တရားသူကြီး ၄:၁-၂၄
၄ ဧဟုဒ ကွယ်လွန်ပြီးနောက် အစ္စရေးတွေက ယေဟောဝါရှေ့မှာ မကောင်းတာတွေ လုပ်ကြပြန်တယ်။+
၂ ဒါကြောင့် ယေဟောဝါက သူတို့ကို ဟာဇော်မြို့မှာ နန်းစံတဲ့ ခါနန်ဘုရင် ယာဘိန်လက်ထဲ ရောင်းလိုက်တယ်။+ သူ့ရဲ့ဗိုလ်ချုပ်က ဟာရောရှက်ဂေါအိမ်အရပ်မှာ နေထိုင်တဲ့ သိသရဖြစ်တယ်။+
၃ ယာဘိန်မှာ သံဓားကောက် တပ်ထားတဲ့ စစ်မြင်းရထား ၉၀၀ ရှိတယ်။+ အစ္စရေးတွေကို အနှစ် ၂၀ လုံး ရက်ရက်စက်စက် ဖိနှိပ်တဲ့အတွက်+ ယေဟောဝါဆီ အစ္စရေးတွေ အော်ဟစ်အကူအညီတောင်းကြတယ်။+
၄ အဲဒီအချိန်မှာ လပိဒုတ်ရဲ့ဇနီး ပရောဖက်မ+ ဒေဗောရက အစ္စရေးတွေကို စီရင်ဆုံးဖြတ်ပေးတယ်။
၅ ဧဖရိမ်တောင်တန်းဒေသ ရာမမြို့နဲ့+ ဗေသလမြို့ကြား+ ဒေဗောရစွန်ပလွံပင်အောက်မှာ သူထိုင်လေ့ရှိတယ်။ အစ္စရေးတွေက ဘုရားသခင်ရဲ့ အဆုံးအဖြတ်ကို သိရဖို့ သူ့ဆီသွားကြတယ်။
၆ ဒေဗောရက ကေဒေရှနဿလိမြို့မှာနေတဲ့+ အဘိနောင်ရဲ့သား ဗာရက်ကို+ လူလွှတ်ပြီး ခေါ်လိုက်တယ်။ ပြီးတော့ “အစ္စရေးတို့ရဲ့ဘုရား ယေဟောဝါမိန့်မှာတယ်– ‘နဿလိအနွယ်နဲ့ ဇာဗုလုန်အနွယ်ထဲက လူ ၁၀,၀၀၀ ကိုခေါ်ပြီး တာဗော်တောင်ကို ချီတက်ပါ။
၇ ယာဘိန်မင်းရဲ့ ဗိုလ်ချုပ် သိသရနဲ့ စစ်မြင်းရထားတွေ၊ စစ်သည်တွေကို ကိရှုန်သဲချောင်းဆီ+ ငါခေါ်လာပြီး မင်းလက်ထဲ အပ်မယ်’”+ လို့ပြောတယ်။
၈ ဗာရက်က ဒေဗောရကို “အစ်မ လိုက်မယ်ဆိုရင် ကျွန်တော်သွားပါ့မယ်။ မလိုက်ရင်တော့ မသွားဘူး” လို့ပြောတော့၊
၉ ဒေဗောရက “ကောင်းပြီ၊ လိုက်ခဲ့မယ်။ ဒါပေမဲ့ ဒီစစ်ဆင်ရေးမှာ ဗာရက် ဂုဏ်ပြုခံရမှာ မဟုတ်ဘူး။ ယေဟောဝါဘုရားက သိသရကို အမျိုးသမီးတစ်ယောက်လက်ထဲ အပ်လိမ့်မယ်”+ လို့ပြောပြီး ဗာရက်နဲ့အတူ ကေဒေရှမြို့ကို+ လိုက်သွားတယ်။
၁၀ ဗာရက်လည်း ဇာဗုလုန်အနွယ်နဲ့ နဿလိအနွယ်ကို+ ကေဒေရှမြို့မှာ စုဝေးခိုင်းတဲ့အခါ လူ ၁၀,၀၀၀ က သူ့နောက်ကိုလိုက်ကြတယ်။ ဒေဗောရလည်း ပါတယ်။
၁၁ ကေနိတ်အမျိုးသား ဟေဗာက မောရှေယောက္ခမ+ ဟောဗတ်ရဲ့ သားမြေးတွေဖြစ်တဲ့ ကေနိတ်အမျိုးသားတွေဆီကနေ+ ခွဲထွက်သွားပြီး ကေဒေရှမြို့၊ ဇာနနိမ်အရပ်မှာရှိတဲ့ အပင်ကြီးနားမှာ တဲထိုးနေထိုင်တယ်။
၁၂ တာဗော်တောင်ပေါ် အဘိနောင်ရဲ့သား ဗာရက် တက်သွားပြီဆိုတဲ့သတင်း သိသရဆီ ရောက်လာတယ်။+
၁၃ သိသရလည်း ချက်ချင်းပဲ သံဓားကောက်တပ်ထားတဲ့ စစ်မြင်းရထား ၉၀၀ နဲ့ စစ်သည်အားလုံးကို စုလိုက်ပြီး ဟာရောရှက်ဂေါအိမ်အရပ်ကနေ ကိရှုန်သဲချောင်းကို ထွက်သွားတယ်။+
၁၄ အဲဒီအခါ ဒေဗောရက “ကဲ၊ သွားတော့။ ဒီနေ့၊ ယေဟောဝါဘုရားက သိသရကို ရှင့်လက်ထဲ အပ်လိမ့်မယ်။ ရှေ့ကနေ ယေဟောဝါဘုရား သွားနေပြီ” လို့ပြောတော့ ဗာရက်လည်း ပါလာတဲ့လူ ၁၀,၀၀၀ နဲ့အတူ တာဗော်တောင်ကနေ ဆင်းသွားတယ်။
၁၅ ယေဟောဝါက သိသရရဲ့ စစ်တပ်တစ်တပ်လုံးနဲ့ စစ်မြင်းရထားတွေကို ဗာရက်ရဲ့ ဓားသွားအောက်မှာ ဖရိုဖရဲဖြစ်စေတယ်။+ နောက်ဆုံး၊ သိသရဟာ မြင်းရထားပေါ်ကဆင်းပြီး ခြေကျင်ထွက်ပြေးရတော့တယ်။
၁၆ ဗာရက်လည်း ဟာရောရှက်ဂေါအိမ်အရပ်ကို ရောက်တဲ့အထိ စစ်မြင်းရထားတွေ၊ စစ်သည်တွေကို လိုက်တိုက်တယ်။ သိသရရဲ့စစ်သည်တွေ တစ်ယောက်မကျန် ကျဆုံးကုန်တယ်။+
၁၇ သိသရကတော့ ကေနိတ်အမျိုးသား ဟေဗာရဲ့+ ဇနီး ယေလရဲ့တဲဆီ+ ခြေကျင်ထွက်ပြေးသွားတယ်။ ဟာဇော်ဘုရင် ယာဘိန်နဲ့+ ကေနိတ်အမျိုးသား ဟေဗာရဲ့အမျိုးတွေဟာ သင့်သင့်မြတ်မြတ် ရှိကြလို့ပဲ။
၁၈ ယေလက သိသရကို ထွက်ကြိုပြီး “သခင်၊ တဲထဲဝင်ပါ။ မကြောက်ပါနဲ့” လို့ပြောတယ်။ သိသရ တဲထဲဝင်သွားတော့ ယေလက သူ့ကို စောင်ခြုံပေးတယ်။
၁၉ သူက “ရေဆာလိုက်တာ။ ရေနည်းနည်း တိုက်ပါဦး” လို့ပြောတဲ့အခါ ယေလလည်း သားရေနို့ဘူးကိုဖွင့်ပြီး တိုက်တယ်။+ ပြီးတော့ စောင်ပြန်ခြုံပေးလိုက်တယ်။
၂၀ သူက “တဲဝမှာပဲ ရပ်စောင့်နေပါ။ ‘တစ်ယောက်ယောက် လာသေးလား’ လို့မေးခဲ့ရင် ‘မလာဘူး’ လို့ပြောလိုက်” ဆိုပြီး ယေလကို မှာတယ်။
၂၁ သိသရ မောမောပန်းပန်းနဲ့ အိပ်မောကျသွားတဲ့အခါ ဟေဗာရဲ့ဇနီး ယေလက တဲငုတ်တိုင်တစ်ချောင်းနဲ့ တူကို ယူပြီး အနားကို အသာလေး ချဉ်းကပ်သွားတယ်။ ပြီးတော့ တဲငုတ်တိုင်ကို နားထင်ကနေ မြေကြီးထဲ စိုက်ဝင်တဲ့အထိ ရိုက်သွင်းလိုက်လို့ သိသရ သေသွားတယ်။+
၂၂ အဲဒီအချိန်မှာ သိသရကို လိုက်ရှာနေတဲ့ ဗာရက်ရောက်လာတော့ ယေလက ထွက်ကြိုပြီး “လာပါ။ ရှင်လိုက်ရှာနေတဲ့လူကို ကျွန်မပြမယ်” လို့ပြောတယ်။ ဗာရက်က ယေလနဲ့အတူ တဲထဲဝင်ကြည့်တဲ့အခါ နားထင်မှာ တဲငုတ်တိုင်စိုက်ပြီး သေနေတဲ့ သိသရကို တွေ့လိုက်ရတယ်။
၂၃ ဒီလိုနဲ့ အဲဒီနေ့မှာ ဘုရားသခင်က ခါနန်ဘုရင် ယာဘိန်ကို အစ္စရေးတွေလက်ထဲ ရှုံးနိမ့်စေတယ်။+
၂၄ အစ္စရေးတွေ ပြင်းပြင်းထန်ထန် တိုက်ခိုက်တဲ့အတွက် နောက်ဆုံးမှာ ခါနန်ဘုရင်+ ယာဘိန် ကျဆုံးသွားတယ်။+
