စက်ရုံရဲ့ မီးခိုးခေါင်းတိုင်ကနေ မီးခိုး​တလူလူ​တက်နေတာကို ကလေးမလေး​တစ်ယောက် မြင်လိုက်တယ်။ မီးခိုးတွေက တိမ်စိုင်တိမ်ခဲတွေနဲ့ တူနေတော့ ဒီစက်ရုံဟာ မိုးတိမ်​ထုတ်လုပ်တဲ့ စက်ရုံပဲလို့ သူတွေးလိုက်မိတယ်။ ​ကလေး​တစ်ယောက်ရဲ့ ဒီလို နားလည်မှု လွဲမှားရုံလေးဟာ ရယ်စရာပဲ။ ဒါပေမဲ့ အရေးကြီးတဲ့​ကိစ္စတွေကို နားလည်မှု​လွဲရင်တော့ ကိုယ့်ရဲ့အသက်တာကို အများကြီး​ထိခိုက်နိုင်တယ်။ ဥပမာ၊ ဆေးညွှန်း​မှားဖတ်မိရင် ဆိုးရွား​တဲ့​အကျိုးဆက်တွေ ​ကြုံနိုင်တယ်။

ယုံကြည်ချက်နဲ့ဆိုင်တဲ့ ကိစ္စတွေမှာ နားလည်မှုလွဲတာက ပိုလို့တောင် ဆိုးရွားနိုင်တယ်။ ဥပမာ၊ လူတချို့က ယေရှုရဲ့ သွန်သင်ချက်တွေကို နားလည်​မှု လွဲခဲ့ကြတယ်။ (ယောဟန် ၆:၄၈–၆၈) သူတို့ ဆက်သင်ယူမယ့်အစား ယေရှု​သွန်သင်ပေးတဲ့အရာ မှန်သမျှကို ငြင်းပယ်လိုက်ကြတယ်။ တကယ့်ဆုံးၡုံးမှုကြီးပါပဲ။

သင်ကော လမ်းညွှန်မှုတွေရဖို့ ကျမ်းစာကိုဖတ်သလား။ ဖတ်တယ်ဆိုရင် တကယ့်ကို ချီးကျူးပါတယ်။ ဒါပေမဲ့ ဖတ်တဲ့အရာတချို့ကို နားလည်မှုလွဲနိုင်တဲ့ အန္တရာယ်ရှိသလား။ လူများစွာ အဲဒီလိုကြုံကြတယ်။ လူအများစု နားလည်မှုလွဲနေတဲ့ အမှားသုံးခုကို သုံးသပ်ကြည့်ကြစို့။

• တချို့သူတွေက ‘ဘုရား​သခင်ကို ကြောက်ရွံ့ခြင်း’ ဆိုတဲ့ ကျမ်းစကားကို နားလည်မှုလွဲကြတယ်။ ဘုရား​သခင်ကို အလွန်အမင်း ထိတ်လန့်ကြောက်ရွံ့တာကို ဆိုလိုတယ်လို့ သူတို့ယူဆကြတယ်။ (ဒေသနာ ၁၂:၁၃) ဒါပေမဲ့ ဘုရား​သခင်က အဲဒီလို အလွန်အမင်း ထိတ်လန့်ကြောက်ရွံ့ပြီး ဝတ်ပြု​ကိုးကွယ်တာကို အလိုမရှိပါဘူး။ “မစိုးရိမ်နှင့်။ ငါသည် သင့်ဘက်မှာရှိ၏။ မကြောက်နှင့်။ သင်၏​ဘုရားသခင် ငါသည် သင့်ကို​ခိုင်ခံ့စေမည်။ သင့်ကို​စောင့်မမည်။ ငါ့သစ္စာ​လက်ယာလက်ဖြင့် ထောက်ပင့်မည်” လို့ ဘုရား​သခင်​ကိုယ်တိုင် ပြောထားတယ်။ (ဟေရှာယ ၄၁:၁၀) ဘုရား​သခင်ကို ကြောက်ရွံ့တယ်ဆိုတာက ရိုးရိုးလေးပြောရရင် ဘုရား​သခင်ကို​ ကြည်ညို​ကိုင်းရှိုင်းပြီး ရိုသေလေးစားတာကို ဆိုလိုတယ်။

• တချို့သူတွေကျတော့ “ခပ်သိမ်းသော အမှုအရာတို့သည် မိမိတို့အချိန်ရှိ၏။ . . . ဖွားချိန်နှင့် သေချိန်လည်းရှိ၏” ဆိုတဲ့ ကျမ်းစကားတွေကို နားလည်မှု​လွဲကြတယ်။ ဘုရား​သခင်က လူတစ်ယောက် သေရ​မယ့်အချိန်ကို သတ်မှတ်တယ်လို့ သူတို့ယူဆကြတယ်။ (ဒေသနာ ၃:၁၊ ၂) တကယ်တော့ ဒီကျမ်းချက်က လူ့ဘဝရဲ့ သေခြင်း၊ ရှင်ခြင်း​အကြောင်း ပြောနေတာဖြစ်ပြီး သေခြင်းကို လူတိုင်းကြုံတွေ့ရတဲ့အကြောင်း ကောက်ချက်ချရုံပါပဲ။ ဒါ့အပြင် ကိုယ့်ဆုံးဖြတ်ချက်က ဘဝ​သက်တမ်းကို တိုစေ၊ ရှည်စေနိုင်တယ်လို့လည်း ကျမ်းစာမှာ ဖော်ပြထားတယ်။ ဥပမာ၊ “ထာဝရဘုရားကို ကြောက်ရွံ့သော​သဘောသည် အသက်တာကို ရှည်စေတတ်၏” လို့ဖတ်ရတယ်။ (သုတ္တံ ၁၀:၂၇။ ဆာလံ ၉၀:၁၀။ ဟေရှာယ ၅၅:၃) ဒါက ဘယ်လိုနည်းနဲ့ ဖြစ်နိုင်သလဲ။ ဥပမာ၊ ဘုရားသခင့် နှုတ်ထွက်စကားကို လေးစားတဲ့စိတ်က အရက်သောက်တာ၊ ကိုယ်ကျင့်တရား​ပျက်ပြားတာလိုမျိုး ကျန်းမာရေး​ထိခိုက်စေတဲ့ အကျင့်တွေကိုရှောင်ဖို့ လှုံ့ဆော်ပေးတယ်။—၁ ကောရိန္သု ၆:၉၊ ၁၀။

• တချို့ကျပြန်တော့ ကောင်းကင်နဲ့​မြေကြီးဟာ ‘မီးရှို့ရန်သိုထားခံရ’ တယ်ဆိုတဲ့ ကျမ်းစကားကို စာသားအတိုင်း အဓိပ္ပာယ်ကောက်ပြီး ကမ္ဘာမြေကို ဘုရား​သခင် ဖျက်ဆီးလိမ့်မယ်လို့ ယူမှတ်ကြတယ်။ (၂ ပေတရု ၃:၇) ဒါပေမဲ့ ဘုရား​သခင်က ကမ္ဘာမြေကို ဖျက်ဆီးဖို့ ဘယ်တော့မှ ခွင့်ပြု​မှာမဟုတ်ဘူးလို့ ကတိပေးထားတယ်။ ဘုရားသခင်က ‘မြေကြီးအမြစ်ကို ကာလအစဉ်အမြဲ မရွေ့မလှုပ်စေဖို့ တည်ထားတယ်။’ (ဆာလံ ၁၀၄:၅။ ဟေရှာယ ၄၅:၁၈) ဒါကြောင့် ကမ္ဘာမြေကြီးကို မဟုတ်ဘဲ အကျင့်ပျက်ခြစားနေတဲ့ ဒီလောကစနစ်ကို မီးနဲ့ဖျက်ဆီးသလို အပြီးသတ် ဖယ်ရှားပစ်မှာ ဖြစ်တယ်။ ကောင်းကင်ကို စာသားအတိုင်းယူမယ်ဆိုရင် မိုးကောင်းကင်၊ ကြယ်အတိပြီးတဲ့ စကြဝဠာ ဒါမှမဟုတ် ဘုရားသခင် စံမြန်းတဲ့နေရာ ဖြစ်တယ်။ ဒါတွေ ဖျက်ဆီးခံရမှာ မဟုတ်ဘူး။

လူများစွာဟာ သူတို့ဖတ်တဲ့ ကျမ်းချက်တွေရဲ့ အဓိပ္ပာယ်ကို နားလည်မှု​လွဲတတ်ကြမှန်း ဒီဥပမာတွေကနေ သိရတယ်။ ဘုရားက ဘာလို့ အဲဒီလိုဖြစ်ခွင့်ပြုရတာလဲ။ တချို့သူတွေက ‘ဘုရားသခင်ဟာ ဉာဏ်ပညာအရှိဆုံးအရှင်၊ အရာခပ်သိမ်းကို သိနိုင်တဲ့​အရှင်ဆိုရင် လူတိုင်း အလွယ်တကူ​နားလည်အောင် ရေးထားတဲ့ ကျမ်းစာကို ပေးသင့်တာပေါ့။ ဘာဖြစ်လို့ အဲဒီ​လိုမပေးတာပါလိမ့်’ လို့ ပြောကြတယ်။ ကျမ်းစာကို နားလည်မှု​လွဲရတဲ့ အကြောင်းရင်း​သုံးခုကို သုံးသပ်ကြည့်ကြစို့။

1. ၁။ နှိမ့်ချသူ၊ သင်ယူလိုစိတ်ရှိသူတွေပဲ နားလည်ဖို့ ကျမ်းစာကို ရေးသားထားတယ်။ ယေရှုက သူ့ဖခင်ကို “ကောင်းကင်နှင့် မြေကြီးကို အစိုးရတော်မူသောအဖ၊ ကိုယ်တော်သည် ဤအကြောင်းအရာတို့ကို ပညာရှိသောသူနှင့် ဉာဏ်ကောင်းသောသူတို့ မသိစေရန် ဝှက်ထားလျက် သူငယ်တို့အား ဖော်ပြတော်မူသောကြောင့် ကိုယ်တော်အား ချီးမွမ်းပါ၏”  ဆိုပြီး ပြောခဲ့တယ်။ (လုကာ ၁၀:၂၁) သဘောထားအမှန်ရှိသူတွေပဲ ကျမ်းစကားတွေရဲ့ အဓိပ္ပာယ်ကို နားလည်ဖို့ ကျမ်းစာကို ရေးသားထားတယ်။ “ပညာရှိသောသူနှင့် ဉာဏ်ကောင်းသောသူတို့” မှာဖြစ်တတ်တဲ့ မာနကြီးတဲ့​သဘောထားမျိုးရှိသူတွေဟာ ကျမ်းစာကို နားလည်မှု​လွဲလေ့ရှိတယ်။ ဒါပေမဲ့ နှိမ့်ချပြီး သင်ယူလိုစိတ်ရှိတဲ့ ‘သူငယ်တွေ’ ရဲ့ သဘောထားမျိုးရှိသူတွေကတော့ ကျမ်း​စကားတွေရဲ့ အဓိပ္ပာယ်ကို ပိုနားလည်ခွင့်​ရကြတယ်။ ကျမ်းစာကို ဘုရား​သခင်​ရေးသားထားပုံဟာ တကယ့်ကို ပညာသားပါတယ်။

2. ၂။ ဖတ်ရှုပြီး နားလည်နိုင်ဖို့ ဘုရား​သခင့်​အကူအညီကို စိတ်ရင်းမှန်နဲ့ လိုချင်သူတွေအတွက် ကျမ်းစာကို ရေးသားထားတယ်။ ယေရှုက သူသွန်သင်တဲ့ အကြောင်းအရာတွေကို လူတွေ အပြည့်အဝနားလည်နိုင်ဖို့ အကူအညီ​လိုအပ်တယ်လို့ ပြောခဲ့တယ်။ ဒီအကူအညီကို ဘယ်လိုရနိုင်မလဲ။ “ခမည်းတော်သည် ငါ၏နာမ၌ စေလွှတ်တော်မူသော ကူညီမစသူဖြစ်သည့် သန့်ရှင်းသော စွမ်းအားတော်သည် သင်တို့အား ခပ်သိမ်း​သောအရာများကို သွန်သင်တော်မူမည်” လို့ ယေရှုပြောခဲ့တယ်။ (ယောဟန် ၁၄:၂၆) ဘုရားသခင်က လူတွေ ကျမ်းစာဖတ်တဲ့အခါ နားလည်နိုင်ဖို့ ကူညီပေးတဲ့အနေနဲ့ သန့်ရှင်းသော​စွမ်းအားတော်ကို ပေးတယ်။ ဒါပေမဲ့ ကိုယ်တော့်အကူအညီကို အားမကိုး​သူတွေကိုတော့ စွမ်းအားတော်မပေးတဲ့အတွက် ကျမ်းစာဟာ သူတို့အမြင်မှာ နားလည်ရ​ခက်နေတယ်။ ကျမ်းစာအကြောင်း ပိုနားလည်ချင်သူတွေကို ကူညီပေးဖို့ သန့်ရှင်းသော​စွမ်းအားတော်က ကျမ်းစာ​အသိပညာပိုရှိတဲ့ ခရစ်ယာန်တွေကို လှုံ့ဆော်ပေးတယ်။—တမန်တော် ၈:၂၆-၃၅။

3. ၃။ တချို့​ကျမ်းစကားတွေကို လူ့သမိုင်းမှာ သင့်တော်တဲ့​အချိန်ရောက်မှပဲ နားလည်ရတယ်။ ဥပမာ၊ ကြိုဟောသူ​ဒံယေလဟာ အနာဂတ်နဲ့ပတ်သက်တဲ့ သတင်းစကားတွေကို ရေးသားဖို့ မိန့်မှာခံရတယ်။ ကောင်းကင်တမန်က “သင်ဒံယေလမူကား အမှုကုန်ရသည်​ကာလတိုင်အောင် ဤစကားတော်တို့ကို ပိတ်၍ စာစောင်ကို တံဆိပ်​ခတ်ထားလော့” လို့ပြောခဲ့တယ်။ ရာစုနှစ်များ​တစ်လျှောက် လူများစွာဟာ ဒံယေလ​ကျမ်းကို ဖတ်ပေမဲ့ အဓိပ္ပာယ်​နားမလည်ခဲ့ဘူး။ ဒံယေလ​ကိုယ်တိုင်တောင် သူရေးခဲ့တဲ့ တချို့​အကြောင်းအရာတွေကို နားမလည်ခဲ့ဘူး။ ‘ထိုစကားကို ငါကြား၍ နားမလည်’ လို့ သူရိုးရိုးသားသား ဝန်ခံ​ခဲ့တယ်။ လူတွေဟာ ဒံယေလ​ရေးသားခဲ့တဲ့ ကြိုဟောချက်တွေကို ဘုရားသခင်​ရွေးချယ်တဲ့ သင့်တော်တဲ့​အချိန်​ရောက်မှပဲ မှန်မှန်ကန်ကန် နားလည်​ပါလိမ့်မယ်။ ကောင်းကင်တမန်က “ဒံယေလ၊ သင်သွားလော့။ ထိုစကားသည် အမှုကုန်ရသည်​ကာလတိုင်အောင် ပိတ်၍ တံဆိပ်​ခတ်ထားလျက်ရှိ၏” လို့ပြောခဲ့တယ်။ ဘုရားသခင့်​သတင်း​စကားတွေကို ဘယ်သူတွေ နားလည်ကြမလဲ။ “မတရားသောသူတို့သည် မတရားသဖြင့်ပြု၍ တစ်ယောက်မျှ​နားမလည်ရ။ ပညာရှိသော​သူတို့မူကား [ထိုးထွင်း​ဉာဏ်ရှိသူတို့၊ ကဘ] နားလည်ကြလိမ့်မည်။” (ဒံယေလ ၁၂:၄၊ ၈–၁၀) ဒါကြောင့် ဘုရား​သခင်က တချို့​ကျမ်းစကားတွေရဲ့ အဓိပ္ပာယ်ကို သင့်တော်တဲ့​အချိန်​မရောက်မချင်း မဖော်ပြဘူး။

အချိန်မတိုင်သေးတဲ့အတွက် ယေဟောဝါ​သက်သေတွေ ကျမ်းစာကို နားလည်မှု​လွဲခဲ့တာမျိုး ရှိသလား။ ရှိပါတယ်။ ဒါပေမဲ့ ကိစ္စရပ်တွေကို ဘုရား​သခင် ရှင်းရှင်းလင်းလင်း ဖော်ပြပေးတဲ့အချိန် ရောက်လာတဲ့အခါမှာတော့ ယေဟောဝါ​သက်သေတွေဟာ နားလည်မှုတွေကို ပြုပြင်​ပြောင်းလဲဖို့ အသင့်ရှိခဲ့တယ်။ ဒီလိုနည်းနဲ့ ခရစ်တော်ရဲ့ တမန်တော်တွေကို အတုယူနေတယ်လို့ ယုံကြည်ကြတယ်။ တမန်တော်တွေဟာ သူတို့ရဲ့ အတွေးအခေါ်ကို ယေရှု​တည့်မတ်ပေးတဲ့အခါတိုင်း နှိမ့်ချစွာ ပြုပြင်​ပြောင်းလဲခဲ့ကြတယ်။—တမန်တော် ၁:၆၊ ၇။

မိုး​တိမ်​တွေနဲ့ပတ်သက်ပြီး ကလေးမလေးရဲ့ စိတ်ကူးယဉ်ဆန်တဲ့​အတွေးဟာ နားလည်မှု လွဲမှားရုံလေးပါပဲ။ ဒါပေမဲ့ ကျမ်းစာ​သွန်သင်ချက်တွေကတော့ သင့်အတွက် အရေးကြီးပါတယ်။ ကျမ်း​စကားတွေဟာ သိပ်အရေးကြီးတာမို့ ကျမ်းစာ​ဖတ်တဲ့အခါ ကိုယ့်ဘာသာကိုယ် နားလည်ဖို့ မကြိုးစားသင့်ဘူး။ ဒါကြောင့် ဖတ်ရှုတဲ့အရာကို နားလည်နိုင်ဖို့ အကူအညီရယူပါ။ နှိမ့်ချတဲ့စိတ်နဲ့ ကျမ်းစာ​လေ့လာနေသူတွေ၊ ကျမ်းစာကို နားလည်ဖို့ ဘုရားသခင့် သန့်ရှင်းသော​စွမ်းအားတော်ကို အားကိုးသူတွေ၊ ကျမ်းစာကို ဘုရားသခင်​နားလည်စေချင်တဲ့​အချိန်၊ လူ့သမိုင်းရဲ့ အထူးခြားဆုံး​အချိန်မှာ ကျွန်တော်တို့ အသက်ရှင်နေမှန်း အခိုင်အမာ​ယုံကြည်သူတွေကို ရှာဖွေပါ။ ယေဟောဝါ​သက်သေတွေကို မေးမြန်းဖို့၊ သူတို့ရဲ့ jw.org ဝက်ဘ်ဆိုက်မှာ အသေအချာ သုတေသနလုပ်ပြီး တင်ပေးထားတဲ့ အကြောင်းအရာတွေကို ဖတ်ကြည့်ဖို့ မတွန့်ဆုတ်ပါနဲ့။ “အသိပညာရရှိရန် တိုးလျှိုးတောင်းပန်လော့။ . . .  ဘုရား​သခင်၏ အကြောင်းတော်ကို သိမြင်နိုင်လိမ့်မည်” လို့ ကျမ်းစာမှာ ကတိပြုထားပါတယ်။—သုတ္တံ ၂:၃–၅၊ ခမ။