၂ ကောရိန္သု ၁၂:၁-၂၁
၁၂ ငါသည် ဝါကြွားရဦးမည်။ ဝါကြွားခြင်းသည် အကျိုးမရှိသော်လည်း သခင်၏ ရူပါရုံများနှင့် ဗျာဒိတ်တော်များအကြောင်းကို ငါပြောရမည်။
၂ ခရစ်တော်နှင့် တစည်းတလုံးတည်း ရှိသူတစ်ဦးသည် လွန်ခဲ့သောတစ်ဆယ့်လေးနှစ်က တတိယကောင်းကင်သို့တိုင်အောင် ရုတ်တရက် ဆောင်ယူခံရကြောင်းကို ငါသိ၏။ ခန္ဓာကိုယ်ပါသည် မပါသည်ကို ငါမသိ။ ဘုရားသခင် သိတော်မူ၏။
၃ ထိုသူကို ငါသိ၏။ ခန္ဓာကိုယ်ပါသည် မပါသည်ကို ငါမသိ။ ဘုရားသခင် သိတော်မူ၏။
၄ သူသည် ပရဒိသုသို့ ဆောင်ယူခံရ၍ လူတစ်ဦး မပြောသင့်၊ မပြောအပ်သော စကားများကို ကြားခဲ့ရ၏။
၅ ထိုသူအတွက် ငါဝါကြွားမည်။ ငါ့အတွက်မူကား ငါ၏အားနည်းချက်များမှလွဲ၍ အဘယ်အရာကိုမျှ ဝါကြွားမည်မဟုတ်။
၆ ငါသည် ဝါကြွားလိုလျှင်ပင် မိုက်မဲသူဖြစ်မည်မဟုတ်။ အကြောင်းမူကား ငါသည် ဟုတ်မှန်စွာ ပြောမည်။ ငါ့ကိုမြင်ရကြားရသည်ထက် ငါ့ကိုမည်သူမျှပို၍ အထင်မကြီးစေရန် ဝါကြွားခြင်းကို ငါရှောင်၏။
၇ ဗျာဒိတ်တော်ကို လွန်ကဲစွာ ရရှိသောကြောင့် ငါ့ကိုအထင်မကြီးစေလို။
ထို့ကြောင့် ငါသည်အလွန်ထောင်လွှားသော စိတ်မဝင်မိစေရန် ကိုယ်၌စူးသောဆူးကို ပေးတော်မူ၏။ ငါသည် အကြွားမလွန်မိစေရန် စာတန်၏တမန်ဖြစ်သော ထိုဆူးသည် ငါ့ကိုစူးရှနာကျင်စေလျက်ရှိ၏။
၈ ထိုဆူးကို ဖယ်ရှားပေးရန် သခင်ထံ သုံးကြိမ်တိုင်တိုင် ငါအသနားခံ၏။
၉ ကိုယ်တော်က “ငါ၏မဟာကရုဏာသည် သင့်အတွက် လုံလောက်ပြီ။ အကြောင်းမူကား သင်အားနည်းသောအခါ ငါ၏တန်ခိုးသည် အပြည့်အဝ ထင်ရှားလာ၏” ဟုမိန့်တော်မူ၏။ သို့ဖြစ်၍ ခရစ်တော်၏တန်ခိုးသည် တဲကဲ့သို့ ငါ့အပေါ် အုပ်မိုးမည့်အကြောင်း ငါ၏အားနည်းချက်များနှင့် ပတ်သက်၍ အလွန်ဝမ်းမြောက်စွာ သာ၍ဝါကြွားမည်။
၁၀ သို့ဖြစ်၍ ခရစ်တော်အတွက် ခံရသော အားနည်းခြင်း၊ စော်ကားခြင်း၊ ချို့တဲ့ခြင်း၊ နှိပ်စက်ညှဉ်းပန်းခြင်း၊ ကျပ်တည်းခက်ခဲခြင်းတို့ကို ငါကျေနပ်စွာ ခံယူပါ၏။ အကြောင်းမူကား ငါသည် အားနည်းသောအခါ တန်ခိုးနှင့်ပြည့်စုံလျက်ရှိ၏။
၁၁ ငါသည် မိုက်မဲသူ ဖြစ်လေပြီ။ သင်တို့ကြောင့် ထိုသို့ဖြစ်ရ၏။ အကြောင်းမူကား ငါသည် သင်တို့၏ချီးမွမ်းခြင်းကို ခံသင့်၏။ ငါသည် ဘာမျှမဟုတ်သည့်တိုင် သင်တို့၏ ထူးချွန်တမန်တော်ကြီးများထက်မူ အလျှင်းညံ့သည်မဟုတ်။
၁၂ ငါတမန်တော်ဖြစ်သည့် အထောက်အထားကိုခံနိုင်ရည်၊ အတိတ်နိမိတ်နှင့်လက္ခဏာများ၊ တန်ခိုးပါသော အလုပ်များအားဖြင့် သင်တို့ကိုယ်တိုင် တွေ့မြင်ခဲ့ကြပြီ။
၁၃ သင်တို့သည် အခြားအသင်းတော်တို့ထက် အဘယ်နည်းဖြင့် အခွင့်အရေး လျော့နည်းသနည်း။ ငါကိုယ်တိုင် သင်တို့အတွက် ဝန်ထုပ်ဝန်ပိုး မဖြစ်စေခြင်းသာရှိမည်။ ထိုအမှားအတွက် ငါ့ကို ကျေးဇူးပြု၍ ခွင့်လွှတ်ကြပါ။
၁၄ ငါသည် သင်တို့ထံ လာရန်အသင့်ရှိသည်မှာ ဤတစ်ကြိမ်ဆိုလျှင် တတိယအကြိမ်ရှိပြီ။ သို့တိုင် သင်တို့၌ ဝန်ထုပ်ဝန်ပိုး ဖြစ်စေမည်မဟုတ်။ အကြောင်းမူကား ငါသည် သင်တို့၏ပိုင်ဆိုင်ရာများကို အလိုမရှိ။ သင်တို့ကိုသာ အလိုရှိ၏။ သားသမီးတို့သည် မိဘတို့အတွက် ဥစ္စာကို ဆည်းပူးရသည်မဟုတ်၊ မိဘတို့သည် သားသမီးတို့အတွက် ဆည်းပူးရ၏။
၁၅ ငါမူကား သင်တို့*အတွက် ရှိသမျှကိုသာမက ကိုယ်ကိုပင် အလွန်ဝမ်းမြောက်စွာ ပေးမည်။ ငါသည် သင်တို့ကို များစွာချစ်သည်ဆိုလျှင် သင်တို့သည် ငါ့ကို အနည်းငယ်သာ ချစ်ရသလော။
၁၆ မည်သို့ပင်ဖြစ်စေကာမူ ငါသည် သင်တို့ကို ဝန်မလေးစေပါ။ သို့တိုင် သင်တို့က ငါ့ကို “ဉာဏ်နီဉာဏ်နက်များ” သည်၊ သင်တို့ကို “ပရိယာယ်အားဖြင့်” ကျော့မိစေသည်ဟု ဆိုကြ၏။
၁၇ ငါသည် သင်တို့ထံ စေလွှတ်လိုက်သောသူ တစ်ဦးဦးအားဖြင့် သင်တို့ထံမှ အခွင့်အရေး ယူဖူးသလော။
၁၈ သင်တို့ထံသွားရန် တိတုကို တိုက်တွန်းပြီးလျှင် သူနှင့်အတူ ညီအစ်ကိုတစ်ဦးကို ငါစေလွှတ်လိုက်ပါ၏။ တိတုသည် သင်တို့ထံမှ အခွင့်အရေး မယူဘဲ နေခဲ့သည် မဟုတ်လော။ ငါတို့သည် တူညီသော စိတ်သဘောထားကို တင်ပြကြသည် မဟုတ်လော။ တစ်လမ်းတည်း လျှောက်ကြသည် မဟုတ်လော။
၁၉ ငါတို့သည် ချေပပြောဆိုနေသည်ဟု သင်တို့ထင်နေကြသလော။ ငါတို့သည် ခရစ်ယာန်များအဖြစ် ဘုရားသခင်၏ရှေ့တော်တွင် ပြောဆိုနေခြင်းဖြစ်၏။ သို့သော် ချစ်ရသောသူတို့၊ ငါတို့ပြုသမျှသည် သင်တို့ကို တည်ဆောက်ပေးရန်ဖြစ်၏။
၂၀ ငါရောက်လာသည့်အခါ သင်တို့သည် ငါမျှော်လင့်ထားသည့် အတိုင်းမဟုတ်၊ ငါသည်လည်း သင်တို့မျှော်လင့်ထားသည့်အတိုင်း မဟုတ်ဘဲ သင်တို့တွင် ခိုက်ရန်ဖြစ်ခြင်း၊ မနာလိုခြင်း၊ အမျက်ထွက်ခြင်း၊ ဂုဏ်ပြိုင်ခြင်း၊ အပုပ်ချခြင်း၊ တီးတိုးအတင်းပြောခြင်း၊ ထောင်လွှားခြင်း၊ ရုန်းရင်းခတ်ဖြစ်ခြင်းတို့ မြင်တွေ့ရမည်ကို ငါစိုးရိမ်၏။
၂၁ နောက်တစ်ဖန် ငါရောက်လာသောအခါ ငါ၏ ဘုရားသခင်သည် သင်တို့တွင် ငါ့ကို အရှက်ရစေမည်ကိုလည်းကောင်း၊ ယခင်က အပြစ်ပြု၍ ယခုလည်း မသန့်ရှင်းခြင်း*၊ မတရားမေထုန်ပြုခြင်း*၊ အကျင့်ပျက်ခြင်း*တို့ကို ပြုကျင့်နေပြီး နောင်တမရသော ထိုသူအများတို့ကြောင့် ငါဝမ်းနည်းရမည်ကိုလည်းကောင်း စိုးရိမ်၏။
အောက်ခြေမှတ်ချက်များ
^ ဂရိ၊ “ပစီးခီး။” နောက်ဆက်တွဲ ၇ ရှု။
^ သို့မဟုတ် “ညစ်ညမ်းခြင်း၊ ယုတ်ညံ့ခြင်း၊ တဏှာရာဂအားကြီးခြင်း။”
^ နောက်ဆက်တွဲ ၄ ရှု။
^ သို့မဟုတ် “လိင်ပိုင်းတွင်စည်းကမ်းမရှိခြင်း၊ လိင်ပိုင်းကိုယ်ကျင့်သိက္ခာမဲ့ခြင်း၊ အရှက်မရှိခြင်း။”
