၁၆:၁၇၊ ၁၈ မှာ ပေတရုကို ယေရှု ဒီလိုပြောခဲ့တယ်– “ငါသည်လည်း သင်အား ဆိုသည်မှာ သင်သည် ပေတရု [နာမည်အဓိပ္ပာယ်က “ကျောက်”] ဖြစ်၏။ ဤကျောက်ပေါ်တွင် ငါ၏အသင်းတော်ကို ငါတည်ဆောက်မည်။” * ဒါကြောင့် ပေတရုအပေါ်မှာ “ချာ့ခ်ျ” ဒါမှမဟုတ် အသင်းတော် တည်ထောင်မယ်လို့ ယေရှု ပြောနေတာလား။ ပေတရုဟာ ယေရှုတပည့်အားလုံးရဲ့ ခေါင်းဆောင်လို့ ဆိုလိုနေတာလား။ ယေရှုပြောတာကိုကြားတဲ့ တခြားတမန်တော်တွေကရော ဘယ်လို နားလည်ခဲ့သလဲ။ အဲဒီနောက်ပိုင်းမှာ ဘယ်သူအကြီးမြတ်ဆုံးလဲလို့ သူတို့အချင်းချင်း ခဏခဏ ငြင်းခုံကြတဲ့အကြောင်း ခရစ်ဝင်ကျမ်းတွေမှာ ဖော်ပြထားတယ်။ (မဿဲ ၂၀:၂၀-၂၇; မာကု ၉:၃၃-၃၅; လုကာ ၂၂:၂၄-၂၆) ယေရှုသာ ပေတရုကို ခေါင်းဆောင်ရာထူးပေးပြီးသားဆိုရင် တမန်တော်တွေထဲမှာ ဘယ်သူအကြီးဆုံးလဲဆိုတာကို ငြင်းခုံစရာအကြောင်းရှိပါဦးမလား။

ပေတရုကိုယ်တိုင်ရော ယေရှုစကားကို ဘယ်လိုနားလည်ခဲ့သလဲ။ အစ္စရေးတစ်ယောက်ဖြစ်တဲ့ ပေတရုဟာ “ကျောက်၊” “တိုက်ထောင့်အမြစ်ကျောက်” နဲ့ပတ်သက်တဲ့ ဓမ္မဟောင်းကျမ်း ကြိုဟောချက်တွေ အကြောင်း ကောင်းကောင်းသိကျွမ်းခဲ့မှာ သေချာတယ်။ (ဟေရှာယ ၈:၁၃၊ ၁၄; ၂၈:၁၆; ဇာခရိ ၃:၉) အဲဒီထဲက ကျမ်းတစ်ချက်ကို ကိုးကားပြီး ယုံကြည်သူချင်းတွေဆီ ပေတရုစာရေးတဲ့အခါ “ထောင့်ချုပ်ကျောက်” ဟာ သခင်ယေရှုခရစ် ဖြစ်တယ်လို့ သူရှင်းပြခဲ့တယ်။ ပေတရုဟာ ဂရိစကားလုံး ပက်ထရာ (မဿဲ ၁၆:၁၈ ပါ ယေရှု ပြောခဲ့တဲ့စကားလုံး) ကို ခရစ်တော်တစ်ဦးတည်းအတွက်သာ သုံးခဲ့ပါတယ်။

တမန်တော်ပေါလုလည်း ခရစ်တော်ယေရှုရဲ့ သစ္စာရှိတပည့်တစ်ဦးဖြစ်တယ်။ ယေရှုဟာ ပေတရုကို ခေါင်းဆောင်အရာ ပေးခဲ့တယ်လို့ ပေါလု ယူမှတ်သလား။ အစောပိုင်းခရစ်ယာန်အသင်းတော်မှာ ပေတရုရဲ့အနေအထားကို ပေါလုအသိအမှတ်ပြုတဲ့အနေနဲ့ ပေတရုဟာ “မဏ္ဍိုင်များအဖြစ် အသိအမှတ်ပြုခြင်းခံရ” သူထဲက တစ်ဦးဖြစ်တယ်လို့ ရေးခဲ့တယ်။ ပေါလုအဆိုအရ ‘မဏ္ဍိုင်’ တစ်ဦးထက်မက ရှိတယ်။ (ဂလာတိ ၂:၉) ဒါ့အပြင် ယေရှုက ပေတရုကို အသင်းတော်ခေါင်းဆောင်အဖြစ် ခန့်အပ်ပြီးသားဆိုရင် သူဟာ မဏ္ဍိုင်အဖြစ် အသိအမှတ်ပြုခြင်းခံရသူတစ်ဦးလောက်သာ ဘယ်လိုလုပ်ဖြစ်နိုင်မှာလဲ။

လူတွေကို ပေတရု အမျိုးမျိုးဆက်ဆံပုံအကြောင်း ပေါလုစာရေးတဲ့အခါ ပွင့်ပွင့်လင်းလင်း အခုလိုပြောခဲ့တယ်– “သူ၏ မှားယွင်းသောအပြုအမူကြောင့် ငါသည် သူ့ကိုမျက်နှာချင်းဆိုင်၍ ဆန့်ကျင်ပြောဆိုခဲ့၏။” (ဂလာတိ ၂:၁၁-၁၄) ခရစ်တော်ဟာ အသင်းတော်ကို ပေတရု ဒါမှမဟုတ် အပြစ်များတဲ့ ဘယ်သူ့အပေါ်မှာမှ မတည်ထောင်ကြောင်း ပေါလု သိထားတယ်။ အသင်းတော်ဟာ ခရစ်တော်ယေရှုအပေါ်မှာပဲ တည်ထောင်ထားကြောင်း သူ ယုံကြည်တယ်။ ပေါလုအတွက်ဆိုရင် “ကျောက်ဆောင်သည်ကား ခရစ်တော်” ပဲ။—၁ ကောရိန္သု ၃:၉-၁၁; ၁၀:၄။

ဒါဆို “သင်သည် ပေတရုဖြစ်၏။ ဤကျောက်ပေါ်တွင် ငါ၏အသင်းတော်ကို ငါတည်ဆောက်မည်” ဆိုတဲ့စကားကို ဘယ်လိုနားလည်ရမလဲ။ မှန်မှန်ကန်ကန်နားလည်နိုင်ဖို့ အထက်အောက်စကားတွေကို ဖတ်ဖို့လိုပါတယ်။ ယေရှုနဲ့ ပေတရုတို့ ဘာအကြောင်း ပြောနေကြတာလဲ။ “သင်တို့မူကား ငါမည်သူဖြစ်သည်ဟူ၍ ဆိုကြသနည်း” လို့ တပည့်တွေကို ယေရှုမေးတော့ ပေတရုက “ကိုယ်တော်သည် အသက်ရှင်တော်မူသော ဘုရား၏သားတော်” ဖြစ်တယ်လို့ ချက်ချင်းဖြေလိုက်တယ်။ ဒါနဲ့ သူ့ကို ယေရှု ချီးမွမ်းပြီးတော့ “ချာ့ခ်ျ” ကိုခိုင်ခံ့တဲ့ “ကျောက်” အပေါ် တည်ထောင်မယ်လို့ ကိုယ်တော် ထပ်ပြောတယ်။  အဲဒီကျောက်ကတော့ ပေတရု ယုံကြည်ပါတယ်လို့ အခုလေးတင်ပြောခဲ့တဲ့ ယေရှုကိုယ်တိုင်ပါပဲ။—မဿဲ ၁၆:၁၅-၁၈။

အဲဒီလိုပဲ “ချာ့ခ်ျဖခင်တွေ” လည်း မဿဲ ၁၆:၁၈ ပါ ကျောက်ဟာ ခရစ်တော်ဖြစ်တယ်လို့ ရေးသားခဲ့ကြတယ်။ ဥပမာ၊ စီအီး ၅ ရာစုက ချာ့ခ်ျဖခင် သြဂတ်စတင်း ဒီလိုရေးခဲ့တယ်– “ပေတရုက ‘ကိုယ်တော်သည် အသက်ရှင်တော်မူသော ဘုရား၏သားတော် သခင်ခရစ်တော်ဖြစ်ပါသည်’” လို့ ပြောတဲ့အခါ သခင်က ‘ဤကျောက်ပေါ်တွင် ငါ၏အသင်းတော်ကို ငါတည်ဆောက်မည်’ လို့မိန့်ဆိုတယ်။ ဒါကြောင့် မင်းယုံကြည်တဲ့ ဤကျောက်ပေါ်မှာ ငါ့အသင်းတော်ကို ငါတည်ဆောက်မည်။” သြဂတ်စတင်းက “ကျောက် (ပက်ထရာ) ဟာ ခရစ်တော်ဖြစ်တယ်” လို့ ထပ်ခါတလဲလဲ ဖော်ပြခဲ့တယ်။

သြဂတ်စတင်းနဲ့ တခြားသူတွေကို လက်ရှိ ကက်သလစ်ယုံကြည်ချက်နဲ့ စီရင်မယ်ဆိုရင် သူတို့လည်း အယူဖောက်ပြန်သူတွေဖြစ်ကုန်မှာပဲ။ ဆွစ်ဇာလန်နိုင်ငံသား ဘာသာရေးပညာရှင် အူလ်ရစ်ခ်လုဇ်အဆိုအရ အဲဒီအကြောင်းနဲ့ပတ်သက်ပြီး အခုခေတ်ကျမ်းပညာရှင်တွေရဲ့ ယူဆချက်ကို ၁၈၇၀၊ ဗက်တီကန်ကောင်စီထုတ်ပြန်ချက်နဲ့ ချိန်ထိုးကြည့်ရင် သူတို့အားလုံး အယူဖောက်ပြန်သူတွေလို့ စွပ်စွဲခံရလိမ့်မယ်။

“ပုပ်ရဟန်းမင်း” ဆိုတဲ့ဘွဲ့ထူးကို တမန်တော်ပေတရု လုံးဝမသိခဲ့ပါ။ စီအီး ၉ ရာစုအထိ ရောမဘုန်းတော်ကြီးမဟုတ်သူတွေက သူတို့နာမည်ရှေ့မှာ ပုပ်ရဟန်းမင်းဘွဲ့ တပ်ခေါ်ကြတယ်။ စီအီး ၁၁ ရာစုကုန်ပိုင်းကျမှ ပုပ်ရဟန်းမင်းဘွဲ့ထူးကို တရားဝင်သုံးလာကြတာ ဖြစ်တယ်။ အစောပိုင်းခရစ်ယာန်တစ်ယောက်မှ ပေတရု ရခဲ့တယ်လို့ဆိုတဲ့ ခေါင်းဆောင်အခွင့်အရာကို ဆက်ခံသူရှိတယ်လို့ မယူဆကြဘူး။ ဒါကြောင့် ဂျာမန်ကျမ်းပညာရှင် မာတင် ဟဲငါ အခုလိုကောက်ချက်ချတယ်– “‘ပုပ်ရဟန်းမင်း’ ဘွဲ့ထူးဖြစ်ပေါ်လာပုံနဲ့ပတ်သက်ပြီး သမိုင်းကြောင်းမှာဖြစ်စေ၊ ကျမ်းစာမှာဖြစ်စေ သက်သေပြစရာ ဘာမှမရှိဘူး။”

ပေတရုက ဦးဆုံးပုပ်ရဟန်းမင်းလား။ သူ့နေရာကို ဆက်ခံသူတွေရှိခဲ့လား။ ကက်သလစ်ချာ့ခ်ျရဲ့ ပုပ်ရဟန်းမင်းအယူအဆက ကျမ်းစာနဲ့ကိုက်ညီသလား။ ရိုးရိုးလေးပြောရရင် အဖြေကတော့ မဟုတ်ပါဘူး။ အဖြေမှန်ကတော့ ယေရှုဟာ စစ်မှန်တဲ့ခရစ်ယာန်အသင်းတော်ကို သူ့အပေါ်မှာပဲ တည်ဆောက်ခဲ့တယ်။ (ဧဖက် ၂:၂၀) ဒါကြောင့် သင်ကော စစ်မှန်တဲ့အသင်းတော်ကို ရှာတွေ့ပြီလား။