မာကု ၁၆:၁-၂၀
၁၆ ဥပုသ်နေ့လွန်သော် မာဂဒလမာရိ၊ ယာကုပ်၏ မိခင်မာရိနှင့် ရှာလုံတို့သည် အလောင်းတော်ကိုသွားရောက် လိမ်းကျံရန် နံ့သာမျိုးကိုဝယ်ပြီးလျှင်၊
၂ သီတင်းပတ်တွင် ပထမနေ့ နံနက်စောစော နေထွက်သောအချိန်၌ သင်္ချိုင်းဂူသို့ သွားကြ၏။
၃ သူတို့က “သင်္ချိုင်းဂူဝမှ ကျောက်တုံးကို မည်သူလှိမ့်ပေးမည်နည်း” ဟု အချင်းချင်း ပြောဆိုကြ၏။
၄ သူတို့ကြည့်ရှုလျှင် အလွန်ကြီးသောကျောက်ဖြစ်သော်လည်း လှိမ့်ထားလျက်ရှိသည်ကို မြင်ကြ၏။
၅ သင်္ချိုင်းဂူထဲသို့ ဝင်သော် လုလင်တစ်ဦးသည် ဝတ်လုံဖြူကိုဝတ်ဆင်လျက် လက်ယာဘက်၌ ထိုင်နေသည်ကိုမြင်၍ အံ့သြမိန်းမောကြ၏။
၆ ထိုသူက “အံ့သြမိန်းမောခြင်း မရှိကြနှင့်။ သစ်တိုင်ပေါ်တွင် အသေခံတော်မူသော နာဇရက်မြို့သား ယေရှုကို သင်တို့ရှာနေကြောင်း ငါသိ၏။ ကိုယ်တော်သည် ထမြောက်တော်မူပြီဖြစ်၍ ဤနေရာ၌ မရှိ။ အလောင်းတော်ထားသော နေရာကို ကြည့်ကြလော့။
၇ ‘သင်တို့အား မိန့်တော်မူခဲ့သည့်အတိုင်း သင်တို့ထက်အလျင် ဂါလိလဲပြည်သို့ ကြွနှင့်တော်မူပြီ။ ထိုပြည်၌ ကိုယ်တော်ကို တွေ့ရလိမ့်မည်’ ဟု တပည့်တော်တို့နှင့် ပေတရုကို သွား၍ပြောကြလော့” ဟုမိန့်မှာ၏။
၈ သူတို့သည်လည်း တုန်လှုပ်ခြင်း၊ စိတ်လှုပ်ရှားခြင်းရှိလျက် သင်္ချိုင်းဂူမှ ထွက်၍ပြေးကြ၏။ ကြောက်ရွံ့သောကြောင့် မည်သူ့ကိုမျှ တစ်စုံတစ်ရာ မပြောကြ။
နိဂုံးတို
လက်ရေးစာမူဟောင်းအချို့နှင့် ဘာသာပြန်ကျမ်းအချို့တို့တွင် မာကု ၁၆:၈ ပြီးနောက် အောက်ပါနိဂုံးတိုကို တွေ့ရ၏။
သူတို့သည် မိန့်မှာခဲ့သမျှကို ပေတရုနှင့် အပေါင်းပါရှိသမျှတို့အား အတိုချုပ်ပြောကြားကြ၏။ ထို့ပြင် ယေရှုကိုယ်တော်တိုင်သည် တပည့်တော်တို့ကို စေလွှတ်၍ သန့်ရှင်းသော၊ မဖောက်ပြန်မပျက်စီးတတ်သော ထာဝရကယ်တင်ခြင်းသတင်းကို အရှေ့အရပ်မှ အနောက်အရပ်တိုင်အောင် ပျံနှံ့စေတော်မူ၏။
နိဂုံးရှည်
ဘုံရှေးဟောင်းလက်ရေးစာမူအချို့နှင့် ဘာသာပြန်ကျမ်းအချို့တို့တွင် အောက်ပါနိဂုံးရှည်ကို တွေ့ရသော်လည်း အာမေးနီးယန်း ဘာသာပြန်ကျမ်းတွင် မတွေ့ရချေ။
၉ ယေရှုသည် သီတင်းပတ်တွင် ပထမနေ့ နံနက်စောစောအချိန်၌ ထမြောက်ပြီးနောက် မာဂဒလမာရိအား ဦးစွာ ကိုယ်ကို ထင်ရှားပြတော်မူ၏။ ထိုမာရိထံမှ ဆိုးခုနစ်ကောင်ကို ကိုယ်တော်နှင်ထုတ်ပေးခဲ့ဖူး၏။
၁၀ မရိသည် သွား၍ တပည့်တော်များ ညည်းတွား ငိုကြွေးလျက်နေကြစဉ် သူတို့အား သတင်းပြောကြားလေ၏။
၁၁ ကိုယ်တော်သည် အသက်ရှင်ပြန်တော်မူကြောင်း၊ မာရိသည် ကိုယ်တော်အား မြင်ခဲ့ကြောင်းတို့ကို ထိုသူတို့သည်ကြားလျှင် မယုံကြ။
၁၂ ထို့နောက် တပည့်တော်နှစ်ပါးတို့သည် တောရွာသို့သွားနေကြစဉ် ကိုယ်တော်သည် အသွင်တစ်မျိုးဖြင့် ကိုယ်ကိုပြတော်မူ၏။
၁၃ ထိုသူတို့သည် ပြန်လာ၍ ကျန်သူတို့အား သတင်းပြောကြားကြ၏။ သို့သော် သူတို့ကိုလည်း မယုံကြ။
၁၄ ထို့နောက် ကိုယ်တော်သည် တစ်ဆယ့်တစ်ပါးသောသူတို့ စားပွဲ၌လျောင်းကြစဉ် ထင်ရှားတော်မူ၏။ သေခြင်းမှ ထမြောက်တော်မူပြီးနောက် ကိုယ်တော်ကို မြင်သောသူတို့၏စကားကို မယုံသောကြောင့် သူတို့၏ယုံကြည်ခြင်းကင်းမဲ့မှု၊ စိတ်နှလုံးခိုင်မာမှုတို့ကို ပြစ်တင်ဆိုးဆုံးမတော်မူပြီး၊
၁၅ သူတို့အား “သင်တို့သည် တစ်လောကလုံးသို့သွား၍ လူအပေါင်းတို့အား သတင်းကောင်း ဟောပြောကြလော့။
၁၆ ယုံကြည်၍ နှစ်ခြင်းခံသောသူသည် ကယ်တင်ခံရလိမ့်မည်။ မယုံကြည်သောသူမူကား အပြစ်စီရင်ခံရလိမ့်မည်။
၁၇ ထို့ပြင် ယုံကြည်သောသူတို့ပြမည့် နိမိတ်လက္ခဏာများကား၊ ငါ၏နာမကိုအမှီပြု၍ နတ်ဆိုးတို့ကို နှင်ထုတ်ကြလိမ့်မည်။ ဘာသာစကားအမျိုးမျိုးတို့ကို ပြောကြလိမ့်မည်။
၁၈ မြွေတို့ကို ဖမ်းကိုင်ကြလိမ့်မည်။ သေစေတတ်သောအဆိပ်ကို သောက်မိလျှင်လည်း ဘေးကင်းကြလိမ့်မည်။ မကျန်းမာသူတို့အပေါ်မှာ လက်ကိုတင်၍ ကျန်းမာစေကြလိမ့်မည်” ဟု မိန့်တော်မူ၏။
၁၉ သခင်ယေရှုသည် ထိုသို့မိန့်တော်မူပြီးနောက် ကောင်းကင်ဘုံသို့ ချီဆောင်ခံရ၍ ဘုရားသခင်၏ လက်ယာတော်ဘက်၌ ထိုင်နေတော်မူ၏။
၂၀ တပည့်တော်တို့သည်လည်း ထွက်သွား၍ ခပ်သိမ်းသောအရပ်၌ ဟောပြောကြ၏။ သခင်သည်လည်း သူတို့နှင့်အတူ လုပ်ဆောင်လျက် သူတို့ပြသော နိမိတ်လက္ခဏာများအားဖြင့် သတင်းတရားကို တည်စေတော်မူ၏။
