၂ တိမောသေ ၁:၁-၁၈
၁ ဘုရားသခင့်အလိုတော်နှင့်အညီ၊ ခရစ်တော်ယေရှုနှင့် တစည်းတလုံးတည်း ရှိသောသူတို့ ရရှိမည့်အသက်တာနှင့်ဆိုင်သော ကတိတော်နှင့်အညီ ခရစ်တော်ယေရှု၏ တမန်တော်ဖြစ်သော ငါပေါလုသည်၊
၂ ချစ်သား တိမောသေထံ စာရေးလိုက်ပါ၏။
အဖဘုရားသခင်နှင့် ငါတို့သခင် ခရစ်တော်ယေရှုတို့ထံမှ မဟာကရုဏာတော်၊ သနားကြင်နာခြင်း၊ ငြိမ်သက်ခြင်း ရှိပါစေ။
၃ ငါသည် နေ့ညမပြတ် တိုးလျှိုးအသနားခံ ဆုတောင်းသည့်အခါတိုင်း သင့်ကို အစဉ်အောက်မေ့သောကြောင့် ဘုရားသခင်ကို ကျေးဇူးတင်ပါ၏။ ငါသည် ထိုဘုရားသခင်ကို ဘိုးဘေးတို့ ကိုးကွယ်ခဲ့သည့်နည်းတူ ကြည်လင်သော ဩတ္တပ္ပစိတ်နှင့်တကွ ကိုးကွယ်ပါ၏။
၄ သင်၏မျက်ရည်ကို ငါသတိရသည့်အခါ ဝမ်းမြောက်ခြင်းနှင့် ပြည့်စုံနိုင်မည်အကြောင်း သင့်ကို တွေ့မြင်ချင်လှပါ၏။
၅ အကြောင်းမူကား သင်၌ရှိသော ဟန်ဆောင်မှုကင်းသည့် ယုံကြည်ခြင်းကို ငါသတိရ၏။ ထိုယုံကြည်ခြင်းသည် သင်၏အဘွားလောဣနှင့် အမိဥနိတ်တို့၌ ဦးစွာရှိခဲ့၍ သင်၌လည်း ရှိကြောင်း ငါယုံကြည်စိတ်ချ၏။
၆ ထိုအကြောင်းကြောင့် သင့်အပေါ် ငါလက်တင်စဉ်က သင်ရရှိသော ဘုရားသခင့်ဆုကျေးဇူးတော်ကို ရှင်သန်နေစေရန် ငါသတိပေး၏။
၇ အကြောင်းမူကား ဘုရားသခင်သည် ငါတို့အား ကြောက်တတ်သည့်စိတ်ကို ပေးတော်မူသည်မဟုတ်။ တန်ခိုးပါသော၊ ချစ်တတ်သော၊ သမာသတိရှိသောစိတ်ကို ပေးတော်မူ၏။
၈ ထို့ကြောင့် ငါတို့သခင်အကြောင်း သက်သေခံရန်သော်လည်းကောင်း၊ ထိုသခင်ကို ယုံကြည်ခြင်းကြောင့် အကျဉ်းချခံရသူ ငါ့အတွက်သော်လည်းကောင်း ရှက်ကြောက်ခြင်း မရှိနှင့်။ ဘုရားသခင်၏ တန်ခိုးတော်အားဖြင့် သတင်းကောင်းအတွက် ဆင်းရဲဒုက္ခကို ဝေမျှခံစားလော့။
၉ ကိုယ်တော်သည် ငါတို့၏ အကျင့်ကြောင့်မဟုတ်ဘဲ မိမိ၏အလိုတော်နှင့် မဟာကရုဏာတော်ကြောင့် ငါတို့ကို ကယ်တင်၍ သန့်ရှင်းသော ခေါ်တော်မူခြင်းဖြင့် ခေါ်တော်မူ၏။ ရှေးကာလအဆက်ဆက်ကတည်းက ထိုမဟာကရုဏာတော်ကို ခရစ်တော်ယေရှုနှင့် တစည်းတလုံးတည်းရှိသော ငါတို့အား ပေးတော်မူ၏။
၁၀ ယခုမူကား ထိုမဟာကရုဏာတော်သည် ငါတို့၏ကယ်တင်ရှင် ခရစ်တော်ယေရှု ထင်ရှားတော်မူခြင်းအားဖြင့် ပေါ်လွင်လာ၏။ ထိုသခင်သည် သေခြင်းတရားကို ဖယ်ရှား၍ သတင်းကောင်းအားဖြင့် အသက်ရှင်ခြင်းနှင့် မပုပ်ပျက်နိုင်သောအဖြစ်တို့ကို နားလည်လာစေတော်မူ၏။
၁၁ ထိုသတင်းကောင်းကို ပြောကြားရန် ဟောပြောသူအဖြစ်၊ တမန်တော်အဖြစ်၊ ဆရာအဖြစ် ငါ့ကို ခန့်ထားတော်မူပြီ။
၁၂ ဤအကြောင်းကြောင့် ငါသည် ထိုဆင်းရဲဒုက္ခများကို ခံရသော်လည်း ရှက်ကြောက်ခြင်းမရှိ။ အကြောင်းမူကား ငါယုံကြည်သောအရှင်ကို ငါသိ၏။ ကိုယ်တော့်ထံ ငါအပ်ထားသောအရာကို ထိုနေ့ရက်တိုင် ကိုယ်တော် စောင့်ရှောက်နိုင်ကြောင်းကိုလည်း ငါယုံကြည်စိတ်ချ၏။
၁၃ သင်သည် ငါ့ထံမှ ကြားနာခဲ့သည့် အကျိုးဖြစ်ထွန်းသော တရားစကားတော်ပုံစံကို ခရစ်တော်ယေရှု၌ရှိသော ယုံကြည်ခြင်း၊ ချစ်ခြင်းနှင့်တကွ ဆုပ်ကိုင်ထားလော့။
၁၄ သင့်အား ပေးအပ်ထားသည့် အလွန်အဖိုးတန်သောအရာကို ငါတို့တွင် ကိန်းဝပ်နေသည့် ဘုရားသခင့် သန့်ရှင်းသောစွမ်းအားတော်*ဖြင့် ထိန်းသိမ်းစောင့်ရှောက်လော့။
၁၅ အာရှနယ်*၌ရှိသော သူတို့သည် ငါ့ကို ကျောခိုင်းသွားကြကြောင်း သင်သိပါ၏။ ထိုသူတို့တွင် ဖုဂေလုနှင့် ဟေရမောဂင်တို့ ပါဝင်ကြ၏။
၁၆ သခင်သည် ဩနေသိဖော်၏အိမ်ထောင်စုကို သနားကြင်နာမှု ပြတော်မူပါစေ။ အကြောင်းမူကား သူသည် ငါ့ကို အကြိမ်ကြိမ် အားတက်စေခဲ့ပြီ။ သူသည် ငါ၏သံကြိုးကြောင့် ရှက်ကြောက်ခြင်း မရှိဘဲ၊
၁၇ ရောမမြို့သို့ ရောက်သည့်အခါတိုင်း ငါ့ကို မတွေ့မချင်း ရှာ၏။
၁၈ အရှင်ယေဟောဝါ*ဘုရားသည် ထိုနေ့ရက်၌ သူ့ကို သနားကြင်နာမှု ပြတော်မူပါစေ။ ဧဖက်မြို့တွင် သူပြုခဲ့သမျှကို သင်ကောင်းစွာသိပါ၏။
အောက်ခြေမှတ်ချက်များ
^ ဂရိ၊ “နျူမာ။” နောက်ဆက်တွဲ ၈ ရှု။
^ ဤဘာသာပြန်ကျမ်းတွင် ‘ယေဟောဝါ’ ဟူသည့် ဘုရားသခင်၏နာမတော် ၂၃၇ ကြိမ်ပါရှိသည့်အနက်မှ တစ်ကြိမ်အပါအဝင်ဖြစ်သည်။ နောက်ဆက်တွဲ ၂ ရှု။
