ယောဘ ၁၂:၁-၂၅
၁၂ ယောဘ ပြန်ပြောတာက–
၂ “သိပ်ဟုတ်တာပေါ့။ ခင်ဗျားတို့ပဲ သိတယ်၊ တတ်တယ်။
ခင်ဗျားတို့ သေတဲ့အခါ ဉာဏ်ပညာလည်း လိုက်သေမှာပဲ။
၃ ကျုပ်လည်း သိတာပေါ့။
ခင်ဗျားတို့ထက် မညံ့ပါဘူး။
ဒါတွေကို မသိတဲ့လူ ရှိလို့လား။
၄ ဘုရားသခင်ဆီက အဖြေရဖို့ အကူအညီတောင်းမိလို့+ကျုပ်ကို မိတ်ဆွေတွေ လှောင်ကြတယ်။+
ဖြောင့်မတ်ပြီး အပြစ်ကင်းတဲ့သူဟာ လှောင်ပြောင်စရာ ဖြစ်ရတာပဲ။
၅ အပူအပင်ကင်းသူက ဘေးဆိုးကို မမှုဘူး။
ခြေမခိုင်သူတွေပဲ ဘေးဆိုးကြုံရတယ်လို့ ထင်တတ်တယ်။
၆ ဓားပြတွေရဲ့တဲက အေးချမ်းနေတယ်။+
ဘုရားသခင်ကို အမျက်ထွက်အောင် လုပ်သူတွေက
ရုပ်တုပိုင်ဆိုင်ထားသူတွေလို ဘေးကင်းလုံခြုံနေတယ်။+
၇ ဒါပေမဲ့ တိရစ္ဆာန်တွေကို မေးကြည့်လိုက်ပါ။ သူတို့ သွန်သင်ပေးလိမ့်မယ်။
မိုးကောင်းကင်ငှက်တွေကို မေးကြည့်ပါ။ သူတို့ ပြောပြလိမ့်မယ်။
၈ ဒါမှမဟုတ် ကမ္ဘာမြေအကြောင်း စဉ်းစားကြည့်လိုက်ပါ။* ခင်ဗျားတို့ကို သွန်သင်ပေးလိမ့်မယ်။
ပင်လယ်ငါးတွေလည်း ခင်ဗျားတို့ကို ပြောပြလိမ့်မယ်။
၉ သူတို့ကို ယေဟောဝါ ဖန်ဆင်းထားတယ်ဆိုတာသူတို့ မသိဘဲနေပါ့မလား။
၁၀ သက်ရှိတိုင်းရဲ့ အသက်နဲ့ လူတိုင်းရဲ့ အသက်စွမ်းအားဟာ
ဘုရားလက်ထဲမှာ ရှိတယ်။+
၁၁ လျှာက အစာကို မြည်းတတ်သလိုနားကလည်း စကားတွေကို စစ်ဆေးတတ်တယ် မဟုတ်လား။+
၁၂ အသက်ကြီးသူဆီမှာ ဉာဏ်ပညာရှိပြီး+အသက်ရှည်သူဆီမှာ သိနားလည်မှုရှိတယ် မဟုတ်လား။
၁၃ ဘုရားဆီမှာ ဉာဏ်ပညာနဲ့ အစွမ်းခွန်အားရှိတယ်။+
အကြံဉာဏ်နဲ့ သိနားလည်မှုလည်း ရှိတယ်။+
၁၄ ဘုရားဖြိုဖျက်ထားတာကို ပြန်တည်ဆောက်လို့ မရနိုင်ဘူး။+
ဘုရားပိတ်ထားတာကို ဘယ်သူမှ ပြန်မဖွင့်နိုင်ဘူး။
၁၅ ဘုရားက ရေကို မလွှတ်ပေးတဲ့အခါ မြေကြီး ခြောက်သွေ့သွားတယ်။+
ပြန်လွှတ်ပေးတဲ့အခါ ရေလွှမ်းမိုးသွားတယ်။+
၁၆ ဘုရားဆီမှာ ခွန်အားနဲ့ လက်တွေ့ကျဉာဏ်ပညာ ရှိတယ်။+
လမ်းလွဲသူရော လမ်းလွဲအောင်လုပ်တဲ့သူပါ ဘုရားလက်ထဲမှာ ရှိတယ်။
၁၇ ဘုရားက မှူးမတ်တွေကို ခြေဗလာနဲ့ သွားလာစေတယ်။
တရားသူကြီးတွေကို ရူးသွပ်စေတယ်။+
၁၈ ဘုရင်တွေ ချည်ထားတဲ့ကြိုးကို ဖြေပေးတယ်။+
ဘုရင်တွေကို ခါးစည်းနဲ့ ချည်နှောင်တယ်။
၁၉ ပုရောဟိတ်တွေကို ခြေဗလာနဲ့ လျှောက်စေတယ်။+
တန်ခိုးအာဏာ တည်မြဲသူတွေကို ကျရှုံးစေတယ်။+
၂၀ ဘုရားက ယုံကြည်ရတဲ့ အတိုင်ပင်ခံတွေကို နှုတ်ဆိတ်စေတယ်။
အသက်ကြီးသူတွေရဲ့ အသိတရားကို နုတ်ယူပစ်တယ်။
၂၁ ဂုဏ်အသရေရှိသူတွေကို အရှက်ခွဲတယ်။+
အားကြီးသူတွေကို အားလျော့စေတယ်။
၂၂ မှောင်မိုက်မှာရှိတဲ့ နက်နဲရာတွေကို ဖော်ထုတ်တယ်။+
အမှောင်ထုကို အလင်းထဲ ခေါ်ထုတ်လာတယ်။
၂၃ ဘုရားက လူမျိုးတွေကို အင်အားကြီးမားစေပြီးနောက် ဖျက်ဆီးပစ်တယ်။
တိုးများစေပြီးနောက် သုံ့ပန်းဘဝ ရောက်စေတယ်။
၂၄ ခေါင်းဆောင်တွေရဲ့ သိနားလည်မှုကို နုတ်ယူတယ်။
လမ်းမရှိတဲ့ ကန္တာရမှာ လှည့်လည်သွားလာစေတယ်။+
၂၅ သူတို့က အလင်းမရှိတဲ့မှောင်မိုက်မှာ စမ်းတဝါးဝါး သွားလာနေရတယ်။+
အရက်မူးနေသူလို ဒယိမ်းဒယိုင် ဖြစ်စေတယ်။+
အောက်ခြေမှတ်ချက်များ
^ “ပြောကြည့်လိုက်ပါ” လည်းဖြစ်နိုင်။
