ဗျာဒိတ် ၈:၁-၁၃
၈ သတ္တမတံဆိပ်ကို သိုးသငယ် ဖွင့်သောအခါ ကောင်းကင်ဘုံတွင် နာရီဝက်ခန့် ဆိတ်ငြိမ်သွား၏။
၂ ထို့နောက် ဘုရားသခင့် ရှေ့တော်၌ရပ်နေသော ကောင်းကင်တမန် ခုနစ်ပါးကို ငါမြင်၏။ သူတို့အား တံပိုးခုနစ်လက်ကိုပေး၏။
၃ ထို့နောက် အခြားကောင်းကင်တမန်တစ်ပါး ရောက်လာပြီး ယဇ်ပလ္လင်နားမှာ ရပ်နေ၏။ သူ၌ နံ့သာပေါင်းရှို့သော ရွှေလင်ပန်းရှိ၏။ သန့်ရှင်းသူအပေါင်းတို့၏ ဆုတောင်းချက်များ နားညောင်းခံရစဉ် ပလ္လင်တော်ရှေ့၌ရှိသော ရွှေယဇ်ပလ္လင်ပေါ်တွင် ပူဇော်ရန် များစွာသော နံ့သာပေါင်းကို သူ့အား ပေးထား၏။
၄ နံ့သာပေါင်းအငွေ့သည် သန့်ရှင်းသူတို့၏ ဆုတောင်းချက်များနှင့်အတူ ကောင်းကင်တမန်၏လက်မှ ဘုရားသခင့်ရှေ့တော်သို့ တက်လေ၏။
၅ သို့သော် ကောင်းကင်တမန်သည် နံ့သာပေါင်းလင်ပန်းကို ချက်ချင်းယူ၍ ယဇ်ပလ္လင်ပေါ်မှမီးဖြင့် ဖြည့်ပြီးလျှင် မြေကြီးပေါ်သို့ ပစ်ချလိုက်၏။ ထိုအခါ မိုးခြိမ်းသံများ၊ စကားသံများ၊ လျှပ်စီးများနှင့် မြေငလျင် ဖြစ်ပေါ်လာ၏။
၆ တံပိုးခုနစ်လက်ကို ကိုင်ဆောင်သော ကောင်းကင်တမန် ခုနစ်ပါးသည် တံပိုးမှုတ်ရန် အသင့်ပြင်ဆင်ကြ၏။
၇ ပထမကောင်းကင်တမန်သည် တံပိုးမှုတ်လိုက်ရာ သွေးနှင့်ရောသော မီးနှင့်မိုးသီးဖြစ်ပေါ်၍ မြေကြီးပေါ်သို့ ပစ်ချခံရသဖြင့် မြေကြီးသုံးပုံတစ်ပုံ၊ သစ်ပင်သုံးပုံတစ်ပုံ လောင်ကျွမ်းလေ၏။ စိမ်းသောအပင်အားလုံးလည်း လောင်ကျွမ်းလေ၏။
၈ ဒုတိယကောင်းကင်တမန်သည် တံပိုးမှုတ်လိုက်ရာ မီးလောင်နေသော တောင်ကြီးနှင့်တူသည့် အရာတစ်ခု ပင်လယ်ထဲသို့ ပစ်ချခံရ၏။ ထိုအခါ ပင်လယ်သုံးပုံတစ်ပုံသည် သွေးဖြစ်လေ၏။
၉ ပင်လယ်ထဲမှ သက်ရှိ*သတ္တဝါ သုံးပုံ တစ်ပုံလည်း သေကြ၏။ သင်္ဘော သုံးပုံတစ်ပုံလည်း ပျက်စီးကြ၏။
၁၀ တတိယကောင်းကင်တမန်သည် တံပိုးမှုတ်လိုက်ရာ မီးခွက်ပမာ ထွန်းတောက်သော ကြယ်ကြီးတစ်လုံး ကောင်းကင်မှကျလာ၍ မြစ်သုံးပုံတစ်ပုံနှင့် စမ်းရေများအပေါ်သို့ ကျလေ၏။
၁၁ ထိုကြယ်၏အမည်မှာ ဒေါနဖြစ်၏။ ရေသုံးပုံတစ်ပုံသည် ဒေါနအရည်ဖြစ်သွား၏။ ထိုရေ ခါးသောကြောင့် လူများစွာ သေကြ၏။
၁၂ စတုတ္ထ ကောင်းကင်တမန်သည် တံပိုးမှုတ်လိုက်ရာ နေ၏သုံးပုံတစ်ပုံ၊ လ၏သုံးပုံတစ်ပုံ၊ ကြယ်များ၏ သုံးပုံတစ်ပုံသည် ကပ်သင့် လေ၏။ သို့နှင့် နေ၊ လ၊ ကြယ်တို့၏ သုံးပုံတစ်ပုံသည် မှောင်မိုက်၍ နေ့၏သုံးပိုင်းတစ်ပိုင်းသည် အလင်းမရ၊ ညလည်း ထို့အတူဖြစ်လေ၏။
၁၃ ထိုအခါ လင်းယုန်တစ်ကောင်သည် ကောင်းကင်အလယ်၌ ပျံဝဲနေသည်ကို ငါမြင်၏။ ထိုလင်းယုန်က “ကောင်းကင်တမန်သုံးပါး မှုတ်တော့မည့် ကျန်သောတံပိုးသံများကြောင့် မြေကြီးပေါ် နေထိုင်သူတို့သည် အမင်္ဂလာရှိ၏၊ အမင်္ဂလာရှိ၏၊ အမင်္ဂလာရှိ၏” ဟုကျယ်သောအသံဖြင့် ပြောဆိုသည်ကို ငါကြား၏။
